#قصص_الأنبياء(٢)
#السيرة_النبوية
#الحلقة_مائتين_أربعون_والأخيرة
#أحداث_السنة_الحادية_عشرة_من_الهجرة
#دَفْن_رسول_الله

وقفنا المرة إللي فاتت عند استقرار الأمور في السقيفة واتفاق الجميع على إن الخليفة يكون من قريش،
لكن السؤال المهم بقى: يا ترى يختاروا مين يكون هو الخليفة🤔
في البداية كان أبو بكر رضي الله عنه رشح للخلافة عمر وأبا عبيدة،
فدلوقتي الترشيح ما زال قائم، لكن عمر وأبو عبيدة كان لهم رأي تاني،
أبو عبيدة رضي الله عنه قال لأبي بكر:
لا ينبغي لأحد بعد رسول الله ﷺ أن يكون فوقك يا أبا بكر ! أنت صاحب الغار مع رسول الله ﷺ، وثاني اثنين،
وأمّرك رسول الله ﷺ حين اشتكى، وصليت بالناس، فأنت أحق الناس بهذا الأمر👌
يعني مينفعش حد يكون أمير عليك، انت إللي كنت مع رسول الله ﷺ في الهجرة وفي الغار زي ما ربنا ذكرك في القرآن، ولما رسول الله ﷺ كان مريض خلاك انت مكانه تصلي بالناس وترعى شؤونهم؛
فأنت احق بالخلافة من أي أحد، فهنا عمر رضي الله عنه قال للأنصار:
" يا معشر الأنصار، ألستُم تعلمون أن رسول الله ﷺ قد أمَر أبا بكر يَؤُم الناس؟!
فأيُّكم تطيبُ نفسه أن يتقدم أبا بكر رضي الله عنه؟
يعني مين إللي نفسه تكون راضية إنه يكون إمام لأبي بكر ورسول الله ﷺ نفسه هو إللي خلاه إمام للناس؟
فقال الأنصار: نعوذ بالله أن نتقدم أبا بكر🤚
فهنا عمر رضي الله عنه قال لأبي بكر:
ابسُطْ يدَك يا أبا بكرٍ.
فبسَطها، فبايَعه عمر، وقام أُسيد بن حضير زعيم الأوس، وقام بشير بن سعد رضي الله عنه يستبقان للبيعة،
يعني كانوا بيسابقوا بعض لمبياعة أبو بكر بالخلافة، فهنا وَثَب أهل السقيفة يَبْتَدِرُون البيعة،
يعني قفزوا من أماكنهم ناحية أبي بكر بيسابقوا بعض، كل واحد عايز يبايع هو الأول😅

فبايع الحُباب بن المنذر وبايع ثابت بن قيس، وبايع زيد بن ثابت رضي الله عنهم أجمعين،
وبايع كل الأنصار في السقيفة ما عدا سعد بن عبادة رضي الله عنه، بايع بعد كم يوم كده،
وهو معذور لأنه ساعته كان مريض والدنيا كانت زحمة وحصلت أحداث كتير،
فلما الأمور هدأت وخف مرضه بايع رضي الله عنه👌

دي كده كانت البيعة الأولى وحصلت بيعة تانية في المسجد لأبي بكر رضي الله عنه وفي تفاصيل كتير حصلت بس ده مش موضوعنا دلوقتي،
واحنا بنتكلم عن الخلفاء هنتكلم عن الأحداث دي بالتفصيل إن شاء الله، وهنتكلم عن الأحاديث إللي كان فيها إشارة لاستخلاف أبي بكر رضي الله عنه😊

احنا بقى هنسيب كل الأحداث دي ونرجع لحُجرة السيدة عائشة إللي كان فيها رسول الله ﷺ ونشوف حصل إيه، فهو ﷺ لم يُدفن حتى الآن👌

لما بيموت أي مسلم المفروض إنه بيتغسّل وبيتكفن ومعروف بيتعمل معاه إيه،
لكن موضوع تغسيل وتكفين ودفن رسول الله ﷺ يُعتبر قضية حساسة جداً ومُحيرة،
وهي من القضايا الأُولى إللي مطلوب من الصحابة إنهم يأخذوا فيها قرار بدون ما يكون رسول الله ﷺ موجود معاهم،
كان في حجرة رسول الله ﷺ مجموعة من الصحابة هم إللي هيقوموا بتغسيله هم:
◇علي بن أبي طالب رضي الله عنه، وكان هو إللي يغسله ﷺ.
◇أسامة بن زيد ومولى رسول الله ﷺ، وكانا يصبان الماء.
◇ العباس بن عبد المطلب عم النبي ﷺ واثنين من أبناء العباس هما قَثَم والفَضل، وكانوا يقلّبونه ﷺ.
◇أوْسُ بن خَوْلِيّ الأنصاري رضي الله عنه، وكان يسند رسول الله ﷺ على صدره.

احتار الصحابة في تغسيل رسول الله ﷺ، هل ينزعون ملابسه كما ينزعزن ملابس باقي الموتي عند الغسل إلا ما يستر العورة؛ ولّا يغسلونه وهو عليه ثيابه؟
لأن هناك من الأحكام الفقهية ما قد يكون خاص به ﷺ وهناك ما قد يكون عامًّا على عموم المسلمين🤷‍♂️

فلما اختلفوا ألقى اللهُ عليهم النومَ ثم كَلّمَهم مُكلّمٌ من ناحيةِ البيتِ لا يدرون مَن هو أنِ اغسلوا النبيَّ ﷺ وعليه ثيابُه،
يعني اختلفوا في الرأي، مجموعة قالت ننزع ملابسه ومجموعة قالت لأ نغسله وعليه ملابسه،
فهنا ربنا خلاهم كلهم يناموا، وبعدين سمعوا حد بيكلمهم من جانب البيت ميعرفوش هو مين وبيقول لهم إنهم يغسلوا رسول الله ﷺ وعليه ثيابه،
ممكن يكون إللي كلمهم ده مَلك والله أعلم🤷‍♂️
فقاموا إلى النبيِّ ﷺ فغسلوه وعليه قميص، يعني كانوا يصبوا الماء على الملابس إللي كان رسول الله ﷺ لابسها
ويُدَلِّكونَه بالقميصِ دونَ أيديهم"
يعني كانوا بيغسلون جسمه من فوق الثياب ولا يَمَسُّونَ بَشَرَتَه ﷺ بأيديهم👌

☆السيدة عائشة كانت تقول:
"لو استَقبلتُ من أمري ما استدبرتُ ، ما غسَلَهُ إلَّا نساؤُهُ"
يعني السيدة عائشة بتقول لو كانت عَلِمت وظَهَر لها ما كان مِن تغسيلِ رسولِ اللهِ ﷺ لكانت زوجات رسول الله ﷺ
هنَّ اللَّاتي غَسَّلوا النَّبيَّ ﷺ،
لكن لأن السيدة عائشة كانت حزينة جدا لموت رسول الله ﷺ فالفكرة دي لم تأتِ في بالها،
وهنا دليل على أن المرأة يجوز أن تغسل زوجها والعكس،
يعني الرجل يجوز إنه يغسّل زوجته،
وطبعا الكلام إللي بيقول إن المرأة إذا ماتت أصبحت أجنبية عن الزوج ومينفعش يشوفها ولا يدخل عليها والكلام ده، كل ده غير صحيح🙅‍♂️❌

بعد ما غسلوا رسول ال

#قصص_الأنبياء(٢)
#السيرة_النبوية
#الحلقة_الأولى
#قبل_مولد_رسول_الله(١)
#أصحاب_الأخدود(١)
إن شاء الله هنبدأ النهاردة الجزء الأول من السيرة النبوية،
السلسلة دي تكملة لقصص الأنبياء،
لأن السيرة النبوية طويلة وفيها تفصيل كبير فخليتها سلسلة لوحدها😉
وطبعا هيدخل معانا قصص القرآن يعني هنحكي قصص القرآن واحنا بنحكي السيرة، لأن القصص دي لها أسباب نزول فلما نوصل للأحداث بتاعتها هنقولها إن شاء الله😊
وإن شاء الله هننزل السيرة برده على التليجرام مع الأجزاء إللي فاتت من قصص الأنبياء😉

في نقطة لازم أوضحها قبل ما نبدأ وهي إن السيرة دي مش حكاية بنسمعها ..السيرة النبوية دي دييين 👌
رسول الله صلى الله عليه وسلم قال :
"ألا إني أوتيت القرآن ومثله معه"
يعني ربنا أنزل القرآن إللي هو الوحي الأول وكمان وحي ثاني وهو السنة أو خلينا نقول السيرة،
يعني قصة حياة رسول الله صلى الله عليه وسلم إللي بتشرح القرآن وتوضح معناه👌
فانتي لما تقرإي السيرة معانا تبقى نيتك طلب العلم لأنك بتتعلمي دينك...بتتعلمي القرآن والسنة إللي فيهم كوووول أحكام الإسلام😉
والإيمان لا يكتمل إلا بحب رسول الله صلى الله عليه وسلم،
ومش أي حب😀
ده حبه لازم يكون مُقدم على كل حب في حياتك ،
فإزاي هتحبي حد وانتي متعرفيش عنه أي حاجة 🤷‍♀️

يعني إننا نتعلم السيرة ده مش حاجة اختيارية ده فرض علينا💁‍♀️
عارفين ليه؟
لأن احنا عندنا امتحان مكون من ثلاثة أسئلة لازم نجاوب
عليهم ..لو مجاوبناش على الأسئلة دي هنتعذب في النار😱
الأسئلة هي : من ربك..من نبيك ..ما دينك؟

احنا سهل أوي نجاوب عليها دلوقتي لكن في القبر غييير😶
هتجاوبي إزاي على من ربك وانتي متعرفيش أي حاجة عنه ولا من نبيك وانتي متعرفيش سنته ولا حياته ولا بتعملي زيه،
هتجاوبي إزاي على ما دينك وإنتي متعرفيش عن الدين إلا حاجات متفرقة من هنا وهنا😕
فاعملوا حسابكم إنكم بتتعلموا دينكم 👌
طبعا هعتمد على الأحاديث الصحيحة وأنا بشرح ولو في أحاديث ضعيفة مشهورة بين الناس،
هقول لكم يا جماعة خدوا بالكم الحديث ده ضعيف...زي حديث الحمامة إللي باضت والعنكبوت إللي عمل خيوط على باب الغار لما رسول الله صلى الله عليه وسلم كان مهاجر واختبأ فيه...الحديث ده ضعيف مع إنه مشهور بين الناس😉

وإن شاء الله هنربط السيرة بالواقع بتاعنا عشان نقدر نخليها منهج نقدر نطبقه في حياتنا 👌

قبل ما ندخل في تفاصيل السيرة نعرف الأول إيه إللي حصل بعد رفع عيسى عليه السلام وإزاي النصرانية انتشرت مع إن اتباع عيسى عليه السلام كانوا قليلين🤔

☆ممكن واحدة تسأل طيب وده إيه علاقته بالسيرة 🤨
بكل بساطة لسببين:
الأول إن في أحداث حصلت مذكورة في القرآن وقبل ما يُولد رسول الله بسنين طويلة زي قصة أصحاب الأخدود💁‍♀️
وكمان قصة أصحاب الفيل.
الثاني : عشان نعرف الأرض كانت عاملة إزاي في الوقت ده😑
ونشوف كمية الكفر والفجور إللي كان على وجه الأرض لدرجة إن رسول الله صلى الله عليه وسلم قال:
"إن الله نظر إلى أهل الأرض فمَقَتَهم عربهم وعجمهم إلا بقايا من أهل الكتاب". 《صحيح مسلم》
والمقت معناه شدة الكراهية...يعني ربنا نظر لأهل الأرض قبل البعثة النبوية فكرههم لشدة كفرهم وطغيانهم في الأرض،
فطبعا لازم نعرف الأرض كانت عاملة إزاي ،
عشان نشوف الفرق إللي هيحصل لما رسول الله صلى الله عليه وسلم يُبعث بالرسالة،
وهل احنا عندنا أمل إن حال الأمة يتصلح ونقدر نرجع الناس للدين تاني ولا لأ👌

بعد رفع عيسى عليه السلام تفرق الحواريين وبقوا يدعوا الناس للنصرانية،
وكان لهم أتباع ولكن اليهود مكنوش بيسيبوهم كانوا بيحرضوا الملوك عليهم ،
وإن الناس دي هيخربوا ملكك فكانت الملوك تعذبهم من يتبع الحواريين فكانوا بيؤمنوا في السر،
والحواريين نفسهم اتعرضوا للتعذيب الشديد جدا،
فهربوا لأماكن مختلفة من العالم وبدأوا ينشروا النصرانية بين الناس،
ومع مرور الوقت تعرضت النصرانية لتحريفات كثيرة،
لأن الإنجيل لم يُكتب هو كمان زي التوراة،
وكانوا بيعلموا بعض النصرانية عن طريق رسائل بيبعتوها لبعض،
وبعد مائتين سنة من رفع عيسى عليه السلام كتبوا أناجيل كثيرة جدا،
وطبعا فيها تحريف كبير جدا😶
وقالوا إن عيسى ابن الله وكلام كتير كده مش موضوعنا😅
فالنصارى بدأوا يتفرقوا في الأرض ويعبدوا ربنا منعزلين عن الناس ،
《راجعوا سلسلة خط الزمن لدكتور راغب السرجاني》

وكان في ناس قليلة جدا جدا هي إللي استمرت على دين عيسى عليه السلام الأصلي بدون أي تحريف👌
وكان في برده أحبار يعني علماء من اليهود بيسافروا من مكان لمكان عشان ينشروا اليهودية ويعرفوا الناس الدين،
في اليمن كان في ملك اسمه ربيعة بن نصر ،
شاف رؤيا فجمع الكُهّان والسحرة ففسروا له الرؤيا بإن الأحباش يعني أهل الحبشة هيحكموا اليمن،
فخاف على أهله وذريته فأرسلهم للعراق يقعدوا هناك،
وهو استمر يحكم اليمن ومات ربيعة بن نصر وجاء بعده أبناؤه حكموا اليمن،
وكان من أبناؤه إللي حكموا واحد اسمه أسعد ولقبه تُبَّع وكان مشرك وكان بيسافر

#قصص_الأنبياء(٢)
#السيرة_النبوية
#الحلقة_الثانية
#قبل_مولد_رسول_الله(٢)
#أصحاب_الأخدود(٢)

وقفنا المرة إللي فاتت عند الغلام لما جنود الملك أخذوه وطلعوا به على قمة جبل وبدأوا يساوموه..يعني يقولوا يابني اعقل وهتبقى إنت الساحر وهتبقى كلمتك مسموعة، ده غير النعيم إللي هتكون فيه،
ولو مسمعتش الكلام هنرميك من فوق الجبل..شوف الفرق بقى..يعني تبقى عايش مُنعم ولا نموتك😈

الغلام إللي لسه مبلغش حتى ..يعني عمره أقل من خمسة عشرة سنة عمل إيه؟
بكل هدوووء وثقة ويقين دعا ربنا وقال :
اللهم اكفنيهم بما شئت🤲

☆أصله يا جماعة الموضوع منتهي بالنسبة له..هو عارف إنه على حق ..هو مش دعا ربنا قبل كده إنه يخليه يشوف آية لو الراهب على حق يقتل الدابة 😁

وكانت النتيجة إن الجبل اتهز ووقعوا كلهم وماتوا ماعدا الغلام💁‍♀️
لكن الغلام عمل حاجة غريبة أوي🤨
المفروض والطبيعي إنه يهرب بجلده ويبعد عن الملك وينقذ نفسه🤷‍♀️
لكن الغلام رجع للملك تاني😳

فلما دخل على الملك سأله فين الجنود إللي كانوا معاك😧
قال له الغلام : ربنا كفاني شرهم👌

الملك بقى مش يتعظ ولا حتى يفكر في إللي حصل ولا يسأل الغلام عن دينه😀

لأ ..ده أمر جنود تانيين إنهم يأخذوا الغلام ويركبوا سفينة ويهددوه بالقتل ...يا إما يرجع عن دينه أو يقتلوه😑
فلما ركبوا السفينة والجنود هددوا الغلام،
الغلام برده دعا: اللهم اكفنيهم بما شئت🤲

فاتقلبت السفينة وماتوا كلهم ماعدا الغلام هو الوحيد إللي نجى😮
مش يهرب بقى... ده رجع تاني للملك😶
فالملك لما شافه سأله فين الجنود إللي كانوا معاك😳
فالغلام قال له : ربنا نجاني منهم👌
وقبل ما الملك يأمر جنود تانيين إنهم يقتلوا الغلام،
قال له الغلام:
شوف إنت مش هتقدر تقتلني إلا لو عملت إللي هقول لك عليه👌
فالملك قال له : أعمل إيه😕

☆الواحد مش عارف يتعجب من مين أكثر ..من الغلام إللي رجع عشان الملك يقتله،
ولا من الملك إللي معندهوش ذرة عقل ومش بيفكر إلا في قتل الغلام ومش قادر يشوف قدرة ربنا ومعجزاته😑

الغلام قال له:
اجمع الناس في مكان واحد واصلبني في جذع شجرة وبعدين خذ سهم من الأسهم إللي معايا وضَعْه في القوس وقل بصوت عالي يسمعه الناس بسم الله رب الغلام وارمني بالسهم ،
لو عملت كده هتقدر تقتلني👌
فالملك جمع الناس وعمل زي ما الغلام قال له بالضبط..وقال بسم الله رب الغلام ورمى السهم فنزل السهم في صُدْغِه فقتله،
وطبعا الناس كانت عارفة إللي بيحصل مع الغلام وإزاي إن الملك مكنش قادر يقتله وإن الجنود هم إللي بيموتوا كل مرة وإنه مقدرش يقتله إلا لما قال:
بسم الله رب الغلام،
فبعد ما قُتل الغلام الناس كلها في نفس واحد قالت : آمنا بالله رب الغلام😮
وهو ده السبب إللي منع الغلام إنه يهرب ..عنده رسالة عايز يوصلها للملك وللناس..الراهب ..المعلم الأول قُتل،
ومفيش غيره ينشر الدين فلو كان هرب مين إللي كان هينقذ الناس دي من ضلال الكفر والشرك👌
يُقال إن الناس إللي آمنت في اللحظة دي عشرين ألف إنسان،
يعني الملك ده لو كان ساب الغلام يدعو طول عمره مكنش هيؤمن العدد ده كله😅
بس سبحان الله كل ما أراد إنسان إنه يحارب دين ربنا ..حربه دي بتكون سبب في انتشار الدين أكثر 👌
وموت شخص واحد أهه كان سبب في إحياء قلوب الآلاف 😊

☆نقف هنا وقفة مهمة جدا 👌
طبعا احنا شايفين في واقعنا الأطفال إللي بتُقتل وتُذبح وبتموت من البرد والناس إللي بتُعتقل وبتُعذب وممكن تموت تحت التعذيب،
الناس دي لها رسالة زي الغلام بالضبط...هم لما يُعذبوا أو يموتوا جزاؤهم الجنة إن شاء الله ونحسبهم شهداء،
وربنا بيخفف عنهم ألم التعذيب وألم القتل،
إحنا ممكن نتخيل إنهم بيتألموا ألم شديد جدا ..زي الراهب إللي نُشر بالمنشار نصفين..متخيلين منشار بينشر جمجمة على الحي كده لحد ما يتقسم نصين 😶
الموضوع تخيله بس مرعب..فما بالنا باللي حصل معاه كده فعلا😐
لكن دي من وجهة نظرنا إحنا البشرية ،
أما في حسابات ربنا فالموضوع مختلف تماما، رسول الله صلى الله عليه وسلم قال إن الشهيد مش بيحس بأي وجع إلا زي ماحنا بنحس بوجع القرصة،
فالعذاب والقتل بالنسبة لهم أجر وبالنسبة لنا إحياء لقلوبنا،
لما تشوفي طفل بيموت من البرد ولا إنسان معتقل ولا...ولا...،
قلبك القاسي بيلين وترفعي إيدك بالدعاء للناس دي،
وبيخليكي تشكري نعمة ربنا إللي إنتي فيها وغيرها وغيرها من الحكم التي لا يعلمها إلا الله،
وفي نفس الوقت هو فتنة للناس إللي في قلوبها مرض ونفوسها خبيثة،
عشان ربنا يطلع إللي جواهم عشان يُقيم عليهم الحُجة لما يقولوا هو فين ربنا ..وفين رحمة ربنا..وإزاي ربنا يقبل بالظلم ..وإزاي...وإزاي...
وفي واحد من أكبر الملحدين دلوقتي وكان حافظ للقرآن في يوم من الأيام قال الكلام ده فعلا👌
ربنا مش بيقول لنا القصص من باب التسلية...القصص للعبرة.. لكن العبرة لمن يعتبر👌
ربنا حكيم رحيم ولا يرضى بالظلم لكن إحنا إللي مش شايفين حكمة ربنا وبدل ما نتهم عقولنا بالعجز عن فهم حكمة ربنا،
بنَتّهم ربنا بالظلم وعد

#قصص_الأنبياء(٢)
#السيرة_النبوية
#الحلقة_الثالثة
#قبل_مولد_رسول_الله(٣)
#أصحاب_الفيل

كنا واقفين عند عمرو بن لُحي لما سافر بلاد الشام وعجبه عبادة الأصنام فأتى بصنم وأدخله الجزيرة العربية وأمر الناس إنهم يعبدوا الصنم ده فالناس عبدوه فعلا،
وكان العرب على التوحيد يعني بيعبدوا الله فكان هو مَن بدّل دين العرب 👌
وأدخل آلهة تانية غير هُبل وأمر كل قبيلة في مكة إن يكون لها صنم عند الكعبة تعبده،
وانتشرت الأصنام في مكة ومن أشهر الأصنام بعد هُبل اللات والعُزّى،
وغيّر تلبية الحج..التلبية المعروفة :
لبيك اللهم لبيك ..لبيك لا شريك لك لبيك..إن الحمد والنعمة لك والملك ..لا شريك لك.
فراح مزوّد عليها:
"إلا شريكا هو لك تملكه وما ملك"
يعني معندكش شريك إلا شريك أنت تملكه،

وبدأ يُشرّع الشرائع لأهل مكة ويخترع حاجات غريبة ،
يعني سَن لهم سنة الأنعام التي لا تُمس، عارفين الآية إللي بتقول :
"مَا جَعَلَ اللَّهُ مِن بَحِيرَةٍ وَلَا سَائِبَةٍ وَلَا وَصِيلَةٍ وَلَا حَامٍ ۙ وَلَٰكِنَّ الَّذِينَ كَفَرُوا يَفْتَرُونَ عَلَى اللَّهِ الْكَذِبَ ۖ وَأَكْثَرُهُمْ لَا يَعْقِلُونَ "

الكفار كانوا بيقولوا إن ربنا هو إللي أمر بالحاجات دي فربنا رد عليهم بالقرآن إنه لا أوجبها ولا أمر بها ده عمرو بن لحي إللي هو شرع الحاجات دي😶

ناخدهم واحدة واحدة 😉
◇البَحِيرة يعني الناقة إللي ولدت خمس مرات يشقوا أذنها ومحدش لا يركبها ولا يذبحها يسيبوها كده..بقت مقدسة🙂
السائبة يعني واحد بينذر نذر ..يقول يارب لو أنت شفيتني أو يارب لو فلان الغائب رجع أو...أو...فأنا هسيب الناقة بتاعتي دي ومش هركبها تاني،

◇الوصيلة يعني لو الشاة إللي هي المعزة ولدت ذكر ذبحوه للآلهة بتاعتهم ولو ولدت أنثى هم يأخذوها يذبحوها لنفسهم،
ولو ولدت ذكر وأنثى قالوا :وصلت أخاها فميذبحوش الذكر للآلهة،
◇الحام يعني ذكر الناقة لو اتولد بسببه عشرة ذكور يحمي ظهره يعني محدش يركبه ولا يُحمل عليه أي شيء ولو مات الرجال والنساء يأكلوه.

والناس عادي تسمع كلامه وتنفذ ..مفيش أي مخ يفكروا به😑
قال رسول الله صلى الله عليه وسلم عن عمرو بن لُحي:
"رأيت عمرو بن لُحي يجر قُصُبَه في النار"
قُصُبه يعني أمعاؤه.
ودي كانت قصة دخول الأصنام إلى مكة وإللي هنلاقيها بعدين في عهد رسول الله صلى الله عليه وسلم😉

نرجع لأبرهة الحبشي إللي كان بنى كنيسة وكان عايز العرب يحجوا لها وجاء رجل من العرب من《 أهل النسيء》وتبرّز في الكنيسة فحلف إنه هيهدم البيت إللي العرب بيحجوا له👌
☆أهل النسيء دول كانوا بيعظموا الكعبة جدا وهم لهم قصة
عارفين الآية إللي بتقول :
"إِنَّمَا النَّسِيءُ زِيَادَةٌ فِي الْكُفْرِ ۖ "
كلمة النسيء معناها التأخير...احنا عارفين إن الأشهر الحُرم أربعة: رجب و ذو القعدة و ذو الحجة ومحرم،
"إِنَّ عِدَّةَ الشُّهُورِ عِندَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ"

والأشهر الحرم معناها إن مينفعش يكون فيها حرب والعرب أصلا عيشتهم على الحرب بينهم،
ففي ثلاثة شهور ورا بعض حُرم 《ذو القعدة و ذو الحجة ومحرم》
وده كده عامل لهم أزمة، يعملوا إيه😕
فاختاروا مجموعة من الناس وسموهم أهل النّسِيء وقالوا الناس دي من حقهم يؤخروا الاشهر الحرم،
يعني يؤخروا محرم لصفر ،يبدلوا شهر صفر مع شهر محرم،
فيكون ذو القعدة حرام وذو الحجة حرام وبعدين ميجيش شهر محرم يجي شهر صفر ويطلعوا من الورطة 👉😉

فكانوا بيعملوا كده سنة وسنة..آخر لخبطة يعني😶
وده تفسير آية :
"يُضَلُّ بِهِ الَّذِينَ كَفَرُوا يُحِلُّونَهُ عَامًا وَيُحَرِّمُونَهُ عَامًا لِّيُوَاطِئُوا عِدَّةَ مَا حَرَّمَ اللَّهُ فَيُحِلُّوا مَا حَرَّمَ اللَّهُ ۚ "
لكن الترتيب في الأشهر رجع زي ما كان تاني والأشهر فعلا مظبوطة دلوقتي👌

♡شوفتوا إزاي إحنا لسه مدخلناش في شرح السيرة لكن عرفنا تفسير كم آية في القرآن😉

جهز أبرهة جيشه لهدم الكعبة ،ودي تاني محاولة لهدم الكعبة😉
الأولى كانت على يد تُبّع إللي اتكلمنا عنه في الجزء الأول 😊
وكان من ضمن الجيش بتاعه فيل ضخم اسمه محمود،
وبدأ يتحرك من اليمن متجه ناحية الكعبة، وسمعت العرب بأن أبرهة عايز يهدم الكعبة،
وكان في رجل من أشراف العرب اسمه ذو نفر جمع بعض المقاتلين وجهزوا نفسهم عشان يحاولوا يوقفوا جيش أبرهة من إنه يهدم الكعبة،
وحاولوا يوقفوا جيش أبرهة لكنهم انهزموا وتم أسر ذو نفر،
وأخذه أبرهة معاه في الجيش أسير،

خرجت لجيش أبرهة قبيلة تانية تقاتله عشان ميهدمش الكعبة بقيادة واحد اسمه نُفيل بن حبيب،
واتهزمت القبيلة وأُسر نُفيل، وصل جيش أبرهة للطائف فخاف أهل الطائف من جيش أبرهة وإنه يهدم عليهم الطائف،
فقالوا له ملناش دعوة مش هنعترض طريقك ولا هنعمل حاجة وعشان نثبت إننا مسالمين ممكن نبعث معاك واحد يدلك على مكان الكعبة،
فتطوع واحد اسمه أبا رغال وقال له أنا هدلك على مكان الكعبة،
وطبعا دي خيانة 😑
وراح مع أبرهة عشان يَ

#قصص_الأنبياء(٢)
#السيرة_النبوية
#الحلقة_الرابعة
#إعادة_حفر_زمزم
#ولادة_رسول_الله

وقفنا المرة إللي فاتت عند عبد المطلب لما اتولد له حفيد بعد حادثة الفيل بحوالي خمسين يوم،
قبل ما نتكلم عن تفاصيل ولادة حفيد عبد المطلب،
خلونا نشوف مين هو عبد المطلب ده👌
قلنا إن عبد المطلب ده كان سيد مكة يعني رئيس مكة بلا منازع،
والرئيس معروف إنه بيستقبل رؤساء زيه وبيقعد معاه كُبراء الناس وبيستقبل وُفود من هنا وهناك،

لكن إزاي أصلا عبد المطلب إللي هو من قريش كان رئيس مكة وقبيلة خزاعة هي إللي كانت بتحكم🤨

إحنا عارفين إن إللي كان بيحكم مكة من زمن إسماعيل هو إسماعيل وأبناؤه إللي هم من قبيلة جُرهم،
وخزاعة اغتصبوا منهم الحكم،
فكان في واحد اسمه فِهر وبيلقبوه باسم قريش من ذرية إسماعيل عليه السلام كان موجود في مكة وعايش فيها بعد ما خُزاعة سيطرت على مكة،
فكان في واحد من ذرية فِهر ده أو خلينا نقول قريش اسمه قُصَي بن كلاب وكان عايز يرجع حكم مكة لسلالة إسماعيل عليه السلام،
وكان قصي بن كلاب كريم وغني وكان معروف بنسبه بين أهل مكة،
فخطب بنت رئيس خزاعة فوافق أبوها وتزوجها قصي بن كلاب فشرفه ومكانته زادت بين الناس،

لما مات رئيس مكة من خزاعة أعلن قصي بن كلاب إن هو رئيس مكة،
وطلب من الناس أنصاره وأقاربه إنهم يقفوا معاه،فبقى في فريقين فريق قصي بن كلاب وفريق خزاعة ،
حصل بينهم حرب ولما كانوا خلاص هيفنوا بعض😮

تدخل الحكماء وقالوا خلّونا نحتكم لرجل من المعمرين،
يعني عمره طويل بقاله عايش في الدنيا سنين طويلة ،
وقعدوا يحلفوا وياخدوا العهود من بعض إن إللي هيحكم به الرجل المُعَمر ده هو إللي هيمشي على الكل ومحدش يعترض👌
راح قصي بن كلاب وقادة خزاعة للمُعمر، وقصي بن كلاب قعد يقول له ده ملك آبائي ،
إسماعيل جدي وهو أول من سكن مكة وزمزم اتحفرت له وخزاعة دول مغتصبين،
ومحدش من خزاعة قادر يفتح بؤه ..هيقولوا إيه🤷‍♀️
فالرجل المعمر ده حكم بكل شيء لقصي بن كلاب👌
وبقى هو حاكم مكة وكان كريم جدا مع الناس،
وبنى لهم حاجة زي قاعة اجتماعات كده وسماها :
《دار الندوة》
أي قرار مهم بيجتمعوا وبيقرروا في الدار دي سواء قرار حرب أو مشاورة أو حتى زواج ، زي ما هنشوف بعدين إيه القرار إللي قريش أخذته بعدين في الدار دي👌

بعد ما كبر قصي بن كلاب في السن شاف إن أبناؤه كلهم عندهم شرف ومكانة بين الناس إلا ابن واحد بس اسمه عبد الدار،
فكتب له قصي بن كلاب كل حاجة لها علاقة بالشرف،
يعني هو إللي هيكون مسؤول عن سقاية الحجيج، ومسؤول عن دار الندوة وكل حاجة خاصة بالشرف،

فلما مات قصي بن كلاب أبناؤه اتخانقوا ،عايزين يأخذوا إللي عند عبد الدار وكان هيحصل بينهم قتال،
هو خلاص اتحقق له المطلوب وبقى له شرف ومكانة بين الناس 💁‍♀️

☆سبحان الله ...الناس تتخانق على الأموال وهم بيتخانقوا على الشرف ،
بيتخانقوا على مين يخدم الكعبة ومعاهم حق بصراحة حد يطول يخدم الكعبة بيت الله ويخدم الحجاج👌
بس طبعا مش هينفعهم يوم القيامة خدمة بيت الله وهم على الكفر😀

المهم اتفقوا إنهم يوزعوا الحاجات دي بينهم،
يعني عبد الدار وأبناؤه يكونوا مسؤولين عن سِدانة الكعبة يعني يبكونوا مسؤولين عن الكعبة يقفلوها ويفتحوها ويغسلوها ويغيروا كسوتها ويستقبلوا زوراها وهكذا 😉

وعبد مناف وأبناؤه مسؤولين عن سقاية الحجاج،
وكانوا بيسقوا الحجاج من خارج مكة لأن زمزم كانت اندفنت خلاص زي ما قلنا قبل كده👌

عبد مناف ده كان من أبناؤه واحد اسمه هاشم وواحد اسمه المُطلب،
هاشم تزوج من واحدة من خارج مكة وكان له ولد اسمه شيبة وكان عايش مع أمه خارج مكة،
فلما مات أبوه هاشم جاء عمه المُطلب وطلب إنه يأخذه عشان يعيش مع أعمامه في مكة،
فلما وصلوا مكة الناس ظنت إن المُطلب اشترى عَبد فقالوا 《عبد المطلب》
فقال لهم لأ ..ده ابن أخويا ..فاشتهر شيبة بين الناس بعبد المطلب إللي بنتكلم عنه دلوقتي وإللي هو مسؤول عن سقاية الحجاج😊
فهو اسمه عبد المطلب بن هاشم بن عبد مناف بن قُصي بن كلاب بن فِهر إللي هو قريش وبينتهي نسبه إلى إسماعيل عليه السلام 😉

في يوم من الأيام كان عبد المطلب نائم فسمع حد بيقول له في الحلم احفر طيبة،
فعبد المطلب قال : وما طيبة😮 ..محدش رد😕
ثاني يوم وهو نايم سمع حد بينادي عليه وبيقول له : احفر برّة ، فقال عبد المطلب : وإيه برّة دي 🤨
فراح الصوت 😕
ثالث يوم جاله نفس المنادي وقال له : احفر المضنونة فقال : وهي إيه المضنونة 😥...فراح الصوت برده🤔
اليوم الرابع وهو نايم سمع برده حد بينادي عليه وبيقول :
احفر زمزم👌
فقال وما زمزم 😮
فالمنادي رد عليه المرة دي وقال:
"لا تنزف أبدا ولاتَزم ..تسقي الحجيج الأعظم وهي بين الفرث والدم عند نقرة الغراب الأعصم عند قرية النمل"

لا تنزف يعني مش بتخلص أبدا مهما الناس شربوا منها،
ولا تَزم يعني مفيهاش عيب 👌

فلما صِحي عبد المطلب من النوم أخذ ابنه الوحيد وكان اسمه الحارث وراحوا عند الكعبة يدوّروا على المكان إللي بين الفرث والدم ،
وصل عبد المطلب

#قصص_الأنبياء(٢)
#السيرة_النبوية
#الحلقة_الخامسة
#نشأة_رسول_الله
#حادثة_شق_صدر_رسول_الله

وقفنا المرة إللي فاتت عند ولادة محمد بن عبد الله حفيد عبد المطلب وشفنا الأحداث إللي حصلت يوم ما اتولد وعرفنا ليه اتسمى باسم محمد،
كان من عادة قريش إنهم لما يتولد لهم مولود مكنوش بيربوه في مكة وكانوا بيرسلوه خارج مكة يرضع ويتربى هناك أول سنتين أساسي لأسباب كثيرة منها :
إن الحُجاج لما كانوا بيأتوا لمكة كانوا بيقعدوا فيها فترة طويلة،
فالأطفال لما بيختلطوا بالناس لغتهم العربية مش بتكون فصيحة ومضبوطة مائة بالمائة 👌
وقريش عايزين عيالهم يكونوا متمكنين من اللغة، فكانوا بيرسلوا أبناؤهم للبدو يتربوا هناك لحد ما لسانهم يتعود على اللغة العربية الصحيحة وبعدين يرجعوا لمكة،
زي مثلا في عصرنا لما الطلبة بتسافر للبلاد الأوروبية وتعيش مع أسر أجنبية عشان يتعلموا منهم اللغة الأجنبية مضبوطة 😉
واللغة العربية مهمة جدا عند العرب، تقدروا تقولوا إنها حياتهم، كان الواحد منهم لما يكون فرحان يقول شعر،
ولما يكون زعلان يقول شعر وفي الحرب شِعر ،
فإزاي هيبهروا الناس بكلامهم ويشتهروا بين العرب وهم مش متعلمين لغة عربية صحيحة 🤷‍♀️

من الأسباب كمان إنهم كانوا عايزين عيالهم يتربوا على حياة الخشونة وميكنوش مدلعين يعني😅
لأن إللي بيتربى في المدينة بيكون متعود على حياة الترف ،
لكن إللي بيتربى في البدو مثلا بيكون متعود على صعوبات الحياة فبيكون شخصيته أقوى ومتحمل للمسؤولية👌

السبب الثالث:
لأن مكة بيأتي لها الناس من كل مكان فكان فيها أمراض،
بعكس الصحراء إللي هواءها نظيف فبيكون نادر فيهم المرض وعندهم صحة😉
فكانت قريش بترسل أبنائها للأعراب من صغرهم عشان يتربوا عندهم،

طبعا احنا ممكن نستغرب ونقول إزاي واحدة ترضى إن ابنها يبقى بعيد عنها ومتشفوش إلا بعد سنتين وواحدة تانية هي إللي ترضعه😳
تقدروا تقولوا إن الموضوع عادة عندهم والناس كلها بتعمل كده فمحدش بيفكر في الموضوع أصلا وشايفينه عادي😅

والأعراب نفسهم كانوا بيوافقوا إنهم يأخذوا الأطفال من باب المنفعة، يعني هياخدوا أموال مقابل رعايتهم للأطفال،
لكن هم مكنوش بيطلبوا مبلغ معين عشان كانوا شايفين إن عيب المرأة تأخذ أجرة على لبنها،
فكان أبو الطفل بيعطوا للأم إللي بترضع مكافأة أو بلغتنا احنا إكرامية 😁

المهم في الوقت إللي اتولد فيه محمد بن عبد الله حفيد عبد المطلب جاءت لقريش مرضعات من بني سعد عشان يأخذوا الأطفال من مكة،
فكانت النساء في مكة بيعرضوا أبائهم على المرضعات،
وكانت آمنة بنت وهب بتعرض ابنها محمد على المرضعات زي باقي النساء ،
فأول ما يعرفوا إن محمد يتيم يرفضوا يأخذوه😶
لأن مين إللي هيعطيهم إكرامية..أبوه ميت وحتى جده من وجهة نظرهم مش هيكون حريص عليه زي أبوه،

وكان من ضمن المرضعات واحدة اسمها حليمة بنت أبي ذُؤَيب إللي هي حليمة السعدية،
وكانت فقيرة جدا وكانت حتى معندهاش لبن يكفي ابنها،
وحتى الأتان إللي كانت راكبة عليها كانت ضعيفة وهذيلة وكانت بتأخر الناس وهم ماشيين عشان مش قادرة تمشي،
الأتان أنثى الحمار😅
فبعد ما كل واحدة من المرضعات أخذت رضيع من مكة وخلاص راجعين ..حليمة ملقتش رضيع تأخذه،
فقالت لزوجها الحارث: أنا مش عايزة أرجع من غير رضيع وأصحابي كلهم معاهم رضيع، أنا هروح آخذ اليتيم ده😤

فزوجها الحارث قال لها: خلينا نأخذه يمكن يكون بركة علينا،
فرجعوا وأخذوا محمد اليتيم،
وكانت بترضعه مولاة عمه عبد العزى إللي كنيته أبو لهب
والمولاة معناها امرأة كانت أَمَة ..عبدة يعني إذا صحت الكلمة 😅وسيدها حررها،
والمرضعة دي أرضعت قبل كده حمزة بن عبد المطلب أخو عبد العزى،
فمحمد بن عبد الله بن عبد المطلب وحمزة بن عبد المطلب أصبحوا إخوة من الرضاعة

حليمة السعدية بتقول:
أول ما أخذت اليتيم ورجعت لمكان رَحْلي يعني المكان إللي الناس متجمعين فيه وبايتين فيه زي نقطة تجمع كده،
عشان الصبح ينطلقوا منه لبلدهم، صدرها اتملى لبن فرضعته وشبع ورضعت ابنها وشبع والطفلين ناموا😳
وابنها مكنش بينام أصلا من الجوع وكل ليلة بيبقى بيعيط،
وبعدين زوجها كان بيشوف الناقة بتاعتهم لقى ضرعها مليان لبن مع إنها عجوز😳

فحَلب الناقة وشرب هو وزوجته وشبعوا وناموا وكانت بالنسبة لهم أحسن ليلة يناموها،
فلما صحيوا تاني يوم زوجها بيقول لها:
يا حليمة إنتي شكلك أخذتي نسمة مُباركة
قالت له : فعلا والله🙊
وهم راجعين الأتان إللي حليمة راكبة عليها بتسبق القافلة كلها، وحليمة عمالة تهدي فيها ودي منطلقة، لدرجة إن النساء إللي كانوا معاها قالوا لها:
هو إيه إللي جرى للأتان بتاعتك😳
هو إنتي غيرتيها ولا هي نفسها 🤨

فقالت لهم :مغيرتهاش ولا حاجة ..هي نفس الأتان إللي أنا جيت عليها 😥
ولما وصلوا أرض بني سعد ..حليمة بتقول إن مفيش أرض جدباء مفيهاش زرع زي أرض بني سعد
وفجأة لقيت الغنم بتاعها راجع من المرعى شبعان والضرع بتاعهم مليان لبن،
فالناس مستغربين اشمعنى حليمة
فكانوا بيقولوا للغلمان بتوعهم روحو

#قصص_الأنبياء(٢)
#السيرة_النبوية
#الحلقة_السادسة
#مصير_أب_وأم_وجد_النبي
#حلف_الفضول

كنا واقفين المرة إللي فاتت عند أبو طالب لما كان عايز يسافر للشام وبعدين ابن أخوه محمد كان عايز يروح معاه وأعمامه وعماته رفضوا،
فلما بكى محمد قلب أبو طالب رقّ له فقال له :
والله لن أفارقك ولن تفارقني، وأخذه معاه فعلا وبدأوا رحلتهم إلى الشام😊

☆سؤال ...إزاي أبو طالب بيحلف بالله وهو كافر🤔
وكمان عبد المطلب مش كان كافر.. إزاى يقول الله أكبر وإزاى سمى ابنه عبدالله،
وإزاى نذر وعارف إن ربنا اللى بيرزق وكمان صمم إنه يوفى بالنذر وكان هيذبح أحب ابناءه ولما اتولد حفيده سماه محمد وكان نفسه إنه يطلع هو النبى معنى كده إنه مصدق إن فى نبى وفى ربنا وكمان قال للبيت رب يحميه🤨

احنا قلنا قبل كده في قصص الأنبياء إن الكفار والمشركين بصفة عامة كانوا بيؤمنوا بتوحيد الربوبية وبيكفروا بتوحيد الألوهية،
توحيد الربوبية معناه إن الكون ده له رب والرب يعني مالك كل شيء وهو الخالق وهو المُحيي والمميت وهو النافع والضار،
وربنا بيقول عن الكفار:
"وَلَئِن سَأَلْتَهُم مَّنْ خَلَقَ السَّمَاوَاتِ وَالْأَرْضَ لَيَقُولُنَّ اللَّهُ ۚ"
فهم كانوا مؤمنين بإن الكون ده له خالق لكن مكنوش معترفين بوحدانية الإله الخالق ده،
ومعنى الرب غير معنى الإله
لأن الإله معناه هو من يستحق العبادة وأي عبادة بنعملها من صلاة أو ذكر أو ذل أو خشوع أو نذر تكون لله 《وبس》👌
وده اسمه توحيد الألوهية،
عشان كده إحنا بنقول لا إله إلا الله إللي هي كلمة التوحيد، يعني كأننا بنقول مفيش حد يستحق العبادة غيرك يا الله🙇‍♂️

فحتى لما عبد المطلب كان عايز يذبح ابنه عبد الله راح يذبحه عند الصنم إساف عشان يوفي بنذره👌
فالشرك واضح فيهم وفي أفعالهم،
وكمان كان في بواقي من دين إبراهيم عليه السلام زي الحج بأركانه،
أيوة حصل فيه تحريف لكن لسه في بقايا من الدين وكمان دين إبراهيم كان مشهور بين العرب لكن مكنوش يعرفوا إزاي يتبعوا الدين ده🤷‍♀️

◇طيب هل معنى كده إن عبد المطلب جد النبي وأبوه وأمه في النار🤔

خلونا نشوف إيه هو مصير أمه وأبيه وجده👌
لأن في ناس زي الشيعة والصوفية بيقولوا إن أم وأب وجد رسول الله من أهل الجنة وده كلام غير صحيح😀
لأنه مخالف لكلام رسول الله وكلام القرآن👌

أولا أبوه :
من أهل النار، لأنه كان بيعبد الأصنام، وجاء رجل من الأعراب يسأل رسول الله عن وبيقول له:
أين أبي؟...فقال له رسول الله: أبي وأبوك في النار.
فأبو النبي إما إنه وصلت له الرسالة بطريقة معينة ورفض إنه يتبع،
أو إنه من أهل الفترة فيوم القيامة هيعصي الله في الإختبار ويدخل النار، وطبعا الكلام ده كله بوحي..يعني ربنا هو إللي أخبر رسوله عن مصير أبيه 👌

ثانيا أمه :
من أهل النار..لأن رسول الله قال في الحديث استأذنت ربي أن أزور قبر أمي فأذن لي، واستأذنته أن استغفر لها فلم يأذن لي،
قال تعالى:
" مَا كَانَ لِلنَّبِيِّ وَالَّذِينَ آمَنُوا أَن يَسْتَغْفِرُوا لِلْمُشْرِكِينَ وَلَوْ كَانُوا أُولِي قُرْبَىٰ مِن بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ"

والحديث بتاع إن ربنا أحيا والدا رسول الله فدعاهم للإسلام فآمنا به ..حديث موضوع لا يصح،
وخصوصا إن الحديث مُخالف لآيات القرآن والأحاديث الصحيحة 👌
◇والحديث الموضوع معناه إن حد اخترعه وقال إن رسول الله قاله.

ثالثا جده عبد المطلب:
العلماء اختلفوا فيه :
علماء قالوا إنه من أهل الفترة...

◇وأهل الفترة يعني الناس إللي موصلهمش رسالة الإسلام من أي رسول، ودول وضعهم مختلف، لأن لسه هيكون لهم امتحان في الآخرة ،
فيوم القيامة ربنا هيجيب جزء من النار ويقولهم : إنتم مجالكوش رسول فاليوم أنا رسول نفسي،ادخلوا في النار دي ، فلو سمعوا الكلام هيدخلوا الجنة، ولو رفضوا ربنا هيقولهم :
أنتم لرسلي أشد تكذيبا..يعني في وسط الأهوال دي وبقولكم ادخلوا النار ومسمعتوش كلامي أمّال في الدنيا كنتم هتعملوا إيه،ويكون مصيرهم النار 👌

وعلماء قالوا إنه من أهل النار لأنه كان بيعبد الأصنام وكان وصل له دين إبراهيم عليه السلام،
وكان في نصارى في مكة على دين عيسى عليه السلام،
زي ورقة بن نوفل، وكان في ناس موحدين زي زيد بن عمرو بن نفيل،
وهنعرف قصتهم بعدين إن شاء الله 😊

¤طيب خلونا نفترض جدلا كده ..مجرد افتراض😅
إن أم رسول الله وأبوه وجده من أهل الفترة وموصلتهمش الرسالة.. هل ينفع إننا نقول عليهم إنهم من أهل الجنة 😀

طبعا لا يجوز 👌
لأننا منعرفش أهل الفترة دول مصيرهم هيكون إيه أصلا ..لأن لسه لهم اختبار في الآخرة 🤷‍♀️
فيكون معاملة أهل الجاهلية معاملة الكفار في الدنيا، يعني لا ندعوا لهم ولا نستغفر لهم، لأن ظاهرهم إنهم ماتوا على الكفر،
ويوم القيامة ربنا هو إللي يفصل فيهم وهو أعلم بهم،
إذا كانوا فعلا وصلت لهم الرسالة ولا لأ👌

◇زي مثلا لما واحد من الكفار يموت في زماننا دلوقتي،
وتيجي واحدة تقولك إيه المشكلة لما أقول الله يرحمه مش يمكن مات على الإسلام وا

#قصص_الأنبياء(٢)
#السيرة_النبوية
#الحلقة_السابعة
#زواجه_من_خديجة
#حادثة_وضع_الحجر_الأسود

اتكلمنا المرة إللي فاتت عن الشاب محمد لما كان عنده عشرين عام واشترك في حِلف الفضول عشان ينصر المظلوم،
واتكلمنا عن أخلاقه وإزاي كان صادق وعمره ما كذب ولو مرة واحدة،
وقلنا إنه كان أمين جدا وبيحافظ على عهوده، ومكنش بيعمل الحاجات إللي الشباب في سنه عادة بيعملوها ومعروف بين الناس إنهم بيعملوها،
فكان الناس بتحبه جدا بسبب أخلاقه دي لدرجة إنهم كانوا مسميينه 《الصادق الأمين》،
كان بيشتغل في رعي الغنم زي ما قلنا وبعدين بدأ يشتغل في التجارة،
كان في مكة امرأة أرملة يعني مات عنها زوجها ..ذكية حازمة غنية عندها تجارة واسعة اسمها 《خديجة بنت خُوَيلد》
كان عمرها أربعين سنة، وكان سادات مكة نفسهم يتزوجوها لكن هي مكنتش بترضى،
كانت بتستأجر الرجال عشان يأخذوا بضاعتها ويتاجروا فيها وتديهم أجر زي مرتب كده،
مقابل إنهم يشغلوا لها فلوسها، فهي مكنتش بتخرج للتجارة بنفسها 《إطلااااقا》 👌

سمعت عن الشاب محمد وعن صدقه وأمانته وأخلاقه، فحبت إنها تستأجره عشان يشتغل لها في أموالها،
فبعتت له حد يقول له إن خديجة عايزاك تشتغل عندها مقابل مبلغ من المال،
فوافق الشاب محمد وخرج بتجارة خديجة، ونظام التجارة إنهم يأخذوا البضائع من مكة مثلا ويروحوا يبيعوها في مكان تاني،
فأخذ الشاب محمد بضائع خديجة وخرج من مكة عشان يتاجر وكان معاه في الرحلة دي غلام لخديجة اسمه مَيْسرة...عبد يعني 😅

ميسرة وهو في الرحلة مع الشاب محمد شاف حاجات عجيبة😳
وهم ماشيين في الطريق مثلا شايف إن في سحابة ماشية معاهم بتظللهم من الشمس🤨
ولما وصلوا مدينة بُصرى في الشام كان في شجرة بعيدة كده راح الشاب محمد وقعد تحتها،
فكان في راهب من رهبان النصارى موجود في المكان ده فسأل ميسرة مين الشاب ده😳👈
فميسرة قال له : ده محمد شاب من قريش ..في إيه يعني 🤨
فالراهب قال لميسرة : الشجرة إللي هو قاعد تحتها دي محدش بيقعد تحتها غير الأنبياء 😮
فميسرة استغرب طبعا.. نبي 😳
ده غير بقى إللي شافه من أخلاقه..هو كان سمع عنه لكن لما شاف بعينه بقى كان الوضع حاجة تانية ..انبهر بأخلاقه جدا وخصوصا لما شافه وهو بيتعامل مع الناس وهو بيبيع ويشتري 😮
ولقى الناس نفسهم بيقبلوا عليه ويشتروا منه بسبب أخلاقه،
ومش بس كده ده عمل حاجة محدش غيره من التجار عملها،
التجار كانوا بيروحوا يبيعوا البضاعة ويرجعوا،
هو بقى بعد ما باع البضاعة اشترى بضاعة تانية ولما رجع مكة باع البضاعة الجديد فكسب مرتين😯
فالمكسب إللي رجعه لخديجة مع أمانته طبعا كان أكثر واحد جاب لخديجة مكسب،
فخديجة تفاجأت لما شافت الفلوس إللي كسبتها وكمان ميسرة حكى لها إللي شافه وسمعه فانبهرت به خديجة وأُعجبت به جدا👌

فكان لها صاحبة اسمها نفيسة كلمتها وقالت لها إنها تروح لمحمد وتعرض عليه إنه يتزوج خديجة،
فوافق الشاب محمد إنه يتزوجها فعلا..حد يطول يتزوج خديجة إللي كل سادات قريش نفسهم يتزوجوها وهي رافضاهم😅
كان عمره في الوقت ده خمسة وعشرين سنة وخديجة كان عمرها أربعين سنة...يعني الفرق بينهم خمسة عشرة سنة على أرجح الأقوال لأن مفيش حديث ثابت صحيح بتحديد السن بالضبط👌
☆في أقوال ثانية بتقول إن خديجة لما تزوجت من رسول الله كان عمرها خمسة وثلاثين أو ثمانية وعشرين سنة

المهم راح الشاب محمد لأعمامه وقال لهم الموضوع فراح معاه عمه أبو طالب وحمزة ابنا عبد المطلب عشان يخطبوها من وليّها..يُقال عمها ويقال من أخوها ويقال من أبوها ، المهم إنه خطبها وتزوجها 😅
ودفع لها مهر عشرين ناقة وده كان مبلغ وقدره... مش حاجة بسيطة 😉
بعد ما تزوجت خديجة بالشاب محمد سلمت كل تجارتها له عشان هو إللي يديرها👌

☆وده معناه إن خديجة بنت خويلد لم تعمل خارج البيت لا قبل زواجها ولا بعده 😀
مسمعش حد يقول بقى ما السيدة خديجة زوجة الرسول كانت بتعمل بالتجارة🤫
ويقول عادي النساء تسيب بيتها والمهمة إللي ربنا أعطاها لها وتخرج تشتغل وسط الرجال وتختلط بهم وتبقى سيدة اعمال وتسافر هنا وهنا 😀

سامعاكي يا حبيبتي ياللي هتقولي يعني نقعد في البيت ومنشتغلش😑
طيب ماحنا محتاجين الدكتورة والممرضة و...و...
أنا مقلتش كده ..أيوة احنا محتاجين ده ومحدش قال عكس كده،
لكن الكلام للناس إللي بتحتج بعمل خديجة رضي الله عنها في التجارة وبيقولوا عادي المرأة تختلط بالرجل،
وتسيب بيتها وعيالها وتطلع تشتغل شغل مش بتاعها أصلا،
لأن عمل المرأة له ضوابط وشروط مش موضوعنا هنا😉

وحتى لو افترضنا جدلا ...مجرد افتراض كده إن السيدة خديجة كانت بتعمل بنفسها في التجارة فده كان قبل الإسلام وقبل الهجرة أساسا،
وآية الحجاب والقرار في البيت نزلت في السنة السادسة من الهجرة والسيدة خديجة ماتت قبل الهجرة بثلاث سنين💁‍♀️

عاشت خديجة بنت خويلد مع الشاب محمد الصادق الأمين إللي اتولد يتيم وأمه ماتت وهو صغير حتى جده إللي كان بيحبه جدا مات وهو صغير وعمه كان مشغول بعياله وتجارته،
فمكنش في حد يربيه

#قصص_الانبياء(٢)
#السيرة_النبوية
#الحلقة_الثامنة
#نزول_الوحي

وقفنا المرة إللي فاتت عند محمد بن عبد الله لما كان بينام ويشوف رؤيا ويلاقيها اتحققت أول ما يصحى من النوم زي ما شافها بالضبط،
وقلنا إنه كان بيمشي في الطريق فيسمع صوت من وراه بيقول :
السلام عليك يارسول الله ولما كان يبص واره مكنش بيلاقي حد فمكنش عارف إيه الصوت ده،
كان في الفترة دي بيحب يختلي بنفسه ، يكون لوحده يعني يتعبد، واحنا قلنا إنه مكنش بيعبد الأصنام لأنه كان عارف بفطرته إن في إله للكون ده،
وخلال سنين حياته والأحداث إللي حصلت له من حادثة شق الصدر،
والكلام إللي سمعه من بُحيرى الراهب والناس إللي كان بيشوفهم بيدعوا لدين إبراهيم زي
《 قِس بن ساعدة و زيد بن عمرو بن نُفيل》
كان عارف إن في إله ليس كمثله شيء ..وإن له طريقة معينة في العبادة،
فكان بيخرج للجبال ويقعد أيام برة البيت يتدبر ويتفكر الإله خالق الكون ده ويتفكر في أحداث حياته إللي عدت وكأنه كان مستني حاجة👌
وعبادة التفكر دي عبادة عظيمة هشرحها لكم بعد ما احكي لكم قصة زيد بن عمرو بن نفيل ،
لأن قصته عجيبة فعلا🙊
احنا عارفين إن الناس في الجاهلية كانوا بيعبدوا الأصنام وكان في بقايا من أهل الكتاب من اليهود والنصارى،
ففي يوم من الأيام لما كان أهل مكة اجتمعوا مرة يذبحوا ذبيحة عند صنم لهم،
انعزل عنهم كم رجل منهم زيد بن عمرو بن نُفيل، وورقة بن نوفل.. قالوا لبعض:
والله الناس دي بتعبد حجر لا يضر ولا ينفع...الله يخلق البهائم وينزل لها المطر من السماء ويطلع لها العشب من الأرض تأكله والناس يذبحوها لغيره😑
فقالوا لبعض: طب والحل😕

قالوا : خلونا ندور على الدين الصحيح 👌
فكل واحد راح في طريق يبحث عن الدين الحق، ورقة بن نوفل قابل راهب من رهبان النصارى ،
فتعلم منه النصرانية فتنصر وبقى على دين عيسى عليه السلام وبقى عالم في النصرانية،
زيد بن عمرو بن نفيل قابل واحد من علماء اليهود فسأله عن الدين الحق فقعد يشرح له الدين فزي ما تقولوا مقتنعش😑
إنتم عارفين تحريفات اليهود في التوراة😶

فسأله عن دين تاني فالعالم اليهودي قال له:
الدين الوحيد إللي أعرفه غير اليهودية هو إنك تكون حَنِيف،
فقال له: يعني إيه حنيف🤨...فاليهودي قال له:
إنك تكون على دين إبراهيم👌
طيب إيه هو دين إبراهيم😓
قال له : معرفش ..ده دين قديييم اندثر محدش يعرف عنه حاجة🤷‍♂️
فمشي وسابه واستمر يبحث عن الدين، لحد ما قابل واحد من علماء النصارى سأله عن الدين ،
فحصل معاه زي برده ما حصل مع اليهودي، لأن برده النصرانية كان دخل فيها تحريف،
احنا بنتكلم في أكثر من خمسمائة سنة بعد رفع عيسى عليه السلام 😅
والإنجيل محدش بدأ يكتبه إلا بعد مئتين سنة من رفع عيسى عليه السلام، فحصل تحريف في الإنجيل.

☆الإنسان إللي فطرته سليمة لما بيسمع حاجة في الدين غلط قلبه بيحس إن في حاجة غلط...مش مرتاح..مش متطمن😑
ومن هنا جاء حديث :
" استفت نفسك وإن أفتاك الناس وأفتوك"
وحديث:
" اسْتَفْتِ قَلْبَكَ وَاسْتَفْتِ نَفْسَكَ ثَلَاثَ مَرَّاتٍ الْبِرُّ مَا اطْمَأَنَّتْ إِلَيْهِ النَّفْسُ ،
وَالْإِثْمُ مَا حَاكَ فِي النَّفْسِ وَتَرَدَّدَ فِي الصَّدْرِ وَإِنْ أَفْتَاكَ النَّاسُ وَأَفْتَوْكَ"
يعني ممكن مثلا حد يفتيكي بحاجة إنها حلال و بعدين حسيتي من قلبك كده إن إللي بيفتي ده بيألف وإنتي من جواكي مش متطمنة وقلقانة...فهنا بقى لا يجوز العمل بالفتوى لو إنتي مش متطمنة لها تخيلي🙊

مثلا يعني الشيخ إللي يقول لك النمص حلال مطلقا أو النمص حلال لو بإذن الزوج...إنتي من جواكي هتحسي بإنك مش مطمئنة كده😐
وهتلاقوا فتاوى كتير كده فعلا تسمعيها تحسي إن قلبك مش مرتاح 😥
أهه لو حسيتي بكده مينفعش تقولي أنا مليش دعوة أنا هاخد برأي الشيخ وخلاص وحطها في رقبة عالم واطلع سالم🤓
لا يا حبيبتي مينفعش..مفيش الكلام ده 😅
الفتوى من المفتي مش هتخلصك من ربنا لو إنتي شكيتي ولو للحظة من جواكي إن الفتوى فيها حاجة مريبة وإنتي مش مرتاحة للموضوع😶

بس استنووووا😱
الكلام ده 👆 للمؤمن صاحب القلب السليم😅
يعني ميجيش واحد غرقان في المعاصي والموبقات وتقوليله حلال وحرام يقول لك: هستفتي قلبي😌😎
أهه ده لو استَفْتى قلبه في الكبائر مثلا...قلبه هيقول له:
حلالٌ حلالٌ حلال 🙃
فلما تسمعي كلام حد من بتوع الفتاوى إياها وحسيتي إن قلبك مش مستريح للكلام..افرحي...لأن قلبك كده يبقى سليم😁
واحنا عندنا القاعدة بتقول إييييه:
"يوم لا ينفع مال ولا بنون إلا من أتى الله
《بقلب سليم》"😉

《الكلام بالتفصيل في شرح الحديث على موقع الإسلام سؤال وجواب》

فزيد بن عمرو بن نفيل كانت فطرته سليمة وكان فعلا صادق في بحثه عن الحق ،
عشان كده حس إن كلام النصراني مش مقنع بالنسبة له فسأله زيد : مفيش دين تاني،
فقال له النصراني : معرفش غير إنك تكون حنيف👌
فقال له : يعني إيه حنيف🤨
قال له : دين إبراهيم وقال له زي ما قال اليهودي،
فقال زيد بن عمرو بن نفيل:
يارب أشهدك إني على دين إبراهيم ..كلهم بيقولو

#قصص_الأنبياء(٢)
#السيرة_النبوية
#الحلقة_التاسعة
#المدثر

وقفنا المرة إللي فاتت عند محمد بن عبد الله لما نزل من الغار وهو خايف وراح لزوجته خديجة وهو مرعوب من إللي شافه فزوجته قعدت تهدّيه وتقول له متخفش ربنا مش هيضيعك،
وقعدت تذكره بصفاته وأخلاقه وأعماله الصالحة فهدِي واطمأن😊
لكن برده مسابوش نفسهم للأوهام وياترى الرجل ده كان جن ولا كان إيه بالضبط🤔
بدأوا يدوّروا مين إللي يقدر يفسر لهم إللي حصل ده، فخديجة كان لها ابن عم اسمه ورقة بن نوفل فاكرينه 😉
هي كانت عارفة عن ورقة بن نوفل إنه تنصر وكان عنده علم كثير،
فشافت إن ده أنسب واحد يقدر يفسر لهم إللي حصل👌

☆وهنا خديجة رضي الله عنها بتعلمنا حاجة مهمة جدا وهي إننا نسأل الناس إللي عندها علم فعلا،
هي ليه مقالتش خلينا نروح نسأل الكهنة،
ولا سادات قريش،
لأنها عارفة إنهم مهما كان عندهم علم بسبب اتصالهم بالجن فمش هم دول إللي هيدوها الإجابة المضبوطة👌
وخصوصا إنها عارفة إن زوجها محمد لا يحب الكهنة ولا السحرة ولا الأصنام😑
فأخذت زوجها وراحوا لورقة بن بن نوفل وكان ورقة في الوقت ده شيخ كبير وأصابه العمى،
فخديجة قالت لورقة :
في حاجة غريبة حصلت فاسمع من ابن أخيك👌
فحكى محمد بن عبد الله لورقة كل إللي حصل معاه وإزاي إن الرجل حضنه جدا لدرجة إن كان حاسس إن روحه هتطلع😮

☆سؤال هنا😁
هو ليه جبريل عليه السلام حضن رسول الله صلى الله عليه وسلم بشدة كده وخلاه يتألم🤔
أولا :
جبريل عليه السلام من الملائكة وهو أعظم الملائكة وأشرفهم مكانة عند الله،
والملائكة دول مخلوقات بتعمل إللي ربنا يقول لها عليه،
يعني محدش فيهم بيتصرف كده منه لنفسه😉
فجبريل عليه السلام لما عمل كده مع رسول الله صلى الله عليه وسلم كان بأمر من ربنا عشان يوضح نقطتين مهمين:
👌
أولا:
دي رسالة لنا إن يا أيها الناس محمد بن عبد الله ده بشر زيكم بيخاف زيكم وبيمرض وبياكل وبيشرب،
وبيحس بالألم فكل حاجة هيعملها بعد كده يستطيع أي بشر إنه يقلده فيها،
يعني هو معندهوش قوة خارقة ولا حاجة...هو بشر👌

ثانيا : العنف ده كله عشان جبريل يقول لرسول الله بلسان الحال :
يا محمد انتبه إنت مش بتحلم..إنت مش بيتهيأ لك...ولا دي أحلام يقظة..
إللي بيحصل لك كده حقيقي ..انتبه كويس عشان الكلام إللي هقوله 👌
فبدل ما جبريل عليه السلام يقعد يشرح الكلام ده بلسانه وصل له المعنى بإنه يحضنه بقوة ثلاث مرات😉
وخصوصا إنه قال له اقرأ وجبريل عارف إن رسول الله لا يعرف القراءة والكتابة💁‍♀️
زي ما المدرس بيقول للطلبة بتوعه اكتبوا فالكل بيستعد للكتابة،
فقال له اقرأ عشان يستعد لقراءة الكلام إللي هيقوله👌

ورقة بن نوفل عمال يسمع ويسمع وفجأة قال :
الله أكبر...إنت جاءك الناموس الأكبر إللي كان بينزل على موسى😲
ياريتني كنت صغير في السن...شاب قوي وأنا كنت هنصرك بقوة لما قومك يخرجوك من بلدك💪🏻

☆ورقة بن نوفل كان عارف إن الزمن ده زمن نبي وكان مستنيه عشان يؤمن به ، لأن وصف الزمن ووصف النبي ده كان موجود عند أهل الكتاب من اليهود والنصارى👌
محمد بن عبد الله بيسمع كلام ورقة بن نوفل...
ناموس أكبر إيه ...ومين دول إللي هيخرجوني من مكة؟
قومي ..أهل مكة يخرجوني أنا؟
الصادق الأمين؟
ده هم إللي أطلقوا علي اللقب ده
يخرجوني أنا؟
أنا إللي بساعد المظلومين والفقراء والأيتام وبكرم الضيوف؟
يخرجوني أنا وأنا أشرف الناس نسبا ومن سادات مكة وحفيد عبد المطلب إللي الناس كانت بتهابه وبتعمل له ألف حساب؟
فقال له ورقة بن نوفل :
الناموس الأكبر هو جبريل إللي بينزل على الأنبياء..يعني إنت دلوقتي نبي😊
ومفيش أي أحد جاء باللي إنت جئت به ده إلا عُودِي،
يعني الناس بقوا أعداء له وآذوه😞

☆أنا عايزاكم تتخيلوا المشاعر إللي كانت في قلب محمد بن عبد الله في اللحظة دي🙊
تخيلي نفسك كده وإنتي لسه بدأة إلتزام أو مثلا عايزة تلبسي النقاب،
وواحدة تبدأ تقولك خدي بالك الناس مش هتسيبك،
حتى أهلك هتلاقيهم بيعارضوكي في كل حاجة وهيقعدوا يتريقوا ويقولوا أيوة يا ست الشيخة وكلام كثيييير،

فإنتي تستغربي...ليه..هو أنا هعمل حاجة غلط🤨
ده أنا هطيع ربنا وأحفظ نفسي من الفتن عشان أدخل الجنة😥
أهه ده نفس الموقف إللي كان فيه محمد بن عبد الله👌
طبعا هو دلوقتي مستغرب ومش فاهم يعني إيه أنبياء ولا إيه قصة حياتهم ،
هو ممكن كان بيكون سمع كلمة من هنا على كلمة من هنا لكن ميعرفش أي حاجة عنهم نهائي😶

◇عارفين قصص الأنبياء إللي اتكلمنا عنهم،في الوقت ده مكنش يعرف عنهم أي حاجة خالص حتى ربنا قال له في القرآن :
"تِلْكَ مِنْ أَنْبَاءِ الْغَيْبِ نُوحِيهَا إِلَيْكَ مَا كُنْتَ تَعْلَمُهَا أَنْتَ وَلا قَوْمُكَ مِنْ قَبْلِ هَذَا "

فبدأ يتساءل: نبي...أنا...طب إزاي؟
معقول ربنا اختارني أنا من بين كل البشر عشان أكون نبي آخر الزمان؟

☆أصل النبوة دي يا جماعة بتبقى اختيار من عند ربنا😅
مش واحد مثلا يقعد يعبد ربنا ويجتهد في العبادة فربنا يعطي له النبوة🤓
النبوة دي اختيار من عند ر