ፒያሳ መሃሙድ ጋ ጠብቂኝ

😎ጠላፊዎቹ
፡
#ክፍል_ሰላሳ
፡
#በኬንፎሌት
፡
#ትርጉም_ወንዳየሁ_ንጉሴ

...አይሮፕላኑ ወደ ኋላ የማይመለስበት ቦታ ላይ ሊደርስ የቀረው ትንሽ ነው፡፡ ኤዲ አዕምሮው በጭንቀት እንደተወጠረ ከምሽቱ አራት ሰዓት ወደ ስራው ተመልሶ ገብቷል፡ በዚህ ሰዓት ፀሃይ ጠልቃ ጨለማ ነግሷል፡፡
የአየር ጠባዩም ተለውጧል፡፡ዝናቡ
የአይሮፕላኑን መስታወቶች
ይጠልዛቸዋል ኃይለኛው ነፋስ አይሮፕላኑን እንደወረቀት ስለሚወዘውዘው
ተሳፋሪዎቹን ጭንቀት ውስጥ ጥሏቸዋል፡

የአየር ጠባዩ ዝቅተኛ ቦታዎች ላይ መጥፎ ቢሆንም ካፒቴኑ
የሚያበረው ባህሩ ጋ አስጠግቶ ነው፡፡ ከምዕራብ አቅጣጫ የሚመጣው ነፋስ
ዝቅተኛ የሆነበትን ከፍታ ለማግኘት ሲል ነፋሱን እያሳደደ ነው፡፡

የአየር ጠባዩ በትንበያው ከተገመተው በላይ እየተበላሸ በመምጣቱ
ሞተሮቹ ከተጠበቀው በላይ ነዳጅ አቃጥለዋል፡ ኤዲ ነዳጁ አነስተኛ መሆኑን በማወቁ ተጨንቋል፡፡ በነዳጅ ማጠራቀሚያው ውስጥ በቀረው ነዳጅ ምን ያህል ኪሎ ሜትር ሊሄድ እንደሚችል ለማስላት የስራ ቦታው ላይ ቁጭ አለ፡፡ የቀረው ነዳጅ ኒውፋውንድ ላንድ ካናዳ የማያደርስ ከሆነ አይሮፕላኑ ወደ ኋላ መመለስ የማይችልበት ቦታ ከመድረሱ በፊት ወደኋላ መመለስ አለበት።

ታዲያ ካሮል አን ምን ሊውጣት ነው?

ቶም ሉተር ጠንቃቃ በመሆኑ አይሮፕላኑ ሊዘገይ የሚችል መሆኑን ግምት ውስጥ አስገብቶ ከጓደኞቹ ጋር ያለውን ቀጠሮ ለማስረገጥ ወይም
ለማስለወጥ መንገድ ይፈልጋል፡፡

አይሮፕላኑ ወደ ኋላ የሚመለስ ከሆነ ካሮል አን በአፋኞቿ መዳፍ ስር ለሃያ አራት ሰዓት መቆየቷ ነው፡፡ ኤዲ ከስራ ውጭ በሆነበት ጊዜ ሁሉ አስሬ በአይሮፕላኑ መስኮት ሲመለከት አመሸ፡፡ እንቅልፍ እንደማይወስደው ስላወቀ ለመተኛት እንኳ አልሞከረም፡፡ ካሮል አን በዓይነ ህሊናው እየታየችው ጭንቅ ጥብብ ብሎታል ወይ ስታለቅስ ወይ እጅ እግሯ ታስሮ ወይ በድብደባ ቆስላ ወይ ፍርሃት ፍርሃት ብሏት ወይ ተስፋ ቆርጣ ትታየዋለች፡፡ ምንም ሊያደርግላት አለመቻሉን ሲያስበው በንዴት የአይሮፕላኑን ግድግዳ በጡጫ ይጠልዘዋል፡
አንድ ሁለት ጊዜ ደግሞ ለእሱ ተተኪ ለሆነው ሚኪ ፊን ስለአይሮፕላኑ የነዳጅ ፍጆታ ለመንገር በደመነፍስ በደረጃው እየወረደ ከራሱ ጋር እየታገለ ሳይነግረው ተመልሷል፡

ኤዲ ቶም ሉተርን በመብል ክፍሉ ውስጥ በነገር የነካካው አዕምሮው
በመረበሹ ነው፡፡ ቶም ሉተር ደግሞ ብዙም አይናገርም፡፡ እድሉ ሲጠም.ደግሞ ሁለቱ አንድ ጠረጴዛ ላይ ለመብል ተገናኙና አረፉት፡፡ ከራት በኋላ ኤዲ ምን ያህል ስርዓት የጎደለው ተግባር በተሳፋሪ ላይ ሲፈጽም እንደነበረ ጃክ ሲነግረው አመሸ፡፡ ኤዲና ቶም ሉተር የተጣሉበት ነገር እንዳለ ጃክ አውቋል፡፡ ጃክ ኤዲ ብዙም ሊነግረው እንዳልፈለገ ስለገባው ለአሁኑ ያለውን ተቀብሎታል፡፡ ኤዲ ከዚህ በኋላ መጠንቀቅ እንዳለበት አምኗል፡፡ ካፒቴን ቤከር የበረራ መሀንዲሱ የተሳፋሪዎችን ደህንነት የሚጎዳ ተግባር በግዴታ
እንዲፈጽም መታዘዙን ከጠረጠረ እንኳን አይሮፕላኑን ወደ ኋላ ከመመለስ አይቆጠብም፡፡ ይህም ኤዲ ሚስቱን ከእገታው ለማውጣት የሚያደርገውን መፍጨርጨር ያደናቅፍበታል፡፡ ስለዚህ ካፒቴኑ አንድም ነገር ማወቅ የለበትም።

በመርቪን ላቭሴይና በሎርድ ኦክሰንፎርድ መካከል የተነሳው
ጠብ ትዕይንት ኤዲ በቶም ሉተር ላይ ያሳይ የነበረውን ሁኔታ
እንዲረሳ አድርጎታል፡፡ ኤዲ ሌላ የአይሮፕላኑ ክፍል ውስጥ ሆኖ በሃሳብ ተውጦ ስለነበር አላየም፡፡ በኋላ ግን አስተናጋጆቹ የነበረውን ሁኔታ አጫወቱት።ሎርድ ጨካኝ ሰው መሆኑን በመረዳቱ ካፒቴኑ አደብ እንዲገዙ ማድረጉ ኤዲን አስደስቶታል፡ ኤዲ ታዳጊው ፔርሲ በዚህ እርጉም ሰው እጅ
ማደጉ አሳዝኖታል፡

ራት ከተበላ በኋላ ተመልሶ ጸጥታ መንገሱ አይቀርም፡፡ በእድሜ የገፉት ተሳፋሪዎች በየመኝታቸው ላይ ይሰፍራሉ፡፡ ብዙዎቹ በአይሮፕላኑ ውዝዋዜ
እንቅልፍን አጥተውት
ሲያንጎላጁ ያመሻሉ፡፡ ከዚያም አንድ በአንድ እያሉ ይተኛሉ፡፡ እንቅልፍ የማይጥላቸው ተሳፋሪዎች ደግሞ ወይ ካርታ ሲጫወቱ ወይም መጠጣቸውን ሲጨልጡ ያመሻሉ፡፡

ኤዲ የአይሮፕላኑን የነዳጅ ፍጆታ በቻርቱ ላይ ይከትባል፡ በግራፉ
የተመለከተው የአይሮፕላኑ
በቀኝ በኩል የነዳጅ ፍጆታ በእርሳስ
ከተመለከተው የእሱ ትንበያ በላይ ነው፡፡ ኤዲ የሃሰት የነዳጅ ፍጆታ ትንበያ ስላሰፈረ ይህ መሆኑ አይቀርም የአየር ጠባዩ መክፋት ደግሞ በትክክለኛው ፍጆታና በትንበያው ፍጆታ መካከል ያለውን ልዩነት እንዲጎላ አድርጎታል።

በቀሪው ነዳጅ አይሮፕላኑ ሊሄድ የሚችለውን ርቀት አስልቶ ሲጨርስ
ጭንቀቱ በረታ፡፡ የአይሮፕላኑም የነዳጅ መጠን አስተማማኝነት ደንብ እንደሚያዘው የቀረውን የነዳጅ መጠን በሶስት ሞተሮች ፍጆታ ሲያሰላው እስከ ኒውፋውንድ ላንድ እንደሚያደርሰው አወቀ።

ሌላ ጊዜ ቢሆን ይህን ሲያውቅ ለካፒቴኑ ወዲያውኑ መንገር አለበት፡ አሁን ግን አልነገረውም፡፡

የነዳጅ መጠኑ በአራት ሞተር ሲሰላ የነዳጅ እጥረቱ በጣም ስለሚያንስ
ምንም አያስጨንቅም፡፡ ከዚህም በላይ የአየር ጠባዩ ከተወሰኑ ሰዓቶች በኋላ ጸጥ ያለ ይሆን ይሆናል፡ የንፋሱ ግፊት ቀለል ያለ ከሆነ አይሮፕላኑ ከተተነበየው ያነሰ ነዳጅ ስለሚጠቀም ለቀረው ጉዞ ነዳጅ ሊተርፍ ይችላል የከፋ ነገር ከመጣ ደግሞ ርቀቱን ለማሳጠር ሲሉ የጊዜ አቅጣጫቸውን
ይለውጡና በሞገደኛው ንፋስ ውስጥ ይጓዛሉ፡፡ በዚህ አይነት ጉዞ ግን የሚሰቃዩት ተሳፋሪዎች ናቸው፡፡

ከኤዲ በስተግራ የተቀመጠው ራሰ በራው ቤን ቶምሰን በሞርስ ኮድ
የተቀበለውን የሬዲዮ መልእክት ወደ ጽሑፍ እየቀየረ ነው፡፡ ኤዲ ከፊታቸው ያለው የአየር ጠባይ የተሻለ እንዲሆን በመመኘት ከቤን ኋላ ሆኖ መልእክቱን ያነባል፡

የመጣው መልእክት ግን ማስደነቅ ብቻ ሳይሆን እንቆቅልሽ ሆኖበታል፡
መልእክቱ የተላከው ኤፍ.ቢ..አይ ኦሊስ ፊልድ ለሚባል ተሳፋሪ ሲሆን

‹ብቁጥጥር ስር ያለው እስረኛ ተባባሪ ሊሆኑ የሚችሉ ከተሳፋሪዎቹ መካhል ያሉ ስለሆነ በጥብቅ ክትትል አድርግ›› ይላል፡

ምን ማለት ነው? ከካሮል አን አፈና ጋር ግንኙነት አለው ይሆን ይህ
መልእክት?› ሲል አሰበ ኤዲ፡ ይህ ሊሆን እንደሚችል ሲያስበው ራሱን
አዞረው።

ቤን የኮድ ትርጉሙን ቀዶ
«ካፒቴን ይህን መልእክት ብታየው›› ብሎ ለአለቃው አቀበለው፡፡

ጃክ አሽፎርድ የሬዲዮ መገናኛ ባለሙያው አስቸኳይ መልእክት መኖሩን ሲናገር ሰምቶ ከሚያፈጥበት ቻርቱ ላይ ቀና አለ፡፡ ኤዲ ከቤን መልእክቱን ተቀብሎ ለጃክ አሳየውና ራቱን እየበላ ላለው ካፒቴን አሳየው።

ካፒቴኑ መልእክቱን አነበበና ‹‹እንዲህ አይነት ነገር ነው የማልወደው›› አለ፡፡ ‹‹ኦሊስ ፊልድ የኤፍ.ቢ..አይ አባል ሳይሆን አይቀርም::››

‹‹ተሳፋሪ ነው?›› ሲል ጠየቀ ኤዲ፡፡

‹‹አዎ፡፡ ሰውየው እንግዳ ባህሪ ነው ያለው፡ ድብርታም ነው፡፡ የተሳፋሪ
ሁኔታ የለውም: ፎየንስ ላይ ቆይታ ሲደረግ ከአይሮፕላኑ ላይ አልወረደም›› አለ፡፡

ኤዲ ሰውየውን ባያስተውለውም ናቪጌተሩ ጃክ ግን አይቶታል፡
‹‹ያልከውን ሰው አውቄዋለሁ›› አለ ጃክ አገጬን እያከከ፡፡ ‹‹ራሰ በራ
ነው፡፡ አብሮት ልጅ እግር ሰው ተቀምጧል፡ ሰዎቹ ሲታዩ ምናቸውም አይጥምም::››

7.5K viewsEyosi, 17:13