На касцёле ў Гервятах цагляныя фасады рамантуюць цэментам 😤

Па-першае, цэмент наносіць шкоду муроўцы на вапне.

Па-другое, спачатку трэба счысціць ружовую фарбу, якой у нас чамусьці любяць наводзяць парадачак на фасадах з чырвонай цэглы, а пасля ўжо перакладаць асобныя цагліны, калі яны разбурыліся (чаго не бачна), або наноў рабіць швы. А не тупа мазаць усё разам!

На адным з контрфорсаў бачны невялікі зандаж, які паказввае наколькі адрозніваецца колер мура ад колеру фарбы. Відаць, аўтэнтыка не спадабавался ўласніку...

Гервяцкі касцёл вельмі раскручаны турыстычны аб'ект і помнік рэспубліканскага значэння, а такую дзіч робяць на ім. Паглядзіце наколькі больш шляхетна выглядаюць два пілоны брамы, да якіх не дабраліся рукі гора-маляроў.

Такая шызафрэнія ў краіне паўсюль: у інтэр'ерах рэстарацый збіваюць тынк з роспісамі, каб дабрацца да моднай цэглы, а звонку фарбуюць тую ж самую цэглу чырвонай ці ружовай фарбай, каб яе не было бачна. 🤡

#антырэстаўрацыя #касцёлы #Гервяты #каларыстыка

Міністэрства культуры паведамляе, што рамонт цэментам на фасадах касцёла ў Гервятах праводзіўся незаконна.

Работы былі прыпынена да распрацоўкі неабходнай для рамонтна-рэстаўрацыйных работ на гісторыка-культурнай каштоўнасці дакументацыі.

#Гервяты #касцёлы #антырэстаўрацыя

У Стоўбцах раскапалі падмуркі знішчанага касцёла Святога Казіміра. Верагодна, раскопкі праводзяцца ў рамках падрыхтоўкі да адбудовы капліцы, дзе знаходзілася труна святога Фабіяна Малішоўскі, прыёра дамініканскай місіі. Прынамсі такія планы парафія агучвала раней.

Мяркуючы па наваколлях, квадратны раскоп зроблены як раз над гэтай часткай страчанага храма. На фота, дасланых падпісчыкамі, бачныя фрагменты сутарэнняў, якія захаваліся на ўсю вышыню з праёмамі і праходамі.

Раней мы ўжо звярталіся з аформленай у адпаведнасці з Кодэксам аб культуры прапановай, каб тэрыторыю ўсяго дамініканскага кляштара, знішчанага саветамі, прызналі хаця б помнікам археалогію. Гэта дазволіла б пазбегнуць самавольнага будаўніцтва на тэрыторыі. Такі статус сёння мае таксама знішчаны касцёл Святога Тамаша Аквінскага, але абласны савет адмовіў у ім падмуркам касцёла ў Стоўбцам, быццам статус гісторыка-культурнай каштоўнасці можа быць нададзены толькі тым аб’ектам, якія рэальна існуюць. Існаванне падмуркаў у сваім лісце афіцыйна пацвердзіў Інстытут гісторыі НАН Беларусі, які праводзіў папярэднія раскопкі. Цяпер і мы іх бачым на фота.

К «Дажынкам» 2022 года на цэнтральнай плошчы Стоўбцаў знеслі міжваенныя гандлёвыя рады, а на іх месцы адбудавалі браму-званіцу. Праблема ў тым, што пры адсутнасці статусу гісторыка-культурнай каштоўнасці, удзел у такім праекце навуковага кіраўніка і ўзгадненне Міністэрства культуры не патрабуюцца. У выніку брама аказалася агулам падобнай да гістарычнай, але вельмі недакладнай у дэталях.

Сярод выяўляеных у раскопах рэчаў - цэгла, якую складаюць побач у кубы, відаць, для паўторнага выкарыстання. А таксама фрагменты багатай ляпной аздобы інтэр’ераў, якія маглі б дапамагчы ўзнавіць арыгінальны выгляд помніка.

Вядома, што ў выпадку адбудовы самога касцёла грамадства мусіць быць зацікаўлена ў тым, каб яго адбудавалі па навуцы, максімальна дакладна. Гэтак жа вядома, што парафія хутчэй зацікаўлена ў сімвалічным аднаўленні, чым у навуковым. Менавіта для такіх выпадкаў і патрэбнае дзяржаўнае рэгуляванне прац, але тут яго няма.

#Стоўбцы #археалогія #касцёлы

На могілках вёскі Мількавічы ў Навагрудскім раёне мясцовыя парафіяне і два мясцовыя калгасы адрамантавалі драўляную капліцу XIX стагоддзя.

Сцвярджаецца, што гэта адзіная драўляная капліца, якая захавалася ў раёне, але гучыць сумнеўна.

Захавалі драўляныя сцены, закансервавалі нейкую пляцоўку, якая мацавалася без цвікоў. Але дах цалкам замянілі.

У час рамонту ў капліцы былі адшуканыя рэліквіі 1755 года з надпісамі на лацінскай мове, барэльеф абраза Маці Божай Вастрабрамскай 1844 года, старадаўнія падсвечнікі, рушнікі, абрусы.

Ці атрымалася падобна?

Крыніца
#Мількавічы #касцёлы #драўлянаедойлідства #аднаўленне

Царква Раства Багародзіцы (былы касцёл Унебаўзяцця Найсвяцейшай Панны Марыі кармелітаў босых) і кляштар кармелітаў у Глыбокім, сфатаграфаваныя Ежы Дулевічам не пазней за вясну 1928 года з дамбы паміж каналам Капаніца.

На сцяне кармеліцкіх муроў звяртае на сабе ўвагу сонечны гадзіннік. Ці захаваўся ён?

Ну як вам сказаць. За гады з моманту вызвалення ад "панскай Польшчы" помнік архітэктуры даведзены да ручкі. Не тое, што сонечны гадзіннік не захаваўся, нават пазнаць яго з таго ж ракурсу складана. А на месцы гадзінніка не засталося ніводнага кавалку тынкоўкі.

Гэтую развалюху апошнія гады безвынікова спрабуюць прадаць хоць каму, але ніхто не бярэ. Самі давялі да такога стану - самі і аднаўляйце.

Фота
#Глыбокае #дэталі #разбурэнне #касцёлы

Стаўбцоўская парафія адрамантавала капліцу Найсвяцейшага Сэрца Езуса ў вёсцы Жацерава.

«Адрамантавалі, а можна сказаць аднавілі ўсё, апроч сцен (хоць і іх з звонку і нутры атынкавалі і пафарбавалі). Узмацнілі фундаменты, правялі па новаму электрычнасць, зрабілі электрааграванне, па льготных тарыфах, столь, сцены, падлогу. Засталося ўваходныя дзверы зрабіць, як былі і навокал капліцы упарадкаваць тэрыторыю.»

Крыніца
#капліцы #касцёлы #аднаўленне #Жацерава

Скора ў кармеліцкім касцёле ў Мсціславе не застанецца ўнікальных фрэсак зусім. Гэта самы вялікі комплекс барочных роспісаў на ўсход ад Магілёва. Можна сказаць усходні фарпост барока ў Еўропе. На дурныя пражэкты кшталту новага музея ў выглядзе савецкага ордэна ў плане грошы ёсць, бо гэта пра вайну, а на тое, што пра Беларусь - няма.

Крыніца
#Мсціслаў #роспісы #касцёлы

Падземны склеп касцёла ў Стоўбцах, у якім захоўвалася труна з целам Фабіяна Малішоўскага. Падмуркі капліцы касцёла, якую парафія плануе адбудаваць, раскрытыя ў час нядаўніх раскопак. Неверагодная захаванасць, застаўся і тынк, і арыгінальнае пакрыццё падлогі. Сапраўднае падарожжа ў часе 😮

Крыніца

#Стоўбцы #касцёлы #археалогія

У жніўні пафарбавалі Троіцкую царкву, а яшчэ рыштаванні стаяць на вежы касцёла Беззаганнага Зачацця Найсвяцейшай Дзевы Марыі пры былым кляштары бернардзінак. Паглядзім хто зможа зрабіць горш помніку, праваслаўныя ці католікі.

#Слонім #касцёлы #цэрквы #антырэстаўрацыя

Пахаванне сэрцаў бацькі і сына Мікалая (пам. 1746) і Фаўстына (пам. 1755) Радзівілаў у касцёле Унебаўзяцця Дзевы Марыі ў Дзятлаве. Целы іх нейкі час спачывалі тут жа ў крыпце, а пасля былі перавезены ў Нясвіж, а сэрцы вось, засталіся.

Крыніца
#касцёлы #Дзятлава #дэталі #інтэр'еры

Рэстаўрацыя барочнага касцёла Нараджэння Найсвяцейшай Дзевы Марыі ў Заслаўі, якая пачалася ў 1989 годзе пасля разбурэння ў час вайны і дзесяцігоддзяў паваеннага занядбання. Працы працягваліся да 1998 года.

Крыніца
#Заслаўе #касцёлы #рэстаўрацыя

Яшчэ больш фота падземнага склепа касцёла ў Стоўбцах, у якім захоўвалася труна з целам Фабіяна Малішоўскага. Мясцовая парафія думае яго заканасерваваць, а пасля адбудаваць капліцу над ім.

Крыніца
#Стоўбцы #археалогія #касцёлы

У Кухцічах (цяпер пасёлак Первамайск Уздзенскага раёна) ўжо часткова перамуравалі разбураныя элементы колішняга кальвінскага збора ў стылі рэнесансу.

Крыніца
#Кухцічы #рэстаўрацыя
#зборы #касцёлы

Супраць прыходу Свята-Троіцкай царквы ў Слоніме распачаты разгляд справы аб адміністрацыйным правапарушэнні, відаць, за нядаўна праведзеныя незаконныя работы на фасадах, якія былі пафарбаваныя ў ярка-зялёны колер.

Што тычыцца залатых купалоў, то ў 2020 годзе навуковым кіраўніком Голасавай распачатыя навукова-даследчыя работы, якія былі спынены праз «адсутнасць у прыходзе фінансавых сродкаў». У 2024 годзе праца нарэшце будзе і ёсць надзея, што купалы ўсё ж заменяць на нармальныя. Спатрэбілася ўсяго 10 гадоў!

#слонім #антырэстаўрацыя #цэрквы #касцёлы #каларыстыка

За апошнія дні апублікавана некалькі зацверджаных Мінкультуры праектаў зон аховы гісторыка-культурных каштоўнасцей:

🔴 Капліцы на нямецкіх вайсковых могілках ў в. Дзясятнікі Валожынскага раёна
🔴 Рэштак касцёла былога кляштара кармелітаў і брацкай магілы Ратушнай плошчы ў г.п. Вялікая Бераставіца Бераставіцкага раёна. Дакумент вельмі паверхневы, без глыбокага аналізу навакольнай забудовы, але паколькі яго зрабіла «Белрэстаўрацыя», то не выключана, што возьмуцца за аднаўленне касцёла. Зацверджанне ПЗА абавязковая ўмова перад пачаткам работ.

🔴 Помнікаў археалогіі Маладзечанскага раёна: гарадзішчаў у паселішчах Гарадок, Краснае і Радашковічы
🔴 Помнікаў археалогіі Глускага раёна: селішчаў ва ўрочышчы Падліпкі каля вёскі Кастрычнік і ва ўрочышчы Гарадок каля вёскі Уюнішча

🔴 Брацкай магілы па вул. Кастрычніцкай у г. Беразіно

#Дзясятнікі #капліцы #могілкі #ахова #касцёлы #ВялікаяБераставіца #археалогія #Гарадок #Краснае #Радашковічы #Кастрычнік #Уюнішча

З'явіліся ўнікальныя здымкі першага барочнага фасада касцёла Святога Станіслава ў Магілёве, які хаваецца за новым. Цудоўная захаванасць і неверагодная крыніца для даследаванняў.

Мураваны барочны храм пры кляштары кармелітаў быў пабудаваны ў 1738—1752 гады і меў традыцыйны для беларускага барока двухвежавы выгляд. Гэты выгляд захаўся на знакамітай фрэсцы ў самім храме, на якім адлюстравана панарама горада, а злевага краю - двухвежавы касцёл, тажы яшчэ пад тытулам Унебаўзяцця Найсвяцейшай Дзевы Марыі.

Пасля далучэння горада да Расіі, магілёўскі біскуп Станіслаў Богуш-Сестранцэвіч стаў кіраўніком усіх католікаў імперыі. У горадзе ён распачаў вялікае будаўніцтва, узвёў свае гарадскія і загарадныя рэзідэнцыі, а таксама перабудаваў фасады па прыкладзе сабора Святога Пятра ў Рыме. Беларускаму Папу — свой Ватыкан!

Касцёл, які стаў вядомы як Станіславаўскі па імені святога заступніка фундатара перабудовы, займеў выцягнуты фасад. Старыя вежы былі зрэзаны, а да старога фасада прыбудаваны велізарны порцік (тое, што ён прыстаўны, бачна на фота галоўнага фасада ў бакавым ракурсе).

Вежы зрэзалі, але з двара яны прасочваюцца дагэтуль. Уласна першае фота зроблена знутры адной са старых вежаў. Пралом зроблены на месцы круглага акна, за якім бачная сцяна франтона новага порціка.

На другім фота ўжо прастора за праломам, дзе захаваўся арыгінальны барочны дэкор старога фасада. Мы бачым нішу з конхай у выглядзе ракавіны і развіты карніз. На трэцім фота ляпны надпіс S. Simon Stochcivs, які, відаць, падпісваў фігуру, якая займала нішу. Гэта была фігура Святога Сімона Стока (Simon Stock), генеральнага прыёра ордэна кармелітаў, які нарадзіўся ў Англіі. Кармеліты як раз пабудавалі касцёл у Магілёве.

https://pups-mog.livejournal.com/16661.html
#Магілёў #касцёлы #дэкор

У касцёле Святога Казіміра ў Застадоллі Сенненскага раёна ўжо цалкам абваліўся карніз, які трымаўся на драўлянай бэльцы.

Крыніца
#разбурэнне #Застадолле #касцёлы

Думаеце калі ў Беларусі помнікі рэнесансу можна пералічыць па пальцах, то ўсе яны ўзятыя пад ахову?

Не. Вось руіны капліцы другой паловs XVII ст. ў Старой Жосне каля Гуляў Мядзельскага раёна. На фасадзе пазнавальныя рэнесансныя партал, круглыя акенцы, аркатурныя паясы. Стаіць развальваецца ў лясочку, нікаму справы да яго няма. У Дзяражаўны спіс не ўключана, нікім не даследавана.

#рэнесанс #касцёлы #капліцы #СтараяЖосна #Гулі