Стары замак у Гродне гэта не толькі XVI стагоддзе, але і XIX-XX стст., калі будынак перастаў быць рэзідэнцыяй манарха і выконваў ваенна-гарамадскія функцыі. Гэтыя стагоддзі таксама пакінулі значны эстэтычны след на целе замка. Ці змогуць пры яго рэканструкцыі ўтрымаць баланс паміж ідэяй «замка Стафана Баторыя» і захаваннем напластаванняў усіх эпох?

P.S. Звярніце ўвагу на 4 здымак з фрагментам роспісу над кутнім праёмам (дзе быў эркер), на якім бачныя мужчынскія ногі ў панчохах па рэнесанснай модзе і вастрыё дзіды.

#замкі #Гродна #дэталі #выяўленне #роспісы

Аднаўленне Крэўскага замка.

фота @belarus_sacral

#Крэва #замкі #рэстаўрацыя

На Крэўскім замку вымуроўваюць Малую браму.

Крыніца
#крэва #замкі #аднаўленне #рэстаўрацыя

А ў Навагрудку вырашылі пагуляць у тэтрыс на руінах замка.

#Навагрудак #замкі #рэканструкцыя

У Нясвіжы перамуроўваюць цагляны бастыён замка, праблемы з якім узніклі адразу заканчэння рэстаўрацыі. Праз памылкі ў гідраізаляцыі, сцены бастыёна пайшлі высаланамі, а пасля ліцавая цэгла пачала проста адвальвацца. Па фота не зусім зразумела ці выправілі праблему, або проста хаваюць сімптомы хваробы, каб праз 15 год перарабіць ізноў.

#Нясвіж #замкі #рэстаўрацыя

Спічастая арка Малой брамы ў Крэўскім замку ў стадыі адбудовы.

Крыніца
#Крэва #замкі #рэстаўрацыя

У Крэўскім замку завершана арка Малой брамы. Перад ёй выкладзены і бункер з часоў Першай сусветнай вайны. Прыступкі XIV ст. будуць экспанавацца за шклом.

#Крэва #замкі #рэстаўрацыя

Нямецкі ДАП, адноўлены пры рэстаўрацыі Крэўскага замка.

Крыніца

#рэстаўрацыя #крэва #замкі #першаясусветнаявайна #фартыфікацыя

На круглым стале ў Акадэміі навук паказалі дызайн-канцэпцыю інтэр'ераў вежы Шчытоўкі Навагрудскага замка пасля яе рэканструкцыі.

Крыніца
#інтэр'еры #рэканструкцыя #рэстаўрацыя #замкі

Будаўніцтва вежы Любчанскага замка. Ці такой яна была ва ўзгодненым праекце?

Фота

#замкі #любча #аднаўленне

Адна з самых цікавых разынак Мірскага замка - роспісы на ламаных гатычных скляпеннях над сходамі ў паўночна-заходняй вежы.

Яшчэ Бубноўскі, рэстаўратар замка, на сваіх парах заінтрыгаваў наяўнасцю роспісаў незвычайнага малюнку (сферы і зорка?), у цёмным невялічнікім памяшканні. Хто і навошта яго зрабіў менавіта тут - не зразумела. Можа нешта язычніцкае? Ці проста аказіяльныя малюнкі?

Але найвялікшае расчараванне было, калі ўдалося ўпершыню наведаць замак з экскурсіяй - нас проста правялі цёмным пакоем ні словам, ні паўсловам не абмовіўшыся пра роспісы, нават не звярнуўшы ўвагі на тое, што яны там ёсць. Адразу пачалі распавядаць у вялікай зале як паны балявалі. Толькі выпадкова заўважыў нешта незвычайнае і вярнуўся туды, каб паглядзець, але там нават святло не ўключалі, таму сфоткаць самому роспісы на тэлефон без ўспышкі - пустая справа.

Фота
#Мір #замкі #роспісы

У Магілёве па выніках грамадскага абмеркавання рэкамендавалі прыняць да рэалізацыі праект музея цара, які прывядзе да знішчэння Замкавай гары з рэшткамі гарадскіх умацаванняў і паловы найстарэйшага парку горада.

З 143 галасоў, сабраных пад петыцыяй супраць будаўніцтва, улічылі толькі 5(!). Пры гэтам аднекуль з дзіркі ад бубліка з'явілася 498 меркаванняў за рэалізацыю - гэта, вядома, мёртвыя душы з епархіі ці ад бюджэтнікаў па разнарадцы. Тое ж самае бачылі па выніках грамадскіх абмеркаванняў і ў іншых гарадах.

Прыведзеныя нарматыўна-прававыя абмежаванні на будаўніцтва ў гэтым месцы цалкам праігнараваны.

Што ж, кіраўніцтва горада будуе сабе той жа помнік, што збудаваў сабе некалі старшыня Віцебска, які загадаў узарваць помнік XII стагоддзя — нашчадкі вам гэтага ніколі не даруюць.

#Магілёў #замкі #паркі #знішчэнне #петыцыі

На гары Гедыміна ў Вільні адбыўся вялікі апоўзень

https://t.me/rudelfi/17500
#Вільня #замкі #разбурэнні

Можа каму цікава, але пад гарой Гедыміна ў Вільні нацыстамі вырыты цэлы падземны бункер, уваходы ў які сёння замураваныя. Але захаваліся фотаздымкі інтэр'ераў калідораў і залаў, прыстасаваных за савецкім часам у сховішча для ўрада.

#Вільня #замкі #таямніцы
https://pamirsta.lt/gedimino-kalno-bunkeris/

Зафіксую, што руіны Смальянскага замка не з'яўляюцца стабільнымі: за апошнія гады абвалілася адна з дзвюх арак верхняга яруса. Помнік незаўважна, але працягвае разбурацца. Ніякіх мер па кансервацыі ці рэстаўрацыі не прадпрымаецца, нягледзячы на тое, што аб'ём зусім невялікі. Сёння ад былога замка засталася добра калі 10-я частка - фактычна адна скрыня лесвічнай клеткі ад усяго іншага комплексу ў стылі паўночнага маньерызму засталіся хіба што падмуркі ў зямлі.

Мір, Нясвіж, Гродна, Крэва, Гальшаны - гэта ўсё добра, але чаму Усходняй Беларусі не перападае аніводнай крошкі з барскага стала? Мсціслаў у руінах, Быхаў у руінах, Смальяны ў руінах.

Дарэчы паміж далёкімі Гальшанамі і Смальянамі ёсць сувязь: камін у вежы Гальшанскага замка амаль ідэнтычны картушу, які нейкім цудам захаваўся на сцяне Смальянскага замка.

#Смальны #разбурэнне #замкі #палацы

Нядаўна медыя паведамілі, што ля сцен Лідскага замка з ліпеня ўзводзяць рэстаран беларускай кухні. Лідскі замак гісторыка-культурная каштоўнасць 1-й катэгорыі, то бок помнік гісторыі і архітэктуры міжнароднага значэння і побач з ім выклікае шмат пытанняў пра законнасць.

Як і ўсе гісторыка-культурныя каштоўнасці, Лідскі замак мусіць мець праект зон аховы, які вызначае што і як можна рабіць на яго тэрыторыі і побач. Для замка ўдалося выявіць такі праект аж 2008 года. У ім тэрыторыя, на якой узводзіцца рэстаран, абазначана як ахоўная зона, на тэрыторыі якой дазволена рэстаўрацыя, кансервацыя і аднаўленне замка, добраўпарадкаванне тэрыторыі і пракладка неабходных падземных камунікацы.

Але цалкам забаронены "ўсе віды будаўніцтва, не звязаныя з рэстаўрацыяй, кансервацыяй і ўзнаўленнем гісторыка-культурнай каштоўнасці".

Як жа тады там могуць будаваць рэстаран? Думаю сакрэт у тым, што вялікая драўляная канструкцыя не праходзіць як аб'ект будаўніцтва, а праходзіць як часовы стацыянарны пункт грамадскага харчавання, летняе кафэ ці крытая тэраса, якая не мае нават фундаментаў. Вельмі зручна, рэстаран ёсць, рэгламенты аховы ёсць, але яны адзін аднаму не замінаюць.

Але мы ўсё роўна праверым у Мінкультуры законнасць.

#Ліда #тэрасы #замкі