#قصص_الأنبياء(٢)
#السيرة_النبوية
#الحلقة_السادسة_والعشرون
#موت_أبي_طالب

كنا واقفين المرة إللي فاتت عند أبو جهل لما كان واقف بيدافع عن نقض الصحيفة،
وقصاده خمسة منظمين من سادات مكة عايزين ينقضوا الصحيفة،
وهم واقفين كلهم بيتخانقوا كده ...فجأة لقوا أبو طالب بن عبد المطلب عم رسول الله صلى الله عليه وسلم داخل عليهم المسجد🤨
فشاف ابو طالب الناس واقفة وبتتكلم فدخل في الكلام وقال لهم:
ابن أخويا بيقول إن الصحيفة إللي إنتم معلقينها في الكعبة وفيها قانون المقاطعة أكلتها دودة الأرض ومسبتش فيها حاجة غير اسم الله عز وجل...باسم اللهم👌
كفار مكة استغربوا إيه إللي بتقوله ده🤨
فقال لهم: روحوا هاتوا الصحيفة لو لقتوها زي ما ابن أخي قال...ترجعوا عن المقاطعة،
ولو كان كاذب هنتركه لكم وإنتم خذوه واقتلوه💁‍♂️
فقالوا : صح معاك حق ..ده العدل😕
فراح زعماء مكة ودخلوا الكعبة وبيشوفوا الصحيفة لقوها زي ما رسول الله قال🙊
معجزة واضحة أهه قصادهم، طبعا مكنش في حل تاني غير إنهم ينهوا المقاطعة زي ما وعدوا أبي طالب،
وانتهى حصار المسلمين بعد ثلاث سنوات في محرم من السنة العاشرة من البعثة،

☆شوفوا هو ربنا كان قادر إنه ينهي الموضوع كله في لحظة،
لكن ربنا أراد إنه يعلم الصحابة ويعلم كل الأجيال إللي هتيجي بعدهم: الصبر والثبات على الإيمان،
وكمان بيعلمنا إن أصعب المشاكل إللي ممكن يكون الإنسان فيها ممكن تتحل من طريق عمره ما يخطر على بال أحد أصلا،
وبيحله كمان من أصعب الأبواب تخيلوا 😅
الطبيعي إن إللي يسعى في نقض الصحيفة مين؟
بنو هاشم والمسلمون صح...لأنهم اكثر ناس متضررين،
ربنا قال للجميع لأ...إللي هيسعى في حل الموضوع رجل كافر ملوش علاقة أصلا بأي حاجة 👌
ومش بس كده ..خذوا الأصعب إللي هينهي القصة دي كلها..دودة😶
متخيلين...ربنا سخر دودة عشان تنهي حصار صعب شديد استمر ثلاث سنوات على المسلمين😳
الدودة قعدت ثلاث سنوات تأكل في الصحيفة، حد كان يخطر على باله إللي حصل ده أصلا🤷‍♀️
فاتعلموا الصبر واتعلموا كويس قوي كلام ربنا:
"وَمَا يَعْلَمُ جُنُودَ رَبِّكَ إِلَّا هُوَ" 👌
كل حاجة هتتحل بس اصبروا وإنتم هتشوفوا العجب 😁

انتهى الحصار وخرج المسلمون أشد ثباتا على الإسلام وأقوى يقينا في الله😊
في بدايات السنة العاشرة من البعثة مرض أبو طالب عم رسول الله،
كان وصل عمره لثمانين سنة، وكمان خرج من حصار ثلاث سنوات أكل فيها ورق الشجر ،
ده غير القلق إللي كان عايش فيه بسبب خوفه على رسول الله صلى الله عليه وسلم،
فكل ده أثر على صحته وأصبح مريض نايم في السرير مش بيتحرك،
الناس كلها عرفت بمرض أبي طالب وتوقعوا إنه يموت قريب😶
فخاف زعماء مكة🙊
هم مش ناويين يسيبوا رسول الله ، هيؤذوه يعني هيؤذوه😑
لكن المشكلة إنهم لو آذوه بعد موت أبي طالب، العرب هتعايرهم...إنتم استغليتم موت عمه عشان تستفردوا بيه وتعملوا إللي إنتم عايزينه😏
وهم كانوا بيراعوا أوي إن محدش يعيرهم، كانت حاجة كبيرة عندهم 😅
عملوا إيه🤔
راح وفد من خمسة وعشرين رجل من سادات مكة لأبي طالب ،منهم أبو جهل، وأبو سفيان وأمية بن خلف، وعتبة بن ربيعة وغيرهم،
اجتمعوا عنده وقالوا له:
يا أبا طالب!
إنت عارف مكانتك عندنا عاملة إزاي، وإنت شايف حالتك إيه دلوقتي، واحنا خايفين عليك من الموت وإنت عارف إللي بيننا وبين ابن أخوك😥
فانت ابعث حد يجيبه ونشوف حل وسط بيننا، احنا هنسيبه في حاله وهو يسيبنا في حالنا،
ونعيش في سلام مع بعض من غير أي مشاكل ، أظن مفيش أحسن من كده🤷‍♂️
☆يعني عايزين رسول الله يشوف الكفار يعبدوا الأصنام وميتكلمش ولا يدعوهم،
عايزين رسول الله يتقبل الناس على كفرهم وصباح الخير يا جاري وإنت في حالك وأنا في حالي 😀
عايزين رسول الله يشوف الفواحش والظلم والربا وكل أمور الجاهلية ويسكت عادي،
مش إنت بتعبد إلهك وأنا بعبد إلهي، خلاص بقى مشيها،
سيبك من الأمر بالمعروف والنهي عن المنكر والكلام ده، كل واحد حر😀

أظن العرض ده يعتبر مغري جدا لرسول الله والمؤمنين 😮
أهل مكة بعد ما كانوا رافضين الإسلام تماما وبيعذبوا المسلمين عشان يتركوا دينهم،
قدموا تنازلات أخيرا وتقبلوا فكرة وجود الإسلام، وكمان المسلمين لسه خارجين من حصار كان تاعبهم جدا،
فهم خلاص مش هيقدروا يستحملوا أي حاجة دلوقتي خالص😣
وأبو طالب إللي كان بيحمي رسول الله هيموت، فدي تعتبر فرصة مثالية للمسلمين مش هتتعوض🙊

وأرسل أبو طالب لرسول الله فلما جاء قال أبو طالب لرسول الله في حضور وفد المشركين:
دول أشراف قومك اجتمعوا على إنهم يعطوك ويأخذوا منك،
يعني هتعيشوا مع بعض في سلام من غير أي مشاكل👌

فرد عليه رسول الله صلى الله عليه وسلم وقال:
ياعم! إيه رأيك أدعوهم لحاجة أحسن من كده؟
فقال أبو طالب: هتدعوهم لإيه🤔
قال رسول الله:
أدعوهم إنهم يقولوا كلمة واحدة يملكوا بها العرب والعجم!!
أصلا أهل مكة مكنوش يحلموا بوحدة العرب،
دلوقتي بتكلمنا إننا نكون حكام للعرب والعجم...فارس والروم😳
فأبو جهل بكل حماسة قال:
قول إيه هي ا

#قصص_الأنبياء(٢)
#السيرة_النبوية
#الحلقة_السابعة_والعشرون
#عام_الحزن

وقفنا المرة إللي فاتت عند رسول الله صلى الله عليه وسلم لما عمه أبو طالب مات وقريش ما صدقت واشتدت في الأذى على رسول الله جدا،
اجتمع على رسول الله الأذى الجسدي والأذى النفسي، فكان إللي بيخفف عنه ويصبّره بعد ربنا هي زوجته خديجة😊
كانت معاه من البداية،
من فترة شبابه لحد نزول الوحي، وفترة الجهر بالدعوة وشِعب أبي طالب،
وجعلت كل أموالها تحت تصرف رسول الله، يتصرف فيها زي ما هو عايز عشان تعينه على نشر دعوة الإسلام
فخديجة كانت لها مكانة خاصة في قلب رسول الله وكانة خاصة عند رب العالمين ،
لدرجة إن ربنا أرسل لها السلام مع جبريل ليخبرها به رسول الله 😮
وربنا بشرها على لسان رسول الله ببيت في الجنة من اللؤلؤ المجوف هادئ جدا مفهوش أي دوشة،
"عن أبي هريرة رضي الله عنه قال:
"أَتَىَ جِبْرِيلُ النّبِيّ صلى الله عليه وسلم. فَقَالَ:
يَا رَسُولَ اللّهِ هَذِهِ خَدِيجَةُ قَدْ أَتَتْكَ، مَعَهَا إِنَاءٌ فِيهِ إِدَامٌ أَوْ طَعَامٌ أَوْ شَرَابٌ،
فَإِذَا هِيَ أَتَتْكَ فَاقْرَأْ عَلَيْهَا السّلاَمَ مِنْ رَبّهَا عَزّ وَجَلّ، وَمِنّي، وَبَشِّرْهَا بِبَيْتٍ فِي الْجَنّةِ مِنْ قَصَبٍ لاَ صَخَبَ فِيهِ وَلاَ نَصَبَ".

مع إن الجنة أصلا هادئة ، لكن زيادة تخصيص لخديجة؛
لأنها كانت دائما بتحافظ على هدوء البيت لرسول الله عشان يرجع يرتاح فيه،
لم يُذكر عنها إنها عملت مشكلة مع رسول الله، ولا رفعت صوتها عليه ولم تُتعبه أبدا، و بالعكس كمان دي كانت بتساعده وتعينه،
مع إن كان في فرص كثيرة للمشاكل بسبب الدعوة،
لكن مع ذلك تحمّلت الأذى مع رسول الله وصبرت،
فبقت أفضل نساء أهل الجنة، فتخيلوا كانت امرأة صالحة أد إيه رضي الله عنها😊
وخير متاع الدنيا المرأة الصالحة، فلما تكون امرأة بالصلاح ده ، زوجها هيحبها أد إيه،
ولو الزوج ده بقى رسول الله صلى الله عليه وسلم هيبقى الحب عامل إزاي 🙊
ومع إن الزواج بأكثر من امرأة كان منتشر عادي في الجاهلية
إلا إن رسول الله لم يتزوج عليها أبدا خلال حياتها معاه إللي استمرت خمسة وعشرين سنة👌
وده من تقديره لها عليه الصلاة والسلام، فهي أغنته عن أي امرأة وكانت له نعم الزوجة،
فكان من وفائه لها وهو صاحب الخلق العظيم إنه لا يُكدر عليها الحياة بسبب الغيرة 😉

لكن مهما كان الإنسان بيحب شخص ومرتبط به فسنة الله في الكون لا تتبدل ولا تتغير،

بعد موت أبي طالب بثلاثة أيام وفي رواية ثانية قيل شهر ماتت خديجة رضي الله عنها😞

بصفة عامة موت الزوجة بالنسبة للرجل بيبقى مصيبة ،وكل ما طالت العشرة كان الوضع أشد والفراق أصعب،
فتخيلوا لما تكون زوجة زي خديجة رضي الله عنها وتموت،
وكمان ماتت في أشد الأوقات على رسول الله👌
لسه رسول الله مخرجش من حزنه على موت أبي طالب على الكفر،
فربنا يبتليه بفقد السكن ، بفقد رفيقة عمره وأم أولاده😞
ماتت إللي كانت بتهون عليه وتعطيه الثقة لما يشتد عليه الأذى من قريش، ابتلاءات ورا بعض ورا بعض،
ورسول الله في الإبتلاءات دي مكنش شاب صغير ده كان عنده خمسين سنة 😥
خمسين سنة وشايل هم المسلمين في الحبشة وهم المسلمين المستضعفين في مكة،
وهم نشر الدعوة ده غير الأذى والإبتلاءات إللي بيتعرض لها هو نفسه شخصيا😔
ومع ذلك رسول الله لم يعترض على قضاء الله، مقلش هو أنا ليه ربنا بيعمل معايا كده وأنا رسول،
مقلش هو إيه الحكمة يعني إن ربنا يبتليني الإبتلاءات دي كلها،
مقلش يارب كفاية أنا تعبت ومبقتش مستحمل ،
بتسمعوا الكلام ده من الناس ولا لأ، وابتلاءاتهم متجيش ذرة في ابتلاءات رسول الله صلى الله عليه وسلم😑

رسول الله كان بيحزن ،والحزن ده شيء طبيعي في النفس البشرية👌
واحنا قلنا قبل كده إن الحزن لا يتعارض مع الصبر والرضا لما اتكلمنا في قصة يوسف عليه السلام الجزء الخامس ،
لما يعقوب عليه السلام وهو نبي حزن لفقد يوسف وأخوه،

المشكلة مش في الحزن ،ده شيء طبيعي لكن المشكلة لما الحزن يخلي حياتنا تقف😑
تلاقي البنت مامتها ماتت أو أبوها أو...أو... وتقول خلاص أنا حياتي وقفت ومش عارفة استمر في الحياة،
وده سببه ضعف الإيمان، لازم نكون مستعدين نفسيا وإيمانيا لفراق أي أحد عشان منتصدمش وحياتنا تقف👌

أي حد بنحبه هنفارقه في يوم من الأيام،
قال جبريل عليه السلام لرسول الله صلى الله عليه وسلم
"أحبب من شئت فإنك مُفارقه"👌
سواء أم أو أب أو جد أو ابن أو زوج أو زوجة أو...أو....زي ما حصل مع رسول الله صلى الله عليه وسلم وربنا قالها لرسول الله ولنا:
"إِنَّكَ مَيِّتٌ وَإِنَّهُم مَّيِّتُونَ "

رسول الله هو أشد البشر بلاءا على الإطلاق ، ومهما كانت ابتلاءاتنا فهو ابتلاءاته كانت أشد،
ومع ذلك حياته موقفتش ، كان بيحزن ويتألم لكن الحياة بتستمر،
عنده دعوة لازم يوصلها لكل أهل الأرض، عنده أصحاب بيتعذبوا لازم يهون عليهم،
رسول الله عنده مسؤوليات تخيلوا لو حزنه خلى حياته تقف!!
كل حاجة هتضيع😳
فينفعش احنا كمان حياتنا تقف، عندنا مسؤوليا

#قصص_الأنبياء(٢)
#السيرة_النبوية
#الحلقة_الثامنة_والعشرون
#رحلة_الطائف

وقفنا المرة إللي فاتت عند رسول الله ﷺ لما خرج من مكة ومعاه زيد بن حارثة عشان يروح الطائف يدعو فيها الناس وتكون بديل لمكة،
وصل رسول الله ﷺ للطائف بعد حوالي يومين من مشيه على قدميه في الصحراء،
نحاول نحط نفسنا مكان رسول الله ﷺ ونفكر معاه هنبتدي إزاي👌
خلونا نقف مع رسول الله ﷺ على باب مدينة الطائف،
نبدأ إزاي ومنين ، وندعوا مين 🤔
وخصوصا إن الموضوع المرة دي مش مجرد دعوة للدخول في الإسلام فقط،
ده دعوة وكمان رسول الله ﷺ هيطلب منهم إنهم ينصروه ضد قريش🙊
فاحنا محتاجين ناس لها وزن في البلد وكلمتها مسموعة،
فهنروح لمين🤔
طبعا هنروح لسادات أهل الطائف، لأن دي مهمة سياسية مش هينفع فيها عوام الناس المستضعفين💁‍♀️
لأن المستضعفين مش هيقدروا يحموا رسول الله ﷺ ودعوة الإسلام من قريش،
عايزين حد يتحمل المسؤولية ...له نفوذ ومكانته عالية بين الناس لما يقول الكلمة الناس بصفة عامة تسمع وتطيع،
ولأن رسول الله ﷺ ملوش حد يُجيره أو يحميه في الطائف،
فمش هيقدر يدعو أي أحد إلا لما يكون في حماية له🤷‍♀️
فذهب رسول الله ﷺ إلى ثلاثة إخوة وهم من سادات الطائف عشان يتكلم معاهم👌

☆ممكن حد يسأل طيب ليه ربنا ميحمهوش ويؤيده بالمعجزات يعني وخلاص ،ماهو ربنا قادر 🤔

قلنا قبل كده إن رسول الله ﷺ قدوة، وحياته منهج ،وربنا أمرنا إننا نتبعه في كل حاجة،
عشان كده رسول الله ﷺ لازم يأخذ خطوات عملية تنفع لأي أحد يأتي من بعده وهيكون في نفس الموقف بتاعه👌
وحصل فعلا إن واحد من المسلمين اتحط في موقف شبيه بموقف رسول الله ﷺ،
الموقف كان لواحد اسمه عبد الرحمن بن معاوية بن هشام بن عبد الملك،
إللي اتعرف بإسم 《عبد الرحمن الداخل》 ، لما كان العباسيون بيقتلوا أي أحد من بيت الخلافة الأموية،
هرب عبد الرحمن الداخل في قصة طويلة وكان مُطارد ومطلوب الرأس في كل مكان،
لحد ما وصل للأندلس ، وقبل ما يدخل الأندلس كان أرسل مولاه لرؤساء قبائل البربر عشان يساعدوه في الدخول للأندلس،
ويقفوا معاه عشان يقدر يحكم الأندلس ويخلصها من الظلم إللي كانوا فيه ساعتها ويقيم الخلافة الأموية في الأندلس بعد سقوطها في المشرق،
فده واحد من المسلمين استفاد من سيرة رسول الله ﷺ وتخطيطه للدخول للطائف👌

وصل رسول الله ﷺ لسادات الطائف الثلاثة وعرفهم بنفسه ودعاهم للإسلام وشرح لهم وضع المسلمين كله،
وإنهم محتاجين الدعم والنصرة ضد قريش،
هم كانوا ثلاثة إخوة أبناء واحد من سادات الطائف اسمه عمرو بن عُمير، خلونا نشوف ردوا على رسول الله ﷺ قالوا إيه :
الابن الأول كان اسمه عبد ياليل قال لرسول الله ﷺ:
ده أنا أقطع أستار الكعبة لو ربنا أرسلك 😤
《بيقول كده إعتراضا على ربنا يعني إزاي يرسلك إنت رسول😑》

الابن الثاني وكان اسمه :مسعود قال:
هو ربنا ملقاش غيرك يرسله يعني🙄

الابن الثالث كان اسمه حبيب، وده حاول يستظرف شوية 😀
قال:
أنا مش هكلمك أبدا 🤚
لو كنت رسول فأنت أعظم من إني أتكلم معاك😰
ولو كنت كاذب فأنت أحقر من إني أكلمك😒
يعني كده كده مش هكلمك😑

ردودهم على رسول الله ﷺ كانت في قمة السفاهة وانعدام الأدب معاه😞
تخيلوا نفسية رسول الله ﷺ وهو بيسمع الكلام ده، والصدمة إللي اتصدمها من كلامهم😥
ومع ذلك رسول الله ﷺ قال لهم:
طيب ده رأيكم ، بصوا متقولوش لأحد إننا حصل بيننا الكلام ده، خلوه سر بيننا!
ورسول الله ﷺ مش عايز الخبر يوصل لقريش، لأنهم لو عرفوا هيتهموه صراحة كده بالتخابر مع قبيلة أجنبية وإنه عايز يزعز نظام الحكم في مكة ،
وإنه عايز يثير الفتنة، ومش بعيد يأخذوها سبب عشان يقتلوا رسول الله ﷺ ويقولوا للناس ده خائن وتبقى قضية رأي عام بقى،
وحتى الناس إللي كانوا متعاطفين معاه ينقلبوا ضده،
وإنتم عارفين باقي القصة😀

الثلاثة دول لم يحفظوا سر رسول الله ﷺ ، مكنش عندهم لا أخلاق ولا مروءة،
مش بس أفشوا سر رسول الله ﷺ ، ده كمان حرضوا السفهاء والغلمان على أذية رسول الله ﷺ 😑

رسول الله ﷺ لم ييأس وقعد في الطائف عشرة أيام مسبش واحد من أشرافهم إلا وكلمه،
ومحدش استجاب منهم إطلاقا وكلهم رفضوا دعوة الإسلام ونصرته ﷺ 😞
في اليوم العاشر قالوا له: اخرج من بلدنا ،مش عايزينك فيها 😡
وعملوا صفين من العبيد والسفهاء خارج الطائف،
ولما أخرجوا رسول الله ﷺ جعلوه يعدي بين الصفين دول وبدأ العبيد والسفهاء يرموه بالحجارة وبدأ رسول الله ﷺ ينزف ،
وهو مش عارف يتصرف إزاي،
وكان معاه زيد بن حارثة بيحاول يبعد عنه الحجارة ومش عارف،
الحجارة بتتحدف من كل مكان، واتفتحت رأس زيد رضي الله عنه، ده غير الشتيمة واللعن 😞
ورسول الله ﷺ ومعاه زيد بيحاولوا إنهم يخرجوا من بين الصفين دول ،
وحتى العبيد لم يتركوهما، طلعوا يجروا وراهم يحدفوهم بالطوب لمسافة كبيرة في روايات تقول قعدوا يجروا وراهم خمسة كيلو،
لحد ما لقوا حديقة فدخل فيها رسول الله ﷺ ومعاه زيد حارثة،
فخاف العبيد يدخلوا وراءهم ورجعوا للطائف،
دخل رسول الله ﷺ وقعد في الحدي

#قصص_الأنبياء(٢)
#السيرة_النبوية
#الحلقة_التاسعة_والعشرون
#إسلام_نفر_من_الجن
كنا واقفين المرة إللي فاتت عند سؤال مهم وهو إزاي ربنا يأذن لملك الجبال بتدمير مكة والطائف وفيهم ناس لم يؤذوا رسول الله ﷺ،
يعني مش كل الناس آذوا رسول الله ﷺ ، فإيه ذنب الناس الذين لم يؤذوه🤔

ساعات بعض الناس بيعملوا حاجات غلط، وإللي حواليهم راضيين،
أو شجعوهم على كده ، فاللي راضيين وشجعوا بيشاركوا الناس إللي عملت الخطأ في الإثم،
حتى لو في واحد مش موجود واتحكى له ومأنكرش الغلط ورضِي به ، كان له نفس ذنب إللي عمل كده، فربنا يعاقبه زي إللي عمل👌
قال رسول الله ﷺ :
" إذا عُمِلت الخطيئةُ في الأرض كان مَن شهدها فكرهها
– أو أنكرها – كمن غاب عنها، ومن غاب عنها فَرَضِيَها، كان كمن شهدها"

زي مثلا إللي حصل مع ناقة صالح عليه السلام ..فاكرين😁
التسعة إللي كانوا مفسدين شجعوا الرجل إللي قتل الناقة،
والعذاب نزل على القرية كلها ، لأنهم كانوا راضيين بقتلها 👌

مثال من أرض الواقع بتاعنا، لو واحدة صاحبتك راحت فرح كله اختلاط وأغاني وقعدت تحكيلك وتقولك عملنا وسوينا وحصل وحصل،
فإنتي لو قلتي ياريتني كنت معاكي، أو زعلتي إنك مرحتيش أو مأنكرتيش على صحبتك ورضيتي إللي هي عملته وإللي حصل في الفرح من المحرمات دي...هتاخدي نفس ذنب صاحبتك مع إنك محضرتيش🙊
لو واحدة بتحكيلك عن علاقتها المحرمة مع شاب وإنتي بتسمعي ومبسوطة وراضية وبتشجعيها على الغلط ده،
هتاخدي نفس ذنبها حتى لو إنتي عمرك ما كلمتي شاب😶
لو واحدة حكت لك إنها مسكت فلانة ومسحت بكرامتها الأرض ،وفرجت الدنيا عليها وإنتي قلتي لها جدعة وتستاهل و...و....
هتاخدي نفس ذنب إللي حكت لك مع إنك مكنتيش موجودة😑
قيسوا بقى على كده...إللي يُقتل ظلم مثلا والناس ترضى وتشمت فيه تاخد نفس وزر القاتل، وهكذا...

أي خطيئة تتعمل في أي مكان الأرض والناس ترضى عنها هياخدوا نفس ذنب إللي عملها🙊
شوفتوا إنكار المنكر بالقلب مهم إزاي👌
وده يودينا لنقطة مهمة وهي إن الناس لو تركوا الأمر بالمعروف والنهي عن المنكر ومحاولات الإصلاح ربنا يعذب الجميع، الصالح وغير الصالح😶
"وَاتَّقُوا فِتْنَةً لا تُصِيبَنَّ الَّذِينَ ظَلَمُوا مِنْكُمْ خَاصَّةً وَاعْلَمُوا أَنَّ اللَّهَ شَدِيدُ الْعِقَابِ"
ورسول الله ﷺ قال:
"إن الناس إذا رأوا الظالم فلم يأخذوا على يديه، أوشك أن يعمهم الله بعقابه"
فأهل الطائف استحقوا كلهم العذاب لأنهم إما وافقوا على أذى رسول الله ﷺ أو شجعوا أو فعلا آذوا رسول الله ﷺ،
وربنا عالم بحال كل واحد فيهم،
فلما يأذن بإهلاكهم جميعا معنى كده إنهم فعلا يستحقوا الهلاك ، وخصوصا إن ربنا لا يظلم مثقال ذرة👌

رجع رسول الله ﷺ لمكة وقبل وصوله وهو في وادي نخلة حصل معاه حادثة،
رسول الله ﷺ كان بيمشي وبعدين يقف يريح،
وراحته كانت إنه يصلي ركعتين 😊
وقف عشان يصلي، وهو بيصلي كان بيقرأ القرآن بصوت عالي،
فمين إللي كان معدي وسمع رسول الله ﷺ بيقرأ القرآن🙊
سبع أفراد من الجن😮

إيه إللي جابهم المكان ده أصلا🤨
لهم قصة 😉
بين زمن عيسى وزمن بعثة رسول الله ﷺ كانت الجن بيطلعوا عند السماء بيسترقوا السمع يعني بيتصنتوا على أهل السماء،
عشان يعرفوا بعض من أخبار الغيب ويقولوها للكهان،
وكانوا متعودين على كده ومفيش مشاكل، وفجأة اتمنعوا من استراق السمع😳
"وَأَنَّا لَمَسْنَا السَّمَاءَ فَوَجَدْنَاهَا مُلِئَتْ حَرَسًا شَدِيدًا وَشُهُبًا"
لقوا السماء اتملت ملائكة كثيرة يحرسوها،
ومعاهم الشهب المحرقة يقذفوها على أي واحد فيهم يحاول إنه يقرب من السماء، إللي يقرب يلاقي شهاب يُقذف عليه يحرقه👌
"وَأَنَّا كُنَّا نَقْعُدُ مِنْهَا مَقَاعِدَ لِلسَّمْعِ فَمَنْ يَسْتَمِعِ الْآنَ يَجِدْ لَهُ شِهَابًا رَصَدًا "

فلما اتمنعوا فجأة كده قالوا أكيد حاجة حصلت في الارض😮
وهم مكنوش عارفين إللي حصل ده بسبب إن ربنا يريد إنه ينزل عذاب بأهل الأرض ولا يريد لهم الخير 🤷‍♀️
"وَأَنَّا لَا نَدْرِي أَشَرٌّ أُرِيدَ بِمَنْ فِي الْأَرْضِ أَمْ أَرَادَ بِهِمْ رَبُّهُمْ رَشَدًا"

فقعدوا يدوروا عن السبب لحد ما لقوا رسول الله ﷺ واقف يصلي في وادي نخلة،
فسمعوه وهو بيقرأ فقالوا لبعض أنصتوا..اسمعوا كده😳
فقربوا من رسول الله ﷺ عشان يسمعوا كويس ومن شدة قربهم منه كانوا كأنهم بيطلعوا على بعض 😅
"وَأَنَّهُ لَمَّا قَامَ عَبْدُ اللَّهِ يَدْعُوهُ كَادُوا يَكُونُونَ عَلَيْهِ لِبَدًا "
دلوقتي رسول الله ﷺ ميعرفش حاجة خالص،
هو بيصلي زي ما بيصلي عادي،

والجن احنا قلنا عنهم قبل كده في قصص الأنبياء إنهم عالم زينا بالضبط بياكلوا ويشربوا ويتناسلوا ويموتوا،
وقلنا إن الشيطان هو الكافر من الجن، والعفريت هو المارد شديد القوة والدهاء والخبث😉
واحنا لا نراهم إلا لو تمثلوا في صورة شخص أو حيوان مثلا ،
فهم دلوقتي قريبين جدا من رسول الله ﷺ بيسمعوا القرآن ورسول الله ميعرفش عنهم حاجة👌
وكان الجن متعجبين جدا من كلام القرآن ومن فصاحته 😮
"وَإِذْ صَرَفْنَا إِل

#قصص_الأنبياء(٢)
#السيرة_النبوية
#الحلقة_الثلاثون
#هم_الدعوة
#الإعداد_للرحلة

اتكلمنا المرة إللي فاتت عن النفر من الجن الذين أسلموا بعد ما سمعوا رسول الله ﷺ يقرأ القرآن وهو قائم يصلي ورجعوا يدعوا قومهم للدخول في الإسلام،
رسول الله ﷺ مكنش يعرف إن في جن سمعوه ولا أي حاجة خالص عن القصة دي لحد ما نزل القرآن وأخبر رسول الله ﷺ بقصة الجن،
وإسلام المجموعة دي من الجن كانت من بشارات استجابة دعاء رسول الله ﷺ 😊
ربنا أراد إنه يهون على قلب رسول الله ﷺ بعد موت أبي طالب وموت خديجة والأذى إللي تعرض له في الطائف،
فكانت أولها ترقيق قلب اثنين من المشركين من أشد أعداء رسول الله ﷺ وإرسالهم للطعام مع عداس العبد النصراني،
وإسلام عداس وكانت دي ثاني البشريات،
وبعد كده إرسال ملك الجبال، وبعدين إسلام الجن 👌
فمهما كانت الأحداث مؤلمة والابتلاءات شديدة هتلاقي ربنا بيلطف بالإنسان😁

☆عارفين..في نوعين من اللطف:
لطف ظاهر ولطف باطن ،
اللطف الظاهر إن ربنا يبعد عنك الأذى، مثلا كنتي هتقعي من على السلم ومسكتي نفسك،
كانت هتخبطك عربية فبعدتي عن الطريق قبل ما تحصلك الحادثة وهكذا وده بيحصل كثير وبنشوفه،
وحتى تلاقينا كثير بنقول الحمد لله ده ربنا لطف بينا ...ده كان ممكن تحصل كارثة 😮
أما بقى اللطف الباطن فمعناه إن ربنا بيجعل في القلب سكينة واطمئنان كده ورضا، ومفيش قلق واضطراب مهما حصل لنا من المصائب والابتلاءات،
يعني في موقف رسول الله ﷺ قلبه كان فيه رضا واطمئنان وسكينة، ومش معنى إنه بكى وتألم فقلبه مفهوش رضا😱
لأ ..ده رسول الله ﷺ 😅
واحنا اتكلمنا عن الفرق بين الرضا والصبر وإنهم لا يتعارضوا مع الحزن والألم في قصة يعقوب لما فقد ابنه يوسف عليهما السلام 😉
فمع وجود الرضا والإطمئنان بيكون في مسحة حزن كده في القلب ودي حاجة طبيعية في النفس البشرية👌
يعني مهما كان القلب فيه سكينة ورضا واطمئنان فبيكون في القلب عضة حزن وألم،
يعني لما رسول الله ﷺ بكى وتألم ده كان بسبب عضة الحزن في قلبه ﷺ،
ولأن رسول الله ﷺ قدوة فكان لازم يمر بالألم ده عشان
لما تلاقي في قلبك عضة الألم والحزن دي مع إنك راضية بقضاء الله وقلبك فيه سكينة متستغربيش،
ربنا يقول لنا إن دي طبيعة النفس البشرية... قدوتكم إللي أمرتكم تتبعوه حصل معاه كده👌

فكان من لطف ربنا برسول الله ﷺ إنه يرسل له البُشريات عشان يخفف عن قلبه عضة الحزن إللي كان حاسس بها،
وربنا هيعمل حاجة لرسول الله ﷺ يمحوا بها عضة الحزن دي من قلبه تماااما هنعرفها إن شاء الله لما ييجي وقتها 😁

نرجع لرسول الله ﷺ إللي المفروض واقف خارج مكة ومحتاج إنه يدخلها ، لكن في مشكلة دلوقتي😕
هيدخل إزاي وظاهر الأوضاع إن دخول مكة في الوقت ده صعب،
واحتمال كبير يغدروا به ويقتلوه🙊
ماهو في وجهة نظرهم خائن لأنه خرج عليهم وراح يطلب النصر من قبائل تانية 😶
وهو ملوش أحد يحميه في مكة، كبير بني هاشم أبو طالب مات....أبو لهب من أشد أعداء الإسلام😑
وحتى لو مفيش خطورة على حياته،
لو رسول الله ﷺ دخل مكة كده عادي بعد ما طُرد من الطائف، المشركين هيشمتوا فيه وفي المسلمين وهيصوروا الموضوع إنه هزيمة لرسول الله ﷺ وللمسلمين ، وربنا يكفيكم شر شماتة الأعداء😞

رسول الله ﷺ فكر إزاي يدخل مكة ويحافظ على حياته وفي نفس الوقت لا يعطي الفرصة للمشركين إنه يشمتوا فيه ،
كان الحل إنه يستغل قانون من قوانين الجاهلية لصالحه وهو قانون الإِجارة، يعني الحماية،
وهو إن الرجل إللي ملوش أحد يحميه ،يدخل تحت حماية رجل له قوة ومنعة في القبيلة،
وطبعا مادام القانون مفهوش أي تعارض أو تنازل عن أي حاجة في الدين يبقى عادي جدا إننا نعمل به أو المسلم يستغله لمصلحته زي ما رسول الله ﷺ عمل،
يعني الإسلام مش بيحارب القوانين لذاتها، هو بيحارب القوانين إللي تتعارض مع تشريعات ربنا فقط🤚
فقرر رسول الله ﷺ إنه يدخل في جوار أو في حماية واحد من سادات مكة المشركين 👌

☆ليه😀
لأن لو رسول الله ﷺ دخل في حماية واحد من المسلمين هيبقى كأنه بيعلن الحرب على مكة وهنا هتنقسم مكة لفريق مؤمن وفريق كافر،
ورسول الله ﷺ مش عايز كده دلوقتي لأن مش هو ده الوقت المناسب للمواجهة،
المسلمين لسه مستضعفين، عايزين نحط قواعد ثابتة عشان لما تحصل المواجهة لا يُباد المسلمين ويرجع وضعهم أسوأ من الأول 😶
ومع إن عدّى عشر سنين لحد دلوقتي من بداية الدعوة للإسلام، إلا أن المسلمين لسه مستضعفين ،
وإللي بيدعو مين...ده رسول الله ﷺ أفضل من مشى على الأرض، سيد الأولين والآخرين ، المُؤيد بالمعجزات ولسه المسلمين مستضعفين،
واخدين بالكم من الرسالة إللي ربنا يريد إنه يوصلها لنا😀
ربنا بيقول لنا متستعجلوش على النتائج...اصبروا...إللي أحسن منكم بمراحل قعد عشر سنين يدعو ولسه المسلمين مستضعفين،
فما بالكم باللي أقل منه محتاج أد إيه 👌
وعشر سنين زمن مش قليل على فكرة،
ومع ذلك رسول الله ﷺ كان بيتصرف بحكمة مش بتهور زي ما بعض المسلمين بيعملوا ومستعجلين النتائج فيضيعوا تعب

#قصص_الأنبياء(٢)
#السيرة_النبوية
#الحلقة_الثانية_والثلاثون
#رحلة_الإسراء_والمعراج
#المعراج_الجزء_الأول

وقفنا المرة إللي فاتت عند جبريل عليه السلام لما أعطى رسول الله ﷺ كأسين واحد فيه لبن والثاني فيه خمر،
فشرب رسول الله ﷺ من الكأس إللي كان فيه لبن فقال له جبريل عليه السلام: هُديت وهُديت أمتك،
والمتوقع إن رسول الله ﷺ يرجع بقى لمكة لكن كان في رحلة ثانية مستنياهﷺ 😮
رحلة مختلفة عن أي رحلة ، رحلة المعراج..يعني الصعود للسماء،
هنبدأ بإزاي رسول الله ﷺ طلع للسماء رسول الله بيحكي وبيقول إنه طلع على حاجة زي السلم كده،
ولكن السلم ده مختلف، فهو مكون من ثلاث درجات، يعني يطلع الدرجة الأولى وبعدين الثانية وبعدين الثالثة وبعد الثالثة يوصل للسماء،
فكل سماء هيوصل لها هتكون بالطريقة دي، درجة اثنين ثلاثة وبعدين السماء وهكذا،
فصعد رسول الله ص مع جبريل على السلم الثلاث دراجات وبقى على باب من أبواب السماء الدنيا،
والسماء الدنيا إللي هي السماء الحقيقية مش الجزء الظاهر إللي احنا شايفينه ده 😅
حتى رسول الله ﷺ بيقول إنه لو أراد إنه يلمس السماء للمسها،
يعني يقدر يحط إيده عليها ويحسس عليها ويحس بها زي ما بنحط إيدنا كده على الحائط مثلا 😉
وطبعا مش هنسأل هو رسول الله ﷺ كان بيتنفس إزاي وهو في الفضاء الخارجي ومفيش أكسجين😀
احنا بنتكلم عن رسول الله ﷺ وبنتكلم عن ربنا يعني احنا برة السنن الكونية أصلا وبرة كل القوانين💁‍♀️
فلما وصل جبريل عليه السلام لباب من أبواب السماء الدنيا وخبط على الباب فخازن الباب ...الحارس يعني سأل : مين؟، فقال : جبريل!
فسأله خازن هل معك أحد فقال له جبريل عليه السلام :معي محمد!
فسأله الخازن :هو أُرسل إليه؟ يعني ربنا أمر إنه ييجي ، فجبريل عليه السلام قال : نعم !
،فقال الخازن فلنِعم المجيء جاء وفرح به أهل السماء ،
يعني كأن الخازن بيقول بلغتنا كده ده الدنيا نورت😍

☆هنشوف أد إيه في تشابه بين نظام الحياة في السماء والأرض،
فزي ما فيه عندنا في الأرض شركات مثلا وعليها حراس بيحرسوها وبيشوفوا إللي داخل وإللي طالع،
برده في السماء هنلاقي كل سماء عليها حراس من الملائكة وظيفتهم حراسة أبواب السماء 😉

لما دخل رسول الله ﷺ السماء الدنيا شاف رجل قاعد في السماء حوله سواد عظيم ،لما ينظر ناحية يمينه يضحك ولما ينظر ناحية شماله يبكي،
فرسول الله ﷺ سأل جبريل من هذا؟!
فقال له جبريل عليه السلام : هذا أبوك آدم سلم عليه!
فسلم رسول الله ﷺ على أدم، فقال آدم عليه السلام لرسول الله أهلا بابني ، أهلا بالابن الصالح والنبي الصالح فلنعم الابن أنت ،ودعا لرسول الله ﷺ بخير،
وبعدين مشي رسول الله مع جبريل عشان يكمل الرحلة😁

☆إذا كان رسول الله ﷺ مشفش والده، لكنه شاف أبوه الأكبر آدم عليه السلام😊.

◇نقف كده مع بعض ثواني نجاوب على كم سؤال 😁
¤أولا:
إزاي رسول الله ﷺ يسأل جبريل عن آدم عليه السلام من هذا وهو كان لسه مصلي معاه في المسجد الأقصى من شوية🤔

مبدئيا هو في خلاف بين العلماء، هل رسول الله صلّى بالأنبياء قبل المعراج ولا صلى بهم بعد المعراج ، في علماء قالوا إنه صلى قبل المعراج وعلماء قالوا إنه صلى بهم بعد المعراج وكل فريق له أدلته💁‍♀️
فأنا شرحت لكم المرة إللي فاتت إن رسول الله ﷺ صلى بالأنبياء قبل المعراج، وعلى الأساس ده تكون الإجابة كالتالي :
رسول الله ﷺ لما دخل المسجد دخل صلى على طول من غير ما يركز في وجوه الانبياء، ده غير الرهبة إللي حصلت له لما شاف الاجتماع الرهيب للأنبياء ده فأكيد مش هياخد باله من كل المائة وأربعة وعشرين ألف نبي 😶
تخيلوا لما ندخل مكان زحمة بنبقى شايفين وجوه ناس كثيرة لكن مش مركزين في الأشخاص نفسهم شكلهم وملامحهم إيه🤷‍♀️
فدلوقتي رسول الله شايف دلوقتي آدم عليه السلام وجها لوجه ، فطبيعي إنه يسأل عن الشخص إللي قصاده دلوقتي ده هو مين بالتحديد، وخصوصا لما شاف السواد إللي حواليه وشاف بكاؤه وضحكه.
لكن لو القول الثاني بإن رسول الله ﷺ صلى بالأنبياء بعد المعراج يبقى مفيش إشكالية لأنه أول مرة كان يقابلهم كانت في السماء😉

¤السؤال الثاني إيه هو السواد إللي كان حول آدم عليه السلام ده🤔
السواد ده هو نسمات أو أرواح أبنائه إللي لسه لم يولدوا من أهل الجنة ومن أهل النار ،
فلما كان ينظر على نسمات أهل الجنة ناحية اليمين كان يضحك فرحا بهم،
ولما كان ينظرعلى نسمات أهل النار ناحية الشمال كان يبكي حزنا عليهم لأنهم فشلوا في الإختبار😞
وموقف البكاء ده يعتبر موقف عارض ، يعني مش إن آدم عليه السلام قاعد بس ينظر ناحية اليمين ويضحك وناحية الشمال ويبكي إلى قيام الساعة،
لأن احنا قلنا إن الأنبياء لهم حياة خاصة بعد الموت وإن أرواحهم موجودة في الجنة أصلا فهو خرج من الجنة عشان يقابل رسول الله ﷺ زي باقي الأنبياء إللي رسول الله ﷺ هيقابلهم في باقي السماوات،
ووجود آدم عليه السلام في السماء الدنيا بالّذت مش في أي سماء ثانية لأن هو بيعرض عليه نسمات أهل ال

#قصص_الأنبياء(٢)
#السيرة_النبوية
#الحلقة_الثالثة_والثلاثون
#رحلة_الإسراء_والمعراج
#المعراج_الجزء_الثاني

كنا واقفين المرة إللي فاتت مع رسول الله ﷺ لما دخل السماء الرابعة ورحب به أهلها، ووجد في استقباله فيها من الأنبياء إدريس عليه السلام،
فقال جبريل لرسول الله ﷺ هذا إدريس سلم عليه، فسلم عليه رسول الله ﷺ فقال له إدريس: مرحبا بالأخ الصالح والنبي الصالح!
واحنا اتكلمنا في قصة إدريس عليه السلام إن ربنا رفعه مكانا عليا😉

☆ممكن حد يسأل إزاي ربنا رفعه مكان عليا وفي أنبياء مكانتهم أعلى منه 🤔
والمعنى المقصود إن ربنا قبض روحه في السماء الرابعة،وهو البشر الوحيد إللي قبضت روحه في السماء زي ما الهلماء بيقولوا😊

بعد ما سلّم على رسول الله ﷺ ودعا له بخير، كمّل رسول الله ﷺ رحلته للسماء الخامسة،
طلع رسول الله ﷺ السلمة الأولى والثانية والثالثة وبعدها كان على باب من أبواب السماء الخامسة مع جبريل،
يخبط على الباب والخازن بيسأل مين، وجبريل عليه السلام يرد ويقول جبريل ، والخازن يسأله معاك مين، يقول له جبريل : محمد فيسأل الخازن هو أُرسل إليه فجبريل يقول له : نعم!
فيقول الخازن فلنعم المجيء جاء ويفرح به أهل السماء ﷺ 😍
احنا ممكن نفكر إن عشان رسول الله ﷺ بينتقل من سماء لسماء بثلاث سلمات فقط يبقى المسافة بين السماوات وبعضها مسافة بسيطة😅
لأ ده الفرق بين كل سماء والثانية مسيرة خمسمائة عام🙊
والمسافة من الأرض لحد ربنا فوق السماء السابعة بتستغرق خمسين ألف سنة 😮
ومع ذلك رسول الله ﷺ كان بيقطع المسافات دي في لحظات 👌
فتخيلوا السرعة إللي كان بيتحرك بها رسول الله ﷺ ، بعد ما دخل رسول الله ﷺ السماء لقى في استقباله هارون عليه السلام 😊
هارون أخو موسى...هارون الرقيق ...هارون الهِبة إللي ربنا وهبها لموسى عليه السلام... هارون وزير موسى عليه... هارون إللي عانى من بنى إسرائيل مع موسى عليه السلام😀

فقال جبريل لرسول الله ﷺ هذا هارون سلّم عليه ،فسلم رسول الله ﷺ عليه، فقال له هارون عليه السلام مرحبا بالأخ الصالح والنبي الصالح ! ودعا له هارون عليه السلام بخير،
وانطلق رسول الله ﷺ لحد ما وصل للسماء السادسة وخبطوا عليها وحصل نفس الاستئذان ونفس الترحيب برسول الله، ولقى مين نازل له من السماء السابعة مخصوص عشان يستقبله في السماء السادسة 🙊
موسى عليه السلام 😍
موسى بني إسرائيل ...موسى الخضر...فاكرين😁
جبريل عليه السلام بيقول لرسول الله ﷺ: هذا موسى سلّم عليه!
تخيلوا رسول الله لما سلّم كان إحساسه إيه😮
إحساسه وهو بيتذكر موسى لما كان رضيع وأمه خافت عليه من جنود فرعون، وألقته في البحر،
موسى إللي اتربى في قصر فرعون... موسى إللي ربنا قال له ولتُصنع على عينى ، إللي ربنا قال له وألقيت عليك محبة مني،
موسى ...هو ده موسى 🙊
رسول الله بيوصف لنا موسى عليه السلام بيقول إنه كان رجل طويل قليل اللحم يعني رفيع،
ممشوق الجسم بشرته سمراء شعره لا هو ناعم أوي ولا هو مجعد،
عارفين الرجال إللي بيكونوا طوال وعندهم عضلات مع جسم متناسق مش العضلات الضخمة دي 😑
لأ...رجل رفيع طويل قوي عنده عضلات متناسقة مع جسمه👌
سلّم عليه رسول الله ﷺ فقال له موسى مرحبا بالنبي الصالح والأخ الصالح !ودعا له بخير،
فلما تركه رسول الله ومشي مع جبريل بكى موسى عليه السلام 😳
فسأله الله عز وجل: بتبكي ليه؟ وهو أعلم سبحانه،
فقال موسى عليه السلام :
عشان في غلام جاء بعدي وهيدخل الجنة من أمته أكثر من إللي هيدخلها من أمتي 😞

☆ليه موسى عليه السلام قال كده 😶

موسى عليه السلام مقلش الكلام ده حسد لرسول الله ﷺ حاشاه👌
ده من أولي العزم من الرسل ومعصوم 😉
بكاؤه كان بكاء حزن على بني إسرائيل وتكذيبهم له مع إنه قعد معاهم سنين طويلة أكثر من إللي رسول الله قعدها مع أمته ،
حتى لما موسى عليه السلام قال غلام، هو كان يقصد صِغر سن رسول الله ﷺ بالنسبة له وللأنبياء من قبله،
لأننا لو قسنا عمر رسول الله ﷺ بالنسبة لعمر موسى وإبراهيم ونوح هنلاقيه إنه أصغر منهم بكثير 🤷‍♀️
و مع ذلك ربنا أعطاه ما لم يعط أحد قبله على صغر سنه ده وقصر مدة بعثته ﷺ،
مش إن موسى عليه السلام يقصد التقليل من شأن رسول الله ﷺ بقوله عنه غلام 😀
ده موسى يا جماعة 😁

وصل رسول الله ﷺ للسماء السابعة مع جبريل عليه السلام ودخلوها ورحب أهلها برسول الله ﷺ لقى فيها إبراهيم عليه السلام 😮
إبراهيم خليل الله ...إبراهيم إللي أُلقِي في النار...إبراهيم صاحب الدين الحنيف...إبراهيم إللي بنى الكعبة إللى قريش ملتها بالأصنام 😑
إبراهيم جد رسول الله ﷺ أبو الأنبياء😍
لقاه رسول الله قاعد ساند ظهره للبيت المعمور ،
والبيت المعمور هو كعبة أهل السماء،
مكانه فوق الكعبة بالضبط لدرجة إنه لو وقع هيقع على الكعبة،
فإبراهيم عليه السماء كان قاعد ساند ظهره للبيت المعمور، موقف رهيب طبعا 😯
وأظن إن ده أكثر مكان مناسب لإبراهيم عليه السلام ،يعني هو ده أكثر مكان ملائم له👌

،لأن إ

#قصص_الأنبياء(٢)
#السيرة_النبوية
#الحلقة_الرابعة_والثلاثون
#رحلة_الإسراء_والمعراج
#المعراج_الجزء_الثالث
#الجنة_ولقاء_الله

اتكلمنا المرة إللي فاتت عن رسول الله ﷺ لما أخذه جبريل عليه السلام وصعد به فوق السماء السابعة عند سدرة المنتهى،
وقلنا إن رسول الله ﷺ رأى جبريل على صورته الحقيقية عند سدرة المنتهى ودي كانت المرة الثانية التى رأى فيها رسول الله ﷺ جبريل على صورته الملائكية،
"وَلَقَدْ رَآهُ نَزْلَةً أُخْرَىٰ ۩ عِندَ سِدْرَةِ الْمُنتَهَىٰ "

المرة الأولى لما جاءه بالوحي بعد فترة الوحي واحنا اتكلمنا عنها قبل كده😉
وقلنا كمان إن سدرة المنتهى فوق السماء السابعة وعندها جنة المأوى،
جبريل عليه السلام أخذ رسول الله ﷺ عشان يقابل ربنا، في الطريق ربنا أهدى رسول الله ﷺ هدية لم يهدها لأي بشر أبدا،
وهنشوف هدايا كثيرة ربنا أعطاها لرسول الله ﷺ في الرحلة دي،
أول هدية إنه جعله يدخل الجنة، وهو مازال على قيد الحياة فرسول الله ﷺ هوالبشري الوحيد إللي دخل الجنة وهو من أهل الدنيا😮
جبريل عليه السلام أخذ رسول الله ﷺ في جولة داخل الجنة، وعايزاكم تتصوروا لما رسول الله ﷺ يقف على باب الجنة قبل ما يدخلها🙊
الجنة إللي حكى عنها للصحابة ، الجنة إللي هيدخلها الذين سعدوا
"وَأَمَّا الَّذِينَ سُعِدُوا فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ"
تخيلوا موقف رسول الله وهو بيستعيد آيات القرآن عن الجنة :
"تِلْكَ الْجَنَّةُ الَّتِي نُورِثُ مِنْ عِبَادِنَا مَن كَانَ تَقِيًّا"

الجنة إللي هيسكنها المؤمنون للأبد، مفيش بعدها موت،
الجنة إللي فيها ما لا عين رأت ولاأذن سمعت ولا خطر على قلب بشر،
الجنة دي رسول الله ﷺ هيشوفها دلوقتي، ياترى شكلها إيه😳
خلونا نشوف رسول الله ص وهو بيوصف لنا الشكل للعام للجنة، بيقول إنه أدخل الجنة، والجنة لها ثمانية أبواب بالمناسبة 😁
وعرضها كعرض السماوات والأرض ...سبع سماوات وسبع أراضين واخدين بالكم😅
أول ما رسول الله دخل شاف حبائل لؤلؤ معلقة،
عارفين لما بِنُزيّن البيت بشرائط ملونة مدلدلة من السقف في المناسبات كده 🤔
أهه حبائل اللؤلؤ نفس الفكرة تقريبا 😉
وشاف قباب من اللؤلؤ ، يعني قبة جنب قبة من اللؤلؤ،
بص في الأرض لقى الأرض بيضاء ترابها المسك والزعفران وده يدينا انطباع أد إيه ريحة الجنة رائعة😮

البيوت شافها مبنية طوبة من الذهب وطوبة من الفضة والمونة إللي بينهم يعني الأسمنت إللي بين الطوب من المسك،
والحصى والرمل الواقع في الأرض من اللؤلؤ والياقوت، ده كان المشهد العام للجنة، ربنا يرزقنا الجنة وإياكم 🤲

رسول الله هيبدأ يشرح لنا تفاصيل أدق عن بعض أجزاء الجنة إللي جبريل عليه السلام هيأخذه فيها😊

☆ثواني كده...هو إزاي الجنة فيها ما لاعين رأت ورسول الله ﷺ شافها أهه😕
المقصود هو إن محدش شاف مثلها أبدا ، مش إن مفيش حد شافها😅
يعني مش المعنى إن الجنة مقفول عليها ولم ترها الأعين أبدا،
لأ... المقصود إن محدش شاف زيها ، وإلا فآدم عليه السلام كان عايش فيها قبل نزوله للأرض ، ورسول الله دخلها وشافها😉

مشي رسول الله ﷺ مع جبريل عليه السلام فشاف نهر،
لكن النهر ده مش بيتحرك في مجرى مائي زي الأنهار العادية، ده بيتحرك على أرض الجنة😳
يعني رسول الله شايف أرض النهر القاع يعني لدرجة إن رسول الله ص مسك الطين إللي في أرض النهر لقاه مسك😮
والحصى إللي في قعر النهر ده من اللؤلؤ والياقوت،
والنهر كان لونه أبيض من الثلج وطعمه أحلى من العسل،
على حافتين النهر يعني على جوانبه في قصور جميلة على شكل قباب،
كل قبة عبارة عن لؤلؤة ضخمة مجوفة، المنظر رائع جدا😯
رسول الله ﷺ سأل جبريل عليه السلام قال له:
إيه ده يا جبريل؟!!
قال له جبريل عليه السلام هذا نهر الكوثر!

النهر إللي ربنا أعطاه لرسول الله ﷺ 🙊
والعرب بتستعمل كلمة الكوثر لما يكونوا عايزين يعبروا عن الشيء الكثير، فنهر الكوثر ده ميته كثيرة وأكوابه كثيرة بعدد نجوم السماء 😮
ونهر الكوثر رآه رسول الله ﷺ في السماء الدنيا مع نهر النيل والفرات فهو منبعه من الجنة وبيجري عبر السماوات ،
لكنه لا ينزل إلى الأرض زي النيل والفرات إللي اتكلمنا عنهم المرة إللي فاتت😉
ونهر الكوثر هو إللي هيُمِد حوض رسول الله ﷺ بالماء إللي هيشرب منه المؤمنون يوم القيامة، وإللي هيشرب منه مش هيعطش تاني أبدا👌

☆إيه قصة الحوض ده 😳

يوم القيامة الشمس هتقرب جدا من الرؤوس والناس هتكون عطشانة جدا ومفيش مية غير إللي موجودة في أحواض الأنبياء ومنهم حوض النبي محمد ﷺ ،
والحوض ده حجمه كبير جدا مسيرة شهر، مليان مية من نهر الكوثر إللي لونه أبيض من الثلج وطعمه أحلى من العسل،
عدد الأكواب بتاعته بعدد نجوم السماء زي ما قلنا من شوية😉
هيبقى موجود على الأرض المُبدلة
" يوْمَ تُبَدَّلُ الْأَرْضُ غَيْرَ الْأَرْضِ"
الناس بقى هتروح لرسول الله ﷺ عشان يشربوا من الحوض بتاعه، فهيشرب منه المؤمنون المتبعين لرسول الله ﷺ ف

#قصص_الأنبياء(٢)
#السيرة_النبوية
#الحلقة_الخامسة_والثلاثون
#رحلة_الإسراء_والمعراج
#المعراج_الجزء_الرابع
#الصلاة

اتكلمنا المرة إللي فاتت عن الهدايا إللي ربنا أعطاها لرسول الله ﷺ وقلنا عن إن أول هدية كانت خواتيم سورة البقرة واتكلمنا عن فضلهم كان إيه،
النهاردة هنتكلم عن الهدية الثانية وهي:
《 غفران المُقْحِمات لمن لم يشرك بالله شيئا》

براحة كده عشان الكلام ده مهم 😁
المُقْحِمات هي كبائر الذنوب زي الزنا والسرقة وغيرها من الكبائر،
واسمها مُقْحِمات لأنها بِتُقْحم الإنسان في النار ، يعني بتزقه وتوقعه في النار👌
فمعنى الكلام بوجه عام :
إن ربنا هيغفر لأصحاب الكبائر ماداموا ماتوا على التوحيد ولم يشركوا بالله شيئا ومعاهم لا إله إلا الله ، حتى من غير ما يتعذبوا ، يعني من مات على كبيرة وهو لا يشرك بالله شيئا ربنا هيغفر له ويدخله الجنة👌

حلو الكلام لحد كده 😁
الكلام ده👆 بقى هل هو لكوووول الناس🤔

لأ مش لكل الناس ، في ناس من أصحاب الكبائر لو ماتوا على التوحيد ربنا هيعذبهم على قدر ذنوبهم في النار وبعدين يخرجهم من النار ويدخلهم الجنة💁‍♀️

يبقى هنطلع بالكلام ده بقاعدتين مهمتين👌
◇ الأولى :
إن من مات من المسلمين على كبيرة من الكبائر من غير ما يتوب منها ،
فهو في مشيئة ربنا إذا شاء عذبه وإذا شاء غفر له وأدخله الجنة من غير ما يتعذب في النار خالص،
ودي حاجة ربنا هو إللي هيحددها بعلمه بقلوب العباد، مين يستحق إنه يتغفر له ومين يستحق العذاب على الكبائر إللي عملها قبل ما يدخل الجنة👌

◇القاعدة الثانية:
إن أهل الكبائر من أمة الإسلام إذا دخلوا النار عشان يتعذبوا لا يُخلدوا في النار،
يعني مادام الإنسان مات وهو على الإسلام وحتى لو معملش خير أبدا لن يُخلد في النار مادام معاه لا إله إلا الله👌
هيتعذب على قدر ذنوبه ويخرج من النار ويدخل الجنة، مادام لا يشرك بالله شيئا ومعاه التوحيد يعني معاه لا إله إلا الله،
والكلام ده كله موجود في الأحاديث الصحيحة عن رسول الله ﷺ 😊
شوفتم رحمة ربنا واسعة إزاي 😉

☆ بس استنواااا 😱
عشان محدش بقى ياخد الكلام ويروح يعمل إللي هو عايزه ويقول عادي بقى مانا ربنا هيغفرلي أو يقول أتعذب شوية وبعدين أدخل الجنة 🤓
مين إللي يضمن إنه يموت على الإسلام من غير ما يشرك بالله شيئا 😑
المعاصي بريد الكفر، يعني إللي يداوم على المعصية وهو حاببها ومش فارق معاه حاجة ومبسوط بيها ومش في دماغه توبة ولا كره للمعصية، ده يتخاف عليه إنه يستحل المعصية، و إللي يستحل المعصية يبقى كافر، والكافر لا يدخل الجنة😶
معادلة صعبة صح😅
ربنا أعطانا هدية قال : إللي فيكم هيموت على التوحيد هيدخل الجنة و إن زنى وإن سرق ،
لكن مين بقى إللي يضمن إنه يموت على التوحيد🤷‍♀️
وخصوصا إن الشيطان بيكون أشد ما يكون إغواء وفتنة على بني آدم عند الموت،
بيقول لأعوانه إلحقوه قبل ما روحه تطلع خلوه يكفر لأنكم لو ملحقتهوش خلاص طلع من تحت إيدكم 😱

فالشيطان حريص جدا إنه يفتن الناس حتى عند الموت، ورسول الله نفسه كان بيقول :
" اللهم إني أعوذ بك أن يتخبطني الشيطان عند الموت"

تخيلوا رسول الله كان بيقول كده فاحنا بقى نقول إيه😶
عشان كده رسول الله علمنا إننا بعد التشهد الأخير نقول:
اللَّهُمَّ إِنِّي أَعُوذُ بِكَ مِنْ عَذَابِ جَهَنَّمَ ،
وَمِنْ عَذَابِ الْقَبْرِ ، وَمِنْ فِتْنَةِ الْمَحْيَا وَالْمَمَاتِ ، وَمِنْ شَرِّ فِتْنَةِ الْمَسِيحِ الدَّجَّالِ"
ففتنة الممات هي فتنة الشيطان للإنسان عند الموت،
فمين بقى يضمن إنه لو عاش على عمل الكبائر بحجة إن ربنا بيغفر لأهل الكبائر ماداموا بيقولوا لا إله إلا الله إنه يموت على الإسلام والشيطان لا يفتنه 🤷‍♀️

نحس كده إن الناس دي بالمنظر ده هيكونوا قليلين😅
لكن مع ذلك ربنا طمنهم وطمنا إن متقلقوش أهم حاجة إنكم تموتوا على التوحيد، ومن عاش على التوحيد وقول لا إله إلا الله هيموت عليها أكيد😉
دي كانت الهدية الثانية لأمة الإسلام،
مع الهدايا ربنا أمر رسول الله ﷺ بأمر واجب التنفيذ،
وده الأمر الوحيد إللي ربنا أمر بيه في المكان ده،
كل أوامر وشرائع الإسلام ربنا أمر بها أو نهى عنها عن طريق جبريل عليه السلام ورسول الله ﷺ في الأرض إلا الأمر ده، وأكيد الموضوع له معنى وحكمة👌

احنا عارفين إن ربنا عز وجل لا يفعل أي شيء عبث،
كل حاجة لها حكمة، فمعنى إنه يأمر بالأمر ده في المكان ده يبقى أكيييد الأمر ده مهم جدا 👌
خلونا نقرب المعنى شوية 🤔
ولله المثل الأعلى في السماوات والأرض،
لما أمك أو أبوكي أو زوجك أو مديرك في العمل أو أي حد يطلب منك حاجة عن طريق إنه يرسل لك شخص ويقولك اعملي كذا،
زوجك يبعتلك ابنك، أمك تقولك يا فلانة اعملي كذا أو تبعتلك أختك تقولك ماما بتقولك اعملي كذا ،
هل هيكون انطباعك في الكلام إللي وصل لك، زي ما والدتك تبعتلك وتقولك تعالي أنا عايزاكي،
ولما تروحي لها تقوم واخداكي وداخلة أوضة وقافلة عليكي وعليها الباب وتتأكد إن مفيش حد

#قصص_الأنبياء(٢)
#السيرة_النبوية
#الحلقة_السادسة_والثلاثون
#رحلة_الإسراء_والمعراج
#المعراج_الجزء_الخامس
#نهاية_المعراج

اتكلمنا المرة إللي فاتت عن رسول الله ﷺ لما طلب من ربنا التخفيف في الصلاة زي ما موسى عليه السلام قال له،
وربنا فعلا خفف الصلاة من خمسين صلاة لخمس صلوات في اليوم والليلة،
وقلنا كم سؤال محتاجين نجاوب عليهم😁

◇السؤال الأول :
هل كان المسلمون قبل فرض الصلوات الخمس بيصلوا ولا لأ🤔
خلاصة القول في الموضوع ده إن الصلاة كانت مفروضة من أول بعثة رسول الله ﷺ،
وكانت صلاة قيام الليل مفروضة على رسول الله ﷺ وعلى المسلمين في أول سنة من البعثة،
وبعدين نُسخت وبقت الصلاة المفروضة ركعتين في أول النهار وركعتين في أخره، زي ما قلنا قبل كده😉
وجبريل عليه السلام كان علم رسول الله ﷺ كيفية الوضوء وكيفية الصلاة منذ البداية ،
وبعدين علمه أوقات الصلاة إللي احنا دلوقتي،
أما بالنسبة للأذان فلسه لم يُشرع دلوقتي، قصادنا كم سنة كده على ما يُشرع الأذان وله قصة هنقولها في وقتها إن شاء الله 😁
والخمس صلوات إللي ربنا فرضهم دول هيكونوا ركعتين فقط، وبعدين لما رسول الله ﷺ يهاجر ،
هتزيد ...الظهر والعصر والعشاء هيكونوا أربعة والمغرب ثلاثة،ولما يكون المسلمون على سفر هيقصروا الصلاة الرباعية فقط👌

◇السؤال الثاني:
ليه ربنا فرض في الأول خمسين صلاة مادام هو هيخففها لخمس صلوات بعدين، يعني كان فرض الخمس صلوات من البداية وخلاص🤔
احنا عارفين إن ربنا لا يكلف نفسا إلا وسعها 💁‍♀️
ومعنى إن ربنا يفرض علينا خمسين صلاة في اليوم والليلة فده معناه إننا نقدر نصلي الخمسين صلاة دي 👌
هو أه هنقعد طول اليوم كله نصلي😅
بس مفيش مشكلة، أصلا ربنا خلقنا للعبادة فطبيعي إننا نقضي اليوم كله في الصلاة 🤷‍♀️
فعشان ربنا يُرِي الناس رحمته بهم قدّر إنهم يكونوا خمسين وبعدين يتخففوا لخمس صلوات في اليوم والليلة،
ومش بس كده ده أعطانا أجر الخمسين كامل👌
فتخيلوا بقى الناس إللي بتفرط ومقصرة في الخمس صلوات مع إنهم يقدروا يصلوا خمسين صلاة ده وضعهم هيبقى إيه عند ربنا😶
وطبعا ده يشجعنا إننا مش بس نحافظ على الخمس صلوات، لا ده احنا كمان نحافظ على السنن الإثنا عشرة ركعة😉
☆وبما إننا بنتكلم على الصلاة والسنن ففي معلومة مهمة محتاجين نعرفها😁
وهي إن أول ما يحاسب عليه العبد يوم القيامة الصلاة...إذا صَلُحَتْ فَقَدْ أَفْلَحَ وَأَنْجَحَ،
وَإِنْ فَسَدَتْ فَقَدْ خَابَ وَخَسِرَ
يعني لازم نجيب في امتحان الصلاة عشرة من عشرة💁‍♀️
طيب إزاي هنجيب عشرة من عشرة وفي شيطان إسمه خنزب وظيفته بس إنه يُلهي الإنسان عن الخشوع في الصلاة ويسرق منها ويخلينا نسرح ونفكر في حاجات برة الصلاة 😑
حتى شوفوا حديث رسول الله ﷺ :
إنه ليس للعبد من صلاته إلا ما عَقل منها،
إن العبد يقوم في الصلاة لا يُكتب له منها إلا نصفها.. إلا ثلثها.. إلا ربعها.. إلا خمسها، حتى قال: إلا عشرها.
كده هيبقى مستحيل إنا ننجح في إمتحان الصلاة ،و هنلاقي إننا طالعين خسرانين وممكن صلاتنا كده تضيع 😱
طب إيه الحل😳
هنا بقى تيجي رحمة ربنا 😊
الحل في قول ربنا في الحديث القدسي للملائكة :
" انْظُرُوا هَلْ لِعَبْدِي مِنْ تَطَوُّعٍ ؟ فَإِنْ كَانَ لَهُ تَطَوُّعٌ ،
قَالَ: أَتِمُّوا لِعَبْدِي فَرِيضَتَهُ مِنْ تَطَوُّعِهِ"
يعني ربنا هيقول للملائكة يوم القيامة شوفوا عبدي لو عنده أي تطوع كملوا به النقص في الصلاة،
يعني السنن الرواتب يُكَمّل بها ما نَقص من الفريضة👌
فلو الإنسان كان بيصلي سنن يبقى هو عنده مخزون يقدر يكمل منه،
طيب لو مكنش بيصلي السنن ، أنا مش هقول إنتم تصوروا الموقف إللي ممكن يكون فيه ساعتها😶
فمش معقول بعد كل رحمة ربنا دي نقصر في الصلاة، وخصوصا إننا أصلا نقدر نصلي الخمسين صلاة👌
يعني لو أحد من البشر عمل فينا معروف بنبقى ممتنين جدا له، فما بالكم بربنا إللي خلق لنا الجنة وأنزل علينا من رحماته😊

◇ندخل في السؤال الثالث 😁
اشمعنا ربنا اختار الصلاة بالذات عشان يفرضها من فوق سبع سماوات؟
احنا قلنا إن الصلاة مهمة وهي الشريعة الوحيدة إللي ربنا أمر بها فوق سبع سماوات في مكان خاص جدا 👌
ليه بقى الخصوصية والأهمية دي🤔
ربنا أراد إنه يعطي المسلمين حاجة تَصِلهم به تُشبه ولو من بعيد إللي حصل مع رسول الله ﷺ 😊
خلونا نوضح أكثر، تعالوا نستعيد كده رحلة الإسراء والمعراج من البداية😉
جبريل عليه السلام غسل قلب وجوف رسول الله ﷺ قبل ما يبتدي رحلة لقاء ربنا،
مش احنا برده قبل ما نقابل ربنا في الصلاة بنتوضأ والوضوء ده بيغسل السيئات بتاعتنا قبل ما ندخل في الصلاة 💁‍♀️
وبعدين رسول الله وهو رايح للقاء الله عدّى على الجنة،
مش احنا برده بعد ما نتوضأ بنقول:
" اللهم اجعلني من التوابين واجعلني من المتطهرين ، أشهد ألا إله إلا الله وحده لا شريك له وأشهد أن محمدا عبده ورسوله " وهنا أبواب الجنة بتتفتح لنا 😉
رسول الله ﷺ طلع لوحده لمقابلة ربنا وتكلم معاه، واحنا برد