• عم احكيلكن عن شوية تجارب عملتا بالبيت، كلها رح احكي عنها بالقناة بإذن الله 💕.

وكلها عنجد حلوة، سواء كان الإنسان عندو اهتمام بالموضوع أو لاء، حلو تنعرف كثقافة عامة.

بس خَلِّص تحضير السماد اللي عم ساويه حاليا، رح انشرلكن عنو أول شي 😁♥️.

#تجربة.
#مايا_بركات.

@MayaDreamer.

• هالفكرة توصلت إلها من أسبوع بعد ما كنت علقانة بموقف معين صاير معي من فترة وما عم اقدر اطلع منو،

وفعلاً غيرتلي تفكيري كلو بعد ما أدركتا، وعرفت الغلط الكبير اللي عم اعملو بدون وعي وبلشت صحح فكرتي من وقتا 💕.

إن شاء الله تستفيدوا من الكلام.

#مايا_بركات.

@MayaDreamer.

• حابة نوّه لموضوع مهم ومنتشر
وضروري جداً احكي عنه
وعم احكي هالحكي كنصيحة من قلبي
وبالنهاية القرار إلكن بعد ما تسمعوني..

في موضوع منتشر بكترة كمحتوى
وبنظري أنا.. هو شي كتير خطير
لأن عم يندسّ متل السم بالعسل
وكتير بنات ما فهمانين شو الأصل منه
وعم يقتدوا بغيرهن بدون تفكير 🤷🏼‍♀.

فيا أصدقائي الجميلين:
علم الطاقة الروحية، الجذب،
الإسقاط النجمي، الأفلاك، الأبراج..

كل هدول علوم زائفة،
والمعلومات فيها مبنية ع وهم
وما بتتقاطع مع العلم الحقيقي أبداً،
وكتير علماء نفوها،
وبالتالي.. ما في شي اسمو علم طاقة!

وهالقصص كلها بتزعم إنو في طاقة بهالكون
ونحن منقدر نجذبها إلنا
وبعدين..
ممكن نصير سوبرمان وبجوز نقدر نطير!


(وكمثال على كلامي..
ممكن تلاقوا هالأشخاص كاتبين:

هالسنة سنة المال، ولنجذب المال خلونا نقول
سأصير غنية، سأصير مليونيرة، أنا أم الأموال..

أو هالسنة سنة الجمال، سأصير مدهشة
سأصبح فاتنة الجمال وسأحب نفسي..

وهالشهر رح يكون عبارة عن شهر الدهاء
وسرعة اتخاذ القرار، ورح نقدر نساوي كذا
بس لازم نركز حتى نوصل لنتيجة..
وكتير جمل غريبة ومالا منطقية؟)

وأهم من هيك، بيخلطوا بكلامهن
الدين والإيمان والثقة بالله،
بس بمسميات بتخصهن إلهن، كتير سيئة
فاللي بيقرالهن بقول واو!
ليكوا شو إيمانا قوي
وشو عندها ثقة بما سيأتي من الله!!!

صدقاً وقت اقرأ حدا كاتب عن هيك أشياء
بحس حرفيا قشعر بدني من الكلام
وبحس عقلي عمل Error..

أنا ما بدي احكي عن الموضوع بشكل شخصي
بس ديروا بالكن من هالأفكار
لأنها بتخلي عقيدتك كمسلم تتشوه شوي شوي
وهيّ أساساً مأخودة من الوثنية والبوذية
وكلها تخبيص ووهم زائف وخرافات..
كأن عم يخلوا الكون والطاقة اللي فيه
تشارك الله بمُلكه وتسيير الأمور حاشى لله!

أنا بس حبيت انصح
لأن مستغربة من الجهل المنتشر
وبدي فَتِّح عقول اللي ما منتبهين للموضوع.

وكمان بدي نبه عشغلة عالسريع،
إنو اللي بصدق الأبراج وبيسمعلهن
_ولو من باب التسلية_ لازم يعرف
إنه لا يُثاب على الصلاة اللي عم يصليها ٤٠ يوم.

#قال_رسول_الله ﷺ: (من أتى عرافا فسأله عن شيء فصدقه لم تقبل له صلاة أربعين يوما). رواه مسلم.

حبيت صحح مفهومكن عن هالقصص،
لأن هالموضوع مالو شغلة عابرة
وكل هالأفكار عم لاقي المراهقين متبنيينها
فما قدرت اسكت عن الموضوع أكتر من هيك!

#مايا_بركات.
#نصيحة_مايية 🩶.

• تعلمت هذه الفترة أن الإنسان لديه عاطفة تفيض وتتدفق في كل تفصيل صغير في هذه الحياة.. وأننا نستطيعُ تجديد عواطفنا كل يوم بطرقٍ لا تعدّ ولا تحصى، ومشاعرنا لم تزرع بنا ليحصدها بشرٌ فقط، وإنما خلق الله لكلّ منا قلباً قادراً على ضخ الحياة في كل جزء في هذا الكون..

وأنا اليوم.. أشعرُ بأنّي أمّ لكل نبات نما عندي، فأجدُ عيناي تفيض من الحبّ عند النظر لما زرعت يداي وأحسُّ بأن روحي تعانقها لتنمو بحبّ أكثر.. فأزداد تعلقاً بها، وأجدني مستعدة لبذل كلّ اهتمامي كي أراها تكبُر أمام عينيّ.

أحبّ أن بإمكاننا نشرُ الحبّ بألف طريقة، وأن الأشخاص ليست فقط من تستحقُ هذه العواطف الحنونة.. وأنّ كلَّ ما في الكون مستعدٌّ لاستقبال موجات السعادة التي تصدرُ عنّا.

- #مايا_بركات ♥️🌱.

شوية حكي عن سماع الأغاني ونشرها بالقنوات..

عشوائي ومو مرتب حكيي هالمرة
بس كان لازم احكي عن الموضوع 😁♥️.

#مايا_بركات.

@MayaDreamer

• يا رب لا تسلب مني دهشتي للأشياء، لا تدع الحياة تسلبني شغفي، لا تسلب حبّي الكبير، ذاك الحبّ الذي ما إن لامس الأشياء أعادها للحياة من جديد.
اسقني بعنايتك الفاضلة وخلّد عطري على مرّ الزّمان. 🌱

- #مايا_بركات.

• رح تنصدموا غالباً من المعلومات اللي رح احكي عنها حالياً.. ركزوا معي 💕:

أغلبنا منستهلك السكريات خصوصاّ السكر الأبيض بصناعة الحلويات، وتحلية القهوة، الشاي.. وأغلب المشاريب، غير أكلات الطيبة والشوكلايات اللي ما منقدر نوقف أكلهن.

🍬 جربنا نسأل حالنا شي مرة شو تأثير السكر عأجسادنا؟ وليش آخر فترة أغلب الأطباء وإخصائي الأغذية عم يحكوا عن ضرورة قطع السكر أو التقليل منه؟

🍬 رح بلش بالحديث عن الإيجابيات، حتى نتشجع على التخفيف من كميات تناول السكر:

وهلأ.. رح اعرض أبرز 8⃣ إيجابيات بتم تحصيلها وقت نقلل تناول السكر، وآخر شي رح احكي كيف بخف الاكتئاب لما نقلل أكل السكر:

1⃣ رح تفقدي وزنك وحيكون في سهولة أكبر للحفاظ عليه:
وببداية الدايت، رح نشوف نزول كبير بالوزن.. لأن السكر بيربط ٤ جزيئات ماء، بينما الدهون بتربط جزيئة ماء واحدة، وبالتالي بكون الجسم فيه كميات ماء كبيرة نتيجة ربط السكر لهالماء.

بالإضافة وقت نقلل سكر، رح يتم حرق السكر الموجود بالدم ورح تقل كميات السكر الزايدة المخزنة بالجسم على شكل دهون.

2⃣ رح تزيد مناعتك، وبالتالي رح يبطل في نزلات برد كتير ورح تبطل تمرض كتير متل قبل.

3⃣ رح تلاحظ تحسن بصحتك العقيلة والمعرفية:
ولأن زيادة نسبة السكر في الدم.. ممكن تسبب التهاب بالدماغ.. وبالتالي لما نقلل سكر، رح يبطل في تأثير سيء على ذاكرتنا، ورح تتحسن صحتنا الإدراكية والوظيفية بالدماغ.

4⃣ رح تتحسن بشرتك، ورح يخف ظهور حب الشباب والبثور والطفح الجلدي والندبات والبقع على بشرتك.. وهالشي بسبب تدمير السكر لمادة الكولاجين المتواجدة بالبشرة واللي بتعطيها النضارة.. وبالتالي بس خففنا سكر رح تبطل البشرة باهتة ومترهلة وفيها ندوب.

5⃣ رح تبطل تجوع كتير، وما رح تكون شره للأكل، ورح تستقر رغبتك بالأكل:
زيادة محتوى السكر بالدم، خصوصاً عند الأشخاص اللي عندهم سمنة أول اللي عندهم مقاومة للأنسولين ( الأنسولين: هو هرمون بساعد الجسم على إدخال السكر إلى الخلايا لما يكون في سكر كتير بجسمنا) فلما الأنسولين ما عاد يقدر ينظم السكر بالدم.. رح يضعف عمل هرمون تاني بسموه اللبتين، وهالهرمون وظيفتو إرسال إشارات للدماغ عن (إيمتى وأديش لازم ناكل)..
فهون رح نصير ناكل أكتر من قبل.. ويصير عنا شراهة ورغبة كبيرة بتناول السكر!

6⃣ رح تصير مستويات الطاقة عندك أكبر!
وبالتالي رح يخف الإرهاق اللي بيجي ولو بدون عمل بدني صعب، ورح يبطل في تعب بدون سبب.

7⃣ رح يتنظم نومك ويتحسن:
لأن زيادة السكر بالجسم رح ترفع هرمونات التوتر بالدم، وهاد الشي بأثر عالنوم، وممكن يسبب "تعرق ليلي".. وبالتالي تقليل السكريات، رح يحفز النوم بشكل أفضل.

8⃣ رح يتحسن مزاجك، ورح يخف الاكتئاب، لأن السكر بيعطي دفعة طاقة بشكل سريع ومباشر، وبالتالي بيعطي شعور بالسعادة مؤقت ورح يصير جسمنا يطلب سكر أكتر لينبسط أكتر.. أما لما نقلل سكر، رح تتحسن صحتنا النفسية ورح نحس بسعادة بعد قطع السكر بأسبوعين تقريبا..

🍬 ورح اختم الكلام، بسبب ارتباط السكر الأبيض بالاكتئاب:

• السكر الأبيض حتى صار أبيض تم تكريره وتنقيته كتير حتى صار هيك، وبالتالي في دراسة حكت عن الأشخاص اللي بتستهلك الأطعمة المصنعة والمكررة بإنهم أكتر عرضة للاكتئاب.

• متخيلين إنو السكر بسبب إدمان أكتر من الكوكايين!
لأن السكر بيعطي حلاوة شديدة، قام بحفز مركز المكافأة بالدماغ وقد تكون هالمتعة اللي عطانا ياها السكر أكتر من الكوكايين.
فمنصير بدنا ناكل سكر أكتر ومنصير مدمنين ولما ما نقدر ناكل مننزعج ومنكتئب.

• اللي بسبب الاكتئاب هو نوع الكربوهدرات اللي مناكلها، مو الكمية.. وبعد أبحاث وجدنا إنو قد تكون السكريات البسيطة هي أحد أسباب الاكتئاب... بينما السكر اللي بالفواكه مفيد جداً.

وبعد كل هالكلام.. يا ترى قادرين تسيطروا على رغبتكم بتناول السكر.. وتبلشوا تخففوا؟

- #مايا_بركات 🍀.

#يتبع.
#تغذية.

• "تناول الخضار والفاكهة اللي بتتميز بحجم كبير ونضج مبكر قد تؤدي لحدوث انهيارات عصبية وعقم ومضاعفات عصبية!"

استغربتوا صح؟ طيب بتعرفوا شو اللي بخلي الخضار والفاكهة المليانة فوائد تتحول لطعام فيه سمّية ومخاطر؟

سؤال صغير قبل ما نفوت بالكلام المهم..
شي مرة استغربتو كيف وليش حبة البطاطا أو الخيار عم تكون عملاقة كتير، أو مثلاً كيف عم تكون ثمرة بطيخ الوحدة عم توصل لل١٥ كيلو وأكتر شوي؟

طبعاً.. عدد كبير مننا بفضل لما يشتري الحبات اللي حجمها كبير، ومنفكر نحن إنو هالحجم سببه إنو الثمار بتكون أكتر نضج وأفضل ونتجت بسبب عناية كبيرة من الفلاح.

بس للأسف هاد النمو يعتبر غير طبيعي، وأغلبية الخضار والفاكهة اللي بهالمواصفات بتسبب خطر كبير على صحتنا، ولتعرفوا السبب كملوا معي للأخير.

بالسنوات الأخيرة تزايدت أعداد السكان فصار الضروري نضاعف الغذاء ليكفي لكل هالأعداد،

قام لقوا طريقة بتعطي إنتاج مبكر وسريع، وأحجام ملفتة للمستهلكين عن طريق "حقن الخضار والفاكهة بالهرمونات" قبل تنزيلها بالأسواق متل هرمون الأوكسيتوسين اللي بزيد إنتاج النباتات، وبسرّع نموها، وبالتالي رح نشهد نضج قبل بوقت، وكمان في هرمونات تانية مستخدمة متل: الإستروجين.

طيب شو هو هرمون الأوكسيتوسين؟
هو هرمون بساعد على در الحليب عند المرأة وكمان عندو نشاط مقوي لتوتر الرحم، وبيتشكل عند الثديات بشكل طبيعي..
بس لما نحقن هالهرمون بالنبات شو حيصير؟

رح يحفّز النمو عن طريق ← تحفيز انقسام الخلايا ←تراكم الكتلة الحيوية ← نمو الفواكه والخضار بشكل أسرع وبتبين أكتر طزاجة.
بس النتائج السلبية ما بتظهر بسرعة متل ما قالت إخصائية التغذية "بريتي فيجاي" وإنما بتظهر على صحتنا لما تتراكم هالمواد داخل جسمنا وبتزيد نسبتها عن الطبيعي مع مرور الوقت، وقد تسبب :
• غثيان، صداع، نعاس، وآلام بالبطن.

طيب شو مشان اللون الجذاب والنضج المثالي لبعض الفاكهة؟
بيرجع اللون لتلوين الخضراوات والفاكهة بكبريتات النحاس.
وبيرجع النضج المثالي للموز بسبب استخدام كربيد الكالسيوم اللي بيستخدم لإنضاج الفاكهة اصطناعياً.

والضرر اللي احتمال تسببه هالمواد ↑:
• خطر شديد عالعيون والرئتين وتهيجات وتقرحات.
___

ختاماً، صعب نعرف إذا في حقن هرموني بالخضار والفاكهة، وصعب نعرف إذا في مواد كيميائية مستخدمة لإعطاء إنتاج مميز ومثالي..

لهيك منحاول نختار أحجام خضار وفاكهة متوسطة طبيعية ما فيها صفات مثالية ومبالغ فيها متل اللون الجذاب والنضج الزايد والطزاجة العالية..

ودمتم بخير وصحة أصدقائي.

#مايا_بركات.

#تغذية 🍏.

• كنت أردد في عقلي دائماً:
"ضربٌ من الجنون أن تصبح مهووساً بشخص ما"

إلى أن وجدت تقاسيم وجهه
تستقر على وجه فنجان قهوتي كلّ صباح.

اكتشفتُ عندها أن للهَوس طعمٌ أيضاً
ومن الجنونِ ألّا نتذوقه.

- #مايا_بركات ♥️.

• هاللحم مالو حلال، مد.بوح د.بح غير شرعي.

بتعرفوا شو المعنى لما يقولوا هالجملة؟
كفوا معي لتشوفوا العجايب 🔰..

يعني ما بيد.بحوا الحيوان، وإنما بيعملوا عملية إغماء للحيوان قبل ذ.بحه.. وهي بتتم بطريقتين:

▪️ إِما بإتلاف دماغ الحيوان واللي بيتسبب بقتله.
▪️ أو بيصعقوه بالكهربا / بيستخدموا غازات متل CO2 أو خليط غازات خاملة / أو بيعطوه مواد مخدرة قام بيغمى عليه.

وبالنهاية منحصل على لحم ذي جودة منخفضة؛ بسبب عدم تخليص الحيوان من الدم الكامل بجسمه لما نقوم بإغماءه، وفوق كل هاد منكون عذبناه قبل ما يموت!

غير كل هاد، في طريقة كتير بتخوف عم يستخدموها كرمال اللحم يكون طري بعد الذبح:

وهيّ استخدام مواد بيحقنوها بالحيوان قبل ١٥-٣٠ دقيقة من الإغماء.. بتعمَل على تحليل اللحم وتفكيك النسيج الضام بجسمه، وسبب الحقن قبل ما يموت مشان تروح عالقلب وتنضخ لكل الجسم..
وهون بهالطريقة.. إذا نسيو الحيوان ثانية، شو بصير؟؟
- ببلش يتحلل وهو عايش ويتعذّب!

🐓 ولسا طريقة الحصول على لحم الدواجن بتخوف كمان، بس ما رح احكي عنها تفصيلياً، بس بيُستخدم فيها سكا.ين كهربائية، وأحواض مائية مكهربة، وبمرروا هالحيوانات وبيقتلو.ها ضمنهن.


"كل هالأسباب اللي انذكرت بتورجينا أديش الد.بح الإسلامي فيه رحمة للحيوان وما فيه تعذ.يب، وكمان ما فيه ضرر عصحتنا لأن طريقة الد.بح بتخلي كل الد.م يصفى وما يبقى دما.ء محشاية بالأعضا.ء متل هديك الطريقة المخيفة".

▫️ولأن الإسلام حاكي عن أصغر التفاصيل اللي بتتعلق بالموضوع، منشوف الرحمة عنا بالتعامل مع هالحيوانات اللي الله سخرها إلنا

(أرجو إنو يكون هالشي عم يتطبق بحذافيره؛ لأن الحيوان لو سببنالو أذى رح يشهد علينا بكرا).

🐑 ومن أحد شروط الد.بح الإسلامي: (ما بعرف إذا بتتطبق تماماً بس هي لازم تراعي هالشروط تقريباً):

• استخدام سكين حاد كتير.
• التلفظ باسم الله أثناء الذبح.
• السرعة بالدبح، وما نخلي الحيوان يشوف الخراف البقية عم تندبح قدامو مشان ما يأثر سلبيا عنفسيتو، ولأن أيضاً اللحم الناتج من هالخاروف ما بكون بذات الجودة والصفات الحسية نفسها.

#مايا_بركات.

#لحوم.
#تغذية.

• بتحبوا المارتديلا؟
طيب شو رأيكن قلكن إنو ما هيك اسمها الصحيح؟

تعوا نعمل تصحيح مسميات ونوضح مفاهيم صغيرة بتتعلق بهالمُنتَج.. 🍽

شي مرة قرأتوا شو مكتوب على العلبة قبل ما تاكلوا منها؟

ولا مرة كان مكتوب مارتديلا مهيك؟
وإنما منقرا عليها: لانشون دجاج صح 🐓؟

لأن المارتديلا: هي مُنتَج إيطالي الأصل مصنوعة حصراً من لحم الخنزير قليل الدهن، وقد تنخلط مع لحم بقري أو لحوم أُخرى.

بتنصنع بنفس طريقة صناعة اللانشون عنا بالبلدان العربية بس بغير نوع لحم لهيك في لغط بالمسميات عنا..

واللانشون: عبارة عن لحم دجاج مفروم منقوم بتحويله لمُستحلب (والمستحلب هو: خليط مكون من سائلين صعبين الامتزاج بس لما منضيف إلهن "عامل الاستحلاب" بصيروا خليط متجانس [متل المايونيز تماما] ).

وبعدين منضيف توابل وكم شغلة لهالمستحلب، ومنعبيهن بعلب ومنقوم بعملية الطهي بفرن مخصص لهالعملية اسمو (الأوتوغلاف).

_
(عم دللكن بالمصطلحات العملية 😂♥️)
_


وبالتالي منوصل لخلاصة إنو نحن ما عنا مارتديلا وإنما لانشون.. أي: لحم مفروم.

وكنصيحة مايية 💘:

ضروري نخفف من أكلها لكتير أسباب ما رح اذكرها، ولا تفكروا إنو هي عبارة عن لحوم وبتغني عن اللحم الأساسي (منستنتج هالشي من سعرها الزهيد مقارنة باللحم الخام).. بالإضافة إنو البروتين اللي فيها معظمه نباتي وليسَ حيواني، وما رح زيد حكي أكتر من هيك.

#مايا_بركات.


#لحوم.
#تغذية.

_
• سمعانين شي مرة بـ البسطرمة؟

عندكن فكرة كيف بتتصنع؟
ومن أي جزء بالتحديد من اللحوم بتتساوى؟
وبتحبوها؟ ولا ما بتعرفوها ومو مجربينها؟

(تعوا نتعرف عليها مع بعض)
بالمناسبة أنا من عشّاق هالنوع من اللحوم.


▪️بدايةً..
كلمة بسطرمة: تسمية أرمنية وهي أكلة شعبية أطلقت على اللحم المقدد المتبل تتبيل شديد ومميز 🔥.

وقيل إنو هالطعام تصنّع بالـ ١٩١٥ بأرمينيا لإعالة العائلات المتأذية بعد الإباد.ة اللي صارت هنيك.

• بتتحضر من لحم البقر وغالباً من الفخذ
وممكن نحضرها من لحم الجمل أو الجاموس.

▪️صناعتها بتنقسم لتلت خطوات رئيسية:
١. تمليح اللحم - ضغطه - تجفيفه.
٢. دعك اللحم بعجينة خاصة.
٣ إعادة التجفيف.

وعجينة البسطرمة بتتكون من هالمكونات:
• توم مقشر ومهروس.
• مسحوق الحلبة.
• فليفلة حمرا ناعمة.
• ملح / فلفل.
• طحين + مادة برتقالية اللون.

ومنخلط كل هالمكونات مع الزيت أو المي، ومندعك اللحم فيها بعدين منجففو.

___

وهلأ سؤالي إلكن.. اللي مو دايقها قبل بمرة، ممكن تجربوها وليش؟ 🥩

#مايا_بركات.

#لحوم.
#تغذية.

• هل لازم نغسل البيض قبل ما نحطو بالبراد؟ 🥚

تعتبر من الأخطاء الشائعة اللي بمارسها الكل بدون ما يعرف إنها بتزيد من التلوث.


▪️الدجاجة قبل ما تحط البيضة، بتفرز حواليها "مادة واقية" بتمنع دخول الجراثيم والأحياء الدقيقة من ثقوب البيضة » وبالتالي » لما نحن نغسل البيض أو ما نشتريه، وبعدين نحفظه بالبراد، هالشي رح يزيد من تلوث البيض وتسلل الأحياء الدقيقة لداخلها.


• كيف منتصرف بطريقة سليمة؟

← منمسح البيض بشقفة ناشفة أو رطبة شوي قبل الاستخدام حصراً.
← أو بحال غسلناه ونسينا، منحطو فوراً بالبراد لنتجنب تلوث البيض.


▪️وسؤالي إلكن..
كنتوا بتعرف إنو هالتصرف خاطئ؟


#مايا_بركات.

#تغذية 🍳.

• لا بأس أن تخفق مرّة أُخرى، لا مشكلة بأن يكون اختيارك الذي حاربت الكون لأجل الفوز به هو خيبتك الكبرى.
لا ضيرَ أن تخسر، مقابل أن تفوز بنفسك.

فلابدّ أن تعي أنّك لن تنضج ولن تعرف ذاتك، إلا من خلال تلك الخيبات التي تحدث على الملأ، تلك التي تجعلك تتندم على مساومتك الدنيا على أنّها تناسبك، وأثناء سيرك نحوها تراها تُهدم أمام جميع من تحدّيت وأمامك.

تأكد أنّه رغم خسارتك المؤلمة تلك أنت فائز،
فُزت بنفسكَ في هذا الفصل من حياتك، وستدرك أنّ ذلك الرّبح هو خيرٌ لكَ من ميداليات تفوزُ بها علناً، وعندما تتأمّلها في سرّك، تجدُّ أنها السبب الأول بهذا الضياء الذي صار يشعُ منك.

- #مايا_بركات.

• أديش بتتركوا البيض عالنار وقت تطهوه؟ ⏱

بتقول الدراسات إنو الطهي الزايد للبيض ↓:

١. بخلينا نخسر بعض الفوائد الموجودة بالبيض (متل انخفاض محتواه من فيتامين D و A).

٢. رح يشّكل عنًا مركبات مؤذية فيه (متل Oxysterols) واللي رح تأثر سلباً على مضادات الأكسدة الموجودة بالبيض اللي بتساعد على منع أمراض القلب والأوعية الدموية والسرطان، وفوائد تانية رح نخسرها في حال زاد الطهي عن المدة اللي رح احكيلكن عنها هلأ:


🥚 البيض المسلوق:
6-10 د بعد ما تبلش المي تغلي.

🥚 البيض المقلي:
أول ما البَياض ينشف، منوقف طهي،
وما لازم نتركه حتى يتقمّر.


مشان هيك.. لا بقا تحطوا البيض ينسلق عالنار وتغطّوا عليه، ضروري تعيروا الوقت لتحصلوا على الفائدة الكاملة من تناوله.

وخليكن ناطرين البوست اللي رح احكي فيه عن العدد المسموح أكله من البيض يومياً 🍽.

#مايا_بركات.

#تغذية 🍀.