اوشاق شعری

▫️گؤزومو یوما بیلمه‌رم.

- اوتاغی سوپور قیزیم!
+ سوپورموشم، آنا جان!
- منه سو گتیر قیزیم!
+ گتیرمیشم، آنا جان!
- پالتارلاری یوموسان؟
+ ایندی یودوم، آنا جان!
- چؤره‌یینی یئمیسن؟
+ یئدیم، دویدوم آنا جان!
- دی گؤزونو یوم گؤروم،
سنه بیر شئی گؤستریم.
+ گؤزومو یومسام، آنا،
سنسیز قالارام آخی!
ایسته‌میرم بیرجه آن،
من سنسیز یاشاماغی...

#قشم_نجف‌زاده
#شعر_اوجاغی
@SheirOcagi

▫️دئیه‌سن

یاغیش یاغیر، ایسلادیر،
گولو، داشی، تورپاغی.
قیزیم یئرین اوستونه،
سریر گوللو یایلیغی.

دئییر، یئر ایسلانماسین،
تئز-تئز حَیطه دوشور.
دونیانی قوروماغی،
دئیه‌سن باشا دوشور...

#قشم_نجف‌زاده
#شعر_اوجاغی
@SheirOcagi

اوشاق شعری

▫️تورال و دنیز

- «دنیز، دنیز، آی دنیز!
ایندی یامان آجمیسان.
اوزادیب اللرینی،
ساحیلینی قوجموسان.

یئمک اوچون ایندی سن،
یامانجا آغلاییرسان.
ایچینده‌کی بالیغی،
نه واختا ساخلاییرسان؟

یوخسا سنه گولرلر،
یئ بالیقدان دویونجا!
چایلار سو گتیررلر،
ایندی سنه اووجوندا.»

- بو سؤزومو آی «تورال!»،
سیرغا ائله قولاغا:
«دنیز آجیندان اؤلر،
آمّا یئمز بالیغی...»

#قشم_نجف‌زاده
#شعر_اوجاغی
@SheirOcagi

اوشاق شعری

▫️اگر

بالاجا تورال
آغلادی بیر گون:
«تئز اولون منه
شوکولات وئرین!
اگر سیز منه
توپ آلماسینیز،
دنیزه، چایا
آپارماسینیز،
دَوه‌یه، آتا
میندیرمه‌سینیز،
ایشدن گلنده
شکیل کیتابلار
گتیرمه‌سینیز،
بیر گون گؤزومو
یوماجاغام من،
قالاجاقسینیز
قارانلیقدا سیز...»

#قشم_نجف‌زاده
#شعر_اوجاغی
@SheirOcagi

اوشاق شعری

▫️توملار*

بیر استکان توم
اکدیم تورپاغا.
سونرا باشلادیم
من داریخماغا.

کئچدی آیلاریم
کئچدی ایللریم،
نه واخت چیخاجاق،
توملاریم منیم؟

ائشدیم تورپاغی
گؤردوم توملارین
یاریسی یوخدو.
یاریسینین دا
الی چیخیبدی.

گؤردوم یاریسی
آیاق آچیبلار.
او بیرلری ده،
یقین قاچیبلار...

#قشم_نجف‌زاده

* توخوم (Tum)
#شعر_اوجاغی
@SheirOcagi

▫️منی آلدادایدین!

منی آلدادایدین پاییزا کیمی،
سولان یارپاقلارا چاتایدیم باری.
منی آپارایدین پاییزا کیمی،
منی آغلایایدی پاییز تویلاری!

ائله باهار کیمی سئوه‌یدین منی،
بیر آغاج اولایدیم باخیشلاریندا.
آچیب حیسلریمی قیز ساچی کیمی،
آخیب دورولایدیم باخیشلاریندا.

بیر مکتوب یازایدین منیم آدیما،
توفانلی دنیزده آدا تاپایدیم.
بیر مکتوب یازایدین منیم آدیما
یئریمی مکتوبدا سالیب یاتایدیم.

یاشیل یارپاقلاردا اؤله بیلمیرم،
منی بو باهاردا دۆشورمه‌یه‌یدین.
منی آپارایدین پاییزا کیمی،
اوردا یاغیشلارلا اؤلوب گئده‌یدیم. 

اوردا بیر قاتارا مینیک باشلانیب،
منی آلدادایدین پاییزا کیمی.
اوردا یوللار تویلو، گؤیلر یاغیشلی،
اوزه‌یدیم، اوزه‌یدیم دنیزه کیمی...

#قشم_نجف‌زاده
@SheirOcagi

‍ ▫️قورخما!

گئت آغ بالینجینا ساچلارینی تؤک،
هئچ قورخوب ائله‌مه، گؤزلرینی یوم!
سن آللاه، سینه‌ندن قولونو آچ، تؤک،
بو اؤلمک فیکرینی بیر طرفه آت!
گؤزونو یومماغا قورخورسان، قوزوم!
من سنی سئویرم، اؤلمزسن هئچ واخت.

گؤردون، من دئیَن‌دی دونیانین ایشی،
کؤنلون ایسته‌ینی، میلیون اللی توت!
قارا گؤزلرینه اؤلوم ایلیشسه،
قورخما!
من سنی سئویرم، اؤلمزسن هئچ واخت.

قورخما، اوستونده‌دی گؤزوم همیشه!
اؤلوم بیر توکونه توخونا بیلمز.
قورخورسان، گل دوشَک تورپاغین اوسته!
دوشک، آیاق‌یالین یئرییک، قوزوم!
دوشک قاطارلاردان، طیّاره‌لردن،
دوشک توفلی‌لردن*، مرتبه‌لردن،
دوشک، تورپاق دادسین آیاقلاریمیز،
ائنَک چیچک‌لره، گوللره، نولار؟!
اگر آیاق‌یالین یئرییه بیلسک،
دوشوب دالیمیزجا گلر آداملار.

هله قاطارداییق، طیّاره‌ده‌ییک،
هله گوللـه اوسته، بومبا اوسته‌ییک.
نه اولسون،
من سنی سئویرم، گئت آرخایین یات!
اوره‌یین آغریسا، قاطار ییخیلسا،
طیّاره سوروشسه گؤیون اوزوندن،
قورخما!
من سنی سئویرم، اؤلمزسن هئچ واخت.
اؤلمزسن هئچ واخت...

#قشم_نجف‌زاده

* آیاغین توپوقدان آشاغیسینی اؤرتن آیاق قابی (Tufli)

#شعر_اوجاغی
@SheirOcagi

▫️سنین درسین

نییه شاگیردلرین دویمورلار سنی؟
گول کیمی درسینده، سس ائله‌ییرلر.
من سئون اللره، من سئون گؤزه،
من سئون اوره‌یه قصد ائله‌ییرلر.

آغزی‌یانمیشلارین یوخدو خبری:
من سنین اؤنونده لال دایانیرام.
دفتره قیرمیزی دوزه‌لیش کیمی،
واراق یاناغیمدا آل دایانیرام.

آدین تک، درسیمی ازبرله‌ییرم-
سئوگی باخیشینا بویانماق اوچون.
عؤمرومو، گونومو قوربان وئره‌رم-
شاگیرد تک اؤنونده دایانماق اوچون.

واخت آخیر... شاگیردلر دویمورلار سنی،
گؤر نئجه قیییرلار کؤورک سسینه!
هاردان بیلسینلر کی، حسرت قالمیشام،
قیرخ بئش دقیقه‌نین بیر دَیقه‌سینه.

سهودی میثاللاری، مسئله‌لری،
دردینی آرتیریب یوز ائله‌ییرلر.
اؤلورم من سنین «اوچ»وندن اؤترو،
وئردییین «بئش»لره ناز ائله‌ییرلر.

تباشیر* لچک‌لی، چیچک اللرین،
لؤوحه‌نین اوزونده کپنک اولار.
دسمالا بنزه‌یر گؤیچک اللرین،
بیر اوغلان بالانی بله‌مک اولار.

میصراع دوداقلارین یورولار هردن،
ساچلارین پیرتداشار، اللرین اسر.
بیر گؤزل، بیر گؤیچک اوغلوموز اولار،
بو دجل قیزلارین سسینی کسر.

نییه شاگیردلرین دویمورلار سنی؟
گول کیمی درسینده، سس ائله‌ییرلر.
من سئون اللره، من سئون گؤزه،
من سئون اوره‌یه قصد ائله‌ییرلر...

#قشم_نجف‌زاده

* گچ

#شعر_اوجاغی
@SheirOcagi

▫️نه اولار؟!

آیاقلارین قاچان ثانیه‌لردی،
ایشه تله‌سیرسن، دایان، نه اولار؟!
ائله بو کوچه‌ده آچ گؤزلرینی!
اوتوز ایل یاتمیسان، اویان، نه اولار؟!

بو شعری ده یازدیم، الویداع کیمی،
باخ ائله بو سطریم سون ویداع کیمی.
من اؤلسم میصراع تک، سن نیدا کیمی،
باشیمین اوستونده دایان، نه اولار؟!

جانیم، بوندان سونرا «یاشا»، «اؤل» کیمی،
قاناتدین قلبیمی ساری‌تئل کیمی.
قوشا اللرینی، قوشا گول کیمی،
سینه‌مین اوستونه قویام، نه اولار؟!

آه چکیم، آهیمدان داغ-داغ اولوم من،
سنی گزه-گزه چیراق اولوم من.
چورویوم، بیر اوووج تورپاق اولوم من،
سن ده چیخ اوستومده دایان، نه اولار؟!
بلکه اوندا سندن دویام، نه اولار؟!

#قشم_نجف‌زاده
#شعر_اوجاغی
@SheirOcagi

▫️گلین آپاردیلار.

گلین آپاردیلار قلبی یوخ کیمی،
هیچقیریق، اوره‌یین سون نغمه‌سی‌یدی.
«وولگا»دا گلینین اَییلن باشی،
بو ایشه بیر سؤال ایشارتی‌یدی.

بیری قلبده گئدیر، بیری «وولگا»دا،
بیز ده گوله-گوله آلقیشلاییریق.
اوره‌یه کؤچندن خبریمیز یوخ،
ائولره کؤچنی خوشبخت ساییریق..‌.

#قشم_نجف‌زاده
#شعر_اوجاغی
@SheirOcagi

حیات یولداشیم «تابَس» خانیم اوچون

▫️ائوه قاییداندا

ائوه قاییدیرام، اوشاقلار یاتیب،
سنین ده گؤزوندن یوخو سوروشوب.
آدیمی الینین ایچینه یازماق،
گؤره‌سن هایاندان یادینا دوشوب؟!

من سنین ان پینتی، دجل بالانام،
هر گون اوست-باشیمی تمیزله‌ییرسن.
منی دلی کیمی سئودییین اوچون،
منیمله بیر قابدا یئمک یئییرسن.

یاشین اوتوز اوچو کئچیبدی چوخدان،
قیز خاصیّتینی دَییشمه‌میسن.
اون سککیز یاشیندا قالدیغین اوچون،
هله زمانه‌یه اویوشمامیسان.

قادین اول، آنا اول، قیز اولما داها!
سئوگینله باشیما اویون آچیرسان.
باشیندا اون سککیز یاشین سئوداسی،
منی قایغیلاردا قویوب قاچیرسان.

سئویرم من سنی، بو حیات کیمی،
سنه سئوگی‌لریم یوز جوره دوندا.
هاردا شعیرلریم قافیه‌سیزدی،
اوشاقلارین اوستون اؤرتموشم اوندا.

چؤرک-سو دالینجا چیخمیشام ائودن،
منی پیس آداملار مین یئردن سیخیب.
ائوه قاییتمیشام آخشاملار، بعضاً،
«سئویرم» سؤیله‌مک یادیمدان چیخیب.

گؤر نئجه اوجادی قلبیمده یئرین،
سن کی آشاغیدا دایانمامیسان.
سنین حاقّیندادی هر سئوگی شعریم،
سن بو خوشبختلییه اینانمامیسان...

#قشم_نجف‌زاده
#شعر_اوجاغی
@SheirOcagi

▫️حیات

دوشونوب-داشینیب،
داشینیب-دوشوندوم بیر آز،
حیات بیر داش کیمی آلنیما دَیدی.

آدام‌آغلادان‌میش «سئوگی» دئییلن،
قیزلارین گؤیچه‌یی، آتیب گئدن‌میش.
سئویلیب-سئویلیب آتیلان اوغلان،
آییلان گؤزل،
آییلدیم، بونلارین هامیسی نه‌دن‌میش؟

سئومه‌یین قایداسی اولورموش دئمه،
گئتمه‌یین-گلمه‌یین یولو وار ایمیش.
آلوودو، دنیزدی «سئوگی» دئییلن،
آلووا، دنیزه قیز گلمیر آخی،
آلوودان آداما ائو اولمور آخی.

«سئومه‌یین قایداسی اولورموش» دئمه،
بو یولو بیله‌نه، قیزلار وورولور.
گویا کی، محبّت درس کیمی شئی‌میش،
اونو ازبرله‌مک، اؤیرنمک اولور.

دوشونوب-داشینیب،
داشینیب-دوشوندوم بیر آز،
حیات بیر داش کیمی آلنیما دَیدی...

#قشم_نجف‌زاده
#شعر_اوجاغی
@SheirOcagi

▫️ائشیت، عزیزیم!

ائشیت نه دئییرم، ائشیت عزیزیم!
اوره‌ییم ییخیلیب قوللاریم اوسته.
بیر گؤزل، سئویملی حسرتین واردی،
ها سئودیم-اوخشادیم، او مندن کوسدو.

دوشونه-دوشونه قوجالدی قلبیم،
اللریم سارالان پاییز یارپاغی.
ائشیت نه دئییرم، ائشیت عزیزیم!
بو یولا باش‌داشی اولدو آیاغیم.

خزان ایسته‌ییردین، -بو دا کی خزان!
سنی اونودونجا جانیم چیخاجاق.
یانیندا بیر حسرت قویوب گئدیرم،
بو صادیق گؤزَلدن عؤمرون قورخاجاق.

واغزالی چالینیر، ائشیدیرسن‌می؟
ایشیغی آغلایان بو توی کیمیندی؟
ائشیت، عزیزیم!
کؤهنه قبریستاندان باش آلیب قاچان،
او تنها، او یالقیز قبیر منیمدی.

ائشیت عزیزیم!
گل آپار عؤمرومو چییین‌لرینده،
تابوت اورک‌لره قویما کی دوشم!
تورپاغین آلتیندا ائشیده‌جه‌یم،
بیر قیز یایلیغینی آلیب الینه،
منی چاغیریردی: «قشم، آی قشم!»...

#قشم_نجف‌زاده
#شعر_اوجاغی
@SheirOcagi

▫️نه یاخشی!

دولدوم تئللرینه،
دولدوم اللرینه،
دولدوم یوللارینا،
هر شئیه باغلادین منی.

کولک‌لره سؤز یازدیم،
تئز آییلدیم، آیازدیم.
بیر چای کیمی دایازدیم،
کئچیب آیاقلادین منی.

یاندیم، اودوما دوشدون
سئودیم، آدیما دوشدون
یئنه یادیما دوشدون،
نه یاخشی، یوخلادین منی!...

#قشم_نجف‌زاده
#شعر_اوجاغی
@SheirOcagi

▫️یاناشی توتما!

آروادیم! سن منی کارتوف* ساتانلا،
قازان دولدورانلا یاناشی توتما!
شاعیر اوره‌ییمی، قلَمیمی سن،
بنزین دولدورانلا یاناشی توتما!

گؤزلریم سیناجاق اوره‌ییم کیمی،
بو کاغیذ-کوغوذوم، چؤره‌ییم کیمی.
گؤرمورسن؟ بیله‌ییم قلمیم کیمی،
او یوک‌قالدیرانلا یاناشی توتما!

بیر دامجی بویوم وار، بیر دونیا عشقیم.
باخ! بو گون قزئتده چیخیبدی شعریم.
بالاجا داخمامدا چؤره‌ییم شیرین،
بئش ائوی اولانلا یاناشی توتما!

«کور اوغلو» بابام وار، «قورقود» دده‌م وار،
هر یئنی شعریمده تزه قدم وار.
آروادیم! آرخامدا منیم وطن وار،
وطنسیز اولانلا یاناشی توتما!...

#قشم_نجف‌زاده

* یئرآلماسی

#شعر_اوجاغی
@SheirOcagi

▫️بیلدین‌می؟

دولوب یاغیش داملاسینا،
پنجره‌نیزی سئودیم.
بیلدین‌می؟
- بیلمه‌دیم.

گؤزوندن سرخوش کیمی،
ییخیلدیم اوره‌یینه.
گولدون‌مو؟
- بیلمه‌دیم.

اؤزوموزدن اؤنجه،
قاپیدا آیاق‌قابیلاریمیزین
قوشا دایانماغینی سئودیم،
سن ده سئودین‌می؟
- بیلمه‌دیم

سن یاتان اوره‌ییمه،
باشیمین سؤال
اللریمین نیدا قویولدوغونو
بیلیرسن‌می؟
- بیلمیرم

اللرین بولود کیمی
کؤلگه سالیر
ساچلاریمین ایشیغینا،
دئیه‌سن یاغیش یاغاجاق آخشاما،
خبرین وارمی؟
- بیلمیرم...

#قشم_نجف‌زاده
#شعر_اوجاغی
@SheirOcagi

▫️بو شعره گؤره

یازیرام بو شعری، یازیرام یئنه،
بو شعریمه گؤره سئویلمه‌یه‌جم.
«آلوو»ا، «دنیز»ه قیز گلمیر آخی،
شعردن آداما ائو اولمور تکجه.

اؤزوم ده بیلمیرم بو حیات نه‌دی.
منی گئری قویوب بو یازی-پوزو.
قیز واختی، شعریمی چوخ ایسته‌ییردی،
ایندی ده پولومو- بو ظالیم قیزی.

«سئوینجدن یاز!» دئییر رئداکتورلاریم،
سئوینج یوخ، من گرک کدردن یازیم.
باشیمی قاتاندا شعرلریمه،
گؤرورم آج قالیر اوغولوم، قیزیم.

کیمین نه وئجینه قاریشقا دردیم؟!
قاریشقا دردیمین کؤمه‌یی یوخدو.
بو شعری یازاندا عاغیل می اولار؟
عاغلی اولانین دا، اوره‌یی یوخدو.

نئجه ائله‌یه‌سن، گوره‌سن نئجه-
شعریمه، عؤمرومه یازیلان باختی؟
دوستلاریم ائو تیکیب کئفی ایسته‌ین.
بو ظالیم قیزینین گوناهی یوخدو...

#قشم_نجف‌زاده
#شعر_اوجاغی
@SheirOcagi

▫️سنه قیش پالتاری آلیرام ایندی‌.

هئچ فیکیر ائله‌مه، قوربانین اولوم!
آدام باشقاسینی گئدیب سئور ده...
آدام سئودییینی آتا بیلر ده.
تزه ایش دئییل کی، باشیما گلن...
باشینا دؤنوم...
آدام سئویلر ده، اونودولار دا،
گئدیب باشقاسینا اویماق دا اولار.
بیر گون یادا دوشر آتیب گئتدییین
سونرا پئشمان اولوب قاییتماق اولار،
آدام باغیشلار دا، باغیشلاماز دا.

هئچ یوز ایل کئچمه‌میش آتیب گئتدییین،
یئریندن دورونجا اوچوب گلرسن،
اوستونو چیرپینجا باخیب گولرسن،
گؤزونو آچینا چیخیب گئدرسن.

هئچ فیکیر ائله‌مه قوربانین اولوم!
آدام آلدانار دا، پئشمان اولار دا...

سنه یالواریرام اؤزونو اوزمه!
اورک یئره دوشوب غفیل سینار دا.
نه اولسون؟
اورک سینمایاندا، بس نه سیناجاق؟

یئریمدن دورونجا،
اوستومو چیرپینجا،
گؤزومو آچینجا،
سن چیخیب گئتدین.
نه اولسون؟
آدام سئودییینی آتیب گئدر ده...

منه بیرجه کلمه یاز:
ائوین ایستی‌می؟
منی او یاندیریر، او یاندیریر کی،
سنه قیش پالتاری آلیرام ایندی.
نه اولسون؟
آدام سویویار دا، آدام یانار دا..‌.

#قشم_نجف‌زاده
#شعر_اوجاغی
@SheirOcagi

▫️یادیندادی؟

یادیندادی،
سنین بیر بالاجا استولون واردی،
اوستونده کیتابلار،
کیتابین اوسته واراقلار،
واراقلارین اوسته شعیر،
شعیرین ایچینده وطن.

یادیندادی،
سنین بیر بالاجا استولون واردی،
اوستونده چیچک کیمی
عصبی، تیترک اللرین.
الینین یانیندا
بیر استکان سویوموش چایین.
چایی سویودان فیکیرلر
گؤزونون اوجوندان
ساللانمیشدی
استکانا...
تورش لیمون کیمی
مصراعلانان آلنین کیمی.

یادیندادی،
سنین بیر آزجا معاشین واردی،
معاشیندا قیزینا دون،
ائوه ات،
داوا-درمان
یول پولون
بیر آز شکر،
بیر آز قند
واردی، یادیندادی؟

یادیندادی،
سنین بیر بالاجا آددیمین واردی
ایچینده لیاقت،
جسارت،
ایکینجینی آتاندا
دیوارا دَیدی آلنین
دئدیلر بسدی
بورا قدر...

یادیندادی،
استولونون اوسته آچارلار واردی
آچارلارین آغزیندا قاپیلار،
قاپیلارین آغزیندا
سنی اونوتماغا گلن
آداملار.

#قشم_نجف‌زاده
کؤچورن: #علی_چاغلا
@SheirOcagi

▫️سئوگینی یاشایا بیلمه‌دیم سنسیز
عؤمور اؤتوب گئدیب مندن خبرسیز.
#نایل_زئینی‌یئو

بو شعری ده یازدیم الویداع کیمی،
باخ ائله بو سطریم سون ویداع کیمی.
#قشم_نجف‌زاده

سنی اونوداردیم یقین بیر آخشام،
بوتون اونودانلار اونودولسایدی.
#ذوالفوقار_روفت‌اوغلو

بیر دوشون، بیر داشین، گؤتور-قوی ائله
منی اونوتماغا تلسمه هله.
#علی_اوسط_سالداش

گئدن چیخار‌ گئدر، نه کوس، نه داریخ،
گلر بیر اؤزگه‌سی توتار یئرینی.
#فیردووسی_رسول

او خوش آرزولاردان الیمی اوزدوم،
یاشاسام دا بیردی، اؤلسم ده بیردی.
#آنار_حبیب‌اوغلو

بیر گون، گؤزه‌لیم، قبریمین اوستن اؤتوشرسن،
دردیندن اؤله‌ن عاشقینی باشه دوشرسن.
#علی‌آغا_واحید

بلکه مندن سنه بیر قورو حسرت،
بلکه سندن منه یالان قالاجاق.
#مممد_ایسماییل

آغریلار سونونجو منزیله قالماز،
ایچر گؤز یاشینی، بیر گیله قالماز
#طالعه_مانصور

🎬 فیلم: #پارک
#شعر_اوجاغی
@SheirOcagi