#قصص_الأنبياء(٢)
#السيرة_النبوية
#الحلقة_التاسعة_والثلاثون
#عرض_الإسلام_على_القبائل

وقفنا المرة إللي فاتت عند رسول الله ﷺ لما حكى لأهل مكة إللي حصل له في الإسراء، وشفنا إزاي بعد ما رسول الله ﷺ جاب لهم الدليل على صدق كلامه كذبوه برده😑
وكده بقى واضح جدا إن رسول الله ﷺ محتاج ناس تانية، خلاص الناس دي مبقتش نافعة،
رسول الله ﷺ حاول معاهم عشر سنين ومفيش فايدة 🤷‍♀️

أول محاولة لرسول الله في إنه يبحث عن ناس تانية تشيل هم الإسلام وتدافع عنه كانت في الطائف واحنا شفنا النتيجة كانت إيه😶
رسول الله ﷺ بدأ يبحث في الحج عن القبائل القوية ويعرض عليهم الإسلام، هو كان بيعرض الإسلام على القبائل في الحج السنين إللي فاتت دي لكن المرة دي الوضع مختلف،
لأنه مش بس هيطلب منهم إنهم يُسلموا، ده كان بيطلب منهم مع الإسلام إنهم ينصروه👌

☆موقف رسول الله ﷺ ده بيعلمنا نقطتين:
♡أولا :
إننا لا نيأس ولانستسلم،
فهو بعد ما حصل إللي حصله في الطائف مقلش خلاص مفيش نتيجة، لأ..ده قعد يدور على ناس غيرهم😊
♡ثانيا :
إننا نُتبع السبب👌
فاكرييين قصة ذو القرنين لما ربنا قال عنه : فَأَتْبَعَ سَبَبًا 😁
يعني كان بيشوف الحاجة المتاحة ويشتغل فيها، بيشوف الباب إللي ربنا فتحه قصاده ويستغله😉
أهه رسول الله ﷺ إللي نزل عليه قصة ذو القرنين استفاد من تجربة ذو القرنين لأنه عارف إن ربنا مش بيقص عليه قصص السابقين كده وخلاص ، ده في عبرة منها😊
فرسول الله ﷺ شاف دلوقتي إن قريش بقت باب مسدود مفيش فيه أمل،
موقفش بقى وصمم على قريش وقعد يقول أنا كده حياتي هتقف، ومش هينفع أدعو ناس تانية مادام أنا معرفتش أدعو أهل مكة و...و...
بكل بساطة رسول الله ﷺ ساب الباب المقفول ده وبدأ يدور على أبواب ثانية،
فَأَتْبَع إيه😁..فَأَتْبَعَ سَبَبا😉
فنتعلم من رسول الله ﷺ وذو القرنين إننا نستغل الأبواب المفتوحة،
مثلا ربنا فتح لك باب دراسة علوم شرعية من عالنت وسماع المحاضرات ،
بس إنتي عايزة تنزلي تروحي المسجد تحضري فيه، وموضوع المسجد مش متاح دلوقتي،
توقفي حياتك بقى ولا تستغلي الباب المفتوح💁‍♀️
فهو ده إللي رسول الله ﷺ عمله، لقى باب قريش مقفول بعد محاولات كثيرة، جاء الوقت إللي ندور فيه على باب ثاني👌
احنا دلوقتي في نهاية السنة العاشرة من البعثة،
بدأ رسول الله ﷺ يزور الوفود إللي بتيجي للحج، ويعرض عليهم الإسلام وإنهم ينصروه ويدافعوا عنه عشان يبلغ دعوة الإسلام،
راح لبني كلب وبني كِندة وبني حنيفة وغيرهم من القبائل وكان بيقول لهم، إنه رسول من عند الله يأمركم بعبادته وترك عبادة الأصنام،
وكلهم كانوا بيرفضوا، ماعدا قبيلة واحدة بس هي إللي أخذت الموضوع بجدية😮
قبيلة بني عامر، قبيلة قوية جدا ومن أعز قبائل العرب، فهم من الخمس القبائل إللي محصلش في تاريخها سبي لنسائها،
يعني محدش قدر يغلبها في تاريخها،
تخيلوا بقى لما قبيلة بالقوة دي تاخد الإسلام على محمل الجد، الإسلام ممكن ينتشر بسرعة أد إيه ومحدش يقدر يمس رسول الله ﷺ بسوء🙊
عرض رسول الله ﷺ الإسلام على قائدهم وكان اسمه بَيْحَرة بن فِراس،
فاهتم جدا بالإسلام ووقف وسط أصحابه يقول لهم قصاد رسول الله ﷺ : أنا لو أخذت الفتى ده من قريش هاكل به العرب👌
يعني هو عرف إن كلام رسول الله ﷺ حق وعرف إن إللي هيمشي وراه هيسود العرب ويملكهم كلهم👌
فعرض على رسول الله ﷺ عرض مغري جدا🙊
قال لرسول الله ﷺ :
هل لو احنا بايعناك وبعدين ربنا أظهرك ونصرك على من خالفك، يكون لنا الملك من بعدك؟
يعني بيقول لرسول الله ﷺ احنا هندخل الإسلام وندافع عنك ضد أي حد يخالفك، وهنساعدك إنك تكون زعيم ، وهتفضل إنت القائد والزعيم كده لحد ما تموت،
لكن بعد موتك الزعامة تنتقل لنا احنا💁‍♂️
عايزاكم تتخيلوا العرض المغري ده وموقف رسول الله ﷺ😬
رسول الله ﷺ الدعوة قصاده في مكة مقفولة، أهل مكة بيحاربوا دعوته،
محدش من القبائل راضي يؤمن به ولا يساعده، هو نفسه في حماية رجل كافر المطعم بن عدي،
وممكن يترك حماية رسول الله ﷺ لو قريش ضغطوا عليه،
المسلمين نصفهم في الحبشة والباقي بيتعذب في مكة،
فالعرض ده يعتبر عرض مثالي جداا وفي وقت قاتل،
واحنا أصلا مصدقنا لقينا حد يوافق على الإسلام🙊
وفي مقابل إيه، مقابل إنه يكونوا هم الزعماء بعد رسول الله ﷺ، يعني يعتبر حاجة بسيطة
يعني رسول الله ﷺ هو الحاكم وهيتبعوا كل أوامره،
رسول الله ﷺ رد على الكلام ده بإيه🤔
قال رسول الله ﷺ: الأمر لله يضعه حيث يشاء!
يعني يا بيحرة، لو إنت هتستحق إنك تقود المسلمين من بعدي وعندك القدرات إللي تأهلك لكده،
ربنا هيخليك إنت إللي تحكم، لكن لو غيرك هو إللي يستحق فربنا هيعطي الولاية للي يستحقها👌
يعني من الآخر رسول الله ﷺ رفض الشرط بتاع بيحرة🙊
فقال له بيحرة : يعني احنا نعرض نفسنا للقتل وبعدين لما ربنا ينصرك يكون الملك لغيرنا😳
لا معلش مش عايزين😤

◇طبعا كلنا مستغربين رد فعل رسول الله ﷺ، يعني هو كان ممكن يقبل بشرطه ده، وبعدين لما الرجل يُسلم يبقى يقنعه ويفهمه عادي مع الوقت

#قصص_الأنبياء(٢)
#السيرة_النبوية
#الحلقة_التاسعة_والأربعون
#استقرار_رسول_الله_في_المدينة

كنا وافقين المرة إللي فاتت عند وصول رسول الله ﷺ ليثرب، وقلنا إن الأنصار كانوا بيخرجوا ينتظروا رسول الله ﷺ كل يوم الصبح لأنهم مكنوش عارفين الوقت إللي هييجي فيه بالضبط،
فكان أول ما الحر يشتد يرجعوا بيوتهم، ففي يوم لما رجعوا بيوتهم، كان في واحد من اليهود موجود فشاف حد جاي من بعيد فبدأ ينادي على الأنصار،
فتجمع الأنصار مرة ثانية وشافوا رسول الله ﷺ وأبو بكر قادمين،
والأنصار مكنوش يعرفوا رسول الله ﷺ ولا شافوه قبل كده، إللي يعرفوه إللي قابلوه في مكة فقط في البيعة😉

فكانوا بيقولوا هو إللي على اليمين ولا إللي على الشمال🤔
فوهم حيرانين كده قام أبو بكر الصديق بتظليل رسول الله ﷺ من الشمس فعرفوا من هو رسول الله ﷺ 😊

أول ما قرب منهم قعدوا يقولوا جاء رسول الله ..جاء نبي الله، وطبعا محدش قال طلع البدر علينا دي خالص😅
مفيش ولا رواية صحيحة بتقول إن الأنصار استقبلوا رسول الله ﷺ بإنشادهم طلع البدر علينا👌
وفي رواية بتقول إن وصل عدد الأنصار إللي استقبلوا رسول الله ﷺ يصل إلى خمسمائة وكانوا بيحملوا السلاح من باب التشريف والإحتفال به ﷺ،

فدخلوا حدود المدينة في منطقة اسمها قِباء، وأحاط الأنصار بأبي بكر الصديق ورسول الله ﷺ ، والغلمان تفرقوا في الشوارع وقعدوا ينادوا يا محمد يا رسول الله..محمد يا رسول الله!
والنساء والرجال طلعوا فوق البيوت يشوفوا الموكب بتاع رسول الله ﷺ وكانوا فرحانين به جدا،
حتى قال صحابي من الأنصار وهو البراء بن عازب:
أنا مشفتش أهل المدينة فرحوا بحاجة زي فرحهم برسول الله ﷺ 😊
"وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ"
وكان ده في يوم الإثنين الثاني عشر من شهر ربيع الأول للسنة الرابعة عشرة من البعثة.

☆يعني الهجرة كانت في شهر ربيع مش في محرم🤔

الهجرة كانت في شهر ربيع، لكن ابتداء العزم على الهجرة كان في محرم،
لأن بيعة العقبة الثانية كانت في شهر ذي الحجة وأول هلال بعد ذي الحجة هو محرم،
فلما عمر بن الخطاب تولى الخلافة وقالوا عايزين نؤرخ للمسلمين بتاريخ، قالوا نؤرخ من بداية العزم على الهجرة،
فدي كانت بداية التاريخ الإسلامي😉

العجيب إن إزاي الأنصار كانوا فرحانين الفرح ده كله😮
إنتم عارفين معناه إيه دخول رسول الله ﷺ يثرب🙊
معناه إن كل أهل الأرض بقوا أعداء أهل يثرب،
معناه إنهم بيعلنوا الحرب على كل العرب،
معناه العداء المستمر مع اليهود إللي كانوا عايشين معاهم وفي بينهم معاهدات،معناه تضحية وبذل وإنفاق وموت في سبيل الله،
وبرغم كل ده كانوا فرحانين كده😅
الأنصار مكنش همهم أي حاجة، كان همهم الثمن إللي اتفقوا عليه مع رسول الله ﷺ...الجنة😊
بعد دخول رسول الله ﷺ يثرب بقى اسمها
《المدينة النبوية》

☆وفي هنا فائدة 😁
إن أي مدينة يدخلها الإسلام تكون منوّرة، أما المدينة إللي دخلها رسول الله ﷺ تسمى المدينة النبوية،
وكان الصحابة والسلف بيسموها المدينة أو المدينة النبوية، حتى لما ربنا ذكرها في القرآن قال عنها المدينة😉
فإن شاء الله هيكون الاستخدام معانا إما المدينة أو المدينة النبوية😊
مش بقول حرام ولا متقولوهاش😱
أنا بحب بس كل حاجة تبقى بالمسطرة 😁

دلوقتي رسول الله ﷺ بقى هو حاكم المدينة رسمي، فأول حاجة عملها بعد دخوله المدينة كانت بناء مسجد قباء،
فكان هو مسجد التقوى الذي أُسّس من أول يوم :
"لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيهِ"

بعد بناء المسجد جاء علي بن أبي طالب رضي الله عنه بعد ما أدى الأمانات، وجاء معه بعض المستضعفين من المسلمين،
وانطلق بعدها رسول الله ﷺ عشان يدخل المدينة،
فكان كل واحد بيحاول يأخذ الناقة إللي كان راكب عليها رسول الله ﷺ ويقولوا تعال عندنا عشان يضيفوه،
فكان يقول لهم اتركوها فإنها مأمورة👌

☆وهنا رسول الله ﷺ بيعلم الناس درس عملي مهم وهو إن مادام ربنا أمر يبقى لا أنا ولا أي حد من البشر يقدر يتدخل ويغير أمر ربنا👌

فضلت الناقة ماشية لحد ما وصلت عند أرض فيها نخل فبركت فيها ، قعدت يعني،فسأل رسول الله ﷺ عن أصحاب الأرض فلقاهم غلامين يتيمين،
فطلب منهم إنه يشتريها، فقالوا خذها يا رسول الله هبة،
فرفض رسول الله ﷺ وقال لازم ندفع ثمنها، فاشتراها منهم من أموال أبي بكر الصديق رضي الله عنه،
وكان أبو بكر الصديق قد أخذ ماله كله معاه في رحلة الهجرة وكان حاطه تحت أمر رسول الله ﷺ،
حتى أبوه سأل حفيدته أسماء : هو أبوكم ساب لكم فلوس أد إيه لما مشي مع محمد🤔
فأسماء رضي الله عنها جابت كيس قماش وحطت جواه حصى وخلت جدها الأعمى يضع يده على الكيس وهي بتقول له : ساب لنا الكيس ده،
فقال لها : والله لو ساب لكم ده يبقى ساب لكم كتير☺

وفعلا أبو بكر

#قصص_الأنبياء(٢)
#السيرة_النبوية
#الحلقة_التاسعة_والخمسون
#غزوة_بدر_الكبرى(١)
#بداية_المعركة

وقفنا المرة إللي فاتت عند صباح يوم معركة بدر، استيقظ المسلمون بعد ما ربنا جعلهم يناموا، وكان أول شيء رسول الله ﷺ عمله هو الدعاء،
أيوة احنا بناخد بالأسباب وبنعمل إللي علينا لكن من غير توفيق ربنا مش هيبقى في أي نتيجة كويسة👌

وهنلاقي إن الدعاء مستمر معانا على طول، يعني رسول الله ﷺ لما خرج من المدينة قعد يدعي ربنا للصحابة ويقول:
"اللهم إنهم حفاة فاحملهم، اللهم إنهم عراة فاكسهم،
اللهم إنهم جياع فأشبعهم"
ولما جاء قبل المعركة برده قعد يدعي ربنا بأنه يعطيه نصره إللي وعده به،
فرسول الله ﷺ مبطلش دعاء خالص حتى لما يدخلوا المعركة،
قلبه معلق بالله، يارب انصرهم يارب لو المجموعة دي هلكت مفيش حد هيعبدك، لأن في الأرض في الزمن مكنش في حد بيعبد ربنا غير المسلمين👌
فرسول الله ﷺ وهو رسول الله قعد يلح على ربنا في الدعاء، مع إنه أصلا دعاؤه مستجاب من غير إلحاح،
حتى أبو بكر الصديق رضي الله عنه لما لقاه بيدعي بشدة قال له : يا رسول الله!
خفف شوية من الدعاء متخفش ربنا مش هيخلف وعده معاك!
ومكنش بس رسول الله ﷺ إللي بيدعي ده كل الجيش كان بيدعي وقلبه متعلق بالله، ودي أهم صفة من صفات الجيش إللي ربنا ينصره👌
لما الجيش يكون قلبه متعلق بالله ومؤمن به وعنده يقين تام إن النصر من عند الله ربنا هينصره أكيد😊

ومش بس المسلمين هم إللي كانوا بيدعوا ،ده المشركين كمان كانوا بيدعوا ربنا تخيلوا😅
بيدعوا ربنا إنه ينصرهم على المسلمين😶
أبو جهل كان بيقول :
"يارب! محمد قطع الرحم وجالنا بدين إحنا منعرفوش، فانصر في المعركة دي الأحب والأقرب لك" 🤲

☆إنتم متخيلين بعد ده كله والسنين والمعجزات دي كلها في مكة وربنا قال عن المشركين إنهم عارفين إن رسول الله ﷺ صادق وهم إللي جحدوا.. أبو جهل بيدعي إن الأحب إللي الله هو إللي ينتصر😳
ده إنت لو بتدعي على نفسك مش هتقول كده🤦‍♀️
فحاجة من الإثنين:
يا إما أبو جهل بيدعي بالدعاء ده عشان يحفز الناس إللي معنوياتها صفر وكارهة القتال أصلا ويخليهم يعيشوا وَهْم إنهم على حق وبيقاتلوا في سبيل قضية عادلة،
وإنهم بيعملوا الخير للوطن وللعالم لما يقضوا على المسلمين إللي عايزين ينشروا الفساد في الأرض،
وإن المليار ونص عايزين يقتلوا الدنيا كلها عشان يعيشوا لوحدهم يا حرام🙄
أو إن أبو جهل من كثرة ما عاش دور إنه زعيم وبيقنع الناس بإن هو المُصلح وصاحب الأخلاق المدافع عن الحق صدق نفسه وإن هو عبقري زمانه😏

☆شخصية أبو جهل دي موجودة في كل العصور،
يبدأ بخداع الناس لحد ما يحقق مصلحته وبعدين يصدق نفسه وهو أصلا من المجرمين إللي بيعذبوا الناس وبينهبوا أموالهم،
وتسمعوه يتكلم عن الشرف والأمانة ولا كأنه اتخلق عشانها🙄

بدأ رسول الله ﷺ يجهز جيش المسلمين إللي هيقاتل المشركين👌
أول مرة العرب يتجمعوا تحت راية واحدة وتحت دين واحد،
جعلهم رسول الله ﷺ صفوف متساوية في منتهى النظام،
وهو بيصف الصفوف كان بيقول لهم الخطة إللي هيبدأوا بها القتال قال:
محدش يرمي السهام على المشركين إلا لما يقربوا منكم، عشان مترموش السهام وهم لسه بعيد فلا تصيبهم ،ويبقى ضيعتم الذخيرة بتاعتكم على الفاضي👌
ومحدش يطلع سيفه من غمده إلا لما يقترب منكم الجيش جدا👌

ودي ثاني صفة من صفات الجيش إللي ربنا بينصره😉
الأخذ بالأسباب😊
يعني إن المسلمين يستعدوا كويس جدا للمعركة باللي يملكوه ،ويأخذوا بأسباب النصر ويعملوا كل إللي يقدروا عليه عشان يحققوا النصر على أعدائهم، وشوفوا ربنا بيقول إيه:
"وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الخَيْل"
يعني شوف إنت استطاعتك إيه واعمله وملكش دعوة بالباقي👌

المعركة خلاص قربت تبدأ ورسول الله بيرص الصفوف لقى في واحد من الصحابة طالع عن الصف، ومش واقف عدل🤨
فقال له رسول الله ﷺ:
استقم ! يعني قف في الصف مضبوط وكان في يد رسول الله ﷺ زي عود أو خشبة كده زقّه بها أو زي ما تقولوا ضربه بها،
زي ما تبقي بتعملي حاجة في البيت وفي حد وقف قصادك فتقولي له وسّع كده وإنتي بتخبطي على إيده أو على ظهره،
خبطة خفيفة يعني😅

فالصحابي ده وكان اسمه 《سواد بن غزية》من الأنصار
قال له : يا رسول الله أوجعتني😥
وإنت جئت بالحق والعدل ولازم تعطيني القصاص😤

☆سواد عارف إن رسول الله ﷺ هو أكثر واحد بيطبق شرع ربنا، ماهو هو إللي قال:
"من ضَرَب بسوط ظلما، اقتُصَّ منه يوم القيامة"
وقال للصحابة : أتدرون من المفلس؟
قالوا: المفلس فينا من لا درهم له ولا متاع، فقال:
إنّ المفلس من أمّتي يأتي يوم القيامة بصلاة وصيام وزكاة ويأتي قد شتم هذا، وقذف هذا،
وأكل مال هذا، وسفك دم هذا، وضرب هذا، فيُعْطَى هذا من حسناته، وهذا من حسناته،
فإن فنيت حسناته قبل أن يقضى ما عليه أُخِذَ من خطاياهم فطرحت عليه ثمّ طرح في النّار"

فسواد استغل إن رسول الله ﷺ هو اتقى الناس عشان يقتص منه،
والصحابة مستغربين من إللي سمعوا سواد بن غزية ب

#قصص_الأنبياء(٢)
#السيرة_النبوية
#الحلقة_التاسعة_والستون
#أحداث_السنة_الثالثة_من_الهجرة
#غزوات_قبل_أحد
#الفرق_بين_الحديث_القدسي_النبوي_القرآن

دخلت السنة الثالثة من الهجرة ومع نهاية شهر محرم وصل لرسول الله ﷺ أخبار إن ناس من بني ثعلبة ومحارب تجمعوا عشان يهجموا على المدينة،
فجمع رسول الله ﷺ أربعمائة وخمسين مقاتل ما بين راكب على فرس وماشي على قدمه،

☆وهنا يبان قدرة رسول الله ﷺ على جمع المعلومات وحكمته في سرعة خروجه عشان يقاتل أعدائه قبل ما يتجمعوا عليه،
يعني زي ما بنقول خير وسيلة للدفاع هي الهجوم👌

عدد المسلمين إللي رسول الله ﷺ جمعه ده كان أكبر عدد يتجمع للمسلمين حتى هذه اللحظة، فخرج بهم رسول الله ﷺ في الثاني عشر من ربيع الأول،
واتجه نحو تجمُّع بني ثعلبة من بني غَطَفان ، واستخلف على المدينة عثمان بن عفان رضي الله عنه عشان يكون مكانه لحد ما يرجع،
في الطريق المسلمون أمسكوا برجل من بني ثعلبة اسمه جبّار وأدخلوه على رسول الله ﷺ،
فدعاه رسول الله ﷺ للإسلام فأسلم الرجل😮
ومش بس كده ده بقى دليل لجيش المسلمين، يعني بيرشد جيش المسلمين إللي كانوا لسه أعدائه من شوية لمكان قومه بني ثعلبة إللي عايزين يهاجموا رسول الله ﷺ،
قومه إللي عاش معاهم عمره، في لحظة كده بقى ولا كأنه يعرفهم،
ولاؤه يعني حبه بقى لله ولرسوله، همه بقى مصلحة الإسلام حتى لو كان على حساب قومه إللي عاش معاهم سنين👌
وصل الخبر لبني ثعلبة إن المسلمين في الطريق، فهربوا وتفرقوا في رؤوس الجبال 😏
وصل رسول الله ﷺ للمكان إللي كانوا متجمعين فيه، وكان في ماء في المكان ده اسمه ماء ذي أَمْر، فاتسمت الغزوة دي بغزوة ذي أمر، وبرده من أسمائها غزوة أنمار،
عسكر رسول الله ﷺ في المكان، وذهب يقضي حاجته فنزل المطر، فملابسه ابتلت بماء المطر،
فخلع ثوبه ووضعه على شجرة ينشف واضطجع تحت الشجرة، يعني زي ما بنقول فرد ظهره على الأرض مستني ثوبه ينشف،
مين إللي شايف الموقف ده🤭
الناس إللي هربت من رسول الله ﷺ، فقالوا لسيدهم دعثور بن الحارث وكان رجل شجاع:
محمد لوحده دلوقتي محدش من أصحابه معاه، ودي فرصة مش هتتعوض😈
فأخذ سيفه واتجه نحو رسول الله ﷺ إللي كان مضطجع تحت الشجرة،
واتسحب دعثور لحد ما وقف عند رأسه ﷺ والسيف في إيده وموجهه لوجه رسول الله ﷺ وهو بيقول له:
مين يقدر يحميك مني يا محمد😈

☆متخيلين الموقف🙊
كل واحد يحط نفسه مكان رسول الله ﷺ كده، نائم وفجأة واحد حاطط السيف على رأسه وبيقول له مين إللي يحميك مني، وهو فعلا لوحده ومش معاه سيفه وأي حركة هيعملها هيلاقي سيف الرجل في رقبته🙊

فقال له رسول الله ﷺ بكل هدوء وثقة ويقين:
الله عز وجل👌
أول ما قال رسول الله ﷺ الله، دفع جبريل عليه السلام دعثور في صدره فوقع السيف من يده، فأمسكه رسول الله ﷺ ووضع السيف على رأس دعثور وقال له:
مين يقدر يحميك مني😊

فقال دعثور : مفيش حد 😥
وأنا أشهد أن لا إله إلا الله وأن محمدا رسول الله، والله ما هجمع الناس ضدك تاني أبدا👌
فأعطاه رسول الله ﷺ سيفه ورجع الرجل لقومه،
طبعا قومه المشركين كانوا شايفين الموقف كله، فلما وصل عندهم قالوا له: مالك، إيه إللي حصل😳
فقال لهم: شوفت رجل طويل فدفع في صدري، ضربني في صدري يعني، فعرفت إنه ملك، وشهدت إن محمد رسول الله، ووالله مش هجمع الناس ضده أبدا😤
وقعد يدعوا قومه للإسلام، فأنزل الله قوله:
" يَا أَيُّهَا الَّذِينَ آمَنُوا اذْكُرُوا نِعْمَتَ اللَّهِ عَلَيْكُمْ إِذْ هَمَّ قَوْمٌ أَن يَبْسُطُوا إِلَيْكُمْ أَيْدِيَهُمْ فَكَفَّ أَيْدِيَهُمْ عَنكُمْ "

☆ملحوظة😁
في قصة تانية مشابهة لقصة دعثور، هتحصل مع رسول الله ﷺ لرجل برده هيحاول قتله بنفس الطريقة، ولكن في غزوة تانية اسمها غزوة ذات الرقاع، هنتكلم عنها لما ييجي وقتها إن شاء الله😊

قعد رسول الله ﷺ في المكان ده مدة قريبة من الشهر
محدش هجم على الجيش ولا حصلت أي مشاكل وسمعت العرب عن مجيء رسول الله ﷺ وجلوسه في المكان ده ومحدش قدر يقرب منه،
وطبعا ده في صالح المسلمين، لأنه بيبين قوتهم، بعد ما كانوا مطاردين👌

وحصلت غزوة تانية برده بعد ما رسول الله ﷺ رجع المدينة بحوالي شهر، وصل له الخبر إن بني سليم جمعت نفسها عشان يهجموا على المدينة جمع رسول الله ﷺ الصحابة وخرجوا لبني سليم وقبل ما يوصلوا بليلة،
قابله رجل وقال له إن بني سليم لما عرفت إنك جاي لهم تحاربهم هربوا كلهم،
فأخذ رسول الله ﷺ الرجل معاه وكمل طريقه لحد ما وصل لمكان التجمع ده ولقاهم فروا فعلا،
فلما تأكد من صدق الرجل تركه، ماهو مينفعش واحد منعرفوش ييجي يقول لنا معلومة نقوم مصدقينه كده على طول من غير ما نتأكد🤓
قعد رسول الله ﷺ في مكان التجمع ده وكان اسمه بحران فترة قبل ما يرجع للمدينة من أواخر شهر ربيع الآخر لحد شهر جمادى الأولى عشان يثبت للناس قوة الإسلام والمسلمين👌

☆ممكن حد يسأل ، هو إيه الفايدة يعني لما الناس تسمع بقوة المسلمين😕

شوفوا، الهدف من غزوات رسول الله ﷺ بصفة عامة هو نشر دين الإسلام،
وز

#قصص_الأنبياء(٢)
#السيرة_النبوية
#الحلقة_التاسعة_والسبعون
#الشورى
#قصة_تحريم_الخمر

اتكلمنا المرة إللي فاتت عن رجوع جيش المسلمين للمدينة بعد غزوة أُحد وشوفنا رد فعل أهل المدينة من المؤمنين ومن المنافقين واليهود كان عامل إزاي،
وشوفنا تعليق القرآن على أحداث غزوة أحد وفَضْحه للمنافقين،
وهنا يظهر عندنا نقطة مهمة جدا👌
لو رجعنا بالأحداث لقبل غزوة أُحد لما كان رسول الله ﷺ بيشاور الصحابة نطلع نقاتل المشركين خارج المدينة ولا نقاتلهم داخل المدينة،
لو فكرنا بالعقل هنلاقي إن الرأي الصحيح كان إن المسلمين يقاتلوا المشركين داخل المدينة زي ما رسول الله ﷺ قال في البداية،
ولكنه خالف رأيه ونزل على رأي الصحابة لأن رأيهم كان الأغلب وطبعا دي كانت أراء اجتهادية منزلش بها وحي قاطع 😅
يعني من الآخر كده الشورى كانت سبب من أسباب الهزيمة من البداية خالص، والمفروض كان رسول الله ﷺ خلى رأيه هو إللي يمشي وكان يُلزم به المسلمين،
فبعد ما شفنا الأثر السلبي للشورى في الموقف ده الطبيعي بالعقل إننا نلغي الشورى🤷‍♀️
لكن ربنا سبحانه وتعالى قال لرسول الله ﷺ إنه يستمر في مشاورة أصحابه والأخذ برأيهم👌
مش معنى إن رأي الشورى كان خطأ مرة يبقى الشورى نفسها سيئة على طول الخط بالعكس،
ده استشارة 《أصحاب الرأي السديد الموثوق فيهم》
بتخلق أفكار كثيرة وبتُنتج أراء صحيحة، والمُشاور لا يكاد يُخطئ وحتى لو أخطأ فمش هيبقى عليه اللوم زي واحد لم يشاور أحد من البداية💁‍♀️
وكمان من أهم الصفات إللي تخلي القائد محبوب بين جنوده وإنهم يطيعوا أوامره هي المشاورة،
لأنه لما ياخد رأيهم في الأمور الخاصة بالدولة إللي محتاجة مشورة، ده هيخلي الجنود يشعروا إنهم جزء من الدولة دي وإن قائدهم حريص على المصلحة العامة للجميع وهيثقوا فيه ،وبالتالي هيكونوا حريصين جدا على طاعته وهيبذلوا جهدهم وطاقتهم في مساعدته 👌
بعكس لو القائد كان مستبد برأيه، وبيتعامل مع الجنود على إنهم مجرد أدوات يجب عليهم تنفيذ الأمر وبس😑
هنلاقيهم بيبعدوا عن القائد وكارهينه وحتى لو أطاعوا أمره فهيطيعوه وهم مضطرين ومن غير ما يكون في حرص منهم على مصلحة دولتهم أو حتى دينهم،
وده إللي ربنا قاله لرسوله ﷺ في القرآن:
"فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ"
ربنا قال لرسول الله ﷺ إنه يعفو عن الخطأ إللي حصل في غزوة أحد، وبيأمروا إنه يستمر في مشاورة أصحابه،
وإنه لو كان سيء الخُلق وقاسي القلب معاهم كان زمانهم انفضوا من حوله👌

☆طيب خلونا نستفيد في حياتنا العملية من قصة الشورى دي، ماهو احنا مش مجرد بنحكي قصة وخلاص احنا عايزين نتربى على أخلاق رسول الله ﷺ وأخلاق القرآن😁
المشاورة مش بتكون بس بين القائد وجنوده،
المشاورة بتكون بين الرجل وزوجته، بين الأم والأب وأبنائهم،
بين الأصحاب وبعض،
مينفعش الزوج ياخد قرار خاص بالأسرة كلها وهيأثر على أهل بيته كلهم من غير ما ياخد رأيهم ويشاورهم،
مينفعش الأم مثلا تاخد قرار خاص بأبنائها من غير ما تاخد رأيهم،
《طبعا في الحاجات إللي محتاجة مشورة فقط 👌》

¤ممكن حد يقول طيب ماهم عقلهم ميستوعبش أو تفكيرهم بسيط لا يرقى لمستوى تفكيري = الزوجة أو الأبناء مثلا= 😕
حلو أوي😁
احنا متفقين إن رسول الله ﷺ هو أكمل الناس وأفضلهم رأيا وعقلا وأكثرهم علما،
ربنا بقى أمر أكمل الناس وأفضلهم رأيا وعقلا وأكثرهم علما إنه يشاور من هُم أقل منه في العقل والحكمة والرأي والعلم،
فمن باب أَوْلى إن إللي أقل من رسول الله ﷺ محتاج يشاور ويشوف آراء إللي حواليه🤷‍♀️
وعلى فكرة هي دائرة 🤓
الزوجة إللي مش بتشاور أبنائها وبتأخذ برأيهم وعلى طول مستبدة برأيها ،هتلاقي ربنا مسلط عليها زوج مستبد مش بياخد برأيها ولا بيشاورها في حاجة،
والزوج إللي مستبد برأيه ومش بيشاور زوجته وعياله هتلاقي ربنا مسلط عليه مدير قارفه في الشغل مثلا💁‍♀️

◇《طبعا أنا بتكلم في القاعدة العامة، مش بنقيس على شواذ القاعدة ، يعني ممكن تكون واحدة مثلا بتشاور أبنائها وربنا مسلط عليها زوج مُستبد كنوع من أنواع الابتلاء، دي حاجة تانية مش موضوعنا خالص😅》

فقاعدة الشورى من صفات الجيش إللي ربنا بينصره، وكذلك قاعدة الشورى 《صفة》 من صفات الأسرة المستقرة نفسيا👌
من الحاجات إللي ربنا علمها للصحابة في القرآن هو الاستغفار لما يقابلوا العدو،
خلونا نشوف الآيات ربنا بيقول:
"وَكَأَيِّن مِّن نَّبِيٍّ قَاتَلَ مَعَهُ رِبِّيُّونَ كَثِيرٌ فَمَا وَهَنُوا لِمَا أَصَابَهُمْ فِي سَبِيلِ اللَّهِ وَمَا ضَعُفُوا وَمَا اسْتَكَانُوا ۗ وَاللَّهُ يُحِبُّ الصَّابِرِينَ "
يعني كم من نبي قاتل معه ربانيون =ناس صالحين= كثير ومحدش فيهم ضِعف ولا استكان لما نبيهم اتقتل، بالعكس ده استمروا في القتال على منهج نبيهم ودافعوا عن دين الله👌
فكان الأَوْلى إنكم تعملوا زي أتباع الأنبياء السابقين،
مش إن

#قصص_الأنبياء(٢)
#السيرة_النبوية
#الحلقة_التاسعة_والثمانون
#أحداث_السنة_الخامسة_من_الهجرة
#تجميع_اليهود_للأحزاب

اتكلمنا في الأجزاء الأخيرة إللي فاتت عن أهم الأحداث في السنة الرابعة من الهجرة، دخلنا دلوقتي في السنة الخامسة من الهجرة،
وصل لرسول الله ﷺ أخبار عن إن القبائل في شمال الجزيرة العربية في منطقة دَوْمَة الجَنْدَل بدأوا يتجمعوا ويهجموا على القوافل إللي بتعدي ناحيتهم ويقتلوا منها المسلمين،
فجهز رسول الله ﷺ جيش عشان يروح يقاتل القبائل دي، وكانت منطقة دَوْمَة الجَنْدل بعيدة عن المدينة بأكثر من أربعمائة وخمسين كيلو متر،
رسول الله ﷺ خرج المرة دي مع الجيش بنفسه، بعد المشي في الصحراء أيام وصل رسول الله ﷺ إلى دومة الجندل وقعد فيها وبدأ يرسل السرايا يعني مجموعات من المقاتلين حول المنطقة،
الناس إللي كانت بتتجمع دي هربوا كلهم من رسول الله ﷺ ومحدش قاتله، خافوا منه ﷺ😁
وبكده ثبّت أركان الدولة الإسلامية اكثر وأكثر، وانتشرت أخبار جيش المسلمين أكثر في الجزيرة العربية،
المجموعة إللي هربت من مكة وراحت المدينة وكانوا مضطهدين دلوقتي الناس بقت هي إللي تخاف وتهرب منهم، وكل ده في أقل من خمس سنين👌
غزوة دومة الجندل كانت في ربيع أول من السنة الخامسة للهجرة،
رجع رسول الله ﷺ مع جيشه إلى المدينة وانتشرت الأخبار في المدينة إن الناس هربوا من رسول الله ﷺ،
الأحداث في الفترة الأخيرة كلها كانت في صالح المسلمين، وده أدى إلى إن المنافقين في المدينة يهدوا شوية بعد ما كانوا شمتانين في المسلمين بعد غزوة أحد، وكانوا عمالين يثيروا الفتن،
فلقوا إن المسلمين استعادوا قوتهم فسكتوا عشان خافوا على نفسهم،
قريش هي كمان وصل لها أخبار المسلمين وانتصاراتهم إللي ورا بعض فبدأت تحس بالقلق من قوة المسلمين إللي كل يوم بتزيد، وكمان تجارتها للشام لسه منقطعة بسبب المسلمين،
فلازم يكون في حل، لكن هم مش عارفين يحلوا المشكلة دي إزاي🤔
حتى قبائل الأعراب البعيدة عن المدينة بدأت تحس بالقلق على نفسها، زي قبائل غَطَفَان إللي كان منها بعض القبائل إللي غدرت بالمسلمين في حادثة ماء الرجيع وبئر معونة،
وطبعا مننساش اليهود سواء يهود بني قُرَيْظَة أو يهود منطقة خيبر ، هم كمان خافوا من قوة المسلمين إللي استطاعوا يخرجوا فرعين منهم من المدينة،
ومتبقاش في المدينة غير يهود بني قريظة إللي كانوا لسه على العهد،
واليهود في منطقة خيبر إللي في شمال المدينة كان عندهم قلقانين جدا يعني كان تفكيرهم إن رسول الله ﷺ هيخلص على اليهود في المدينة وهيروح لهم بعد كده،
قال يعني رسول الله ﷺ كان ظالمهم يا عيني ومكنوش هم إللي نقضوا العهد مع رسول الله ﷺ مرة بعد مرة 🙄
وطبعا بني النُّضير بزعمائهم متوصُّوش😀
بعد ما رسول الله ﷺ أخرجهم من المدينة وراحوا سكنوا في حصون خيبر نقلوا لهم كراهيتهم للإسلام والمسلمين، مع إن هم إللي ابتدوا ونقضوا العهد 😑
بس نقول إيه...يهود متخصصين في إنهم يقلبوا الحقائق ويخلوا الإنسان الكويس أسوأ ما خلق الله، بس مين يفهم😞

☆زي مثلا كده لما حد ييجي يحكي لنا مشكلة، يقعد يتكلم عن الطرف التاني لدرجة إنه يخلينا نكرهه احنا كمان مع إننا ممكن منعرفش الطرف التاني ده أو نعرفه بس مشفناش منه حاجة وحشة
وإللي بيحكي ده ممكن يكون هو إللي غلطان أصلا بس الأسلوب والكلام بيوصلنا لمرحلة الكره بدون ما نشعر،
وممكن يخلينا نحكم له بالحق مع إنه ظالم،
عشان كده رسول الله ﷺ حذرنا👌
يقول :
" إِنَّمَا أَنَا بشَرٌ، وَإِنَّكُمْ تَخْتَصِمُونَ إِلَيَّ، وَلَعَلَّ بَعْضَكُمْ أَنْ يَكُونَ أَلْحَنَ بحُجَّتِهِ مِنْ بَعْضٍ؛
فأَقْضِي لَهُ بِنحْوِ مَا أَسْمَعُ، فَمَنْ قَضَيْتُ لَهُ بحَقِّ أَخِيهِ فَإِنَّمَا أَقْطَعُ لَهُ قِطْعَةً مِنَ النَّارِ"
يعني لو اتنين بينهم مشكلة وواحد بيعرف يتكلم بطريقة تقنع إللي قصاده بإنه على الحق والثاني يا عيني ظلمه مع إن هو إللي غلطان أو ملوش حق في أي حاجة، فأي شيء هياخده هيكون نار عليه يوم القيامة،
أي حاجة بقى...أموال...أرض...بيت...حُكم😀
ده للناس للي بيتكلموا بس، فما بالكم بالأفعال،
إللي بيزور عشان يأخذ حق مش حقه، وإللي بيقتل عشان يأخذ حق مش حقه، وإللي...وإللي...
يوم القيامة هنشوف فضايح والله، ربنا يسترنا ويرحمنا برحمته😓

دلوقتي بقى عندنا كفار قريش والمنافقين واليهود والقبائل العربية غير المسلمة كل دول عايزين يتخلصوا من رسول الله ﷺ ودولة الإسلام والمسلمين،
أمنيتهم المجموعة دي تختفي من على وجه الأرض، مع إن رسول الله ﷺ معملهمش حاجة،
واحنا شفنا الأحداث من ساعة البعثة، مين إللي بيتشتم ومش بيرد، ومين إللي كان بيتعذب ومش بيرد ومين إللي كان بيتقتل ومش بيدافع عن نفسه،
وشفنا أخلاق رسول الله ﷺ والمسلمين قبل البعثة كانت إيه،
وكل الأذى ده عشان رسول الله كان بيقول لهم آمنوا بالله وعايز يصلح المجتمع الفاسد ويبعد الناس عن الفواحش والمحرمات،
بالضبط زي ما ربنا قال عن أصحاب الأخدود، فاكرين أول ماتكلمنا في ال

#قصص_الأنبياء(٢)
#السيرة_النبوية
#الحلقة_التاسعة_والتسعون
#أحداث_السنة_الخامسة_من_الهجرة
#لماذا_النساء

اتكلمنا المرة إللي فاتت عن الحجاب في الإسلام وعن وضع المرأة لمّا تخرج من البيت تبقى لابسة إيه وتمشي إزاي،
وشوفنا تحذير رسول الله ﷺ من الدخول على النساء،
وفي أحاديث تانية لرسول الله ﷺ وهو بيحذر الصحابة وبيحذر الرجال من بعدهم من النساء،
قال :
" المرأةُ عورةٌ ، وإنها إذا خرجت من بيتِها استشرفها الشيطانُ ، و إنها لا تكون أقربَ إلى اللهِ منها في قَعْرِ بيتِها"

يعني يجب تغطية المرأة زي ما بنغطي العورة كده، ومحدش يشوفها من غير المحارم، فهي يجب أن تُحفظ وتُصان،
ومش معنى الكلام إن المراة دي حاجة وحشة ونستعر منها زي ما الناس فاهمة،
أو زي ما كارهي الإسلام بيقولوا🙄

مثال عملي عشان نقرب المعنى👌
الدواء، مش بيبقى مكتوب عليه يُحفظ بعيدا عن أيدي الأطفال، هو الدواء ده حاجة وحشة عشان نخليه بعيد عن الأطفال🤨
لأ مش حاجة وحشة، لكن لو الأطفال شافوا الدواء وفتحوه وشربوه هيضرهم،
وكذلك السكّينة، بنبعدها خااالص عن الأطفال عشان لو شافوها وقدروا يوصلوا لها هتضرهم وتؤذيهم،
فالسكينة نفسها مش وحشة ومنقدرش نستغنى عنها ،لكن وجودها مع الشخص الغلط هو إللي مُضر😊
كذلك المرأة، المرأة مش حاجة سيئة عشان كده لازم نخبيها، المرأة بنبعدها وبنخفيها عن الأشخاص الغلط إللي هيسيؤوا لها أو يُسيؤوا استخدامها،
ومن الأشخاص دول الشيطان، قاعد لها بالمرصاد مستنيها تخرج، وأول ما تخرج من بيتها بيزينها في نظر الرجال فيوقعهم هم الاتنين في الفتنة،
ويا سلام بقى لو مكنتش لابسة الحجاب الشرعي وماشية كاسية عارية ومتزينة بكامل زينتها، تخيلوا كمية المصائب إللي ممكن تحصل😶
والمرأة أقرب ما تكون إلى الله وهي في قعر بيتها، شايفين الوصف، بيقول قعر البيت...يعني جوة أوي في العمق،
وبكده هتاخد أعظم أجر وثواب، والحديث ده بيشجع المرأة إنها متخرجش إلا لضرورة 👌

☆وطبعا ده يشمل تنزيل المرأة صورها على مواقع التواصل، زي الفيس وغيره🙂
ماهو إزاي في قعر بيتها وهي منزلة صورها الرايح والجاي يشوفها، دي سيئات جارية مش طاعة أبدا ،والكلام ده حتى لو لابسة نقاب يا جماعة لأن الأصل في النساء الستر👌
ثم المرأة مش هتنزل صورتها غير لو شايفة إن شكلها حلو، ودي مصيبة تانية وسيئات جارية أكيد،
وإلا الطبيعي لما الواحد بيتصور صورة وحشة فهو بيخفيها أصلا مش بيبقى عايز حد يشوفها🤷‍♂️
الموضوع ده خطير جدا والله لأن الواحدة ممكن تموت في أي لحظة ويفضل عداد السيئات شغال😓
فيا أي حد بيقرأ كلامي سواء رجل أو امرأة راجعوا حساباتكم وشوفوا لو عندكم أي سيئات جارية في أي مكان امسحوها وتوبوا قبل فوات الأوان، محدش يعرف ميعاد موته امتى👌

◇ وبمناسبة إن محدش يعرف ميعاد موته هحكي لكم قصة حصلت معايا ،كان في بنت جارتنا كانت بريئة جدا وكنت بحبها من وهي صغيرة بسبب برائتها دي، وكنت بشوفها بتروح تحفظ قرآن في المسجد،
انتقلوا للسكن في مكان تاني، وشوفتها بعد كده مرة واحدة قدرًا كده بعد كم سنة لما كبرت شوية، ومشفهتهاش تاني من بعدها وعدت سنين،
في يوم كنت راجعة من مشوار بعد المغرب فلقيت عربية متزينة واقفة تحت عمارة فيها كوافير فعرفت إن في عروسة، وأنا معدية من جنب العربية لقيت العروسة جوة العربية وكانت بكامل زينتها، فستان فرح مبين جسمها وكانت فاتحة الشباك عشان الحر وماسكة مروحة بتهوي بيها على نفسها، فكانوا ساعتها بيستعدوا للزفة،
شوفت العروسة وطلعت البنت جارتنا إللي مشفتهاش بقالي سنين،
فحزنت جدا لأن من الطبيعي إن الإنسان يحزن لما يشوف حد بيحبه واقع في معاصي، فدعيت لها وأنا ماشية وكنت خايفة عليها بصراحة لتموت لا قدّر الله قبل ما تتوب،
العروسة دي هي وزوجها ماتوا بعد الموقف ده بحوالي ثلاثة أو أربع ساعات بعد ما رجعوا بيتهم بعد الفرح بسبب سخان الغاز😞
الموضوع كان صدمة لكل المنطقة وصدمة لي أنا شخصيا، لأني كنت لسه شايفاها قبلها على طول وكنت كمان خايفة عليها،
تعتقدوا لو كانت تعرف إنها على ميعاد مع ملك الموت بعد شوية كان ده بقى حالها، ولاّ كانت هتفضل تصلي وتستغفر وتفضل ساجدة لله عشان تموت على طاعة،
بدل ما كان يتكتب في آخر أعمالها كمية المعاصي والذنوب دي، على فكرة كان عمرها عشرين سنة فقط😞
ربنا يرحمها ويتجاوز عنها وعنّا ويرزقنا حسن الخاتمة،
وفي قصص وعبر تانية كتير بتحصل حوالينا بس احنا إللي مش بناخد بالنا،
السعيد من وُعظ بغيره يا جماعة👌

نرجع لحديث تاني لرسول الله ﷺ بيحذر فيها من فتنة النساء قوله:
" إنّ الدنيا حُلْوة خَضِرة، وإن الله مستخلِفَكم فيها فينظر كيف تعملون،
فاتقوا الدنيا واتقوا النساء، فإن أول فتنة بني إسرائيل كانت في النساء"
يعني رسول الله ﷺ بيقول عن الدنيا إنها حلوة بسبب إللي فيها من الملذات،
والنفس البشرية بيجذبها ويستهويها الطعم الحلو، وكمان النفس بتحب اللون الأخضر،
مش احنا بنكون مبسوطين لما بنقعد في مكان فيه زرع وأشجار لونهم أخضر،
فتخيلوا ل

#قصص_الأنبياء
#الحلقة_التاسعة
#قصة_هود

اتكلمنا المرة إللي فاتت عن الوصية إللي نوح عليه السلام وصاها لابنه قبل موته،
بعد موت نوح عليه السلام عاش أبناؤه على التوحيد وعَمَروا الأرض،
وبعد سنين وسنين الناس نسيت وصية نوح عليه السلام و بدأ الشيطان يوسوس لهم تاني بنفس الطريقة،
أحفاد نوح عليه السلام قالوا إحنا مش عايزين ننسى آبائنا فاحنا لازم نعملهم تماثيل،
عشان نفضل فاكرينهم فيذكرونا بعبادة ربنا وقدرة ربنا والمعجزة إللي حصلت لنوح عليه السلام،

وطبعا جيل بعد جيل نسيوا عبادة ربنا وتعظيم وراء تعظيم كانت النتيجة إن البشرية رجعت تعبد الأصنام تاني وتركوا عباة الله الواحد الأحد الذي لا شريك له😑

واحنا قلنا قبل كده إن الشيطان نَفسه طوييييل مبيزهقش،
عادي جدا بالنسبة له إن يحط بذرة النهاردة بخطوة واحدة، ويلاقي ثمرتها بعد جيل أو أجيال كاملة👌

¤ ممكن حد يسأل ويقول وهم ذنبهم إيه...ماهمّ مكنوش يعرفوا حاجة؟
الجواب:
كان فيه تقصير من الآباء والمجتمع كله في نقل العلم الصحيح لأبناءهم وكل إللي حواليهم وإنهم يحذروهم من الشرك الظاهر والواضح جدا ده،
هقول لكم مثال،
مش احنا بنشوف في عصرنا دلوقتي ناس بتطوف بقبور أولياء الله الصالحين إللي ماتوا، ويتوسلوا ليهم ويدعوهم من دون الله؟!
طيب بلاش دي،
هل في عاقل يروح يشتري بنطلون مقطع فِتَل كده عشان يلبسه😑
يعني الطبيعي إن الهدوم لما تتقطع بنخيطها ونلبسها،
لكن لما تتتقطع لدرجة إنها تبقى فِتل بنشتري غيرها عشان خلاص مبقتش تنفع تتلبس، صح؟
هل يُعقل إني أروح أشتري الهدوم دي😳
لأ
ولو قلت آه = يبقى انت إللي غلط ومبتفهمش في الأمور الصح طبعا 🙄
طيب فين دور الأباء والأمهات هنا في غرس الصح ده وتصحيح الخطأ لما بيلاقوه قدامهم؟ فين تربيتهم؟
ماهو الأبناء هيجيبوا فلوس منين عشان يشتروا الهدوم دي مثلا؟
ده ساعات الأب والأم همّ إللي بيساعدوا أبناءهم ويشجعوهم إنهم يلبسوا كده،
وساعات كمان تلاقي الأب والأم لابسين اللبس ده بكل أسف، مع إن لسه حواليهم ناس بتفكرهم إن ده غلط وما يصحش ولسه بين إيدينا القرآن والسنة والهدي النبوي، يعني العلم لسه موجود👌
يبقى منستغربش لما الناس نسيت وصية نوح عليه السلام، لإنهم ببساطة مشيوا خطوة ورا الشيطان، والخطوة بتجر لخطوة،
وخطوة خطوة هتبص وراك مش هتلاقي طريقك كان فين بدايته عشان ترجع، فبتكمل لقدام ..
وبسبب كده ضلوا ورجعوا تاني لعبادة الأصنام😞

طيب خلونا نفترض إن الأباء مقصروش في تربية أبناءهم
والأبناء هم إللي ضلوا وعبدوا الأصنام، لأنهم مش مستوعبين خطورة الشرك بالله وطال عليهم العهد بعد هلاك قوم نوح عليه السلام، وأكيد إللي سمع مش زي إللي شاف👌

طيب إيه الحل؟
الحل إن ربنا يبعت لهم نذير،
وهو ده إللي حصل مع عاد قوم هود👌
عاد قوم هود هم أول ناس عبدوا الأصنام على وجه الأرض بعد الطوفان،
كانوا بيسكنوا في مكان اسمه الأحقاف وهي جبال الرمل،
وهي جزء من صحراء الربع الخالي، بين سلطنة عُمان واليمن،
"واذْكُر أخَا عادٍ إذ أنذَرَ قومَه بالأحْقَاف "
وكانوا عمالقة وأقوياء ...مكنش في حد في قوتهم أبدا في الوقت ده،
بنوا مدينتهم إِرَم وكانوا بيحبوا يعيشوا في الخيام،
فبنوا خيام بعواميد عملاقة ومرتفعة جدا، وكان عندهم حضارة متقدمة، ربنا وصف حضارتهم بإنها لم يُخلق مثلها في البلاد،
ويُقال إن أسوار المدينة كانت من الذهب والفضة،
وكانوا بيبنوا فوق الجبال القصور للترفيه والتسلية بالبناء، بيلعبوا يعني😅
يعني مش عشان يسكنوا فيها، لأ بينوها كده وخلاص،
من كتر ماكانوا أقوياء وعندهم رخاء وأموال،
زي إللي بيلعب بالرمل على الشاطئ كده مثلا،
وكانت القصور دي آية في الروعة والضخامة وفن المعمار..
"أتَبْنُونَ بكل رِيعٍ آيةً تَعبثُون"

وكان الناس بيخافوا من قوم عاد لأنهم كانوا ظلمة وجبارين،
مكنش في حد بيقدر يقف في طريقهم،
فهم اجتمع عندهم الكفر والظلم، يعني ربنا قادر على إنه يهلكهم في لحظة👌
لكنه سبحانه قال:
"وما كنا مُعَذّبِينَ حتّى نَبْعثَ رَسُولا"
فعشان يقيم عليهم الحُجة أرسل إليهم هود عليه السلام عشان يحذرهم من عبادة الأصنام ويدعوهم لعبادة الله وحده
ويحذرهم من الظلم والكفر والفجور وغيره،

كان هود عليه السلام واحد منهم... يعني عارفينه وعارفين أخلاقه وعارفين أصله وكل حاجة عنه،
وكان هود عليه السلام من الأنبياء العرب الأربعة،
والأنبياء العرب الأربعة هم عالسريع كده:
هود وصالح وشعيب ومحمد صلى الله عليهم أجمعين.
فكان هود عليه السلام وقومه عاد يتكلمون العربية.

قال هود لقومه اعبدوا الله وسيبكم من عبادة الأصنام ربنا هو إللي خلقكم وأعطاكم القوة والأموال ، وأنعم عليكم بالرخاء إللي إنتم عايشين فيه ده، الأصنام حجارة لا تضر ولا تنفع😥
"وَإِلَى عَادٍ أَخَاهُمْ هُودًا قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ "

فرد عليه عِلية القوم والأكابر منهم وقالوا :
انت سفيه وكذاب 😏
"قَالَ الْمَلَأُ الَّذِينَ كَفَرُوا مِنْ قَوْمِهِ إِنَ

#قصص_الأنبياء
#الحلقة_التاسعة_عشرة
#قصة_إسحاق_يعقوب_يوسف(١)
#الرؤيا_والمَكِيدة

قلنا قبل كده إن إبراهيم عليه السلام ربنا بشّره بابنه إسحاق على لسان الملائكة لما كانوا رايحين يُهلكوا قوم لوط،
فإسحاق هو الابن الثاني لإبراهيم عليه السلام
اتولد بعد إسماعيل عليه السلام بحوالي ١٣ سنة،
"وَبَشَّرْنَاهُ بِإِسْحَاقَ نَبِيًّا مِنَ الصَّالِحِينَ "
مفيش كلام كتير عنه في القرآن والسنة، هو كان نبي على نفس شريعة إبراهيم عليه السلام،
وكان عنده ولدين: يعقوب والعِيص، والإتنين كانوا بارّين بأبوهم،
زوجة إسحاق عليه السلام قالت لابنها يعقوب إنه يروح عند خاله واسمه "لَابان"
ويقعد عنده في مدينة حَرّان وهي موجودة حاليا في شرق تركيا،
مسافة السفر كانت طويلة فكان بينام في الليل في الطريق،
فنام على صخرة وشاف رؤيا ،
شاف إن ربنا بيكلمه وبيقوله إنه هيُكَثَّرُ له في ذريته،
يعني ذريته هتبقى كتيرة وربنا هيبارك له فيها وهتكون الأرض دي له هو وذريته،
استيقظ يعقوب عليه السلام من النوم وحط علامة على الحجر إللي كان نايم عليه عشان يعرف الأرض إللي ربنا قاله إنها هتكون له هو وذريته وسمى المكان ده "بيت إِيل"،
وكلمة إِيل في لغتهم معناها الله...
و"بيت إِيل" يعني بيت الله،
فقال إنه هيبني في المكان ده بيت لربنا،
وإسرا معناها عبد وإسرائيل معناها عبد الله، ده في لغتهم هم😅
لكن احنا ماينفعش نسمي ربنا في شريعتنا الإسلامية العربية بإيل لأن أسماء الله في شريعتنا الخاتمة توقيفية،
يعني ربنا عز وجل هو إللي يقولنا عليها، زي الرحمن والرحيم والعزيز و....و...فمينفعش احنا نخترع اسم ونسمي ربنا بيه 👌
المهم،
يعقوب عليه السلام كمّل طريقه ووصل عند خاله واستقر عنده مدة طويلة،
طلب من خاله إنه يتزوج بنته واسمها "راحِيل"
فقاله موافق بس بشرط إنك تشتغل عندي سبع سنين،
فقاله ماشي وبعد السبع سنين زوّجه بنته الكبيرة "لِيَا"🤓
فقاله يا خالي أنا عايز راحيل مش لِيا فقاله عندنا ماينفعش الصغيرة تتزوج قبل الكبيرة،
فقاله بس أنا عايز راحيل😳
قاله مفيش مشكلة اشتغل عندي سبع سنين تانية وأزوجك راحيل😊
ففعلا اشتغل عنده سبع سنين تانية وبعدين تزوج من راحيل.

¤كان في شريعتهم عادي إن الرجل يجمع في الزواج بين أختين.
وقعد عند خاله ست سنين كمان لحد ما أتم عنده عشرين سنة،
وكان بيرعى الغنم وربنا فتح عليه في الرزق وبقى عنده أموال كثيرة،
ربنا رزقه بستة أبناء من لِيا،
وراحيل مخلفتش،
فلما يئست إنها مش هتخلف أهدت يعقوب عليه السلام جارية لها عشان يتزوجها فالجارية دي خلّفت ليعقوب عليه السلام ولدين،
تسكت "لِيا" 😅
لأ طبعا😅
راحت هي كمان أهدت يعقوب عليه السلام جارية عشان يتزوجها فخلفت هي كمان ولدين،

☆زمانكم مستغربين إيه الناس دي😳😅
هو عادي كده الواحدة تدي لزوجها امرأة تانية 🤐
طبعا الزمن والتربية بيختلف، يعني احنا أجيال اتربينا على رفض الزوجة التانيةنفسيا -مش شرعا طبعا وإلا يبقى كفر والعياذ بالله-
واتربينا على إنها خطافة الرجالة ونظرة الناس لده فيها حرج وشماتة و...و...،بعكس الأزمنة إللي فاتت،
وكمان إنتشار الجواري في الأزمنة إللي فاتت كان مخلي الأمور طبيعية أكتر من كده، فأكيد طبعا لازم نستغرب من النساء بتوع زمان😅

فيعقوب عليه السلام اتولد له دلوقتي عشر أبناء...
لكن راحيل مخلفتش، فيُذكر إنه دعا الله أن يرزقه ولد من راحيل وهي كمان دعت، فربنا رزقها بيوسف وبينيامين،
بعد ما أتم يعقوب عليه السلام عشرين سنة عند خاله قرر إنه يرجع عند أبوه إسحاق وأمه وأخاه، فرجع فعلا لأهله واستقر معاهم،
رجع يعقوب عليه السلام للمكان إللي حط عنده العلامة وبنى هناك بيت المقدس، وكان ثاني بيت لله في الأرض،
البيت الأول كان الكعبة والتاني هو بيت المقدس،
ورجع قعد مع أبيه إسحاق ومات إسحاق عليه السلام بعد مدة وقيل إنه مات وهو عنده ١٨٠ سنة،

☆طبعا الأسماء والأحداث👆 التفصيلية دي من الإسرائيليات التي لا نصدقها ولا نكذبها واحنا كنا اتكلمنا في أنواع الإسرائيليات قبل كده والمقبول منها والمرفوض منها لو تفتكروا،
وأهل التفسير ذكروا التفاصيل دي عشان نفهم السياق المبدئِي والتخيلي للقصة ماشي إزاي 👌

يعقوب عليه السلام اتولد له ١٢ ولد، واختلف أهل العلم هل أبناؤه دول هم الأسباط ولّا لأ🤔
والأسباط معناها ذرية الإنسان
سواء أبناؤه مباشرة أو أحفاده أو أحفاد أحفاده المهم إنهم من ذرية الإنسان،
" قُلْ آمَنَّا بِاللَّهِ وَمَا أُنزِلَ عَلَيْنَا وَمَا أُنزِلَ عَلَىٰ إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ ،
وَمَا أُوتِيَ مُوسَىٰ وَعِيسَىٰ وَالنَّبِيُّونَ مِن رَّبِّهِمْ لَا نُفَرِّقُ بَيْنَ أَحَدٍ مِّنْهُمْ وَنَحْنُ لَهُ مُسْلِمُونَ"
والصحيح إن أبناء يعقوب عليه السلام مش الأسباط لأن الأسباط كانوا كلهم أنبياء،
وأفعال أبناء يعقوب عليه السلام مع أخوهم يوسف زي ما هنشوف مش أخلاق أنبياء حتى قبل الرسالة👌

في يوم من الأيام جه ليعقوب عليه السلام ابنه الصغي

#قصص_الأنبياء
#الحلقة_التاسعة_والعشرون
#قصة_موسى_الجزء_الرابع
#من_آمن_لموسى

وقفنا المرة إللي فاتت عند فرعون لما أمر إن السحرة إللي آمنوا كلهم تتقطع إيديهم ورجليهم وبعدين يتصلبوا في جذوع النخل والبلد مقلوبة😶
السحرة إللي كانوا مُوَالين لفرعون بيتقتلوا لمجرد إنهم آمنوا بموسى عليه السلام،
ودي عادة الطواغيت،
إنهم في أي لحظة ممكن يقتلوا أي حد حتى الموالين ليهم إللي نصروهم في كذا موضع قبل كده عشان يحافظوا على مُلكهم😑
طبعا فرعون مقدرش يعمل حاجة لموسى عليه السلام،
لأنه لو قتله هيتحول لشهيد مظلوم، وهتحصل فتنة كبيرة جدا في البلد؛
لإن الناس كلهم شافوا إللي حصل، فموسى عليه السلام في مَوْضع قوة دلوقتي،
وفرعون كان ذكي، فكان عايز يلم الموضوع في الموقف ده لحد ما يدبّر له مكيدة تانية يخلص بيها منه👌

الشعب شاف كل إللي حصل ده قصاد عينهم وعرفوا صِدق موسى عليه السلام وإن هو إللي معاه الحق،
ومع ذلك محدش فيهم آمن لموسى عليه السلام😕

من شعب مصر كله لم يؤمن إلا ثلاثة أشخاص غير السحرة،
◇ أولهم ابن عم فرعون.
وطبعا كان بيخبي إيمانه؛ لأنهم لو عرفوا إنه آمن بموسى هيتعرضوا له بالقتل زيه زي السحرة😶
فكان بيحضر الاجتماعات مع فرعون وباقي الملأ ومحدش عارف إنه مؤمن،
وكان الملأ في مجالسهم بيحرّضوا فرعون إنه يقتل موسى أو حتى يؤذيه، ويقولوا له:
هو انت هتسيب موسى يفسد في الأرض ويخرّب عقول الناس ويدعوهم إنهم يعبدوا إلاهه ويسيبوا عبادتك😤
"وَقَالَ الْمَلأُ مِن قَوْمِ فِرْعَونَ أَتَذَرُ مُوسَى وَقَوْمَهُ لِيُفْسِدُواْ فِي الأَرْضِ وَيَذَرَكَ وَآلِهَتَكَ "

فقال لهم فرعون انتم بس ادوني تفويض من الشعب عشان أقتل موسى ويبقى يستنجد بربه ينقذه أو يمنعه مني،
أنا خايف على مصلحتكم كلكم ...لإن ده جاي عاوز يغير دينكم ويُفسد في الأرض ويخرب البلد....صحيح🤓
"وَقَالَ فِرْعَوْنُ ذَرُونِي أَقْتُلْ مُوسَى وَلْيَدْعُ رَبَّهُ إِنِّي أَخَافُ أَن يُبَدِّلَ دِينَكُمْ أَوْ أَن يُظْهِرَ فِي الْأَرْضِ الْفَسَادَ "

شوفوا إزاي 😏
ده على أساس إنك مش خايف على مُلكَك انت بس، وإنك بيهمك مصلحة الناس أوي ونفسك تعوّض الشعب المسكين إللي لم يجد مَن يحنو عليه🙄

الرجل المؤمن لما سمعهم بيتكلموا عن قتل موسى عليه السلام بدأ يكلمهم عشان يحاول يمنعهم من قتله عليه السلام، وفي نفس الوقت من غير ما يفهموا إنه بيعمل كده عشان هو مؤمن زيه،
فكان بيقول لهم كلام منطقي يقنعهم ويُخاطب عقلهم، قال لهم:
انتم عايزين تقتلوا واحد لمجرد إنه بيقول الله ربي، متسيبوه يقول براحته😥
وكمان ده جالكم بدليل ومعجزة تثبت للناس إنه فعلا رسول من عند ربنا وتؤكد صدق كلامه😞
"وَقَالَ رَجُلٌ مُّؤْمِنٌ مِّنْ آلِ فِرْعَوْنَ يَكْتُمُ إِيمَانَهُ أَتَقْتُلُونَ رَجُلًا أَن يَقُولَ رَبِّيَ اللَّهُ وَقَدْ جَاءكُم بِالْبَيِّنَاتِ مِن رَّبِّكُمْ "

يعني الرجل المؤمن ده عاوز يقول لهم انتم كده موقفكم بقى أصعب ومحتاج خطط تانية غير القتل.. سيبوه خالص،
وهو لو كان كاذب فهو إللي هيتحمّل نتيجة كذبه لوحده وهيتفضح أمره والناس مش هترحمه🤷‍♂️
ولو طلع صادق فعلا وكنتم قتلتوه ممكن ينزل عليكم عقوبة من السماء زي ما حصل زمان..
"وَإِن يَكُ كَاذِبًا فَعَلَيْهِ كَذِبُهُ وَإِن يَكُ صَادِقًا يُصِبْكُم بَعْضُ الَّذِي يَعِدُكُمْ"
وبعدين بدأ يزوّد أكتر في الكلام ويتكلم بوضوح أكبر فقال لهم:
كفاية إنكم متمسكين بدينكم الغلط، يعني انتم مفكرين عشان عندكم سلطان وقوة وقاهرين لبني إسرائيل يبقى انتم كده محدش هيقدر يَقهركم😑
طيب مين إللي هينجينا من قوة ربنا وقهره وعقابه لو نزل علينا😔
"يا قَوْمِ لَكُمُ الْمُلْكُ الْيَوْمَ ظَاهِرِينَ فِي الْأَرْضِ فَمَن يَنصُرُنَا مِن بَأْسِ اللَّهِ إِنْ جَاءنَا "

فهنا بدأ فرعون يعرف إن الرجل المؤمن ده آمن بموسى عليه السلام واتبعه،
فبدأ يغضب وجنون العظمة رجعله تاني ووجه كلامه للناس قبل ما يتأثروا بكلام المؤمن، وقال:
أنا رأيي هو الصح ومش بعمل غير عشان مصلحتكم ، ومصلحتي هي مصلحتكم، وأنا مش بقول لكم غير الصح وهو إني أقتل موسى، أنا لو سبته هيغير دينكم ويخرب البلد😤
"قَالَ فِرْعَوْنُ مَا أُرِيكُمْ إِلَّا مَا أَرَى وَمَا أَهْدِيكُمْ إِلَّا سَبِيلَ الرَّشَادِ"

فقال الرجل المؤمن:
أنا خايف عليكم لو قتلتم موسى هيحصل لكم زي ما حصل يوم الأحزاب...الأقوام إللي تحزّبوا ضد أنبياؤهم نوح وهود وصالح وإللي جاءوا بعدهم ...ربنا أهلكهم جميعا،
فلو اتجرأتم عليه وأذِتُوه ربنا هيهلككم زي ما أهلكهم😔
"وَقَالَ الَّذِي آمَنَ يَا قَوْمِ إِنِّي أَخَافُ عَلَيْكُم مِّثْلَ يَوْمِ الْأَحْزَابِ مِثْلَ دَأْبِ قَوْمِ نُوحٍ وَعَادٍ وَثَمُودَ وَالَّذِينَ مِن بَعْدِهِمْ"

ويوسف كان جاءكم بالبينات هو كمان وفضلتم شاكين في الدين إللي جاء بيه، ولما مات قلتم خلاص لن يبعث الله رسول تاني،
"وَلَقَدْ جَاءكُمْ يُوسُفُ مِن قَبْلُ بِالْبَيِّنَاتِ فَمَا زِلْتُمْ فِي شَكٍّ مِّمَّا جَاءكُم بِهِ

#قصص_الأنبياء
#الحلقة_التاسعة_والثلاثين
#قصة_داود_الجزء_الثاني
#قصة_سليمان_الجزء_الأول

اتكلمنا المرة إللي فاتت عن داود عليه السلام وعرفنا إنه أول نبي يجمع بين النبوة والملك في بني إسرائيل،
وداود عليه السلام كان أول نبي من بني إسرائيل يحكم معظم أرض فلسطين حكم إيماني لمدة أربعين سنة👌

☆إيه ده، هل معنى كده إن أرض فلسطين والقدس بتاعة اليهود زي ما بيقولوا😳
طبعا لأ مش بتاعتهم إطلاقا 👌
لإن القدس وفلسطين وبلاد الشام بصفة عامة فُتحت في عهد عمر بن الخطاب رضي الله عنه وبقت تحت حكم المسلمين،
وأي دولة تُفتح وتُحكم بحكم الإسلام خلاص بقت بتاعة المسلمين ولو مر الزمن وتم احتلالها بيبقى واجب على المسلمين استرجاعها 👌
زي القدس في الوقت الحالي وزي أسبانيا والبرتغال برده، إللي كان بيُطلق عليها اسم بلاد الأندلس وهي:
《الفردوس المفقود》

من الأحداث إللي حصلت في حياة داود عليه السلام
قصة رواها ابن عباس رضي الله عنه إن رجلين اتنين اختصموا عند داود عليه السلام،
الأول قال إن الرجل التاني أخد البقر بتاعه بالغصب، لكن الرجل الثاني أنكر الموضوع... فأجّل داود عليه السلام الحكم في الموضوع بتاعهم لوقت الليل، فربنا أوحى له إنه يقتل الرجل المُدّعِي😳
فتاني يوم داود عليه السلام قال للرجل الأول - إللي هو 《المُدَّعِي》- قولي حقيقة الموضوع .. ربنا أوحى لي إني أقتلك 😶
فالرجل قال: والله يا نبي الله أنا صادق في كلامي والرجل ده فعلا أخد البقر بتاعي غصبا😔
لكن أنا قتلت أبوه من غير ماحد يعرف 😞.. فأمر داود علي السلام إن الراجل يُقتل قَصاصًا 👌

ومن الأحداث إللي حصلت برده وكان لسليمان الابن المتميز لداود عليه السلام دور فيه،
رجلين جاءوا اختصموا عند داود عليه السلام، واحد عنده أغنام والثاني عنده أرض زراعية،
فكان لما ييجي الليل⛼ كان صاحب الغنم يدخل غنمه الحظيرة.. ففي ليلة من الليالي الغنم🐐 طلعت من الحظيرة وراحت الأرض الزراعية بتاعة الرجل الثاني وقعدت تاكل منها وأفسدتها،
ربنا قال عنها في القرآن:
"وَدَاوُودَ وَسُلَيْمَانَ إِذْ يَحْكُمَانِ فِي الْحَرْثِ إِذْ نَفَشَتْ فِيهِ غَنَمُ الْقَوْمِ وَكُنَّا لِحُكْمِهِمْ شَاهِدِينَ"
وطبعا صاحب الغنم مسؤول عن أغنامه في الليل إنه لازم ياخد باله منها ويقفل عليها كويس ويتأكد إنها مش مطلوقة على حد،
بعكس بالنهار ليس عليه أي حرج لما الغنم يخرج للرعي ويدخل أرض زراعية بالغلط، لأن ساعتها بيبقى في أكثر من طريقة لمنعها...
لكن في الليل الكل نايم فمين إللي هيمنعها غير راعيها🤷‍♂️ فالإشكالية إن الغنم أفسدت الأرض في الليل،
فلما راح الراجل صاحب الأرض لداود عليه السلام يشتكي، فحكم له داود عليه السلام إنه ياخد الغنم بتاعة الرجل وتبقى بتاعته،
فسليمان بن داود عليه السلام قال إنه عنده رأي ثاني وهو:
إن الرجل صاحب الغنم ياخد الأرض الزراعية يصلّحها،
ولما ترجع زي ماكانت يرجّعها لصاحبها، وإن الراجل صاحب الأرض الزراعية ياخد الغنم يستفيد منها لحد ما أرضه تتصلح وترجعله،
فوافق الرجلين على حل سليمان ورضيوا به أكتر من الحل بتاع داود عليه السلام😊..
"فَفَهَّمْنَاهَا سُلَيْمَانَ ۚ وَكُلًّا آتَيْنَا حُكْمًا وَعِلْمًا"

☆طيب هل معنى كده بقى إن سليمان أعلم من داود😕
لأ..ربنا أعطى داود وسليمان العلم، لكن مش كل إنسان عنده علم لازم يكون عالم بكل المسائل،
وربنا قال عن داود عليه السلام :
"وآتيناه الحِكمة وفصلَ الخطاب"
فعادي جدا لما تَخفَى عليه بعض المسائل ويكون فيها حل أحكم من حله أو أرجح منه 💁‍♂️
فمش شرط إن الإنسان يفهم كل قضية جزئية عشان نقول إنه فاهم😅
يعني لو عالم أصاب مثلا في ألف مسألة وأخطأ في مسألة معينة ... فمنقولش إنه لم يفهم،
زي ما حصل في موقف الغنم ده بين داود وسليمان وموقف المرأتين من الجزء إللي فات،
وساعات الإنسان بيحتاج مع العلم سرعة البديهة وحسن التصرف زي المواقف إللي حكم فيها سليمان👌

◇وزي قصة حرامي الإِوَز 😅
والقصة هي إن في رجل راح اشتكى لإمام المسجد إن الإِوَز بتاعه بيتسرق من جيرانه لكنه مش عارف مين هو بالضبط،
فبعد الصلاة قال للناس:
إن جار فلان بيسرق الإِوَز بتاعه وبيدخل المسجد وهو على راسه ريش الوز، فواحد من إللي قاعدين مسح على راسه، فعرف إن هو إللي بيسرق الإوز😄

¤وممكن العكس كمان... يعني يكون واحد عنده أصل العلم لكنه عنده بلادة أو غباء أو ضيق أُفق في الفهم والتطبيق😶
زي الخوارج مثلا لما بيقولوا الآيات على غير معناها الصحيح،
مثال:
رسول الله ﷺ بيقول : "شفاعتي لأهل الكبائر من أمتي"
فييجي واحد منهم يقول أهل الكبائر المقصود بيها هنا :أهل الصلاة والزكاة🤓
وبيستشهدوا بكلام ربنا: " واستعينوا بالصبر والصلاة وإنها لكبيرة"😐
فبيقولوا إن المقصود بالكبائر في الحديث هو كبائر الطاعات،
والأصل والمتواتر إن لفظ الكبائر بتُطلق على المعاصي والذنوب🤦‍♂️
أهه دول ناس عندهم العلم لكن مفيش أي ذرة فَهم😑

◇ملحوظة مهمة عن الحديث عشان الناس متفهمش غلط😅
مش معنى إن

#قصص_الأنبياء
#الحلقة_التاسعة_والأربعون
#صاحب_الجنتين

قصتنا النهاردة ربنا ذكرها في القرآن لرسول الله ﷺ وهي رسالة لكل إللي هيقرأ القرآن على مر السنين،
عشان كفار قريش يعرفوا واحنا كمان نعرف إن العبرة مش بكثرة الأموال ولا بالغنى،
ولكن العبرة بالإيمان لأن الرجل ممكن يكون غني كافر ولا ينفعه ماله مثلكم يا كفار قريش👌
وممكن يكون الإنسان فقير ولكنه مؤمن وهو ده إللي هينفعه يوم القيامة زي فقراء الصحابة إللي انتم طلبتم من رسول الله ﷺ إنه يطردهم عشان تقعدوا معاه وتسمعوا كلامه👌

خلونا نشوف القصة مع بعض😊

القصة عن رجلين يُقال إنهم من بني إسرائيل، منعرفش في زمن أنهي نبي،
لكن إللي يهمنا إن قصتهم بتتكرر في كل زمان، فلازم ناخد بالنا ونعتبر..
الرجلين دول، واحد منهم غني ربنا أعطاله بستانين مليانين شجر من كل الثمرات، وخصوصا شجر العنب، لإنه أفضل الثمار ..
والمسافة إللي بين البستانين كمان مكنتش فاضية،
لأ، ده ربنا جعل فيها كمان زرع ، ده غير إن من الأطراف الخارجية للبستانين النخل محاوط المكان من كل جانب.. فكان شكل البستانين جميل جدا وجذاب وكله نضارة وتناسق..
كمان موقع البساتين كان ممتاز،
يعني بيدخل له الهوا والشمس بشكل منتظم وصحي.. زي ما بنقول على شقة من الشقق مثلا: الشقة دي شِرحة وبِرحة ، جَوَّها بحري وهواها يرد الروح ويشرح القلب😅
أهه البستانين بتوع صاحبنا ده كانوا من أحسن ما يمكن في كل شيء بالذات الموقع، فعشان كده الثمار طلعت على أحسن ما يكون..
ومش بس كده، ده الثمر إللي كان بيطلع مكنش فيه أي حاجة منه بتبوظ خالص أو تفسد 👌
"وَاضْرِبْ لَهُمْ مَثَلًا رَجُلَيْنِ جَعَلْنَا لِأَحَدِهِمَا جَنَّتَيْنِ مِنْ أَعْنَابٍ وَحَفَفْنَاهُمَا بِنَخْلٍ وَجَعَلْنَا بَيْنَهُمَا زَرْعًا"

وكان لما يسقي الزرع في البستانين مكنش بيحتاج يحفر في الأرض عشان يطلع المياه الجوفية،
ولا كان بيحتاج إنه يجيب عُمال ينقلوا المياه للأرض عنده، ولا أي حاجة من دي،
لأ، ده ربنا كان منعّمه ومريّحه أكتر، فكان مفجّر له نهر منها فيها والنهر ده كان بيمشي في البساتين ويرويها،
وربنا جعل له زي عيون المية كده بتجري وسط البساتين من النهر ،فعلا سبحان الله حاجة تسحر العيون😮
"كِلْتَا الْجَنَّتَيْنِ آتَتْ أُكُلَهَا وَلَمْ تَظْلِمْ مِنْهُ شَيْئًا وَفَجَّرْنَا خِلَالَهُمَا نَهَرًا"
شوفوا النعم إللي ربنا أنعم بيها على الرجل دي كلها،
عمل إيه هو عشان يشكر النعم دي😕

☆شوفوا،
الناس في شكر النعم أنواع:
◇نوع بيتكبر ويطغى بالنعمة وبيعصي ربنا بيها،
ودول ربنا بيصبر عليهم لعلهم يتوبوا، ولما بيستمروا في معاصيهم وتكبّرهم، بيسلب منهم النعم دي أو بيموتهم عليها والعياذ بالله👌
يعني مثلا تلاقي واحد ربنا مديله نِعم زي نعمة البصر ونعمة السمع،
وبعدين تلاقيه بيستعملها في المعاصي ويتفرج على الأفلام والمسلسلات وبيسمع الأغاني..
أو تلاقي واحدة ربنا معطيها نعمة زي نعمة الجمال، تقعد تستعرض جمالها قدام الناس وتخرج متبرجة في الشارع وتفتن الشباب..
دول ممكن يفضلوا مستمرين في استعمال النعم في معصية الله لحد ما ربنا يسلبها منهم إن أراد عقابهم ولم يعفو عنهم..

كم مرة سمعتم عن بنت عملت حادثة وهي لابسة لبس مش كويس،
وخرجت من الحادثة وهي مشوّهة أو محروقة أو عندها عاهة مستديمة والعياذ بالله قضت على جماله إللي كانت بتُبَارز ربنا بيه بالمعصية ليل نهار بدل ما تشكر النعمة كما يحب ويرضى؟
كم مرة سمعتم عن شاب عمل حادثة وهو بيسمع الأغاني وبدأ يطلّع في الروح، فحاولوا يلقنوه الشهادة لكن للأسف ما عرفش يقولها وفِضِل يردد الأغاني المحرمة لحد ما روحه طلعت؟
شوفنا وسمعنا كتير عن حكايات زي دي، وكلهم هيُبعَثوا يوم القيامة وهمّ على المعصية دي، إن لم يعف عنهم الله، لإن من مات على شيء بُعث عليه👌

◇النوع التاني من الناس هو نوع كل ما ربنا يزوّد له في النِّعم يتواضع لربنا ويشكر نعمته ويستعملها في طاعته عز وجل، وده ربنا بيمتّعه بالنعم دي حتى الممات..
كام مرة سمعنا عن واحد مات وهو ساجد أو صائم؟
دي ناس أفنت نعمة الصحة في تسخيرها في طاعة الله، وهو ده شكر النعمة..
كام مرة سمعتم عن بنت ماتت وهي بتقرأ القرآن؟
أو بنت ماتت بحجابها مستورة مش باين منها شعراية حتى، رغم إنها ممكن تكون وقعت من مكان مرتفع مثلا ،
الجزاء من جنس العمل يا جماعة، إللي يشكر نعمة ربنا ..ربنا هيبارك له في النعمة ويزودها له،
واحنا شوفنا مثال على شكر النعم في سليمان عليه السلام وفي ذي القرنين،
وإللي يكفر نعمة ربنا ويستعملها في معصيته ويتكبر بيها ويستغنى، ربنا هيسلبها منه في يوم من الأيام👌
وربنا مهما أمهل الناس، فهو يمهل ولا يهمل..
فالرجل صاحبنا بقى عمل إيه في النِّعم إللي ربنا أعطاها له💁‍♂️
للأسف كان من النوع الأول، تكبّر وطغى 😞

والراجل ده كان له صاحب فقير فلوسه قليلة مش زي صاحبه،
في يوم من الأيام الراجل الغني قال لصاحبه الفقير: تعال نتمشى في البستان عندي شوية كده..
دخلوا البستان

#قصص_الأنبياء
#الحلقة_التاسعة_والخمسون
#مريم_زكريا_الجزء_التاسع
#عيسى_الجزء_الخامس

وقفنا المرة إللي فاتت عند الحواريين لما سألوا عيسى عليه السلام سؤال غريب.. قالوا إيه..؟
"إذْ قَالَ الْحَوَارِيُّونَ يَا عِيسَى ابْنَ مَرْيَمَ هَلْ يَسْتَطِيعُ رَبُّكَ أَن يُنَزِّلَ عَلَيْنَا مَائِدَةً مِّنَ السَّمَاء "
يعني ياعيسى هو ربك يقدر إنه ينزل علينا مائدة من السماء 😅🤔

☆بالضبط كده زي ما قرأتم، مائدة😀
عايزين ترابيزة عليها أكل تنزل لهم من السماء😶

عيسى عليه السلام قال لهم : اتقوا الله😳
إزاي تطلبوا حاجة زي كده والمفروض إنكم مؤمنين😑
"قَالَ اتَّقُواْ اللَّهَ إِن كُنتُم مُّؤْمِنِينَ"
متسألوش الأسئلة دي وتطلبوا كل شوية آية ومعجزة، عشان مينزلش عليكم العذاب.. كفاية المعجزات إللي شفتوها لحد دلوقتي😕

☆فاكرين ثمود قوم صالح😬
لما طلبوا معجزة الناقة زي ماكانوا عايزين بالضبط وزي ما وصفوها وبعدين كفروا برده فربنا عذبهم 👌

¤ممكن هنا حد يسأل:
هو مش المفروض إن الحواريين أصحاب عيسى عليه السلام دول هم المؤمنين المخلصين إللي على أعلى درجة من الإيمان؟
إزاي بقى يشُكّوا في قُدرة ربنا ويسألوا عن قدرة ربنا، وكمان بصيغة "هل يستطيع ربك" وكأنه هو رب عيسى عليه السلام بس ومش ربهم إللي بيعبدوه🤔

هوّ السؤال هنا يا جماعة مكنش سؤال استفهامي ومستنيين إجابة عليه بأيوة أو لأ،
لكن السؤال هنا كان لغرض إنهم يزدادوا إيمانا، زي إبراهيم عليه السلام لما طلب من ربنا إنه يشوف إزاي عز وجل بيحيي الموتى،
أو إن سؤالهم بالطريقة دي كان من باب التأدب مع الله مش الشك في قدرته،
يعني زي مثلا ولله المثل الأعلى لما يكون حد فينا معزوم عند حد وعايش دور الكسوف شوية😅
فنقول لأي حد من الناس إللي احنا عندهم:
تقدر تجيبلي مناديل؟
أو تقدر تجيبلي كوباية مية؟
هو يقدر أكيد، واحنا معندناش شك في ده،
لكن احنا لما طلبنا الحاجة بعِدنا عن أسلوب الأمر إللي هو: هات لي كوباية مية.. من باب الأدب يعني😁
فالحواريين استعملوا الأدب مع ربنا لما سألوا عيسى عليه السلام،
وقالوا هل ربك يستطيع إنه ينزّل علينا مائدة من السماء؟ يعني بدل ما يقولوا أنزل علينا مائدة من السماء؛ خلوها زي عَرض يا إما يُقبل أو لا يُقبل👌

فلما عيسى عليه السلام تخيل إن ده سوء أدب منهم أو شك منهم، وقال لهم اتقوا الله؛ بدأوا يوضحوا وجهة نظرهم وقالوا:
احنا جعانين وعايزين ناكل فدي فرصة مناسبة لكده،
وكمان بالمرة نطمن بآية جديدة تخص استجابة ربنا لدعاءك وإنك فعلا رسول من عنده ومش بتكذب علينا،
يعني لما تدعي ربنا بحاجة احنا إللي اقترحناها عليك ونشوف إن ربنا عز وجل استجاب لك؛
احنا كده هنبقى مطمنين أكتر إنك صادق بإنك نبي مقرب منه عز وجل💁‍♂️
كمان الناس بتكذّبك ياعيسى فاحنا هنشهد عندهم ونقول لهم إنك حققت لنا معجزة جديدة زي ما طلبنا بالضبط، معجزة مختلفة عن معجزاتك الطبية المعروفة👌
"قَالُواْ نُرِيدُ أَن نَّأْكُلَ مِنْهَا وَتَطْمَئِنَّ قُلُوبُنَا وَنَعْلَمَ أَن قَدْ صَدَقْتَنَا وَنَكُونَ عَلَيْهَا مِنَ الشَّاهِدِينَ"

☆يعني عيسى عليه السلام لما كان بيَشفي الأعمى مكنتش حاجة مقنعة بالنسبة لهم،
ولما كان بيحيي الموتى ويشفي الأبرص بإذن الله و...و... ده برده مكنش حاجة مقنعة كفاية، لكن الأكل هو إللي هيقنعهم بقى 😅

☆بالمناسبة ...عقيدة النصارى في إن عيسى عليه السلام كان إله أو ابن إله مكنتش موجودة إطلاقا في وجود عيسى عليه السلام،
وانتم شفتم الحواريين بيقولوا إيه، بيقولوا :
"ربك" مقالوش أباك الذي في السماء والكلام ده🙄
والآية إللي ربنا بيقول فيها:
"وَإِذْ قَالَ اللَّهُ يَا عِيسَى ابْنَ مَرْيَمَ أَأَنتَ قُلْتَ لِلنَّاسِ اتَّخِذُونِي وَأُمِّيَ إِلَٰهَيْنِ مِن دُونِ اللَّهِ"
دي مش في الدنيا، السؤال ده ربنا هيسأله لعيسى عليه السلام في الآخرة من باب إنه يُشهده على أمته إللي كفرت بالله عز وجل من بعده👌

عيسى عليه السلام بدأ يدعي ربنا إنه ينزل عليهم المائدة إللي طلبوها،
وربنا ذكر الدعاء إللي عيسى عليه السلام دعاه بالنص، مع إنه كان ممكن عز وجل يقول "ودعا عيسى ربه "وبس كده، لكن معنى إن ربنا أخبرنا بالدعاء بألفاظه يبقى ده معناه إن ربنا《يريد》 إنه يقول لنا رسالة 😊

☆بالمناسبة يا جماعة..مينفعش نقول ربنا 《عايز》 نقول ربنا 《يُريد》 كذا، لأن كلمة عِوَز في اللغة العربية بتدل على الحاجة وضيق الحال،
فمينفعش نستخدم كلمة زي كده مع رب العالمين حتى لو منقصدش المعنى السيء😅
أنا عارفة إنها كلمة بتتقال كده واتعودنا عليها،
لكن لازم نتأدب مع ربنا ونستعمل الألفاظ إللي تليق به،
هو لو واحد فينا بيتكلم مع مديره في الشغل ولا بيتكلم مع حد في مركز عالي هيتكلم معاه كده بأيّ كلام ولّا هيستعمل الكلام المناسب💁‍♂️
أهه ربنا أحق إننا نتكلم معاه بأدب 👌

نرجع للرسالة إللي ربنا 《يريد》 إنه يوصلها لنا من خلال دعاء عيسى عليه السلام😊
"قال عيسى بنُ مريم اللَّهُمَّ رَبَّنَا أَنزِلْ عَلَيْنَا م

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة
#علامات_الساعة_الصغرى
#الجزء_الثاني

عارف لما تبقى ماشي في الشارع وعينك تقع《فجأة》على بنت لابسة ملابس ضيقة ومبينة زينتها وأجزاء من جسدها؟
أهه التبرج إللي البنات بتعمله ده من علامات الساعة الصغرى👌
بمعنى إن《ظهور النساء الكاسيات العاريات》ده من علامات الساعة الصغرى،
ومعنى الكاسيات العاريات إن النساء دول لابسين ملابس؛ لكنها ضيقة ومفصّلة لأجسادهن فكأنها عارية أو لابسين ملابس خفيفة رقيقة مبينة لأجسامهن والجديد في عصرنا بقى و بقينا شايفينه؛ إن النساء بتلبس المقطع ومبينة جسمها،
وللأسف الصنف ده قال عنه رسول الله ﷺ:
صِنْفَان مِنْ أَهْلِ النَّارِ لَمْ أَرَهُمَا: وذكر منهم:
"نِسَاءٌ كَاسِيَاتٌ عَارِيَاتٌ مُمِيلَاتٌ مَائِلَاتٌ، رُؤُوسُهُنَّ كَأَسْنِمَةِ الْبُخْتِ الْمَائِلَةِ"《رواه مسلم》
تخيل إن النساء دول مكنوش موجودين أيام الجاهلية؟!
رسول الله ﷺ مشفهمش في حياته حتى قبل الإسلام، فلك أن تتخيل كمية الانحدار إللي وصل إليه تبرج النساء👌
ورسول الله ﷺ بيقول إن النساء إللي وَصْفُهم كده؛ لو ماتوا من غير 《توبة》هيكونوا من أهل النار والعياذ بالله😓
لأن إللي بيعملوه ده كبيرة من الكبائر، والكبيرة هي:
"هي التي وَرَد فيها وعيد خاص أو حَدٌّ في الدنيا أو عذاب في الآخرة"
يعني لما احنا اتكلمنا عن الناس إللي هيتعذبوا في القبر زي آكل الربا،
ده كان عمل كبيرة من الكبائر لأن له وعيد خاص زي ما شرحنا وشوفنا عذابه كان عامل إزاي،
أو السرقة مثلا، هي كبيرة من الكبائر لأن لها حَد في الدنيا وهو قطع يد السارق،
وكذلك التبرج وعدم لبس الحجاب الشرعي الصحيح هو كبيرة من الكبائر؛ لأن له عذاب في الآخرة وهو إن النساء دول هيكونوا من أهل النار👌
فانت لو ليك أخت أو زوجة أو بنت أو أي واحدة من محارمك مش لابسة حجاب شرعي ووصفهم زي ما جاء في حديث رسول الله ﷺ كده؛ انصحهم بالحُسنى إنهم يلتزموا بالحجاب الشرعي عشان ميدخلوش في حديث رسول الله ﷺ👌

¤طبعا مش محتاجة أفكرك بإنك لا يجوز لك إنك تقعد تبص للبنت المتبرجة👀
يجب عليك غض البصر مهما كانت هي لابسة إيه👌
ورسول ﷺ اتسأل عن نظر الفجأة فأمر بصرف النظر،
يعني تُدِير وجهك ولا تنظر مرة ثانية،
ومش معنى إن البنت لابسة اللبس المتبرج ده؛ يبقى ده مبرر ليكِ إنك متغضش بصرك عنها،
أيوة هي هتاخد ذنب التبرج وعدم طاعة ربنا بإنها لم تلبس الحجاب الشرعي؛
لكن انت برده هتتحاسب لو قعدت تبص عليها ومصرفتش نظرك عنها👌

وبما إن نساء كتير بقوا كاسيات عاريات وبيمشوا في الشوارع بالمنظر ده ورجال كتير بيشوفوهم؛ فالنتيجة الطبيعية لكده ظهور علامة تانية من علامات الساعة الصغرى وهي《انتشار الزنا》؛ لأن أعظم فتنة على الرجال هي النساء👌
فالشاب يشوف البنت فيعجب بجسدها فيحاول يوقعها في حباله باسم الحب وما شابه حتى يحصل ما لا يُحمد عقباه👌
وانتشار الزنا من العلامات إللي ظهرت بطريقة مرعبة في الفترة الأخيرة،
وبقى في مُجاهرة بالعلاقات المحرمة إللي المفروض إنها حصلت في السر حتى على مواقع التواصل الاجتماعي والموضوع للأسف بقى عادي جدا عند الناس إلا من رحم الله،
تخيل إن الزنا هينتشر وسط الناس لحد ما يوصلوا إنهم يستحلّوه والعياذ بالله😞
قال رسول الله ﷺ:
"ليكونن من أمتي أقوام يستحلُّون الحِرَ والحرير والخمر والمعازف"
《حديث صحيح-أخرجه البخاري موصولا》
والحِرَ معناه الزنا،
ولو انت متابع هتلاقي إن في زماننا دلوقتي الشاب له صاحبة والبنت لها صاحب إلا من رحم الله،
لأ وبيتفاخروا ويعلنوا ده وسط الناس، وبتخرج مع صاحبها عادي ويعملوا قصاد الناس ما يفعل الرجل مع زوجته في خلوتهم،
مع إن زمان كان نادرا لما تشوف بنت ماشية مع شاب،
ولو حصل؛ بتبقى مكسوفة وحاسة إنها بتعمل حاجة غلط،
لكن دلوقتي الآية اتعكست وبقى الطبيعي إن البنات يكون لهن أصحاب شباب،
وياريت الموضوع هيقف لحد هنا، ده هييجي اليوم إللي الرجل هيزني بالمرأة في الشارع كده علنا عادي ومحدش هيكلمه،
وهيكون أحسن واحد ساعتها هو إللي هيقول له :
لو إنك تزني بيها وراء الجدار أحسن!
متخيل إنه مش بينكر الزنا!
ده بيقول له ازني بس روح وراء الجدار مش في وسط الشارع،
وده كلام رسول الله ﷺ، قال:
"والذي نفسي بيده لا تفنى هذه الأمة حتى يقوم الرجل إلى المرأة فيَفْتَرِشُها في الطريق فيكون خِيَارهم يومئذ من يقول لو وَاريتها وراء هذا الحائط"《السلسلة الصحيحة》

أنا شخصيا لما كنت بسمع الحديث ده زمان كنت بستغرب إزاي ممكن الحال يوصل للدرجة دي!
لحد ما شفت الحال إللي وصلنا له وكل ده كان بالتدريج،
الشيطان مش بيزهق، هو بيحط البذرة ويفضل يرعاها ومعندوش مشكلة إنه يحصد الزرع بتاعه في الجيل إللي بعده👌
ربنا يعافينا ولا يجعلنا نحن ولا ذرياتنا بذرة أو حصاد😞

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة_عشر
#علامات_الساعة_الكبرى_الجزء_الرابع
#خروج_الدجال_في_آخر_الزمن

أشد السنوات هي الثلاث سنوات إللي بيسبقوا خروج الدجال،
ساعتها هيكون في فُرْقة واختلاف وفتن بين الناس،
وهيكون في فساد في أحوال الناس، وخفة من الدين ،وسوء ذات بين،
ويصيب الناس فيها جوع شديد، فالسنوات دي مفهمش مطر والماء على الأرض هيكون قليل جدا.

فاكر لما قلت لك إن من علامات الساعة الصغرى توقف نزول المطر؟ أهه في الثلاث سنوات إللي قبل خروج الدجال هتحصل العلامة دي،
في السنة الأولى تحبس السماء ثلث المطر،
والأرض هي كمان هتحبس ثلث النبات، وفي السنة الثانية السماء تحبس الثلث الثاني من المطر والأرض تحبس الثلث الثاني من النبات،
وفي السنة الثالثة تحبس السماء الثلث الثالث من المطر والأرض تحبس الثلث الثالث من النبات،
ومادام مفيش ماء يبقى مفيش زرع، فمش هيلاقوا أكل يأكلوه ولا مية يشربوها، حتى الحيوانات هتهلك إلا ما شاء الله،
قال رسول الله ﷺ:
"وإنَّ قبلَ خروجِ الدَّجَّالِ ثلاثَ سنواتٍ شِدادٍ ، يُصِيبُ الناسَ فيها جُوعٌ شديدٌ،
يأمرُ اللهُ السماءَ السنةَ الأولى أن تَحْبِسَ ثُلُثَ مَطَرِها، ويأمرُ الأرضَ أن تَحْبِسَ ثُلُثَ نباتِها،
ثم يأمرُ السماءَ في السنةِ الثانيةِ فتَحْبِسُ ثُلُثَيْ مَطَرِها، ويأمرُ الأرضُ فتَحْبِسُ ثُلُثَيْ نباتِها،
ثم يأمرُ السماءَ في السنةِ الثالثةِ فتَحْبِسُ مطرَها كلَّه، فلا تَقْطُرُ قُطْرةً،
ويأمرُ الأرضَ فتَحْبِسُ نباتَها كلَّه فلا تُنْبِتُ خضراءَ فلا يَبْقَى ذاتُ ظِلْفٍ إلا هَلَكَت إلا ما شاء اللهُ" 《صحيح الجامع》
والمقصود من ذات الظِلْفٍ هو الحيوانات، يعني الحيوانات كلها هتهلك إلا القليل،
فالصحابة لما سمعوا كلام رسول الله ﷺ سألوه عن الناس هيعيشوا إزاي ومفيش لا زرع ولا ماء ولا حتى حيوانات يأكلوها!

فقال لهم رسول الله ﷺ إنهم هيعيشوا على قول لا إله إلا الله والحمد لله والله أكبر، وهيقوم الذكر بمقام الطعام،
"قيل: فما يعيش الناس في ذلك الزمان؟
قال رسول الله ﷺ : التهليل والتكبير، والتحميد، ويجزئ ذلك عليهم مَجْزأة الطعام" 《صحيح الجامع》

◇وهنا في فائدة وهي إن الأذكار بتعطي قوة للبدن،
وده مش خاص بآخر الزمان فقط؛ لأ، ده خاص بكل زمان،
والدليل على كده إن فاطمة بنت رسول الله ﷺ لما جاءت واشتكت لأبيها رسول الله ﷺ وإنها عايزة خادم يساعدها في شغل البيت؛ قال لها رسول الله ﷺ:
"أَلَا أَدُلُّكِ علَى ما هو خَيْرٌ لَكِ مِن خَادِمٍ؟
تُسَبِّحِينَ ثَلَاثًا وَثَلَاثِينَ، وَتَحْمَدِينَ ثَلَاثًا وَثَلَاثِينَ، وَتُكَبِّرِينَ أَرْبَعًا وَثَلَاثِينَ، حِينَ تَأْخُذِينَ مَضْجَعَكِ"《صحيح مسلم》
يعني بيقولها إنه هيدلها على حاجة هي أحسن من الخادم، وهي إنها قبل ما تنام تسبح الله ثلاث وثلاثين مرة،
وتحمد الله ثلاث وثلاثين وتكبر أربع وثلاثين، فالحديث موضح إن الذكر فيه فائدة في تقوية البدن،
فحتى لو انت احتجت للي يساعدك في الأعمال فالحل إنك تُكثر من ذكر الله؛ لأن فيه قوة للبدن،
ودي حقيقة فعلا مش مجرد كلام وعن تجربة شخصية عشان محدش بس يستبعد الموضوع وإنه صعب أو مستحيل👌

☆انت بقى ممكن تستغرب وتقول:
هو مش احنا قلنا إن المهدي هيكون قبل الدجال، وإنه لما يحكم هيملأ الأرض عدل وربنا هيخرج له الثمار وينزل له الغيث من السماء؟
إزاي بقى يكون في قحط وقلة ماء وغذاء وفتن وفساد في أحوال الناس؟!!

شوف،
المسيح الدجال هيخرج في زمن المهدي، والمهدي هيكون حاكم عادل وهيملأ الأرض عدل، والعدل بييجي معاه كثرة الخير ونزول البركة من السماء،
لكن الوضع هيتغير قبل خروج الدجال بثلاث سنوات وربنا قادر، ومش معنى إن المهدي هيكون إمام عادل وخليفة راشد إن مش هيبقى في ناس فاسدين في الأرض وفي منافقين،
فقبل خروج الدجال هيكون في فتن تصيب الناس عشان تطلع إللي جواهم ويميز الله الخبيث من الطيب ويتميز أهل الحق عن أهل الباطل،
وفي ثلاث فتن هتحصل قبل خروج الدجال بزمن،
والفتن دي هي فتنة:《الأحْلاس، والسَّرّاء، والدُّهَيْمَاء》
وكنتيجة للفتن الثلاث دي؛ هينقسم الناس لفريقين:
فريق مؤمن لا نفاق فيه، وفريق منافق لا إيمان فيه،
والمؤمنين هم إللي هيقاتلوا الروم وينتصروا عليهم ويفتح الله عليهم القسطنطينية وروما وغيرها من البلاد،
ومتنساش إن المهدي هيحكم سبع أو ثمان سنوات،
فممكن لما يحكم هيقدر يملأ الأرض عدل وتفضل الفتن والاختبارات مستمرة عشان يحصل التمايز بين المؤمنين وغيرهم،
لأن المنافقين مش بيظهروا غير في عزة الإسلام وقوته،
فإزاي ربنا يُظهر إللي في قلوبهم غير بالابتلاءات والفتن زي ما حصل في غزوة أحد وما بعد غزوة أحد وإللي حصل في غزوة الأحزاب👌
فمن حكمة ربنا إن يكون في ابتلاءات وشدائد قبل الدجال عشان المؤمنين يتعلقوا بالله فتثبت قلوبهم في الامتحان الأكبر.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة_والعشرون
#المرحلة_الثالثة_اليوم_الآخر
#الأحداث_في_أرض_المحشر_الجزء_الأول
#اقتراب_الشمس_من_الرؤوس

اتكلمنا المرة إللي فاتت عن سَوْق الناس لأرض المحشر،
بعد ما بقى يوصلوا لأرض المحشر؛ الناس بصفة عامة هيقفوا في أرض المحشر بمقدار خمسين ألف سنة من حسابات الدنيا،
يعني يوم القيامة إللي هيكون فيه الناس واقفين وهيتحاسبوا فيه هو يوم واحد فقط، لكن اليوم ده يساوي خمسين ألف سنة من حسابتنا في الأرض، وبعدها يكون الخلود إما في الجنة أو في النار،
وبكده تقدر تفهم كويس معنى آية:
"إِنَّهُمْ يَرَوْنَهُ بَعِيدًا وَنَرَاهُ قَرِيبًا" 《سورة المعارج 》
يعني الواحد حتى لو عاش مائة سنة فهي مش هتيجي حاجة بجانب الخمسين ألف سنة،
فلو حاولنا نحسبها هنلاقي إن المائة سنة دي مش هتكمل دقائق معدودة في الخمسين ألف سنة👌
والانتظار والوقوف خمسين ألف سنة ده إللي هيحس بيه هم الكفار والمنافقين والمجرمين، عشان كده هيقولوا يوم القيامة عن المدة إللي عاشوها في الدنيا:
"لَبِثْنَا يَوْمًا أَوْ بَعْضَ يَوْمٍ"《سورة المؤمنين آية(113)》
والحكمة من الوقوف الطويل ده هو تعذيب الكفار على كفرهم.

أما بالنسبة للمؤمنين فهتكون فترة الخمسين ألف سنة دي زي المدة إللي ما بين الظهر والعصر،
قال رسول الله ﷺ:
"يوم القيامة على المؤمنين كقدر ما بين الظهر والعصر"
《صححه الألباني في صحيح الجامع》
وربنا قال:
"أَصْحَابُ الْجَنَّةِ يَوْمَئِذٍ خَيْرٌ مُسْتَقَرًّا وَأَحْسَنُ مَقِيلا"
《الفرقان آية(24)》
فهنا الآية تدل على انتهاء الحساب في نصف نهار؛ لأن المقيل هو فترة القيلولة أو مكانها، وهي الاستراحة إللي بتكون في نصف النهار في الحر.
فالفترة دي هتكون هيّنة على المؤمنين ومش هيحسوا بطولها زي الكفار.

طبعا في موقف الحشر ده الدنيا زحمة جدا وكل واحد لا يملك غير موضع قدميه، وهنا الشمس هتقرب من رؤوس البشر بقدر ميل،
قال رسول الله ﷺ:
"تدنو الشمسُ يومَ القيامةِ من الخلقِ ، حتى تكونَ منهم كمقدارِ مَيلٍ ،
فيكون الناسُ على قدرِ أعمالهم في العَرقِ ،
فمنهم من يكونُ إلى كعبَيه ، ومنهم من يكون إلى ركبتَيه ، ومنهم من يكون إلى حِقْوَيه ، ومنهم من يلجُمه العرقُ إلجامًا"
《صحيح الجامع》
والميل يساوي حوالي كيلو وستمائة متر، وعشان بس الصورة تكون واضحة؛ المسافة بين الأرض وبين الشمس في وقتنا الحالي تساوي مائة وخمسين مليون كيلو متر،
يعني لما تجرب شدة الحر في فصل الصيف وتبقى مش قادر تستحمل الحرارة، وتقعد تدور على مكان ظل تلجأ له، وتدوّر على مية ساقعة تشربها؛ تخيل إن الحر ده والشمس بعيدة عن الأرض بملايين الكيلو مترات ،
فما بالك شدة الحر والتعب هتكون أد إيه لما تقرب المسافة وتكون كيلو وستمائة متر فقط من غير ما يكون في ظل ولا ماء والناس خارجة من القبور عطشانة؟!!!

وطبعا معنى إن في شمس؛ يبقى في عرق👌
والعرق هيكون شديد جدا مش بس بسبب الشمس؛ لكن كمان بسبب الزحمة، فكل واحد ملوش غير موضع قدميه، وكمان هيكون بسبب الخوف والفزع؛ لأن الإنسان إذا خاف وفزع؛ ينزل منه العرق،
والعرق هنا هيكون بحسب الأعمال زي ما قال رسول الله ﷺ:
"...فيكون الناسُ على قدرِ أعمالهم في العَرقِ ،
فمنهم من يكونُ إلى كعبَيه ، ومنهم من يكون إلى ركبتَيه ، ومنهم من يكون إلى حِقْوَيه ، ومنهم من يلجُمه العرقُ إلجامًا"
《صحيح الجامع》
يعني إللي هينجو من العرق هو إللي عمل أعمال صالحة، فبقدر الأعمال يكون العرق، لو الأعمال الصالحة كثيرة يكون العرق أقل، ففي إللي هيبلغ العرق لحد كعبه،
وفي إللي هيوصل عرقه لحد ركبتيه ولحد وسطه، وفي إللي هيبقى غرقان في عرقه والعياذ بالله😞

لكن مع كل هذا في سبع أصناف من الناس وضعهم هيكون مختلف، السبعة أصناف دول ربنا هيظلهم تحت ظل عرشه فلن يشعروا بحر الشمس ولن يتأثروا بالعرق👌
قال رسول الله ﷺ:
"سَبْعَةٌ يُظِلُّهُمْ اللَّهُ فِي ظِلِّهِ يَوْمَ لا ظِلَّ إِلا ظِلُّهُ :
الإِمَامُ الْعَادِلُ ، وَشَابٌّ نَشَأ فِي عِبَادَةِ رَبِّهِ ،
وَرَجُلٌ قَلْبُهُ مُعَلَّقٌ فِي الْمَسَاجِدِ ، وَرَجُلَانِ تَحَابَّا فِي اللَّهِ اجْتَمَعَا عَلَيْهِ وَتَفَرَّقَا عَلَيْهِ ،
وَرَجُلٌ طَلَبَتْهُ امْرَأَةٌ ذَاتُ مَنْصِبٍ وَجَمَالٍ فَقَالَ إِنِّي أَخَافُ اللَّهَ ،
وَرَجُلٌ تَصَدَّقَ بِصَدَقَةٍ فَأَخْفَاهَا حَتَّى لا تَعْلَمَ شِمَالُهُ مَا تُنْفِقُ يَمِينُهُ ، وَرَجُلٌ ذَكَرَ اللَّهَ خَالِيًا فَفَاضَتْ عَيْنَاهُ "
《رواه البخاري ومسلم》

☆أنا هشرح الحديث شرح سريع بحيث نقدر نكون أي صنف من السبعة دول فيظلنا الله تحت ظل عرشه يوم القيامة👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة_والثلاثون
#المرحلة_الثالثة_اليوم_الآخر
#الأحداث_في_أرض_المحشر_الجزء_الحادي_عشر
#لا_تكن_منهم_الجزء_الأول

اتكلمنا المرة إللي فاتت عن الحوار إللي هيحصل بين المستكبرين والمستضعفين في وقت الحساب،
وشوفنا إزاي إن المستكبرين تبرأوا من المستضعفين وقالوا لهم إنهم ملهمش ذنب في ضلال المستضعفين وإن السبب في ضلالهم هو إجرام المستضعفين أنفسهم،

فهيرد المستضعفين ويقولوا:
"بَلْ مَكْرُ ٱلَّيْلِ وَٱلنَّهَارِ إِذْ تَأْمُرُونَنَآ أَن نَّكْفُرَ بِٱللَّهِ وَنَجْعَلَ لَهُۥٓ أَندَادًا"
《سورة سبأ آية(33)》
يعني بيقولوا لهم:
لاااا،
ده إللي أوقعنا في التهلكة ووصّلنا للي احنا فيه دلوقتي ده هو تدبيركم الشر لنا في الليل والنهار😑
فكنتم بتحسّنوا لنا الكفر وتزيّنوه وبتدعونا له وتقولوا إن ده هو الحق وفي نفس الوقت كنتم بتشتموا في الحق وتشوّهوا صورته وتشوهوا صورة إللي بيدعوا للحق،
وكنتم بتقولوا عن الحق إنه باطل، فاستمريتم في خداعنا وتدبير الكيد لنا لحد ما أغويتونا وفتنتونا وأبعدتونا عن الحق😤

والنتيجة المتوقعة بعد الجدال بين المستكبرين والمستضعفين هي الندامة على إللي عملوه🤷
فكل فريق ندم على أفعاله وكل فريق تبرأ من صاحبه لما شافوا العذاب إللي متجهز لهم، وتمنى كل واحد أَنْ لو كان على الحق،
وتمنى أَنْ لو ترك الباطل الذي أوصله إلى هذا العذاب، وكل واحد عرف إنه ظالم مُستحق للعذاب،
والندم ده أسرّوه في صدروهم ولم يظهروه لخوفهم من الفضيحة لو أقروا على أنفسهم الخطأ.
قال تعالى:"وَأَسَرُّوا النَّدَامَةَ لَمَّا رَأَوُا الْعَذَابَ"
《سورة سبأ آية(33)》

هنسيب بقى المستكبرين والمستضعفين بيتخانقوا مع بعض وكل واحد بيرمي اللوم على التاني ونروح نشوف رحمة ربنا مع عبد من عبيده سبحانه، قال رسول الله ﷺ:
"يُؤْتَى برجلٍ يَومَ القِيامَةِ،
فيُقالُ: اعْرِضُوا عليه صِغارَ ذُنُوبِهِ، وارْفَعُوا عنْه كِبارَها، فَتُعْرَضُ عليه صِغارُ ذُنُوبِهِ،
فيُقالُ: عَمِلْتَ يَومَ كَذا وكَذا كَذا وكَذا، وعَمِلْتَ يَومَ كَذا وكَذا كَذا وكَذا،
فيَقولُ: نَعَمْ، لا يَسْتَطِيعُ أنْ يُنْكِرَ وهو مُشْفِقٌ مِن كِبارِ ذُنُوبِهِ أنْ تُعْرَضَ عليه،
فيُقالُ له: فإنَّ لكَ مَكانَ كُلِّ سَيِّئَةٍ حَسَنَةً، فيَقولُ: رَبِّ، قدْ عَمِلْتُ أشْياءَ لا أراها هاهُنا."《صحيح مسلم》

يعني يوم القيامة ربنا هيأمر الملائكة إنها تعرض على رجل صغائر الذنوب إللي عملها ويُخفوا عنه الكبائر،
فيبدأوا يعرضوا عليه ذنوبه بالتفصيل، عملها امتى وإزاي، فيقولوا انت عملت الذنب الفلاني في الوقت الفلاني،
فيُقر العبد ده بذنوبه وميقدرش ينكرها، وفي نفس الوقت هو قلقان وخايف من كبائر الذنوب إللي لسه متعرضتش عليه،
يعني وكأنه بيقول في نفسه لما هم بيحاسبوني على الصغائر دي واحدة واحدة؛ أمّال لما يشوفوا الكبائر هيعملوا إيه😣

لكن تيجي النتيجة بعكس ما كان متوقعها وتدركه رحمة الله عز وجل👌
فيُقال له إن السيئات دي هتتبدل لحسنات برحمة من الله، فيبقى مكان كل سيئة حسنة، فيقوم يقول أنا عندي ذنوب تانية مش موجودة هنا😥

هو قال كده عشان عايزها هي كمان تتبدل للحسنات، فهو أقر بالكبائر دي من غير حتى ما تتعرض عليه، فضح نفسه يعني😅
لكن طمعه ورغبته في رحمة الله جعلته يفضح نفسه كده😊
وزي ما قال أيوب عليه السلام من قبل:
ومَن يَشبع من رحمتك يارب👌

بكده نقدر نقول إن احنا عندنا ثلاثة أصناف من الناس يوم القيامة بالنسبة للحساب:
1️⃣الأول: صنف هيدخلوا الجنة بغير حساب وعرفناهم.

2️⃣الثاني: صنف لا يُناقشون الحساب ولكن مجرد عرض الأعمال عليهم ثم يدخلوا الجنة، وشوفنا مثال للصنف ده.

3️⃣الثالث:
صنف يُناقشون الحساب ويُسألون فيه عن أعمالهم، وده يدخل فيه الكافر والمنافق زي ما شوفنا برده أمثلة عليهم،
ويدخل في الصنف ده برده بعض عصاة المُوَحِّدين إللي هيُحاسبوا محاسبة من تُوزن حسناته وسيئاته وهيدخلوا النار يعذبوا فيها مدة معينة على حسب ذنوبهم وبعدين يدخلوا الجنة ويعيشوا فيها للأبد، ودول هنشوف أمثلة عليهم بعدين إن شاء الله.

تخيل بقى إن مع سعة رحمة ربنا وعدله وفضله ففي أصناف من البشر اختاروا إنهم يخرجوا من رحمة الله بعصيانهم له سبحانه😞
فطردهم الله من رحمته ولن ينظر إليهم عز وجل يوم القيامة نظر رَحْمةٍ وعطْفٍ وإحسانٍ،
ولن يكلمهم بكلام رضا أو تكريم ولا كلام يسرّهم،
ولا يُطهِّرُهم مِنَ الذُّنوبِ بالمَغفرةِ، ولا يُثْني عليهم، بلْ يَسخَطُ عليهم ويَنتقِمُ منهم، ولهم منه عَذابٌ مُوجِعٌ بسَببِ ما فعلوه من كبائر،
فكلَّ مَن حُرم نظر الله عز وجل إليه؛ فإن له نصيبًا من الوعيد الأكيد والتهديد الشديد، وصاحبه مستحقٌّ للعذاب الأليم👌

تعال نشوف مين الناس دي عشان تشوف نفسك إذا كنتَ أو كنتِ حد منهم وتلحق نفسك وتغيّر قبل فوات الأوان 👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة_والأربعون
#المرحلة_الثالثة_اليوم_الآخر
#الأحداث_في_أرض_المحشر_الجزء_العشرون
#الصراط_وأحوال_الناس_عليه_الجزء_الأول

قلنا في الحلقة إللي قبل إللي فاتت إن المؤمنين هيسجدوا لله عز وجل بعدما يكشف عن ساقه سبحانه،
ثم يأمرهم برفع رؤسهم ثم يُعطي لهم نورا على قَدْرِ ما كانوا عليه في الدُّنْيا من الأعْمالِ الصالِحَةِ والخيْرِ،
ويُؤخذ الكفار إلى النار زي ما شرحنا الحلقة إللي فاتت، فكده يتبقى في أرض المحشر كل مَن ينتسب إلى الإسلام، سواء المؤمنين أو المنافقين أو العصاة من الموحدين،
ثم يدعوهم الله عز وجل فيتبعونه ويأخذهم إلى حافة جهنم، يعني على طرفها كده،
قال رسول الله ﷺ:
"ثم يتبعونه وعلى جسر جهنم كَلالِيب وحَسَك تأخذ من شاء الله"
《رواه مسلم》
في الوقت ده تحديدا هتتبدل الأرض والسماوات التبديل الثاني إللي كنا اتكلمنا عنه في الحلقة الثامنة والعشرون،
وقلنا إن السيدة عَائِشَةَ قَالَتْ:
" سَأَلْتُ رَسُولَ اللهِ ﷺ عَنْ قَوْلِهِ عَزَّ وَجَلَّ:
"يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ"{إبراهيم آية48}
فَأَيْنَ يَكُونُ النَّاسُ يَوْمَئِذٍ يَا رَسُولَ اللهِ؟
فَقَالَ: عَلَى الصِّرَاطِ" 《رواه مسلم》
وقال في حديث تاني لما اتسأل نفس السؤال:
"هم في الظُّلمَة دون الجسر"《رواه مسلم》

فالتبديل هيكون إما والناس منتظرين للمرور على الصراط أو أثناء مرورهم فعلا👌
يمر بقى كل مَن ينتسب إلى الإسلام سواء من أمة الإسلام أو الأمم السابقة بالمرحلة السابعة وهي《الصراط》أو الجسر👌

1️⃣أولا: وصف الصراط:
الصراط ده عبارة عن جسر والجسر في حياتنا الدنيا معناه ممر مُعلّق، الناس بتستعمله عشان تعبر عليه من مكان لآخر بينهما عائق،
زي كده لما يكون في أرضين بينهما مياه، فبيتم عمل جسر عشان الناس تمر عليه وتروح الناحية التانية،
فكذلك الصراط هو الجسر إللي الناس هتعدي عليه يوم القيامة عشان توصل للجنة، فالصراط هو جِسْرٌ يفصِلُ بينَ النَّاسِ وبينَ الجنَّةِ👌

والجسر ده هيكون ممدود فوق جهنم وهو جسر رقيق مِثلَ حَدِّ السَّيفِ وله جنبتان وحافتان، يعني له ناحيتين زي الجسور إللي احنا عارفينها،
والحافتين دول بيتحركوا ويتلاعبوا بالناس فتُسقطهم في النار بعضهم فوق بعض، يعني هو يضطرب كما تضطرب السفينة بأهلها إذا كانت الرياح عاصفة،
قال رسول الله ﷺ:
"يُحمَل الناسُ على الصراط يوم القيامة فَتَتَقادع بهم جنبتا الصراط تَقَادُعَ الفراشِ في النار"《حديث حسن》

وعلى الجسر ده يوجد خَطَاطِيفُ وَكَلاَلِيبُ وَحَسَكَةٌ مأمورة بأخذ مَن أُمِرت به، يعني في ناس هتخطفهم الكلاليب والخطاطيف دي وترمي بهم في جهنم،
قال رسول الله ﷺ:
"عَلَيْهِ خَطَاطِيفُ وَكَلاَلِيبُ، وَحَسَكَةٌ مُفَلْطَحَةٌ لَهَا شَوْكَةٌ عُقَيْفَاءُ، تَكُونُ بِنَجْدٍ، يُقَالُ لَهَا: السَّعْدَانُ"《صحيح البخاري ومسلم》

الكلاليب: جمع كَلوب، وهو حديدة معطوفة الرأس يُعلّق عليها اللحم بتشوفوها عند الجزارين بتبقى عاملة زي علامة الاستفهام المقلوبة كده👈 ¿

والخُطَّاف: الحديدة المُعوجة كالكلوب يختطف بها الشيء، زي الحديدة إللي بتكون في صنارة الصيد وبيصطادوا بيها السمك👌

والحَسَكَة: شوكةٌ صلبةٌ معروفة، وقيل أنها نبات له ثمر خشن يتعلق بأصواف الغنم وهي عريضة مُعوَجّة،
يعني رسول الله ﷺ بيحاول هنا يقرّب لهم معنى: إزاي الكلاليب والخطاطيف دي بتمسك في أجساد الناس وإنها لو مسكت في حد مش هتسيبه👌
قال رسول الله ﷺ:
"و في حَافَّتي الصراط كَلاليب مُعلّقة مأمورة بأخذِ مَن أُمرت به"
《رواه مسلم》

وطبعا سهل جدا هنا تنزلق الأقدام وتسقط من عليه الأجساد والأرجل،
قال رسول الله ﷺ عن الصراط أنه:
"مَدْحَضَةٌ مَزِلَّةٌ"《رواه البخاري ومسلم》
مَدْحَضَةٌ يعني تنزلق فيه الأقدام، يعني هو طريق بيزحلق،
ومَزِلَّةٌ معناها تسقط فيه الأجساد والأرجل.

خليني أقرب صورة الصراط أكثر بشيء من الدنيا،
شوف كده لما تكون بتلعب لعبة عبارة عن إنك تعدي من على طريق متعلق رفيع كده وموجود تحت الطريق ده ماء أو نار وخلال مانت بتعدي من على الطريق في عوائق بتتمرجح في الهواء بتطلع لك من اليمين والشمال و المفروض إنك تتفاداها عشان توصل لنهاية طريقك؛
أهه ده أقرب تصور للموضوع، بس طبعا مع الفارق الكبير ربنا يعافينا😞
ومع كل ده بقى فالناس لاااازم تعبر من عليه، يعني مش حاجة اختيارية بالنسبة لهم، ده أمر ربنا محدش هيقدر يهرب منه،
والكل هيعدي عليه حتى الأنبياء والصالحين وحتى إللي هيدخلوا الجنة بغير حساب👌
يعني كلنا بلا استثناء هنعدي من على الصراط فوق جهنم😢