#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثالثة_والخمسون
#المرحلة_الثالثة_اليوم_الآخر
#الشفاعة_المقبولة_والشفاعة_المردودة_يوم_القيامة_الجزء_الثالث
#شفاعة_المؤمنين

قلنا قبل كده إن رسول الله ﷺ هيشفع شفاعة عامة وإنه هيشترك معاه في الشفاعة العامة دي المؤمنون إللي عبروا الصراط،
لكن طبعا النصيب الأكبر في الشفاعة هو لرسول اللهﷺ👌
يعني رسول الله ﷺ هيشفع في عدد كبير من الناس، والمؤمنين هيشفعوا في ناس تانية غير إللي رسول الله ﷺ هيشفع فيهم،
فكل واحد هيشفع له حد معين يشفع فيه👌

بعد ما المؤمنين يعبروا من على الصراط ويكونوا خلاص في أمان من النار؛ هيشفعوا في الناس إللي سقطت من الموحدين،
فهم هيشوفوا ناس وقعوا في النار، فيقفوا ويدعوا ربنا ويجادلوا ويدافعوا عن بعض الناس ويُلِحُّوا على الله ويقولوا:
"رَبَّنا كانُوا يَصُومُونَ معنا ويُصَلُّونَ ويَحُجُّونَ"
《صحيح مسلم》
يعني بيقولوا لربنا إن إللي وقعوا دول مِن المُوحِّدينَ؛ كانوا بيعملوا أعمال الإسلام معانا، فيطلبوا من ربنا إنه يخرّجهم من النار،
والناس إللي سقطوا دول كانوا خلَطوا مع الأعمال الصالحة أعمالًا سيِّئةً، فدخَلوا للنَّارَ تطْهيرًا لهم👌

فمع إلحاح المؤمنين ومناشدتهم ربهم يَرْضى اللهُ عز وجل ويُشَفِّعُهم فيهم ويُخرجهم من النار برحمته ويقول للمؤمنين:
"أخْرِجُوا مَن عَرَفْتُمْ"《صحيح مسلم》
يعني خرّجوا من النار إللي انتم وصفتوهم دول، فيُخرجوا من النار ناس كتير جدا عرفوهم من مواضع السجود؛ لأن ربنا حرّم على النار إنها تحرق مواضع السجود إكرامًا لأعْضاءِ أَثَّرَ فيها السُّجودُ للهِ تعالى👌
قال رسول الله ﷺ:
"حرَّم اللهُ عزَّ و جلَّ على النَّارِ أنْ تأكُلَ أثرَ السُّجودِ"
《رواه البخاري ومسلم》
وآثار السجود تكونُ في الأعْضاءِ السَّبْعةِ التي يسجُدُ الإنْسانُ عليها، وهي: الجَبْهةُ، واليَدانِ، والرُّكْبتانِ، والقَدَمانِ، وتكونُ أظْهَرَ ما تَكونُ في الوَجْهِ،
وده بعكس الكفار إللي النار محيطة بهم من كل جانب وتحرق أجسادهم كلها،
وهنا بقى نسأل: يا ترى، تارك الصلاة《بالكلية》لو هو مش كافر وكان هيخرج من النار، فإزاي هيتعرف من غير ما يكون عنده آثار للسجود🙂
يستحيل المساواة بين إللي كان بيصلي و يسجد لله عز وجل وبين إللي مكنش بيصلي👌

بعد كده هيقول المؤمنون لربنا:
"رَبَّنا ما بَقِيَ فيها أحَدٌ مِمَّنْ أمَرْتَنا به"《صحيح مسلم》
يعني احنا طلعنا كل إللي نعرفه ومتبقاش حد تاني من إللي نعرفه في النار، فيقول الله عز وجل لهم:
"ارْجِعُوا فمَن وجَدْتُمْ في قَلْبِهِ مِثْقالَ دِينارٍ مِن خَيْرٍ فأخْرِجُوهُ"
《صحيح مسلم》
يعني شوفوا الناس إللي وقعت دي إللي تلاقوا في قلبه خير بمقدار وزن دينار أخرجوه،
وزي ما قلنا هيعرفوهم بمواضع السجود، وكمان مقدار الخير ده بيكون من أصل الإيمان إللي اتكلمنا عنه الحلقة إللي فاتت👌
فيرجعوا ويُخرجوا من النار خلقا كثير ويرجعوا لربنا ويقولوا:
"رَبَّنا لَمْ نَذَرْ فيها مِمَّنْ أمَرْتَنا أحَدًا"《صحيح مسلم》
يعني احنا مسبناش حد في قلبه مثقال دينار من خير إلا وطلعناه من النار.

فيقول الله لهم:
"ارْجِعُوا فمَن وجَدْتُمْ في قَلْبِهِ مِثْقالَ نِصْفِ دِينارٍ مِن خَيْرٍ فأخْرِجُوهُ"
《صحيح مسلم》
فيرجعوا ويطلعوا خلقا كثيرا، ويرجعوا تاني لربنا ويقولوا إنهم أخرجوا كل إللي أمرهم بيه، فيقول لهم:
"ارْجِعُوا فمَن وجَدْتُمْ في قَلْبِهِ مِثْقالَ ذَرَّةٍ مِن خَيْرٍ فأخْرِجُوهُ"
《صحيح مسلم》
فيرجعوا برده ويُخرجوا خلقا كثيرا ولا يتركوا أحدا في قلبه مثقال ذرة من خير إلا ويخرجوه من النار👌

في ناس بقى ربنا لن يسمح لهم بالشفاعة حتى لو كانوا من أهل الجنة😶
قال رسول الله ﷺ:
"إنَّ اللَّعّانِينَ لا يَكونُونَ شُهَداءَ ولا شُفَعاءَ يَومَ القِيامَةِ"
《صحيح مسلم》
اللَّعّانِينَ يعني الناس إللي بتقعد تقول{الله يلعنك}وده معناه إنه بيدعي على الشخص بإن ربنا يبعده عن رَحمته عزَّ وجلَّ،
وسواء اللعن ده كان لشخص يستحق اللعن أو لا يستحق اللعن، وسواء كان ده لعن البشر أو الحيوانات أو الجماد،
فاللعن مينفعش بأي حال من الأحوال، ورسول الله ﷺ قال:
"ليس المؤمن بالطعان، ولا اللعان، ولا الفاحش، ولا البذيء"
《رواه الترمذي، وقال: حديث حسن》

فلما يموت العبد من غير ما يتوب من اللعن ده وييجي يوم القيامة؛ ربنا لا يسمح له إنه يشفع في أقربائه أو غيرهم؛ لأن الشفاعة تكون بالكلام الحسن، والكلام الطيب، واللعن ينافي الشفاعة، وهو كبيرة من الكبائر👌
ومش بس كده ده كمان هيتحرموا من شرف الشهادة بالبلاغ على الأمم السابقة😬
يعني احنا كنا قلنا قبل كده إن أمة الإسلام هتشهد على الأمم السابقة بإن أنبياؤهم بلغوهم رسالات ربهم،
اللعانين دول ربنا لن يسمح لهم بالشهادة دي وهيتحرموا منها👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والخمسون
#المرحلة_الثالثة_اليوم_الآخر
#الشفاعة_المقبولة_والشفاعة_المردودة_يوم_القيامة_الجزء_الرابع
#شفاعة_الملائكة_وأسباب_الحصول_على_الشفاعة

اتكلمنا المرة إللي فاتت عن شفاعة رسول الله ﷺ وعن الناس إللي هتشفع معاه،
وقلنا إن من ضمن الشفعاء إللي هيشفعوا في المذنبين الموحدين بعد ما يأذن لهم الله عز وجل؛ هم الملائكة👌

والملائكة زي ما كلنا عارفين هم خلق عظيم من مخلوقات الله، ربنا خلقهم من نور وأعطاهم قوة وقدرات عظيمة جدا، يعني مثلا يقدروا يتحركوا بسرعة شديدة جدا، ففي لحظة كان ينزل الوحي من السماء،
قَالَ رَسُولُ اللَّهِ ﷺ:
"خُلِقَتِ الْمَلَائِكَةُ مِنْ نُورٍ وَخُلِقَ الْجَانُّ مِنْ مَارِجٍ مِنْ نَارٍ وَخُلِقَ آدَمُ مِمَّا وُصِفَ لَكُمْ"《رواه مسلم》
وهم عندهم أجنحة، ولكنهم غير متساويين في القوة أو في عدد الأجنحة،
فأقواهم وأعظمهم وأكثرهم أجنحة هو جبريل عليه السلام👌

وبيقدروا يتشكلوا بأشكال غير أشكالهم الحقيقة،
وانت كنت شوفت ده واحنا بنتكلم في قصص الأنبياء في قصة إبراهيم عليه السلام لما جاءه الملائكة الثلاثة في هيئة بشر وبعدها راحوا لقوم لوط،
وكمان لما تجسد ملك الموت في هيئة بشر وراح لموسى عليه السلام، ولما تجسد جبريل في هيئة بشر وذهب إلى مريم عليها السلام، وغيرها من الأمثلة👌

وهم لهم أسماء لكن احنا منعرفش أسماء كل الملائكة،
جاء في القرآن والسنة بعض أسمائهم زي مثلا جبريل وميكائيل وهاروت وماروت،
وأعداد الملائكة لا يعلمها إلا الله عز وجل وهم لا بيتعبوا ولا بيملوا من عبادة وذكر ربنا ولا يعصون أوامر ربنا أبدا🙅
وهم لا يأكلون ولا يشربون وشكلهم جميل جدا،
ومينفعش نصفهم بالذكورة ولا بالأنوثة؛ لأن ربنا قال في القرآن إنهم ليسوا إناثا وإللي يقول إنهم إناث يكفر لأنه كده بيكذب صريح القرآن🤷
قال تعالى:
"وَجَعَلُوا الْمَلائِكَةَ الَّذِينَ هُمْ عِبَادُ الرَّحْمَنِ إِنَاثًا أَشَهِدُوا خَلْقَهُمْ سَتُكْتَبُ شَهَادَتُهُمْ وَيُسْأَلُونَ"《سورة الزخرف آية(19)》
وبرده مينفعش نقول عليهم ذكور لأن مفيش نص صريح بكده، احنا بس نقول إنهم خلق من مخلوقات الله معصومون من الوقوع في المعاصي👌
وهم من عالم الغيب إللي احنا لازم نؤمن بيه، والإيمان بالملائكة ركن من أركان الإيمان الستة:
《الإيمان بالله وملائكته وكتبه ورسله واليوم الآخر وبالقدر خيره وشرّه》
واحنا منعرفش تحديدا ربنا خلق الملائكة امتى، بس هم مخلوقين من قبل البشر، والدليل على كده إن ربنا قال لهم إنه هيجعل في الأرض خليفة قبل ما يخلق آدم عليه السلام👌

أهه الملائكة العظيمة دي مش بس هتشفع يوم القيامة للمذنبين الموحدين؛ دول حتى في حياتنا الدنيا دلوقتي بيستغفروا للمؤمنين، يعني بيدعوا ربنا إنه يغفر للمؤمنين ذنوبهم إللي وقعوا فيها وإنه يتجاوز عنه ويدخلهم الجنة وينجيهم من عذاب النار👌
قال تعالى:
"الَّذِينَ يَحْمِلُونَ العَرْشَ وَمَنْ حَوْلَهُ يُسَبِّحُونَ بِحَمْدِ رَبِّهِمْ وَيُؤْمِنُونَ بِهِ وَيَسْتَغْفِرُونَ لِلَّذِينَ آَمَنُوا رَبَّنَا وَسِعْتَ كُلَّ شَيْءٍ رَحْمَةً وَعِلْمًا فَاغْفِرْ لِلَّذِينَ تَابُوا وَاتَّبَعُوا سَبِيلَكَ وَقِهِمْ عَذَابَ الجَحِيمِ ۩
رَبَّنَا وَأَدْخِلْهُمْ جَنَّاتِ عَدْنٍ الَّتِي وَعَدْتَهُمْ وَمَنْ صَلَحَ مِنْ آَبَائِهِمْ وَأَزْوَاجِهِمْ وَذُرِّيَّاتِهِمْ إِنَّكَ أَنْتَ العَزِيزُ الحَكِيمُ ۩
وَقِهِمُ السَّيِّئَاتِ وَمَنْ تَقِ السَّيِّئَاتِ يَوْمَئِذٍ فَقَدْ رَحِمْتَهُ وَذَلِكَ هُوَ الفَوْزُ العَظِيمُ"《سورة غافر آية(7-9)》

انت بقى ممكن تستغرب وتسأل هو ليه الملائكة العظيمة دي صاحبة المكانة العالية عند ربنا شاغلين نفسهم بالاستغفار للمؤمنين في الدنيا وهيبشروهم لما يقابلوهم بعد البعث، وكمان هيشفعوا في العصاة منهم يوم القيامة🤔

¤أولا:
ده بسبب الرابطة إللي بين الملائكة وبين المؤمنين في الأرض وهي رابطة الإيمان بالله عز وجل👌
يعني هم الاتنين بيؤمنوا بالله والمؤمنون من البشر بيجاهدوا أنفسهم عشان يطيعوه، والملائكة عارفة طبيعة البشر وضعفهم، وعارفين طُرق الشياطين عشان يضلوهم،
فمع كل ده يجاهد المؤمنون أنفسهم عشان يفضلوا على الإيمان وعلى طريق ربنا،
فهم يحبوا الخير للمؤمنين وعايزين ربنا يثيبهم على أعمالهم فبيستغفروا لكل أهل الإيمان وهيشفعوا في المذنبين منهم حتى لو كانوا من أصحاب الكبائر👌

¤ثانيا:
استغفار الملائكة للمؤمنين وشفاعتهم لهم《تجري مجرى اعتذار عن ذَلَّة سبقت》👌
يعني إيه🤨
فاكر لما قلنا في قصص الأنبياء قبل خلق آدم إن ربنا قال للملائكة إنه هيجعل خليفة في الأرض؟

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_والخمسون
#المرحلة_الثالثة_اليوم_الآخر
#معنى_لم_يعملوا_خيرا_قط

اتكلمنا المرة إللي فاتت عن سعة رحمة ربنا وقلنا إن ربنا هيخرج من النار ناس لم يعملوا خيرا قط👌
فده معناه إيه بقى🤔

الأول كده خلينا نسأل، هي الناس دي دخلت النار ليه؟
شوف،
ربنا عز وجل هيُدخل عباده الجنة أو النار《بالأفعال والتُّرُك》،
يعني مثلا:
¤ناس تركت كل المحرمات والمُوبقات لله و مكنوش بيعملوا منها حاجة،
وفي نفس الوقت أفعالهم الصالحة كانت قليلة، فكان التَّرك عندهم أكبر وأعظم والفعل أقل، فدول كده ربنا عز وجل يُدخلهم الجنة.

¤وناس ممكن يدخلوا النار بترك الطاعات والأعمال الصالحة، مع إنهم لم يفعلوا المحرمات، فيكون لديهم ترك الطاعات كثيراً وفعل المحرمات قليلاً، فيدخلوا النار.

¤ناس تانية تركوا الأعمال الصالحة وفعلوا المحرمات، فدول ربنا يدخلهم النار.
وده الصنف إللي بنتكلم عنه، ناس لم يعملوا الصالحات وعملوا المحرمات فدخلوا النار👌

عشان تفهم المعنى بطريقة بسيطة وسهلة خلينا نفتكر مع بعض قصة قاتل المائة نفس💁
قاتل المائة نفس ده كان رجل قتل الأول تسعة وتسعين إنسان، ومعروف في فطرة وطبع كل إنسان إن القتل مُحرم وإنه حاجة غلط حتى لو مكنش عنده علم من دين أو رسول مثلا،
فهو كان عايز يتوب فسأل الناس عن أعلم أهل الأرض فدلوه على عابد،
فراح للعابد وقال له إنه قتل تسعة وتسعين نفس، فهل له توبة؟
فالعابد قال له: لا، فالرجل قتل العابد وأكمل به المائة،
وبعد كده كان لسه عايز يتوب فسأل عن أعلم أهل الأرض فدلوه على عالم، فذهب للعالم وسأله إذا كان له توبة،
فالعالم قال له إن له توبة، لكن بشرط إنه يترك بلده إللي هي أرض سوء ويذهب لبلد تاني فيها قوم صالحين بيعبدوا الله فيعبد الله معهم،
فالرجل فعلا خرج واتجه ناحية البلد إللي العالم قال له عليها، وفي نص الطريق جاءه الموت،
فملائكة العذاب وملائكة الرحمة إللي اتكلمنا عنهم في بداية الحلقات إنهم إللي بيأخذوا أرواح المؤمنين وأرواح غير المؤمنين؛ اختصموا مين يأخذ روحه،
ملائكة العذاب تقول إنه《لم يعمل خيرا قط》وملائكة الرحمة تقول إنه خرج تائبا لله،
فأرسل الله عز وجل مَلك وقال لهم يقيسوا المسافة، فلو كان هو أقرب إلى أرض الصلاح تأخذه ملائكة الرحمة، ولو كان أقرب إلى أرض السوء تأخذه ملائكة العذاب،
فلما قاسوا المسافة لقوه إنه كان أقرب إلى أرض الصلاح بشبر؛ فأخذته ملائكة الرحمة👌

الشاهد من القصة هو إن ملائكة العذاب قالت عن الرجل إنه لم يعمل خيرا قط،
لكن في الواقع إن الرجل تاب وكان صادق في توبته وكمان تحرك وتوجه فعلا لأرض الصلاح وده كله يعتبر عمل صالح لكنه في نفس الوقت عمل غير مكتمل،
يعني هو لسه معملش أي أعمال صالحة بعد التوبة توزاي أو تعادل المائة نفس إللي قتلهم،
عشان كده قالوا إنه لم يعمل خيرا قط👌

☆ممكن تقول بس التوبة بتمسح إللي قبلها وكمان ربنا بيبدل الحسنات للسيئات للتائب، فإزاي بقى معندوش حسنات توازي أفعاله السيئة🤔

ماهو عشان التوبة تمسح إللي قبلها من الذنوب لازم لها شروط، ومن الشروط دي إن العبد يعمل أعمال صالحة بعد التوبة ويكون حاله بعد التوبة أفضل من حاله قبلها💁
وساعتها بس ربنا يبدل سيئاته لحسنات، زي قصة الرجل إللي اتكلمنا عنه المرة إللي فاتت إللي كان عمل كل المعاصي ورسول الله ﷺ قال له إنه يترك السيئات ويعمل الحسنات ساعتها ربنا هيبدل له سيئاته لحسنات،
لكن قاتل المائة نفس لسه أصلا معملش أي حاجة نهائي🙅
هو فقط تاب وتوجه للبلد الصالح، فلأنه كان صادق في توبته ربنا تقبله بدون ما يعمل أعمال صالحة👌

نرجع بقى لكلامنا الأول وهو إن ربنا هيخرج ناس من النار لم يعملوا خيرا قط،
احنا نفهم من الكلام إن الناس إللي ربنا هيخرجهم من النار نوعين:
1️⃣الأول:
إما إنهم لم يعملوا شيئًا من أعمال الجوارح؛ لأنهم ماتوا مثلا ولم يتمكنوا من العمل زي قاتل المائة نفس،
أو مثلا واحد تاب وجاله مرض فجأة ودخل في غيبوبة ومات بعدها، ده برده لم يتمكن من العمل👌

أو ناس مثلا لم يَصل إليهم من الإسلام غير لا إله إلا الله فقط،
زي في آخر الزمان هيحصل إن الإسلام يندثر ويُمْحَى ولا يبقى منه غير كلمة التوحيد"لا إله إلا الله"
وفي ناس هيفضلوا يقولوها لأنهم سمعوا آبائهم وأجدادهم يقولوها، يعني هم بيقلدوهم بس،
وهم في نفس الوقت لا بيصلوا ولا بيزكوا ولا بيصوموا ولا بيحجوا لأن معندهمش العلم بالشرائع دي،
فقط هم يقولوا لا إله إلا الله، فدول هتنفعهم لا إله إلا الله يوم القيامة وتنجيهم من النار؛
مع إنهم لم يعملوا خيرا قط غير بس كلمة التوحيد إللي قالوها، والدليل على كده الحديث إللي رواه حُذَيْفَةَ بْنِ الْيَمَانِ رضي الله عنه عن رسول الله ﷺ:

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السابعة_والخمسون
#المرحلة_الثالثة_اليوم_الآخر
#وصف_الجنة_والنار_الجزء_الأول
#الحشر_إلى_الجنة_وإلى_النار

تخيل نفسك كده عايش في فيلا واسعة فيها غرف كثيرة، وأثاث كل غرفة أو العفش الموجود في كل غرفة مختلف عن التاني وكله أحلى من بعض،
ده غير الأرض المفروشة بسجاد ناعم شكله جميل، والفيلا دي نصها مبني فوق الأرض وأمامها حديقة كبيرة جميلة وحمام سباحة،
ونصها التاني مبني تحت الماء، بحيث إنك لما تنزل للنص الثاني تشوف الأسماك الموجودة تحت البحر بأشكالها المختلفة،
مش هتكلم بقى عن المطبخ إللي مليان بكل أصناف الطعام إللي بتحبها، الغالي منها والرخيص😅
ولا هتكلم عن الغرفة إللي فيها شاشة كبيرة تقدر تلعب عليها بالألعاب المختلفة أو تتفرج على إللي انت عايزه فيها،
وفوق كل ده انت مش مطلوب منك تشتغل ولا عليك أي مسؤولية خالص وكمان عايش مرتاح البال،
ويا سلام لو الفيلا دي متحركة تقدر تسافر بيها لأي مكان في العالم وتستمتع بالمناظر المختلفة😁
أكيد طبعا هتحس بمتعة غير طبيعية لو كنت عايش العيشة دي💁

طيب تعال كده في المقابل تخيل نفسك عايش في مقلب زبالة، يعني مكان محاط كله بالقمامة والمجاري والأوساخ، ومفيش حتى غرفة تدخل تنام فيها،
انت بتنام وسط القاذورات والروائح الكريهة دي،
والأرض إللي بتمشي عليها مليانة زجاج متكسر كل شوية تتجرح منه، وحتى مش لاقي أكل،
ولو حصل ولقيت فبيكون طعمه سيء جدا ومعفن والماء إللي بتشربه ريحته لوحدها كريهة جدا فما بالك بطعمه😷
وطبعا لا في كهرباء ولا أي خدمات وحتى الهواء إللي بتتنفسه ملوث، يعني من الآخر كده عيشة سيئة جدا😑

لو انت اتعرض عليك تختار عيشة من الاتنين دول هتختار إيه؟!
طبعا مفيش عاقل إلا وهيختار العيشة الأولى؛ عيشة الرفاهية😀

أنا بقى عايزة أقولك إن الصورة البسيطة من عيشة الرفاهية دي متجيش ذرة في نعيم أقل واحد من أهل الجنة👌
والصورة البسيطة من العيشة السيئة دي متجيش ذرة في عذاب أقل واحد في جهنم والعياذ بالله😞

وأنا بقولك صورة بسيطة لأن مهما تخيلت وفكرت عمرك ما هتقدر تتخيل نعيم الجنة؛ لأن بكل بساطة ربنا قال في حديث قدسي:
"أعْدَدْتُ لِعِبادِي الصَّالِحِينَ، ما لا عَيْنٌ رَأَتْ، ولا أُذُنٌ سَمِعَتْ، ولا خَطَرَ علَى قَلْبِ بَشَرٍ."《صحيح البخاري》
يعني ربنا يقول إنه خلق وهيأ في الجنة حاجات مفيش أيُّ عيْنٍ مِن الأعيُنِ شافتها،
ومفيش أي أذن سمعت بوصفها، وأي حاجة ممكن تمر أو تيجي على خاطر أو ذهن أي إنسان فالحاجات دي لا تشبهها أبدا وفِيها أفضلُ ممَّا تخيَّله👌
والحاجات دي ربنا جهزها وخلقها للعباد إللي كانوا بيعملوا الصالحات وهم مُخلصين لله عز وجل وكانوا بيسعوا في عمل الخير👌

¤ممكن تقولي هنا: إزاي يعني فيها ما لا عين رأت وآدم عليه السلام كان عايش فيها قبل ما ينزل للأرض، وكمان رسول الله ﷺ شاف الجنة ودخلها في رحلة الإسراء والمعراج🤨
شوف،
المقصود هو إن محدش شاف مثلها أبدا، مش إن مفيش حد شافها خالص،
يعني المعنى مش إن الجنة مقفول عليها ولم ترها الأعين أبدا،
لأ، المقصود إن محدش شاف زيها،
وكمان كون آدم عليه السلام كان في الجنة لا يعني إنه اطلع على كل ما فيها من النعيم،
يعني ممكن إنه يكون في الجنة من النعيم ما لم يره ولم يسمع به ولم يخطر على قلبه،
وكذلك برده رسول الله ﷺ، ممكن يكون ربنا خلاه يشوف بعض الجنة وليس كلها، فيكون عادي في نعيم مخفي لم يره أحد💁
زي كده لما موسى عليه السلام سأل ربنا عن أعلى أهل الجنة منزلة فقال له الله عز وجل:
"أُولَئِكَ الَّذِينَ أَرَدْتُ غَرَسْتُ كَرَامَتَهُمْ بِيَدِي وَخَتَمْتُ عَلَيْهَا فَلَمْ تَرَ عَيْنٌ وَلَمْ تَسْمَعْ أُذُنٌ وَلَمْ يَخْطُرْ عَلَى قَلْبِ بَشَرٍ"
《رواه مسلم》

أما النار فأقل واحد فيهم في العذاب موضوع تحت قدميه جمرتين من نار تغلي منهما دماغه زي ما شرحنا قبل كده.

فهل في عاقل يختار معيشة فيها عذاب على معيشة فيها نعيم لا يخطر على باله أصلا😕

تعال بقى نشوف الجنة والنار من الداخل عشان الصورة تكون واضحة عندك أكثر لعل ده يكون دافع ليك إنك تتمسك بطريق الله المستقيم حتى تلقاه👌

كلمة جنة لا تُطلق إلا على المكان إللي أشجاره كثيرة ملتفة حول بعضها ومختلفة الأنواع،
فمن هنا تفهم إن الجنة عبارة مكان مليان أشجار كثيرة بأنواع مختلفة لدرجة إنك مش بتبقى شايف الأرض من كثرتها،
ومعنى وجود أشجار فأكيد هيكون في ثمار وأنهار وطيور، لكن الحاجات دي مختلفة عن إللي انت عارفه منها في الدنيا،
فليس في الجنة شيء مما في الدنيا إلا الأسماء👌
يعني لما ربنا يذكر لنا مثلا إن الجنة فيها فاكهة ونخل ورمان؛ ده مش معناه إنها نفس إللي موجود عندنا في الدنيا، لأ،
ربنا ذكر لنا الأسماء إللي احنا نعرفها من باب التقريب للأذهان، وإلا فنعيم الجنة الحقيقي الأبدي ما لا يمكن وصفه، ولا يمكن لعقولنا أن تتخيله ولا للغة التخاطب عندنا أن تعبر عنه👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثامنة_والخمسون
#المرحلة_الثالثة_اليوم_الآخر
#وصف_الجنة_والنار_الجزء_الثاني
#الدخول_من_أبواب_الجنة_وأبواب_النار

اتكلمنا المرة إللي فاتت عن حشر أهل الجنة إلى الجنة وحشر أهل النار إلى النار،
وقلنا إن الجنة لها أبواب وعرفنا عددهم وصفاتهم وأسماءهم،
✴️كذلك بقى النار لها أبواب، وهي سبعة أبواب،
وأبواب النار مش بالعرض زي ما احنا عارفين، لأ دول أبواب فوق بعض، طبقات كده،
واحنا منعرفش مساحة الباب الواحد أد إيه بعكس أبواب الجنة إللي عرفنا مساحة الباب الواحد فيها أد إيه الحلقة إللي فاتت،
لكن لما تعرف وصف أجساد أهل النار بعدين إن شاء الله هتعرف إزاي إن حجم أبواب النار كبير جدا👌

كل باب بقى من أبواب النار دي له فريق معين من الغاوين هيدخلوا منه، كل واحد منهم على حسب مقدار الغِواية بتاعته ومقدار اتّباعه لإبليس،
و الغاوي معناه: إللي عرف الحق وتركه ولم يعمل بيه، سواء كان كافرا أو عاصيا.
قال تعالى:
"لَهَا سَبْعَةُ أَبْوَٰبٍۢ لِّكُلِّ بَابٍۢ مِّنْهُمْ جُزْءٌ مَّقْسُومٌ"
《سورة الحجر آية(44)》

قال العلماء إن أسماء الطبقات أو الأبواب دي بالترتيب من الأول إلى السابع هي:
¤جهنم ومعناها بعيدة القعر، يعني حاجة عميقة جدا.
¤ثم لَظَى ومعناها لهب يشتد من توقدها، يعني نارًا تتوهج.
¤ثم الحُطَمة واتسمّت كده لأنّها تُحطّم وتكسّر كلَّ ما يُلقى فيها، فهي تحطم العظام وتحرق القلوب.
¤ثم السعير ومعناه عذابًا أليمًا حارًا لا يُطاق.
¤ثم سَقر ومعناها الشديدة المُحرقة التي تغير الجلود.
¤ثم الجحيم و أصل معنى هذه الكلمة هو ما اشتد لهبه.
¤ثم الهاوية ومعناها كل شيء لا يُدرَك قعره،
يعني احنا مش عارفين قعره واصل لحد فين وإللي بيقع فيه لا يخرج منه أبدًا.
والنار قعرها بعيد، يعني المسافة بين سطحها وقعرها يساوي سبعين سنة👌
قال رسول الله ﷺ عن شيء وقع وعمل ضجة وصوت عالي سمعه هو والصحابة:
"هذا حَجَرٌ رُمِيَ به في النَّارِ مُنْذُ سَبْعِينَ خَرِيفًا، فَهو يَهْوِي في النَّارِ الآنَ، حتَّى انْتَهَى إلى قَعْرِهَا"
《صحيح مسلم》

والأسماء إللي قلناها دي موجودة فعلا في القرآن، ويُقال إن دي أسماء النار نفسها، أو أسماء الدركات بتاعتها،
لكن ترتيبهم وتقسيمهم بالطريقة دي هو اجتهاد العلماء مش كلام رسول الله ﷺ، يعني هم استنبطوا أو استنتجوا التقسيمة دي من خلال جمع الآيات مع بعضها👌
وقالوا إن في الباب الأول أو الطبقة الأولى أو الدركة الأولى يكون أهل التوحيد إللي دخلوا النار بحسب ذنوبهم وبعدين هيخرجوا في النهاية،
وفي الثانية النصارى، وفي الثالثة اليهود،
وفي الرابعة الصابئون《وهم اتقال فيهم تعريفات كتير منها إنهم قوم بين اليهود والمجوس ليس لهم دين》،
وفي الخامسة المجوس إللي هم كانوا بيعبدوا النار،
وفي السادسة أهل الشرك، وفي السابعة المنافقون،
قال تعالى: "إِنَّ الْمُنَافِقِينَ فِي الدَّرْكِ الْأَسْفَلِ مِنَ النَّارِ"
《سورة النساء آية(145)》

وبكده كل فريق وصل لبابه، فريق أهل الجنة عند أبواب الجنة، وفريق أهل النار عند أبواب النار👌

تخيل نفسك بقى وانت واصل مع فريق المؤمنين لحد أبواب الجنة إللي انت شامم ريحتها أصلا من على الأقل مسافة أربعين سنة زي ما هتعرف تفصيل الرائحة دي بعدين إن شاء الله،
فلما توصل مع ️أهل الجنة للباب؛ هتلاقوا باب الجنة مغلق، فانت هتبقى مشتاق إنك تدخل الجنة إللي سمعت عن وصفها كتير ومستني الباب يتفتح عشان تدخلها وتكتمل سعادتك،
فيأتي بقى الشخص الذي لا تُفتح الجنة لأحد قبله وهو رسول الله ﷺ👌
يشفع رسول الله ﷺ في فتح باب الجنة و يطرق باب الجنة،
فيسأل خازن الجنة مين إللي بيطرق باب الجنة، فيعرّفه رسول الله ﷺ بنفسه، فيقول له خازن الجنة إنه لم يُؤمر بفتح باب الجنة لأحد قبله،
قَالَ رَسُولُ اللَّهِ ﷺ:
آتِي بَابَ الْجَنَّةِ يَوْمَ الْقِيَامَةِ فَأَسْتَفْتِحُ، فَيَقُولُ الْخَازِنُ: مَنْ أَنْتَ؟ فَأَقُولُ: مُحَمَّدٌ.
فَيَقُولُ: بِكَ أُمِرْتُ لَا أَفْتَحُ لِأَحَدٍ قَبْلَكَ"《 رواه مسلم》

فيدخل رسول الله ﷺ إلى الجنة وتدخل أول جماعة من المؤمنين وهم الفُقَراءُ المُهاجِرونَ إللي كانوا هاجَروا مِن مَكَّةَ إلى المدينةِ،
وكان بيرابطوا في سبيل الله ويحرسوا المكان إللي الأعداء ممكن يدخلوا منه،
وكان الناس يحتموا بهم في الشَّدائدِ والمصائِبِ والواحد فيهم من شدة فقره كان يموت بدون ما يحصل على إللي كان محتاجه،
قال رسول الله ﷺ:
"أوَّلُ مَن يدخُلُ الجنَّةَ مِن خلقِ اللهِ الفُقَراءُ المُهاجِرونَ الَّذينَ يُسَدُّ بهم الثُّغورُ وتُتَّقَى بهم المَكارِهُ ويموتُ أحَدُهم وحاجتُه في صدرِه لا يستطيعُ لها قضاءً"《صحيح ابن حِبّان》

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة_والخمسون
#المرحلة_الثالثة_اليوم_الآخر
#وصف_الجنة_والنار_الجزء_الثالث
#خطبة_الشيطان_النار

اتكلمنا المرة إللي فاتت عن تخاصم أهل النار والكلام إللي حصل بينهم، وقلنا إن المستضعفين أو الأتباع كانوا متغاظين من إللي الزعماء إللي أضلوهم، وكانوا عايزين ينتقموا منهم،
فبعد بقى ما كلهم يكونوا في النار مع بعض: الرؤساء والأتباع، والأغنياء والفقراء؛ هتقول آخر مجموعة في الدخول وهم الأتباع عن أول مجموعة دخلوا وهم الزعماء والمتبوعين:
يا رب! رؤساء الضلال وكبراءنا في الشرك دول هم السبب في ضلالنا وهلاكنا😩
احنا سمعنا كلامهم واتبعناهم في الضلال بتاعهم، فأبعدونا عن طريق الهُدى والإيمان،
فخليهم يذوقوا عذاب أشد من عذاب النار لأنهم أضلونا😖
و خلي عذابهم ضعفين من العذاب واطردهم من رحمتك، وأبعدهم عن مغفرتك إبعادا شديدا عظيما👌
قال تعالى:
"حَتَّىٰ إِذَا ادَّارَكُوا فِيهَا جَمِيعًا قَالَتْ أُخْرَاهُمْ لِأُولَاهُمْ رَبَّنَا هَٰؤُلَاءِ أَضَلُّونَا فَآتِهِمْ عَذَابًا ضِعْفًا مِّنَ النَّارِ"
《سورة الأعراف آية(38)》
وقال:
"وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءَنَا فَأَضَلُّونَا السَّبِيلا۩رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْنًا كَبِيرًا"
《سورة الأحزاب آية(67-68)》

فيأتيهم الجواب الذي يحمل لهم التهكم والسخرية، فيقول الله لهم: لكل منكم ومنهم عذاب مضاعف من النار، فكلكم اشتركتم في الكفر والمعاصي،
فحتى وإن كان هناك اختلاف في درجات العذاب بينكم وده بحسب اختلاف جرائمكم؛ فأنتم جميعا تشتركون في العقاب،
فأنتم عذابكم بسبب تقليدكم الأعمى، وأما هم فبسبب إضلالهم لكم ولغيركم، ولكنكم يا معشر المقلدين لا تعلمون ما لكل فريق منكم من العذاب لجهلكم وانطماس بصيرتكم👌
قال تعالى:
"قَالَ لِكُلٍّ ضِعْفٌ وَلَٰكِن لَّا تَعْلَمُونَ"《سورة الأعراف آية(38)》

بعد كده بقى تأخذهم ملائكة العذاب وتسحبهم سحبا شديدا عنيفا إلى وسط النار، وتضربهم الملائكة بمقامع من حديد، يعني مطارق من حديد على رؤوسهم،
فتنفتح دماغ الواحد فيهم من الضربة، فيُصب من فوق رأسه الحميم فينزل في وسط البدن فيتخلله إلى البطن والأمعاء حتى يخرج من كعبيه والعياذ بالله، فيقوم الحميم ده مسيّح ما في البطون والجلود😓
والملائكة بيصبوا عليه الحميم بيقولوا له من باب السخرية والتهكم عليه: ذُق إنك أنت العزيز الكريم.
قال تعالى:
"خُذُوهُ فَاعْتِلُوهُ إِلَى سَوَاءِ الْجَحِيمِ۩ثُمَّ صُبُّوا فَوْقَ رَأْسِهِ مِنْ عَذَابِ الْحَمِيمِ۩ذُقْ إِنَّكَ أَنتَ ٱلْعَزِيزُ ٱلْكَرِيمُ"《سورة الدخان آية(47 -49)》

وقال: "وَلَهُم مَّقَٰمِعُ مِنْ حَدِيدٍۢ"《سورة الحج آية(21)》

وبعد ما يدخلوا النار لا تبقى أبوابها مفتوحة، يعني يتم غلق الأبواب عليهم، عشان لو الأبواب مفتوحة مثلا ممكن يتسّرب من حرها للخارج، لكن لما تكون الأبواب مغلقة تتركز الحرارة في المكان،
فيرجع عليهم حرها ولهبها👌
قال تعالى:
"وَٱلَّذِينَ كَفَرُواْ بِـَٔايَٰتِنَا هُمْ أَصْحَٰبُ ٱلْمَشْـَٔمَةِ۩عَلَيْهِمْ نَارٌ مُّؤْصَدَةٌۢ"
《سورة البلد آية(19-20)》

ويتحسر الكفار وهم بيتعذبوا ويقولوا يا ريتنا أطعنا الله وأطعنا الرسول، كان زماننا تخلصنا من العذاب ده ودخلنا الجنة مع المطيعين😣
قال تعالى: "يَوْمَ تُقَلَّبُ وُجُوهُهُمْ فِي النَّارِ يَقُولُونَ يَا لَيْتَنَا أَطَعْنَا اللَّهَ وَأَطَعْنَا الرَّسُولا"《سورة الأحزاب آية(66)》

ومش معنى إنهم كلهم في العذاب مع بعض فده هيخفف عنهم أو يهوّن عليهم العذاب شوية؛ لأ خالص👌
يعني مثلا في الدنيا لما الواحد يشوف ناس واقعة في مصائب مختلفة فده بيهون وبيخفف عليه مصيبته،
أو لو واحد بيعمل معصية وشايف إللي حواليه بيعملوا فبيقول ما الناس كلها بتعمل، فده بيهون عليه فعل المعصية وبيخفف عليه لومه لنفسه،
لكن في النار بقى مفيش الكلام ده، ربنا نزع عنهم روح التسلِّي دي،
فمصيبة الآخرة جمعت كل عقاب ولا يوجد فيها أدنى راحة، ولا حتى هذه الراحة البسيطة👌
قال تعالى:
"وَلَن يَنفَعَكُمُ ٱلْيَوْمَ إِذ ظَّلَمْتُمْ أَنَّكُمْ فِى ٱلْعَذَابِ مُشْتَرِكُونَ"
《سورة الزخرف آية(39)》

وهنا بقى أهل النار هيتساءلوا عن إللي كانوا بيسخروا منهم في الدنيا وبيتغامزوا لما يشوفوهم و بيعتبروهم أهل ضلال وشايفينهم من الأشرار؛ لأ وكمان بنوا حياتهم على عداء هؤلاء و تشويه صورتهم و التحذير منهم زي ما ربنا قال عنهم:
"إِنَّ الَّذِينَ أَجْرَمُوا كَانُوا مِنَ الَّذِينَ آمَنُوا يَضْحَكُونَ ۩
وَإِذَا مَرُّوا بِهِمْ يَتَغَامَزُونَ ۩
وَإِذَا انقَلَبُوا إِلَىٰ أَهْلِهِمُ انقَلَبُوا فَكِهِينَ ۩
وَإِذَا رَأَوْهُمْ قَالُوا إِنَّ هَٰؤُلَاءِ لَضَالُّونَ"《المطففين آية(29-32)》

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الستون
#المرحلة_الثالثة_اليوم_الآخر
#وصف_الجنة_والنار_الجزء_الرابع
#وصف_أشكال_أهل_الجنة

وقفنا المرة إللي فاتت عند وصف أشكال أهل الجنة،
انت لما تدخل الجنة مع أهلها ️هتكونوا كلكم على صورة آدم عليه السلام، يعني الطول زي طوله، وهو عليه السلام طوله ستين ذراع، يعني حوالي سبعة وثلاثين متر👌
قال رسول الله ﷺ:
"....كُلُّ مَنْ يَدْخُلُ الْجَنَّةَ عَلَى صُورَةِ آدَمَ...."
《رواه البخاري ومسلم》
والأجساد مش هيكون فيها شعر خالص ولا حتى في الوجوه، طبعا ما عدا شعر الرأس، فده هيكون موجود😅
وهتكون البشرة بيضاء والعيون هتكون متكحلة، يعني زيادة في الجمال والحسن،
والأعمار هتكون ما بين الثلاثين(30) والثلاث والثلاثين(33)؛ لأن العُمر ده هو عُمر اكتِمالِ الشَّبابِ،
وده لكل أهل الجنة سواء كانوا ماتوا صغارا أو شباب أو كبار في السن رجالا ونساءا👌
قال رسول الله ﷺ:
"يَدْخُلُ أَهْلُ الجَنَّةِ الجَنَّةَ جُرْدًا، مُرْدًا، مُكَحَّلِينَ، أَبْنَاءَ ثَلاَثِينَ أَوْ ثَلاَثٍ وَثَلاَثِينَ سَنَةً"《السلسلة الصحيحة》

وجاء في أحاديث《ضعيفة》يقوّي بعضها بعضا إن أهل الجنة من المؤمنين هيكون جمالهم كجمال يوسف عليه السلام وقلوبهم كقلب أيوب عليه السلام، والله أعلم.
لكن مش معنى الوصف ده إنهم هيكونوا متشابهين بحيث يلتبس بعضهم ببعض ويبقى مش عارفين نفرق بينهم😅
لأ، هو المقصود التشابه في الحجم ونسبة الجمال، مش التطابق في الأوصاف، حتى رسول الله ﷺ يقول:
"إنَّ أوَّلَ زُمْرَةٍ يَدْخُلُونَ الجَنَّةَ علَى صُورَةِ القَمَرِ لَيْلَةَ البَدْرِ، ثُمَّ الَّذِينَ يَلُونَهُمْ علَى أشَدِّ كَوْكَبٍ دُرِّيٍّ في السَّمَاءِ إضَاءَةً..."
《صحيح البخاري》
وفي رِوايةِ مُسلمٍ: "ثمَّ هم بعْدَ ذلك مَنازِلُ"

يعني رسول الله ﷺ بيصف أهل الجنَّةِ جَميعًا بالحُسنِ والجَمالِ، وإن الجمال ده يتفاوت أو يختلف بحسَبَ دَرَجاتِهم وأعمالِهِم؛
فأوَّلُ طائفةٍ أو مجموعة تَدخُلُ الجنَّةَ تكونُ كالقمَرِ لَيلةَ البدْرِ،
و لَيلةُ الرَّابعَ عشَرَ يكون القمر بدر وساعتها القمر يكتمل استدارتُه، ويَتِمُّ نُورُه، فيكونُ أكثرَ إشراقًا، وأعظَمَ حُسنًا وبَهاءً،
أمَّا الطَّائفةُ الثَّانيةُ إللي هتدخل بعدهم فإنَّها تُشبِهُ في صُورتِها أقْوى الكواكبِ نُورًا وضِياءً،
يعني تخيل إن السوّار إللي بتلبسه حول معصمك لو ظهر في الدنيا لغطى نوره ضوء الشمس زي كده ما الشمس بتغطي على ضوء النجوم😮
فما بالك بجمالك نفسه و ضوْء وجهك هيبقى عامل إزاي👌
قال رسول الله ﷺ:
"لو أنَّ رجُلًا مِن أهْلِ الجنَّةِ اطَّلَع، فبَدا أساورُه؛ لَطمَسَ ضَوءَ الشَّمسِ، كما تَطمِسُ الشَّمسُ ضَوءَ النُّجومِ"《صحيح الترمذي》
وإللي هيدخلوا بعدهم؛ دَرَجاتِهم في إشراقِ اللَّونِ مُتفاوِتةٌ بحَسبِ عُلوِّ دَرَجاتِهم، وتَفاوُت فضْلهم💁

ده كده كان وصف الشكل الظاهر،
أما القلوب بقى فهي على قَلْبِ رجُلٍ واحدٍ، يعني القلوب هتبقى في غاية الاتفاق، مفيش بينك وبينهم أي اختلاف ولا بُغض ولا كره، والنفوس صافية نقية طاهرة مليانة بالحب والمودة مفيش فيها أي عداوة لأحد كأن القلوب هي قلب لرجل واحد👌
قال رسول الله ﷺ:
"قُلُوبُهُمْ علَى قَلْبِ رَجُلٍ واحِدٍ، لا اخْتِلَافَ بيْنَهُمْ ولَا تَبَاغُضَ..."
《صحيح البخاري》
وقال الله عز وجل:
"وَنَزَعْنَا مَا فِي صُدُورِهِم مِّنْ غِلٍّ إِخْوَانًا عَلَى سُرُرٍ مُّتَقَابِلِينَ"
《سورة الحجر آية(47)》

وأهل الجنة مائة وعشرين صف، أُمة الإسلام لوحدهم ثمانين صف، والأربعين الباقية من باقي الأمم السابقة، يعني أمة الإسلام هتكون ثُلثين أهل الجنة،
قال رسول الله ﷺ:
"أهْلُ الجنَّةِ عِشرونَ ومائةُ صفٍّ ثمانونَ منها من هذهِ الأمَّةِ وأربَعونَ من سائرِ الأممِ"《صحيح الترمذي》
واحنا كنا قلنا قبل كده إن رسول الله ﷺ تمنى أن أمة الإسلام تكون نصف أهل الجنة في الحديث:
"والَّذي نَفْسُ مُحَمَّدٍ بيَدِهِ، إنِّي لَأَرْجُو أنْ تَكُونُوا نِصْفَ أهْلِ الجَنَّةِ"
《صحيح البخاري》
فحقق الله له أمنيته وزاده كمان العدد لحد ما وصل إلى الثلثين،
فتكون النسبة النهائية هي أن أمة الإسلام ثلثي أهل الجنة👌

وانت داخل للجنة مع المؤمنين هتكونوا ماسكين بأيدي بعضكم البعض صف صف، وهتدخلوا الجنة مع بعض،
قال رسول الله ﷺ:
"لَيَدْخُلَنَّ الجَنَّةَ مِن أُمَّتي سَبْعُونَ ألْفًا، أوْ سَبْعُ مِئَةِ ألْفٍ مُتَماسِكِينَ، آخِذٌ بَعْضُهُمْ ببَعْضٍ، حتَّى يَدْخُلَ أوَّلُهُمْ وآخِرُهُمُ الجَنَّةَ"
《صحيح البخاري》

تعال بقى ندخل بقى الجنة ونشوف هيحصل إيه معاك ومع المؤمنين💁

أهل الجنة هم ضيوف الرحمن جل جلاله، وانت شوف لو واحد نزل ضيف عند غني من أغنياء الدنيا وهو صاحب مكانة عالية؛ بيعامل ضيفه بكرم وإحسان إزاي،
فاحنا هنا بنتكلم عن الله الكريم أغنى الاغنياء ذو الفضل العظيم، مش هنقدر نتخيل إكرامه لأهل الجنة هيكون عامل إزاي👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الواحدة_والستون
#المرحلة_الثالثة_اليوم_الآخر
#وصف_الجنة_والنار_الجزء_الخامس
#رائحة_الجنة

اتكلمنا المرة إللي فاتت عن طعام أهل النار وقلنا إن طعامهم هيكون الزقوم والضريع والغسلين،
وقلنا إن الطعام ده هيُدفع في أفواههم غصب عنهم فيحاولوا يبلعوه فيحصل لهم غُصّة، يعني يقف في زورهم فلا يبقوا عارفين يبلعوه ولا عارفين يخرّجوه،
ويستمر دفع الطعام ده في أفواههم لحد ما تتملى بطونهم بيه،
وياريت بقى الموضوع هيقف لحد كده😬
يعني الواحد فينا في الدنيا لما يأكل طعام مش عاجبه أو طعمه وحش بيقوم بالعه على طول عشان يتخلص من الطعم وخلاص انتهى الموضوع،
لكن دول لما الطعام ده ينزل إلى بطونهم هيكون بيغلي فيها كأنهم والعياذ بالله أوقدوا ناراً للقدور في بطونهم《كَالْمُهْلِ يَغْلِي فِي الْبُطُونِ》والمُهل هو النحاس والرصاص المذاب👌

انت عارف إن الماء بيغلي لما يصل إلى مائة درجة مئوية، وبيسموها درجة الغليان، تخيل بقى إن النحاس عشان يُذاب محتاج إلى أكثر من ألف ومائتين وخمسين درجة مئوية😶
فتخيل كمية الحرارة إللي هتكون في بطونهم عاملة إزاي ربنا يعافينا😓
ده الواحد لو جاله شوية حموضة وحس بحرقان في صدره بيبقى مش قادر يستحمل الألم، فما بالك بحاجة حرارتها فوق الألف درجة😥

أما بقى الشراب إللي هيشربوه مع الزقوم فهو《شَوْبًا مِّنْ حَمِيمٍۢ》
يعني شراب مخلوط بماء شديد الحرارة يُقطع الأحشاء،
يعني اجتمع في طعامهم مرارة الزقوم وحرارة الماء والعياذ بالله😞
ده غير ماء الصديد إللي هيشربوه🤢
قال تعالى:
"مِّن وَرَآئِهِۦ جَهَنَّمُ وَيُسْقَىٰ مِن مَّآءٍۢ صَدِيدٍۢ"
《سورة إبراهيم آية(16)》
وماء الصديد هو ما يسيل من أجسام أهل النار من القيح والدم
وما يسيل من الدِّمل ونحوه عافانا الله وإياكم😓

ومن هنا تقدر تستوعب ليه ربنا غيّر أجسادهم وجعل حجمها كبير جدا زي ما قلنا المرة إللي فاتت، الجسد البشري مكنش هيستحمل أبدا العذاب ده فاتغيرت أجسادهم لتتحمل العذاب👌

يبقى هم هياكلوا من شجرة اسمها شجرة الزقوم وهيشربوا ماء اسمه ماء حميم👌
وهم مش ساكتين في كل العذاب ده، دول بيصرخوا ويتألموا ويستغيثوا، عايزين يشربوا ماء يُطفئ الحر واللهيب إللي هم فيه؛
لكن لما يستغيثوا "يُغَاثُواْ بِمَآءٍۢ كَٱلْمُهْلِ يَشْوِى ٱلْوُجُوهَ ۚ"
《سورة الكهف آية(29)》
يعني ملائكة العذاب هتجيب لهم ماء لكنه ماء عامل زي الرصاص أو النحاس المُذاب من شدة حرارته،
ومن شدة حرارته بيشوي الوجوه، أمال بقى لما يدخل في بطنه هيعمل إيه😓
ربنا بيقول:
"يُصْهَرُ بِهِ مَا فِي بُطُونِهِمْ وَالْجُلُودُ"《سورة الحج آية(20)》
و الآية هنا بتوضح الآثار إللي هتترتب على العذاب ده وهي إن الماء الحميم بيذوّب ما في بطونهم من اللحم والشحم والأمعاء،
والجلود بتاعتهم هتتشوى لدرجة إنها تسقط وده بسبب شدة حر الماء الحميم وعظيم أمره ربنا يعافينا😞

تخيل إن أمنية أهل النار هتبقى شوية مية يشربوها عشان تخفف عنهم بعض العذاب ده👌
فهينادوا على أهل الجنة لما يشتد بهم الجوع والعطش:
"أَفِيضُوا عَلَيْنَا مِنَ الْمَاءِ أَوْ مِمَّا رَزَقَكُمُ اللَّهُ"
《سورة الأعراف آية(50)》
يعني بيطلبوا منهم إنهم يُفيضوا عليهم من الماء، أو مما رزقهم الله من الطعام، لكن يرد عليهم أهل الجنة ويقولوا لهم:
"إِنَّ اللَّهَ حَرَّمَهُمَا عَلَى الْكَافِرِينَ"《سورة الأعراف آية(50)》
يعني ربنا حَرَّم الشراب والطعام على الذين جحدوا توحيده، وكذَّبوا رسله👌

فهل انت تقدر تستحمل انقطاع الماء والطعام عنك فضلا إنك تاكل طعام مليان شوك وريحته وطعمه لا يُطاق وتشرب الحميم ده؟!
طاعة الله أهون عليك من العذاب ده،
فأطعه تكسب جنة عرضها السماوات والأرض وتنجو من نار انت مبتقدرش تستحمل نَفَسها لا في الصيف ولا في الشتاء😞
انت متخيل إن أشد أوقات الحر في الصيف ده نفس واحد بس من أنفاس جهنم والعياذ بالله😶
وأشد أوقات البرد ده نفس تاني من أنفاس جهنم👌
شوف الحديث ده، قال رسول الله ﷺ:
"اشْتَكَتِ النَّارُ إلى رَبِّهَا فَقالَتْ: رَبِّ أكَلَ بَعْضِي بَعْضًا،
فأذِنَ لَهَا بنَفَسَيْنِ: نَفَسٍ في الشِّتَاءِ ونَفَسٍ في الصَّيْفِ، فأشَدُّ ما تَجِدُونَ مِنَ الحَرِّ، وأَشَدُّ ما تَجِدُونَ مِنَ الزَّمْهَرِيرِ."
《صحيح البخاري》

يعني النار اتكلمت فعلا ونطقت زي ما الأيدي بتنطق، وكذلك الجلود والأرجل يوم القيامة وشرحناه قبل كده،
فنطقت وقالت لربنا إن أجزائها أكلت بعضها من شدة الحر ومن شدة البرد إللي جواها،
فأذن الله لها أن تتنفس في الصيف ليخف عليها الحر، وتتنفس في الشتاء ليخف عليها البرد إللي هو الزَّمْهَرِيرِ وهنعرفه بالتفصيل بعدين إن شاء الله،
ومفيش مشكلة خالص إن النار يكون فيها طبقة أو دركة من البرد مع إن حرارتها ملتهبة ربنا قادر على كل شيء👌

¤ممكن تقول:
طيب ماهو الحر والبرد بيكون على حسب قرب الأرض وبُعدها عن الشمس وده واقع ومُثبت فعلا، فإيه إللي دخّل جهنم في الموضوع🤨

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثانية_والستون
#المرحلة_الثالثة_اليوم_الآخر
#وصف_الجنة_والنار_الجزء_السادس
#ميراث_أهل_الجنة_وأشجار_الجنة

اتكلمنا المرة إللي فاتت عن أرض الجنة وقلنا إنها من الفضة وقلنا إن التراب بتاعها من المسك والزعفران، والمسك بتاعها لونه أبيض شديد البياض،
وقلنا إن لها رائحة جميلة جدا بتتشم من على بُعد أربعين عامًا، أو سبعين عامًا أو مائة عام أو خمسمائة عام بحسب أعمال العبد ودرجته في الجنة،
وقلنا إن في ناس هيتحرموا من شم ريحة الجنة دي، مين هم بقى؟
عد معايا وخد بالك لتكون منهم أو حد من أهل بيتك منهم👌

1️⃣ النساء المتبرجات الكاسيات العاريات وما أكثرهن في زماننا😓
يعني إللي مش لابسين حجاب شرعي صحيح وبيلبسوا ملابس ضيقة أو خفيفة فتكون الواحدة كأنها لابسة ومش لابسة في نفس الوقت،
فتخيل بُعد النساء المتبرجات الكاسيات العاريات عن الجنة نفسها،
يعني الريحة تتشم من على أقصى بُعد وهو خمسمائة سنة، والكاسيات العاريات مش هيشموا الريحة دي ربنا يعافينا، يعني هم بُعاد أوي عن ريحة الجنة فما بالك ببعدهم عن الجنة نفسها هيكون أد إيه😶
وكل ده في مقابل إيه؟!
في مقابل ملابس ضيقة مفصّلة لجسدها؟!!
في حد عاقل يبيع جنة عرضها السماوات والأرض عشان شوية ملابس؟!!!
قال رسول الله ﷺ:
صِنْفَانِ مِنْ أَهْلِ النَّارِ لَمْ أَرَهُمَا، وذكر منهما:
"نِسَاءٌ كَاسِيَاتٌ عَارِيَاتٌ مُمِيلَاتٌ مَائِلَاتٌ، رُؤُوسُهُنَّ كَأَسْنِمَةِ الْبُخْتِ الْمَائِلَةِ لَا يَدْخُلْنَ الْجَنَّةَ وَلَا يَجِدْنَ رِيحَهَا"《رواه مسلم》

2️⃣الشخص إللي بيصبغ شعره بالسواد بأي طريقة، سواء كان ذكر أو أنثى،
قال رسول اللهﷺ: "يَكونُ قومٌ يخضِبونَ في آخرِ الزَّمانِ بالسَّوادِ كحواصلِ الحمامِ
لا يريحونَ رائحةَ الجنَّةِ"《صحيح أبي داود》
و حواصلِ الحمامِ معناه صدور الحمام، فالناس دي هتصبغ شعرها باللون الأسود زي صدور الحمام إللي بيكون غالب لونه أسود،
فمادام الصبغ بلون مختلف عن الأسود فمفيش مشكلة،
لكن النهي عن الصبغ بالأسود👌

3️⃣الشخص إللي بيكون مسؤول عن رعِية فيُقصّر في حَقِّ رَعِيَّتِه ولا يَرعَاهَا ولا يَنصَحْ لها، ويضَيَّعَ حُقوقَها الدِّينيَّةَ والدُّنيويَّةَ،
سواء كان حاكم أو حتى زوج مع أهل بيته أو زوجة مع أهل بيتها أو أي واحد كان مسؤول عن مجموعة من الناس سواء المجموعة دي كبيرة أو صغيرة👌
يعني الأزواج إللي مقصرين في تحمل مسؤولياتهم وراميين كل حاجة على زوجاتهم ومقصرين في تربية أولادهم يلحقوا نفسهم ويصلحوا لأنهم ممكن يدخلوا في الحديث ده😓
وأنا بركز على النقطة دي لأنها منتشرة جدا في زماننا دلوقتي، فكل واحد يراجع حياته ويراجع نفسه،
مسؤولية الزوج مش توفير أكل وشرب بس، مسؤولية الزوج أكبر من كده بكتير👌
قال رسول الله ﷺ:
"ما مِن عَبْدٍ اسْتَرْعاهُ اللَّهُ رَعِيَّةً، فَلَمْ يَحُطْها بنَصِيحَةٍ، إلَّا لَمْ يَجِدْ رائِحَةَ الجَنَّةِ"《صحيح البخاري》
لم يَحُطْها بنَصِيحَةٍ يعني: لم ينصح لرعيته ولم يولها عنايته، ولم يقم عليها بما ينبغي سواء كانت الرعية صغيرة أو كبيرة👌

4️⃣ الشخص إللي بيتعلم العلم والمفروض يكون بيتعلمه لله لكنه بيتعلمه لأجل دنيا، سواء شهرة أو مدح أو عايز منصب من وراء العلم ده. قال رسول الله ﷺ:
"من تعلَّم علمًا مما يبتغى به وجهَ اللهِ تعالى، لا يتعلَّمُه إلا ليُصيبَ به عرضًا من الدنيا لم يجِدْ عَرْفَ الجنةِ يومَ القيامةِ"
《صحيح الترغيب والترهيب》
و عَرْفَ الجنة في الحديث يعني ريحَها👌

5️⃣ إللي بيقتل مُعاهَدًا، والمعاهد هو واحد كافر دخل إلى دارِ الإسلامِ بأمانٍ سواء كان يهودي أو نصراني، قال رسول الله ﷺ:
"مَن قَتَلَ نَفْسًا مُعاهَدًا لَمْ يَرِحْ رائِحَةَ الجَنَّةِ، وإنَّ رِيحَها لَيُوجَدُ مِن مَسِيرَةِ أرْبَعِينَ عامًا"《صحيح البخاري》

6️⃣ المرأة إللي بتطلب الطلاق بدون سبب وبدون ضرر، قال رسول الله ﷺ:
"أيُّمَا امرأةٍ سألت زوجَها طلاقًا في غيرِ ما بأسٍ فحرامٌ عليها رائحةُ الجنةِ"《صحيح أبي داود》
يعني المرأة إللي تطلب الطلاق مِن زوجِها دونَ وُقوعِ ضرَرٍ أو أذًى عليها مِن زوجِها، ودونَ سببٍ واضحٍ ومقبول؛ تكون من الناس إللي مش هيشموا رائحة الجنة،
وكل أصناف الناس دي لو ماتوا على التوحيد فهم في النهاية هيدخلوا الجنة، لكنهم مش هيشموا رائحةَ الجنَّة زي ما هيشمها المُحسِنون من البداية، ولن يدخُلوها مع أوَّلِ الدَّاخلين👌

فتخيل ابتعاد الناس دي عن الجنة أد إيه😓
ربنا يصلح حالنا وحال المسلمين ويرزقنا جميعا توبة قبل الموت🤲

نرجع بقى للجنة ووصفها،
كده انت شميت ريحة الجنة وشوفت الأرض وشوفت الحصى والرمل،
بعدين هترفع رأسك تنظر إيه موجود حواليك،
لكن قبل ما أقولك هتشوف إيه، خليني أقولك معلومة مهمة👌
انت لما تدخل الجنة مش بس هتاخد نصيبك من النعيم؛ ده انت كمان هتورث نصيب الكافر من النعيم😀
يعني إيه الكلام ده🤨

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثالثة_والستون
#المرحلة_الثالثة_اليوم_الآخر
#وصف_الجنة_والنار_الجزء_السابع
#ثمار_ودواب_الجنة

اتكلمنا المرة إللي فاتت عن ميراث أهل الجنة واتكلمنا عن شجر الجنة وقلنا إن سِيقان الشجر في الجنة من الذهب، وقلنا إن الشجر حجمه كبير جدا،
بالنسبة بقى للثمار والفواكه إللي بتخرج من شجر الجنة فهي متنوعة، يعني كل أنواع الثمرات والفواكه تخرج من شجر الجنة، وكل ما تشتهي أو تختار فاكهة معينة؛ تلاقيها عندك،
قال تعالى:
"وَفَاكِهَةٍ مِّمَّا يَتَخَيَّرُونَ"《سورة الواقعة آية(20)》
وقال: "إِنَّ الْمُتَّقِينَ فِي ظِلَالٍ وَعُيُونٍ۩ وَفَوَاكِهَ مِمَّا يَشْتَهُونَ"
《سورة المرسلات آية(41-42)》

والفواكه والثمار دي موجودة على طول في كل الأوقات،
فلا هي بتخلص؛ لأنها كثيرة جدا،
ولا بييجي عليها وقت ومتكنش موجودة بسبب اختلاف الفصول مثلا زي ثمار الدنيا، قال تعالى:
"وَفَاكِهَةٍ كَثِيرَةٍ لَا مَقْطُوعَةٍ وَلَا مَمْنُوعَةٍ"《سورة الواقعة آية(33)》

وأشهر ثمار وفواكه الجنة هي العنب والرمان، قال تعالى:
"فِيهِمَا فَاكِهَةٌ وَنَخْلٌ وَرُمَّانٌ"《سورة الرحمن آية(68)》
وقال رسول الله ﷺ:
"إنِّي رَأَيْتُ الجَنَّةَ، فَتَنَاوَلْتُ عُنْقُودًا، ولو أصَبْتُهُ لَأَكَلْتُمْ منه ما بَقِيَتِ الدُّنْيَا"《صحيح البخاري》
يعني عنقود واحد يأكل مليارات البشر على مدار مئات السنين😮

أما نخل الجنة فوصفه عجيب👌
قال عبد الله بن عباس رضي الله عنه:
نَخْلُ الجنةِ جُذُوُعُها من زُمُرُّدٌ أخضَرُ،
وكَرَبُهَا ذهبٌ أحمَرُ وسَعَفُهَا كِسْوَةٌ لأهلِ الجنَّةِ، منها مُقَطَّعَاتُهُمْ، وحُلَلُهُم،
وثمرُها أمثالُ القِلالِ والدِّلاءِ، أحْلَى منَ العَسَلِ، وألْيَنُ منَ الزُّبْدِ لَيْسَ له عَجَمٌ"《صحيح الترغيب والترهيب》

يعني ربنا جعل جذع النخل من الزمرد الأخضر، وهو عبارة عن حَجَر كَريم لونه أخضرُ شديدُ الخُضرةِ وفي نفس الوقت شفَّاف.

☆والأحجار الكريمة(Gemstone) معناها: أحجار نادرة غالية الثَّمن، وأشكالها وألوانها جميلة جدا، وقيمتها عالية جدا يعني هي أغلى من الذهب، وأشهر أنواعها:
اللؤلؤ، المرجان الأحمر، والعنبر، والزمرد، والياقوت، والألماس.

وانتم لو بحثتم على النت هتشوفوا صور الأحجار الكريمة دي، شكلها فعلا سبحان الله جميل جدا😮
فلو كان جذع النخلة مصنوع من الزمرد الأخضر بتاع الدنيا ده هيبقى شكلها تحفة، فما بالكم بزمرد الجنة إللي منعرفش عامل إزاي والتشابه في الاسم فقط👌
《هتلاقوا في التعليقات👇 صورتين لأشكال الأحجار الكريمة》

يبقى كده الجذع زمرد أخضر، نطلع بقى على ساق النخل وورقه،
"كَرَبُهَا ذهبٌ أحمَرُ" يعني أُصولُ السَّعَفِ والجَريدِ،
عارفين النخيل، مش بيبقى في الساق بتاعته حاجات مدببة كده
👈🌴أهه ده أصل سعف النخيل، وده إللي هيكون من الذهب الأحمر.

السَّعَف نفسه بقى إللي هو أوراق النخيل؛ عبارة عن:
1️⃣ كسوة لأهل الجنة، فمنها يَأخُذونُ ثيابَهم،

2️⃣ ومنها "مُقطَّعاتُهم"، ودي لها كذا معنى إما إنها الثِّيابُ المَخيطةُ مِثلُ الجُبَّةِ وغيرِها، أو قِصارُ الثِّيابِ، أو كلُّ ما يُفصَّلُ ويُخاطُ مِن قَميصٍ وغيرِه👌

3️⃣منها "حُلَلُهم" والحُلّة هي ما يُلبَسُ فوْقَ الثِّيابِ للزِّينَةِ والرَّفاهيَةِ، زي كده الملوك زمان لما كانوا بيلبسوا فوق ملابسهم رداء طويل ملون ومزخرف👌

وعادي يكون أكثر من مكان تخرج منه الثياب،يعني المرة إللي فاتت قلنا إن ثمار شجرة طوبى عبارة عن ملابس أهل الجنة،
والنهاردة قلنا إن ورق نخل الجنة عبارة عن ملابس وحُلَل لأهل الجنة💁

أما ثمر النخيل فهو كبير جدا، يعني الثمرة الواحدة عامل زي القلة والدلو، ودي كانت أَوعيَةٌ كَبيرةُ الحَجمِ كانوا بيملوها بالماءِ،
والثمار دي طعمها أحلى من العسل وملمسها ليّن وطري جدا لدرجة إنه ألين من الزبد😮
والثمر "ليس له عَجَمٌ"، يعني مفيش داخل الثمر ده نوى زي ثمر نخيل الدنيا👌

فإللي عايز بقى يكون عنده شجر ونخل وثمار في الجنة ينفذ وصية إبراهيم عليه السلام لأمة الإسلام وهي زي ما قالها لرسول الله ﷺ في رحلة والمعراج:
"يا محمَّدُ، أقرئ أمَّتَكَ منِّي السَّلامَ وأخبِرْهُم أنَّ الجنَّةَ طيِّبةُ التُّربةِ عذبةُ الماءِ، وأنَّها قيعانٌ،
وأنَّ غِراسَها سُبحانَ اللَّهِ والحمدُ للَّهِ ولا إلَهَ إلَّا اللَّهُ واللَّهُ أَكْبرُ"《صحيح الترمذي》
يعني إللي عايز يتغرس له شجر ونخيل في الجنة؛ يسبح ويحمد ويوحّد الله ويكبّره👌
واحنا اتكلمنا عن موضوع الذكر قبل كده في حلقة الميزان👌

☆طيب نفترض مثلا إنك كنت واحد بتحب الزراعة، وبعد ما دخلت الجنة اشتهيت إنك تزرع، هل هتقدر تحقق أمنيتك تزرع ولّا خلاص الزراعة والغرس كان في الدنيا ومفيش في الجنة🤔