‏من سنن يوم الجمعة :
‏1-الإغتسال
‏2-التطيب
‏3-لبس الجميل
‏4-التسوك
‏5-التبكير إلى المسجد
‏6-قراءة سورة الكهف
‏7-الإكثار من الدعاء
‏8-الصلاة على نبينا ﷺ
‏.
‏‌ #يوم_الجمعة ⁩ ‌ #سنن_الجمعة

#قصص_الأنبياء
#الحلقة_السادسة_والثلاثون
#حزقيل_إلياس_اليسع

وقفنا المرة إللي فاتت عند موت يوشع عليه السلام، بعد ما عاش في بيت المقدس فترة من الزمن مع بني إسرائيل يحكم فيهم بالتوراة،
بنو إسرائيل من كثرة فسادهم وعصيانهم لله، كان ربنا بيبعث فيهم الأنبياء ..واحد ورا الثاني ورا الثالث؛ عشان يستقيموا على الدين وميبعدوش عنه،
فبعد موت يوشع عليه السلام، انتقلت النبوة لنبي من بني إسرائيل اسمه《كَالِب بن يُوفَنا》...احنا منعرفش عنه حاجة تقريبا، لكن كباقي الأنبياء استمر يحكم في بني إسرائيل بحكم الله وشريعته لحد ما مات،
وجه بعده نبي تاني اسمه حِزقِيل بن بُوذَى --ويقال إنها بُوذِي-- وبرده معندناش عنه أخبار كثيرة،
لكنه كان نبي من أنبياء بني إسرائيل ، نعرف عنه قصة واحدة فقط، هي في قوله تعالى:
"أَلَمْ تَرَ إِلَى الَّذِينَ خَرَجُوا مِن دِيَارِهِمْ وَهُمْ أُلُوفٌ حَذَرَ الْمَوْتِ فَقَالَ لَهُمُ اللَّهُ مُوتُوا ثُمَّ أَحْيَاهُمْ "
إللي هي قصتنا النهاردة..
بعد يوشع عليه السلام انقسمت النبوة والملك، يعني قبل كده كان النبي هو الملك أو الحاكم إللي بيحكم بني إسرائيل،
لكن بعد موت يوشع عليه السلام بقى في مَلِك أو حاكم يحكم بني إسرائيل، وفيه نبي تأتيه النبوة والرسالة والشريعة من ربنا،
فكان فيه ملك معين من حُكام بني إسرائيل، أمرهم إنهم يقاتلوا عدو ليهم، منعرفش مين هو العدو ده🤔
لكن بني إسرائيل خافوا من القتال والموت بما إنهم طول عمرهم أحرص الناس على حياة،
فاتحججوا و قالوا للحاكم بتاعهم إن القرية إللي انت عايز تودينا ليها دي فيها طاعون فمش هندخلها😤
فربنا أنزل عليهم الطاعون في مكانهم ، فبدأوا يهربوا من قريتهم عشان ميموتوش،
فالحاكم دعا ربنا إنه يُوريهم آية إنهم مهما هربوا فمحدش فيهم هيقدر يهرب من الموت لو كان خلاص جاء أجله،
فربنا استجاب لطلب الحاكم وقال لبني إسرائيل موتوا.. فماتوا قبل آجالهم النهائية المكتوبة..
يعني لو مثلا كان المفروض إنهم يموتوا وهمّ عندهم ١٠٠ سنة، ربنا أماتهم بدري وهمّ عندهم ٦٠، يعني لسه فاضل لهم ٤٠ سنة، وبقول ده كمثال لتقريب المعنى 😅
فقعدوا ميتين بالمنظر ده 8 أيام، لحد ما بطونهم اتنفخت، وريحتهم بدأت تطلع...
فحاول باقي القرية إنهم يدفنوهم معرفوش لإنهم كانوا بالآلاف..! فسابوهم..
فمرّ عليهم نبي الله حِزقِيل فتعجب من منظرهم، فربنا قال له : أُرِيك آية؟
قال حزقيل: نعم، فأحياهم ربنا كلهم من تاني، ورجعوا لقومهم وعاشوا معاهم لحد ما استكملوا آجالهم المكتوبة.

☆طبعا القصة دي من كلام المفسرين، لأن القرآن والسنة متعرضوش للتفصيل ده،
واحنا عارفين إن القرآن مش كتاب تاريخ عشان يحكي لنا القصة بالتفصيل، لكن ربنا بيقول لنا القصة من الزاوية إللي فيها العبرة المُستفادة منها👌
والرسالة أو العبرة إللي ربنا بيعلمهالنا من القصة دي هي إننا نتوكل عليه عز وجل، ومنحاولش نهرب من مُسببات الموت بترك الأمور الواجبة إللي ربنا أمرنا بيها وإللي ممكن لو عملناها نتعرض للموت،
يعني مينفعش نقوم سايبين طاعة ربنا عشان خايفين من الموت، فربنا بيعلمنا إن ده حرام وغلط كبير وسوء تفكير وضعف إيمان👌
يعني همّ عصوا أمر ربنا بالجهاد عشان خايفين من الموت
والهلاك إللي هو أصلا بيد الله،
ونسيوا إن لو ربنا شاء هياخد أرواحهم حالا حتى لو كانوا بس قاعدين على سرايرهم بدون أي قتال أو مرض أو سبب ظاهر للموت،
فربنا بيعلمنا بقصتهم إن محدش يملك لك ضر ولا نفع إلا إذا ربنا أَذن👌
لكن مش معنى كده إن الإنسان لا يحتاط ويقوم رايح يرمي نفسه في المهالك🤓
لأ طبعا.. ناخد بالأسباب إللي ندفع بيها سبب الهلاك أو الموت عشان ربنا أمرنا بده لإن حفظ النفس من الضرورات الخمس في مقاصد الشريعة،
لاااااكن من غير ما يتسبب أخدنا للأسباب في معصيتنا لله وتركنا لطاعة من طاعاته عز وجل 👌
لأن حفظ الدين مُقَدَّم على باقي الضرورات الخمس👌

☆الضرورات الخمس كلها هي:
حفظ الدين، ثم حفظ النفس، ثم حفظ العِرض/النسل، ثم حفظ العقل، ثم حفظ المال.
فلو تعارض حفظ الدين مع حفظ النفس يتم تقديم حفظ الدين مباشرةً؛ لإن هو ده إللي عشانه اتخلقنا وبالتالي في سبيله يهون كل شيء وربنا قال:
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ".
فلما يحصل موقف يكون الإختيار فيه بين مصلحة نفسي واتباع ديني...يبقى لازم اتبع ديني ولو على حساب مصلحتي، وربنا قادر إنه يعوضني بعدين لأن هو بإيده الملك كله والرزق كله👌
وهو ده المغزى من إن ربنا يقول لنا قصة الناس إللي عصوا أمر الله بالجهاد عشان يحافظوا على حياتهم من الموت😊

بعد موت حِزقيل عليه السلام، انتشر الفساد وانحرف الناس عن أوامر ربنا ، لدرجة إنهم عبدوا الأصنام😶
فربنا أرسل لهم نبي تاني اسمه إِلياس بن ياسين، من نسل هارون عليه السلام،
"وَإِنَّ إِلْيَاسَ لَمِنَ الْمُرْسَلِينَ.."
ويُعرف في كتب الإسرائيلين باسم إيلِيا...لكن عندنا في القرآن إلياس،
وكان الأنبياء في بني إسرائيل من بعد موسى عليه السلام بيج

ددوا إحياء شريعة موسى ويذَكّروا بيها الناس،
فربنا أرسل النبي إلياس كرسول لبني إسرائيل إللي كانوا بيعبدوا صنم اسمه بَعْل،
"أَتَدْعُونَ بَعْلًا وَتَذَرُونَ أَحْسَنَ الْخَالِقِينَ"
فبدأ يدعوهم لعبادة الله الخالق الرازق...
"اللَّهَ رَبَّكُمْ وَرَبَّ آبَائِكُمُ الْأَوَّلِينَ" ،
ونصحهم وذكَّرهم بقصص السابقين إللي ربنا أهلكهم، ولكنهم مستجابوش له 😑
فربنا توعَّدهم بعذاب يوم القيامة زي ما قال في الآية: "فَكَذَّبُوهُ فَإِنَّهُمْ لَمُحْضَرُون".
ووعد الناس إللي اتبعوا إلياس عليه السلام بالثواب يوم القيامة،
ومدح عز وجل إلياس عليه السلام وإنه لم يُقَصِّر في دعوته👌
يعني ربنا لم يهلكهم في الدنيا ولم يعذبهم زي باقي الأمم السابقة..

☆احنا حاسين إن القصة عادية صح😕
لأ مش صح😁
لإن زي ما قلنا، ربنا مش بيقول أي كلام عبث كده وخلاص حاشاه سبحانه، ولا بيحكي لنا قصص من باب تكرار كده وخلاص من غير ما يكون بيلفت نظرنا لعبرة في القصة👌
والعبرة في قصة إلياس هي إنه عليه السلام دعا قومه بكل الأساليب،
بالترغيب والترهيب وبالحسنى زيه زي باقي الأنبياء السابقين، يعني ما قصرش في دعوته،
طيب كانت إيه النتيجة ؟ ...النتيجة كانت إن قومه كذبوه،
برغم كل إللي عمله،
وهنا أول فائدة لنا وهي:
♡إننا ممكن نكون بنستخدم كل أساليب الدعوة إلى الله وفعلا مش مقصرين ومع ذلك الناس تكذّبنا وتسخر مننا عادي جدا زي ما حصل مع إلياس عليه السلام 👌
طيب بقى هل لما كذبوه ربنا أهلكهم؟
لأ لم يهلكهم ولكن توعدهم بعذاب الآخرة...ودي الفائدة التانية، وهي:
♡ إن ربنا بيقولنا مش لازم تشوف هلاك الفاجر أو الكافر أو الفاسق أو الظالم في الدنيا، ممكن تلاقيه عايش حياته بيعمل ما بدا له وعنده أموال وأولاد ومنصب وكل النعم،
لكن مش معنى كده إنه على حق...لأ ده هيشوف الويل في الآخرة👌
حتى ربنا بيقول إيه:
"وَلَا يَحْسَبَنَّ الَّذِينَ كَفَرُوا أَنَّمَا نُمْلِي لَهُمْ خَيْرٌ لِّأَنفُسِهِمْ ۚ إِنَّمَا نُمْلِي لَهُمْ لِيَزْدَادُوا إِثْمًا ۚ وَلَهُمْ عَذَابٌ مُّهِينٌ "

يعني الناس دي متفكرش إن ربنا سايبهم كده على كفرهم وظلمهم إن دي حاجة كويسة ليهم، لأ ده سايبهم عشان كل مايزدادوا في الطغيان كل ما عذابهم هيزيد😈
وطبعا في المقابل المؤمنين إللي بيتعرضوا للظلم أجرهم هيزيد،
فمش لازم تشوف هلاك الظالم بعينك..ممكن انت تموت وهو لسه عايش عادي جدا ،زي ما أبو جهل قتل سمية وزوجها ياسر ، همّ ماتوا واستمر أبو جهل عايش بعدهم،
وربنا قال لرسول الله ﷺ في القرآن:
"فَإِمَّا نُرِيَنَّكَ بَعْضَ الَّذِي نَعِدُهُمْ أَوْ نَتَوَفَّيَنَّكَ فَإِلَيْنَا يُرْجَعُونَ"
وقال:
"وَإِمَّا نُرِيَنَّكَ بَعْضَ الَّذِي نَعِدُهُمْ أَوْ نَتَوَفَّيَنَّكَ فَإِلَيْنَا مَرْجِعُهُمْ ثُمَّ اللَّهُ شَهِيدٌ عَلَى مَا يَفْعَلُونَ"
فربنا بيأكد علينا في القرآن العبرة دي أكتر من مرة، عشان نتعلم إن احنا دورنا فقط هو التبليغ،
أما عاقبة الناس فأمرهم بإيد ربنا وحده، يعذبهم في الدنيا بعصيانهم،
أو يأجل عقابهم للآخرة، أو يتوب عليهم قبل الممات ويقبلهم مع الطائعين، ده مش مفروض يأثر فيك أو يلهيك عن مهمتك، فإنما علينا البلاغ وعلى ربنا الحساب👌

الفائدة الثالثة هي:
♡إننا نوصل دين ربنا وخلاص...سواء الناس استجابت ولّا لأ،
احنا مش مطلوب مننا إننا نُكره الناس ونغصبهم على تطبيق نصايحنا بالطاعة وترك المعاصي،
ولعل إجبارنا ليهم ده بالكلام أو بالفعل ده إللي بيخلي الناس أحيانا تَنفُر مننا بالفعل، لأنهم بيحسوا إننا عايزين نتحكم فيهم ونمشيهم على مزاجنا،
فبيبان كإني عاوز الحق يوصلك عن طريقي أنا وبس..
واحنا نفسنا ساعات بنبقى فاهمين غلط،
بنبقى فاهمين إننا لما نقول لحد أي نصيحة المفروض إنه ينفذها في نفس اللحظة في ساعتها،
فلما ميعملش كده نقوم نتعصب وتقلب بخناق وحرقة دم😅ونسينا إن رسول الله وهو رسول الله قعد ١٣ سنة في مكة يدعو الناس لقول لا إله إلا الله ولم يسلم إلا القليل👌
وربنا قال لرسول الله ﷺ نفسه:
"وَمَا جَعَلْنَاكَ عَلَيْهِمْ حَفِيظًا ۖ وَمَا أَنتَ عَلَيْهِم بِوَكِيلٍ"
وقال له في آية تانية إنه يقول ده للناس بوضوح كمان:
"قُلْ يَا أَيُّهَا النَّاسُ قَدْ جَاءَكُمُ الْحَقُّ مِن رَّبِّكُمْ ۖ
فَمَنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۖ وَمَا أَنَا عَلَيْكُم بِوَكِيلٍ "
يعني نبلغ دين ربنا ...والله الناس آمنوا واتبعوا؟ هياخدوا أجرهم في الآخرة..
طب لم يتبعوا؟ خلاص دي حاجة ترجع لهم ولربهم ، همّ إللي هيتحاسبوا وهو اللي هيحاسبهم👌
لكن مش معنى كده إني أسيب الناس من غير ما أمرهم بالمعروف وأنهاهم عن المنكر عشان ما استجابوش من أول مرة😶
لأ طبعا احنا نأمر بالمعروف وننهى عن المنكر ونبلغ دين ربنا ليل نهار، لكن ننوع في الأسلوب مع المعاندين، مرة بالترغيب في الأجر،
ومرة بالترهيب من عذاب ربنا للي بيخالف أوامره ومرة بالكلمة، ومرة بالصحبة، ومرة بالنصي

حة، ومرة بالهدية، ومرة بالقصة... وهكذا زي ما كان رسول الله ﷺ بيعمل مع الناس إللي بيدعوهم.

بعد موت إلياس عليه السلام تولى النبوة ابن عمه 《اليسع》، وكان إلياس عليه السلام بيربيه عشان يتحمل أعباء النبوة من بعده.
فسار اليسع على نفس منهج إلياس عليه السلام ، وكان بيدعو بني إسرائيل لعبادة الله والتمسك بشريعته سبحانه،
ظل فيهم مدة زمنية الله أعلم بيها ، لحد ما مات عليه السلام، مفيش عنه أخبار مُفَصّلة زي باقي الأنبياء..
لكن بنو إسرائيل كَثُر فيهم الفساد والفجور والظلم، لدرجة إنهم بقوا يقتلوا الأنبياء😬
وكان عندهم تابوت، صندوق يعني، فيه آثار من أغراض موسى عليه السلام،
زي بعض ملابسه مثلا، وكانت العصا كمان موجودة في الصندوق ده، و بعض ألواح التوراة،
فربنا سلط الجبابرة على بني إسرائيل وأخرجوهم من القدس وسرقوا التابوت، ورجعوا مشردين تااااني في الأرض😶
هل سيظل بنو إسرائيل مشردين؟
ولا هيحاولوا يرجعوا لبيت المقدس مرة تانية؟

ده إللي هنعرفه الجزء الجاي إن شاء الله😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

ساعة إجابة، لا تنسوا أهلنا المستضعفين في كل بقاع الأرض من صالح دعائكم

#قصص_الأنبياء
#الحلقة_السابعة_والثلاثون
#قصة_طالوت_وجالوت

وقفنا المرة إللي فاتت عند بني إسرائيل لما ربنا سلط عليهم الجبابرة أو العماليق وسرقوا منهم التابوت وأخرجوهم من القدس وشردوهم بسبب فجورهم وقتلهم لأنبيائهم،
ومات ملك بني إسرائيل في الوقت ده من الهم والحزن بسبب سرقة التابوت،
فأصبح مفيش حاكم يجمعهم تحت راية واحدة،
واحنا قلنا المرة إللي فاتت إن المُلك والنبوة انفصلوا عن بعض، يعني النبي بييجي من سِبط ، والمَلك أو الحاكم من سِبط تاني، والسّبط هنا معناه قبيلة،
لكن المقصود بكلمة الأسباط هم الأنبياء من ذرية يعقوب عليه السلام.. عشان بس مايحصلش لخبطة😅
مفيش مَلِك .. لكن النبوة موجودة... مستمرة .. لإن الدين لازم يُقام في جميع الأحوال👌
بنو إسرائيل تعبوا وزهقوا من التشريد وعايزين يرجعوا للقدس، ويسترجعوا أبناءهم المأسورين عند الجبابرة،
فراحوا لنبي ذلك الزمان،
ويُقال إن اسمه 《شَمُوِيل》 أو 《سَمْعُون》 طبعا مفيش دليل على الاسم ده، يعني اسمه عرفناه من الإسرائيليات، إللي لا بنصدقها ولا بنكذبها زي ما قلنا قبل كده،

فقالوا له: إحنا عايزين مَلِك عشان يقودنا للجهاد في سبيل الله، فاختار لنا مَلِك😤
"أَلَمْ تَرَ إِلَى الْمَلَأِ مِنْ بَنِي إِسْرَائِيلَ مِنْ بَعْدِ مُوسَى إِذْ قَالُوا لِنَبِيٍّ لَهُمُ ابْعَثْ لَنَا مَلِكًا نُقَاتِلْ فِي سَبِيلِ اللَّهِ "
فنبيهم رد عليهم وقال لهم
ولما يتفرض عليكم الجهاد وبعدين متجاهدوش بقى😑
"قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلَّا تُقَاتِلُوا "

☆ده احنا حفظناكم خلاص... كلام وشعارات وبس🙄

فردوا بكل حماس وقالوا:
إزاي مش هنجاهد والعمالقة أخرجونا من بيوتنا وشردونا وأسروا أبنائنا😤
"قَالُوا وَمَا لَنَا أَلَّا نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا"
وكان عددهم حوالي ٨٠ ألف..فربنا فرض عليهم الجهاد زي ما طلبوا... والنتيجة متوقعة طبعا💁‍♂️
رجعوا في كلامهم ومجاهدوش، إلا القليل جدا منهم..
"فَلَمَّا كُتِبَ عَلَيْهِمُ الْقِتَالُ تَوَلَّوْا إِلَّا قَلِيلًا مِنْهُمْ"
☆وده أول اختبار يسقطوا فيه مع النبي الجديد😶

¤عارفين الموقف ده زي إيه🤔
لما مجموعة من الشباب أو البنات مثلا يسمعوا إن الإلتزم بدين ربنا ده حاجة جميلة، وإن نهاية الإلتزام ده الجنة، فيبدأوا يطلبوا إنهم يدخلوا بقى في الالتزام ده ويتعرفوا أكتر عليه،
وبعدين بقى لما يبدأوا يعرفوا إن الواحد لازم يصلي الصلوات كلها في مواعيدها وبشروطها، وميفطرش في رمضان وميغتابش ولا يكذب ولا يحسد ولا يسخط وينفق من فلوسه زكاة المال،
وإن في حجاب بشروط معينة وفي اجتناب للمحرمات وووإلخ... تلاقي جزء من الناس دي يقولوا إيه العقد والتشدد ده 😳
لا لا خلونا زي ماحنا، و أصلا ربنا غفور رحيم ☺️
مش معقولة هيدخلنا النار عشان حبة شعر مش مغطيينهم، مش معقولة هيعذبنا عشان حبة حركات رياضية مانتظمناش فيها -إللي هي الصلاة-
أنا هتصدق بدالها وده إللي أقدر عليه وربنا عارف إللي في قلبي والإيمان إيمان القلب..
وهنا الناس تبدأ تِفصل العمل عن الإيمان تماما،
وده أكبر خطر ممكن الواحد يتعرض له، لإن الإيمان اعتقاد بالقلب وقول باللسان وعمل بالأركان.. والعمل دليل على الإيمان والطاعة.. لكن مين يفهم الكلام😐
أهه بني إسرائيل لما شافوا إن الموضوع صعب عليهم تراجع الجزء الأكبر منهم، والجزء الأقل هو إللي كمل الطريق👌

نبيهم قال لهم:
مش انتم طلبتم مَلك؟ ربنا جعل لكم طالوت مَلِك يحكمكم👌
"وَقَالَ لَهُمْ نَبِيُّهُمْ إِنَّ اللَّهَ قَدْ بَعَثَ لَكُمْ طَالُوتَ مَلِكًا"
فقالوا:
إزاي يكون مَلك علينا واحنا أحق بالمُلك منه! المُلك في القبيلة بتاعتنا من زمان، إزاي واحد من قبيلة تانية هو إللي يكون ملك علينا😲
وكمان معندوش فلوس كتير و مش من الأثرياء😒
" قَالُوا أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِنَ الْمَالِ "
☆وده تاني اختبار يسقطوا فيه مع النبي الجديد تاني😑

¤يعني انتم أهم حاجة عندكم دلوقتي إن المُلك يبقى فيكم😶
يعني يا إما احنا يا إما لأ😑
هو إيه المهم بالنسبالكم دلوقتي؟ مش المهم إنكم ترجعوا بلدكم وتحرروا أبناءكم المأسورين، ولّا المهم الجاه والمنصب والرياسة والزعامة🤦‍♂️
المفروض إن المهم إن النصر يتحقق وتعيشوا في سلام في أرضكم، ومش مهم على إيد مين يتحقق الكلام ده، وخصوصا إن ربنا هو إللي اختار المَلِك ده،
يعني مش مثلا النبي نفسه هو إللي اجتهد في اختياره ليكم فممكن مثلا يكون فيه نقاش، لأ، ده بيقول لكم بوضوح
"إن الله قد بعث لكم طالوت مَلِكا"😑

فنبيهم كرر عليهم إن ربنا هو إللي اختاره مش أنا،
والعبرة مش بكثرة المال ، في عطايا ومزايا تانية مهمة ربنا رزقه بيها، ربنا أعطاله علم وجسم ضخم، ودي كلها مميزات مش عندكم 🤷‍♂️
ثم ربنا يُعطي الملك لمن يريد، هو يعلم تماما الشخص المناسب لكل مهمة😤
"قَالَ إِنَّ اللَّهَ اص

ْطَفَاهُ عَلَيْكُمْ وَزَادَهُ بَسْطَةً فِي الْعِلْمِ وَالْجِسْمِ وَاللَّهُ يُؤْتِي مُلكَهُ من يَشَاء"

¤وهو ده معيار الاختيار للقادة إللي القرآن بيعلمهولنا، معيار القوة والعلم ، مش المال ولا الوجاهة ولا النسب والحسب،
وبيعرف يتكلم بعلم مش زي غيره نقعد نعصر دماغنا عشان نفهم جملة مفيدة 🙄
المهم يعني مع إن طالوت كان قليل المال ومن قبيلة تانية غير قبيلة الملوك؛ لكن هو أحق بالملك بسبب مواصفات فيه مكنتش موجودة في حد غيره.

فقالوا لنبيهم واحنا نعرف منين إن انت صادق وبتقول الحق وإن ده كلام ربنا؟!😒
فرد عليهم وقال:
علامة مُلكه إن التابوت إللي اتسرق منكم ، الملائكة هتحمله وهتجيبه لحد عندكم من تاني👌
"وَقَالَ لَهُمْ نَبِيُّهُمْ إِنَّ آيَةَ مُلْكِهِ أَنْ يَأْتِيَكُمُ التَّابُوتُ فِيهِ سَكِينَةٌ مِنْ رَبِّكُمْ وَبَقِيَّةٌ مِمَّا تَرَكَ آلُ مُوسَى وَآلُ هَارُونَ تَحْمِلُهُ الْمَلَائِكَةُ"
ولقوا التابوت فعلا طاير في السماء لحد ما وصل عندهم، وفتحوه ولقوا فيه أثار موسى عليه السلام، فقبلوا بملك طالوت على مضض وهمّ متأزمين نفسيا..هيعملوا إيه يعني مضطرين يوافقوا😑
فطالوت بدأ يجهز الجيش إللي هيروح يقاتل بيه الجبابرة،
طالوت عارف إن في الجيش بتاعه ناس معترضين عليه ومش عايزينه وهم دلوقتي داخلين معركة،
فإزاي هيعتمد عليهم كده ويضمن ثباتهم عند مواطن الخطر الشديدة؟
ده ممكن في لحظة يتخلوا عنه ويعرضوا الكل للهلاك👌
فكان لازم اختبار لهم قبل المعركة...
لما مشي طالوت بالجنود فترة وهم في الطريق عطشوا،
فقال لهم طالوت ربنا هيبتليكم ويختبركم عشان يشوف إذا كنتم هتقدروا تكملوا ولّا لأ ويعلم الصادق من الكاذب،
احنا هنعدي على نهر..فمحدش يشرب من النهر ده،
إللي هيشرب منه مش هيكمل معايا... إلا لو بس شرب شربة ماء واحدة بإيده كده عشان يبل ريقه زي ما بنقول،
"فَلَمَّا فَصَلَ طَالُوتُ بِالْجُنُودِ قَالَ إِنَّ اللَّهَ مُبْتَلِيكُمْ بِنَهَرٍ فَمَنْ شَرِبَ مِنْهُ فَلَيْسَ مِنِّي وَمَنْ لَمْ يَطْعَمْهُ فَإِنَّهُ مِنِّي إِلَّا مَنِ اغْتَرَفَ غُرْفَةً بِيَدِهِ "
فلما وصلوا للنهر...كوووولهم شربوا منه إلا مجموعة قليلة جدا.
"فَشَرِبُوا مِنْهُ إِلَّا قَلِيلًا مِنْهُمْ "
عددهم ٣١٤ فقط، من أصل 80 ألف جندي، همّ فقط إللي نجحوا في الاختبار 👌

☆سهل أوي إني اقول إني مؤمن وإني مُناصر للحق وإني هدافع عن الدين و....و... وربنا يعلم الصادق في كلامه فعلا ويعلم المُدَّعي،
لكن ربنا مش بيحاسبنا بسابق علمه فينا،
لازم يكشفنا قصاد أنفسنا احنا صادقين فعلا ولّا لأ ، فبيبتلينا بالاختبارات الكاشفة.. ويا بخت إللي ربنا يبَصَّرَهُ بعيوب نفسه فيصلحها ويتوب عنها ويصبر عند الفتن👌

الناس إللي خرجت مع طالوت للجهاد مقدروش يصبروا عن شوية مية،
فإزاي هيصبروا على الموت أو الأسر أو الجرح في سبيل الله!؟
إزاي هيثبتوا قدام مواجهة ناس بالقوة دي وهمّ ماقدروش يثبتوا قدام حبة مية زيادة عن قدر الحاجة فقط👌

☆عارفين زي إيه😑
زي لما أعلنت أمريكا إن القدس عاصمة الكيان الصهيوني، الشباب اتحمسوا بقى ويلّا افتحوا لنا باب الجهاد وعالقدس رايحين شهداء بالملايين،
وهمّ أصلا نفس الشباب دول ناشرين على صفحاتهم على فيسبوك أفلام وأغاني وصور نساء متبرجات وألفاظ نابية ونكت فيها شرك ومنكرات وكلام عن الأبراج و...و... وماخفي كان أعظم 😞
طيب إنت أصلا مش قادر تقاوم شهوة نفسك في مساحة معركتك الشخصية الضيقة جدا اللي اسمها "فيسبوك" هتعرف تثبت في أرض معركة وجهًا لوجه مع سيوف وقنابل؟!
إنت بتقوم تصلي الفجر بالعافية في البرد، ده إذا قمت أصلا🤓
انت بتقوم من على موبايلك والألعاب والنت بالعافية مش قادر تقاوم شهوتك ومزاجك! وعايز تقاتل في سبيل الله؟
طب إزاي؟
في حياة كل واحد فينا ابتلاء زي ابتلاء النهر كده، بمعاصي أو حتى إفراط في المباحات على حساب الأولويات،
لكن على حسب إيمان وشخصية كل واحد فينا بيكون الوقوع الخطأ أو بيكون العصمة منه👌
وفي النهاية ، لا يدخل الجنة إلا المؤمنون الصابرون،
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ"
بتجاهد نفسك وتصبر على الطاعة ولّا لأ؟
◇بتصبر على كظم الغيظ، ولّا سايب بركان غضبك يفور وقت ما يحب؟
◇بتصبر على إجبار نفسك على اختيار الكلام الطيب وانت بتكلم الناس، ولّا بتخبط في وشهم الكلام إللي زي الطوب بدون أي مجهود في مراجعته وتحسينه؟
◇بتصبر على الإحسان للناس برغم الإساءة، ولا بتسيب نار الثأر تاكل كل شيء لإن نفسك عندك مقدسة مينفعش حد يمسها بسوء وأسيبه يعيش حياته بعدها ببساطة؟
◇بتصبر إنك تتبع منهج رسول الله ﷺ برغم مخالفة الناس حواليك لمعظم الدين دلوقتي، والا بتعوم على عومهم وخلاص بدون أي مقاومة؟
◇بتجاهد نفسك وتصبر عن الغيبة، ولاّ ما بتقدرش تلجّم لسانك؟ فإزاي هتقدر تلجّم فرسك في الجهاد بقى؟
شوف ابتلاء النهر إللي في حياتك إيه هو وفتش عنه، وحاسب

نفسك وابدأ عالجها.. قد أفلح من زكاها.. وقد خاب من دساها..
الحياة لسه فيها فرص مفتوحة قصادنا، غيرنا بيتمنى إنه يرجع للفرص دي كلها... فسارعوا إلى مغفرة من ربكم👌

نرجع لطالوت و نشوف كمل الطريق إزاي،
طالوت أخد الـ٣١٤ مؤمن إللي صبروا معاه ، واتوجه بيهم ناحية بيت المقدس،
لما وصلوا هناك وشافوا جيش الجبابرة الضخم -وكان القائد بتاعهم اسمه جالوت وكان ضخم وقوي جدا- خافوا😥
وقالوا احنا مش هنقدر على جالوت وجنوده .. عددنا بقى صغير أوي وهمّ أعدادهم كثيرة وأقوى مننا😰
"فَلَمَّا جَاوَزَهُ هُوَ وَالَّذِينَ آمَنُوا مَعَهُ قَالُوا لَا طَاقَةَ لَنَا الْيَوْمَ بِجَالُوتَ وَجُنُودِهِ"
فرد عليهم العلماء العالمون وقالوا:
إن النصر مش بالكثرة ولا بالقوة ولا بالعتاد، لكن بالتقوى والصدق والإيمان الراسخ والتوكل على الله والاعتصام به،
ربنا هو إللي بينصر الفئة القليلة على الفئة الكثيرة، مادامت الفئة القليلة مؤمنة بالشكل ده👌
قَالَ الَّذِينَ يَظُنُّونَ أَنَّهُمْ مُلَاقُو اللَّهِ كَمْ مِنْ فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّهِ وَاللَّهُ مَعَ الصَّابِرِينَ"
دول الناس إللي على يقين من لقاء الله والآخرة، وده ردهم الطبيعي في كل زمان ومكان.

لما اصطف الجيشين للقتال ، المؤمنين دعوا ربنا إنه يرزقهم الصبر ويثبت أقدامهم عشان يقدروا يكملوا المعركة وينتصروا فيها على جيش الكفار 👌
وَلَمَّا بَرَزُوا لِجَالُوتَ وَجُنُودِهِ قَالُوا رَبَّنَا أَفْرِغْ عَلَيْنَا صَبْرًا وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ"

☆وهنا في فائدة لينا...وهي إننا المطلوب مننا ناخد بالأسباب إللي نقدر عليها وخلاص،
مالناش دعوة بالنتائج.. النتائج دي بتاعة ربنا👌
وفي الأول وفي الآخر ربنا هو إللي بيوفّق ويعين، يعني مش بشطارتي إني أقوم لصلاة الفجر في عز البرد... مش بشطارتي إني ألتزم بدين ربنا في وسط مجتمع بيعمل كل إللي هو عايزه،
إنما الأمور كلها بحول الله وقوته والاستعانة بيه عز وجل👌

جالوت قائد الجبابرة طلب حد يبارزه من جيش طالوت، فخافوا ومحدش قام قصاده🙊
ماعدا شاب كان عمره ساعتها ١٦-١٧ سنة كده، قال لطالوت : أنا هبارزه🙋‍♂️
فطالوت قال له لو قتلت جالوت هزوجك بنتي وهخليك مَلِك من بعدي👌

☆وده ينفع عادي من باب التشجيع، زي المكافآت إللي بتتعمل في مسابقات حفظة القرآن كده، من باب التشجيع أكتر على الطاعة😅
فقام الشاب -وكان اسمه داوُد- وخرج لمبارزة جالوت ، فاستغرب جالوت إزاي شاب صغير جسمه ضئيل عايز يبارزني أنا😏
معندكوش حد أكبر وأضخم منه ولّا إيه🙄
دخل عليه داود.. وكان سلاحه "المِقلاع"، ودي أداة رَمْي، حاجة كده زي نبلة مثلا لكن بطريقة مختلفة ،
عبارة عن جلدة بيحط فيها الحجارة مربوطة بحبل ويقعد يلف فيها ثم فجأة يحدفها على الهدف،
لو بتشوفوا أطفال فلسطين وهمّ بيستعملوها في مقاومتهم لليهود، هتعرفوها😁
فداود وضع تلاتة من الحجارة في الجلدة وقعد يلفها .. يلفها.. يلفها.. لحد ما فجأة رماها على جبهة جالوت فأصابه وقتله👌
"وَقَتَلَ دَاوُدُ جَالُوتَ"..
وقع جالوت ميت فالمؤمنين اتشجعوا يقاتلوا باقي الجيش ، وبالفعل انتصروا عليهم، "فهزموهم بإذن الله"
واستعادوا القدس ورجعوا للبلد الكريمة تاني.
وتزوج داود من ابنة طالوت وتولى المُلك من بعده زي ما وعده طالوت

مين هو داود؟ وكيف كان حكمه في بني إسرائيل؟

ده إللي هنعرفه الجزء الجاي إن شاء الله😁

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

كيف تلهو وحال أمتك كما ترى؟

كيف تضيع طاقتك ونفسك وأنت فرد من هذه الأمة التي يموت أطفالٌ منها جوعاً على يد الكفرة الحاقدين ومن والاهم ممن أذلوا الشعوب؟

كيف يرتاح ضميرك لتبديد المال الذي جعل الله بين يديك في السرف واللهو والتبذير وإخوانك هناك لا يجدون ما يسد رمقهم؟

استشعر مسؤوليتك في هذه الأحداث..

مسؤوليتك أن تنصرهم بكل ما تستطيعه بشكل مباشر، وتنصر أمتك في ثغرك ونفسك في كل أيامك وحياتك وأدوارك فيما قد يبدو شكلاً غير مباشر..

أن تعمل لتكون أنت وأسرتك ومن ثم دائرتك الأكبر والأكبر قوة للأمة ورفضاً لذلها وصمتها..

أن تجتهد لتكون من مكانك سبباً لرفع الاستضعاف والخذلان عنها..

ألا نكون ضائعاً في الغفلة واللهو تظن أنك ستقوم للجهاد بمجرد فتح بابه!
بل تهيأ وتوجه واحمل هم الأمة وامتلئ بها وبالانتماء إليها من مكانك..

معاصيك الفردية "تفرق"!
تقصيرك "الخاص" مؤثر!

وحالتك ووقتك وأعمالك الخاصة جزء من هذه الأمة وتستطيع أن تكون من أسباب قوتها أو من أسباب ضعفها..

فلك الخيار..

اقرأ باسم ربك الذي خلق || سورة العلق كاملة
القارئ #بدر_التركي - يوتيوب

الصور المستخدمة بالتصميم

﴿إِنَّ الَّذينَ قالوا رَبُّنَا اللَّهُ ثُمَّ استَقاموا فَلا خَوفٌ عَلَيهِم وَلا هُم يَحزَنونَ﴾ [الأحقاف: ١٣]
إن الذين قالوا: ربنا الله، ثم استقاموا على الإيمان به، فلا خوف عليهم من فزع يوم القيامة وأهواله، ولا هم يحزنون على ما خلَّفوا وراءهم بعد مماتهم من حظوظ الدنيا.
- التفسير الميسر
- الشيخ #محمد_صديق_المنشاوي

#قصص_الأنبياء
#الحلقة_الثامنة_والثلاثون
#قصة_داود_الجزء_الاول

¤قبل ما أبتدى قصة النهاردة في ملحوظة مهمة عايزة أقولها عشان إللي ميعرفش يعرف😊
وهي إن أي معلومة بقولها عليها دليل من القرآن أو السنة أو كلام جمهور العلماء من المذاهب الأربعة ،أو جمهور المفسرين،
مش بجيب أقوال شاذة،
ولو في أي إسرائيليات من إللي يجوز نحكيها كما قال رسول الله ﷺ... بنَبّه عليها لما بقولها،
إللي عايز الدليل على أي معلومة بقولها يسألني وأنا هجيب له الدليل عادي جدا 😁✌

☆نرجع لقصتنا 😊

وقفنا المرة إللي فاتت عند داود لما قتل جالوت وكان طالوت وعد داود إنه يزوجه ابنته ويكون وريثه في الملك،
ونفّذ طالوت وعده وزوجه ابنته، وأحب بنو إسرائيل داود،
مين بقى داود🤔
فاكرين لما اتكلمنا عن خلق آدم عليه السلام وإن ربنا مسح على ظهره وأراه ذريته، وكان كل واحد من أبناؤه كان في وجهه نور، ماعدا واحد بس كان النور ده شديد أوي،
فجذب انتباه آدم عليه السلام، فسأل ربنا عنه فقال له الله إن هذا داود فأعطاه آدم من عمره أربعين سنة عشان يكمل عمره مائة عام؟
أهه هو ده داود 😁
كان داود من نسل يعقوب عليه السلام...تولى حكم بني إسرائيل وأعطاه الله النبوة 👌
فكان أول نبي يجمع النبوة والملك بعد يوشع بن نون عليه السلام،
فاكرين لما قلنا إن المُلك كان في سِبط والنبوة في سِبط، دلوقتي اجتمعت تاني في داود عليه السلام😊
"وشَدَدْنَا مُلْكَهُ وَآتَيْنَاهُ الْحِكْمَةَ وَفَصْلَ الْخِطَابِ"

وربنا قال له إنه يحكم بين الناس بالعدل والحق ولا يتبع الهوى، يعني متحكمش لحد عشان هو قريبك أو صديقك ويكون الحق مش معاه،
ولا تحكم ضد عدوك بالظلم ويكون الحق معاه، وإلا هتكون من الضالين عن طريق الله وطريق الحق، وإللي بيضل عن الطريق هيكون من المعذبين عذاب شديد يوم القيامة لإنهم ما عملوش حساب وقفة يوم الجزاء👌
"يَا دَاوُودُ إِنَّا جَعَلْنَاكَ خَلِيفَةً فِي الْأَرْضِ فَاحْكُمْ بَيْنَ النَّاسِ بِالْحَقِّ وَلَا تَتَّبِعِ الْهَوَى فَيُضِلَّكَ عَنْ سَبِيلِ اللَّهِ إِنَّ الَّذِينَ يَضِلُّونَ عَنْ سَبِيلِ اللَّهِ لَهُمْ عَذَابٌ شَدِيدٌ بِمَا نَسُوا يَوْمَ الْحِسَابِ "

☆ربنا بيقول الكلام ده لداود النبي... فما بالنا بينا احنا😞

عاش داود عليه السلام مع بني إسرائيل في القدس، وكان بيحكم بينهم بالعدل، ومع إنه كان ملك لكنه كان بيشتغل ، كان بيصنع دروع،
عارفين دروع الحرب إللي كان بيلبسها الجنود زمان عشان تحميهم في الحروب 🤔
أهه أول واحد اخترع الدروع دي كان داود عليه السلام بتعليم الله له.. وكان الموضوع سهل على داود عليه السلام، لإن ربنا أعطاه له آية أو معجزة، وهي معجزة لِين الحديد بين يديه،
يعني لما كان يمسك الحديد كان يقدر يشكِّله ويتحكم فيه من غير ما يضطر الأول يسخنه جاااامد جدا عشان يبقى طري ويتمكن من تشكيله،
يعني الحديد في إيده كان بيتشكل بسهولة زي العجينة الطرية إللي بنشكلها ونعمل منها مخبوزات😅
"وَأَلَنَّا لَه الْحَدِيدَ"
فكانت الدروع إللي بيعملها دقيقة جدا، خفيفة فمش بتعُوق الجنود في الجهاد، وفي نفس الوقت معمولة بإتقان يحميهم من ضربات العدو.
"وَعَلَّمْنَاهُ صَنْعَةَ لَبُوسٍ لَّكُمْ لِتُحْصِنَكُم مِّن بَأْسِكُمْ "

☆طيب وإيه المشكلة يعني لو ملبسوش دروع ؟
ما يموتوا وخلاص ومفيش داعي يحموا نفسهم من ضربات العدو...مش إللي بيموت في سبيل الله بيكون شهيد😕
أيوة الشهادة في سبيل الله أقصى ما يتمنى الإنسان، لكن نتخيل كده لو كلنا متنا في سبيل مين إللي هينشر دين ربنا؟ مين إللي هيعلم الناس ويخرجهم من ظلمات الكفر؟
ثم في المعارك لازم الأخذ بالأسباب إني أستمر على قيد الحياة أكبر وقت ممكن👌
بحيث إني أزود عدد القتلى والخسائر إللي في صفوف العدو وأساعد جيش المسلمين بأكبر طاقة ممكنة، مش أدخل المعركة من غير أي عُدة ولا عتاد ولا دروع ولا خطط دفاعية، وأخلي الأعداء يقتلوني بحجة الشهادة😶
ده رسول الله ﷺ وهو رسول الله كان بيلبس الدروع وبيجهز الجيوش بالعتاد الكافي للقتال أطول فترة ممكنة لإجبار العدو على الانسحاب وإعلان هزيمته،
وبيعمل الخطط الدفاعية المُحكمة👌
فقبل الدخول في أي معركة لازم يكون الجنود مُجهّزين إيمانيًا، وكمان مُجهّزين على حسب استطاعتهم بالقوة والسلاح💁‍♂️
وربنا بيقول:
"وَأَعِدُّوا لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ "

داود عليه السلام برغم مُلكُه وشُغله في الحِدادة كان عابد لله، وكان بيصوم يوم ويفطر يوم، وده أفضل الصيام كما قال رسول الله ﷺ:
"إن أفضل الصيام صيام داود: كان يصوم يوماً ويفطر يوماً"
وربنا أنزل على داود عليه السلام الزَّبُور .. وكلمة الزبور نفسها معناها الكتاب، وكان الزبور عبارة عن حِكَم ومواعظ مكنش فيه حلال وحرام،
عارفين كمثال: زي آيات الترغيب والترهيب في القرآن كده🤔
فكان داود يقرأها ويدندن بيها ويتغنّى في قراءتها ويحسّن بيها صوته وكان صوته جميل جدا مفيش لصوته مثال، بينضرب بيه المثل في الأصوات

الجميلة.. يعني لو قلنا إن يوسف عليه السلام أخد جمال الشكل، فداود عليه السلام أخذ جمال الصوت 😅

☆وبالمناسبة داود عليه السلام مكنش بيستعمل المزمار زي ما الناس فاهمة، يعني رسول الله ﷺ لما قال لأبي موسى الأشعري لما سمع تلاوته للقرآن:
" لقد أُوتيتَ مزمارًا من مزامير آل داود"
مكنش يقصد إن معاه مزمار موسيقي في بيته، لكن يقصد إن صوته حلو شبيه بصوت المزمار، فالموضوع مجرد تشبيه فقط👌
كمان حديث عائشة رضي الله عنها لما دخل عليها أبوها أبو بكر الصديق رضي الله عنه،
وكان فيه جاريتين صغيرتين بيغنوا في يوم الفطر أو يوم الأضحى وبيضربوا بالدف فقط، ورسول الله ﷺ موجود معاهم بس مديهم ضهره، فقال أبو بكر الصديق باستغراب واستنكار:
《مزمار الشيطان في بيت رسول الله؟!》
فرد رسول الله ﷺ وقال له إنه يسيبهم عادي لإن ده يوم عيد فعادي إنهم يغنوا، فكان المقصود هنا هو الغناء مع الضرب بالدف فقط،
فالجاريتين الصغيرتين مكنش معاهم مزمار ولا حاجة؛
لإن من المعروف في شريعة الإسلام إن أصوات الموسيقى محرمة،
سواء كانت الموسيقى دي من آلات موسيقية معروفة أو أصوات بتخرج من الفم والحنجرة تشبه بالضبط صوت الموسيقى،
زي الأكابيلا أو البِيت بوكس كده إللي منتشرين دلوقتي؛ لأن الأصل في التحريم على النتيجة مش على السبب👌
عارفين زي تحريم الخمر كده🤔
أي حاجة بتؤدي للسُّكْر دخلت في التحريم، لأن في حاجات مستحدثة مكنتش موجودة على أيام رسول الله ﷺ ،
فالحكم بيكون على النتيجة، يعني لو حاجة أدت لسُكر الإنسان دخلت في حكم الخمر،
ولو حاجة طلعت نفس صوت الموسيقى بالضبط دخلت في نفس حكم الموسيقى👌

كان من جمال صوت داود عليه السلام ، إن الطيور والوحوش والجن والإنس بيتجمعوا حواليه يسمعوا تلاوته للزبور، ومبيتحركوش خااالص من شدة الاستماع بتركيز وإنصات وتأثر😮
شوفوا كده لما بنسمع حد صوته حلو في القرآن مثلا ولاّ الأناشيد، بنكون عاملين إزاي😳
أهه ده ما يجيش ذَرَّة في جمال صوت داود عليه السلام👌
حتى إن الجبال والطيور كانت بتسبّح معاه لما تسمع صوته بالتسبيح،
"إنَّا سَخَّرْنَا الْجِبَالَ مَعَهُ يُسَبِّحْنَ بِالْعَشِيِّ وَالإِشْرَاقِ.. والطير محشورةً كل له أوَّاب.."
وكان عليه السلام مقسّم أيامه:
يوم يتعبد فيه لله، ويوم يسمع فيه خصومة الناس ويحكم بينهم، ويوم لأشغاله ونسائه..

☆وده يعلمنا إننا منسيبش نفسنا كده بدون تخطيط وزي ماتيجي تيجي😶
لما نقسم وقتنا بين أمور الدنيا وأمور الآخرة هنرتاح جدا وهنعرف نركز وننجز بإذن الله،
ومش هنبقي متشتتين وفي دماغنا كذا حاجة ومش عارفين نكمل حاجة لآخرها وماشين في كذا اتجاه،
وقتنا هو رأس مالنا، مينفعش نسيب نفسنا للسعي بدون خطط وترتيب أولويات وتقسيم للساعات وإعطاء كل ذي حق حقه، ولازم نحرص على إن ميبقاش في أوقات فراغ مهدورة بدون نية او عمل يعينا على الطاعة،
فإياك والفراغ القاتل👌
لإن النفس لو مشغلنهاش بالحق هتشغلنا هي بالباطل..
هي أكتر المعاصي سببها إيه؟ مش الفراغ🤷‍♂️
لكن لو كل يوم بنصلي الصلوات المفروضة والسنن الرواتب، ولينا ورد من القرآن وبنسمع درس علم وبنقول أذكار اليوم والليلة وأذكار الأحوال وبنهتم بنفسنا وأهلنا والناس إللي حوالينا،
وبنبلغ إللي اتعلمناه، وبنتابع أحوالنا بانتظام وتخطيط، سواء دراستنا أو بيوتنا أو أزواجنا أو أرحامنا أو أعمال البر والترويح عن النفس بالحلال للاستعانة على الطاعة وشحن الهمم...إلخ، بعد ده كله هنجيب وقت منين للفراغ ولا المعاصي😕
ودي أول حاجة نتعلمها من قصة داوود عليه السلام، تقسيم أوقاتنا كويس👌

في يوم من الأيام إللي كان داود عليه السلام مخصصه للعبادة، في اتنين من الأشخاص تسلّقوا سور المكان إللي كان بيتعبد فيه، ودخلوا عليه فجأة،
فاتخض وخاف زي أي بشر، وده من الخوف الفطري الطبيعي إللي مفيش حرج فيه، ولا ينتقص من عبودية الخوف من الله شيء،
دي حاجة ودي حاجة..
يعني الخوف من الله فقط مقصود بيها إن لو حد هيعاقبني بشيء لو مسمعتش كلامه وكلامه ده فيه معصية لله عز وجل، أقوم أنا أسمع كلامه عشان خايف من عقابه ومخفش من عقاب ربنا على المعصية دي،
يبقى أنا كده إيماني ناقص وفيه مشكلة لازم تتعالج👌
لكن الخوف من الحاجات إللي فعلا تخوّف في الحياة بصفة عامة فده طبيعي ومفيهوش حرج شرعي..
فداود خاف من إللي دخلوا عليه فجأة دول، فهو وإن كان نبي فهو بشر👌
"وَهَلْ أَتَاكَ نَبَأُ الْخَصْمِ إِذْ تَسَوَّرُوا الْمِحْرَابَ إِذْ دَخَلُوا عَلَى دَاوُودَ فَفَزِعَ مِنْهُمْ"
فطمنوه، وقالوا له ما تخافش مننا، إحنا مش جايين في شر أو ضرر ليك، ده إحنا الإثنين اختصمنا في شيء وجايين عشان عاوزينك تحكم بينا فيه بالعدل وتشوف الحق مع مين😅
"قَالُوا لَا تَخَفْ خَصْمَانِ بَغَى بَعْضُنَا عَلَى بَعْضٍ فَاحْكُمْ بَيْنَنَا بِالْحَقِّ وَلَا تُشْطِطْ وَاهْدِنَا إِلَى سَوَاءِ الصِّرَاطِ"

وبدأ أول واحد فيهم يحكي المشكلة قال:
ده أخويا عنده تسعة وتسعين شاة، يعني عنده خير كثير من الأنعام يخليه ق

نوع وميبصش لغيره في رزقه.. وأنا عندي نعجة واحدة بس،
فأخويا رغم غِناه ده كله قال لي أعطني النعجة بتاعتك دي، وغلبني في الكلام ومعرفتش أرد عليه😶
"إِنَّ هَذَا أَخِي لَهُ تِسْعٌ وَتِسْعُونَ نَعْجَةً وَلِيَ نَعْجَةٌ وَاحِدَةٌ فَقَالَ أَكْفِلْنِيهَا وَعَزَّنِي فِي الْخِطَابِ"
فقال داود عليه السلام :
"لَقَدْ ظَلَمَكَ بِسُؤَالِ نَعْجَتِكَ إِلَى نِعَاجِهِ وَإِنَّ كَثِيرًا مِنَ الْخُلَطَاءِ لَيَبْغِي بَعْضُهُمْ عَلَى بَعْضٍ إِلَّا الَّذِينَ آمَنُوا وَعَمِلُوا الصَّالِحَاتِ وَقَلِيلٌ مَا هُمْ"
يعني داود عليه السلام حكم للي اتكلم ده، من غير ما يسمع لأخوه، إللي هو الطرف التاني من الخصومة او المشكلة،
وكان حكمه إن الأخ التاني ده هو إللي ظالم لما طلب منك الشاة الواحدة إللي معاك في حين إن هو عنده تسع وتسعين نعجة غيرها،
وقال له للأسف كتير من الشركاء والأخلّاء بيبغِي بعضهم على بعض، إلا طبعا إللي عنده من الإيمان بالله والعمل الصالح ما يمنعه من الظلم.. وما أقلهم👌
وبعدين انتبه داود عليه السلام لكلامه وتيّقن إن ده كان اختبار من ربنا عز وجل في الحكم بين الناس بضوابط القضاء العادل،
ولكنه عليه السلام اتسرّع واتعجل في الحكم لما أشفق على الطرف إللي بيحكي، فاستغفر ربنا وسجد لله وتاب عن ده،
"وَظَنَّ دَاوُودُ أَنَّمَا فَتَنَّاهُ فَاسْتَغْفَرَ رَبَّهُ وَخَرَّ رَاكِعًا وَأَنَابَ"

واحنا قلنا قبل كده إن الانبياء معصومين من الكفر والشرك والكبائر و الصغائر التي تدل على الخسة والدناءة،
لكنهم غير معصومين من الخطأ العادي زي ما حصل مع يونس عليه السلام.. وزي ما حصل مع داود عليه السلام هنا 😊

☆طيب وهو فين الخطأ إللي وقع فيه داود عليه السلام😕
◇أولا:
إنه استمع لخصم واحد فقط ومسمعش من الطرف التاني في الخصومة مع إنه واقف قصاده كمان، فكان مفروض زي ما سمع من الأول كان لازم يسمع من التاني قبل ما يحكم أي حكم.. مش يمكن التاني هو إللي معاه الحق🤷‍♂️
◇ثانيا:
إنه حكم للشخص الأول بظاهر الأمور من غير ما يعرف هل كلامه حقيقي فعلا وصدق ولّا مزود كلام من عنده؟
مش يمكن القصة محصلتش بالشكل ده؟ مش يمكن ناقصة حتة مهمة جدا تخليه ظالم مش مظلوم؟

☆فاحنا لازم ناخد بالنا لما يجيلنا أي شخص عايز مشورة وبيشتكي من حد تاني، متتبرعش مباشرة بدعم موقفه وتسخن على صاحبه وإنت أصلا ماسمعتش من الطرف التاني،
وممكن إللي بيحكيلك يكون هو إللي غلطان أصلا وهو سبب الكارثة🤦‍♂️
ولو تفتكروا في قصة يوسف عليه السلام،
إخوة يوسف جاءوا أباهم يبكون... أي حد معدي ما يعرفهمش كان هيتعاطف معاهم، في حين إن همّ إللي كانوا مجرمين أصلا مش مجرد مظلومين حتى😅
ويا سلام لو أخت بتحكي عن مشكلة بينها وبين زوجها في الجروبات 😳
تلاقي كل واحدة تقولها وإيه إللي يصبرك على زوج بالاخلاق دي؟!.. اطلقي منه طبعا... فدي مش معصية واحدة هنا، ده ذنب مُرَكَّب من كذا معصية لا يتسع المقام لتحليلها،
والسبب في الجرأة دي بيكون دايما إن الناس ناسيين
"ما يلفظ من قول إلا لديه رقيب عتيد"..
"مَنْ يَشْفَعْ شَفَاعَةً حَسَنَةً يَكُنْ لَهُ نَصِيبٌ مِنْهَا وَمَنْ يَشْفَعْ شَفَاعَةً سَيِّئَةً يَكُنْ لَهُ كِفْلٌ مِنْهَا ".👌
ثم حتى لو سمعت من الطرفين واتضح إن الكلام متطابق وفيه ظالم ومظلوم، ما تسخنش حد على حد،
إنت دورك هنا تفض نزاع بالعدل أيوة، لكن ليك دور تاني إنك تؤلف بين القلوب وتلطف الجو بين الطرفين💁‍♂️

فلما داود عليه السلام إللي هو نبي، وقع في الخطأ ده وهو الحكم من غير ما يسمع من الطرفين تاب واستغفر، فما بالكم بينا إحنا 😶
واحنا ممكن نكون بنقع في الخطأ ده كتير واحنا مش حاسين😞
فلما تاب داوود عليه السلام واستغفر، تاب الله عليه وأثنى عليه 😊
"فَغَفَرْنَا لَهُ ذَلِكَ وَإِنَّ لَهُ عِنْدَنَا لَزُلْفَى وَحُسْنَ مَآبٍ"

☆وده يعلمنا طبعا إننا لما نذنب نسارع بالتوبة والاستغفار و الاعتذار لله عز وجل،
"وَسَارِعُوا إِلَىٰ مَغْفِرَةٍ مِّن رَّبِّكُمْ"
فالتوبة لازم تكون فورية على طول بدون تأجيل وتسويف مهما اتكرر الذنب ده، وربنا بيغفر وبيرحم إللي بيتوب إليه يستغفره 👌

¤في هنا ملحوظة مهمة جداااااا
وهي إن في قصة مشهورة عن داود عليه السلام لا تصح أبداااا وهي من الإسرائيليات المردودة إللي مش مقبولة،
والقصة دي بتقول:
إن داود عليه السلام كان مُتزوج من تسعة وتسعين امرأة ، وشاف امرأة تانية غيرهم فعجبته،
وكانت المرأة دي متزوجة حد تاني، فأمر زوجها إنه يروح يقاتل في الحرب وإنه يكون في الصفوف الأولى في المعركة، عشان يموت فيتزوجها داود عليه السلام بعد منه ويكمل بيها عدد زوجاته 100،
فربنا أرسل له في المحراب ملكين في صورة الخصمين دول ، عشان يعرَّفه خطأه بالقصة بتاعتهم دي إللي شبه قصته مع المرأة، وقالوا كلام كله قَدْح في داود عليه السلام،
فالقصة بتاعة الزواج دي كلها 👆لا تصح إطلاااقا يا جماعة🙅‍♂️❌
وغير مقبولة حتى في حق رجل صالح من الصالحين العاديين، فما بالنا بنبي من ا

لأنبياء المُصطَفين الأخيار👌

داود عليه السلام كان عنده أبناء كتير، وكان عنده ابن مميَّز .. كان اسمه سليمان،
كان سليمان بيساعد داود عليه السلام في أمور الحُكم وحل المشاكل والخصومات إللي بين بني إسرائيل.
من الأحداث إللي حصلت إن امرأتين اختصمتا إلى داود عليه السلام،
يعني جم قاصدينه في حل مشكلة بينهم، وكان معاهم طفل رضيع كانت المرأة الكبيرة ماسكاه في إيدها،
فالكبيرة دي قالت إن الطفل الرضيع ده ابنها، والصغيرة قالت لأ ده ابني أنا ، والذئب أكَل ابن أختي الكبيرة دي،
فداود عليه السلام حَكَم للكبيرة، إما على أساس الشَبه إللي بينها وبين الطفل، أو على أساس إنه كان معاها هي في إيدها شايلاه؛ لإن مكنش فيه قدامه دليل أقوى من ده يقدر يحسم بيه القضية🤷‍♂️
فلما خرجت المرأتين من عند داود عليه السلام، كان سليمان عليه السلام موجود،
فعرضت الصغيرة القصة مرة ثانية عليه،
فقال هاتوا السكين أقطعه بينكم وكل واحدة تاخد نص ليها، فصرخت الصغيرة وقالت لأ هو ابنها خلاص متئذيهوش😥
فحكم سليمان عليه السلام بالطفل الرضيع للصغيرة؛
لأنه عارف شفقة الأم وعارف إن أمه ممكن تتحمل فراقه بعيد عنها لكن ما تتحملش إنه يتعرض لألم أو قتل قدام عنيها ويكون بسببها كمان،
فالأم يهمها إن ابنها يكون حي على قيد الحياة سليم ومعافَى، حتى لو مش في حضنها، بس ما يموتش أو يتأذي،
فسليمان احتال حيلة مشروعة ، وهي إنه أوهمها إنه هيقطع الطفل عشان تُظهر المشاعر الحقيقية العفوية بعيد عن التمثيل👌

☆ومن الحِيل المُشابهة إللي استعملها القضاة برده ، إن رجلين اختصموا عند قاضي، فالمظلوم قال للقاضي:
أنا أقرضت الراجل ده فلوس وهو مش راضي يرجعهالي، وبيقول ما أخدتش منك حاجة😥
فالقاضي قال له: هل معاك شاهد؟.. فالمظلوم قال لأ،
فالقاضي سأل: طب هل في أي علامة معينة؟
فالمظلوم قال: أقرضته الأموال عند شجرة كذا...
فالقاضي قال له:
طيب روح عند الشجرة واستنى هناك.. وخلّى الراجل التاني يستنى معاه في مجلس القضاء..
فبدأ القاضي يقضي بين الناس ، والراجل التاني قاعد جنبه، وبعد شوية قليلة سأله القاضي فجأة:
تفتكر صاحبك يكون وصل للشجرة🤔 .. فالراجل قال له:
لأ.. مايلحقش لأنها بعيدة😕
فالقاضي قال له: باااس تعال بقى ..عرفت منين مكان الشجرة وانت بتنكر أصلا الموضوع كله وإنك تعرف الشجرة😈
فمبقاش قصاده غير إنه يعترف 😄😄
و دي من الحِيل المشروعة إللي ممكن نستعملها لو هتؤدي لاسترجاع الحق الحق من المنكرين😁
طب إيه المواقف التانية إللي حصلت برده مع سليمان .....؟

من المواقف إللي حصلت برده مع سليمان .....

كفاية كده النهاردة نكمل الجزء الجاي إن شاء الله😅

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

ولا تحسبن الله غافلا عما يعمل الظالمون ||
#وديع_اليمني سورة إبراهيم - يوتيوب

الصور المستخدمة بالتصميم