#قصص_الأنبياء
#الحلقة_الأربعون
#قصة_سليمان_الجزء_الثاني
#قصة_النملة_والريح

كنا واقفين المرة إللي فاتت عند سليمان عليه السلام لما كان راجع من الجهاد وسمع صوت بيتكلم،
كان إيه الصوت ده بقى😁
كان صوت نملة بتنصح باقي قرية النمل إللي هي عايشة معاهم وبتقول لهم:
كل النمل يجري على الجحور بسرعة، أحسن سليمان عليه السلام وجيشه يدوسوا علينا ويقتلونا وهمّ مش واخدين بالهم👌
"حَتَّى إِذَا أَتَوْا عَلَى وَادِي النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لا يَحْطِمَنَّكُمْ سُلَيْمَانُ وَجُنُودُهُ وَهُمْ لا يَشْعُرُونَ"

☆احنا ممكن نشوف الجملة دي عادية جدا لكن الجملة دي فيها فوائد كتيرة وكنوز عظيمة 😊
منها:
♡ الفائدة الأولى:
إن إللي اتكلمت "نملة"... مجرد نملة عادية مالهاش أي وزن ولا أي مكانة وبالعافية متشافة أصلا، ومع ذلك نصحت باقي قرية النمل عشان مصلحتهم..
مقالتش مثلا طب وأنا مالي أنصحهم ليه؟
هو أنا يعني كلامي إللي هيأثر🙄
وأصلا لو نصحتُهم ماهمّ ممكن مايسمعوش كلامي عشان أنا مش معروفة ومجرد نملة بسيطة زي أي نملة😑
وكمان فيه نمل تاني غيري شايفين جنود سليمان، ماهمّ إللي يتكلموا إشمعنى أنا؟
مليش دعوة خليني ف حالي... وكمان فين دور الملكة والجنود؟
مش المفروض إنهم همّ إللي ياخدوا بالهم من المخاطر دي😕أنا أروح أستخبى وأنقذ نفسي وخلاص وهمّ أكيد هيتصرفوا😤
مقالتش أي حاجة من دي خالص.. هي مجرد ما شافت جيش سليمان عليه السلام جاي ناحيتهم، نصحت بكل قوتها وطاقتها وعملت إللي عليها👌
وحتى لو باقي النمل ماسمعش كلام النملة فعلى الأقل شالت اللوم والذنب من عليها،
يعني محدش هيقدر ييجي يقولها لو حصل لهم حاجة إنتِ محذرتيناش ليه؟
ولا هي هتلوم نفسها أو تندم وتقول ياريتني كنت نصحتهم😔
فمهما كانت معلوماتك بسيطة.. مهما كنت شايف نفسك حاجة صغيرة .. مهما شفت الناس مش هتسمع كلامك وإنك مهما قلت ونصحت مفيش فايدة لإنك شايف إن جهدك متواضع وبسيط مالوش وزن ومش متشاف:
اعمل إللي عليك دايما بدون تقصير، وانصح لله قدر وسعك وأجرك على الله بقدر طاقتك.. حتى حديث رسول الله ﷺ بيقول إيه؟
بيقول : بلغوا عني ولو《 أية》

♡الفائدة الثانية: حُسن الظن😊
سليمان عليه السلام كان معروف إنه نبي،
وبالذات الدواب والحشرات والطيور تعرفه بشكل خاص لإن ربنا رزقه معجزة إنه يفهم لغتهم ويتخاطب معاهم بيها، وعارفين إن سليمان أخلاقه عظيمة، فطبيعي إن إللي عنده أخلاق ميطلعش منه القسوة أو الأذية لغيره،
فسليمان وجيشه مش هيقتلوا النمل في طريقهم كده بدون سبب، يعني لو حصل وقتلوهم فهيكون بدون قصد غير متعمدين👌
مثال من واقعنا: لما يكون في حياتك شخص متعرفش عنه إلا كل خير، وحصل منه موقف زعلك، وفي الطبيعي إنه ميطلعش منه الموقف ده،
فالمفروض إنك تقول أكيد هو عمل كده وهو مايعرفش، أو عمله بدون قصد ، أو عمله مضطر،
أو يمكن قصده بالفعل ده كذا مش كذا، أو أكيد وراه سبب منطقي ومعتبر مش زي ما أنا فاهم أو...أو...
عارفين أقرب حاجة للموضوع ده إيه وواضحة أوي كمثال؟
موضوع الشيوخ والعلماء.
الشيوخ والعلماء《المُعتبرين》طبعا، مش أي شيوخ..
الطبيعي إنهم معروف عنهم من ظاهرهم إنهم ناس بتتقي الله وبتعلّم الناس الخير من سنين،
فلما يوصلني كلام عن إن حد من العلماء دول إنه عمل حاجة مخالفة للي نعرفه عنه من الخير، المفروض نعمل زي نملة سليمان عليه السلام ونقول: أكيد مكنش يقصد... أكيد الكلام اتنقل عنه غلط... أكيد كان عنده عذره.......
أيا كان👌
طيب ولو طلع الكلام صح وإن فعلا الشيخ اللي أنا أحسنت الظن بيه كان متعمد للخطأ وسيئ النية و...و...؟
يبقى أنا مخسرتش أي حاجة نهائي، بل العكس ربنا يأجرني على حسن ظني💁‍♂️
وهصحح للناس الكلام وأفهمهم إن ده كان حسن ظن مني فيه إللي ربنا أمرني بيه، لكن بعد ما اتضح
《بالدليل الواضح الصريح إللي ميحتملش تخمين》 إن حسن ظني مش في محله، فأنا بتراجع عن ده،
في حين إنه لو طلع بريء وأنا كنت أسأت الظن بيه واتكلمت عليه بأي سوء...؟ فأكييييد أنا الخسران👌
فالمهم إن الأصل هو إحسان الظن، وعشان كده ربنا عز وجل قال:
"اجتبنوا كثيرا من الظن.. إن بعض الظن إثم"

◇خلونا نشوف مثال حصل أيام النبي ﷺ 😊
عارفين حادثة الإفك ؟
لما اتُّهمت السيدة عائشة رضي الله عنها في عرضها بالظلم والبهتان، والناس بدأت تتكلم عنها بسوء وهي المُبرأة الشريفة إللي محدش عرف عنها أي سوء...
وصل الكلام لواحد من الصحابة اسمه أبو أيوب الأنصاري وزوجته ،
فزوجته بتقول له :
سمعت الكلام إللي بيتقال على عائشة وصفوان🙊
قال لها :سمعت... فقالت له : وانت إيه رأيك 🤔؟!
فقال لها: لو انتِ كنتِ مكان عائشة كنتِ هتعملي الفاحشة دي؟
فقالت له: لأ😶
قال لها: طب لو أنا كنت مكان صفوان تعرفي عني إني ممكن كنت أعمل الفاحشة دي؟
قالت له : لأ🤨
قام قايل لها: فعائشة أحسن منكِ، وصفوان أحسن مني👌
بس كده وانتهت القضية من الأساس بحسن ظن عظيم 💁‍♂️

فلما نزلت آيات البراءة، تعتقدوا

#قصص_الأنبياء
#الحلقة_الواحدة_والأربعون
#قصة_سليمان_الجزء_الثالث
#قصة_الهدهد

اتكلمنا المرة إللي فاتت عن سليمان عليه السلام لما كان بيتفقّد الجيش بتاعه وملقاش طائر الهدهد موجود فتوعّد الهدهد إنه هيعذبه عذاب شديد لما يرجع👌
"وتَفَقَّدَ الطَّيْرَ فَقَالَ مَا لِيَ لا أَرَى الْهُدْهُدَ أَمْ كَانَ مِنَ الْغَائِبِينَ"

☆حد ممكن يسأل:
هو كده سليمان عليه السلام مش قاسي شوية مع الحيوانات😕
سليمان عليه السلام نبي وفي نفس الوقت مَلِك، يعني بإيده الأمر والنهي حتى على الحيوانات وبيعمل إللي بيشوفه مناسب كقائد للشعب والجيوش،
والهدهد جندي من جنود سليمان في جيش الطيور، فإزاي الجندي يغيب عن قائده من غير استئذان🤷‍♂️
لكن سليمان عليه السلام كان عادل، فقال إن الهدهد لو جاب سبب مقنع خلاه يغيب عن الجيش هسامحه،
"لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ"

يعني سليمان عليه السلام مقالش إنه هيعذبه لغرض التعذيب ، لأ.. بمجرد إن يبقى في عذر مقبول، يبقى خلاص مفيش عقوبة👌
بعد فترة بسيطة إلّا وسواد نازل من السماء وداخل على سليمان وسط الجنود من الجن والإنس والطيور والكل مُترقب يا ترى هيحصل إيه للهدهد 🙊
فتكلم الهدهد وقال لسليمان عليه السلام:
أنا عرفت معلومات انت متعرفهاش وجايبلكم أخبار غريبة ومافيشهاش أي شك أو إشاعات،
مع إني هدهد صغير ضعيف، وإنت نبي وملك وعندك كل الجنود دي فأنا عندي معلومات خَفِيَت عنك👌
"فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِطْ بِهِ وَجِئْتُكَ مِن سَبَإٍ بِنَبَإٍ يَقِينٍ"
أنا كنت في مملكة سبأ، وهناك لقيت الحاكم إللي بيحكم المملكة امرأة مش رجل، وهي غنية جدا وعندها من أسباب القوة والمُلك، وكرسي العرش بتاعها عظيم جدا،
"إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ"

☆ طيب ياهدهد انت مالك يعني تحكمهم امرأة ولّا رجل هتفرق إيه🤨
الهدهد استنكر وجود امرأة في الحكم لأن ده مش مكان النساء،
ربنا خلق المرأة بطبيعة وتكوين مختلف عن الرجل عشان هي لها دور في الحياة مختلف عن دور الرجل،
المرأة رقيقة وعاطفية وحنونة ومشاعرها دي بتغلب عليها أكتر من عقلها،
عشان هو ده إللي هتحتاجه لما تيجي تقوم بدورها وهو تربية أبنائها ومراعاتهم ومراعاة تقلّباتهم في كل مراحل حياتهم وحُسن احتواءهم في المراحل دي كلها،
ودي حاجة معروفة من قديم الزمان ومسمعناش من أول آدم عليه السلام إن فيه امرأة حكمت بلد فيه رجال قبل ملكة سبأ،
وكذلك النبوة مبتكونش غير في الرجال، لإن كل دي مهام بتحتاج قوة في البدن وقوة تحمل للصعاب وتغليب للعقل على العواطف واجتماع بباقي الرجال وقيادة الجيوش وطلب الرزق في الحر والبر،
إلى آخر الأمور إللي ربنا خلق الرجل بطبيعته دي عشان يكون مُهيأ ليها أكتر من المرأة،
وحتى في شريعة الإسلام، المرأة لا يجوز إنها تتولى الرئاسة أو القضاء👌
فطبيعي إن الهدهد يستغرب من الموضوع🤷‍♂️

¤طيب وهو كده ميبقاش في ظلم لقدرات المرأة، وخصوصا إن في نساء تولّت الرئاسة ونجحوا🤔

فكروا معايا كده،
هل لمّا الضابط يقول للعسكري خليك واقف هنا، ده مكانك احرسه بحياتك عشان العدو ميدخلناش منه، ومحدش هيقدر يحمي المكان ده غيرك .... هل لما بيقول له كده بيكون ده في انتقاص من قدرات الجندي؟
ولّا كده الضابط بيوجه قدرات العسكري للمكان الصحيح والمناسب له عشان مصلحة الجندي نفسه و مصلحة الشعب في كده💁‍♂️
طيب ولو الجندي ده ساب مكانه وطمع في سلاح الطيران وهو غير مُؤهل لكده بسبب طول قامته مثلا بزيادة أو ضعف بنيانه أو أي سبب، مش هو كده بيعرض مصلحته ومصلحة الشعب للخطر والهلاك😕
وده بالضبط معنى حديث رسول الله ﷺ:
" لَنْ يُفْلِحَ قَوْمٌ وَلَّوْا أَمْرَهُمْ امْرَأَةً"
الإسلام لم ينتقص من قدرات المرأة ولكنه وجهها في المكان المناسب لها،
المرأة مش مكانها إنها تختلط بالرجال...
مش مكانها إنها تسافر من هنا لهنا عشان تعمل المعاهدات والاتفاقات...
مش مكانها إنها تقود الجيوش للجهاد... مش مكانها تمسك القضاء وتحكم على ده بالقتل وعلى ده بقطع اليد، بجانب حمل وولادة وتربية!
غير كده جسمها بيضعف مع تتابع الحمل والولادة، وتركيزها بيقل ومشاعرها بتغلب عليها ونتيجة لكل ده بتحتاج لشاهد تاني معاها في الخصومات وخلافه،
"وَاسْتَشْهِدُوا شَهِيدَيْنِ مِن رِّجَالِكُمْ ۖ فَإِن لَّمْ يَكُونَا رَجُلَيْنِ فَرَجُلٌ 《وَامْرَأَتَانِ》 مِمَّن تَرْضَوْنَ مِنَ الشُّهَدَاءِ أَن تَضِلَّ إِحْدَاهُمَا فَتُذَكِّرَ إِحْدَاهُمَا الْأُخْرَىٰ ۚ"
فإزاي هتحكم بين الناس🤷‍♂️
وخلال حكم رسول الله ﷺ وحكم الخلفاء الراشدين وخلال القرون الثلاثة الأولى خير القرون على الإطلاق مكانش في امرأة بتفكر بس كده مجرد تفكير إنها تطمع في حكم أو قيادة إدارة مدينة أو جيش مثلا؛
لأنها عارفة إن ده مش مكانها، وكون إن في نساء تولوا الرئاسة ونجحوا، فبغض النظر إن النساء دي م

#قصص_الأنبياء
#الحلقة_الثانية_والأربعون
#قصة_سليمان_الجزء_الرابع
#إسلام_ملكة_سبأ

كنا واقفين المرة إللي فاتت عند سليمان عليه السلام لما قال لرُسل ملكة سبأ إنه هيأتيهم بجنود مش هيقدروا عليها وهيخرجوهم من أرضهم مذلولين،
لما الرسل مشيوا بقى من عند سليمان عليه السلام ووصلوا لملكة سبأ -ويُقال إن اسمها بَلقِيس- حكوا لها إللي شافوه عند سليمان عليه السلام،
فقالت أنا كنت متأكدة إنه مش هيكون زي ملوك الدنيا، واحنا مش هنقدر على قتاله فعلا ..
فقررت إنها تروح مع وفد من كبراء قومها عشان تسمع من سليمان عليه السلام عن الدين إللي هو بيدعو إليه ده،

سليمان عِرف إن الملكة هتيجي مع وفد لسليمان، سواء بقى عرف عن طريق الوحي أو عن طريق الهدهد أو هو نفسه استنتج كده، المهم إنه عرف وخلاص،
فعرض مهمة على أفراد الملأ بتاعه قال لهم:
مين فيكم يقدر يجيبلي العرش بتاعها قبل ما ييجوا عندنا هنا برغبتهم طائعين مستسلمين؟
"قَالَ يَا أَيُّهَا الْمَلَأُ أَيُّكُمْ يَأْتِينِي بِعَرْشِهَا قَبْلَ أَن يَأْتُونِي مُسْلِمِينَ"

غرض سليمان من طلبه ده إنه يورّيها جزء من قدرة ربنا وفضله عليه ونعمه العظيمة إللي وهبها له عز وجل 👌
فعفريت من الجن من جنود سليمان من جيش الجن قال بافتخار واقتدار وهمة عالية:
أنا هجيبهولك قبل ما تقوم من مقامك، يعني قبل ما تقوم من مجلسك ده وتتركه، أو قبل ما مجلسك يكون انفض باللي فيه وكل واحد يروح لحاله،
المعنى بالظبط على خلاف بين المفسرين لكن المقصود يقول هجيبهولك بسرعة جدا،
وأنا قوي هقدر أشيله، وأمين مش هضيع منه حاجة👌
"قَالَ عِفْريتٌ مِّنَ الْجِنِّ أَنَا آتِيكَ بِهِ قَبْلَ أَن تَقُومَ مِن مَّقَامِكَ وَإِنِّي عَلَيْهِ لَقَوِيٌّ أَمِينٌ"

☆ملحوظة:
العفريت هو المارد من الجن شديد القوة والدهاء والمكر والخُبث،
والعفريت من الجن ده أعلى في الخبث والدهاء والمكر من مَردة الجن، والمَردة أشد من الشياطين،
فباختصار:
الجن عموما كلهم كفار ما عدا فصيلة الجن المؤمن:
"وَأَنَّا مِنَّا الْمُسْلِمُونَ وَمِنَّا الْقَاسِطُونَ فَمَنْ أَسْلَمَ فَأُولَئِكَ تَحَرَّوْا رَشَدًا ۩ وَأَمَّا الْقَاسِطُونَ فَكَانُوا لِجَهَنَّمَ حَطَبًا "

لكن واحد تاني رد وقال :
أنا أجيبهولك في غمضة عين 👌
ربنا قال عنه:
"قَالَ الَّذِي عِندَهُ عِلْمٌ مِّنَ الْكِتَابِ أَنَا آتِيكَ بِهِ قَبْلَ أَن يَرْتَدَّ إِلَيْكَ طَرْفُكَ"
إللي عنده علم من الكتاب هو:
إما جبريل عليه السلام، أو هو صاحب صالح لسليمان عليه السلام عنده اسم الله الأعظم الذي إذا دُعِيَ به أجاب.

☆طب بما إنه مش جن وعنده قوة خارقة، هيجيب العرش في لمح البصر إزاي🤔
بالدعاء.. هيدعو الله باسمه الأعظم وهو موقن بالإجابة ويعلم إن الاسم ده إذا دُعِي الله به أجاب،
عشان كده ربنا وصفه بإنه عنده علم؛ لإن علم أسماء الله وصفاته من أعظم علوم التوحيد👌
فمجرد ما هيدعو هيلاقيه قصاده، وفعلا ده إللي حصل👌

في لمح البصر أو أسرع كمان بمجرد ما دعا باسم الله الأعظم سليمان عليه السلام لقى العرش قدامه!
فلما سليمان شاف عرش بلقيس قصاده أول حاجة عملها
كانت شكر النعمة👌
وكأنه بيقول:
مش هسمح للنعمة تلهيني عن ذكر الله وشكره،
مش هسمح للنعمة تفتني عن ديني،
أنا عارف إن النعم دي اختبار يا إما أشكر يا إما أجحد النعمة وأكفر، ولازم كل مرة أنجح في الاختبار ده،
وإللي بيشكر بيشكر لنفسه لإن ربنا كده كده غني عن العاملين،
وعبودية الشكر دي لمصلحتنا احنا لإن ربنا هيزيد الشاكر من فضله، واللي مش بيشكر النعمة مش هيضر ربنا بشيء..مش بيضر إلا نفسه👌
"فَلَمَّا رَآهُ مُسْتَقِرًّا عِندَهُ قَالَ هَذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَن شَكَرَ فَإِنَّمَا يَشْكُرُ لِنَفْسِهِ وَمَن كَفَرَ فَإِنَّ رَبِّي غَنِيٌّ كَرِيمٌ"

بعد كده وجّه سليمان أوامر للخدم بتوعه وقال لهم:
غيّروا في شكل العرش بتاعها شوية بحيث لما تيجي نخليها تشوفه ونشوف رد فعلها 👌
"قَالَ نَكِّرُوا لَهَا عَرْشَهَا نَنظُرْ أَتَهْتَدِي أَمْ تَكُونُ مِنَ الَّذِينَ لَا يَهْتَدُونَ"
والتغيير إللي حصل هنا يا جماعة كان تغيير في الشكل يعني يضيف جواهر مثلا بطريقة معينة، لكن مش تغيير في أصل العرش؛ لأنه مش بتاعه عشان يتصرف فيه👌

☆طيب ليه سليمان أمر جنوده اصلا إنهم يغيروا التغيير ده🤔
إحنا عارفين إن سليمان عليه السلام ذكي وسريع البديهة،
من يوم ما كان بيحكم مع سيدنا داود في الخصومات،
فهو حب يعرف هل عندها وعي وبصيرة وهتقدر تتعرف علي عرشها رغم التغييرات إللي عملوها فيه دي،
ولّا هتكون من النوع إللي بيدخل عليه الخدع والتزييف وبيتلخبط ومش بيعرف يميز الحق من الباطل👌

فلما جاءت ملكة سبأ لسليمان استقبلها وورّاها العرش وسألها:
ده العرش بتاعك👈
فقالت: كأنه هو😳
هي مقدرتش تقول 《لأ》 لأنه يشبه العرش بتاعها جدا، وفي نفس الوقت مش قادرة تقول《أيوة》 لأن العرش بتاعها في سبأ، والمسافة بين فلسطين وبين سبأ كبيرة...فإزاي العرش بتاعه

#قصص_الأنبياء
#الحلقة_الثالثة_والأربعون
#معجزة_موت_سليمان
#خبر_النبي_دانيال

اتكلمنا المرة إللي فاتت عن قصة سليمان مع ملكة سبأ، وشوفنا إن سليمان عليه السلام كان بينشر دين ربنا في الأرض،
واستمر الحال ده مع سليمان عليه السلام فترة من الزمن، وكان عنده جيش من الجن زي ما قلنا قبل كده،
فاكرين لما قلنا إن ثاني مسجد بُني في الأرض كان المسجد الأقصى وإللي بناه كان يعقوب عليه السلام🤔
خلال السنين دي كان المسجد اتخرّب، فداود عليه السلام كان بدأ يجدده، لكنه مات قبل ما يكمّل تجديده،
فأوصى سليمان عليه السلام إنه يكمل من بعده تجديده وترميمه،
فأمر سليمان عليه السلام الجن بإنهم يتولوا مهمة البناء والترميم دي،
وكان عليه السلام بيُشرف عليهم بنفسه، فربنا كان مسخّر الجن لخدمة سليمان عليه السلام ، سواء المؤمن منهم أو الكافر،
"وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ ۖ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ"
كان مجموعة منهم بيبنوا له القصور والتماثيل وأحواض كبيرة يُجمع فيها الماء،
ومجموعة تانية كانوا بيغوصوا في البحار يستخرجوا له منها الجواهر واللآلئ،
"يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ"
وبيعملوا كمان أعمال مختلفة، و مكنش حد يقدر يخرج عن أمر سليمان عليه السلام،
"وَمِنَ الشَّيَاطِينِ مَن يَغُوصُونَ لَهُ وَيَعْمَلُونَ عَمَلًا دُونَ ذَٰلِكَ وَكُنَّا لَهُمْ حَافِظِينَ"
و أي واحد من الجن يعصي أمر سليمان عليه السلام، كان بيتم ربطه بالأغلال والسلاسل أو ربنا بيعذبه بالنار.
الشياطين كانوا بيقولوا للناس في زمن سليمان عليه السلام إنهم كانوا بيعلموا الغيب،
وكانت الناس مصدقاهم لأنهم كانوا بيشوفوا قوة الجن وقدرتهم الخارقة،
وكان سليمان بيقول لهم إن ده مش صح، فلا يعلم الغيب إلا الله، لكن الناس مكنوش مقتنعين،
فسليمان عليه السلام دعا ربنا إنه يُخفِي عن الجن موته عشان يثبت للناس إن الجن كدابين في زعمهم العلم بالغيب..
كان سليمان عليه السلام كل فترة بيختلي بنفسه عشان يتعبّد لله ومبيسمحش لحد إنه يقطع عليه خلوته الإيمانية دي،
وكان بياخد معاه إللي بيحتاجه من الأكل والشرب،
زي ما رسول الله ﷺ كان بيخرج يتعبد في غار حراء قبل البعثة😁
فسليمان عليه السلام عرف إنه هيموت قريب؛ لأن الأنبياء زي ماقلنا قبل كده بيتم تخييرهم قبل ما يموتوا بين الموت وبين المُكْث في الدنيا 😊
ففي يوم كان سليمان عليه السلام بيتابع شغل الجن في ترميم المسجد الأقصى وبيشرف عليهم بنفسه عشان مايكسلوش عن الشغل👌

☆إيه ده، يعني المسجد الأقصى هو هيكل سليمان إللي اليهود بيقولوا عليه🤨
لأ طبعا،
موضوع هيكل سليمان ده أصلا حاجة من اختراع اليهود مش موجودة 🙄
يعني المسجد حاجة والهيكل ده حاجة تانية،
والدليل على كده إن رسول الله ﷺ قال عن سليمان عليه السلام إنه بنى بيت المقدس، إللي هو المسجد الأقصى زي ما قلنا من شوية👌
ومعنى البناء هنا يعني هو إللي أعاد بناء المسجد الأقصى، يعني هو كان موجود ولكنه أعاد بناؤه،
ده غير إن في كتب اليهود في اختلاف بين علماء اليهود على مكان الهيكل وعلى شكل الهيكل نفسه عامل إزاي😶
يعني متخيلين ناس بتدور على حاجة مش عارفين هي إيه أصلا🤦‍♂️

◇طب ثواني كده، يعني إيه أصلا هيكل سليمان🤨
الهيكل يعني المعبد، وفي اللغة العِبرية الهيكل معناه بيت الإله، واليهود بيقولوا إن الهيكل ده هو أهم مكان للعبادة، وإن سليمان بناه لهم ولديانتهم،
وبيقولوا إنه موجود تحت المسجد الأقصى، عشان كده بيحفروا تحته دلوقتي عشان عايزين يوقعوه😑

المهم،
سليمان عليه السلام كان واقف وساند دقنه على العصاية بتاعته بيراقب سير العمل وهمّ شايفينه باصص عليهم طول الوقت،
و هو في الوضع ده ربنا قبض روحه 🙊
الجن شايفينه مفتح 👀 وباصص عليهم...لكن هو في الحقيقة ميت😅
واستمر الوضع كده فترة زمنية.. أد إيه بالضبط؟ محدش يعرف، في علماء قالوا أسبوع .. علماء تانيين قالوا شهر.. علماء غيرهم قالوا سنة😶
العلم عند الله والموضوع مش هيفيدنا كثير، أهم حاجة نعرف إنه قعد فترة ميّت على الأقل أسبوع،
والجن مكنتش تعرف وعمالين يشتغلوا بدون راحة، ومحدش كان يقدر يقرب من سليمان عليه السلام،
وطبعا همّ لم يشكّوا إن سليمان عليه السلام كان ميت، مع إنه مكنش بياكل ولا بيشرب؛ لأنهم عارفين الأنبياء وضعهم مختلف،
يعني ممكن ربنا بيعطيهم القدرة في أوقات معينة إنهم يستغنوا عن الأكل والشرب،
زي موسى عليه السلام لما صام ثلاثين يوم وأفطر وبعدها صام عشر أيام تانية بأمر من ربنا ومكنش بياكل ولا يشرب،
وخدوا بالكم إن أجساد الأنبياء لا تتحلل ولا تأكلها دواب الارض، يعني أجساد كوووول الأنبياء والرسل زي ماهي في القبور لم تتعفن ولم تتحلل👌
فربنا أرسل دودة الأرض تأكل عصا سليمان عليه السلام إللي هو كان ساند عليها،
فربنا أرسل دودة الأرض واسمها 《الأَرَضَة》 وقعدت تأكل عصا سل

#قصص_الأنبياء
#الحلقة_الرابعة_والأربعون
#قصة_عُزَير
#مقدمة_عن_ذي_القرنين

وقفنا المرة إللي فاتت عند بُخْتُنصّر لما أدخل أسدين مع النبي دانيال في بئر كبير عشان ياكلوا ويقتلوه وهو صاحي،
لكن سبحان الله الأسدين لم يؤذياه بالعكس ده قعدوا يلحسوا فيه😮
ربنا أيّد نبيه بمعجزة من عنده تُثبت إنه نبي 👌

☆وطبعا بُخْتُنصّر مش مستوعب ده اسمه إيه إللي حصل ده😳
ماهو أصله مش فاهم إن كل المخلوقات ماتقدرش تعمل حاجة إلا بأمر ربنا وإن ربنا هو مُسبب الأسباب ومالك الملك يقدر ينزع الأسباب ويعطلها في الوقت إللي يريده،
ميعرفش إنما أمره إذا أراد شيئا أن يقول له كن.. فيكون.. ميعرفش:
" إن الأمة لو اجتمعت على أن يضروك بشيء لن يضروك إلا بشيء قد كتبه الله عليك"👌
خرج دانيال من البئر سليم مُعافى😊
فعمل خاتم ونقش على الفص بتاعه صورة رجل بين أسدين والأسدين بيلحسوه، عشان مينساش نعمة ربنا عليه بإنه أنقذه في الوقت العصيب ده👌
من ضمن إللي بيُحكَي في قصة النبي دانيال، إن بُخْتُنصّر شاف رؤيا ونسيها، فسأل عنها دانيال،
فحكاها له دانيال زي ما شافها وفسرها له كمان، وكان تفسيرها بشارة ببعثة رسول الله ﷺ، وإن مُلك أمة التوحيد والإسلام هيبلغ مشارق الأرض ومغاربها👌

◇قصة دانيال عليه السلام👆 من الإسرائيليات التي لا تُصدق ولا تُكذب،
لكن الصحابة لما فتحوا مدينة تُسْتَر في فتوح فارس،
ودخلوا بيت مال الهُرمُزان إللي هو قائد الجيش الفارسي في معركة القادسية،
لقوا فيه تابوت، كان جواه جثة لرجل أنفه طولها ذراع، كان أهل الفرس لما ينقطع عنهم المطر كانوا بيستسقوا بجثة الراجل ده،
فأرسل الصحابة لعمر بن الخطاب رضي الله عنه يحكوا له عن قصة الجثة دي،
فقال لهم عمر: إن ده جسد نبي لإن الأرض والنار مش بياكلوا أجساد الأنبياء..
ولما لقوا الخاتم في يده، الصحابة سألوا الناس عنه، فالناس قالوا لهم إن دانيال ده كان ملك من الملوك السابقين أسَره وحصل كذا كذا.. وحكوا لهم حكايته مع الأسدين إللي على الخاتم،
فعرف الصحابة إنه النبي دانيال..
وحفر المسلمون ثلاثة عشر قبرا في النهار،
ودفنوا جثة النبي دانيال في واحد منهم بالليل عشان محدش يعرف مكانه ويطلعه تاني، ويحافظوا على التوحيد،
ويُبطلوا عبادة التوسل بالأموات إللي تعتبر شرك بالله تعالى👌
☆بالمناسبة :
مدينة تُسْتَر بالفتح، مع إن معظمنا كان بيمسعها بالضم "تُستُر" لكن لما بحثنا عنها بالتشكيل، لقينل الموجود كان بالفتح في تفسير ابن كثير، ومكنش موجود بالضم خالص.. فهل هي ليها تشكيلين ، واحد بالضم وواحد بالفتح؟ الله أعلم🤷‍♂️
لكن المؤكد إن التشكيل بالفتح ثابت👌

نرجع بقى شوية لبيت المقدس بعد خروج بُخْتُنصّر منه..
أصبح بيت المقدس خراب والناس مقتولين فيه، فمرّ على بيت المقدس رجل صالح من بني إسرائيل،
وكان راكب على حمار بتاعه، وكان معاه سلة فيها أكل يخصه.. كان فين ورايح فين؟ محدش يعرف😅
لكن المهم إنه لما دخل المدينة وشاف الناس مقتولة والمدينة خراب، قال في نفسه وهو بيتعجب:
إزاي الناس دي ربنا هيحييها مرة تانية😮
هو مكنش بيشك في قدرة ربنا.. لكنه كان مستغرب🤔
هقول لكم زي إيه عشان أقرب لكم المعنى👌
عارفين لما تشوفوا إعلان عن شقة هتكون عاملة إزاي بعد التشطيب 🤔
أو عمارة مثلا هتكون عاملة إزاي لما تتبنى وتخلص خالص وشكلها في الإعلان خرافي وشديد الإبهار،
وانتم على أرض الواقع مجرد شايفين يادوب الأساس هو إللي بيتحفر.. فيبقى فيه تعجب جواكم كده:
إزاي الناس دول هيعملوا العمارة لحد ما توصل في الآخر بالمنظر ده 😳
هو انتم هنا معندكوش شك إنها فعلا هتتبنى، لكن انتم بس مستغربين مندهشين متعجبين👌
ولله المثل الأعلى ...
أهه ده كان إحساس الرجل الصالح، ويقال إن اسمه أَرميا النبي إللي اتكلمنا عنه المرة إللي فاتت أو إنه اسمه عُزيْر إللي احنا عارفينه من القرآن،
بس العلماء اختلفوا هل عُزَير ده رجل صالح ولا نبي🤔
لكن المشهور عند أهل التفسير إنه رجل صالح واسمه عُزَير،
فلما شاف عُزيْر خراب المدينة وشاف كمية جثث القتلى وشدة المقتلة فيهم، استغرب إزاي ربنا هيرجع الأرض دي عمار مرة تانية😮
"أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا"
فربنا توفاه لمدة 100 سنة، ثم أحياه من تاني.. وخلال المائة سنة دي أحداث كتيير حصلت...
بختنصر كان مات خلاص،
وحصلت معركة بين أهل بابل في العراق وبين الفُرس في إيران، وانتصر الفُرس على البابليين بمساعدة اليهود إللي كانوا في بابل عبيد زي ما قلنا،
وضم الفُرس حُكم فلسطين للدولة الفارسية، وانتهى الحكم البابلي العراقي لفلسطين، ودخل فيها الحُكم الفارسي..
وكان بعض اليهود رجعوا لأرض فلسطين في الوقت إللي هي فيه تحت الحكم الفارسي، وبدأوا يعمَّروا المدينة مرة تانية....
كل ده وعُزير ميت🙊
فبعد ما المائة سنة خلصوا ربنا بعثه وأحياه من تاني.. فلما قام، كان متخيل إنه نام كام ساعة بس كده،
فربنا سأله على ل

#قصص_الأنبياء
#الحلقة_الخامسة_والأربعون
#ذو_القرنين

وقفنا المرة إللي فاتت عند سؤال : مين هو ذو القرنين😁

قلنا قبل كده إن في أربعة حكموا الأرض، أولهم كان النمرود.. والثاني هو ذو القرنين.
ذو القرنين كان عبد صالح مسلم موحد لله، يُقال إنه أسلم مع إبراهيم عليه السلام وطاف بالكعبة مع إبراهيم وإسماعيل، لكن مفيش دليل على كده، ده اجتهاد لبعض المفسرين، وبالتالي احنا مانعرفش زمنه إيه بالتحديد، إللي يهمنا من قصته العبرة 👌
كان سبب ذكر قصة ذو القرنين في القرآن إن مُشركي مكة كانوا عايزين يتأكدوا إن محمد ﷺ رسول من عند ربنا فعلا ولّا لأ، فقالوا: خلونا نسأل اليهود ..
فراحوا لليهود في المدينة وسألوهم: نعرف إزاي إذا كان محمد صادق ولا كاذب🤔
فاليهود قالوا لهم: اسألوه عن تلات حاجات:
وكان من ضمن الأسئلة التلاتة: إنهم يسألوه عن مين هو الملك إللي طاف الأرض..
فراح المشركين يسألوا رسول الله ﷺ ، فقال لهم رسول الله ﷺ إنه هيقول لهم الإجابة بكرة، ونسي يقول إن شاء الله زي ما قبل سليمان عليه السلام نسي يقولها، قبل كده،
فاكرين😁
وكل يوم يقول لهم هقول لكم بكرة وينسى، ورسول الله ﷺ لا ينطق عن الهوى، يعني ماينفعش يقول لهم عن قصة ذي القرنين أي كلام من عنده كده وخلاص😅
لحد ما عدى ١٥ يوم -وفي رواية تانية شهر- ونزل القرآن يوضح مين هو الملك ده في سورة الكهف..
ونزلت الآية تعاتب النبي ﷺ على نسيانه قول إن شاء الله: "وَلَا تَقُولَنَّ لِشَيْءٍ إِنِّي فَاعِلٌ ذَٰلِكَ غَدًا *إِلَّا أَن يَشَاءَ اللَّهُ"

وطبعا واحد طاف الأرض كلها يعني قابل ناس كتير وحصل معاه أحداث كتير، فعشان ربنا يحكي لنا عنه كل حاجة هنحتاج لأجزاء كتيرة ومجلدات 😅
فربنا قالنا بس جزء من رحلته باللي يفيدنا وناخد منه العبرة 👌
"وَيَسْأَلُونَكَ عَنْ ذِي الْقَرْنَيْنِ قُلْ سَأَتْلُو عَلَيْكُمْ مِنْهُ ذِكْرًا"
طيب هو ذو القرنين اسمه الحقيقي إيه؟
واشمعنى يعني لقبه كان ذو القرنين بالذات؟
طيب وبلده الأصلي كان إيه؟...واتولد سنة كام...و...و...و؟
كل الحاجات دي اختلف فيها العلماء وزي ما قلنا مش هتفيدنا في حاجة... هي من باب : علمٌ لا ينفع وجهلٌ لا يَضر🤷‍♂️
☆ودي من ضمن العبر إللي في قصته:
إننا نتعلم مانسألش ولا ندوّر إلا عن الحاجة إللي هتفيدنا في ديننا وحياتنا..
عود نفسك في حياتك قبل ما تسأل عن حاجة في أمور الدنيا أو أمور الدين المسكوت عنها، تسأل نفسك سؤال:
هستفيد إيه لو عرفت🤔
وده هيمنع عنك شر كتير جدا وهيمنع عنك تضييع أوقات وطاقات انت محتاج لها أكتر👌
ولعل أهم فايدة هنستفيدها، إننا نجنب نفسنا إننا نتكلم فيما لا يعنينا، وهنكون وصلنا لمحاسن الإسلام وكمال الإيمان؛ لأن من حسن إسلام المرء تركه ما لايعنيه💁‍♂️

فاللي يهمنا نعرفه إن ذا القرنين كان ملك مسلم طائع لله،
ربنا مَكِّن لذي القرنين في الأرض وأعطى له مُلك عظيم ووهبه من كل شيء من كل شيء علم،
يعني وهبَه من كل علم وسيلة وطريقة يقدر يحقق بيها إللي هو عايزه،
"إِنَّا مَكَّنَّا لَهُ فِي الْأَرْضِ وَآتَيْنَاهُ مِنْ كُلِّ شَيْءٍ سَبَبًا "
يعني مثلا كان عنده ناس مترجمين بيتكلموا بلغات متعددة لأهل الأرض، لما يروح أي بلد يدعوا أهله للإسلام كان بيدعو الناس عن طريق المترجمين دول،
فذو القرنين كان هدفه المحدد هو نشر دين الله في الأرض وإقامة العدل بين الناس،
وبالرغم بقى من إن ربنا أعطى له علم عن كل حاجة فهو موقفش...منمش في الخط يعني😅
ربنا إداله بداية العلم وهو يطور ويتعمق أكثر لحد ما يُتقن العلم ده، وهو ده معنى:
"فَأَتْبَعَ سَبَبًا"
عارفين زي إيه في حياتنا دلوقتي؟
زي الإلتزام بالدين😊
ربنا ميسر لنا أسباب إننا نتعلم ديننا الصحيح واحنا على سريرنا في أوضة نومنا في التكييف وأكل وشرب رايح جاي، سواء عن طريق مقالات أو كتب إسلامية موجودة عالنت أو محاضرات عاليوتيوب أو...أو...أو ..
وهو ده السبب إللي ربنا أعطاه لنا زي ما أعطى ذا القرنين،
احنا بقى بنعمل إيه إلا من رحم الله😶
تلاقي مثلا إللي يقولك أصل الكلام كتير وانا مبحبش أقرأ الكلام الكتير، مع إنه تلاقيه عند الروايات الطويلة منشار قراية عادي جدا😀
تلاقي حد تاني يقولك أصل مفيش وقت، وهو بيضيع معظم يومه على فيسبوك وغيره😑
تلاقي حد تالت يقول لك أصل انا مبحبش أقعد كده وأقعد أسمع وبس...بحب الحوار والتفاعل كده،
لازم حد يتكلم معايا وجها لوجه عشان المعلومة تدخل... وحد رابع... وخامس....
وندّي بقى ضهرنا للوسائل إللي ربنا يسرهالنا للخير، ونقعد نشتكي ونسأل احنا ليه متأخرين كده وليه فاشلين وليه حاسين بالإحباط والهزيمة وكده
أهه هو ده الفرق بينا وبين ذو القرنين ..هو انتهز الفرص والنعم إللي ربنا أعطاها له وإحنا لأ👌
فلما ربنا يعطيك فرصة وسبب ووسيلة ميُسرة إوعى تفرط فيها...إوعى تتلكع..
لقيت ربنا فتح عليك سبب وباب إنك تتعلم دينك، أتبِع سَبَبًا... ادخل كمان واتعمق فيه لحد ما توصل لفوايده وكنوزه إللي تنفعك في حياتك وآخرتك..
لقيت سبب وباب إنك توجع أ

#قصص_الأنبياء
#الحلقة_السادسة_والأربعون
#يأجوج_ومأجوج

وقفنا المرة إللي فاتت عند الناس إللي مكنوش عارفين ولا لغة غير لغتهم ولكن صمموا إنهم يوصلوا رسالتهم لذي القرنين،
كانت إيه رسالتهم بقى 😁
قالوا:
يا ذا القرنين إن يأجوج ومأجوج قوم مفسدون في الأرض ...بيقتلوا ويظلموا ويخرّبوا كل حاجة يشوفوها😑
فاحنا عايزين منك خدمة، وهي إنك تجعل بينا وبينهم سد عشان ميخرجوش علينا ويفسدوا علينا معيشتنا...ومتخفش إحنا هنديك أجر كبير مقابل مساعدتك لنا😅
"قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا "

☆السؤال هنا ..إيه إللي خلى الناس دي تطلب من ذي القرنين طلب زي ده أول ما قابلوه وهم ميعرفهوش...مش ممكن يكون ملك ظالم جاي يقتلهم وخصوصا إنه داخل عليهم بجيشه الجرار ومعاه معداته وآلاته🤔

السبب في كده هو نفس السبب إللي خلّى أصحاب يوسف عليه السلام في السجن يحكوا له عن رؤيتهم...
سّمْت الصلاح الظاهر عليه هو السبب👌
ماهو الناس الصالحين بيبان عليهم.. بيبان على شكلهم وعلى تصرفاتهم😊
مش ساعات تشوف واحد ولّا واحدة تحس إنه صالح وإنه شخص قريب من ربنا؟
مع إن دي حاجة قلبية غيبية منعرفهاش ولا يعلمها يقينا إلا الله، بس شكله بيقول كده سبحان الله... تصرفاته وكلامه بيقولوا كده👌
عارفين في حديث لرسول الله ﷺ بيقول:
"أَلا أُخْبِركم بِخيَارِكم ؟ الصحابة قالوا : بلى يا رسول الله.
قال: الذين إذا رُؤُوا ذُكرَ الله"

◇هل لما النساء بيشوفوا لبسك كمسلمة، بيذكروا الله ويتمنوا يلبسوا زيك؟... ولّا بيسألوكِ عن لبسك وشياكته وألوانه وجبتيه منين وبكام عشان يقلدوكِ؟
◇هل لما الناس بيشوفوا تصرفاتكم ويسمعوا كلامكم، بيذكروا ربنا وبيتمنوا إنهم يكونوا في أخلاقكم ودينكم؟
◇هل لما بيدخلوا على صفحاتكم الشخصية في الفيسبوك مثلا أو يقرأوا كتاب من تأليفكم، بيذكروا ربنا وبيبدأوا يسألوا في الدين وإزاي نقرب من ربنا،
ولّا بيذكروا المسلسل الفلاني ولا الفيلم العلاني ويسألوكم عن قصة شعركم دي بتاعة أنهي فنان أو أنهي لاعب كورة؟
أهو ده السّمت إللي بنتكلم عليه...
إن ظاهرك إللي يدل على تقوى وحياء وحسن خلق يخلي الناس يفتكروا ربنا👌

¤ملحوظة بقى قبل ما كلامي يتفهم غلط😶
كلامنا هنا عن الغالب الأعم، لكن طبعا دي مش قاعدة إن كل حد ظاهره الصلاح بيكون صالح بالفعل..
فيه ناس بتعرف تتلون وتستعمل وسائل للنصب على الناس باسم الدين..
وفيه نساء لابسة إسود في إسود ولا يفقهوا في الدين شيء مثلا...
في بنات مش محجبة ومتعمقين جدا في الدين ويمكن يكونوا حافظين للقرآن..
وممكن المنتقبة إسود في إسود دي ربنا يختم لها بخاتمة سيئة، وحصلت بالفعل وكانت داعية كمان للأسف ربنا يرحمها😞
وفي بنت أو شاب ممكن يكونوا ضايعين خالص وفي آخر لحظة في حياتهم ربنا يختم لهم بخاتمة حسنة..
أيوة برده بيحصل👌
لكن مش ده إللي بتكلم فيه نهائي😅
دي حالات شاذة ما اقدرش أحطها عشان أطلع منها قاعدة عامة أقيسها على البشر كلهم😊
لإننا بكل بساطة: مالناش غير الظاهر.. أحكم على الظاهر الواضح، لحد ما يتبين لي من سريرة الشخص ده إللي لسه مش واضحة، عكس الظاهر الواضح بتاعه ده👌
ومش أنا إللي بقول كده ده رسول الله ﷺ إللي بيقول😁
قال رسول الله ﷺ :
"لا تُصاحب إلا مؤمنا ولا يأكل طعامك إلا تقي"
إزاي هعرف إن اللي قصادي ده مؤمن ولّا تقي ودي حاجة قلبية لا يعلمها إلا الله🤔
بكلامه وتصرفاته، يعني من الظاهر 💁‍♂️
ثم ده الغالب زي ما بنقول لإن رسول الله ﷺ قال :
"ألا إن في الجسد مُضغة إذا صَلُحَت صَلُح الجسد كله وإذا فسدت فسد الجسد كله ألا وهي القلب"،
ويوم القيامة العبرة بالقلوب :
" يَوْمَ لَا يَنْفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ "
فلو القلب في الدنيا سليم، الطبيعي إنه يظهر أثر سلامته دي من الأمراض والشرك على الجوارح، وهيبان في الشكل والتصرفات👌

☆ممكن واحدة تقول طيب ماهو ناس بيكون ظاهرها كويس ولما تعاشريها يتبين لك إنها مثلا نقاب على الفاضي ولا لحية على الفاضي أو مظهر متدين عالفاضي وبيعملوا الغلط🙄

طيب إيه رأيكم بقى إن ده مش ذنبهم😊
المشكلة مش في الملتحي ولا في المنتقبة ولا أي حد عليه مظهر من مظاهر الإلتزام... المشكلة فينا إحنا😑
احنا متصورين إن الناس دي ملايكة بقى ومبيغلطوش،
فلما يعمل حاجة نقول أاااه شوف الملتحي😡
شوف المنتقبة😠
احنا اللي ربطنا اللحية والنقاب بالإلتزام 《الملائكي》 ودي مجرد شريعة زي باقي شرائع الإسلام🤷‍♂️
واحد ولّا واحدة فيهم كل العِبر بس قدروا ينفذوا حاجة في الدين هياخدوا عليها حسنات فاحنا نقول:
لأ احلق لحيتك،
وانتِ اقلعي نقابك وخمارك.. يعني زوّدوا كمان معصية لمعاصيكم أو قللوا الحسنات بتاعتكم😶
الحسابات عند ربنا غير حسابتنا خاالص😅
لو الإنسان عمل حسنة وزنها زي وزن حبة الخردل ربنا هيجازيه عليها👌
"إِنَّهَا إِن تَكُ

#قصص_الأنبياء
#الحلقة_السابعة_والأربعون
#أصحاب_السبت

بما إننا اتكلمنا عن يأجوج ومأجوج والسد..وقلنا إننا نحط بيننا وبين الفتن سد،
فأنسب قصة نتكلم عنها النهاردة هي قصة أصحاب السبت😊
ليه يعني🤨
خلونا نشوف السبب👌

اليهود كانوا بيقولوا إنهم أحباب الله،
فربنا قال لهم لو كلامكم صحيح ، طيب ليه بيعذبكم بذنوبكم وعصيانكم وجحودكم 😒
ربنا مش بيعذب إللي بيحبه، ممكن يعاقب المؤمن عشان يفوق من غفلته ، لكن نزول العذاب من ربنا على ناس معينة مش بيكون وهو بيحبهم عز وجل..
"وَقَالَتِ الْيَهُودُ وَالنَّصَارَىٰ نَحْنُ أَبْنَاءُ اللَّهِ وَأَحِبَّاؤُهُ ۚ قُلْ فَلِمَ يُعَذِّبُكُم بِذُنُوبِكُم ۖ بَلْ أَنتُم بَشَرٌ مِّمَّنْ خَلَقَ"

أيوة ربنا فضّل بني إسرائيل بالنبوة والمُلك على باقي البشر في زمانهم، لكن إللي بيعصي وبيُعرِض عن البينات ويؤذي الرسل ويُبارز ربنا بعصيان أمره؛ ربنا بيعذبه في الدنيا قبل الآخرة..
عايزين مثال إن إللي بيفسق عن أمر ربه ويبارزه بالعصيان ده ربنا بيعذبه في الدنيا؟
عندنا قصة أصحاب السَّبْت👌

أصحاب السبت دول هم قوم من بني إسرائيل، منعرفش زمانهم كان إمتى بالتحديد، لكن يُقال إنهم كانوا في زمن داوود عليه السلام،
وكانت قرية اليهود دي جنب البحر، فطبعا ده معناه إنهم كانوا بيعتمدوا على صيد السمك في غذائهم.
ربنا كان محرّم عليهم صيد السمك في يوم السبت... باقي الأسبوع مباح الصيد عادي، لكن يوم السبت لأ👌

☆طيب اشمعنى يوم السبت😕
كل نبي من الأنبياء بيقول لقومه على يوم الجمعة وفضله،
فلما موسى عليه السلام قال لبني إسرائيل عن يوم الجمعة زي باقي الأنبياء؛
بني إسرائيل اعترضوا وقالوا لأ السبت أحسن، وقعدوا يبرروا ويجادلوا، فربنا قال لهم خليكم في السبت..
فلما جاء زمن قرية أصحاب السبت ربنا ابتلاهم إنهم لا يصطادوا السمك يوم السبت، كاختبار وامتحان لهم على الطاعة👌
في البداية كانوا ملتزمين بعدم صيد السمك، وكانوا بيصطادوا في باقي أيام الأسبوع،
لكن مكنش بيطلع لهم سمك في البحر غير يوم السبت😶
طول الأسبوع مفيش ولا سمكة.. ويوم السبت السمك كثير جدا لدرجة إنه بينط على بعض وبيشوفوه بعنيهم😅

☆زي مثلا لما الواحد بيبدأ يتبع أوامر ربنا ونواهيه، ويقول خلاص بس أنا تبت 😤
مثلا تبت من سماع الأغاني والمعازف والمسلسلات.. فبقى كل ما يمشي في مكان يسمع الأغاني إللي كان بيحبها وكان على طول بيسمعها، وكإن الشارع كله قرر فجأة يشغلها😳
أو مثلا واحدة تابت من التبرج ولبست الحجاب الشرعي، تقوم طول ما هي ماشية عمالة تشوف البنات المتبرجة بعدد كبير وكإنهم مكنوش موجودين قبل كده🤨
همّ كانوا موجودين، لكن لإنها بقت مختلفة عنهم فبقوا باينين جدا قصادها، وربنا بيختبرها بيهم،
يعني دي تقول لها إنتِ كبّرتي نفسك ليه باللبس الغريب ده؟! والتانية تقولها شكلك وحش كده، والتالتة تقول ...والعاشرة والعشرين....كل ده اختبار👌
ماهو ياجماعة سهل جدا إن الواحد يقول أنا مؤمن أو أنا ملتزم بأوامر ربنا.. الكلام سهل😅
إزاي الإنسان يعرف إذا كان صادق فعلا في كلامه ولّا لأ؟
بالإبتلاء والامتحانات ومُفترق الطرق وعند المشاكل والصعاب والفتن والشهوات....و...و .. و
ربنا يعلم الغيب أيوة، ويعلم إذا كان الشخص ده صادق ولّا لأ، بس مش بيحاسبنا عز وجل بسابق علمه فينا😊
إنما بيحاسبنا باللي احنا بنعمله👌
فبيبتلي الإنسان عشان يقوله شوف نفسك.. شوف أفعالك.. هل انت فعلا صادق في كلامك وايمانك والتزامك ولّا لأ👌
فلو صبر الإنسان قصاد الفتن والمُغرِيات واستمر على طريق الإلتزام يبقى هو فعلا كان صادق،
لكن لو رجع خالص زي الأول وأكثر يبقى مكنش صادق🤷‍♂️
"أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"

فربنا خلى السمك يطلع على وش المية يوم السبت بكميات كبيرة ويغوص في أعماق البحر باقي الأسبوع،
وسبحان الله لو مكنوش جادلوا في يوم الجمعة، كان زمانهم بياكلوا السمك عادي يوم السبت😏
☆وهنا ملحوظة مهمة:
وهي إننا لما بنطمع في حاجة غير اللي ربنا إداهالنا، أحيانا بنكون بنتمنى الشر لأنفسنا واحنا مش عارفين..
ربنا بيقول:
"وَيَدْعُ الْإِنسَانُ بِالشَّرِّ دُعَاءَهُ بِالْخَيْرِ ۖ وَكَانَ الْإِنسَانُ عَجُولًا"،
فدايما في أمور الدنيا نرضى بالمقسوم ونحمد ربنا عليه ونطمئن لاختيار ربنا لينا دايما،
ولو هنطلب شي دنيوي محدد نقول في الآخر: يارب لو فيه خير،
لكن في أمور الآخرة والنجاة، ندعي براحتنا طبعا بدون قلق👌

المهم،
بني إسرائيل كانوا صابرين على ابتلاء يوم السبت وثابتين على طاعة ربنا في عدم الصيد فيه، لحد ما واحد منهم عمل إيه🙊
عمل حيلة ...
حفر يوم الجمعة زي حفرة كبيرة جنب البحر، عشان لما الموج يجيب السمك يوم السبت، يدخل السمك في الحفرة، وميعرفش يطلع تاني، وييجي هو يوم الأحد ياخد السمك من الحفرة.. وبكده ما يبقاش اصطاد يوم السبت، وكإن ربنا مش مطلع على مكره وتحايله على الحرام🙂
"وَاسْأَلْهُمْ عَنِ الْقَرْيَةِ الَّتِي كَانَتْ حَاض

#قصص_الأنبياء
#الحلقة_الثامنة_والأربعون
#فتية_الكهف

اتكلمنا المرة إللي فاتت عن أصحاب السبت وأنواع الناس في الأمر بالمعروف والنهي عن المنكر،
واتكلمنا عن أهمية الأمر بالمعروف والنهي عن المنكر وإن إللي ربنا بينجيه من المَهَالك العامة هو إللي بيأمر بالمعروف وينهى عن المنكر😊
طيب لو الإنسان هيتعرض لأذى شديد جدا لو أمر بالمعروف ونهى عن المنكر يعمل إيه🤔
هنعرف الإجابة إن شاء الله من قصة فتية الكهف 👌

كان في مدينة قومها بيعبدوا الأصنام من دون الله، وبيقدموا القرابين للأصنام دي زي ما كان قوم إبراهيم عليه السلام بيعملوا لو تفتكروا،
وكان الملك والأمراء من أوائل الناس إللي بتقدم القرابين للأصنام دي،
في وسط الكفر ده كان في شاب من أبناء الأمراء بيفكر مع نفسه كده:
إزاي نسجد ونبكي ونتضرع ونُوهب قربان لصنم لا بيتكلم ولا بيسمع ولا حتى بيشاور أو بيتحرك..!
أكيد في إله تاني للكون ده هو إللي خلقه وهو إللي يستحق العبادة👌
طبعا الكلام ده كان جواه مش قادر يقول الكلام ده للناس حواليه لإنه عارف إنه لو اتكلم هيتعرّض لأذى شديد😑
في يوم عيد لهم والكل خارج عشان يقدم القرابين للأصنام ، الشاب ده اعتذر وقال إنه مش هيقدر يخرج معاهم،
وبعدين راح ناحية شجرة لوحده عشان يفكر في حاله وحال قومه وهيعمل إيه بعد كده..
وهو ماشي رايح يقعد في المكان ده لوحده لقى ستة من الشباب جايين معاه في نفس الوقت عند المكان ده 🙊
فالشباب بصوا لبعض واستغربوا😳
وكأن لسان حال كل واحد منهم بيقول:
المفروض إن النهاردة يوم عيد! والكل خرج عشان يقدموا القرابين...! الشباب دول بيعملوا إيه هنا..! يا ترى إيه إللي جابهم هنا🤨
فبدأوا يكلموا بعض ويسألوا إنت جيت هنا ليه.. وإنت .. وإنت...
فكل واحد بدأ يتكلم عن إللي جواه واتضح إن كلهم بيفكروا نفس تفكير صاحبنا الشاب إللي اتكلمنا عنه من شوية😮
فالشباب اتشجعوا واستقوُوا ببعض وقالوا :
احنا ربنا هدانا للإيمان بيه وبوجوده.. فمش هينفع نسكت.. لازم نعرَّف الناس إن إللي بيعملوه ده غلط، وإن الإله الحق هو الله خالق السموات والأرض، مش الأصنام إللي لا بتنفع ولا بتضر👌
شباب مؤمن بربه وعنده همة عالية كمان في تبليغ الدين رغم خطورة الموقف.. عشان كده ربنا قال عنهم:
"إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى"
هنا الشباب زي ما شفنا آمنوا بالله... واحنا عندنا القاعدة بتقول إييييه😁
إن مادام فيه إيمان يبقى في إبتلاء وفتنة واختبار وتمحيص👌
"أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"
فإيه اللي حصل....؟
الملك عرف إن في مجموعة من الشباب مبتعبدش الأصنام مع باقي الناس، وبيقولوا إنهم بيعبدوا إله تاني،
ودول مش أي شباب على فكرة، دول كانوا أبناء الملوك والأمراء و الملك ده نفسه عارفهم شخصيا ..
طبعا الشباب بقوا خايفين أكتر، لإنهم دلوقتي بقوا في مواجهة دولة كاملة..
يعني مش بس هيواجهوا أهلهم وأصحابهم، لأ دول هيواجهوا الشعب كله وهيواجهوا كمان الحاكم ذات نفسه.. الرئيس بجنوده وسلطانه.... وهمّ مجرد سبعة أشخاص بس😶

☆خليني أقرب الصورة أكثر😊
شوفوا لما تكون واحدة عايزة تلبس نقاب مثلا أو عايزة تلتزم إلتزام صح بدينها ،
وتيجي تكلم أهلها وهي عارفة إنهم ضد فكرة الإلتزام جُملة وتفصيلا..بتبقي عاملة إزاي..بتبقي بتفكري في إيه..قلبها بيكون خايف أد إيه🙊
ودول أهلها من لحمها ودمها..بيخافوا عليها وبيتمنوا لها الخير أكثر من أي حد👌

تخيلوا معايا الموقف، الملك خلاص استدعاهم...داخلين عليه القصر.. جنود في كل حتة.. والناس بتبص عليهم وتبدأ الوشوشة بينهم وبين بعض:
يا ترى إيه إللي جمّع الشباب دول مع بعض...! وإيه إللي جابهم هنا في القصر...! ويا ترى الملك هيعمل فيهم إيه..؟!
تساؤلات وهمسات وجلبة ودوشة، والشباب سامعين وشايفين كل ده،
ومع ذلك متقدمين بثبات عشان يقابلوا الملك.
الملك شافهم داخلين... أنظار الوزراء والحاشية كلها عليهم.. مستنيينهم يتكلموا .. أول مرة يحصل موقف زي كده وحد يواجه الملك👌
موقف يحبس الأنفاس فعلا...فتخيلوا موقف الشباب دول كان عامل إيه، وقلوبهم في الوقت ده كانت عاملة إزاي🙊
لإن هنا الإختبار والفتنة ، هل هيصبروا ويثبتوا على الإيمان، ولّا هينكروا كل شيء ويسجدوا لصنم عشان الملك يصدقهم؟

لكن الشباب كانوا واخدين القرار إنهم هيجهروا بالحق ويبينوا للناس إنهم يسيبوا عبادة الأصنام ويعبدوا الله الواحد الأحد، قرروا يعملوا كده رغم الصعاب إللي ممكن يواجهوها..
برغم الأذى إللي ممكن يتعرضوا له....
ومع ذلك مقالوش احنا نخلينا في نفسنا احنا معذورين، وهنعبد ربنا في السر بقى وأهه نعيش مع أهلنا في القصور مضطرين عشان محدش يشك فينا،
ما حنا بردو مش هننعزل يعني عن الناس ونسيب حياتنا 😑

وبالمناسبة🙂
الشباب دول قرروا يعملوا كده من نفسهم لله، يعني همّ مجلهمش وحي، ولا جالهم رسالة من ربنا بالأمر بالمعروف والنهي عن المنكر،
لكن إحساسهم الفطري إنهم لازم يدعوا الناس ل

#قصص_الأنبياء
#الحلقة_التاسعة_والأربعون
#صاحب_الجنتين

قصتنا النهاردة ربنا ذكرها في القرآن لرسول الله ﷺ وهي رسالة لكل إللي هيقرأ القرآن على مر السنين،
عشان كفار قريش يعرفوا واحنا كمان نعرف إن العبرة مش بكثرة الأموال ولا بالغنى،
ولكن العبرة بالإيمان لأن الرجل ممكن يكون غني كافر ولا ينفعه ماله مثلكم يا كفار قريش👌
وممكن يكون الإنسان فقير ولكنه مؤمن وهو ده إللي هينفعه يوم القيامة زي فقراء الصحابة إللي انتم طلبتم من رسول الله ﷺ إنه يطردهم عشان تقعدوا معاه وتسمعوا كلامه👌

خلونا نشوف القصة مع بعض😊

القصة عن رجلين يُقال إنهم من بني إسرائيل، منعرفش في زمن أنهي نبي،
لكن إللي يهمنا إن قصتهم بتتكرر في كل زمان، فلازم ناخد بالنا ونعتبر..
الرجلين دول، واحد منهم غني ربنا أعطاله بستانين مليانين شجر من كل الثمرات، وخصوصا شجر العنب، لإنه أفضل الثمار ..
والمسافة إللي بين البستانين كمان مكنتش فاضية،
لأ، ده ربنا جعل فيها كمان زرع ، ده غير إن من الأطراف الخارجية للبستانين النخل محاوط المكان من كل جانب.. فكان شكل البستانين جميل جدا وجذاب وكله نضارة وتناسق..
كمان موقع البساتين كان ممتاز،
يعني بيدخل له الهوا والشمس بشكل منتظم وصحي.. زي ما بنقول على شقة من الشقق مثلا: الشقة دي شِرحة وبِرحة ، جَوَّها بحري وهواها يرد الروح ويشرح القلب😅
أهه البستانين بتوع صاحبنا ده كانوا من أحسن ما يمكن في كل شيء بالذات الموقع، فعشان كده الثمار طلعت على أحسن ما يكون..
ومش بس كده، ده الثمر إللي كان بيطلع مكنش فيه أي حاجة منه بتبوظ خالص أو تفسد 👌
"وَاضْرِبْ لَهُمْ مَثَلًا رَجُلَيْنِ جَعَلْنَا لِأَحَدِهِمَا جَنَّتَيْنِ مِنْ أَعْنَابٍ وَحَفَفْنَاهُمَا بِنَخْلٍ وَجَعَلْنَا بَيْنَهُمَا زَرْعًا"

وكان لما يسقي الزرع في البستانين مكنش بيحتاج يحفر في الأرض عشان يطلع المياه الجوفية،
ولا كان بيحتاج إنه يجيب عُمال ينقلوا المياه للأرض عنده، ولا أي حاجة من دي،
لأ، ده ربنا كان منعّمه ومريّحه أكتر، فكان مفجّر له نهر منها فيها والنهر ده كان بيمشي في البساتين ويرويها،
وربنا جعل له زي عيون المية كده بتجري وسط البساتين من النهر ،فعلا سبحان الله حاجة تسحر العيون😮
"كِلْتَا الْجَنَّتَيْنِ آتَتْ أُكُلَهَا وَلَمْ تَظْلِمْ مِنْهُ شَيْئًا وَفَجَّرْنَا خِلَالَهُمَا نَهَرًا"
شوفوا النعم إللي ربنا أنعم بيها على الرجل دي كلها،
عمل إيه هو عشان يشكر النعم دي😕

☆شوفوا،
الناس في شكر النعم أنواع:
◇نوع بيتكبر ويطغى بالنعمة وبيعصي ربنا بيها،
ودول ربنا بيصبر عليهم لعلهم يتوبوا، ولما بيستمروا في معاصيهم وتكبّرهم، بيسلب منهم النعم دي أو بيموتهم عليها والعياذ بالله👌
يعني مثلا تلاقي واحد ربنا مديله نِعم زي نعمة البصر ونعمة السمع،
وبعدين تلاقيه بيستعملها في المعاصي ويتفرج على الأفلام والمسلسلات وبيسمع الأغاني..
أو تلاقي واحدة ربنا معطيها نعمة زي نعمة الجمال، تقعد تستعرض جمالها قدام الناس وتخرج متبرجة في الشارع وتفتن الشباب..
دول ممكن يفضلوا مستمرين في استعمال النعم في معصية الله لحد ما ربنا يسلبها منهم إن أراد عقابهم ولم يعفو عنهم..

كم مرة سمعتم عن بنت عملت حادثة وهي لابسة لبس مش كويس،
وخرجت من الحادثة وهي مشوّهة أو محروقة أو عندها عاهة مستديمة والعياذ بالله قضت على جماله إللي كانت بتُبَارز ربنا بيه بالمعصية ليل نهار بدل ما تشكر النعمة كما يحب ويرضى؟
كم مرة سمعتم عن شاب عمل حادثة وهو بيسمع الأغاني وبدأ يطلّع في الروح، فحاولوا يلقنوه الشهادة لكن للأسف ما عرفش يقولها وفِضِل يردد الأغاني المحرمة لحد ما روحه طلعت؟
شوفنا وسمعنا كتير عن حكايات زي دي، وكلهم هيُبعَثوا يوم القيامة وهمّ على المعصية دي، إن لم يعف عنهم الله، لإن من مات على شيء بُعث عليه👌

◇النوع التاني من الناس هو نوع كل ما ربنا يزوّد له في النِّعم يتواضع لربنا ويشكر نعمته ويستعملها في طاعته عز وجل، وده ربنا بيمتّعه بالنعم دي حتى الممات..
كام مرة سمعنا عن واحد مات وهو ساجد أو صائم؟
دي ناس أفنت نعمة الصحة في تسخيرها في طاعة الله، وهو ده شكر النعمة..
كام مرة سمعتم عن بنت ماتت وهي بتقرأ القرآن؟
أو بنت ماتت بحجابها مستورة مش باين منها شعراية حتى، رغم إنها ممكن تكون وقعت من مكان مرتفع مثلا ،
الجزاء من جنس العمل يا جماعة، إللي يشكر نعمة ربنا ..ربنا هيبارك له في النعمة ويزودها له،
واحنا شوفنا مثال على شكر النعم في سليمان عليه السلام وفي ذي القرنين،
وإللي يكفر نعمة ربنا ويستعملها في معصيته ويتكبر بيها ويستغنى، ربنا هيسلبها منه في يوم من الأيام👌
وربنا مهما أمهل الناس، فهو يمهل ولا يهمل..
فالرجل صاحبنا بقى عمل إيه في النِّعم إللي ربنا أعطاها له💁‍♂️
للأسف كان من النوع الأول، تكبّر وطغى 😞

والراجل ده كان له صاحب فقير فلوسه قليلة مش زي صاحبه،
في يوم من الأيام الراجل الغني قال لصاحبه الفقير: تعال نتمشى في البستان عندي شوية كده..
دخلوا البستان

#قصص_الأنبياء
#الحلقة_الخمسون
#قصة_الأبرص_والأقرع_والأعمى

قصتنا النهاردة هي قصة الأعمى والأبْرص والأقْرع، حصلت القصة دي في بني إسرائيل في أي زمن بالتحديد أو إيه أسماء الثلاثة دول منعرفش🤷‍♂️
لكن رسول الله ﷺ حكالنا القصة دي للعبرة،
قال رسول الله ﷺ:
"إِنَّ ثَلَاثَةً في بَنِي إِسْرَائِيلَ أَبْرَصَ وَأَقْرَعَ وَأَعْمَى بَدَا لِلَّهِ أَنْ يَبْتَلِيَهُمْ.."
يعني كان في ثلاثة رجال من بني إسرائيل، واحد أعمى مش بيشوف، والتاني أبرص يعني عنده مرض البرص إللي هو بيكون أجزاء من الجسم لونها أبيض ومختلف عن باقي لون الجسم الطبيعي، ربنا يعافينا ويعافي كل مبتلى🤲
والتالت أقرع معندهوش شعر..
فربنا أراد إنه يبتليهم ويختبرهم...

☆طيب ما همّ أصلا في بلاء، هيبتليهم أكثر من كده إيه🤔
أشد البلاء هو الإبتلاء بالنعم👌
لإن الصبر على الشدة ناس كثير تقدر تحققه،
زي الصبر على المرض والصبر على الفقر ، وهكذا ..
وابتلاء الصبر على الشدة ده بيقدر عليه المؤمن والكافر زي ما قلنا قبل كده،
يعني الواحد مضطر يصبر كده كده مفيش قدامنا حيلة إلا الاستسلام غالبا🤷‍♂️
والسبب في كده إن النفس البشرية بتكون متأهبة ومستعدة للتحدي والمواجهة، وعلى طول الإنسان يقوم يتضرع ويدعو ربه بخضوع وانكسار وتذلل عشان يرفع عنه البلاء،
بعكس الإنسان إللي عايش في نعيم ومش بيواجه مشاكل، هتلاقيه مش في دماغه أصلا الاحتياج لشيء، وعايش حياته بالطول والعرض، ولو ذكّرناه بالله هيقول وهو أنا محتاج ربنا في إيه ما أنا كل أموري تمام💁‍♂️
عشان كده ربنا بيقول لنا:
"كَلَّا إِنَّ الْإِنسَانَ لَيَطْغَىٰ..أَن رَّآهُ اسْتَغْنَىٰ"

فالثلاثة دول لما كانوا في ابتلاء بالنّقَم يعني الشدائد كانوا خاضعين لله منكسرين،
فربنا أراد إنه يبتليهم بالنعم عشان يشوفوا نفسهم هيبقوا عاملين إزاي،
مع إن ربنا عالم باللي في قلوبهم لإن ربنا علام الغيوب وعليم بذات الصدور،
لكن زي ما قلنا كتير قبل كده، ربنا مش بيحاسبنا على سابق علمه فينا، لكن على أعمالنا الفعلية وإللي هي مش غيب بالنسبة له عزو جل أبدا، فبيبتلينا عشان نشوف الحاجات المستخبية جوة قلوبنا،
فينجو مننا إللي يُزكي نفسه ويعالج الأمور دي، ويَهلَك إللي يعمل نفسه مشفش حاجة ويكمل في الغفلة👌
فربنا عمل إيه معاهم 😊
قال رسول الله ﷺ: "فَبَعَثَ إِلَيْهِمْ مَلَكًا.."
يعني بعت لهم مَلك من الملائكة في صورة بشر عشان يسألهم أمنيتهم إيه؟
"فَأَتَى الْأَبْرَصَ فقال: أَيُّ شَيْءٍ أَحَبُّ إِلَيْكَ؟"
يعني المَلك راح للأبرص واتكلم معاه وبعدين سأله: نِفسَك في إيه، أو تتمنى إيه🤔
فالأبرص قال:
"لَوْنٌ حَسَنٌ وَجِلْدٌ حَسَنٌ، قد قَذِرَنِي الناس"
يعني أتمنى إن جلدي يكون حلو و لُوني يكون لون واحد مش لونين، وميكونش عندي إللي الناس بيبعدوا عني بسببه ده ويستغربوني 😔
"فَمَسَحَهُ فَذَهَبَ عنه، فَأُعْطِيَ لَوْنًا حَسَنًا وَجِلْدًا حَسَنًا"
يعني المَلَك مسح على جلد الرجل الأبرص فاختفى البَرص، والرجل أخد إللي هو عايزه من اللون والجلد الجميل..
وبعدين المَلك سأله: أَيُّ الْمَالِ أَحَبُّ إِلَيْكَ؟
يعني إيه أكتر أنواع الأموال إللي بتحبها🤔
فالراجل قال له: الْإِبِلُ، فالمَلك أعطاه نَاقَةً عُشَرَاءَ وقال له: يُبَارَكُ لك فيها.
يعني الملك إداله له ناقة حامل 🐪 ودعاله بالبركة👌 وبعدين سابه ومشي..
وراح المَلك للرجل الأقرع واتكلم معاه هو كمان وسأله تتمنى إيه؟
فالأقرع قال: نِفسي شعر راسي يرجع تاني؛ لإن الناس اشمأزوا منه ومن منظر راسي وشكلي😞
=ويمكن كانوا بيضايقوه كمان بسبب إن همّ عندهم شعر وهو لأ=
فأنا عاوز شعري يطلع تاني ويكون شكلي جميل
فالملَك مسح على رأس الأقرع فطلع فيها شَعر جميل،
ثم سأله برده عن أكثر الأموال إللي بيحبها فقال له: البقر ، فالملَك اداله بقرة حامل🐄 ودعا له بالبركة، وبعدين سابه ومشي..
وراح بعد كده للأعمى واتكلم معاه وسأله تتمنى إيه؟
فالأعمى قال له : نفسي ربنا يرجع لي بصري عشان أشوف الناس😔
فمسح الملك على عينه فبقى مُبصِر ، فسأله الملك هو كمان: بتحب إيه أكثر نوع من الأموال 🤔
فقال : الغنم ، فاداله شاة حامل 🐐 .. ودعا له بالبركة وبعدها سابه ومشي..

عدّت كم سنة والأبرص بقى عنده وادي من الإبل، والأقرع عنده وادي من البقر، والأعمي عنده وادي من الغنم.
تخيلوا معايا كده يعني إيه وادي😅
الوادي ده أرض منخفضة، حاجة كده زي الحوض الوااااسع، بيكون طوله آخر ما تجيب عينك من اليمين والشمال،
فكل واحد منهم بقى عنده أرض مليانة بالإبل أو البقر أو الغنم😮
وهنا جه وقت الإختبار👌
بعد كام سنة رجع لهم المَلَك تاني ..
الملك راح للرجل إللي كان أبرص في صورة رجل أبرص عشان يفكّره بنفسه زمان لو كان نِسي..
وقال له: "رَجُلٌ مِسْكِينٌ تَقَطَّعَتْ بِيَ الحِبَالُ في سَفَرِي فلا بَلَاغَ الْيَوْمَ إلا بِاللَّهِ ثُمَّ بِكَ،
أَسْأَلُكَ بِالَّذِي أَعْطَاكَ اللَّوْنَ الحَسَنَ وَالجِلْدَ الْحَسَنَ وَالمَالَ بَعِيرًا أَتَبَلَّغُ عليه في سَ

#قصص_الأنبياء
#الحلقة_الواحدة_والخمسون
#قصة_آل_عمران
#مريم_زكريا_الجزء_الأول

كنا واقفين قبل ما نبدأ قصص القرآن عند بني إسرائيل لما كانوا عايشين في بيت المقدس تحت الحكم الفارسي وبعدين تحت الحكم الإغريقي وبعدين تحت الحكم الروماني،
وقلنا إن في حاكم روماني اسمه هِيرُودِس هو إللي كان بيحكم فلسطين،
والحاكم ده دخل اليهودية ولكنه كان ظالم وفاسد والكل كان بيكرهه حتى اليهود وقلنا إنه جدّد المسجد الأقصى ووسعه،
ده كان حال الوضع في فلسطين بصفة عامة، ندخل بقى للوضع في بني إسرائيل بصفة خاصة،
بني إسرائيل إللي كانوا عايشين في فلسطين في الوقت ده كانوا من نسل يهوذا ..إللي كان فيه نسل ملوك بني إسرائيل،
واحنا عارفين إن المُلك والنبوة اتجمعوا سوا تاني مع بعض لداوود وسليمان عليهما السلام💁‍♂️
فبني إسرائيل الموجودين تحت الحكم الروماني في فلسطين هم من ذرية داود وسليمان عليهما السلام👌
كان في بني إسرائيل أهل بيت صالحين من العُبّاد، وكانوا من نسل سليمان عليه السلام،
أهل البيت ده كان معروف بين بني إسرائيل بالتقوى والصلاح وكثرة العبادة وكان اسمهم :《آل عمران》
"إِنَّ اللَّهَ اصْطَفَى آدَمَ وَنُوحًا وَآلَ إِبْرَاهِيمَ وَآلَ عِمْرَانَ عَلَى الْعَالَمِينَ"
الأب اسمه عمران وكان كبير الأحْبار من اليهود يعني كبير العلماء، وكان الأحبار في بني إسرائيل بيرجعوا له في كل شيء، وزوجته كان اسمها حَنّة،
وكان لها أخت اسمها أَشْيَاع وزوجها اسمه زكريا، ويقال إن أشياع دي بنتها،
فالموضوع على خلاف بين العلماء 😅
المهم في يوم من الأيام حَنة زوجة عمران شافت عصفورة بتأَكّل عيالها الصغيرين في العِش، فتحركت عاطفة الأمومة وبقى نفسها في طفل وكانت ساعتها كبيرة في السن،

☆زي كده لما نشوف طفل صغير لسه مولود ويبقى نفسنا في طفل زيه،
أو واحدة خلاص اكتفت من العيال بس لما تشوف طفل مع واحدة صاحبتها أو أختها، تشتاق نفسها للأطفال 😁

فده إللي حصل مع حَنّة زوجة عمران، اشتاقت للأطفال فدعت ربنا إنه يرزقها بطفل،
ونذرت إن إللي في بطنها ده هيكون لله، يعني عابد لله عشان ينصر الدين،
وكان موضوع نذر الأولاد للعبادة ده في بيت المقدس مشهور عندهم،
وتمّنت إن الطفل ده يكون ذكر عشان الذكر مختلف عن الأنثى في العبادة؛ لأن الأنثى بيجيلها وقت وتنقطع عن العبادة بسبب الحيض بعكس الذكر، ده غير قوة تحمل الذكر لأعباء الدعوة إلى الله،
"إِذْ قَالَتِ امْرَأَةُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي إِنَّكَ أَنتَ السَّمِيعُ الْعَلِيمُ"

وفعلا حملت زوجة عمران لكن لما ولدت كان المولود أنثى🙊
فقالت يارب دي طلعت بنت😥
والولد مش زي البنت في العبادة😔
"فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَى وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالأُنثَى "

☆طبعا ربنا يعلم إنها بنت وحَنة عارفة إن ربنا يعلم إنها بنت بس بتقول كده من باب مناجاة ربنا،
يعني بتكلم ربنا و بتعبّر عن استغرابها وإن أمنيتها متحققتش مع إن نيتها كانت حلوة وربنا أعطاها عكس ماهي عايزة😕

شوفوا بقى بالرغم من إن المولود طلع بنت مش ولد ..حنة زوجة عمران مقلتش خلاص يارب أهه إنت إللي قدّرت كده ..هعمل إيه يعني،
فخلاص هرجع في النّذر بتاعي لأن مش ده إللي كنت مخططة له، وخلاص وهخلي البنت معايا وهستنى لما ترزقني بولد بقى 🤷‍♂️
لأ، دي صممّت إنها تكمّل في القرار إللي أخذته وتستغل النعمة المُتاحة إللي ربنا أعطاها لها عشان تحقق نيتها الحلوة برده👌
المهم....حَنّة زوجة عمران سمت البنت مريم، ومريم معناها العابدة،
يعني كأنها بتقول لربنا:
يارب ولد ولّا بنت خلاص إللي انت رزقتني بيه هستغله ومش هضيعه 😤
ودعت ربنا إنه يعصمها من الشيطان هي وذريتها🤲
"وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ"
ودي صفات الإنسان الصادق في عبادته لربنا المُستسلم لقدر الله إللي مش بيتبع هواه..نشتغل بالموجود إللي ربنا أعطاه لنا 👌

☆وعايزين نقف هنا ياجماعة وقفة😊
حنة زوجة عمران كان نفسها في حاجة معينة بصورة معينة وكانت نيتها فيها طيبة وخالصة لوجه الله،
وده بيحصل معانا ساعات لما ندعي بحاجة معينة بصورة معينة وتبقى نيتك فيها طيبة،
لكن ربنا يعطينا حاجة عكسها خالص..فنبدأ نشك في نفسنا ..نشك في حكمة ربنا والعياذ بالله والشيطان يبدأ يوسوس لنا وندخل في متاهات 😶
لما حنة ربنا أعطاها عكس إللي كان نفسها فيه عملت إيه😊
استغلت الموجود 👌
عارفين زي إيه😁
واحدة نفسها تلبس النقاب وأهلها مش موافقين وبيمنعوها كل مرة تلبسه،
وساعات بيقطعوا النقاب مثلا أو مش بيدوها فلوس تشتري نقاب أوغيره،
وبيخلوها تخرج معاهم من غيره بالغصب وهي مغلوبة على أمرها في ده حاليا، ومش عارفة تلبسه،
طيب هي تعمل بقى دلوقتي؟
هل توقّف حياتها عند النقطة دي؟
طيب دي حاجة مش متاحة دلوقتي زي ما هي بتتمنى، خلاص يبقى تشوف إللي ربنا أ

#قصص_الأنبياء
#الحلقة_الثانية_والخمسون
#مريم_زكريا_الجزء_الثاني
#زكريا_يحيى

اتكلمنا المرة إللي فاتت عن زكريا عليه السلام لما كان بيدخل على مريم الطفلة الصغيرة عشان يعطيها الأكل بتاعها ،
فكان بيلاقي عندها فاكهة الصيف في الشتاء ،
وفاكهة الشتاء في الصيف، فلما سألها قالت له إن ده رزق من عند ربنا👌
فوقع في قلب زكريا عليه السلام إن ربنا حقق للطفلة الصغيرة دي كرامة وأعطاها الفاكهة من غير ما تطلب،
أمّال لو أنا بقى دعيت وطلبت بقى ..أكيد ربنا هيستحيب،
حتى ربنا مقالش في القرآن فدعا زكريا لأ..ده قال:
"هُنَالِكَ دَعَا زَكَرِيَّا رَبَّهُ "
فكأن زكريا عليه السلام جت له فرصة فاغتنمها👌
يعني يارب إنت إديتها حاجة عجيبة من عجائب الأرزاق من غير ماهي تسألك،
لكن أنا يارب هسألك فيا ترى عطائك هيكون إزاي لمن يسألك😮
ودعا زكريا وقال:
"رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاء"
يعني يارب هب لي ذرية طيبة على الرغم من كبر سني وشعري إللي شاب وعقم زوجتي.. يا سميع الدعاء يا مَن ترزق من تشاء بغير حساب🤲

☆طيب هو ليه زكريا عليه السلام قال لربنا : "هب لي" ومقلش "أعطني"🤔

لأن الهبة لا يُحاسَب عليها الشخص إللي هيوهبها لي لو لم يهبها لي👌
بمعنى إن أنا لو اديتك هِبة فده فضل من عندي، ولو منعتك الهبة دي فانت ملكش أي حق إنك تزعل أو تضايق،
بعكس لو جيت طلبت مني شيء، وأنا منعته عنك ممكن ساعتها تزعل..
ننزّل الموقف على زكريا عليه السلام:
هو طلب من ربنا الهبة، بمعنى إنه لو إداله الطفل هيبقى كرم وفضل من ربنا عليه عز وجل ،
ولو منعه الطفل، فخلاص مش مشكلة مش هيزعل إن ربنا منع عنه شيء لإنه أصلا بيطلبها وهو شايف إن ملوش حق فيها ولا يملك حاليا أسباب الهبة إللي بيطلبها دي، وكله هيبقى أولا وأخيرا بفضل ربنا..
وده يعملنا جانب من أدب الأنبياء في الدعاء عليهم السلام👌

تعالوا كده نحلل دعاء زكريا عليه السلام ونشوف إزاي دعا ربناو نتعلم منه 😊
◇أول حاجة، زكريا عليه السلام كلم ربنا بينه وبين نفسه، مناجاة في الخفاء من غير ما حد يسمعه..
"إذْ نَادَى رَبَّهُ نِدَاء خَفِيًّا"
قال:
يارب متسبنيش من غير ولد ولا وارث يرث النبوة من بعدي وأنت خير الوارثين🤲
"وَزَكَرِيَّا إِذْ نَادَىٰ رَبَّهُ رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ"

☆واحد عايش بقاله مائة سنة تقريبا بيطلع يشوف الناس ، فلان معاه أبناؤه بيلعب معاهم، وده أبناؤه بياخدوا بالهم منه وده..وده..
مائة سنة.. ماسمعش كلمة بابا.. مش هيحس بإحساس زكريا عليه السلام غير إللي اتحرم من نعمة الذرية...
يارب يرزق كل مشتاق ذرية صالحة 🤲

☆عارفين بقى زكريا عليه السلام حالته من ناحية التشخيص الطبي إيه🙃؟
رجل وزوجته داخلين على مائة سنة.. هي عاقر وهو شيخ كبير عجوز.. يعني من الناحية الطبية استحاااالة إنهم يخلفوا أطفال😶
فكان زكريا عليه السلام بيدعو في الخفاء بالليل بينه وبين ربنا... متخيلين لو الناس سمعوه وهو بيدعي بإن ربنا يرزقه طفل، وهو ظروفه زي إللي قلناها كده.. الناس هيكون رد فعلهم إيه😶

◇تاني حاجة بدأ زكريا عليه السلام الدعاء بأنه أظهر الفقر والضعف والذل لله👌
قال : يارب أنا عظمي بقى ضعيف يعني لو انت شايفني واقف لكن انا عظمي ضعيف😔
وشعر رأسي شاب كله، وأنا عمري ما دعيتك قبل كده ورديت دعائي،
"قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُن بِدُعَائِكَ رَبِّ شَقِيًّا"

☆خدوا بالكم إن في أدعية ربنا بيستجيبها لنا من غير ما ندعي بيها👌
يعني انت النهاردة دعيت ربنا إنه يحفظ لك بصرك؟
دعيت ربنا إنه يحفظ لك سمعك، جسمك، عيالك، والدتك، والدك، بيتك إللي إنت ساكن فيه، موبايلك إللي معاك دلوقتي، إلى آخر كل النعم إللي احنا غارقانين فيها ليل نهار؟
طيب ولما مش بتدعي إن ربنا يحفظهم؟ مين إللي بيحفظهم من غير دعاءك؟ الحفيظ عز وجل..
نِعم كتير أوي ربنا حافظها لنا من غير ما ندعي بس احنا مش واخدين بالنا 😞

◇تالت حاجة بقى قال لربنا في الدعاء السبب هو ليه عايز الولد، فقال :
"وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِرًا فَهَبْ لِي مِن لَّدُنكَ وَلِيًّا.. يرِثُنِي وَيَرِثُ مِنْ آلِ يَعْقُوبَ وَاجْعَلْهُ رَبِّ رَضِيًّا"
يعني يارب أنا خايف إني أسيب أحبار اليهود يُفسدوا على بني إسرائيل دينهم ومفيش نبي غيري دلوقتي، وكمان زوجتي عاقر لا تلد😔
فيارب اوهبني من رحمتك ذرية 🤲
لكن مش أي ذرية أنا مش عايز ولد كده وخلاص، لأ أنا عايزه يكون ذرية طيبة يرثني ويرث من آل يعقوب النبوة..

فاستجاب الله دعاء زكريا عليه السلام👌
ومش بس كده😁
ده ربنا أرسل له الملائكة عشان تبشره وتقوله:
"يا زَكَرِيَّا إِنَّا نُبَشِّرُكَ بِغُلامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيًّا"
يعني يا زكريا، احنا ملائكة الله جايبين لك البشارة من ربنا إنه استجاب دعاءك وهيرزقك بولد اسمه يحيى من أحسن ا

#قصص_الأنبياء
#الحلقة_الثالثة_والخمسون
#مريم_زكريا_الجزء_الثالث
#مريم_الجزء_الأول

اتكلمنا المرة إللي فاتت عن زكريا عليه السلام وإنه دعا ربنا إنه يرزقه الذرية الصالحة لما شاف إنه بيرزق مريم بنت عمران فاكهة الصيف في الشتاء وفاكهة الشتاء في الصيف،
وكان ده كرامة من ربنا لمريم بسبب كثرة عبادتها وزهدها وتعلقها بالله،
كانت مريم مختلفة عن البنات إللي في سنها، يعني كان جسمها بيكبر وبيقرب من البلوغ أسرع من البنات العادية،
وكان من عادة بني إسرائيل إنهم يحجّون لبيت المقدس،
يعني بيطلعوا في قافلة من مدن القدس ويتوجهوا من هناك لبيت المقدس لأن بيت المقدس كان قبلتهم،
زي ما المسلمين بيتوجهوا للحج في مكة👌
في يوم من الأيام لما كان عمرها حوالي خمسة عشر سنة
خرجت في قافلة مع أهلها لبيت المقدس وهي كانت من مدينة النّاصرة،
في الطريق..سابت أهلها وتأخرت عن القافلة لسبب معين،
"إِذِ انتَبَذَتْ مِنْ أَهْلِهَا مَكَانًا شَرْقِيًّا"
إيه السبب منعرفش بالضبط..ممكن يكون أصابها الحيض،
أو إنها كانت عايزة تطهر من الحيض...أو غيرها من أقوال العلماء،
المهم إن حصل حاجة خلتها تتأخر عن الناس إللي معاها وراحت وراء جبل قريب كده بس بعيد عن عنيهم،
"فَاتَّخَذَتْ مِن دُونِهِمْ حِجَابًا "
فهي كانت عايزة تكون لوحدها..وفجأة لقت قصادها رجل..فاتخضت وخافت 🙊
"فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا"
فكرت إن الرجل ده عايز يراودها عن نفسها أو عاوز يؤذيها
ويعمل فيها حاجة يعني،
فقالت له : أعوذ بالرحمن منك لو كنت من المتقين😰
لأن التّقي هو إللي بيخاف ربنا وخوفه من ربنا بيمنعه إنه يعمل أي شيء محرم👌
"قالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيًّا"
فالرجل قالها: متخافيش الموضوع مش زي مانتي فاكرة أنا رسول من عند ربك عشان أوهبك غلام..طفل طيب وطاهر، هتكوني انتِ أمه.
"قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلامًا زَكِيًّا"

☆قبل ما نكمل هنقف كم وقفة كده مع آيات القرآن نتدبرها 😊
♡ربنا بيقول 《وأرسلنا إليها روحنا》
الروح هنا المقصود به جبريل عليه السلام ..طيب ليه ربنا سمّى جبريل عليه السلام بالروح🤔
احنا كبشر بنتكون من حاجتين هما جسد وروح صح؟
إيه إللي بيحرك الجسد😁
الروح هي إللي بتحرك الجسد..يعني الروح هي السبب في حياة الجسد👌
جبريل عليه السلام هو المَلك المسؤول عن توصيل الوحي،
والوحي ده سبب في حياة القلوب...فالإنسان بيكون حي بحاجتين: حياة جسدية وحياة قلبية👌
الحياة الجسدية كوووول الناس بتشترك فيها حتى الحيوانات بتشترك في الحياة الجسدية دي،
لكن الحياة القلبية دي خاصة بعباد الله المتقين....
"أَوَمَن كَانَ مَيْتًا فَأَحْيَيْنَاهُ" يعني كان كافرا فهديناه👌

يعني باختصار كده الروح تحيا بها الأجساد وجبريل عليه السلام يحيا بسببه القلوب عن طريق الوحي..عشان كده اسمه الروح😊

♡ نشوف الآية الثانية :
ربنا بيقول عن مريم لما راحت في مكان لوحدها لقت قصادها رجل《بشرا سويا》..ليه ربنا قال بشرًا سويا 😁
عشان يوصّل لنا إن إللي مريم شافته كان من البشر ومكنش من الجن..ده أولاً
ثانيا : البشر إللي هي شافته ده هو في أصله مَلك من الملائكة إللي هو جبريل عليه السلام،
والبشر ميقدروش يشوفوا الملائكة على أصلهم لازم يتمثلوا في صورة بشر عشان نقدر نشوفهم،
فلو كان الرجل إللي هي شافته ده طويل جدا مثلا أو قصير جدا أو في خِلقته أو في شكله أي حاجة مختلفة عن البشر العاديين كان الطبيعي إنها تخاف ويبان إن ده إللي مخوّفها💁‍♂️
لكن القرآن بيقول لنا إن ده مكنش سبب خوفها،
يعني هي مخفتش لمجرد إنها شافت بشر لإن البشر إللي شافته كان بشر سويّ الخِلقة مفيهوش علامة غريبة تستدعي الخوف في حد ذاته.. لأ.. ده بشر طبيعي زي أي بشر،
لكن هي خافت على نفسها من الرجل ده إنه يعتدى عليها 👌

♡الآية الثالثة😊
لما قالت مريم《إني أعوذ بالرحمن منك》 ليه قالت الرحمن؟ مع إن المفروض هنا كانت تقول الجبار أو ذو الانتقام والبطش عشان تخوفه مثلا ، ولإن هي عايزة تدفع عن نفسها الضرر فطبيعي تستغيث بالقوي المتين الجبار 🤷‍♂️
زي كده لو حد اعتدى على حقي، هقول له:
"موعدنا عند الرحمن"؟ ولّا هقول له موعدنا عند الجبار ؟ 👌
فمريم عليها السلام قالت الرحمن بالذات ومقلتش اسم تاني من أسماء الله الحسنى إللي فيها معنى الاستجارة بذي القوة والجبروت والبطش؛ لإنها كانت بتحاول تذكّر الراجل ده برحمة ربنا قبل عذابه👌
بتذكّره بالرجاء قبل الخوف من باب الرفق بالناس ودعوتهم للخير قبل ترهيبهم بالضر والعقوبة..

◇وده يعلمنا إن في الدعوة إلى الله قبل ماننهى عن المنكر نأمر الناس بالمعروف حتى ربنا بيقول لنا إيه:
"كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ "
فربنا قدم الأمر بالمعروف قبل النهي عن المنكر👌
فدايما في الدعوة إلى الله نقدم الأمر بالمعروف وبعدها على طول في نفس اللحظة ننهى ع

#قصص_الأنبياء
#الحلقة_الرابعة_والخمسون
#مريم_زكريا_الجزء_الرابع
#يحيى

اتكلمنا عن زكريا عليه السلام لما دعا ربنا إنه يرزقه بولد عشان يرث النبوة، وربنا استجاب دعاؤه وحملت زوجته "إشياع" بيحيى عليه السلام،
ولدت إشياع يحيى عليه السلام، وكان يحيى مختلف عن باقي الأطفال؛ لإن ربنا أعطاله الحكمة والفَهم من وهو صغير ،
حتى لما كِبِر شوية وكان الأطفال يقولوا له تعالى نلعب كان بيقول لهم:
احنا متخلقناش للعب وكان يسيب اللعب ويتعبد لله، و ده إللي ربنا قال عنه في القرآن:
" وَآتَيْنَاهُ الْحُكْمَ صَبِيًّا"

◇وممكن نشوف الكلام ده مع أطفال صغيرين حوالينا تلاقي البنت على صغر سنها تطلب إنها تلبس الحجاب،
وتلاقيها منها لنفسها كده متجهة لطاعة ربنا بالرغم إن إللي حواليها مش في دماغهم أصلا وكل همهم يلبسوا على الموضة ويتفسحوا ويتحرروا من أي أوامر أو التزامات شرعية و...و...
فلما تلاقي بنتك ولّا أختك ولا أي طفلة أو طفل ماشيين في طريق ربنا شجعهم كتير،
يمكن تشجيعك ليهم ده يكون سبب في ثباتهم على الدين وتكون أعمالهم بسبب تثبيتك لهم في ميزان حسناتك 😊
واوعوا.. 🤐
إوعوا تقولوا للبنت مثلا "يا حبيبتي انتِ لسه صغيرة"،
ولا "عاملة في نفسك كده ليه!"، ولا أي كلام من الكلام المحبط ده إللي بيقتل الهِمم والعزائم ده 😑
لو البنت رجعت عن الإلتزام بطريق ربنا وكنتم انتم السبب ، هتبقى في ميزان سيئاتكم😶
ولازم تكونوا عارفين إن المسلم إللي بينشأ في طاعة الله، بيكون من السبعة إللي ربنا بيظلهم يوم القيامة من حر الشمس في ظل عرشه لما تكون الشمس قريبة جدا من رؤوسنا نسأل الله السلامة..
مش لو حد فينا شاف طفل واقف في عز الشمس مش بيصعب علينا؟
أهه يوم القيامة هيبقى أشد من حر الدنيا 😞
فياريت يصعب عليك هناك أكتر من الدنيا، وخلوا أطفال المسلمين يبنوا لأنفسهم ظلهم يوم القيامة بدون ما تحبطوهم👌
المهم،
يحيى عليه السلام كان طائع لربنا من صغره وزاهد في اللعب ، وعنده جدية في الإلتزام، وده كان بسبب إن ربنا قال له《يَا يَحْيَى خُذِ الْكِتَابَ بِقُوَّةٍ》💪🏻
يعني خد التوراة باجتهاد وبجدية وهمة عالية.. ومش هتعرف تاخدها بجِد واجتهاد غير لما تفهمها صح الأول،
ولما تفهمها صح ساعتها العقيدة هتستقر عندك وتقدر تطبقها في أقوالك وأفعالك كلها 👌

☆وطبعا الكلام ده لما ربنا بيقوله في القرآن فهو مش ليحيى لوحده، ده لينا احنا كمان 💁‍♂️
يعني ربنا بيقول لنا خدوا القرآن بجدية.. افهموه صح عشان تعرفوا تطبقوه..
فلما ربنا يقول أطيعوا الله وأطيعوا الرسول،
يبقى لازم تاخد الموضوع بجدية وأول خطوة في الجدية دي أكيد هي:
إنك تتعلم وتفهم إيه هي الأوامر دي إللي مفروض تطيعها،
وبعدين تاني خطوة في الجدية بتكون إنك تطيع كل الأوامر دي،
مش الموضوع يبقى على حسب ظروفك ومزاجك وهواك: ده هطيعه وده لأ؟ 😕
"أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ "؟!
يعني ما ينفعش مثلا تقول :
والله أنا هطيع ربنا وأصلي وأقرأ قرآن وأصوم وأزكي،
لكن الموسيقى مش هقدر، لازم أسمع😤
أو السينما دي روحي، معرفش أعيش من غيرها،
أو كله إلا الاختلاط مش هقدر مكلمش زمايلي ونخرج مع بعض😤
الدين يا جماعة ماينفعش ناخد نصه ونسيب نصه، ولا حتى نسيب حتة منه بمزاجنا...
آه ممكن نقصر غصب عنا ونكون زعلانين بسبب تقصيرنا في فريضة أو معصية،
لكن ميبقاش بمزاجنا: الأمر الإلهي ده هعمله لإنه سهل، وده لأ مش هعمله لإني مش مقتنع إنه فرض أو هيضايقني لو عملته.. الدين مش كده..
الدين ناخده كده كله على بعضه 😅

ثم لو كل حاجة سهلة كده يبقى فين أجر المجاهدة 🤷‍♂️
وكمان الجنة حُفّت بالمكاره يعني متحوّطة كده بالحاجات إللي بنكره نعملها...الحاجات إللي هي ضد هوانا👌

يعني مش هندخل الجنة غير لما نكسر المكاره دي💪🏻
زي كده لما واحد بيعدّي حواجز عشان يوصل لهدفه👌
وربنا بيقول لنا:
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ"
فين بقى مجاهدتنا لنفسنا وصبرنا على الطاعة وصبرنا عن المعصية 💁‍♂️
هو مين إللي بيبقى عايز يقوم في عز البرد يحط مية على جسمه عشان يتوضى؟
والله لولا إننا بنجاهد عشان نرضي ربنا وناخد الأجر مكنش في حد قام من تحت البطانية 😳
على فكرة الكلام ده لا يتعارض مع حديث لن يدخل أحد الجنة بعمله 😁
لأن واحد من الصحابة قال لرسول الله ﷺ خلاص بلاش نعمل ..فرسول الله قال:
"اعملوا فكل مُيَسر لما خُلق له"
فلما الواحد يلاقي نفسه واخدة الكتاب بقوة وماشية في طريق ربنا هنا نعرف إن ربنا ميسّرنا لطريق الجنة 😊
ربنا قال لنا اعمل كذا..حاضر يارب حاااالا،
متعملش كذا..حاضر يارب حااالا..مش نستنى لما نشوف ظروفنا تسمح ولّا لأ..ولا نقعد ندور على شيخ يقولنا عادي لو معملتش كذا أو يجوز إنك تعمل كذا على حسب الهوى🤓

فيحيى عليه السلام من صغره وهو بيطيع أمر ربنا👌
طب إيه باقي صفات يحيى عليه السلام؟
من الحاجات إللي ربنا رزقه بيها ك

#قصص_الأنبياء
#الحلقة_الخامسة_والخمسون
#مريم_زكريا_الجزء_الخامس
#عيسى_الجزء_الأول

اتكلمنا عن مريم عليها السلام وإنها كانت منقطعة للعبادة عشان كده اسمها مريم البتول،
وعلى فكرة كلمة "القِدّيسة مريم" دي من وصف النصارى لمريم رضي الله عنها،
والكلمة دي من الغُلُو في وصف مريم،
فاحنا كمسلمين منقولش الكلمة دي.. ربنا وصفها بالصِّدِّيقة ، وليها أوصاف تانية في الإسلام ، لكن وصف《 قِدّيسة》 ده مش تبعنا خالص، يعني كإن في إيحاء كده إنها مقدسة، والقُدسِية لله وحده عز وجل👌
وقلنا إنها حملت بعيسى عليه السلام بدون أب وإنها انعزلت بحملها عن الناس،
وقلنا إن حمل عيسى عليه السلام كان تسعة أشهر على أرجح أقوال العلماء،
بعد ما خلصت مدة الحمل وجاء وقت الولادة ،
ألم الولادة اضطر مريم عليها السلام إنها تلجأ لجذع نخلة تسند عليه وتولد عنده بعيد عن عيون الناس،
"فَأَجَاءَهَا الْمَخَاضُ إِلَى جِذْعِ النَّخْلَةِ"

☆ عايزاكم تتخيلوا معايا شابة صغيرة عفيفة في موقف زي ده، بتولد لوحدها من غير ما يكون أي حد معاها لا أم ولا أب ولا أخ...ومش بس كده الطفل إللي بتولده ملهوش أب😶
الواحدة لما بتكون بتولد بتبقى تعبانة وخايفة وقلقانة و...و...
مع إن أهلها حواليها وزوجها معاها ومطمنة إن بعد الولادة كل الأمور متجهزة للمولود الجديد،
مريم عليها السلام اجتمع عليها تعب الولادة والألم النفسي بتاع الوحدة ومفيش حد يراعيها ولا يعطيها أكل ولا ماء،
وكمان الخوف من مواجهة الناس بالمولود ده😞
فكل المشاعر دي متجمعة جواها فتعبتها نفسيا جدا وخلتها تتمنى الموت،
وقالت ياريتني كنت مت قبل ما يحصل لي كده ، وكانت الناس نسيتني ونسيِت كل حاجة عني😔
"قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّ"

◇إيه ده ثواني كده😳
هو مش تمنّي الموت منهِي عنه؟ وكده يبقى جَزع وعدم رضا بقضاء الله😯

أيوة، بس في وضع مريم هنا الأمر مختلف.. لإن مريم لما تمنت الموت كان لسببين ✌
◇الأول:
إنها خافت إن الناس يظنوا بها الشر في عفّتها وتقواها ، فيعايروها بتهمة تمس الشرف فده يخليها تُفتن في دينها ،
ويجوز للإنسان إنه يتمنى الموت لو خاف على نفسه فتنة في دينه،
حتى رسول الله ﷺ قال إن في حاجتين الإنسان بيكرههما :
الموت، والموت أفضل للمؤمن من 《الفتنة》 والحاجة التانية قلة المال، وقلة المال أقل في الحساب ،
لكن مينفعش الإنسان يتمنى الموت لو أصابه ضرر أو أذى أو ابتلاء بشكل عام زي مرض مثلا أو فقر أو غيره👌

◇الثاني:
إنها خافت على قومها إنهم يقعوا في البهتان وقذف محصنة عفيفة، ويكون ده بسببها...يعني تكون سبب إن قومها يقعوا في معاصي،
زي مثلا لما تكرهي إن تحصل مشكلة أو فتنة بين الناس بسببك.. أكيد محدش بيتمنى لحظة زي دي😅
فمريم مكنتش عايزة قومها يقعوا في الغلط بسببها، فتمنت الموت.

☆وفي هنا فايدة لنا وهي إننا لا نتمنى الموت عشان حصل لنا ابتلاء ...مش يمكن البلاء ده يكون هو سبب تغير حياتنا💁‍♂️
هي مريم اتمنت الموت بسبب ابتلاء وفي ظنها إن ده أسوأ وضع ممكن تتعرض له واحدة في حياتها، لكن كان نتيجته إيه؟
بقت أم لرسول من أولي العزم ، وكمان هيُنسب ليها هي، وهتفضل سمعتها مُبرأة زي ما هي،
لأ وكمان هتبقى أيقونة في العفة لكل العالمين، بعد ما كانت من الأخفياء في زمن بني إسرائيل فقط👌
فبلاش نتمنى الموت بسبب أي بلاء يحصل لنا أيا كان نوعه، لكن نصبر الصبر الجميل بيقين ميتهزش، يقين في إن رب الخَير لا يأتي إلا بالخَير 😊

لما مريم عليها السلام تمنت الموت كان التمني ده لمجرد لحظات، فهي لما قالت يا ريتني كنت مت، ناداها جبريل عليه السلام من أسفل الوادي يطمئنها،
وكان المكان ده في بيت لحم وكانت ولادة عيسى عليه السلام على أرجح الأقوال في الصيف،
واستدل العلماء إن الولادة كانت في الصيف بالكلام الموجود في الروايات التاريخية بأن الرعاة كانوا بيمشوا في الليل بأغنامهم في زمن ولادة عيسى،
وفي الشتاء، البرد بيكون شديد وأحيانا بيكون في ثلج في بلاد الشام وبالتالي مفيش أحد بيتحرك في الليل🤷‍♂️
يعني احتفال النصارى بمولد عيسى عليه السلام سواء في شهر ديسمبر أو شهر يناير ملوش أصل تاريخي صحيح 👌

فناداها جبريل وقال لها متزعليش ربنا جعل تحتك نهر صغير تشربي منه،
"فَنَادَاهَا مِن تَحْتِهَا أَلاَّ تَحْزَنِي قَدْ جَعَلَ رَبُّكِ تَحْتَكِ سَرِيًّا"
◇ويُقال إن إللي ناداها كان عيسى ولكن الراجح هو جبريل،

فجبريل ناداها وطمنها، وقال لها ماتزعليش ومتخافيش، بصي ِلِمعِية ربنا إللي بتحاوطك واطمني،
ربنا جعل تحت منك نهر صغير تشربي منه، وهزي النخلة إللي وراكي بإيدك كده بس هتنزل عليكِ رُطَب ..
"وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا"
فكلي واشربي وكوني مطمئنة البال وأبشري، ربنا معاكِ ومش هيضيعك وهيدفع عنك الأذى..
"فَكُلِي وَاشْرَبِي وَقَرِّي عَيْنًا"
رحمة عظيمة من ربنا لمريم في توقيت مهم جدا بالنسبة لها،
يعني هي إزاي هتقدر تاكل وتشرب في

#قصص_الأنبياء
#الحلقة_السادسة_والخمسون
#مريم_زكريا_الجزء_السادس
#عيسى_الجزء_الثاني

اتكلمنا المرة إللي فاتت عن مريم عليها السلام لما وضعت عيسى عليه السلام وراحت بيه لقومها وشوفنا إزاي اتهموها في عرضها،
وهي كانت صايمة عن الكلام وأشارت لعيسى عليه السلام وهي ماتعرفش إيه إللي هيحصل،
والكل مستني ومستغرب، وفجأة لقوا صوت طالع من بين إيديها وبيكلمهم، عيسى بن مريم عليه السلام نطق 🙊
أنطقه الله وهو لسه رضيع مكملش كام يوم في اللفة 😮
ربنا أنطق الطفل الرضيع في المهد عشان يدافع عن أمه،
هي تعرفت لله في الرخاء وكان عابدة وكان عندها رصيد،
فلما جاء الاختبار والابتلاء ربنا أكرمها بمعجزة👌
وشوفوا بقى أول حاجة قالها الطفل الرضيع كانت إيه:
"قَالَ إِنِّي عَبْدُ اللَّهِ "👌
يعني أنا مش إله ولا ابن إله ولا أي حاجة من دي خالص، أنا مجرد عبد لله،
"إِنِّي عَبْدُ اللَّه..ِ آتَانِيَ الْكِتَابَ.. وَجَعَلَنِي نَبِيًّا"

أعطاني الله الإنجيل، يعني ربنا آتاه الإنجيل والنبوة من زمان أوي من وقت ما قضى القضاء قبل أن يُخلق الخلق مش إن الإنجيل والنبوة معاه حالا،
لأ ده هيكون في المستقبل لما يكبر بس هو بيحكي عن حاجة هتحصل👌
فأعطاني الإنجيل، وجعلني نبي ليكم ، يعني محدش يطعن فيّ ويقول إني ابن زنا وانتم عارفين إن مستحيل الأنبياء يكونوا مولودين من زنا💁‍♂️
يعني كإن عيسى عليه السلام بيقول لهم أنا نبي.. وعبد لله... اتولدت بمعجزة، مش من الزنا.. وأمي مش زانية زي ما اتهمتوها مع إنكم عارفين أصلها وشرفها 😑
بل إنتم يا بني إسرائيل عارفين إن الأنبياء بيبعثوا في نَسَبِ قومِهِم، يعني بيكونوا من أشراف قومهم المعروف عنهم النزاهة وكل الأخلاق الطيبة عشان محدش يطعن في عِرضهم وشرفهم سواء ست أو راجل..
وبالفعل علو المقام والشرف والأخلاق ده كله كان اعترف بيه بنو إسرائيل وهم بيكلموها في الأول لما قالوا لها :
"يا أخت هارون ما كان أبوكِ امرءَ سَوءٍ وما كانت أمك بَغِيًّا"👌

عيسى عليه السلام كَمّل تعريف بنفسه وتعريف بوصايا ربنا له، والناس واقفة مذهولة😳
قال:
"وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
"وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
يعني ربنا جعلني مبارك ومُعلم الخير للناس وداعيا إليه عز وجل ومُحَبِّبِ الناس في طاعة الله👌
ووصاني بالصلاة والزكاة طول ما أنا حي 👌

☆ممكن حد يسأل دلوقتي ويقول ..يعني عيسى عليه السلام دلوقتي بيصلي ويزكي🤨
يعني احنا كمسلمين عقيدتنا بتقول إن عيسى عليه السلام لم يمت وإنه هينزل في آخر الزمان..يبقى هو كده بيصلي ويزكي؟
وكمان ليه مذكرش الصيام..مش ربنا قال إن الصيام كان مفروض على الناس إللي قبلنا 🤔
شوفوا،
♡أولا: عيسى عليه السلام ربنا قال على لسانه:
"فَلَمَّا تَوَفَّيْتَنِي كُنتَ أَنتَ الرَّقِيبَ عَلَيْهِمْ"
الوفاة هنا معناها النوم..لو في واحد نايم بنقول عليه حي ولا ميت😁
بنقول عليه حي مع إن ربنا بيقول:
"اللَّهُ يَتَوَفَّى الْأَنفُسَ حِينَ مَوْتِهَا وَالَّتِي لَمْ تَمُتْ فِي مَنَامِهَا"

فعيسى عليه السلام دلوقتي نايم وبيصحى بأمر الله.. لما ربنا يشاء يعني،
ومن الأوقات إللي صِحي فيها كانت في رحلة الإسراء والمعراج ، لما رسول الله ﷺ صلى بالأنبياء جميعا في المسجد الأقصى،
ولما رآه رسول الله في السماء الثانية مع يحيى عليه السلام في رحلة المعراج وهنعرف الموضوع بالتفصيل واحنا بنتكلم في السيرة النبوية،
فهو بيصحى وقت ما ربنا يريد وينام وقت ما ربنا يريد، فحكُم عيسى عليه السلام كحكم النائم ،وإنتم عارفين إن الصلاة تسقط عن النائم 😊
وطبعا الزكاة نفس الموضوع، واحد نايم هيجيب فلوس منين عشان تبلغ النصاب ويخرجها🤷‍♂️

♡ثانيا:
بالنسبة للصيام ..عيسى عليه السلام مقلش الصيام وده معناه إن ربنا تكفّل ببقاء جسده بغير طعام ولا شراب👌
فهو لو قال إن ربنا أوصاني بالصيام يبقى ده يدل إنه بياكل،
وعشان الإنسان ياكل لازم يكون صاحي مش هياكل وهو نايم يعني😅
فالكلام ده معناه إنه نام وربنا هو إللي تكفّل ببقاء جسده من غير لا أكل ولا مية،
عارفين زي إيه؟
فاكرين قصة أصحاب الكهف إللي قلناها، وإنهم ناموا أكثر من ثلاثمائة سنة بدون أكل أو شرب وحتى شكلهم متغيرش💁‍♂️
وكمان ربنا تكفّل بهم إنهم لا يمرضوا وإنهم لا يصيبهم العمى وتكفّل بحاجات كتير أوي لهم.

◇خدوا بالكم إن اليهود والنصارى بيؤمنوا بقصة أصحاب الكهف😀
فإيه المشكلة في إن ربنا يتكفل بجسد عيسى عليه السلام خلال السنين دي كلها زي أصحاب الكهف لحد ما ينزل للأرض في آخر الزمان🤷‍♂️
فاللي يخلينا نقبل بمعجزة أصحاب الكهف نقبل بمعجزة عيسى عليه السلام،
وخصوصا إن عيسى عليه السلام خارج نطاق الزمن أصلا؛
لأن ربنا لما هيرفعه هيكون عمره ثلاثة وثلاثين سنة،
ولما ينزل في آخر الزمن هيكون عمره برده ثلاثة وثلاثين سنة👌
يعني الإنسان بيكبر في العمر بسبب إيه😕
مش بسبب تعاقب الليل والنهار؟ والسبب في تعاق

#قصص_الأنبياء
#الحلقة_السابعة_والخمسون
#مريم_زكريا_الجزء_السابع
#عيسى_الجزء_الثالث
#الذين_تكلموا_في_المهد

وقفنا المرة إللي فاتت عند عيسى عليه السلام لما ربنا أنطقه عشان يدافع عن مريم عليها السلام وهو لسه طفل رضيع،
وكانت معجزة واضحة لبني إسرائيل،
مش يعتذروا بقى لمريم عليها السلام ويقولوا آمنا بالله وحقك علينا والكلام ده،
لأ ده كذِّبُوها وقالوا لها إنها بَغِيّ، وكانوا بيسموا عيسى عليه السلام ابن البغي😑

☆شوفوا على قدر مكانة مريم رضي الله عنها وقدرها عند ربنا لدرجة إنها المرأة الوحيدة إللي ربنا ذكرها في القرآن بالاسم،
ومع ذلك بتتعرض للإهانة والقذف من قومها إللي كانوا لسه بيمدحوها ومعترفين بفضلها لما قالوا "يا أخت هارون"👌

فدي رسالة من ربنا لكل واحد فينا بإننا مهما بَلَغنا من التَّقوى والعَفاف وحُسن الخلق فمش هنسلَم من كلام الناس،
هنلاقي إللي مستني الفرصة عشان يؤذينا ويشوّه صلاحنا.. هنلاقي إللي بيستفزنا ويقول كلام مش فينا،
هنلاقي... وهنلاقي...
ودي رسالة للنساء بالذات👌
يعني احنا كنساء عمرنا ما هنوصل لدرجة مريم عليها السلام في الكمال والفضل والمكانة؛ لإنها من النساء إللي النبي ﷺ قال عنهن:
"لَمْ يَكْمُلْ مِنَ النِّسَاءِ: إِلَّا آسِيَةُ امْرَأَةُ فِرْعَوْنَ، وَمَرْيَمُ بِنْتُ عِمْرَانَ"
ومع ذلك حصل لها الإبتلاء ده ولم تسلم من كلام الناس، يبقى احنا بقى يا جماعة متوقعين إيه من الناس💁‍♂️

◇ممكن حد يسأل:
طيب وهو ليه ربنا بيعمل كده..؟
إيه الحكمة من إنه عز وجل بيسلط الناس المؤذية دي أو بيَأذن بأذى الصالحين؟ مش المفروض إنه يحميهم منهم 😞

شوفوا،
أي ابتلاء بيكون يا إما لتكفير الذنوب أو لرفع الدرجات أو
إن ربنا يريد يعلمنا عبادة قلبية مش هنتعلمها غير بالابتلاء والأذى ده،
زي التضرع لله أو الخشوع والخضوع والذل له👌
واحنا المفروض أي ابتلاء بينزل علينا نتعامل معاه على إنه تكفير لذنوبنا، طب ليه🤨
عشان النفس اللوامة هي إللي هتجدد التوبة باستمرار، وأي ابتلاء بيحصل لنا بيكون سبب في تكفير الذنوب💁‍♂️
رسول الله ﷺ بيقول:
"مَا يُصِيبُ الْمُسْلِمَ مِنْ نَصَبٍ وَلاَ وَصَبٍ وَلاَ هَمٍّ وَلاَ حَزَن وَلاَ أَذًى وَلاَ غمٍّ، حتَّى الشَّوْكَةُ يُشَاكُها إِلاَّ كفَّر اللَّه بهَا مِنْ خطَايَاه"
يعني أي حاجة بتصيب الإنسان من التعب أو الهم أو الحزن أوالغم أو الأذى حتى الشوكة إللي بتشك الإنسان -شكة الدبوس يعني مثلا- كووول ده ربنا بيكفر به عن ذنوب الإنسان👌
وهقولكم حاجة كمان🤫
من صفات أهل الجنة إنهم كانوا من الكاظمين للغيظ في الدنيا،
يعني كانت بتحصل لهم مواقف تضايق فكانوا مع ذلك بيكتموا غيظهم وغضبهم لله ده، ومش بيقابلوا الإساءة بإساءة ولا بظلم،
فاحنا إزاي هنعرف نكظم غيظنا ومفيش ناس مستفزة حوالينا ومفيش ناس تضايقنا أساسا، و مفيش ناس تحرق دمنا وتؤذينا بلسانها عشان ونصبر ونمارس عبادة احتساب الأجر لله على الصبر على الظلم و الأذى🤷‍♂️
فربنا بيسمح بوجود الناس دي في طريقنا عشان نصلح أنفسنا ونصلح قلوبنا إللي هتكون التذكرة إللي هندخل بها الجنة👌
ربنا بيقول : "يَوْمَ لَا يَنفَعُ مَالٌ وَلَا بَنُونَ*إِلَّا مَنْ أَتَى اللَّهَ بِقَلْبٍ سَلِيمٍ "
فاحنا بسبب الناس دي هنكتسب صفات جديدة ربنا بيحبها عز وجل وبتزود من قربنا منه وترفع درجاتنا عنده،
يعني هنتعامل مثلا مع شخص عصبي، هنتعلم بسببه الصبر والحِلم،
هنتعامل مع شخص أناني، هتعلم بسببه الحِكمة وضرورة التمسك بالكرم والإيثار مع الناس،
هنتعامل مع شخص مستفز هنتعلم بسببه كظم الغيظ، وبعدها نطلع للدرجة الأعلى وهي العفو عن الناس، يعني مسامحة إللي ظلمهم،
يعني همّ ملهمش خالص في قصة الثأر للنفس دي:
"وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُم بِهِ ۖ وَلَئِن صَبَرْتُمْ لَهُوَ خَيْرٌ لِّلصَّابِرِينَ ۩
وَاصْبِرْ وَمَا صَبْرُكَ إِلَّا بِاللَّهِ ۚ وَلَا تَحْزَنْ عَلَيْهِمْ وَلَا تَكُ فِي ضَيْقٍ مِّمَّا يَمْكُرُونَ ۩إِنَّ اللَّهَ مَعَ الَّذِينَ اتَّقَوا وَّالَّذِينَ هُم مُّحْسِنُونَ"
فدي كلها صفات ربنا بيحبها جدا وبسببها المسلم يدخل الجنة ويبقى من أصحاب الدرجات العليا عنده عز وجل💁‍♂️

شيخ الإسلام ابن تيمية ملخص الموضوع ده كله في كلمتين👌
بيقول: إنما العباد آلة.. فانظر إلى مَن سلطهم عليك.. ولا تنظر إلى صَنِيعهم بك.. ترتاح من الهم والغم😊
يعني بيقول البشر دول عاملين زي الآلات إللي بيحركهم ربنا عز وجل،
فاحنا عشان نريح نفسنا من وجع الدماغ وحرقة الدم وقهرة النفس؛ منركزش على إللي همّ عملوا فينا،
لكن نركز ونشوف مين إللي خلاهم يعملوا كده، وساعتها هنسلم لقضاء ربنا ونرضى لإننا عارفين إن إللي حصل ده من حكمة ربنا الحكيم العليم الرحيم عز وجل،
وننظر لكل شخص يدخل حياتنا كأنه الخضر في حياة موسى عليه السلام جاي يعلمنا حاجة جديدة 👌

لكن يا جماعة مش معنى كلامي إن لما حد يضربك بالقلم على خدك تقوم تديله خدك التاني 😶
إطلاقا.. الإسلام إل

#قصص_الأنبياء
#الحلقة_الثامنة_والخمسون
#مريم_زكريا_الجزء_الثامن
#عيسى_الجزء_الرابع

اتكلمنا عن عيسى عليه السلام وإنه اتكلم في المهد وإنه نشأ في رعاية مريم عليها السلام،
و قلنا إنهم كانوا خرجوا من بيت لحم عشان يهربوا من أذى بني إسرائيل،
وقلنا إن عيسى عليه السلام بعد ما نطق في المهد متكلمش تاني غير لما وصل لمرحلة الكلام العادية بتاعة الأطفال،
وقلنا إننا معندناش أي أخبار عنه قبل بعثته،
لما قُتل يحيى عليه السلام زي ما حكينا في قصته،
انتشر في بني إسرائيل الكفر والفجور وتجاوزوا حدود الله وفجروا، لدرجة إن ناس منهم أنكرت البعث والحساب والعقاب، وبقوا عايشين لشهواتهم وملذاتهم وبس😐
فربنا أرسل لهم رسول تاني على طول وهو عيسى عليه السلام، كان عمره لما ربنا أوحى له تلاتين سنة، وربنا أنزل عليه الإنجيل:
وإنجيل عيسى عليه السلام امتداد لشريعة موسى عليه السلام، لكن مع بعض التخفيف،
يعني همّ كان مُحرّم عليهم حاجات في شريعة موسى عليه السلام ،فلما جاء عيسى، أحلّ لهم بعض المحرمات دي،
طبعا بوحي من ربنا مش منه لنفسه كده😅
ربنا بيقول:
"وَمُصَدِّقًا لِّمَا بَيْنَ يَدَيَّ مِنَ التَّوْرَاةِ وَلِأُحِلَّ لَكُم بَعْضَ الَّذِي حُرِّمَ عَلَيْكُمْ وَجِئْتُكُم بِآيَةٍ مِّن رَّبِّكُمْ فَاتَّقُواْ اللَّهَ وَأَطِيعُونِ"

وكان بني إسرائيل في الوقت ده مشهورين بالطب،
وكان كل نبي بييجي بمعجزات بتكون من صميم الأمور إللي المُرسل إليهم مشهورين بيها،
يعني موسى عليه السلام لما أرسله لفرعون كان أهل مصر مشهورين بالسحر ،
فكان من معجزاته مثلا إنه يقلب العصا حية حقيقية تاكل الحبال بتاعة السحرة، ويخرَّج إيده بيضاء من جيبه وهو أسمر أساسا، كده يعني،
أما عيسى عليه السلام فكانت معجزاته في الناحية الطبية لأن بني إسرائيل كانوا مشهورين بالطب،
يعني كان بيشفي الطفل إللي مولود أعمى ، وده مالوش علاج نهائي في الطب،
وكان بيشفي الأبرص إللي عنده مرض البرص المعروف، وده كمان مالوش علاج طبي،
وكان بيُحيِي الموتى، ودي طبعا حاجة أصل مالهاش وجود في الطب إلا بعلاج من أوشك على الموت يعني، لكن إن حد يموت وييجي طبيب يُحيِيه من القبر؛ عمرها ما حصلت قدامهم،
وكان بيصنع من الطين شكل الطير ، وينفخ في فم التمثال ده فيتحول لطير حقيقي بيطير في السماء😮
وطبعا كل ده بقدرة ربنا يا جماعة وبإذنه.. يعني ربنا هو إللي وهب عيسى عليه السلام المعجزات دي 👌
"أَنِّي أَخْلُقُ لَكُم مِّنَ الطِّينِ كَهَيْئَةِ الطَّيْرِ فَأَنفُخُ فِيهِ فَيَكُونُ طَيْرًا بِإِذْنِ اللَّهِ.. وَأُبْرِئُ الأَكْمَهَ وَالأَبْرَصَ وَأُحْيِي الْمَوْتَى بِإِذْنِ اللَّهِ "

ومع كل المعجزات دي ووضوحها، كان بنو إسرائيل بيحاولوا يتعنتوا ويعَجِّزوا عيسى عليه السلام،
فكانوا بيسألوه : احنا عندنا أكل إيه في بيوتنا؟
فيقول لهم الأكل إللي عندهم في بيوتهم، وكمان الأكل إللي هم مخزنينه👌
"وَأُنَبِّئُكُم بِمَا تَأْكُلُونَ وَمَا تَدَّخِرُونَ فِي بُيُوتِكُمْ إِنَّ فِي ذَلِكَ لآيَةً لَّكُمْ إِن كُنتُم مُّؤْمِنِينَ"
عيسى عليه السلام فضل يدعوهم ويوعظهم، ويشرح لهم الحاجات إللي اختلفوا عليها، وجاء توضيحها في الإنجيل،
لإن التوراة زي ما قلنا اتحرقت واتحرّفت بعد موسى، فربنا نزّل عليهم كتاب جديد،
"وَلَمَّا جَاءَ عِيسَىٰ بِالْبَيِّنَاتِ قَالَ قَدْ جِئْتُكُم بِالْحِكْمَةِ وَلِأُبَيِّنَ لَكُم بَعْضَ الَّذِي تَخْتَلِفُونَ فِيهِ ۖ فَاتَّقُوا اللَّهَ وَأَطِيعُونِ "

وربنا أجرى على إيده معجزات كتيرة زي ما شوفتوا، ومع ذلك بنو إسرائيل لم يؤمنوا بردو كالعادة😑
فلما عيسى عليه السلام خلاص شاف منهم الكفر الواضح وإنهم معندهمش أي استعداد للإيمان طرح سؤال على الناس كلها وقال:
مين ينصرني ويؤمن بي وبرسالة رب العالمين ويبقى معايا على الحق ؟
ربنا بيقول:
"فَلَمَّا أَحَسَّ عِيسَى مِنْهُمُ الْكُفْرَ قَالَ مَنْ أَنصَارِي إِلَى اللَّهِ "

قال مجموعة من بني إسرائيل عددهم حوالي اثنا عشر رجل احنا هننصرك ونؤيدك ونؤمن بك🙋‍♂️
ودول اسمهم الحواريين، يعني الناصرين لعيسى عليه السلام،
أو لأنهم آمنوا بالله وكانت قلوبهم مُخلصة ونقية وصافية من العيوب والأمراض، إللي هو تعريف الحواريّ.
ربنا بيقول:
"قَالَ الْحَوَارِيُّونَ نَحْنُ أَنصَارُ اللَّهِ آمَنَّا بِاللَّهِ وَاشْهَدْ بِأَنَّا مُسْلِمُونَ"

☆متخيلين من مئات الآلاف من بني إسرائيل آمن لعيسى ١٢ رجل فقط😑
عشان لما حد يقولك : يعني الناس دي كووولها غلط وانت بس إللي صح🙄
ولّا واحد يييجي يقولك ما هو لو كان كلامك صح كان ناس كتير عملوه 😒
قولوا للجماعة دول بقى إن أتْباع الرسل دايما ناس قليلة، و أتباع الحق دايما ناس قليلة،
رسول الله ﷺ قال:
"يأتي النبي يوم القيامة ومعه الرجل والنبي ومعه الرجلان والنبي وليس معه أحد"
يعني في أنبياء لم يؤمن معاهم أصلا غير رجل واحد أو رجلين، أو محدش آمن خالص😶
هل ده معناه بقى إن النبي ساعتها كان هو إللي غلط عشان محدش اتبع كلامه فبقى لوحده

#قصص_الأنبياء
#الحلقة_التاسعة_والخمسون
#مريم_زكريا_الجزء_التاسع
#عيسى_الجزء_الخامس

وقفنا المرة إللي فاتت عند الحواريين لما سألوا عيسى عليه السلام سؤال غريب.. قالوا إيه..؟
"إذْ قَالَ الْحَوَارِيُّونَ يَا عِيسَى ابْنَ مَرْيَمَ هَلْ يَسْتَطِيعُ رَبُّكَ أَن يُنَزِّلَ عَلَيْنَا مَائِدَةً مِّنَ السَّمَاء "
يعني ياعيسى هو ربك يقدر إنه ينزل علينا مائدة من السماء 😅🤔

☆بالضبط كده زي ما قرأتم، مائدة😀
عايزين ترابيزة عليها أكل تنزل لهم من السماء😶

عيسى عليه السلام قال لهم : اتقوا الله😳
إزاي تطلبوا حاجة زي كده والمفروض إنكم مؤمنين😑
"قَالَ اتَّقُواْ اللَّهَ إِن كُنتُم مُّؤْمِنِينَ"
متسألوش الأسئلة دي وتطلبوا كل شوية آية ومعجزة، عشان مينزلش عليكم العذاب.. كفاية المعجزات إللي شفتوها لحد دلوقتي😕

☆فاكرين ثمود قوم صالح😬
لما طلبوا معجزة الناقة زي ماكانوا عايزين بالضبط وزي ما وصفوها وبعدين كفروا برده فربنا عذبهم 👌

¤ممكن هنا حد يسأل:
هو مش المفروض إن الحواريين أصحاب عيسى عليه السلام دول هم المؤمنين المخلصين إللي على أعلى درجة من الإيمان؟
إزاي بقى يشُكّوا في قُدرة ربنا ويسألوا عن قدرة ربنا، وكمان بصيغة "هل يستطيع ربك" وكأنه هو رب عيسى عليه السلام بس ومش ربهم إللي بيعبدوه🤔

هوّ السؤال هنا يا جماعة مكنش سؤال استفهامي ومستنيين إجابة عليه بأيوة أو لأ،
لكن السؤال هنا كان لغرض إنهم يزدادوا إيمانا، زي إبراهيم عليه السلام لما طلب من ربنا إنه يشوف إزاي عز وجل بيحيي الموتى،
أو إن سؤالهم بالطريقة دي كان من باب التأدب مع الله مش الشك في قدرته،
يعني زي مثلا ولله المثل الأعلى لما يكون حد فينا معزوم عند حد وعايش دور الكسوف شوية😅
فنقول لأي حد من الناس إللي احنا عندهم:
تقدر تجيبلي مناديل؟
أو تقدر تجيبلي كوباية مية؟
هو يقدر أكيد، واحنا معندناش شك في ده،
لكن احنا لما طلبنا الحاجة بعِدنا عن أسلوب الأمر إللي هو: هات لي كوباية مية.. من باب الأدب يعني😁
فالحواريين استعملوا الأدب مع ربنا لما سألوا عيسى عليه السلام،
وقالوا هل ربك يستطيع إنه ينزّل علينا مائدة من السماء؟ يعني بدل ما يقولوا أنزل علينا مائدة من السماء؛ خلوها زي عَرض يا إما يُقبل أو لا يُقبل👌

فلما عيسى عليه السلام تخيل إن ده سوء أدب منهم أو شك منهم، وقال لهم اتقوا الله؛ بدأوا يوضحوا وجهة نظرهم وقالوا:
احنا جعانين وعايزين ناكل فدي فرصة مناسبة لكده،
وكمان بالمرة نطمن بآية جديدة تخص استجابة ربنا لدعاءك وإنك فعلا رسول من عنده ومش بتكذب علينا،
يعني لما تدعي ربنا بحاجة احنا إللي اقترحناها عليك ونشوف إن ربنا عز وجل استجاب لك؛
احنا كده هنبقى مطمنين أكتر إنك صادق بإنك نبي مقرب منه عز وجل💁‍♂️
كمان الناس بتكذّبك ياعيسى فاحنا هنشهد عندهم ونقول لهم إنك حققت لنا معجزة جديدة زي ما طلبنا بالضبط، معجزة مختلفة عن معجزاتك الطبية المعروفة👌
"قَالُواْ نُرِيدُ أَن نَّأْكُلَ مِنْهَا وَتَطْمَئِنَّ قُلُوبُنَا وَنَعْلَمَ أَن قَدْ صَدَقْتَنَا وَنَكُونَ عَلَيْهَا مِنَ الشَّاهِدِينَ"

☆يعني عيسى عليه السلام لما كان بيَشفي الأعمى مكنتش حاجة مقنعة بالنسبة لهم،
ولما كان بيحيي الموتى ويشفي الأبرص بإذن الله و...و... ده برده مكنش حاجة مقنعة كفاية، لكن الأكل هو إللي هيقنعهم بقى 😅

☆بالمناسبة ...عقيدة النصارى في إن عيسى عليه السلام كان إله أو ابن إله مكنتش موجودة إطلاقا في وجود عيسى عليه السلام،
وانتم شفتم الحواريين بيقولوا إيه، بيقولوا :
"ربك" مقالوش أباك الذي في السماء والكلام ده🙄
والآية إللي ربنا بيقول فيها:
"وَإِذْ قَالَ اللَّهُ يَا عِيسَى ابْنَ مَرْيَمَ أَأَنتَ قُلْتَ لِلنَّاسِ اتَّخِذُونِي وَأُمِّيَ إِلَٰهَيْنِ مِن دُونِ اللَّهِ"
دي مش في الدنيا، السؤال ده ربنا هيسأله لعيسى عليه السلام في الآخرة من باب إنه يُشهده على أمته إللي كفرت بالله عز وجل من بعده👌

عيسى عليه السلام بدأ يدعي ربنا إنه ينزل عليهم المائدة إللي طلبوها،
وربنا ذكر الدعاء إللي عيسى عليه السلام دعاه بالنص، مع إنه كان ممكن عز وجل يقول "ودعا عيسى ربه "وبس كده، لكن معنى إن ربنا أخبرنا بالدعاء بألفاظه يبقى ده معناه إن ربنا《يريد》 إنه يقول لنا رسالة 😊

☆بالمناسبة يا جماعة..مينفعش نقول ربنا 《عايز》 نقول ربنا 《يُريد》 كذا، لأن كلمة عِوَز في اللغة العربية بتدل على الحاجة وضيق الحال،
فمينفعش نستخدم كلمة زي كده مع رب العالمين حتى لو منقصدش المعنى السيء😅
أنا عارفة إنها كلمة بتتقال كده واتعودنا عليها،
لكن لازم نتأدب مع ربنا ونستعمل الألفاظ إللي تليق به،
هو لو واحد فينا بيتكلم مع مديره في الشغل ولا بيتكلم مع حد في مركز عالي هيتكلم معاه كده بأيّ كلام ولّا هيستعمل الكلام المناسب💁‍♂️
أهه ربنا أحق إننا نتكلم معاه بأدب 👌

نرجع للرسالة إللي ربنا 《يريد》 إنه يوصلها لنا من خلال دعاء عيسى عليه السلام😊
"قال عيسى بنُ مريم اللَّهُمَّ رَبَّنَا أَنزِلْ عَلَيْنَا م