А якія яшчэ помнікі барока могуць нас здзівіць у будучыні? Што калі я вам скажу, што ні «белы лебедзь над Дзвіною» — Сафія, ні праваслаўны архікафедральны сабор у Мінску не былі белымі? Прапаную варыянты размалёвак, як могуць выглядаць гэтыя храмы ў будучыні.

⚠️ Дадзеныя размалёўкі грунтуюцца на колеравых рашэннях некаторых адрэстаўраваных барочных храмаў у Літве і Польшчы і не з'яўляюцца дакладнымі для помнікаў. Што тычыцца Сафіі, то ў час рэстаўрацыі яе фасады былі даследаваны, але колер не быў адноўлены, верагодна, з ідэалагічных прычын. Паводле некаторых крыніц Сафія таксама мела цёплую бэжавую гаму, але паколькі такую мы ўжо выкарысталі на мінскай кафедры, цікавей было разгледзець расфарбоўку з іншага канца спектру — фісташкава-ружовую.

#мінск #полацк #касцёлы #каларыстыка

Што зараз адбываецца на фасадах Мінскага галоўпаштамта.

У артыкуле МН не знайшоў ніводнага цікавага слова пра гэты кампрамонт акрамя чарговага параўнання з Версалем/Афінамі/Швейцарыяй/Венецыяй — гэтым разам з рымскім палацца Полі, перад якім размешчаны знакаміты фантан Трэві.

Ад сябе магу хіба што звярнуць увагу на тое, што фасады фарбуюцца ў адзін тон, цяпер на розніцу гуляюць толькі архітэктурныя дэталі, а да гэтага будынак быў даволі адвольна пафарбаваны ў некалькі адценняў бэжава-карычневатага.

#Мінск #каларыстыка #савецкаяспадчына #рэстаўрацыя

Рэканструкцыя першапачатковага выгляду алтара на 1730-я гады ў кафедральным касцёле ў Пінску. Выканана на падставе хіміка-фізічных даследаванняў пігментаў і зандажоў жывапісных слаёў. 1986 год. З архіва Аркадзя Шпунта.

#Пінск #касцёлы #каларыстыка #роспісы #інтэр'еры

Вяртанне барочнага каларыту касцёлам у Польшчы:

* Касцёл Святых апосталаў Пятра і Паўла пры кляштары капуцынаў. Люблін, 1726-1733
* Касцёл Святых Янаў. Кракаў. 1715-1723
* Калегіяцкая базіліка. Познань. 1651-1705
* Касцёл Святога Войцеха і Святога Станіслава Біскупа. Каліш. 1592-1597
* Касцёл на Скалцы. Кракаў. 1733-1751
* Касцёл Святога Яна Хрысціцеля. Янаў Любельскі. 1694-1769
* Касцёл францысканцаў. Пшэмысль. 1754-1778
* Касцёл Святога Францыска Ксаверыя. Красныстаў. 1695-1717
* Базіліка Адведзін Найсвяцейшай Дзевы Марыі. Свента Ліпка. 1688-1730
* Базіліка Адведзін Найсвяцейшай Дзевы Марыі. Сейны. 1750-1779

У Беларусі пакуль не так шмат прыкладаў - рэстаўрацыя фасадаў нясвіжскага касцёла Божага Цела і мінскага касцёла Святога Іосіфа. А можа быць больш!

#каларыстыка #барока #касцёлы #польшча #замежжа

Як будзе выглядаць Дом афіцэраў у Полацку пасля рэканструкцыі. У даваенны час ён быў пафарбаваны вельмі нязвыкла для нас - цёмна-сінія філёнгі на рустоўцы, такія ж цёмныя карнізы. Пасля вайны ўнармавалі каларыстыку, але цяпер плануюць вярнуць арыгінальнае рашэнне. Паглядзім, ці не сустрэне яно супраціву з боку густу чыноўнікаў.

https://t.me/vitebsk_region_officially/23531

#Полацк #савецкаяспадчына #каларыстыка #рэстаўрацыя

На кляштары бенедыкцінак XVII стагоддзя ў Нясвіжы працягнуць рамонтныя работы на фасадах.

Увосень 2022 года на агароджы і вежы-браме кляштара, нягледзячы на тое, што помнік мае 2-ю катэгорыі каштоўнасці, былі праведзеныя работы без узгаднення з Міністэрствам культуры. Ужо у сакавіку наступнага года да работ на помніку барока быў нарэшце прыцягнуты навуковы кіраўнік, частку карпусоў перафарбавалі ў пясочны колер з белымі карнізамі.

Цяпер справа дайшла да корпуса, які пафарбаваны сёння ў парсюкова-ружовы колер. Паводле хіміка-фізічных даследаванняў "Белрэстаўрацыі" найбольш раннія слаі афарбоўкі на гэта таксама жоўтая вапнавая на сценах (блізкая да Marill 110,
Marill 115, Goldocker 30) і белая на вапне - на карнізах.

Пра аднаўленне касцёльнай вежы гаворкі, на вялікі жаль, не ідзе.

#Нясвіж #рэстаўрацыя #касцёлы #кляштары #каларыстыка

Дом афіцэраў у Полацку пафарбавалі насуперак хіміка-фізічным даследаванням.

Даследванне афарбовачных слаёў паказала, што гэты міжваенны будынак меў халодную гаму, а філёнгі на рустоўцы былі афарбаваныя ў цёмна-сінія колеры. Такімі ж былі і карнізы.


Але ў час наведвання Полацка адной высокай чыноўніцы, якая не мае ніякага дачынення да рэстаўрацыі, не спадабалася прадстаўленая рэканструкцыя аўтэнтычных колераў.

Цяпер помнік архітэктуры пафарбавалі па класічнай схеме: цёплы бэж і тэракотавы замест цёмна-сіняга. Вельмі шкада, што ў Беларусі ўсе пытанні вырашаюцца вось так...

Фота
#Полацк #савецкаяспадчына #каларыстыка #рэстаўрацыя #дэградацыя

У Полацку да Форуму рэгіёнаў Беларусі і Расіі амаль скончылі рэканструкцыю Дома афіцэраў, пабудаванага ў міжваенны час.

«Неэксплутаваны будынак заўсёды памірае. Увесь тынкавы слой прыйшлося збіваць да цэглы, ляпны дэкор таксама пайшоў пад замену».

І гэта не адзіная страта. На вялікі жаль, кіруючыся меркаваннем чыноўніцы, далёкай ад рэстаўрацыі, канчаткова была выбрана каларыстычнага гама фасадаў, якая супярэчыць таму, што паказалі хіміка-фізічныя даследаванні першапачатковай аддзелкі.

#Полацк #рэканструкцыя #рэстаўрацыя #каларыстыка #савецкаяспадчына

https://gorod214.by/new/11142

Метраполітэн-музей не так даўно выклаў лічбавую рэканструкцыю мармуровай галавы багіні Мінервы з Брытанскага музея (датаванне — 140 -150 гг. н.э.), знойдзенай у канцы XIX стагоддзя на Эсквілінскім пагорку ў Рыме. Аўтараў рэканструкцыі гэта статуя зацікавіла паколькі на ёй захаваліся фрагменты арыгінальнай афарбоўкі.

І вось амаль праз дзве тысячы гадоў багіня паўстала нам у сваёй першапачатковай дзіўна мяккай і далікатнай прыгажосці. Пра сам працэс рэканструкцыі можна паглядзець ролік ад яе аўтараў.

Крыніца

#каларыстыка

На касцёле ў Гервятах цагляныя фасады рамантуюць цэментам 😤

Па-першае, цэмент наносіць шкоду муроўцы на вапне.

Па-другое, спачатку трэба счысціць ружовую фарбу, якой у нас чамусьці любяць наводзяць парадачак на фасадах з чырвонай цэглы, а пасля ўжо перакладаць асобныя цагліны, калі яны разбурыліся (чаго не бачна), або наноў рабіць швы. А не тупа мазаць усё разам!

На адным з контрфорсаў бачны невялікі зандаж, які паказввае наколькі адрозніваецца колер мура ад колеру фарбы. Відаць, аўтэнтыка не спадабавался ўласніку...

Гервяцкі касцёл вельмі раскручаны турыстычны аб'ект і помнік рэспубліканскага значэння, а такую дзіч робяць на ім. Паглядзіце наколькі больш шляхетна выглядаюць два пілоны брамы, да якіх не дабраліся рукі гора-маляроў.

Такая шызафрэнія ў краіне паўсюль: у інтэр'ерах рэстарацый збіваюць тынк з роспісамі, каб дабрацца да моднай цэглы, а звонку фарбуюць тую ж самую цэглу чырвонай ці ружовай фарбай, каб яе не было бачна. 🤡

#антырэстаўрацыя #касцёлы #Гервяты #каларыстыка

У БНТУ працягваюць перафарбоўваць свой ансамбль у кіслотна-зялёны колер.

Цяпер рукі дабраліся да інтэрната па № 3 па праспекце Незалежнасці, 63, які сваім фасадам фарміруе фронт забудовы галоўнай магістралі сталіцы.

З гэтымі перафарбоўкамі стаіць дэкан архітэктурнага факультэта Армэн Сардараў, якія мае пасведчанне навуковага кіраўніка і выконвае для свайго ўніверсітэта ўсе працы на гісторыка-культурных каштоўнасцях. Пры гэтым відавочна, што ён не мае аніякага ўяўлення пра навуковую рэстаўрацыю і заканадаўства ў сферы аховы. У свой час яго выперлі з Рады пры Мінкультуры з гэтай прычыны.

Менавіта пад ягоным "навуковым кіраўніцтвам" у 2020 годзе былі праведзены неўзгодненыя з Міністэрствам культуры (то бок незаконныя) работы па перафарбоўцы галоўнага корпуса ў такія ж кіслотныя колеры. Тады кіраўніцтва ўніверсітэта абівала парогі ведамствам, каб ім усё ўзгаднілі задняй датай.

Што цікава, прыкладна ў той жа час рамантавалася агароджа перад галоўным корпусам, якая невядома з якой прычыны не мела ахоўнага статусу. Але для яе іншым спецыялістам удалося ўстанавіць блізкае для арыгінальнага адценне зялёнага — і яно ні разу не кіслотнае.

Кіслотнага зялёнага проста не магло быць на фасадах будынкаў 1950-х гадоў, такія адценні сталі магчымыя толькі ў наш высокатэхналагічны час. На савецкай неакласіцы гэта будуць прыглушаныя глыбокія колеры, далёкія ад вясёльнага салатавага.

Дарэчы на фота можна заўважыць гэты неверагодны кантраст паміж брамай у агароджы, для якой адноўлена арыгінальная каларыстыка па выяўленых пігментах старой аддзелкі, і новай афарбоўкай інтэрната.

Ну гэта проста здзек з горада. А ўсё таму, што адзін няздара ў скураным крэсле бачыць сябе вялікім мэтрам рэстаўрацыі.

#Мінск #савецкаяспадчына #антырэстаўрацыя #каларыстыка

Вось некалькі фота, якія паказваюць наколькі галоўны "мэтр" БНТУ не трапляе ў колер з 2020 года. За 4 гады так і не здолеў падвучыць базу.

Адноўлены аўтэнтычны колер на агароджы без ахоўнага статусу vs. ярка-зялёненькі колер на падставе "я так бачу" на будынку БНТУ са статусам.

#каларыстыка

Гэтыя шкоднікі ў Слоніме не спыніліся на самапальных залатых цыбулінах, якія яны паставілі замест рэстаўрацыйных, цяпер яны пафарбавалі помнік сярэдзіны XVII стагоддзя ў ярка-зялёны колер. , Такога колеру не магло быць у той час праз адсутнасць устойлівых пігментаў. І ім ні слова не скажуць, ні капейкі штрафу не выпішуць за ўсе гэтыя здзекі з беларускай архітэктуры.

#Слонім #дэградацыя #цэрквы #каларыстыка

Супраць прыходу Свята-Троіцкай царквы ў Слоніме распачаты разгляд справы аб адміністрацыйным правапарушэнні, відаць, за нядаўна праведзеныя незаконныя работы на фасадах, якія былі пафарбаваныя ў ярка-зялёны колер.

Што тычыцца залатых купалоў, то ў 2020 годзе навуковым кіраўніком Голасавай распачатыя навукова-даследчыя работы, якія былі спынены праз «адсутнасць у прыходзе фінансавых сродкаў». У 2024 годзе праца нарэшце будзе і ёсць надзея, што купалы ўсё ж заменяць на нармальныя. Спатрэбілася ўсяго 10 гадоў!

#слонім #антырэстаўрацыя #цэрквы #касцёлы #каларыстыка

Вы не паверыце, але будынак Гродзенскай медыцынскай акадэміі канца XVIII стагоддзя таксама пафарбавалі ў зялёны! Сапраўдная каляровая пандэмія!

Будынак быў пабудаваны ў 1775—1781 гадах для першай на Беларусі вышэйшай медыцынскай навучальнай ўстановы, заснаванай па ініцыятыве Антонія Тызенгаўза.

Пасля пераезду акадэміі ў Вільню будынак стаў палацам князёў Чацвярцінскіх. Пасля вайны тут да 2000-х гадоў размяшчалася ваенная камендатура, далей стаяў закінуты. У 2020 годзе яго набыў суседні Гродзенскі парк забаваў.

Выглядае, што аўтар хацеў паказаць розныя перыяды бытавання помніка, які перабудоўваўся і разбудоўваўся. Зялёная частка, вежападобныя рызаліты - самая старая, устаўка па цэнтры ў жоўта-персікавай гаме была прыбудавана пазней, калі перабудоўвалі пад палац, а атыкі на вежах з ляпнымі сцягамі (панопліі) увогуле савецкага часу. Ну і бакавыя крылы зрабілі проста ярка-жоўтымі.

Але не атрымалася, розныя колеры развальваюць будынак на часткі. Не вельмі зразумела, чаму ў цэнтральнай частк і савецкіх атыкаў агульная гама, калі ўжо выбралі прынцып кожнай эпосе свой колер.

І ўвогуле можна было чакаць, што савецкімі атыкамі ахвяруюць дзеля аднаўлення эфектных шлемападобных купалоў. Але іх аднаўляць не сталі. Як і балюстраду. Увогуле абышліся мінімальнай рэстаўрацыяй — але мы чакалі не гэтага, а поўнамаштабнага аднаўлення!

#Гродна #каларыстыка #палацы