Рад цудоўных пераўтварэнняў працягвае помнік архітэктуры 1930-х гадоў у Оршы. 🙈
#орша #дэградацыя

Не перастае здзіўляць глухая адбітасць беларускіх праектантаў. Яны нешта чулі пра кантрастнасць колераў, таму да адзінага магчымага колеру ў краіне, бэжу, дадаюць сіне-фіялетавы ў спадзеве на тое, што цуд-эфект прыхавае іх прыродную бясталентнасць. Вядома, кантрастнасць ≠ прыгожа, часцей за ўсё нават наадварот. Любы рамонт мусіць асучасніць будынак, таму дойліды звяртаюцца да самага сучаснага, што яны бачылі ў сваім жыцці — ПВХ-дзвярэй і бяздушнага сіняга люстранога шкла на палову фасада — у ім жа так душэўна будзе адлюстроўвацца парк, неба, а калі неба будзе шэрае, то колер шкла дадасць яму весялосць!

Усё гэта я неяк магу патлумачыць, але не магу ўявіць, якая рэлігія ці палітычная арыентацыя не дала аўтарам рэканструкцыі кінатэатра «Перамога» ў Оршы правесці па фасадзе пару вертыкальных ліній расшыўкі па тынкоўцы, якія былі на сценах і ў арыгінале. Такая дробязь, але задае нейкі рытм чляненняў — усяк лепш, чым сотні метраў гладкага бэжу.

#дэградацыя #Орша

Будынкі № 19 і 17 па вуліцы Мінскай у Оршы ў 2007 годзе планавалі цалкам разбурыць, як тагачасны гораданачальнік разабраўся раней з афіцынай езуіцкага манастыра XVII-XVIII стст., будынкамі прывакзальнай гасцініцы канца ХІХ ст. і чыгуначнай школы 1905 г. пабудовы. Уласна дом № 19 такі лёс і напаткаў, а вось дому № 17 «пашчасціла» — зверху надбудавалі 2 уродскія паверхі з балконамі Джульеты. Але ж гэтыя два паверхі займаюць плошчу нават меншую, чым знішчаны дом № 19, у чым была праблема адрамантаваць адзін помнік і не паскудзіць іншы?

Акрамя будынкаў пад мудрым кіраўніцтвам калгаснікаў зачысцілі і прыватную забудову (пэўна комплексы «карэнных гараджан» так праяўляюцца), а разам з ёй зніклі і некалькі гістарычных вуліц. Хочацца нагадаць, што акрамя помнікаў архітэктуры вылучаюцца і помнікі горадабудаўніцтва, прадстаўленыя звычайна планіровачнай
структурай гістарычных цэнтраў, то бок сеткай вуліц, якая фарміравалася стагоддзямі.

#знішчэнне #Орша #гістарычнаязабудова #дэградацыя

Першы пайшоў, другому падрыхтавацца! На Свята-Ільінскай царкве ў Оршы, якая з'яўляецца гісторыка-культурнай каштоўнасцю, змянілі дах званіцы і пазалацілі глаўку, залатая замена галоўнаму купалу ды барабану чакае свайго часу на падворку.

#цэрквы #Орша #антырэстаўрацыя

У пачатку мая таксі ўпісалася і знішчыла аўтэнтычны парапет моста цераз замкавы роў у Оршы. Мост пабудаваны ў 1902 годзе побач з млынам, абодва будынкі з'яўляюцца гісторыка-культурнай каштоўнасцю.

Калічныя таксіты, у нас і без вас ёсць каму спадчыну нішчыць, куды вы палезлі?😡

#орша #разбурэнне #гістарычнаязабудова #масты

Зацверджаны праект зон аховы жылога корпуса былога трынітарскага кляштара па вул. Камсамольская, 21 у Оршы.

Нічога цікавага ў яго не закладзена, наадварот, я б сказаў, што выкананы ён досыць фармальна. Да кляштара натуральным чынам прымыкаў касцёл Святой Тройцы, знішчаны камуністамі ў 1960 годзе ў рамках антырэлігійнай кампаніі. Але ў праекце яго абрысы ніяк не паказаны, у тэксце няма ніводнай згадкі пра магчымасць і неабходнасць аднаўлення гэтага важнага элемента гістарычнага комплексу, або хаця б выяўлення на мясцовасці (брукам, азеляненнем).

Праігнараваны і той факт, што гістарычна кляштар ахопліваў куды большую тэрыторыю. У праекце цалкам адсутнічае зона аховы архелагічнага пласта - 300 гадоў людзі жылі тут, вялі сваю гаспадарчую і рэлігійную дзейнасць, а культурны пласт не нарасцілі, так атрымліваецца? 🤡 Цяпер земляныя работы могуць цалкам законна без навуковага суправаджэння праводзіцца па падмурках дапаможных пабудоў, агароджы без іх вывучэння, фіксацыі і захавання, археалагічныя артэфакты, разам з зямлёй будуць проста вывозіцца куды-небудзь.

Гэта ўжо не першы праект, дзе на археалогію забілі. Цікава, чаму на гэты факт распрацоўшчыкам не паказваюць спецыялісты Мінкультуры, праз чые рукі праходзяць усе праекты?

#ахова #орша #касцёлы

Зацверджаны праект зон аховы Куцеінскага манастыра ў Оршы. Рэгламентамі ахоўнай зоны на тэрыторыі манастыра забаронена любое будаўніцтва акрамя аднаўлення страчаных аб’ектаў, пацверджаных архіўна-бібліяграфічнымі звесткамі, а гэта прынамсі драўляны Богаяўленскі сабор XVII стагоддзя, які згарэў у 1885 годзе ад ўдару маланкі, палова барочнага жылога корпуса і яшчэ некалькі пабудоў уздоўж агароджы.

Таксама забаронена знішчэнне, прычыненне шкоды элементам аўтэнтычнай агароджы, праўда, не зразумела навошта гэта прапісана, бо агароджа ўнесена ў Дзяржаўны спіс і ўсе гэтыя меры да яе выконваюцца па змоўчанні.

Усе прыбудовы да гістарычных і савецкіх капітальных збудаванняў прызнаныя дысгарманічнай забудовай і мусяць быць прыбраныя.

Хацелася б, каб праект зон аховы быў першай ластаўкай аднаўлення комплексу, бо на сёння манастырскія карпус і агароджа ў гаротным стане. Радуе, што карпусы хаця б маюць дах, што запавольвае разбурэнне.

Пры манастыры ў 1630-я гады дзейнічала друкарня, якая была цэнтрам беларускага кірылічнага кнігадрукавання. У ёй Спірыдон Собаль выдаў свой знакаміты «Буквар» і іншыя кнігі.

#Орша #праектызонаховы #манастыры #Куцейна