ဒါ့ကြောင့်လူထုဟာ အာဏာရှင်စနစ်ကို အမြစ်ဖြတ်ဖို့ ဆုံးဖြတ်လိုက်ကြတာပဲ။ ဒါ့ကြောင့် အသက်တွေ သွေးတွေ ဒီလောက်ပေးဆပ်နေကြတာပဲ။ ဘယ်သူမှ သူများမြှောက်ပေးလို့ အသေခံနေတာမဟုတ်ဘူးး။

အားလုံးသိထားကြဖို့က ဒီပွဲဟာ စစ်တပ်ကပုံဖျက်ပြောဆိုနေတဲ့ အစိမ်းနဲ့အနီပွဲမဟုတ်ဘူး။ စစ်တပ်က အစိမ်းနဲ့အနီပွဲလို့ပြောနေတာဟာ မဘသတွေကို ထိန်းထားနိုင်အောင် လှည့်စားနေတာ။ မဘသတွေက အဟုတ်မှတ်တယ်။ ပျူစောထီးဖွဲ့ပြီး စစ်တပ်ကိုကျားကန်ပေးတယ်။ ဒါပေမဲ့ ပြည်သူကိုတော့ အဲဒီနည်းနဲ့ လှည့်စားလို့မရတော့ဘူး။

ဒီပွဲဟာ ၁၉၄၈ ခု လွတ်လပ်ရေးရပြီးစကတည်းက စတင်တိုက်ပွဲဝင်ခဲ့ကြရတဲ့ စစ်အာဏာရှင်စနစ်နဲ့ ပြည်သူတရပ်လုံးဆင်နွှဲနေတဲ့ တိုက်ပွဲကြီးရဲ့ အဆက်ပဲ။ ပြည်သူတရပ်လုံးနဲ့ စစ်အာဏာရှင်ရဲ့တိုက်ပွဲ။ နောင်နှစ်ပေါင်း ၁၀၀ ဆက်ပြီး စစ်ကျွန်မဖြစ်စေချင်လို့တိုက်တဲ့ပွဲပဲ။

ဒီတပွဲနိုင်အောင် မတိုက်နိုင်ရင် နောက်ထပ်အနှစ် ၁၀၀ ကျွန်ခံရမယ်။ ငါတို့နိုင်အောင်တိုက်ကြမယ်။
___
ယခုဆောင်းပါးဟာ အိုးဝေစာစောင် အတွဲ ၁၊ အမှတ် ၄ မှာ ပါဝင်တဲ့ဆောင်းပါးတပုဒ်ဖြစ်ပါတယ်။ အိုးဝေစာစောင် အတွဲ ၁၊ အမှတ် ၄ ကို ဒေါင်းလုတ်ရယူရန် - https://bit.ly/3iyZBnu
___
#Oway #Oway0104 #Whatshappeninmyanmar #Myanmar #Coup #Minaunghlaing

သမဂ္ဂကျောင်းသား ကိုအောင်ဆန်း

◾️ နယ်ချဲ့စနစ်နှင့် ဖက်ဆစ်စနစ်ကို ဆန့်ကျင်တော်လှန် တိုက်ပွဲဝင်ခဲ့သည့် ကိုအောင်ဆန်း၏ မွေးနေ့မှာ ယနေ့ဆိုလျှင် ၁၀၈ နှစ် ပြည့်လေပြီ။

သူသည် ငယ်စဉ်ကတည်းက အမျိုးသားရေး၊ နိုင်ငံရေးတို့အား အထူးစိတ်ဝင်စားပြီး ရေနံချောင်းအမျိုးသားကျောင်းတွင် ကျောင်းသားသမဂ္ဂအမှုဆောင်အဖြစ် ပါဝင်ခဲ့သည်။

၁၉၃၅ - ၁၉၃၆ စာသင်နှစ်တွင် ရန်ကုန်တက္ကသိုလ်ကျောင်းသားသမဂ္ဂ အမှုဆောင်တဦးအဖြစ် ရွေးကောက်တင်မြှောက်ခြင်း ခံခဲ့ရပြီး အိုးဝေမဂ္ဂဇင်းအယ်ဒီတာအဖြစ် တာဝန်ထမ်းဆောင်ခဲ့သည်။

၁၉၃၆ ခုနှစ် ဇန်နဝါရီလထုတ်၊ အတွဲ ၅၊ အမှတ် ၁ အိုးဝေမဂ္ဂဇင်း အင်္ဂလိပ်ကဏ္ဍတွင် "ငရဲခွေးကြီးလွတ်နေပြီ" ဟူသော ဆောင်းပါး ပါရှိလာသည်။ ထိုဆောင်းပါးတွင် တက္ကသိုလ်အာဏာပိုင်တဦး၏ မတရားမှုကို ပွင့်ပွင့်လင်းလင်း ဝေဖန်ထားရာ ကျောင်းရှိ အာဏာပိုင်များကိုသာမက ညွန့်ပေါင်းအစိုးရကိုပါ အဖျားခတ်နေသည်။

ဆောင်းပါးရေးသားသူ ယမမင်း ကလောင်ရှင်၏ အမည်ရင်းကိုမူ မသိကြပေ။ ထို့ကြောင့် ကျောင်းအုပ်ကြီးက အယ်ဒီတာ ကိုအောင်ဆန်းကို ဆောင်းပါးရှင်အမည် ဖော်ထုတ်ပေးရန် တောင်းဆိုလာသည်။ ကိုအောင်ဆန်းက အယ်ဒီတာကျင့်ဝတ်နှင့်အညီ ဆောင်းပါးရှင်အား မပြောနိုင်ကြောင်း အရေးယူလိုလျှင် မိမိအား အရေးယူနိုင်ကြောင်း ပြောသည်။

ဤဆောင်းပါးအား ထည့်သွင်းစေသည်ဟူသော အကြောင်းပြချက်ဖြင့် တကသဥက္ကဋ္ဌ ကိုနု ကို ကျောင်းထုတ်သည်။ ဆောင်းပါးရှင်အား အမည်မဖော်သည့်အတွက် ကိုအောင်ဆန်း ကိုလည်း ကျောင်းထုတ်သည်။

ထိုအခါ ကျောင်းသားများက မကျေနပ်‌ကြတော့ဘဲ သမိုင်းဝင် ဒုတိယကျောင်းသားသပိတ်ကြီး ဖြစ်ပေါ်လာခဲ့သည်။

ထိုမှတဆင့် တပြည်လုံးရှိ ကျောင်းသားများအား စည်းရုံး၍ ပိုမိုခိုင်မာကျစ်လစ်သော လှုပ်ရှားမှုများဆောင်ရွက်ကြရန် ရည်ရွယ်ချက်ဖြင့် ဗမာနိုင်ငံလုံးဆိုင်ရာကျောင်းသားများသမဂ္ဂ - ဗကသ (All Burma Students' Union - ABSU) ပေါ်ပေါက်လာခဲ့သည်။

ကိုအောင်ဆန်းသည် ၁၉၃၇ - ၃၈ ခုနှစ်တွင် ဗကသဥက္ကဋ္ဌအဖြစ်‌လည်းကောင်း၊ ၁၉၃၈ - ၁၉၃၉တွင် ဗကသနှင့် တကသဥက္ကဋ္ဌအဖြစ်လည်းကောင်း ဆောင်ရွက်ခဲ့သည်။ ထို့နောက် အခြားသောနိုင်ငံရေးတာဝန်များ ဆောင်ရွက်ရန် သမဂ္ဂမှထွက်ပြီး လွတ်လပ်ရေးအတွက် ဆက်လက်ကြိုးပမ်းခဲ့သည်။

၁၉၁၅ ခုနှစ်၊ ဖေဖော်ဝါရီလ ၁၃ ရက်နေ့‌တွင် မွေးဖွားခဲ့သော ကိုအောင်ဆန်းသည် သက်ရှိထင်ရှားရှိမည်ဆိုလျှင် ယနေ့ ၂၀၂၃ ခုနှစ်၊ ဖေဖော်ဝါရီလ ၁၃ ရက်နေ့တွင် ၁၀၈ နှစ် ပြည့်မည် ဖြစ်သည်။

#UYSU #ABSU #KoAungSan #Oway #အိုးဝေ #ကိုအောင်ဆန်း #တကသ #ဗကသ

ထိုင်းလွှတ်တော်မှာ ပြုလုပ်တဲ့ မြန်မာ့အရေး ဆွေးနွေးပွဲမှာ ရတကသ အလုပ်အမှုဆောင် ကိုအောင်ဖုန်းမော် တက်ရောက်ဟောပြော

မတ် ၃၊ ရတကသ

ထိုင်းနိုင်ငံ လွှတ်တော်မှာ မတ်လ ၂ ရက်နေ့က ပြုလုပ်ခဲ့တဲ့ မြန်မာ့အရေး ဆွေးနွေးပွဲမှာ ရန်ကုန်တက္ကသိုလ်ကျောင်းသားများသမဂ္ဂ (ဗကသများအဖွဲ့ချုပ်) အလုပ်အမှုဆောင် အဖွဲ့ဝင် ကိုအောင်ဖုန်းမော် တက်ရောက် ဟောပြောခဲ့ပါတယ်။

“အာဏာသိမ်းပြီး သုံးနှစ်အကြာ” လို့ ခေါင်းစဉ်ပေးထားတဲ့ ဒီဆွေးနွေးပွဲကို ထိုင်းအတိုက်ခံပါတီဖြစ်တဲ့ Move Forward ပါတီက ဦးဆောင်ကျင်းပခဲ့တာပါ။

"တခြားကမ္ဘာ့နေရာ တော်တော်များများက လူငယ်တွေ လွယ်လွယ်ကူကူ ရနေကြတဲ့အခွင့်အရေးတွေကို မြန်မာပြည်က လူငယ်‌တွေက ခက်ခက်ခဲခဲကြီး တိုက်ယူနေကြရတယ်။ ဒီအကြောင်းတွေကို ဆွေးနွေးပွဲတက်ရောက်သူတွေ သိအောင် အဓိကထား ပြောခဲ့ပါတယ်။" လို့ ကိုအောင်ဖုန်းမော်က ပြောပါတယ်။

"ဂုဏ်သိက္ခာမရှိ အနာဂတ်မရှိတဲ့ ဘဝနဲ့ နေမယ့်အစား လူငယ်‌တွေဟာ အမှန်တရားအတွက် ဂုဏ်သိက္ခာအတွက် သူတို့ရဲ့ အသက်တွေနဲ့ အလဲအထပ်လုပ်နေရတယ်။"

ဒါ့အပြင် ၂၀၀၈ ဖွဲ့စည်းပုံ အပါအဝင် ၊ ဗဟိုပြည်မအုပ်ချုပ်ရေးစနစ်၊ ဗမာ/ဗုဒ္ဓ လူမျိုးကြီးအတွေးအခေါ်တွေနဲ့ တိုင်းပြည်ကို စုစည်းလို့မရနိုင်တော့ကြောင်းကိုလည်း အဓိကထား ဆွေးနွေးခဲ့တယ်လို့ ဆိုပါတယ်။

မြန်မာနိုင်ငံမှာ စစ်အာဏာသိမ်းပြီးနောက်ပိုင်း သုံးနှစ်အတွင်း လက်ရှိအခြေအနေများ နဲ့ လူသားချင်းစာနာထောက်ထားမှုဆိုင်ရာ အကျပ်အတည်းများ ဖြေရှင်းရာမှာ ဒီမိုကရေစီကို ပံ့ပိုးကူညီနိုင်မယ့် နည်းလမ်းများကို ရှာဖွေဆွေးနွေးဖို့ ထိုင်းနိုင်ငံ လွှတ်တော်ထဲမှာ နှစ်ရက်တာကြာမြင့်တဲ့ ဆွေးနွေးပွဲကို မတ်လ ၂ ရက်နေ့နဲ့ ၃ ရက်နေ့မှာ ကျင်းပ ပြုလုပ်ခဲ့တာပါ။

လူ့အခွင့်အရေးချိုးဖောက်မှုတွေကို နေ့စဉ်ကျူးလွန်နေတဲ့ စစ်ကောင်စီနဲ့ပေါင်းပြီးတော့ လူသားချင်းစာနာထောက်ထားမှုဆိုင်ရာ အကူအညီတွေပံ့ပိုးပေးမယ့် အစီအစဉ်ဟာ အလုပ်မဖြစ်နိုင်ဘူးလို့လည်း ကိုအောင်ဖုန်းမော်က သုံးသပ်ပါတယ်။

"စစ်မှုထမ်းဥပဒေကြေညာပြီး လူသားချင်းစာနာ‌ထောက်ထားမှု အကျပ်အတည်းကို ပိုဆိုးအောင်လုပ်နေတဲ့ စစ်တပ်နဲ့ပေါင်းပြီးတော့ လူသားချင်း စာနာထောက်ထားမှု အကူအညီပေးကြမယ်ဆိုတဲ့ဟာက အလုပ်မဖြစ်နိုင်ဘူး"

မြန်မာ့ နိုင်ငံရေး၊ စီးပွားရေး၊ လူမှုရေး အခြေအနေများနဲ့ ထိုင်းနိုင်ငံအနေနဲ့ မြန်မာနိုင်ငံရဲ့ ဒီမိုကရေစီ လှုပ်ရှားမှုများကို ပံ့ပိုးနိုင်တဲ့ ဗျူဟာများ ချမှတ်ဖို့ အဲဒီဆွေးနွေးပွဲက ရည်ရွယ်တယ်လို့ သိရပါတယ်။

ဆွေးနွေးပွဲနဲ့အတူ မြန်မာပြည်သူတွေ ကြုံတွေ့နေရတဲ့ အခက်ခဲအမျိုးမျိုးကို ထင်ဟပ်စေနိုင်မယ့် အနုပညာပြခန်း တခုကိုလည်း ထည့်သွင်းပြသခဲ့ပါတယ်။

နှစ်ရက်တာ ကြာမြင့်တဲ့ ဆွေးနွေးပွဲကို ထိုင်းနိုင်ငံလွှတော်ရဲ့ အမျိုးသားလုံခြုံရေး၊ နယ်စပ်ရေးရာ၊ အမျိုးသားမဟာဗျုဟာ နဲ့ ပြုပြင်ပြောင်းလဲရေးကော်မတီနဲ့အတူ အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်၊ ကုလသမဂ္ဂမြန်မာသံအမတ်ကြီး ဦးကျော်မိုးထွန်း၊ ကရင်အမျိုးသားအစည်းအရုံး KNU၊ အမျိုးသားညီညွတ်ရေးအတိုင်ပင်ခံကောင်စီ NUCC နဲ့ နိုင်ငံတကာ အဖွဲ့အစည်းများ တက်ရောက် ဆွေးနွေးခဲ့ကြပါတယ်။

#Oway #UYSU #ABFSU #Thailand #Parliament #ရတကသ #ဗကသ #ထိုင်း #လွှတ်တော် #မြန်မာ့အရေး #ဆွေးနွေး

ဒီပရင်္ဂ

⬛ ကြည်မောင်သန်း

ပုံပြင်ထဲက မြို့လည်း မဟုတ်
ဒဏ္ဍာရီထဲက မြို့လည်း မဟုတ်
ရာဇဝင်ထဲက မြို့တစ်မြို့
ပုဂံခေတ် ကတည်းကရှိတဲ့ မြို့တစ်မြို့
လွန်ခဲ့တဲ့ နှစ်ပေါင်း ၇၀၀ ကျော် ကတည်းကရှိတဲ့ မြို့တစ်မြို့
သမိုင်းဝင် မြို့တစ်မြို့ ။

ဒီမြို့ကို ကတူးလူမျိုးတွေ တည်ထောင်ခဲ့တယ်
အလောင်းစည်သူမင်း
တိုင်းခန်းလှည့်လည်ရင်း
မြောက်ဘက်အရပ်အရောက်
အရှေ့ဘက်က နတ်တွေ ဆိတ်ယောင်ဆောင်
ရေသောက်မယ့်ဟန် မြည်သံပေးတာကို အစွဲပြုလို့
ဒီမြို့ ဒီနာမည် တွင်ခဲ့ရ ။

အရှေ့မှာ ဧရာဝတီ
အနောက်မှာ ချင်းတွင်း
မနီးမဝေးမှာ မူးမြစ်နဲ့
စိုက်ပျိုးရေး လုပ်ငန်းတွေ ဖြစ်ထွန်းခဲ့တယ် ။
သာသနိက အဆောက်အအုံတွေ ပေါများ
ရဟန်းပညာရှိ လူပညာရှိတွေ ထွန်းကား
တခြားမြို့တွေနဲ့ စီးပွားကူးသန်း သွားလာဖို့ လွယ်ကူ
ဘိုးတော်ဘုရားလက်ထက် စစ်တမ်းတွေအရ
အစည်ကားဆုံးမြို့ ၁၂ မြို့ထဲက မြို့တစ်မြို့ ။

အလောင်းဘုရား လက်ထက်မှာ
အိမ်ရှေ့စံ နောင်တော်ကြီး ဒီမြို့ကို စားရ
ဘိုးတော်ဘုရား လက်ထက်မှာ စစ်သူကြီး မဟာဗန္ဓုလ
နေမျိုးသူရ ရဲခေါင်ဘွဲ့နဲ့ ဒီမြို့ရဲ့ မြို့ဝန် ။
ဘုံခန်းပျို့ဆရာ အရှင်အဂ္ဂသမာဓိ
စစ်သူကြီး မဟာဗန္ဓုလ မုံတိုင်ပင် အရှင်ဝံသ
အတုလ ဆရာတော် အရှင်ယသ
မြသိန်းတန် ဆရာတော် အရှင်ဇိန
အယူတော် မင်္ဂလာ ဦးနိုး
လယ်တီဆရာတော်
ဒါ ဒီမြို့သား ပုဂ္ဂိုလ်ကျော်တွေ

ဒီမြို့မှာ
မင်းတုန်းမင်းကို ပုန်ကန်ခြားနားတဲ့
ပတိမ်းမင်းသား ခိုလှုံခဲ့ဖူးတယ်
ဒီမြို့ကနေ
ကောက်ကျစ်ယုတ်မာတဲ့ မြို့ဝန် ဦးမှန်း
အောက်ပြည်ကို ထွက်ပြေးခဲ့ရတယ်
ဒီလိုနဲ့
ဒီမြို့မှာ
သူရဲကောင်းတွေ ပျောက်ဆုံးခဲ့ရတယ်
ဒီမြို့မှာ
သစ္စာဖောက်တွေ အတောင်ပေါက်ခဲ့ကြတယ်
ဒီမြို့မှာ
လူငယ်လေးတစ်ယောက်
သူ့ဆိုင်ကယ် ကျပျောက်ခဲ့ရတယ်
ဒီမြို့မှာ
အမျိုးသမီးတစ်ယောက်
သေကံမရောက် သက်မပျောက် ဖြစ်ခဲ့ရတယ်
ဒီမြို့မှာ
အံကြိတ်ရ တက်ခေါက်ရတဲ့
အဖြစ်အပျက်တွေ ရှိခဲ့တယ် ။

တစ်နေ့တော့
မိုးနည်းတဲ့ ဒီဒေသ
ဆောင်းတွင်း အခါသမယမှာ
မိုးရွာဖို့ မဆိုထားနဲ့
မိုးအုံ့ဖို့တောင် အကြောင်းမရှိ
ရုတ်တရက် မိုးကြီး ရွာချလိုက်တယ်
ဆင်ခြေရာတွေတောင်
တိမ်ကောပပျောက်သွားအောင် ရွာတဲ့မိုးမို့
အညာအခေါ်
ဆင်ရာတိမ်မိုးတဲ့လေ ။

မုံရွာ - ရေဦးလမ်းကို ဖြတ်သန်းရင်း
ဒီမြို့ကို ကားပေါ်က လှမ်းကြည့်မိတဲ့အခါ
အတိတ်တစ္ဆေက ငါ့ကို ခြောက်လှန့်နေလေရဲ့ ။ ။

⬛ ကြည်မောင်သန်း
ချယ်ရီမဂ္ဂဇင်း၊ ၂၀၀၈ ။

၂၀၀၃ ခုနှစ်၊ မေလ ၃၀ ရက်နေ့မှာ စစ်အုပ်စုဟာ ဒီပဲယင်းကျေးရွာမှာ နိုင်ငံတော်လုပ်ကြံမှုကြီးတရပ်ကို ပြောင်ပြောင်တင်းတင်း ကျူးလွန်ခဲ့ပါတယ်။ဒေါ်အောင်ဆန်းစုကြည်နဲ့ ဦးတင်ဦးတို့က ဒီလုပ်ကြံမှုကြီးကနေ ကံကောင်းထောက်မစွာ လွတ်မြောက်ခဲ့ပေမယ့် ပြည်သူအမြောက်အများ သေကြေဒဏ်ရာရခဲ့ကြပါတယ်။ နဝတ၊ နအဖ စစ်အုပ်စုကလည်း သူတို့ရဲ့ သမိုင်းအမည်းစက်ကြီးကို မှေးမှိန်အောင် ဖုံးဖိဖျောက်ဖျက်ခဲ့ကြတယ်။

ထိုခေတ်ကာလ စာပေစီစစ်ရေး တင်းကြပ်ထားတဲ့အချိန်မှာတောင် ကဗျာဆရာလှသန်းဟာ ကြည်မောင်သန်း ကလောင်အမည်ခံပြီး ၂၀၀၈ ခုနှစ်၊ ဇွန်လထုတ် ချယ်ရီ မဂ္ဂဇင်းမှာ ဒီဖြစ်ရပ်ဆိုးကြီးအကြောင်းကို "ဒီပရင်္ဂ"ကဗျာနဲ့ ရေးသားထုတ်ဖော်ပြောဆိုခဲ့ပါတယ်။

#‌Oway #ABFSU #UYSU #ဒီပဲယင်း #ဒီပဲယင်းလုပ်ကြံမှု #လှသန်း

ပြန်ဆုံကြဦးမလား
______

တွင်းနက်နက်ထဲ ခုန်ချသွားတဲ့ကောင်လို့
ရယ်ရယ်မောမော မင်းတို့လှမ်းပြောတော့
ငါ့မှာ ရယ်ရယ်မောမော
ခေတ်ကြီးကိုက ရယ်စရာ မောစရာကြီးလေ

မင်း ပြန်မလာတော့ဘူးလား
ပြန်မလာတော့ဘူးလား

ကျဆိမ့်တခွက်က တရားမဖြစ်မှန်းသိမှတော့
လမ်းထိပ်ကဆိုင်ကလေးနဲ့ ဝေးခဲ့ရ

ချစ်ခြင်းဖြင့် စစ်ခင်းကြမယ်ကွယ်
ငါတို့ခေတ်ကို ငါတို့နင့်နေအောင်ချစ်ကြ

အိုပျက်နေတဲ့ခေတ်ကြီးကို ငါတို့ဖြိုဖျက်ပစ်ဖို့
အင်တာနေရှင်နယ်သီချင်းကို ငါတို့ကြူးဟစ်လို့

ငါပြန်မလာတော့ဘူး
ငါ့ကောင်
ငါပြန်မလာတော့ဘူး။ ။

◾️ ရဲဘော်ထွန်းနိုင်

(ဒီကဗျာက ရဲဘော်ထွန်းနိုင်ရဲ့ ဖုန်းမှတ်စုထဲကနေ တွေ့ရတဲ့ သူ့ခံစားမှု အပိုင်းအစ တချို့ပါ)

ရဲဘော်ထွန်းနိုင် (ခ) ကိုအောင်သူရ ဟာ မြင်းခြံနည်းပညာတက္ကသိုလ်ကျောင်းသားများသမဂ္ဂ (ဗကသများအဖွဲ့ချုပ်) ရဲ့ ကျောင်းသားထုအခွင့်အရေးတာဝန်ခံ(ဟောင်း) ဖြစ်ပြီး ပြည်သူ့လွတ်မြောက်ရေးတပ်မတော် PLA အနောက်မြောက်စစ်ဒေသရဲ့ ပါတီကလာပ်စီး အဖွဲ့ဝင်၊ အမှတ် ၈၁၅ PLA တပ်ဖွဲ့မှာ နိုင်ငံရေးမှူးအဖြစ် တာဝန်ထမ်းဆောင်ခဲ့သူဖြစ်ပါတယ်။ ရဲဘော်ထွန်းနိုင် (ခ) ကိုအောင်သူရ ဟာ စစ်အာဏာရှင်စနစ်ကို လက်နက်ကိုင်တော်လှန်ရင်း ၂၀၂၄ ခုနှစ် မေလ ၂၆ ရက်နေ့ မနက်ပိုင်းက ပခုက္ကူမြို့နယ် ဖလံအိုကျေးရွာတိုက်ပွဲမှာ မြင့်မြတ်ဂုဏ်ပြောင်စွာ အသက်ပေးတိုက်ပွဲဝင်သွားခဲ့ပါတယ်။

#Oway #ABFSU #ရဲဘော်ထွန်းနိုင် #ကိုအောင်သူရ

ဘယ်လိုလူအုပ်စုတွေ/လူပုဂ္ဂိုလ်တွေ/အဖွဲ့အစည်းမျိုးတွေ အပေါ်မှာပဲ ဒီလိုမျိုး စဉ်းစားဆုံးဖြတ်ဖို့ ‘သင့်တော်’ တယ် ဆိုတဲ့ အဘောင်အကန့်တရပ်ဟာ ရှိနှင့်နေပြီးသား မဟုတ်ပါလား။ ပြီးတော့၊ အဲ့ဒီလို ‘အဘောင်အကန့်’ တရပ်ရှိနှင့်နေပြီးသားဖြစ်တယ် ဆိုတဲ့အဓိပ္ပာယ်က “အုပ်ချုပ်ခွင့်ရှိသူအတန်းအစားတရပ်ရပ်ရဲ့ ကြိုတင်တည်ရှိမှုကို လူတွေဟာ လိုလိုလားလား မကြွင်းမကျန် လက်သင့်ခံထားကြရမယ်၊ လူတွေဟာ လိုလိုလားလား မကြွင်းမကျန် အုပ်ချုပ်ခံကြရဖို့ အသင့်ဖြစ်နေရမယ်” ‌ဆိုတဲ့ ချုပ်နှောင်ကျွန်ပြုရေး အတွေးအမြင်တမျိုးသာလျှင်မဟုတ်ပါလား။

ဒီတော့ “ဘယ်သူတွေက အုပ်ချုပ်ဖို့ ‘သင့်တော်’ ကြသလဲ?” ဆိုတဲ့ မေးခွန်း၊ အဲ့ဒီမေးခွန်းတလျောက် အဖြေထုတ်ဖို့ကြိုးပမ်းကြတဲ့ စဉ်းစားချက်တွေ၊ အဲ့ဒီမေးခွန်းကို ဗဟိုပြုပြီး လည်ပတ်ကြတဲ့ ဟောပြောပို့ချချက်တွေနဲ့ ရေးသားချက်‌တွေ၊ အဲ့ဒီမေးခွန်းကို အခြေပြုပြီး သူတို့ရဲ့ လေ့လာမှုရပ်ဝန်းတစုံလုံးကို ဖွင့်ဆိုထားကြတဲ့ ပညာရပ်နယ်ပယ်‌တွေ၊ ဒီအရာတွေအားလုံးဟာ အလွန်တရာမှ တသီးတသန့်ဖြစ်တဲ့ နောက်ခံတိမ်းညွှတ်မှုတရပ်ရဲ့ လက်တံတွေသာလျှင်ဖြစ်ကြောင်းကို မလွဲမသွေကောက်ချက်ချကြရမှာပဲဖြစ်တယ်။ အဲ့ဒီတိမ်းညွှတ်မှုဟာ အရိုးရှင်းဆုံးအနေနဲ့ ဖော်ပြရရင် ‘လိုလိုလားလား အုပ်ချုပ်ခံရဖို့နဲ့ အုပ်ချုပ်ပေးဖို့/ လိုလိုလားလား ဗိုလ်ကျကြီးစိုးခံရဖို့ နဲ့ ဗိုလ်ကျကြီးစိုး‌ပေးဖို့’ ဆိုတာကလွဲလို့ အခြားမဟုတ်နိုင်ပါ။ အဲ့ဒီတိမ်းညွှတ်မှုဟာ “အုပ်ချုပ်ခွင့်ရှိသူအတန်းအစားတရပ်ရပ်ရဲ့ ကြိုတင်တည်ရှိမှုကို လူတွေဟာ လိုလိုလားလား မကြွင်းမကျန် လက်သင့်ခံထားကြရမယ်၊ လူတွေဟာ လိုလိုလားလား မကြွင်းမကျန် အုပ်ချုပ်ခံကြရဖို့ အသင့်ဖြစ်နေရမယ်” ဆိုတာကို သင်ကြားပို့ချသလို ဒီလိုသင်ကြားပို့ချတာနဲ့အညီ သူ့ရဲ့ နိုင်ငံရေးစဉ်းစားတွေးခေါ်ချက်တွေဆိုတာတွေ ဟာလည်း “ဆိုးယုတ်သူတွေအစား ကောင်းမြတ်မှန်ကန်သူတွေသာ စီမံအုပ်ချုပ်ကြရင် လူ့အဖွဲ့အစည်းဟာ ကောင်းမြတ်မှန်ကန်နေမှာပဲ” ဆိုတဲ့အတွေးနဲ့ “ကောင်းမြတ်မှန်ကန်သောအုပ်ချုပ်သူတွေကို လူ့အဖွဲ့အစည်းတရပ်လုံးဟာ လိုလိုလားလားပင့်မြှောက်ကြရမယ်၊ ဒီလို လိုလိုလားလားပင့်မြှောက်ခြင်းဟာလည်း အားလုံးရဲ့ တာဝန်ဖြစ်တယ်” ဆိုတဲ့ နိုင်ငံတော်ဝါဒမျိုးထက် မပိုပါဘူး။ ဒီတော့ “ဘယ်သူတွေက အုပ်ချုပ်ဖို့ ‘သင့်တော်’ ကြသလဲ?” ဆိုတဲ့ မေးခွန်း၊ ပြီး‌တော့ ၎င်းမေးခွန်းရဲ့ နောက်ခံတိမ်းညွှတ်မှုနဲ့ နောက်ခံအယူအဆ အလုံးစုံကို ပြန်လည်ချေဖျက်မေးခွန်းထုတ်စေတဲ့အနေနဲ့ ကျနော်က ဒီနေရာမှာ အဖြေတခုထုတ်ပြလိုက်ပါတယ်။

“ဘယ်သူတွေက အုပ်ချုပ်ဖို့ ‘သင့်တော်’ ကြသလဲ?”

“ဘယ်သူမှ အုပ်ချုပ်ဖို့ ‘မသင့်‌တော်’ နေပါဘူး။”

⬛ အောင်ဖုန်းမော်

#Oway0307 #Oway #ABFSU #OwayArticle