دم صبر وعدم رضى بقضاء الله مع إنه نبي😕؟!

الجواب:
الحزن لا يتعارض مع الصبر والرضا👌
أصلا الإنسان إزاي هيحقق الصبر والرضا لو مفيش حزن🤷‍♂️ هيصبر على إيه طيب😅
فالصبر على الإبتلاء واجب، ويأثم إللي ميصبرش، الرضا بقى العلماء اختلفوا هل هو واجب ولّا مستحب،
في علماء قالوا واجب وعلماء تانيين قالوا مستحب،
فلما تحصل حاجة للإنسان بيكرهها أو حاجة عكس إللي هو عايزها زي المرض والفقر والتعرض لأذى الناس ويرضى من جواه، فدي من المقامات العالية لأهل الإيمان👌

◇طيب وهو إيه الفرق أصلا بين الرضا والصبر😕
الصبر إن الإنسان يمسك نفسه عن التسخّط والشكوى والجزع مع إن قلبه قلقان وتعبان وحزين ومُثقل وبيتمنى من جواه إن البلاء ده ما يكونش نزل عليه.
لكن الرضى بقى هو صبر وزيادة عليه كمان عدم تمني إن البلاء ده مكانش موجود،
يعني الإنسان الراضي مش بيتسخط ومش بيشتكي وكمان قلبه مطمئن وصدره منشرح بقضاء ربنا وواثق إنه لو كان اختار لنفسه مكانش هيختار زي ما ربنا اختار له ما يلصح أمره دنيا وآخرة.
وأعلى من ده كله إن الإنسان يشكر ربنا على المصيبة أو البلاء إللي حصل له ده😁
عشان هو بيشوف نعم ربنا إللي جاتله بسبب المصيبة دي، يعني يفكر إن الإبتلاء ده ربنا جعله سبب لتكفير السيئات، ورفع للدرجات، ويفكر إنه سبب في إنه يتعلم التوكل والتضرع إلى الله و...و... فهو بيشوف بعين قلبه النعم إللي في البلاء فيهون عليه البلاء ويحمد ربنا عليه😊
وده لا يتعارض مع الألم النفسي أو إن الإنسان يشتكي لله فقط👌
لأن ده حاجة طبيعية في البشر، الإنسان يتألم لوقوع البلاء وفي نفس الوقت راضي بقضاء الله، زي المريض إللي بيرضى يشرب دواء طعمه وحش، أو زي رضى الإنسان إنه يصوم في يوم شديد الحر في مقابل الأجر إللي هياخده💁‍♂️
وده إللي هيخلينا نحقق إللي النبي ﷺ قال عليه:
"عجبا لأمر المؤمن إن أمره كله خير، وليس ذاك لأحد إلا للمؤمن؛
إن أصابته سرّاء شكر؛ فكان خيراً له، وإن أصابته ضرّاء صبر؛ فكان خيراً له"
وكمان السعي لإزالة البلاء مش ضد الرضى، بالعكس ده بيكون تحت إطار عبودية الأخذ بالأسباب كما أمر الله،
يعني يسعى لرفعه لإن ربنا أمره بده، لكن من جواه هو متقبل الوضع ويوقن إنه خير.. وإن العافية منه برده لو أذن الله بها فهي خير..
يعني لو إنسان مريض... ياخد علاج ، لو حد أذاك... تاخد بأسباب دفع الأذى بدون تعدّي،
لو واحد فقد ابنه ياخد بالأسباب ويدوّر عليه وهكذا، زي ما يعقوب عليه السلام عمل👇

عمل إيه؟!
يعقوب عليه السلام قال لأبنائه :
روحوا تاني كده هناك وشوفوا ودوروا على أي أخبار عن يوسف وأخوه، ومتيأسوش،
بلاش كلام اليأس بتاعكم ده، خلي عندكم أمل، إللي بييأس من الفرج بتاع ربنا هم الكفار بس.
"يَا بَنِيَّ اذْهَبُوا فَتَحَسَّسُوا مِنْ يُوسُفَ وَأَخِيهِ وَلَا تَيْئَسُوا مِنْ رَوْحِ اللَّهِ إِنَّهُ لَا يَيْئَسُ مِنْ رَوْحِ اللَّهِ إِلَّا الْقَوْمُ الْكَافِرُونَ"

فعلا راح بعض أبناء يعقوب لمصر بعد كده، ودخلوا على العزيز وقالوا له يا أيها العزيز احنا جينا ببضاعة رديئة سيئة ماعندناش غيرها،
فإدينا زي ماكنت بتدينا قبل كده ولك الأجر من ربنا...انت عودتنا الكرم والزيادة، وياريت تتصدق علينا بتحرير أخونا من العبودية عندكم...وتسيبه يرجع معانا ده أبوه حزين جدا عليه😔
فهنا فاجئهم يوسف واتكلم بلهجتهم همّ إللي هي 《السريانية》وقال لهم:
فاكرين عملتم إيه في يوسف وأخوه زمااان وانتم مش مدركين عاقبة أفعالكم المؤذية أبدا 😊
"قَالَ هَلْ عَلِمْتُمْ مَا فَعَلْتُمْ بِيُوسُفَ وَأَخِيهِ إِذْ أَنْتُمْ جَاهِلُونَ"

إخوة يوسف سمعوا اللهجة اتغيرت من المصرية للسريانية، ولقوا حد بيقول لهم حاجة عن أخوهم محدش يعرفها غيرهم😲
فبدأوا يبصوا للي بيتكلم ويتمعنوا في ملامحه...ولسان حالهم: مش ده العزيز؟!...وفضلوا بيدققوا النظر..ويجمعوا أفكارهم ...وفجأة نطقوا :
"قَالُوا أَئِنَّكَ لَأَنْتَ يُوسُفُ"😲
قال لهم:
أنا يوسف وهذا أخي 💁‍♂️ ربنا من علينا بفضله 😊
"قال أنا يوسف وهذا أخي قد مَنَّ الله علينا"

ودخَّل أخوهم عليهم فلقوه مُنعّم ومُكرّم وفي أبهى صورة ...
ودول مصدومين من إللي بيشوفوه🙊
فكمل كلامه وقال القاعدة النبوية الذهبية إللي بيها الإنسان يعرف يتخطى أي بلاء بإذن الله قال:
"إِنَّهُ مَنْ يَتَّقِ وَيَصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ "

تقوى الله(الخوف من الله)+ صبر =فرج من الله وفتح مبين😊
حياة يوسف عليه السلام كلها تقوى وصبر،
مع إيذاء إخواته قبل البئر وبعده تقوى وصبر...
مع امرأة العزيز تقوى وصبر(صبر على فتنة النساء)...
مع النسوة تقوى وصبر...
في السجن تقوى وصبر(الصبر على الظلم وأذى الناس)...
مع الألم من نسيان رد الجميل لما رفيق السجن نسيه فطالت مدة السجن أكتر، تقوى وصبر..
وبعد ما شاف إخوته تاني تقوى وصبر...
أكثر من ثلاثين سنة تقوى وصبر، فكانت نتيجة التقوى والصبر إيه😊
ربنا فرج عنه ومكّن له في الأرض وبقى وزير، وجعل النساء يعترفن ببرا

ءته قصاد الناس كلها،
وخلى إمرأة العزيز تعترف على نفسها قصاد الكل ،ورجّعله إخواته مكسورين معتذرين تائبين معترفين بفضله عليهم وعند رب العالمين بتقواه وإحسانه،
ربنا لا يضيع أجر المحسنين أبدا ،
وهو في أكثر من إحسان يوسف عليه السلام ونبينا محمد وأولي العزم من الرسل؟! 👌
ربنا بيقولنا قصص الأنبياء عشان نعتبر ونقلدهم وعشان يصبرنا بيهم😊
عارفين قصة يوسف عليه السلام نزلت على رسول الله ﷺ إمتى؟
نزلت وهو في مكة...في العام العاشر من البعثة، إللي سماه المؤرخون عام الحزن لأنه ماتت فيه خديجة رضي الله عنها زوجة رسول الله ﷺ ومات فيه عمه أبو طالب،
فربنا بيهوّن على رسول الله ﷺ بقصة يوسف عليه السلام، أحسن القصص،
وبيهوّن بيها على كل مُبتلى 👌
عشان كده بنحس بأُنس مع قصة يوسف عليه السلام لأنها بتعبر عننا كلنا وعن ابتلاءتنا وبتدينا أمل بالفرج،
وإللي عايز ربنا يفرج عنه البلاء يتقي ويصبر،
يوسف عليه السلام وهو نبي مرسل فضل محقق التقوى والصبر ثلاثين سنة لحد ما جاله الفرج،
فما بالكم بينا احنا😅
احنا مش معصومين زيه فممكن منعرفش نحقق التقوى كاملة أو الصبر كامل فزمن البلاء يطول علينا أكثر لنُمتحن أكتر ونُنَقّى أكثر،
ومهما طال زمن البلاء افتكروا إن غمسة واحدة في الجنة تُنسي أبأس أهل الأرض بؤسه كله ...
ويؤتى بأهل البلاء يوم القيامة يُصب عليهم الأجر صبّا... ويتمنى أهل البلاء يوم القيامة أن لو قُرِّضوا بالمقاريض في الدنيا، من عِظم الثواب المسكوب في الآخرة عليهم ضمن ثواب اهل البلاء الصابرين..
فاتقِ الله واصبر وارفع نفسك للمنزلة الأعلى وهي الشكر على المصيبة والبلاء وقل الحمد لله على كل حال..فالحمد لله تملأ الميزان😊

إخوة يوسف عليه السلام أخيرا اعترفوا ليوسف عليه السلام بفضله ومكانته زي ما امرأة العزيز اعترفت قبل كده ببراءته وتقواه، وقالوا له بكل وضوح: ربنا فضّلك علينا وقرّبك وأبعدنا، لإن إحنا إللي كنا غلطانين😔
وعرف إخوة يوسف إن ربنا هو إللي كان بيفضله عليهم مش أبوهم👌
ماهي المشكلة كان سببها إيه من البداية؟ مش كانت إنهم مفكرين إن أبوهم بيحب يوسف أكثر💁‍♂️
مطلعش بقى يعقوب هو إللي بيحبه أكثر وبيفضله عليهم، ده ربنا هو إللي فضّل يوسف عليهم بالنبوة والتمكين في الأرض لأنه يعلم صفاء ونقاء قلبه وأمانته،
بعكسهم هم إللي قلبهم كان مليان غيرة وحقد، وهم شافوا بنفسهم يوسف عمل معاهم إيه وأكرمهم إزاي،
ولسه كمان هنشوف يوسف عليه السلام عمل معاهم إيه،
"قَالُوا تَاللَّهِ لَقَدْ آَثَرَكَ اللَّهُ عَلَيْنَا وَإِنْ كُنَّا لَخَاطِئِينَ "

تخيلوا هو قال لهم إيه في الموقف الرهيب ده إللي يقدر يذلهم فيه وينتقم منهم شر انتقام ويتشفّى ويتعالى عليهم؟
أكيد انتم عارفين يوسف وأخلاق يوسف وإحسان يوسف💁‍♂️
قال لهم:
خلاص ما تقلقوش.. لا لوم ولا حتى هعاتبكم.. ربنا يغفر لكم ويتجاوز عنكم😊
"قَالَ لَا تَثْرِيبَ عَلَيْكُمُ الْيَوْمَ يَغْفِرُ اللَّهُ لَكُمْ وَهُوَ أَرْحَمُ الرَّاحِمِينَ"
وهو ده بقى العفو عند المقدرة...هو تَمَكّن منهم وهم بقوا في إيده بالفعل خلاص وقادر على عقابهم، فعفى عنهم،
مش إني أكون مغلوب على أمري وأقول خلاص أنا هسامح عشان العفو عند المقدرة😅
ده مختلف عن ده، العفو عند المقدرة لما أكون فعلا قادر إني آخد حقي وقادر أذل إللي قصادي لكن أعفو زي يوسف عليه السلام👆
يوسف عليه السلام عرف إن أبوه يعقوب أُصيب بالعمى
فقال لهم خدوا قميصي ده وحطوه على وجه أبي، وبصره هيرجع له بإذن الله،
وهاتوا أهلكم كلهم وتعالوا لي،
"اذْهَبُوا بِقَمِيصِي هَذَا فَأَلْقُوهُ عَلَى وَجْهِ أَبِي يَأْتِ بَصِيرًا وَأْتُونِي بِأَهْلِكُمْ أَجْمَعِينَ "
بالفعل رجع إخوة يوسف لأبيهم ، فلما قربوا من المدينة سبحان الله، يعقوب عليه السلام قال لأبنائه إللي كانوا موجودين معاه ومراحوش مع اللي راحوا ليوسف في مصر: أنا خايف تتهموني إني كبرت وخرّفت بس أنا شامم ريحة يوسف👌
"وَلَمَّا فَصَلَتِ الْعِيرُ قَالَ أَبُوهُمْ إِنِّي لَأَجِدُ رِيحَ يُوسُفَ لَوْلَا أَنْ تُفَنِّدُونِ"
فقالوا له إنت لسه في أوهامك القديمة بخصوص إنك هتشوف يوسف تاني🙄
"قَالُوا تَاللَّهِ إِنَّكَ لَفِي ضَلَالِكَ الْقَدِيمِ "
لكن اتضح بعد شوية صغيرين خالص مين إللي كان عايش في الوهم ومين إللي كان على يقين حقيقي طول السنين دي👌
إخوة يوسف جم ودخلوا على يعقوب ورمى واحد منهم قميص يوسف على وش يعقوب بالفعل، فبصره رجع له فعلا سبحان الله، ودي معجزة من معجزات الله 👌
"فَلَمَّا أَنْ جَاءَ الْبَشِيرُ أَلْقَاهُ عَلَى وَجْهِهِ فَارْتَدَّ بَصِيرًا قَالَ أَلَمْ أَقُلْ لَكُمْ إِنِّي أَعْلَمُ مِنَ اللَّهِ مَا لَا تَعْلَمُونَ"

إخوة يوسف لما شافوا المعجزة قصادهم اتزلزلت قلوبهم وعرفوا إنهم كانوا غلط فطلبوا من أبوهم إنه يدعي لهم ربنا بالمغفرة على إللي عملوه كله،
"قَالُوا يَا أَبَانَا اسْتَغْفِرْ لَنَا ذُنُوبَنَا إِنَّا كُنَّا خَاطِئِينَ "
فقالهم إنه هيستغفر لهم في كل موضع وبالذات في وقت ال

سحر في الثلث الأخير من الليل عشان ده من مواطن إجابة الدعاء الجليلة والعظيمة عند الله،
يعني كمان سيدنا يعقوب بيضرب لنا مثل في الإحسان غير عادي، ده مش عفو عادي عن ولاده إللي لو حد فينا مكانه مش قادر أتخيل ممكن نعمل إيه؟!
لأ، ده عفو بإحسان، وشفقة حقيقية عليهم من عقوبة الله كمان، وتحرّي لأرجى أوقات إجابة المغفرة لهم..

بعد كده، خدوا بعضهم كلهم وارتحلوا من فلسطين وراحوا مصر عشان يدخلوا على يوسف،
وهترك لكم تخيل لحظة لقاء يعقوب بيوسف بعد كل إللي حكيناه ده، لإن اللسان يعجز عن ده بالفعل👌
بعد ما احْتفى يوسف عليه السلام بأبويه وأكرمهم، أجلسهم معاه على كرسي الملك، وهنا كلهم سجدوا له😊
الأب إللي هو القمر لأن القمر مذكر، وأمه إللي هي الشمس لأن الشمس مؤنثة والإخوة ال١١.. إللي هم ال١١ كوكب👌
وظاهر القرآن يقول إن أم يوسف عليه السلام كانت عايشة مش ميتة زي ماهو مشهور بين الناس، وهي إللي سجدت مع يعقوب وإخوته، الآية بتقول:
"وَرَفَعَ أَبَوَيْهِ عَلَى الْعَرْشِ وَخَرُّوا لَهُ سُجَّدًا"
وأبويه يعني الأب والأم👍

☆ وطبعا وزي ما قلنا قبل كده في قصة آدم عليه السلام إن السجود هنا سجود تكريم وتشريف مش سجود عبادة،
لإن من سجد لغير الله للعبادة فده كافر، وقلنا إن ده كان في شرع إللي قبلنا لكن شريعة الإسلام مُحرم فيها حتى سجود التكريم😁
هنا يوسف عليه السلام قال لأبوه:
ده تأويل الرؤيا بتاعتي إللي شفتها زمان...ربنا حققهالي دلوقتي.
"وَقَالَ يَا أَبَتِ هَذَا تَأْوِيلُ رُؤْيَايَ مِنْ قَبْلُ قَدْ جَعَلَهَا رَبِّي حَقًّا"
ويقال إن ما بين رؤيا يوسف عليه السلام وتحقيقها أربعون سنة، فمحدش ييأس😅
يوسف عليه السلام يذكر نعمة ربنا عليه وإزاي إنه أخرجه من السجن وجمعه مع أهله تاني بعد ما الشيطان كان فرق بينه وبين إخوته،
"وَقَدْ أَحْسَنَ بِي إِذْ أَخْرَجَنِي مِنَ السِّجْنِ وَجَاءَ بِكُمْ مِنَ الْبَدْوِ مِنْ بَعْدِ أَنْ نَزَغَ الشَّيْطَانُ بَيْنِي وَبَيْنَ إِخْوَتِي"

♡وهنا لفتة جميلة بيقول لنا عليها العلماء،
وهي إن يوسف عليه السلام نسب الإيذاء إللي حصل من اخواته له للشيطان، فطالما تابوا يبقى مافيش داعي أفكرهم كل شوية بخلقهم السيء القديم،
فسبحان الله كان محسن في كل أحواله عليه السلام..
وقعد يتدبر في حاله وإزاي إن ربنا لطيف بعباده وإنه إذا أراد شيئا هيأ أسبابه،
يعني إزاي يوسف عليه السلام كان هيكون في المكانة إللي هو فيها دي من غير ما يعدي على كووول الإبتلاءات إللي فاتت💁‍♂️
"إِنَّ رَبِّي لَطِيفٌ لِمَا يَشَاءُ إِنَّهُ هُوَ الْعَلِيمُ الْحَكِيمُ "
فهو العليم سبحانه بمصالح العباد .
فزي ما قلنا كتير، بنكرر واحنا بنختم احسن القصص ونقول:
ربنا بيدينا الأمل من خلال قصص الأنبياء وبيقولنا اصبروا على الابتلاء وهتشوفوا النتيجة،
فلما تحققت ليوسف الرؤيا وربنا أتم عليه نعمه كلها ... قال: يارب زي ما رزقتني الملك وعلمتني تأويل الرؤى ووهبتني النبوة وأصلحت ليا دنيايا، فأصلح لي آخرتي 🤲
"رَبِّ قَدْ آَتَيْتَنِي مِنَ الْمُلْكِ وَعَلَّمْتَنِي مِنْ تَأْوِيلِ الْأَحَادِيثِ فَاطِرَ السَّمَاوَاتِ وَالْأَرْضِ أَنْتَ وَلِيِّي فِي الدُّنْيَا وَالْآَخِرَةِ تَوَفَّنِي مُسْلِمًا وَأَلْحِقْنِي بِالصَّالِحِينَ "
وآخر نقطة ننبه ليها:
مفيش أي رواية من القرآن والسنة بتقول كم عاش يوسف عليه السلام، لكن أرجح اقوال المفسرين هو إنه عاش ١٢٠ سنة والله أعلم😊


#Eman_Shalapy

#قصص_الأنبياء
#الحلقة_الرابعة_والعشرون
#قصة_أيوب

اتكلمنا عن قصة يوسف عليه السلام وإنه كان ابن يعقوب عليه السلام، وقلنا قبل كده إن إسحاق عليه السلام كان عنده ولدين هما يعقوب والعيص،
فكان من ذرية العيص نبي اسمه أيوب عليه السلام ودي قصتنا النهاردة إن شاء الله😊

☆لكن قبل ما نتكلم عن أيوب عليه السلام في أخت سألتني: إيه الحكمة إن ربنا أرسل يوسف عليه السلام ؟
يعني في الأمم السابقة كان الرسل بيدعوا قومهم ولو لم يؤمنوا ربنا يهلكهم، وربنا لم يهلك أهل مصر، فإيه السبب🤔

=يوسف عليه السلام كان نبيا رسولا، أُرسل لأهل مصر في زمن ملك مصر إللي أكرمه وأحسن إليه ومكّنه من خزائن مصر،
هو دعا الناس لعبادة الله والملك نفسه قرّبه إليه، فكان التركيز في القرآن على قصة حياة يوسف عليه السلام عشان نتعلم منها العِبر زي الصبر على البلاء والصبر على الأذى،
والقوة في مواجهة الفتنة، والإحسان لمن أساء إلينا، إلى آخرِه..
فلو كل الأحداث نسخة بالكربون يبقى احنا هنستفيد إيه🤷‍♂️
وربنا مش بيذكرلنا قصة إلا وهو يريد إنه يعلمنا منها حاجات جديدة من زوايا جديدة ومتنوعة👌
ده غير إن كل قصص الأنبياء السابقين إللي قومهم هلكوا كانوا بسبب إنهم كذّبوا أنبياؤَهم وطلبوا معجزات فيها تعنّت واستكبار وابتزاز وآذوا الأنبياء ،
لكن ده محصلش مع يوسف عليه السلام، فليه ربنا يهلكهم وخصوصا إنهم أكرموا يوسف والناس بتحبه وفي مجال إنهم يدخلوا في الدين؟!
والغاية أبدا مش إهلاك الناس... الغاية جعل الناس يؤمنوا بالله، فطول ماهو شغال في الدعوة والناس مش بتؤذيه وهو نفسه مدعاش عليهم خلاص...ربنا يسيبهم لعلهم يؤمنوا،
ولعل في ناس آمنت كثير بس مش ده المقصد من قصة يوسف عليه السلام،
الدروس إللي بنتعلمها من قصة يوسف عليه السلام غير الدروس إللي اتعلمناها من قصة هلاك قوم نوح مثلا أو قوم صالح...كل قصة ليها عبرة خاصة بيها، فربنا بيقولولنا إللي يفيدنا من كل قصة😊

نرجع بقى لقصة أيوب عليه السلام😁
قلنا قبل كده إن إسحاق عليه السلام كان عنده ولدين هما يعقوب والْعِيص،
فكان من ذرية العيص بن إسحاق بن إبراهيم النبي أيوب عليهم جميعًا السلام،
"إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِنْ بَعْدِهِ وَأَوْحَيْنَا إِلَى إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَعِيسَى وَأَيُّوبَ"
كان أيوب عليه السلام عنده أموال وأراضي وذرية كتير جدا،
كان عنده ١٤ ولد وبنت ، وكان عايش في أرض حُورَان في الشام مع قومه،
عاش أيوب عليه السلام في نعيم الأرض ده سبعين سنة،
وكان نبي مع النعيم ده كله....
وكان كريم جدا ...كان لو عدّى على اتنين بيتخانقوا وحلفوا على بعض بالله كان بيُصلح بينهم، ثم لمّا يروَّح بيتصدق عن حلفانهم ده من ماله الخاص تنزيهًا لاسم ربنا إن حد يحلف بيه كذب أو يحلف وميوفيش بحلفانه،
وكان يساعد الفقراء بكل كرم وسخاء ...على الرغم من كل الطاعات إللي كان بيعملها دي؛ بدأ البلاء ينزل بأيوب عليه السلام...
أبناؤه بدأوا يموتوا واحد ورا التاني🙊
الابن إللي كان بيلعب معاه وكِبر قصاد عينه، إذ فجأة داخل البيت زوجته تقوله ابنك مات😞
ياخده يغسله ويكفنه ويدفنه في القبر ويسيبه ويمشي والناس تعزيه ولسه نار قلبه مبردتش ويلاقي التاني مات😥
ويتكرر نفس الموضوع ١٤ مرة ...متخيلين؟!
ده لو حد مات له طفل ولا اتنين ولا حتى ثلاثة بيبقى هيتجنن ومش قادر😞
ده مات له ١٤ ابن ورا بعض،
ومش بس كده، ده كمان خسر أمواله كووولها😑
ثروته...والأراضي بتاعته كل حاجة ...كل حاجة بمعنى الكلمة،
ومش بس كده...ده بدأ كمان المرض ينزل عليه لدرجة مبقاش في مكان في جسمه إلا فيه مرض، ماعدا لسانه وقلبه😶
أنا عايزكم تتخيلوا معايا😦
واحد عياله كلهم ماتوا...خسر فلوسه كلها...نايم على السرير مبيتحركش...جسمه بقى مليان قُرَح... واستمر في المرض ده مش يوم ولا اتنين ولا شهر ولا شهرين...ده قعد مريض مش بيتحرك ١٨ سنة👌
إحنا الواحد فينا –ربنا يعافي الجميع- لما بيقعد في السرير كام يوم بيبقى مش طايق نفسه ومخنوق😑
ده إنسان قعد ١٨ سنة مريض بيتألم وكمان مبتلى بالحزن على فقد أولاده وفلوسه،
والمرض طول جدا لدرجة إن الناس زهقت من كتر ما بتروح تزوره،
وبِعدوا عنه وهجروه وبدأوا يتكلموا عليه،وطبعا إنتم عارفين كلام الناس😶
هَمّ تاني لوحده🙄
يعني كم واحد رجع عن طريق الإلتزام بسبب كلام الناس وكم واحدة خايفة تأمر بالمعروف وتنهى عن المنكر عشان خايفة من كلام الناس و....و.... 😑
المهم،
اتبقّى لأيوب عليه السلام اتنين أصحابه هم بس إللي استمروا يزوروه، لحد ما في يوم من الأيام وهما رايحين يزوروه واحد قال للتاني:
أكيد أيوب عمل ذنب عشان ربنا يبتليه الإبتلاء ده😤
السنين دي كلها في الإبتلاء وربنا ما بيرفعش عنه ويعافيه! أكيد عمل حاجة استحق بيها عقاب ربنا👌

☆بنسمع وبنقول الكلمة دي لبعض كتير صح😁
لما نلاقي حد ربنا بيبتليه ويبتليه ويبتليه بنقول أكيد ده عنده ذنب ف

عشان كده ربنا بيعاقبه😤

☆سؤال لولبي مهم جدا هنا وناس بتسأله كتير،
إزاي أعرف الفرق إن الإبتلاء ده عقوبة ولّا تكفير سيئات ولّا رفع درجات 🤔

=لو واحد كافر وربنا ابتلاه بمصيبة ده أكيد مش رفع درجات😅
ده بيكون عقوبة للكافر على كفره ومعاصيه وبيكون عبرة وعظة لغيره عشان مايعملش زيه،
ولو واحد مسلم لكنه فاسق مجاهر بالمعصية وربنا ابتلاه يبقى الظاهر إنه عقاب على فسقه وفجوره ومجاهرته للمعصية،
وبالتالي يبقى تكفير للسيئات عشان تكفير السيئات مُقدم على رفع الدرجات، يعني إزاي ربنا هيرفع درجة واحد في الجنة عنده سيئات كتير😅
لازم يتنضف الأول من السيئات ويطلع من القاع إللي هو فيه وبعدين تترفع درجاته للمنازل العُليا😁

لكن واحد طائع عابد لله لا يظهر منه إلا كل خير وربنا ابتلاه فده يغلب الظن إنه لرفع درجته في الجنة
واحنا بنقول يَغلب الظن لأن احنا معندناش يقين بده🤷‍♂️
لأن ممكن ربنا بيطهره من ذنبوب محدش يعرفها غيره سبحانه،
أو ربنا بيربي قلبه تربية إيمانية ، يعني زي إن ربنا يعلمه التوكل مثلا، فدي حاجات محدش يعرفها غير ربنا وبالتالي ملناش غير الظاهر💁‍♂️
وطبعا لو ربنا ابتلى إنسان ظاهره الطاعة وبعدين الشخص ده أظهر التّسخُّط وعدم الرضا بقضاء الله فكده ابتلاؤه أكيد مش لرفع درجاته إطلاقا😶
بيكون للأسف عقوبة 👌
لأن علامة إن البلاء يكون لتكفير السيئات الصبر الجميل يعني مفيش شكوى ولا تسّخط على قدر ربنا،
وعلامة إن البلاء يكون لرفع الدرجات هو الرضا واطمئنان النفس😊
وهو في فرق بين الصبر والرضى 🤔
أينعم 😁...وده تعرفوه من الجزء إللي فات 😊👈
والأكمل بقى في كل إللي فات:
إن ربنا لما يبتلي الإنسان.. يستغفر ويصبر ويشكر...فربنا يغفر له ويرفع درجته في الجنة ويعطيه أجر الصابرين يوم القيامة 👌
¤طيب أنا أعرف إزاي بقى عن نفسي إن البلاء ده بسبب ذنب وده تكفير للذنب، ولّا هو عقوبة😶
تشوف حالك إيه 💁‍♂️
بمعنى هل لمّا البلاء نزل عليك، كان حالك إنك بتتفرج على أفلام ومسلسلات وتسمع أغاني وبتغتاب الناس ومقصر في الصلاة؟
أو المرأة مثلا بتعمل حواجبها ولبسها غير شرعي ..لبس مجسم يعني و...و...
ولّا البلاء نزل عليك وانت مقرب من ربنا وتائب ومتطهر من الذنوب باستمرار وملتزم الطاعات ومجتنب المعاصي وبتتقي الله ؟
فانت هتكون أدرى من أي حد، هل البلاء إللي نزل عليك كان عقوبة ولّا تكفير سيئات ولّا رفع درجات👌

☆وعلى فكرة دايما النجاة بتكون في لوم النفس،
عشان اللوم ده هيدفعها دايما للشعور بالتقصير وبالتالي الإنسان يسارع بالتوبة طول الوقت،
فيُنقي الإنسان نفسه باستمرار من الذنوب، وبالتالي هيكون
العبد أقرب من ربه ومقام محبته 💁‍♂️
"إن الله يحب التوابين ويحب المتطهرين"
غير بقى حال الشخص إللي هيستقبل الابتلاء ده وهو متيقن إن سبب البلاء هو رفع الدرجات وإن أنا كده تمام😌
فالتفكير ده بيعطل النفس عن الإكثار من التوبة، ده غير بقى إن فيه شبهة إن الإنسان يبقى مُعجب بعمله ومُعتقد كماله،
والعُجب أصلا من مُحبطات الأعمال😑
ده غير إنه بيخليه يترك للتواضع الله👌

نرجع بقى لأيوب عليه السلام ونشوف صاحبه إللي قال عنه إنه أذنب ذنب عظيم عشان كده ربنا ابتلاه،
لما وصلوا عند أيوب عليه السلام صاحبه التاني ماقدرش يسكت🙊
فقاله يا أيوب صاحبك ده بيقول إنك أذنبت ذنب عظيم عشان كده ربنا ابتلاك بالابتلاءات دي ولحد دلوقتي انت لسه في البلاء😥
فقال أيوب عليه السلام :
أنا ما اعرفش إنت بتتكلم عن إيه، لكن ربنا يعلم إني معديتش على اتنين بيتخانقوا فيحلفوا بالله إلا وكفّرت عنهم يمينهم عشان ما يكونش حد ذكر اسم ربنا في باطل واستهان بيه😔

خلال بقى ال١٨ سنة دول كانت زوجة أيوب عليه السلام هي إللي بتخدمه وبتشتغل في البيوت عند الناس عشان تشتري أكل ويقدروا يعيشوا،
لكن الناس مع الوقت رفضوا إنهم يشغلوها عندهم... خافوا أحسن تعديهم من مرض أيوب عليه السلام،
فقالت له مرة: يا أيوب انت نبي فادعو الله إنه يرفع عنك البلاء😔
فقالها: احنا عشنا كام سنة في العافية والنعم ؟
فقالت له : سبعين سنة😕
فقالها : أنا اتكسف إني أدعي ربنا وأنا معدّاش عليّ في العافية زي ما عَدّى عليّ في البلاء سبعين سنة 👌
وكان أيوب عليه السلام خلال ال١٨ سنة دول صابر محتسب بيذكر ربنا على طول لم يشتكِ أبدا ولم يدعُ أبدا برفع البلاء عن نفسه.
في يوم من الأيام زوجته خرجت عشان تدوّر على حد تشتغل عنده بعد ما كل الناس بطلوا يشغّلوها، ملقتش.
فباعت ضفيرتها، واخدت تَمَنها واشترت بيه أكل ورجعت البيت..
فلما شاف أيوب عليه السلام الأكل قال لها: جبتيه منين؟
قالت له كُل بس الأول وبعدين نتكلم ، فقال إنه مش هياكل غير لما يعرف،
فكشفت عن شعرها فلقاها باعت شعرها،
فهنا أقسم إنه يضربها مائة جلدة بالسوط لو ربنا شفاه وبقى عنده قوة من تاني👌
◇وده أرجح الأقوال في الموضوع عشان في روايات كتير عن السبب إللي خلى أيوب عليه السلام يحلف إنه يضرب زوجته.

☆طبعا لو جت واحدة قالت يا جماعة أنا زوجي تعبان بقاله سن

ة وانا إللي شايلاه وواخدة بالي منه وبدخله الحمام، وبشتغل وبصرف عليه وأأكله ومالوش غيري ،
وبعدين الفلوس خلصت ومش لاقية شغل، فرُحت بعت حلقي إللي ماليش غيره عشان نجيب أكل ناكله، فراح حالف عليا لَيضربني لو خف، أعمل إيه😞
بالله عليكم مش هتقطَّعوا في فروة الراجل الأول وبعدين تقولوا لها اطّلقي منه عشان يعرف قيمتك قليل الأصل خاين العشرة و...و.... إلا من رحم الله طبعا 😅
يعني احنا هنا مش قادرين نتكلم بس عشان إللي عمل الموقف ده نبي😊
لكن في مواقف أقل من كده ومع ناس تانية مش أنبياء ، بتحصل بين الزوج وزوجته وتلاقي الناس تقول اطلقي اطلقي اطلقي.. طلقها طلقها طلقها😑
أهي زوجة أيوب نفسها كملت الحياة معاه عادي ومطلبتش الطلاق🤷‍♂️
فبلاش نحكم للناس بأحكام وقوالب ثابتة يطبقوها في كل المواقف بدون حكمة،
كل واحد مناسب له حل معين ممكن ميكونش مناسب مع غيره، والطلاق أحيانا بيكون حل وأحيانا لأ،
وممكن نفرّق بين زوجين بنصايحنا وتكون العشرة بينهم لسه تقبل استمرار وتغافل وطول أمل وتراحم وتحمّل.. فناخد بالنا 👌
أيوب عليه السلام لما شاف وضع زوجته إللي بقت فيه واضطرارها لبيع شعرها عشان تأكله وتأكل نفسها دعا ربنا وقال:
يارب أنا مسّني المرض -يعني لمسني- وأنت أرحم الراحمين🤲
يعني حتى مقالش يارب أنا متبهدل ومافيش حتة في جسمي سليمة من المرض ولا قال حتى بشكل مباشر يارب اشفيني وارزقني الفلوس والأكل والأبناء و...و...
إحساس عالي جدا بالحرج من حجم العافية إللي عاش فيه عمر طويل فمستحي يطلب زحزحة وضع الابتلاء بشكل واضح ممكن يظهر فيه كإنه بيشتكي أو مش عاجبه إللي بيحصل فيه ده👌
في حين إنه كمان متكلمش عشان نفسه،
ده اتكلم لما بدأ يشوف إن زوجته انقطعت بيها الأسباب تماما وأشفق عليها،
فبكل أدب فوّض الأمر لربنا يارب انت عالم بالحال وأنت أرحم الراحمين ، لو إنت ترى إن من الرحمة إني أستمر في البلاء خلاص خليني في البلاء😔
"وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ"
فكانت الإستجابة الفورية من عند ربنا 👌
لأنه كان عنده رصيد😁
"فَاسْتَجَبْنَا لَهُ فَكَشَفْنَا مَا بِهِ مِنْ ضُرٍّ "
كان صابر و أوّاب...يعني بيصلي وبيسبّح وبيذكر ربنا كتير،
"إِنَّا وَجَدْنَاهُ صَابِرًا نِعْمَ الْعَبْدُ إِنَّهُ أَوَّابٌ "
وطبعا في شريعة الإسلام مش مطلوب إنك تستحي من الدعاء بالعكس، ده انت تدعي وتلح في الدعاء وتناجي ربنا وتشكيله همك وحزنك –زي ما يعقوب عليه السلام كان بيعمل👌
لكن احنا بنوريكم بس إزاي أيوب عليه السلام كان بينظر لحجم العافية وكان مقدّر النعم الإلهية تقدير عظيم جدا مخليه مستحي بالشكل ده.

أيوب عليه السلام كان في يوم عايز يروح الحمام فزوجته اتأخرت عليه فربنا أوحى له إنه يضرب الأرض برجليه، فطِلِع نبع مية، فربنا قال له يشرب ويغتسل من النبع ده، وعمل كده فعلا وخف من المرض كله،
مش بس كده ، ده كمان رِجِع شباب 🙊
"ارْكُضْ بِرِجْلِكَ هَذَا مُغْتَسَلٌ بَارِدٌ وَشَرَابٌ"
زوجته لما جت وقابلت الشاب ده اندهشت وسألته: فين نبي الله المبتلى إللي كان هنا!
فقالها : أنا ايوب😊
قالت: أيوب🙊 إيه إللي حصل 😳
فقال لها: "ربنا شفاني ورجّع لي صحتي وشبابي، بعد صبري على طول البلاء فيهم..."
وربنا كافأ الزوجة الصابرة الأصيلة دي بإنه رجعلها هي كمان شبابها،
ورزق أيوب عليه السلام بعد كده ب٢٨ ولد ،ضِعف عدد اللي ماتوا فسبحان الله😮
"وَوَهَبْنَا لَهُ أَهْلَهُ وَمِثْلَهُمْ مَعَهُمْ رَحْمَةً مِنَّا"
لكن في مشكلة دلوقتي😬
لازم أيوب عليه السلام يوفي بالقسم اللي قطعه على نفسه لما زوجته باعت ضفيرتها،
ولا يمكن ميوفيش بقسمه، ده هو أصلا إللي كان بيكفّر عن أيمان الناس التانية إجلالا لاسم الله،
فمش معقولة هيتهاون هو في الوفاء بنذر حلف إنه هيعمله بنفسه😅
فربنا من رحمته بيه هو وزوجته ولعلمه مدى تقواهم لله عز وجل وإخلاصهم؛ أمر أيوب عليه السلام إنه يجيب مائة عود ويجمعها كلها مع بعض ويضرب زوجته بيها ضربة واحدة خفيفة كده وبس، ويبقى كده وفّى القسم👌
"وَخُذْ بِيَدِكَ ضِغْثًا فَاضْرِبْ بِهِ وَلَا تَحْنَثْ"
ولعل الموضوع ده في حكمة لكل زوج أو كل أم حتى، ممكن يكونوا في موقف شبه موقف أيوب عليه السلام وأقسموا إنهم هيضربوا حد من أسرتهم،
وبعدين لما الزوبعة هديت بقوا مش عارفين يعملوا إيه😅 ممكن ياخدوا درس من رحمة الله بأيوب وزوجته ويعملوا حيلة بما يشبه التعريض، وتكون الحيلة دي سبب لرفع المشكلة بإذن الله👌

ربنا بقى بعت لأيوب عليه السلام سِرب جراد من ذهب بقى يقع عليه وهو يعبّيه في حجره كله كإنه مش عاوز يسيب واحدة تفلت،
فربنا عز وجل قال له: يا أيوب أما تشبع؟ يعني انت مشبعتش لسه؟!
فقال أيوب عليه السلام : ومن يشبع من رحمتك يارب.!
يعني محدش يقول أصل أيوب عليه السلام كان صابر على ابتلاء فَقْد المال مثلا لإن ربنا جعله نبي وجعله زاهد أصلا في المال،
لأ، الجواب قصادكم أهه:
هو بشر زي أي بشر، يصيبه ما يصيب البشر من

غضب وغيرة وحب للمال والبنين،
لكن عند الابتلاء بالخير والشر هو عبد رباني تقي طائع لربه عز وجل صابر محتسب بكل رضا وأدب.
انتهى ابتلاء أيوب عليه السلام ونسي أيام الشقاء والتعب من تاني،
وزي ما العافية والنعم بتُنسِي الإنسان كل الآلام إللي فاتت ، فكذلك غمسة واحدة في الجنة تُنسي أشد الناس بلاء في الدنيا أي بلاء شافوه👌
أجمل جملة فعلا ممكن نختم بيها قصتنا النهاردة،
ومن يَشبع من رحمتك يارب😊

☆سؤال مهم من التعليقات:
📌والله مافهمتش ليه كان عاوز يضربها؟
وليه مأخرجش كفاره يمين زى ماكان بيعمل للناس التانيه
القصه في النقطه دى تزعّل😞

💡طيب براحة كده وواحدة واحدة عشان النقطة دي ممكن نحس فيها ظلم شوية من وجهة نظرنا لكن الواقع مش كده 😁
زوجة أيوب عليه السلام لما كانت بتطلع عشان تشتغل، راحت لوحدة عشان تشغلها فقالت لها:
لأ، مش هشغلك لحد ما تديني ضفايرك عشان أزين بيها بنتي وكان شعرها جميل ففعلا عملت كده، فلما رجعت لأيوب عليه السلام غضب عليها لأن فعلها ده محرم وحلف إنه يجلدها مائة جلدة،
لكنه بعد كده ندم، ومينفعش يرجع في حلفانه، لأن ربنا أمره بكده، فرحمة بزوجة أيوب عليه السلام ربنا أمره بموضوع الأعواد ده وهي على فكرة ضربة خفيفة شبه الوكزة إللي بالسواك مثلا، مش زي ماحنا متصورين إنه ضربها ضربة جابتها الأرض😅

◇وفي هنا نقطة شرعية محتاجة تتوضح،
شعر الزوجة مش ملك ليها لوحدها تتصرف فيه براحتها، لأ ده من ضمن العهد والوعد إللي اتفقوا عليه سوا كزوج وزوجة، يعني إنه يديها المهر بتاعها قصاد إنها تكون زوجته إللي من حقه يتمتع بجمالها ومن ضمن جمالها ده أكيد شعرها بل هو تاج المرأة،
فلما تتصرف فيه من غير إذن زوجها يبقى خالفت العهد، فمنبصش لرد فعل الزوج قبل ما نشوف حق كل طرف إيه الأول👌
ولعل كمان الزوج في موقف زي ده يكون غار غيرة شديدة إن شعر زوجته يكون في إيد التجار، حتى لو هي كانت حريصة إنها ما تبينش إنه شعرها هي، لأ ممكن يكون شعر حد تاني وهي جاية تبيعه، لكن لعل غيرة الزوج تكون سبب تاني من ضمن الأسباب..
وطبعا ما ننساش ننبه هنا إن بيع الشعر في شريعة الإسلام عشان يتعمل منه باروكة وخلافه حرام شرعا لا يجوز، ولعل أحيانا الشعر ممكن يتباع لأغراض تانية مباحة شرعا مفيش مشكلة.

✔في قول تاني بقى إنها في يوم وهي خارجة بتدور على شغل قابلها الشيطان متجسد في صورة طبيب وقالها إن شفاء أيوب يكون في إنه يجيب عصفور ويدبحه بدون ما يذكر اسم ربنا عليه ويشرب معاه الخمر ويمسح جسمه بدم العصفور فراحت لأيوب عليه السلام وقالت له،
فقالها إن ده الشيطان وإنه كان بيغويكي فملكيش دعوة بيه تاني،
فتجسد لها الشيطان في صورة انسان على حصان أحمر وقالها إيه سبب البلاءات إللي إنتم فيها دي؟
قالت له إن ربنا أراد إنه يختبرنا، فقالها لأ ...ده لأنكم بتعبدوا إله السماء ومش بتعبدوا إله الأرض ، وأنا إله الأرض وتعالي هوريكي الدليل،
وراحت معاه ناحية واد وسحر عينيها بألاعيب الجن فشافت عيالها وأموالهم وكل إللي فقدوه،
فرجعت لأيوب عليه السلام تقوله فغضب جدا لأنها وصلت هنا للشك في وحدانية الله، وكمان هو كان نهاها عن إنها تسمع الوساوس الشيطانية دي تاني فحلف إنه يجلدها، وهي نفسها تمنت إنه يخف ويضربها👌

انتم متخيلين احننا بنعصب ونزعق لعيالنا الصغيرين اللي ميعرفوش حاجة لو حد فيهم كذب ولّا مسمعش الكلام ولّا...ولّا...وممكن الموضوع يتعدى للضرب الشديد😑
فما بالكم بزوجة نبي يوصل معاها للوضع لكده👌

✔الرواية الثالثة، إنها كانت بتاخد الصدقة من الناس وتخلي أيوب عليه السلام ياكل الصدقة من غير ما يعرف وحرااام على الأنبياء أكل الصدقة، وهو كان نهاها عن كده بس هي استمرت برده فغضب عليها وحلف إنه يضربها.

ففي كل الحالات دي ربنا خفف عنها ورحمها بالوحي بالحيلة دي، فأيوب مش ظالم ليها ده نبي حاش لله إنه يظلم،
وكمان الحلفان بتاعه كان نَذر مش مجرد قَسَم، والنذر يجب الوفاء بيها ماينفعش يكفر عنه تكفير يمين زي ما كان بيعمل مع الناس💁‍♂️

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الخامسة_والعشرون
#قصة_ذا_الكفل_أصحاب_الرس_يونس

معانا النهاردة إن شاء الله ثلاث قصص قصيرة هم:
《قصة ذو الكفل وأصحاب الرّس، ويونس》

♡نبدأ بأول قصة وهي قصة ذو الكفل.

من الأنبياء إللي ربنا ذكرهم لينا ذو الكفل عليه السلام،
في علماء قالوا إنه كان فقط رجل صالح مش نبي، لكن ظاهر القرآن بيقول إنه كان نبي،
وفي علماء قالوا إنه كان ابن أيوب عليه السلام بس مفيش دليل على الكلام ده،
هو مفيش عنه أخبار كتير، بس ربنا قال عنه إنه كان من الصابرين وذكره مع أيوب وإسماعيل عليهما السلام،
"وَإِسْمَاعِيلَ وَإِدْرِيسَ وَذَا الْكِفْلِ كُلٌّ مِنَ الصَّابِرِينَ"

والكفل معناه الحِمْل، و ذا يعني "صاحب" فيبقى "ذا الكفل" معناه صاحب الحِمل أو واحد بيشيل حِمل.

◇طيب ليه اتسمى بالإسم ده 🤔
علماء التفسير قالوا لأنه تحمّل –أو حمّل نفسه- إنه يصوم النهار ويقوم الليل ولا يغضب أبدا.
وطبعا الموضوع صعب 😅
مين إللي يستحمل يصوم النهار كل يوم ويقوم الليل كل ليلة ولا يغضب أبدا😶

☆لو لاحظتم ...في قصة إسماعيل وأيوب ويوسف كان ربنا بيذكّرنا بالصبر على البلاء إللي بيحصل للإنسان غصب عنه،
زي بلاء المرض ودخول السجن والذبح،
لكن في نوعين تانيين من الصبر وناس كتير أوي تلاقيها مبتقدرش تكمل في النوعين دول👌
◇النوع الأول هو:
الصبر على الطاعة، زي الصبر على الصلاة والوضوء في شدة البرد، والصبر على قيام الليل والصبر على صيام النهار والصبر على لبس النقاب في عز الحر،
والصبر على قراءة القرآن والصبر على اتباع أوامر ربنا...ده كله من الصبر.
◇النوع التاني إللي هو: الصبر عن المعصية.
يعني واحد مثلا بيموووت في سماع الأغاني، بيموووت في الأفلام والمسلسلات ومع ذلك بيصبر إنه لا يسمع أغاني ولا يتفرج على المسلسلات،
واحدة بتموووت في لبس الموضة وإنها تبين جمالها للناس عشان الناس تقولها انتِ جميلة، لكن بتصبر عن المعصية دي وتجاهد نفسها إنها تبعد عنها👌
فكلنا بلا استثناء حالنا هو إما صبر على طاعة أو صبر عن معصية أو طبعا النوع التالت إللي كلنا عارفينه زي ماقلنا، إللي هو الصبر على البلاء 😊
عشان كده ربنا ذكر اسم ذا الكفل عليه السلام مع أيوب وإسماعيل عليهما السلام،
لإنه تحمّل صبر على طاعات شديدة وصبر عن معصية صعبة جدا،
وإليكم المفاجأة 🙊
الصبر على الطاعة والصبر عن المعصية أعلى منزلة من الصبر على البلاء😁✌️
إزاي😳
ببساطة لأن البلاء أو المصيبة قدر من ربنا نافذ لا محالة، فالإنسان غصب عنه مفيش قدّامه إلا إنه يصبر سواء صبر جميل أو لأ، كده كده معندوش اختيارات إنه يقبل بالوضع أو ميقبلش🤷‍♂️
يعني سواء صَبَر صَبْر جميل أو اشتكى منه ليل نهار فالبلاء كده كده موجود غصب عنه ما يقدرش يرفعه بنفسه،
والصبر على البلاء كمان ممكن بيقدر عليه الكفار فمهواش خاص بالمؤمنين فقط يعني،
كم مرة شوفنا واحد غير مسلم حصل له ابتلاءات كتير ومع ذلك صابر وبيضحك والدنيا عنده عادي وبيصبّر نفسه بإيمانه بإلهه المزعوم؟
كتييير 😅
لكن الصبر إللي له علاقة بالتكليف سواء صبر على طاعة أو الصبر عن المعصية، فده صبر أتْباع الرسل، لإنه حاجة اختيارية بنختارها بإرادتنا،
الإنسان بيختار بنفسه إنه يتبع هواه ويسيب الطاعات... يسمع أغاني يغتاب، يسرق، يكذب، ينقّي من الدين إللي على هواه، أو ممكن يختار بنفسه عكس ده كله💁‍♂️
يعني ذِكر قصة ذي الكفل وكُون اسمه لافت للنظر وله معنى عميق كده ده يؤكد لنا إن ربنا لما بيذكر لنا قصة نبي بيكون وراها فايدة أكيد، وإللي يسكت عنه يبقى ما يهمناش أو مالوش فايدة،
لإن القرآن مش كتاب تاريخ عشان يقول لنا تفاصيل الأحداث الدقيقة، زي مثلا قميص يوسف كان لونه إيه، امرأة العزيز كان عندها كام سنة وهكذا😅
الحاجات دي متقالتش في قصة يوسف عليه السلام،
اتقال لنا فقط إللي يهمنا من موضوع القميص،
وكذلك لما ربنا قال لنا عن قصة ذي الكفل في القرآن قالنا على يهمنا بس فيها، وهو إنه كان من الصابرين الصالحين👌
"وَاذْكُرْ إِسْمَاعِيلَ وَالْيَسَعَ وَذَا الْكِفْلِ وَكُلٌّ مِنَ الْأَخْيَارِ "
وبكده خلصت قصة ذي الكفل عليه السلام😊

♡القصة التانية هي: قصة أصاحب الرس.
"كَذَّبَتْ قَبْلَهُمْ قَوْمُ نُوحٍ وَأَصْحَابُ الرَّسِّ وَثَمُودُ "

علماء التفسير قالوا فيها كلام كتير أوي بصراحة😶
فأنا هقول لكم أكثر قصة لقيتها منطقية ومُقنعة نوعا ما 😅
وإللي عايز يعرف الأقوال التانية هيلاقيها في تفسير بن كثير 😁
الرّس معناها البئر، وكان أصحاب الرس عندهم بئر بيشربوا منه، وكان بيحكمهم ملك عادل وكانوا بيحبوه جدا، فلما مات زعلوا عليه جدا...
وبعد كام يوم الشيطان تمثّل في صورته وقال لهم : أنا مامُتّش، لكن أنا غيبت عنكم شوية كده عشان أشوفكم هتعملوا إيه 😏
ففرحوا جدا وأمرهم إنهم يعملوا بينهم وبينه حجاب،
☆ حاجة كده زي الكَرَفان إللي بيكون مخرم ده عارفينه🤔

المهم،
أكتر الناس صدّقته فعلا وافتَتَنوا بيه وبدأوا يعبدوه😶
فربنا أرسل لهم نبي وقال لهم إن الحاكم ده شيطان

.. وأمرهم بعبادة الله وحده،
وكان ربنا بيُوحي له وهو نائم، وكان اسم النبي ده حَنْظلة بن صفوان،
فأهل القرية اعتدوا عليه وقتلوه ورموه في البئر،
فماء البئر اختفى ومبقاش عندهم مية والأشجار ماتت وربنا أهلكهم كلهم.
"وَعَادًا وَثَمُودَ وَأَصْحَابَ الرَّسِّ وَقُرُونًا بَيْنَ ذَلِكَ كَثِيرًا * وَكُلًّا ضَرَبْنَا لَهُ الْأَمْثَالَ وَكُلًّا تَبَّرْنَا تَتْبِيرًا "

☆شوفتم إزاي الأنسان ممكن يحب حد فيُفتن بيه ويكون سبب في هلاكه👌
هم متقبّلوش موت الملك إللي كانوا بيحبوه فالشيطان استغل الفرصة دي والتعلق القلبي الشديد ده وأضلّهم بسببه،
وممكن يحصل معانا برده على فكرة الموقف ده بس مع شوية اختلافات😅
ممكن مثلا المرأة تحب زوجها بزيادة أوي والشيطان يقعد يخوّفها من فراقه بشكل مَرَضي ،
وتلاقيها كل ما زوجها يقولّها على حاجة تسمع كلامه حتى لو كانت فيها معصية لله، عشان خايفة خوف شديد إنه يطلقها،
ولو حد نصحها مثلا تقول له ده زوجي ما أقدرش أزعله😥

أو حتى واحدة تحب صاحبتها أو صاحب يتعلق بصاحبه أوي أو أم بتتعلق بولادها أوي أو ابنة تتعلق بأبوها بشكل شديد زايد عن الطبيعي، لدرجة إنهم ممكن يعصوا ربنا عشان
خاطر حبايبهم دول مايزعلوش منهم وما يغيبوش عن عنيهم،
وخدوا من ده كتير،
بصوا في حياتكم هتلاقوا على الأقل مثال من الأمثلة دي حواليكم👌

♡آخر قصة معانا النهاردة هي قصة يونس عليه السلام.

اسمه يونس بن متّى، ربنا أرسله لقرية نِينَوَى في العراق،
"وَإِنَّ يُونُسَ لَمِنَ الْمُرْسَلِينَ "
وكانوا كفار فدعاهم لعبادة الله فترة فكذبوه كالعادة زي الأمم السابقة، فربنا قال له إنه هيرسل عليهم العذاب،
فيونس عليه السلام غضب على قومه وقال لهم إن ربنا هيرسل عليهم العذاب بعد ثلاثة أيام،
فساب القرية ومشي، وقومه غضبوا منه إنه سابهم ومشي برة القرية،
"وَذَا النُّونِ إِذْ ذَهَبَ مُغَاضِبًا "
وخدوا بالكم: يونس عليه السلام خرج من القرية قبل ما ربنا يَأْذن له بالخروج👌
في الأمم السابقة لو تفتكروا ربنا كان بيؤمر الرسول إنه يُنذر قومه بالعذاب ويخرج من البلد قبل نزول العذاب، زي قوم صالح ولوط عليهما السلام
فيونس عليه السلام اجتهد من نفسه وخرج من القرية إللي اتهددت بالعذاب قياسا على الأمم السابقة،
فخروجه ده مكنش بوحي لسه،
فلما خرج من القرية كان متخيل إنه عادي يعمل كده لإنه نبي وربنا مش هيغضب عليه أو يعاتبه،
وده معنى قول ربنا في القرآن :"فَظَنَّ أَنْ لَنْ نَقْدِرَ عَلَيْهِ"
ونَقْدِر هنا معناها من التضييق، يعني أن لن نضُيّق عليه بسبب إللي عمله،
ومش معنى "لن نقدر عليه" إن ربنا مش هيقدر عليه بمعنى القُدرة😅
لأن أي حد يفكر إن ربنا مش هيقدر عليه يَكفُر على طول👌فبعد ما خرج من القرية راح ركب سفينة في البحر،
وهمّ في الطريق البحر هاج والناس خافت لَيغرقوا، فقالوا نخفف الأحمال،
ورموا الأمتعة بتاعتهم في البحر وبرده لسه السفينة تقيلة، فقالوا مفيش قصادنا حل غير إننا نبدأ نرمي من الناس حد معين😶
فعملوا زي قرعة فطلع نصيب يونس عليه السلام إنه يترمى في البحر🙊
" إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنَ الْمُدْحَضِينَ "
الناس بصوا له شافوا عليه علامات الصلاح فقالوا بلاش نرميه خلونا نعمل قرعة تانية وعملوا القرعة ثلاث مرات وكل مرة يطلع نصيب يونس عليه السلام😮
فعرف سيدنا يونس إن هو المقصود👌 وإن دي علامة من ربنا،
◇ملحوظة مهمة،
احنا في شريعتنا الإسلامية لو الموقف ده حصل لا يجوز لركاب السفينة إنهم يختاروا واحد منهم ويرموه في البحر عشان الباقيين ينجوا،
حياة المسلمين كلها سواء، فإما كلهم ينجوا مع بعض أو يغرقوا مع بعض، مفيش حد حياته أغلى من التاني، وده من عدل الإسلام👌
ثم هم يعرفوا منين إنهم لو رموا الإنسان ده إنهم مش هيغرقوا كلهم🤷‍♂️
كلها احتمالات، ودم المسلم معصوم بيقين، فلا يُهْدَر هذا اليقين لأجل ظن رَجَح عندك،
فموقف زي كده يدعوا ربنا ينجيهم لأن هو المُنجي سبحانه،
"قُلِ اللَّهُ يُنَجِّيكُم مِّنْهَا وَمِن كُلِّ كَرْبٍ"

المهم،
أهل السفينة رموا يونس فعلا في البحر...
على فكرة الموضوع مرعب حتى لو كنت نبي..ففي الآخر هو بشر، يعني برة المركب أمواج بحر عالية... منظر المية وهي ملهاش قعر ولا نهاية...
وهل كان بيعرف يسبح ولّا لأ...كل دي حاجات مجرد التفكير فيها يخوّف فما بالنا باللي هيترمى فيها🙊
ده غير بقى إن أول حاجة هتيجي في بال يونس عليه السلام إنه قصر في رسالة عظيمة وعقاب ربنا هيكون على قدر عِظَم الأمانة فأكيد الموضوع كان مرعب جدا بالنسبة ليونس عليه السلام😶
وبعد ما رموه في البحر، على طول في ساعتها طلع حوت ضخم وفتح فمه وابتلع يونس عليه السلام 😳
في نفس الوقت ده ربنا كان أرسل على قوم يونس العذاب،
فلما شافوا السحاب وهو بيطلّع شرر أحمر من بعيد وشافوا سحاب اسود، اجتمعوا كلهم وقالوا يونس كان صادق وده العذاب جايلنا ...ربنا هيُهلكنا كلنا😱
احنا مفيش قصادنا غير إننا نتوب ونستغفر ونتضرع إلى الله

عشان يكشف عننا العذاب،
وفعلا كل القرية اجتمعوا وقعدوا يبكوا ويتضرعوا لربنا وكانوا أكثر من مائة ألف،
"وَأَرْسَلْنَاهُ إِلَى مِائَةِ أَلْفٍ أَوْ يَزِيدُونَ "
حتى كانوا بيفصلوا الطفل الصغير عن أمه عشان يبكي هو كمان ، حتى لو بكاؤه كان مجرد بكاء من الجوع، بس أهه أي وسيلة يسترحموا بيها ربنا ويحاولوا يستجلبوا بيها عفوه عنهم،
وفضلوا كده لحد ما ربنا رفع عنهم العذاب بالفعل👌
"فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا "

وهي دي الغاية يا جماعة إن الناس تؤمن، الهدف من إن ربنا يبتلي الإنسان هو إنه يتضرع ويستغفر ويرجع لطريق الطاعة
"فَلَوْلَا إِذْ جَاءَهُم بَأْسُنَا تَضَرَّعُوا "
هو ربنا الغني عز وجل هينتفع بإيه لما يعذبنا يعني بدون سبب؟
"مَّا يَفْعَلُ اللَّهُ بِعَذَابِكُمْ إِن شَكَرْتُمْ وَآمَنتُمْ"
فلما قوم يونس عليه السلام آمنوا ربنا كشف عنهم العذاب على طول،
على عكس اللي حصل مع كل الأمم إللي ما نفعهمش الإيمان بشيء لما جالهم العذاب خلاص،
وكل ده ويونس عليه السلام مايعرفش إللي حصل مع قومه، ولعل كان ده السبب إن ربنا لم يَأذن ليونس عليه السلام إنه يخرج من القرية،
لأنه يعلم في علم الغيب إن قوم يونس لما يشوفوا بدايات العذاب هيؤمنوا👌
مش هيقولو مثلا زي إللي قالوا قبل كده "هذا عارضٌ ممطرنا"
ويونس عليه السلام لأنه ميعرفش الغيب فتصور إن الوضع هيكون زي الأمم السابقة فخرج من القرية🤷‍♂️

☆بس إزاي يونس عليه السلام وهو نبي معصوم يغلط😶
ركزوا معايا عشان النقطة دي مهمة جدا👌
◇أولا :
الأنبياء معصومين من الخطأ في تبليغ الوحي سواء خطأ متعمد أو خطأ غير مُتعمّد ومعصومين من الكفر قبل الوحي وبعده.
◇ثانيا:
الأنبياء معصومين من الوقوع في الكبائر.
◇ثالثا :
الأنبياء معصومين من الصغائر التي تدل على الخِسَّة زي سرقة لقمة مثلا.
لكن ممكن يقعوا في الصغائر إللي لا تدل على الخِسّة، مع عدم إقرارهم عليها،
يعني بينزل وحي في ساعتها بالعتاب عليها بشكل واضح وعلني فبيستغفروا منها بشكل علني برده ومش بيرجعوا لها تاني أبدا،
زي آدم عليه السلام لما وقع في معصية الأكل من الشجرة لما نسي إن إبليس عدوه فسمع كلامه، وماستمرش على المعصية ساعتها،
ده تاب واستغفر على طول أول ما تبيّن له إنه غلط، وربنا تقبّل توبته، وطبعا ما كررهاش تاني أبدا.
"وَعَصَىٰ آدَمُ رَبَّهُ فَغَوَىٰ *ثُمَّ اجْتَبَاهُ رَبُّهُ فَتَابَ عَلَيْهِ وَهَدَىٰ"
وده إللي حصل مع يونس عليه السلام
"إِذْ أَبَقَ إِلَى الْفُلْكِ الْمَشْحُونِ"
فهو استعجل وخرج من قومه قبل ما ربنا يأذن له، وحتى ربنا وصى رسول الله ﷺ إنه ميكونش زي يونس عليه السلام في إنه لم يصبر الصبر المطلوب لحد ما يجيله الوحي في الأمور إللي متنفعش من غير وحي👌
"فَاصْبِرْ لِحُكْمِ رَبِّكَ وَلَا تَكُنْ كَصَاحِبِ الْحُوتِ إِذْ نَادَى وَهُوَ مَكْظُومٌ ۩ لَوْلَا أَنْ تَدَارَكَهُ نِعْمَةٌ مِنْ رَبِّهِ لَنُبِذَ بِالْعَرَاءِ وَهُوَ مَذْمُومٌ"
بس مش معنى كده إن ده يُنقص حاجة من قَدر الأنبياء دول،
لإن تمام الكمال بيكون حسب النهاية كانت إيه، والعبرة بالخواتيم،
فيونس عليه السلام وغيره من الأنبياء حالهم أكمل الأحوال😊

المهم،
يونس عليه السلام فتح عينه لقى نفسه في بطن الحوت وكان ربنا أمر الحوت إنه مياكلوش ولا يكسر عظمه لإنه مش رزقه👌
كان الحوت بيطوف بيونس عليه السلام في البحر فكان بيسمع أصوات تسبيح المخلوقات في الأعماق،
فبدأ يونس عليه السلام يسبّح معهم.
فلما كان يونس عليه السلام يسبّح ويقول :
"لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ"
كانت الملايكة تقول يارب احنا سامعين صوت ضعيف
مألوف بأرض غريبة،
فربنا قال لهم إن ده يونس عليه السلام، فشفعوا ليونس عند ربنا، ودعوه عز وجل وقالوا:
أَلست أنت ترحم في الشدة من كان يعرفك في الرخاء؟ فأجاب الله عز وجل: بلى،
فربنا أمر الحوت إنه يطلع يونس من بطنه ويلقيه على الساحل، بتسبيحه إللي ربنا جعله سبب في خروجه من الضيق الشديد ده،
"فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ"
وكان جسمه ضعيف زي هيئة الظبي لما بيتولد،
فربنا أنبت له جنب منه شجرة من يقطين بالذات –إللي هو نبات القرع- لأنها بتتاكل على جميع الأحوال ...بقشرها وبدون...مطبوخة وغير...
يعني هي أنسب أكلة في حالته دي وفيها فوائد كتير محتاجها في ضعفه ده دلوقتي،
وهنا ربنا بيعلمنا قاعدتين مهمتين:
◇الأولى:
إن لما ينزل بينا البلاء أول حد ممكن نفكر فيه هو وحده سبحانه؛ لإنه هو الوحيد القادر على تغيير البلاء لنعمة وعافية.
◇القاعدة التانية:
تَعَرَّف إلى الله في الرخاء يعرفك في الشدة، يعني الإنسان يكون عنده رصيد في الصّلة بالله عز وجل زي ما قلنا في قصة أيوب عليه السلام ،
وإن التسبيح من أعظم أسباب رفع البلاء وكشف المصائ

ب 😊
"فَلَوْلَا أَنَّهُ كَانَ مِنَ الْمُسَبِّحِينَ * لَلَبِثَ فِي بَطْنِهِ إِلَى يَوْمِ يُبْعَثُونَ"
يُقال إن يونس عليه السلام قعد في بطن الحوت يوم واحد ، وفيه إللي قال سبع أيام وفي إللي قال قعد أربعين يوم.
لكن المؤكد إنه قعد فترة كافية تخليه يخرج بالشكل الهزيل الضعيف ده،
والحوت إللي ابتلع يونس عليه السلام مش على قيد الحياة زي ما الناس فاكرة وبتقول😅
وغير معروف كم سنة عاشها يونس عليه السلام بعد خروجه من بطن الحوت.

إن شاء الله المرة الجاية هنتكلم نبي ورسول من أُولِي العزم من الرّسل أنا شخصيا بحبه جدا😁
استنتجوا انتم بقى هو مين🤭

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_السادسة_والعشرون
#قصة_موسى_الجزء_الأول
#المولد_والنشأة

قصتنا النهاردة عن نبي من أُولِي العَزْم من الرسل،
وأُولي العزم معناها:
الأنبياء إللي تعرضوا لأذى شديد من قومهم واتعرضوا لابتلاءات كثيرة في حياتهم، ثم واجهوا الأذى والبلاء ده بالصبر،
وأولي العزم من الرسل هم أفضل الأنبياء والمرسلين على الإطلاق، وهم خمسة : نوح وإبراهيم وموسى وعيسى ومحمد صلى الله عليه أجمعين.
واحنا اتكلمنا عن نوح وإبراهيم عليهما السلام، و النهاردة هنتكلم عن موسى عليه السلام 😁
اسمه موسى بن عمران من ذرية يعقوب عليه السلام،
هو أكثر نبي مذكور في القرآن لأن قصته مع بني إسرائيل مليانة عِبر، ولأن أحداث أُمِّته متشابهة كتير مع أحداث أمة محمد ﷺ،
وموسى عليه السلام له علينا فضل كبير جدا احنا المسلمين ،
لأن في رحلة المعراج لما ربنا فرض على رسول الله ﷺ الصلاة وكانت خمسين،
قابل رسول الله ﷺ موسى في السماء السادسة، وسأله موسى عن إللي ربنا فرضه عليه ،
فقال له رسول الله ﷺ إن ربنا فرض عليه خمسين صلاة،
فموسى عليه السلام قال له أُمّتك مش هتستحمل،
فاطلب من ربك التخفيف، فالنبي ﷺ استغرب، وبص لجبريل باستغراب وسأل:
هو أنا ينفع أرجع لربنا وأسأله التخفيف؟ فجبريل عليه السلام قال له: نعم،
ففعلا بسبب كلام موسى عليه السلام، استمر رسول الله ﷺ يسأل ربنا التخفيف لحد ما وصلت لخمس صلوات بدل خمسين،
وطبعا انتم عارفين إن كتير من الناس بتصلي الخمس صلوات بالعافية فما بالنا لو كانت خمسين😶
طبعا كله بتقدير من ربنا ومكتوب في اللوح المحفوظ، لكن موسى عليه السلام كان سبب بس،
وربنا هو إللي جعله سبب في ده، وهتلاقوا في السيرة شرح الموضوع بالتفصيل😊

نرجع بقى بالزمن شوية كده😁
اتكلمنا قبل كده عن قصة يوسف عليه السلام وإنه قال لإخواته إنهم يجيبوله كل أهلهم من البَادية في فلسطين عشان يسكنوا مصر،
وفعلا يعقوب عليه السلام جه هو وأبنائه ال11 وأم يوسف، وسكنوا كلهم مصر،
وكان الناس بيكرّموهم ويعاملوهم بإحسان إكراما ليوسف عليه السلام.
وكان الملك إللي بيحكم مصر في عهد يوسف عليه السلام من الهكسوس، وكان الهكسوس محتلين مصر ساعتها،
فلما قام أحمس الأول بثورة وخرّج الهكسوس من مصر وبدأ عصر الفراعنة،
بدأ الفراعنة يستعبدوا بني إسرائيل على أساس إنهم كانوا مُوالين ومتعاونين مع الهكسوس، وقعدوا في الظلم والقهر والاستعباد ده حوالي ٣٠٠ سنة،
وقلنا قبل كده إن إسرائيل هو يعقوب عليه السلام، وإن كلمة إيل في اللغة السريانية معناها الله، وكلمة إسرا معناها عبد فتكون إسرائيل بمعنى عبد الله،
وبني إسرائيل هم ذرية يعقوب عليه السلام 😊
فكان الفراعنة إللي بيحكموا مصر مخليين بني إسرائيل عبيد وبيخلوهم يشتغلوا في المِهن الحقيرة الوضيعة عندهم، يعني كانوا عايشين في منتهى الذل والهوان والقهر😶
في يوم من الأيام واحد من الفراعنة شاف رؤيا ويُقال إن الفرعون ده رمسيس الثاني والله أعلم،
شاف إن في نار بتخرج من بيت المقدس وتنتشر في مصر ، وبتُصيب كل بيوت أهل مصر،
ماعدا بيوت بني إسرائيل مش بتيجي ناحيتهم،
فقام من النوم خايف😳
وجمع السحرة والكهنة والوزراء وبدأ يسألهم فقالوا له ده معناه إن في طفل هيتولد من بني إسرائيل وهيكون زوال ملكك على إيده👌
فطبعا خاف وأمر إن أي طفل يتولد لبني إسرائيل يُقتل على طول😤
الفرعون ده كان أشد الفراعنة قوة وبطش وظلم ...كان مفتري يعني😑
"إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا"
والفراعنة بصفة عامة كانوا بيقولوا إن دمهم فيه دم إلهي، يعني نَسَبْهُم مُتصل بالإله،
الفرعون ده بقى عَدَّاهُم كلهم...قال إنه هو ذات نفسه إله ورب😶
فاكرين لما قلنا قبل كده إن معظم الناس كانوا مؤمنين بتوحيد الربوبية يعني إن الكون ده له رب هو الخالق والرازق والمدبر والمالك، بس همّ بيشركوا معاه آلهة تانية في العبادة والقصد والتعظيم🤔
أهه الفرعون ده بقى مش بس بيزعم إنه إله متفرد بتوحيد الألوهية وتعظيم الناس له، لأ ده كمان بيزعم إنه متفرد بتوحيد الربوبية،
"أَنَا رَبّكُمْ الْأَعْلَى "
بيقول إن هو الرب، يعني هو الخالق والرازق والمدبر ومالك الملك...حاجة كده آخر جنون يعني 😅

المهم،
بدأ جنود فرعون يمشوا في الشوارع وأول ما يلاقوا طفل ذَكَر مولود ياخدوه كده ويدبحوه أو يقتلوه، ويبحثوا عن غيره😶
طبعا حاجة بشعة...احنا لما بنشوف طفل ميت عادي قلبنا بيتقطع عليه، ولّا لو أم ابنها مات بعد ما تولده بتبقى روحها هتطلع😞
دول بقى كانوا بياخدوا الطفل الرضيع إللي لسه مولود ويذبحوه قصاد أمه وأبوه وأهله ويسيبوه ويمشوا،
وأهله مش قادرين يعملوا لهم حاجة.

☆وطبعا المذابح إللي حصلت للأطفال بسوريا مش بعيد عننا، أكيد شفتم الأطفال الصغيرين ومنظرهم وهم مدبوحين😔
فده كان بلاء واقع على بني إسرائيل...ذبح وقتل في الأطفال، وياخدوا الرجال يشتغلوهم بالسُّخْرة والعبودية..وياخدوا النساء يشتغلوا في قصور الأغنياء...حياة كلها ذل وقهر.
"يَسْتَضْعِفُ طَائِفَة

ً مِنْهُمْ يُذَبِّحُ أَبْنَاءهُمْ وَيَسْتَحْيِي نِسَاءهُمْ إِنَّهُ كَانَ مِنَ الْمُفْسِدِينَ"
لما الملأ بقى شافوا إن أعداد المواليد بدأوا يقلوا ومفيش أطفال ذكور ...لقوا إنه مع الزمن مش هيلاقوا حد يشتغل عندهم، فقالوا لفرعون كده مش هنلاقي حد يشتغل عندنا وهنضطر إننا إللي نشتغل😕
فقال خلاص هنقتل الأطفال سنة ونسيبهم سنة 😤

☆لا بتتعب والله😀
شوفوا سبحان الله لما ربنا يجعل غباء الطاغية جندي من جنود الله وربنا يسلطه عليه فيهلكه👌
يعني انتَ ما فكرتش لحظة يا عدو الله إن ممكن لو مولود واحد فقط اتساب وما اتقتلش يكون هو ده الطفل المُنتَظَر إللي هيقضي عليك؟!
طيب مابالك عشرات الأطفال إللي هتسيبهم سنة ورا سنة ورا سنة😏
بدأ جنود فرعون ينفذوا الأمر الجديد وبقى فيه سَنة للقتل والذبح للمواليد الجديدة، وسنة مافيهاش قتل،

☆وفي فرق بين القتل والذبح، الذبح لازم يُراق فيه الدماء، وبيكون بقطع شرايين الرقبة، لكن القتل ممكن يكون بالحرق أو بالخنق مثلا.
حتى هنلاقي في القرآن آيتين بنفس الكلام ماعدا كلمتين 《القتل والذبح》
"يَسُومُونَكُمْ سُوءَ الْعَذَابِ 《يُذَبِّحُونَ》 أَبْنَاءَكُمْ وَيَسْتَحْيُونَ نِسَاءَكُمْ "
"يسُومُونَكُمْ سُوءَ الْعَذَابِ 《يُقَتِّلُونَ》 أَبْنَاءَكُمْ وَيَسْتَحْيُونَ نِسَاءَكُمْ"
فربنا بيقولنا إن جنود فرعون مخلوش إجرام إلا وعملوه
ذبح ماشي ...قتل بالحرق عادي...قتل بالخنق مايضرش...يعني وصلوا لأقصى درجات التجبّر😑

امرأة من بني إسرائيل تحمل🤰 وتولد ذكر 🤱ولكنه اتولد في عام المسامحة، فاطمنت، وعدّى الموضوع بسلام، وكان الطفل ده اسمه هارون.
وبعدها على طول حملت تاني 😱
طيب ميعاد الولادة هيكون في سنة الذبح😧
تعمل إيه😶...أخفت الحمل ...بقت تلف بطنها بقماش عشان ميبانش عليها حمل، لحد ما جت لحظة الولادة، ولقت المولود ذَكر😳
جنود فرعون ممكن ييجوا في أي لحظة يفتشوا ولو شافوه أو سمعوا صوته وعرفوا إنه ولد هيدبحوه😥

في اللحظة دي ربنا أوحى للمرأة دي بحاجة من وجهة نظر البشر تُعتبر جنونية😕
والوحي هنا بمعنى الإلهام مش بمعنى النبوّة لإن ربنا جعل النبوة في الرجال فقط.. فربنا ألهمها إنها تحط ابنها في صندوق وترميه في النيل😳
"وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ "
طيب هي أصلا خايفة عليه من القتل، إزاي ترميه في المية ومتخافش عليه من الغرق😐
ماهو ممكن في لحظة الصندوق يتقلب والولد يموت 😥
لو بصينا للموضوع هنلاقي إن الطفل لو فضل مع أمه هيموت غالبا بنسبة100%
لكن لو حطته في صندوق في النيل فيه إحتمال إنه ميموتش، فهو ده الحل الوحيد دلوقتي.
فالأم أخذت ابنها الرضيع ورضّعته عشان ينام شبعان وما يصوّتش ويلم عليه الناس:D
وحطيته في سرير خشبي ..تابوت يعني، وحطت التابوت في النيل،
جم الجنود فتّشوا... ملاقوش أطفال حديثي ولادة عندهم، سابوهم وراحوا يدوّروا في بيت تاني وهكذا،
في الوقت ده كان التابوت بيتحرك في المية، لحد ما وصل عند قصر الفرعون🙊
وخادمات القصر شافوا الصندوق إللي في المية ده وراحوا يشوفوا فيه إيه...سحبوا الصندوق وبيبصوا لقوا طفل صغير،
أخدوا الطفل وراحوا لزوجة فرعون عشان يقولوا لها على الطفل وكان اسمها آسية بنت مُزَاحِم،
"فَالْتَقَطَهُ آلُ فِرْعَوْنَ لِيَكُونَ لَهُمْ عَدُوًّا وَحَزَنًا"
في الوقت ده الأم قلقانة وعقلها وقلبها مع ابنها إللي مش عارفة مصيره إيه😥
"وَأَصْبَحَ فُؤَادُ أُمِّ مُوسَى فَارِغًا إِنْ كَادَتْ لَتُبْدِي بِهِ لَوْلَا أَنْ رَبَطْنَا عَلَى قَلْبِهَا"
يا ترى حد لقاه ...؟ ياترى غرق في المية...؟ ياترى الجنود شافوه وقتلوه...؟ كان هاين عليها تخرج وسط الناس وتسأل عنه من كتر ما هي هتتجنن عليه،
لكن ربنا ربط على قلبها بالصبر والثبات والتوكل واليقين عشان تعرف تتحكم في مشاعرها وما يتفضحش أمرها،
لكن طبعا مش قادرة تقعد ساكتة بدون أي سعي يطمنها، فقالت لأخته الكبيرة روحي شوفيه ...دوّري عليه وفتشي عن أخباره كده...
"وَقَالَتْ لِأُخْتِهِ قُصِّيهِ"

☆ملحوظة:
في رواية بتقول إن أم موسى كانت بتحط الصندوق في النيل وبتربط الصندوق بحبل عشان لو جه جنود فرعون ميشوفوش ابنها، وفي مرة حطت الصندوق في المية ونسيت تربطه وبكده مشي الصندوق في النيل،
لكن الرواية دي غير صحيحة لأنها تخالف ظاهر القرآن،
لأن ظاهر القرآن بيقول إنها لما ولدته ربنا ألهمها إنها ترضعه وتضعه في التابوت وترميه في البحر،
"فإذا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي ۖ إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ"

المهم،
البنت طلعت ومشيت على طريق النيل إللي مشي فيه التابوت لحد ما وصلت لقصر الفرعون وهي كانت بتشتغل هناك أصلا، فدخلت القصر لقت فيه حركة غريبة... بدأت تراقب من بعيد من غير ما حد ياخد باله...
"فَبَصُرَتْ بِهِ عَنْ جُنُبٍ وَهُمْ لَا يَشْعُرُونَ"
سمعت إن الخادمات لقوا طفل رضيع في النيل والطفل عمّا

ل يبكي جعان وكل ما واحدة تيجي ترضّعه يرفض إنه يرضع منها ومقطع الدنيا عياط وصويت من شدة الجوع وكلكم طبعا عارفين ومتخيلين :D
"وَحَرَّمْنَا عَلَيْهِ الْمَرَاضِعَ مِنْ قَبْلُ"
فهنا عرفت البنت إن ده أخوها...فدخلت عليهم وقالت لهم:
تحبوا أدلكم على ناس ياخدوا بالهم منه ويرضّعوه وهمّ مش هيقصروا في رعايته؟
فقالوا لها وانتِ عرفتي منين إنهم هيهتموا بيه للدرجة دي🤨
فقالت لهم عشان الناس دي عايزين يكونوا أصهار الملك وكمان عشان ينتفعوا بالأُجرة،
فاقتنعوا وقالوا لها تروح تجيب المرأة إللي هي بتتكلم عنها دي.
"فَقَالَتْ هَلْ أَدُلُّكُمْ عَلَى أَهْلِ بَيْتٍ يَكْفُلُونَهُ لَكُمْ وَهُمْ لَهُ نَاصِحُونَ"

☆طيب ليه الفرعون مقتلش الطفل ده😐
زوجته آسية لما شافت الطفل حبته جدا وهي مكنتش بتخلّف وفرعون لما دخل عليها وشاف الطفل عرف إنه من بني إسرائيل من لون بشرته وملامحه وعرف إنه اتحط في التابوت عشان خافوا عليه من الذبح فأمر إنه يتقتل، فآسية قالت له لأ خليه، قرة عين لي ولك... يفرّحنا ويسعدنا ويمكن نتبناه..
"وَقَالَتِ امْرَأَةُ فِرْعَوْنَ قُرَّةُ عَيْنٍ لِي وَلَكَ لَا تَقْتُلُوهُ عَسَى أَنْ يَنْفَعَنَا أَوْ نَتَّخِذَهُ وَلَدًا"
ففرعون قال لها: قرة عين ليكِ انتِ، أنا لأ😒
لكن عشان فرعون كان بيحب آسية جدا فنزل على رغبتها ووافق إن الطفل لا يُقتل..ويُقال في بعض كتب التفسير إن آسية سمّت الطفل الصغير ده موسى والله أعلم،
راحت البنت وجابت المرأة إللي قالت لهم عليها، وهي طبعا أمها وأم موسى عليه السلام،
ولما رضّعته قَبِل إنه يرضع منها فأكل وشبع، وكل إللي في القصر فرحوا إن الطفل بدأ ياكل ويهدأ،
وطلبت آسية من المرأة إنها تفضل معاها في القصر عشان تراعي موسى عليه السلام فرفضت وقالت لها إن عندها زوج وأبناء،
لكن قالت لها إن هي ممكن تاخده عندها في بيتها وترضّعه وتراعيه.. حاولت آسية تقنعها لكن مفيش فايدة،
فوافقت آسية إن موسى عليه السلام يرجع مع المرأة إللي هي أمه ، وماحدش يعرف إنها أمه، وأمرت لها بأُجرة زي مرتب شهري كده😁

☆محتاجين نقف هنا وقفة مهمة.
شايفين التحدي 👌
فرعون بقاله كام سنة عمّال يقتل في الأطفال عشان خايف من طفل واحد ...فانت بتتحدى ربنا مثلا يعني😏
طيب إيه رأيك بقى إن إللي انت خايف منه ده انت إللي هتربيه وانت إللي هتراعيه!
والأم إللي كانت خايفة من بطشك وإجرامك على ابنها هنجيبها عندك في القصر وهترضّعه قصاد كووول إللي موجودين في القصر ومحدش هيقدر يمسّها هي أو ابنها بأي أذى وإنت أوّلهم👌
ومش بس كده... ده الأم دي هتاخد الطفل وهتربّيه عندها في البيت براحتها وبعيد عن عيون الناس، وانت هتدّيها أجرة على كده كمان وهيكونوا تحت حمايتك👌
بتقتل الأطفال عشان تثبّت مُلكك...بتستعبد الناس وتظلمهم وتقهرهم عشان تثبّت ملكك...طيب شوف إزاي ربنا هيهلكك بإيدك انت شخصيا😏

أخدت أم موسى ابنها ورجعت للبيت وفِضِل موسى معاها خلال فترة الرضاعة.. كانت ساعات تجيبه لآسية عشان تشوفه،
وبعد ما عدت السنتين وخلاص الرضاعة وقفت، طلبت آسية إن موسى عليه السلام يرجع للقصر عشان يعيش فيه كابن لها هي وفرعون؛ لإن آسية كانت لا تُنجِب زي ما قلنا، وراح موسى يعيش في قصر فرعون.
كانت آسية في يوم من الأيام بتلاعب موسى وهو صغير فإدته لفرعون وحطته في حِجره،
فموسى شد فرعون من لحيته بقوة فقال الملأ حواليه إن الطفل ده بيتوعّده، وده الطفل إللي هيكون سبب في زوال ملك فرعون،
فأمر إن موسى يُقتل، فآسية رفضِت وقالت طيب نختبره: نجيب لؤلؤتين وجمرتين، فلو اختار اللؤلؤ اقتلوه لإنه كده معناه إنه بيعقل، ولو اختار الجمر يبقى هو لا يعقل ويبقى شد لحيته زي أي طفل عادي بيلعب.!
وفعلا جابوا اللؤلؤ والجمر، فأخذ جبريل عليه السلام يد موسى ووضعها على الجمرتين وخلّاه يمسكها وحطها موسى في فمه فحرقت لسانه وسببت له لثغة.

☆وهنا ممكن حد يفكر في سؤال وهو إن إزاي موسى مسك الجمر ووصله لبؤه من غير ما إيده تتلسع🤔

هو إحساس اللسع عند الأطفال مش بييجي بسرعة، يعني الأطفال ممكن تيجي إيدهم على حاجة سخنة ويقعدوا لحظات على ما يحسوا بالحرارة بعكس البالغين،
وآسية نفسها خلته يرمي الجمر من إيده عشان إيده متتحرقش، فالموقف أصلا كله لحظات👌
ده غير إننا أصلا منعرفش إذا كانت إيده اتلسعت ولّا لأ، ممكن تكون اتلسعت وعالجوها مع الوقت وراح أثرها أو ممكن يكون سابت أثر الله أعلم،
احنا معندناش بعلم بالنقطة دي، إللي عندنا علم بيه هو لثغة اللسان؛ وده لأن موضوع اللثغة ده فيه معجزة👌

◇طيب إيه المعجزة دي🤔
اللثغة إللي عند موسى عليه السلام دي استمرت معاه لحد وقت الرسالة، يعني لحد الوقت إللي ربنا أرسل فيه موسى؛
فعشان كده موسى عليه السلام سأل ربنا إنه يجعل معاه أخاه هارون عشان يتكلم بداله، قال موسى:
" وَأَخِي هَارُونُ هُوَ أَفْصَحُ مِنِّي لِسَانًا"
فربنا استجاب له وكمان شفاه من اللثغة دي، لأن موسى عليه السلام دعا ربنا وقال له:
" رَبِّ اشْرَحْ لِي صَدْرِي ۩ وَيَسِّرْ لِي أَمْ

رِي ۩ 《 وَاحْلُلْ عُقْدَةً مِّن لِّسَانِي * يَفْقَهُوا قَوْلِي》
وكمان الأنبياء أكمل الناس خَلْقاً وخُلُقا، فمينفعش يكون فيهم حاجة تعيبهم،
ولما راح موسى عليه السلام لفرعون بعدين عشان يبلغه الرسالة مكنش عنده أي مشكلة في لسانه،
لكن فرعون كان بيعايره باللثغة بتاعته مع إنها مكنتش موجودة اصلا وكان بيفتري عليه وقال للملأ حوله:
" أَمْ أَنَا خَيْرٌ مِنْ هَذَا الَّذِي هُوَ مَهِينٌ وَلا 《يَكَادُ يُبِينُ》"
فهو كان عارف إن موسى عليه السلام عنده لثغة من وهو صغير، فكان شفاءه من اللثغة دي معجزة ظاهرة لفرعون ومع ذلك أنكرها واتهم موسى بالباطل إنه مش عارف يتكلم👌

المهم آسية لما شافت موسى عليه السلام إزاي اختار الجمر على اللؤلؤ قالت لفرعون شوفت إزاي ده مجرد طفل بيلعب ولا يعقل، فمحدش يقرّبله ولا يقتله😤

📣ملحوظة:
قصة الجمر واللؤلؤ دي👆 يرويها عبد الله بن عباس رضي الله عنه لما كان بيفسر آية: "وفَتَنّاك فُتُونا"
والحديث عن ابن عباس حديث صحيح، وهو بيروي بعض أحداث القصة من الإسرائيليات إللي لا تُصدق ولا تُكذب 👌

تربى موسى عليه السلام ونشأ في بيت فرعون في أمان الله رغم أنف فرعون،
خلال الفترة دي القرآن مقلناش إيه إللي حصل مع موسى عليه السلام، لكن أول ما بلغ مبلغ الشباب بدأ مَجرى حياة موسى عليه السلام يتغير،
إيه إللي حصل غَيّر مجرى حياته ؟
ده إللي هنعرفه الجزء الجاي إن شاء الله😁

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman