#قصص_الأنبياء(٢)
#السيرة_النبوية
#الحلقة_الثالثة_والأربعون
#بيعة_العقبة_الثانية

اتكلمنا المرة إللي فاتت عن إسلام أُسَيد بن حضير وسعد بن معاذ وشفنا إزاي في خلال سنة واحدة انتشر الإسلام في يثرب،
ووقفنا عند وفد المسلمين إللي جاء لمكة عشان يقابل رسول الله ﷺ عشان ينصروه ويدعوه إنه يروح معاهم ليثرب،
وقلنا إنهم كانوا ثلاثة وسبعين رجلا وامرأتين،
بدأ الترتيب بين رسول الله ﷺ ووفد المسلمين من يثرب، هو محتاج يقابل الخمسة وسبعين كلهم،
يعني مينفعش يقابل نصهم مثلا لأنهم وإن كانوا من قبيلتين إللي هم الأوس والخزرج،
إلا إن القبيلتين فيهم بطون كثيرة، يعني عائلات وفروع كثيرة، وممكن ناس توافق على الشروط وناس لأ🤷‍♀️
فهيكون الموقف إيه لو رسول الله ﷺ راح يثرب واكتشف إنهم مش أد المسؤولية أو فيهم ناس معترضة على الإتفاق إللي حصل بينه وبين بعضهم😶
فلازم رسول الله ﷺ يقابلهم كلهم ويطمن بنفسه إن كلهم موافقين على الإتفاق إللي هيتم،
رسول الله ﷺ بيحسب كل خطوة بمنتهى الدقة👌
مينفعش في المرحلة دي يكون في أي خطأ لأن احنا بنحط أساس لقيام دولة الإسلام،
وانتم عارفين إن أهم حاجة في أي بناء هو الأساس💁‍♀️
عشان كده ربنا جعل للإنسان بالذات اثنا عشرة سنة على الأقل قبل البلوغ ليس عليه حساب ،
عشان يتأسس صح ويقدر يؤدي تكاليفه ومسؤولياته بعد مرحلة البلوغ😉

طيب العدد كبير ومكة صغيرة هيتقابل معاهم إزاي وفين من غير ما أي أحد يعرف، احنا محتاجين السرية التامة زي ما قلنا المرة إللي فاتت🤔
شوفوا عبقرية رسول الله ﷺ وتخطيطه الدقيق عشان نتعلم منه👌

♡أولا:
اختار رسول الله ﷺ إن الميعاد يكون في ليلة ثلاثة عشر يعني آخر ليلة في موسم الحج،
لأن ثاني يوم الحجاج هيرجعوا لبلادهم، فلو أحد من قريش عرف أي حاجة عن اللقاء ده، مش هيقدروا يوصلوا للوفد إلا بعد ما يكونوا مشيوا💁‍♀️

♡ثانيا:
رسول الله ﷺ خلى ميعاد اللقاء في الثلث الأوسط من الليل، لأن في الغالب كل الناس هتبقى نايمة في الوقت ده👌

♡ثالثا:
بالنسبة للمكان ، اختار رسول الله ﷺ مكان بعيد عن زحمة الحجاج ومفيش حد من الحجاج حاطط خيام فيه، اختار الشِّعب الأيمن من العقبة😉

♡رابعا:
رسول الله ﷺ مقلش لأحد من المسلمين على اللقاء ده😮
يعني محدش عرف نهائي غير ثلاثة فقط،
العباس عم رسول الله ﷺ وكان في الوقت ده مشرك ولكن كان هيشارك في الإجتماع،
وأبو بكر الصديق وعلي بن أبي طالب عشان يراقبوا مكان الإجتماع👌
ورسول الله ﷺ أخفى على المسلمين مش عشان هو شاكك فيهم أو بيخونهم، لأ...لكنه عايز اللقاء يكون في سرية تامة،
فاللي ملوش علاقة بالموضوع يعرف ليه🤷‍♀️

☆وده يعلمنا إننا منزعلش لما حد يخبي علينا حاجة متخصناش أو مفيش فايدة في معرفتها😉
يعني لما المسلمين هيعرفوا بعدين باللقاء إللي حصل، مفيش حد هيقول لرسول الله ﷺ إنت ليه مقلتناش يا رسول الله،
هو احنا يعني هنفشي سرك ولا هنقول لحد😑
مش كان لازم تعرفنا مش احنا برده في مركب واحدة ولازم نكون عارفين كل حاجة😤
بالعكس محدش اعترض لأن مش كل حاجة لازم يعرفوها وهم عارفين إن رسول الله ﷺ مش هيعمل حاجة إلا وهي في مصحلة الإسلام والمسلمين 👌

ورسول الله ﷺ قال للوفد إللي هيقابله ياخدوا بالهم وينتبهوا هم كمان عشان محدش من الناس المشركين إللي معاهم يحس بيهم🤫
عمل إيه الوفد😅
بيحكي كعب بن مالك وهو واحد من الوفد المسلم بيقول:
احنا نمنا مع قومنا عادي في المكان المخصص بتاعنا،
ولما ميعاد اللقاء قرب،
كل واحد بدأ يتسلل...يتسحّبوا يعني واحد وراء التاني لحد ماتجمعوا في المكان إللي اتفقوا عليه😁

اجتمع الوفد وجاء رسول الله ﷺ ومعاه العباس وأبو بكر الصديق وعلي بن أبي طالب في الميعاد المحدد وبدأ الإجتماع إللي هيغير خريطة الأرض كلها🙊

طبعا السؤال المُحير هنا هو إزاي رسول الله ﷺ يجيب معاه واحد مشرك في اجتماع مهم زي ده😳

قلت لكم إن رسول الله ﷺ مش بياخد أي خطوة إلا بحساب👌
العباس بن عبد المطلب له دور سياسي مهم، المسلمين من يثرب هدفهم إنهم يأخذوا رسول الله ﷺ،
فلازم يعرفوا إن رسول الله ﷺ له قبيلة ذات شرف، فهم لما يأخذوه عندهم لازم يكونوا هم البديل للقبيلة دي💁‍♀️

¤ممكن حد يقول طيب ما كان يأخذ حمزة ماهو عمه وبرده مسلم🤔
ماهو لو كان أخذ حمزة رضي الله عنه كان هيترسخ في ذهن الوفد إن حمزة جاء عشان هو مؤمن مش عشان بيمثل بني هاشم،
لكن لأن العباس مشرك فده بيوصل لهم معلومة وهي إن بني هاشم مؤمنهم وكافرهم مع رسول الله ﷺ👌
وخلونا نشوف كلام العباس لوفد المسلمين من يثرب 😉
قال العباس :
يا معشر الخزرج!
=العرب كانت بتسمي أهل يثرب كلهم من الأوس والخزرج خزرجا=
مكانة محمد فينا زي ما إنتم عارفين، واحنا دافعنا عنه ضد قومنا، فهو عزيز في قومه ومنيع في بلده، لكنه هو إللي مصمم إنه يسيبنا ويروح عندكم🤷‍♂️
فلو إنتم شايفين إنكم هتقدروا توفُّوا إللي وعدتوه به وتحموه من إللي يخالفه، خلاص إنتم حرين،
لكن لو إنتم هتتخلوا عنه بعدين فسيبوه من دلوقتي، فهو في عزة ومنعة م

#قصص_الأنبياء(٢)
#السيرة_النبوية
#الحلقة_الرابعة_والأربعون
#هجرة_المسلمين_ليثرب

وقفنا المرة إللي فاتت عند رسول الله ﷺ لما كان قاعد مع وفد المسلمين من يثرب، وشفنا البيعة إللي حصلت،
واختار الوفد المسلم من بينهم اثنا عشر رجلا عشان يكونوا مسؤولين عن كل الوفد ويمثلوا كل المسلمين إللي في يثرب،
وقال لهم رسول الله ﷺ :
إنتم المسؤولين قصادي عن كل المسلمين في يثرب، وأنا المسؤول على المسلمين من أهل مكة،
فقالوا : ماشي اتفقنا 🤝
وطلب رسول الله ﷺ من الاثنا عشر رجل إنهم يختاروا واحد منهم يكون رئيسهم عشان التواصل والمتابعة يبقى سهل😉
رسول الله ﷺ مش بس بيعلمنا إزاي نخطط ونرتب وناخد بالأسباب ، ده كمان بيعلمنا فن الإدارة وتنظيم الأمور،
مش كل حاجة سايحة على بعض😅
كل واحد له مسؤولية محددة 👌
اختاروا أسعد بن زرارة يكون هو رئيسهم😁
وبعد ما خلاص اتفقوا وكل حاجة تمام ، سمعوا صرخة عظيمة جدا، صوت عالي جدا بيقول:
يا أهل الجَبَاجِب، هل لكم في مُذَمّمٍ والصُّبَاةُ معه قد أجمعوا على حربكم😲
يعني يا أهل المنازل أو يا أهل الخيام، يقصد أهل مكة،
إلحقوا مذمم اجتمع مع الصابئين إللي غيروا دينهم عشان يحاربوكم،
ومذمم يقصد به رسول الله ﷺ لأنهم غيروا اسمه من محمد لمُذَمّمٍ، نوع من أنواع الأذى إللي كان بيتعرض له رسول الله ﷺ، حتى كان من أدب رسول الله ﷺ ونظرته الإيجابية للموضوع، كان يقول :
شوفوا ربنا بيصرف عني أذى قريش إزاي، بيدعوا على مذمم وبيشتموا مذمم وأنا محمد😊
فرسول الله ﷺ لما سمع الصرخة قال :
هذا شيطان العقبة، اسمع عدو الله، أما والله لأَفْرُغَنّ لك👌
يعني اصبر عليّ بس أما أفضالك👌
فتوجه للوفد المسلم وقال لهم :
ارجعوا للخِيم بتاعتكم، قبل ما أحد من المشركين ييجي👌
المفروض دلوقتي إن الوفد المسلم يروح بسرعة قبل ما المشركين ييجوا،
لكن الوضع كان مختلف🙊
قام واحد من الوفد اسمه العباس بن عبادة وقال لرسول الله ﷺ :
والله يا رسول الله لو عايز نحارب أهل مِنَى كلهم دلوقتي 👌
خدوا بالكم إن الإتفاق كان إن المسلمين في يثرب ينصروا رسول الله ﷺ ويدافعوا عنه ويجاهدوا معاه لما يروح عندهم يثرب،
فهم دلوقتي بيعطوا رسول الله ﷺ أكثر من البيعة ومن إللي اتفقوا عليه، لأن إللي عايز الجنة بيبذل أي حاجة مهما كانت عشان يوصل لها،
يعني كأنهم بيقولوا بالدليل العملي يارسول الله ده أول إثبات مننا على صدق بيعتنا 🤚

لكن رسول الله ﷺ قال لهم : أنا لم أؤمر بكده، يعني مجاليش الأمر من ربنا إني أقاتل أهل الحج👌
أيوة إنتم بايعتم وكل حاجة لكن مش ده وقت التطبيق
والحكمة فعلا إن ميكونش أي مواجهة دلوقتي بين الوفد وبين أهل مكة،
لأنهم هيُبادوا كلهم😶
حلو أوي إنهم يموتوا كلهم شهداء، لكن فين الدولة إللي احنا عمالين نخطط لبنائها، فين بناء الأمة الإسلامية إللي هتنشر الدين في كل الدنيا😕
يبقى الصح إننا ننسحب دلوقتي ونتجنب المواجهة ، لحد ما نبقى أقوى وييجي الوقت المناسب للمواجهة 👌

سمع الوفد الإسلامي كلام رسول الله ﷺ ورجعوا للخيام بتاعتهم وباتوا مع باقي الوفد المشرك إللي هم أتوا معاهم،
تاني يوم جاء كفار مكة لرئيس وفد الحج إللي جاء من يثرب وكان مشرك واسمه :《عبد الله بن أُبَيّ بن سَلُول》

☆ من أكثر الشخصيات إللي بكرهها جدا 😑
خليكم فاكرين اسمه عشان هيكون له دور في أحداث رهيبة هتحصل بعدين👌

المهم قعدوا معاه وقالوا له بأسلوب في ترغيب وترهيب:
يا معشر الخزرج !
احنا وصل لنا إنكم قعدتم مع صاحبنا ده، عشان عايزين تطلعوه برة مكة وتبايعوه على حربنا😒
وأنتم أكثر ناس منحبش إن يكون في بينا وبينهم حرب،
لكن لو استمريتم على الوضع ده هنحاربكم، وإنتم عارفين كويس أوي مين هي قريش😈

فعبد الله بن أبي بن سلول قال لهم بكل انفعال:
الكلام ده مش صحيح، عمر ما حاجة زي كده تحصل من غير ما يستشيروني، ده أنا حتى لو في يثرب مش هياخدوا قرار زي ده إلا لما يسألوني😲
هو فعلا صادق لأنه ميعرفش إللي حصل بين الوفد المسلم وبين رسول الله ﷺ، وهو بيتكلم بكل ثقة لأن الأوس والخزرج كانوا شبه متفقين إن إللي هيحكم يثرب عبد الله بن أبي سلول،
لأن يثرب مكنش لها رئيس، لكنهم اتفقوا على الرجل ده بس لسه الموضوع مش رسمي،
فهو عمال يدافع والمسلمين قاعدين ساكتين يبصوا لبعض ولا كأنهم عملوا حاجة🤭

المشركين من أهل مكة اقتنعوا بكلام عبد الله بن أبي بن سلول ومشيوا، وبعدها كانوا لموا حاجتهم وخلاص مشيوا راجعين ليثرب،
لما كفار قريش رجعوا داخل مكة، عرفوا إن فعلا حصل لقاء بين الوفد من أهل يثرب وبين رسول الله ﷺ، عرفوا منين وإزاي،
ممكن من صوت الشيطان إللي سمعوه أو حد شاف الوفد وهم بيتسللوا،
المهم إنهم عرفوا وخلاص، فراحوا راجعين للوفد تاني لقوهم مشيوا لأنه كان آخر يوم في الحج،
ودي حاجة رسول الله ﷺ كان عامل حسابه فيها👌
حاولوا يلحقوهم وطاردوهم فعلا لحد ما لحقوا اثنين المنذر بن عمرو وسعد بن عبادة وكانا مسلمين، وكمان من النقباء الاثنا عشر🙊
المنذر بن عمرو قدر يهرب، سعد بن ع

#قصص_الأنبياء(٢)
#السيرة_النبوية
#الحلقة_الخامسة_والأربعون
#قصص_القرآن
#أصحاب_الجنة
#لقمان

وقفنا المرة إللي عند رسول الله ﷺ وهو بيجهز لهجرته ليثرب،
لكن قبل ما نسيب مكة مع رسول الله ﷺ ونهاجر ليثرب محتاجين نعرف قصتين من قصص القرآن نزلت في مكة خلال الثلاثة عشرة سنة إللي عاشاها رسول الله ﷺ بعد البعثة😊

◇القصة الأولى قصة أصحاب الجنة،
ربنا أنزل آيات في سورة القلم في بداية الدعوة بيحكي لرسول الله وللمسلمين ولكفار قريش قصة رجل صالح من أهل الكتاب وأبنائه الخمسة في الزمن إللي فات،
عشان يضرب لهم المثل ويقول لهم عاقبة إللي بيكفر نعمة ربنا هتكون إيه👌
كان في رجل صالح عنده جنة، يعني حديقة كبيرة جدا مليانة أنواع الشجر والنخيل والثمار ،يُقال إن الجنة دي كان في مدينة من مدن اليمن،
الرجل الصالح ده كان من عادته إنه يقسم الثمار أو المحصول ثلاثة أقسام، قسم بياخده لبيته وأولاده،
وقسم بيوزعه على الفقراء والمساكين، وقسم بيرجعه الأرض تاني عشان يعيد إنتاجه،
وكان ربنا مُبارِك له بسبب صدقته على الفقراء والمساكين،
عياله مكنش عاجبهم الموضوع، بالنسبة لهم أبوهم ده رجل بيضيع فلوسه وإنهم أوْلى بالثمار إللي أبوهم بيوزعها عالناس دي،
المفروض يُؤَمن مستقبلنا احنا، حد عارف المستقبل فيه إيه😤
ماعدا واحد فيهم كان شايف إن إللي أبوه بيعمله هو الصح، وإن الرزق والنعم إللي هم فيها دي بسبب بركة ربنا لهم في البستان بتاعهم،
عدت السنين ومرض أبوهم ومات وورث الأبناء الخمسة البستان، وكان في السنة إللي أبوهم مات فيها دي محصول البستان بتاعهم كثير جدا أكثر من أي سنة فطمعوا
و قالوا:
أبونا ده كان رجل أحمق ، يعني مش بيعرف يدبر أموره،
بيصرف على الفقراء من أموالنا دي😑
فاحنا بقى مش هنعطي لأي أحد حاجة من الثمار دي وهنوفر ونعيش مرتاحين😈
فأخوهم الأوسط قال لهم:
بلاش تعملوا كده، خليكم زي ما كان أبونا بيعمل، الثمر إللي إنتم شايفينه ده بسبب بركة ربنا😥
طبعا مسمعوش الكلام🙃
اتفقوا مع بعض وأقسموا من غير ما يقولوا إن شاء الله ،
إنهم هيصحوا الصبح بدري في أواخر الليل كده عشان يجمعوا الثمار قبل ما أي أحد من الفقراء والمساكين ييجي ومش هيستثنوا ولا واحد من الناس دي👌
"إِنَّا بَلَوْنَاهُمْ كَمَا بَلَوْنَا أَصْحَابَ الْجَنَّةِ إِذْ أَقْسَمُوا لَيَصْرِمُنَّهَا مُصْبِحِينَ"

ده كان تدبيرهم وتخطيطهم، لكن رب العالمين يعلم بكل شيء، فأرسل على البستان بتاعهم عذاب من السماء، يقال إن العذاب ده كان نار أحرقت كل البستان لحد ما بقى أسود فحمة وكل ده وهم نايمين ميعرفوش حاجة😶
"فَطَافَ عَلَيْهَا طَائِفٌ مِنْ رَبِّكَ وَهُمْ نَائِمُونَ* فَأَصْبَحَتْ كَالصَّرِيمِ"

كانوا عايزين يمعنوا حق ربنا في الفقراء والمساكين عشان يحوّشوا ويزودوا دخلهم ونسيوا إن ربنا هو إللي بيرزق،
وإن الثمار دي لولا إن ربنا أذن إنها تخرج مكنتش خرجت،
فعاقبهم الله بعكس إللي كانوا بيخططوا له،
يعني مش بس مفيش حاجة تحوشوها، لأ...ده حتى الجزء إللي كنتم بتاخدوه كل سنة مش هتاخدوا منه ثمرة 👌
"وَكَذَلِكَ أَخْذُ رَبِّكَ إِذَا أَخَذَ الْقُرَى وَهِيَ ظَالِمَةٌ إِنَّ أَخْذَهُ أَلِيمٌ شَدِيدٌ "

صحيوا الصبح ...يلا يا جماعة بسرعة نروح قبل ما أحد ييجي لو إنتم فعلا جادين في كلامكم بتاع امبارح😤
" فَتَنَادَوْا مُصْبِحِينَ * أَنِ اغْدُوا عَلَى حَرْثِكُمْ إِنْ كُنْتُمْ صَارِمِينَ"
مشيوا براحة ومن غير ما يعملوا أي صوت عشان محدش يحس بيهم من الفقراء وييجي يطلب منهم الصدقة🤫
"فَانْطَلَقُوا وَهُمْ يَتَخَافَتُونَ * أَنْ لَا يَدْخُلَنَّهَا الْيَوْمَ عَلَيْكُمْ مِسْكِينٌ * وَغَدَوْا عَلَى حَرْدٍ قَادِرِينَ"

أول ما وصلوا البستان لقوها عبارة عن سواد كل حاجة محروقة 😳
قالوا إيه ده...احنا تهنا ولا إيه😅
"فَلَمَّا رَأَوْهَا قَالُوا إِنَّا لَضَالُّونَ"
فلما اتأكدوا إن إن فعلا ده البستان بتاعهم عرفوا إن ربنا غضب عليهم وعاقبهم بسبب نيتهم الخبيثة بمنع حق الفقراء،
"بَلْ نَحْنُ مَحْرُومُونَ"

☆ممكن حد يسأل سؤال ويقول طيب هم أصلا لسه معملوش الغلط، يعني المفروض ربنا يعاقبهم لما يحصل منهم الخطأ مش قبلها،
لأن إللي بينوي عمل سيئة ومعملهاش ربنا مش بيكتبها عليه، فليه بقى ربنا عاقبهم على ذنب لسه محصلش😕

لما تكون نية عمل السيئة مجرد خاطرة جت على بال الإنسان، أو إنه هيعملها بس تذكر ربنا فخاف ورجع عنها،
هنا ربنا لا يعاقبه ولا تُكتب له سيئة💁‍♀️
لكن الإنسان إللي مخطط ومصمم وعاقد النية ومرتب أموره إنه يعمل المعصية تكتب له سيئة وربنا يعاقبه عليه حتى قبل ما ينفذها،
يعني باختصار يأثم الإنسان إذا وصل لمرحلة العزم والتصميم حتى لو مكنش لسه عمل المعصية👌

هنا تكلم أخوهم الأوسط وكان قد خرج معهم لعله يقول لهم كلمة تنفعهم ويرجعوا عن إللي في دماغهم، قال لهم:
مش أنا حذرتكم ومسمعتوش كلامي😓
"قَالَ أَوْسَطُهُمْ أَلَمْ أَقُلْ لَكُمْ لَوْلَا تُسَبِّحُونَ"

قالوا : فعلا كان معاك حق احنا ظلمنا ن

#قصص_الأنبياء(٢)
#السيرة_النبوية
#الحلقة_السادسة_والأربعون
#بداية_هجرة_رسول_الله

اتكلمنا عن بيعة العقبة الثانية وإزاي الأنصار بدأوا يُهيؤوا يثرب لاستقبال رسول الله ﷺ و المسلمين إللي هيهاجروا، وشوفنا فعلا أعداد من الصحابة هاجروا ليثرب ، وكان لما المسلمين بيوصلوا ليثرب كان بيستقبلهم الأنصار ويضيفوهم ويراعوهم ،
كل واحد ياخد إللي يقدر عليه من المسلمين المهاجرين من مكة، إللي ياخد له رجل وإللي ياخد له اثنين، كل واحد وإللي يقدر عليه😊

كل يوم قريش تصحى الصبح يلاقوا واحد منهم اختفى، يلاقوا عيلة كاملة اختفت، الناس دي بتروح فين😳
هم كانوا عارفين من موسم الحج إن أهل يثرب لهم علاقة بالموضوع، لكنهم مش متأكدين أوي ومش فاهمين إيه إللي بيحصل بالضبط😕
فبدأت تأتي لهم أخبار من يثرب من معارف لهم هناك إن المسلمين بيهاجروا إلى يثرب،
فالموضوع ده عمل لهم قلق، المسلمين بدأ يكون لهم مكان هيستقروا ويتجمعوا فيه،
وده إللي قريش مش عايزاه نهائي لأن الموضوع ده له مخاطر كبيرة بالنسبة لهم🙊
خلونا نشوف إيه هي المخاطر من وجهة نظر قريش:
◇أولا:
لو دعوة الإسلام انتشرت في الجزيرة العربية احتمال كبير جدا إن قريش تفقد مكانتها وتجارتها،
لأنهم كانوا بيكسبوا كثير جدا من بيع الأصنام، فمين إللي هيشتري أصنام لما الناس تدخل الإسلام🙃

◇ثانيا:
كفار مكة عارفين كويس أوي إن المسلمين مش مهاجرين ليثرب عشان يقضوا فترة راح ويغيروا جو😅
دول عارفين إن المسلمين أصحاب قضية، عايزين يقيموا دولة إسلامية وهيرجعوا في يوم من الأيام عشان يحكموا مكة،
ما هو رسول الله ﷺ بقاله ثلاثة عشرة سنة بيقول لهم إن الحكم لله فقط،
فأكيد المسلمين هيرجعوا في يوم من الأيام عشان يقيموا حكم الله في مكة🤷‍♀️

◇ثالثا:
هجرة المسلمين ليثرب بالذات كان مشكلة بالنسبة لهم لأن يثرب فيها مميزات مش موجودة في أي مكان تاني وده مش في مصلحة قريش نهائي، ومن المميزات دي:

♡إن سكان يثرب إللي هم الأوس والخزرج من أعز قبائل العرب وأقواهم في الحرب،
ولولا إنهم كانوا مشغولين في الحرب إللي كانت بينهم كان زمانهم بقوا قوة كبيرة مشهورة في الجزيرة العربية تهدد باقي القبائل👌
فتخيلوا القوة دي لما تنضم لرسول الله ﷺ بعد ما يتوحدوا هتبقى عاملة إزاي🙊

♡موقع يثرب الجغرافي بيهدد قوافل قريش، لأنها تقع على طريق قوافل قريش من وإلى الشام،
فيثرب تقدر تعمل حصار على مكة وتجارتها في أي وقت، وده هيسبب لهم خسارة كبيرة جدا لأن عيشتهم كلها على التجارة 😕
ده غير إن يثرب مدينة حصينة، يعني محمية حماية طبيعية محدش يقدر يهجم عليها بسهولة👌
فحتى لو فكروا إنهم يحاربوا أهل يثرب فهتكون حرب صعبة جدا عليهم😬

♡يثرب بيسكنها اليهود، وهم أهل سلاح وأموال وأعداد كبيرة، وهم أهل كتاب وأتباع الانبياء، وكانوا عارفين إن ده زمن خروج آخر الأنبياء،
والمتوقع إنهم هيدخلوا في الإسلام ويتبعوا رسول الله ﷺ،
وده مصيبة كبيرة جدا لأهل مكة😶

بالإضافة لكل إللي فات ده، الناس إللي هاجرت دي من أهل مكة أصلا، يعني كل واحد من زعماء مكة إما فقد ابن أو أخ أو ابنة، وفي ناحيتهم حب فطري،
ولولا محمد ﷺ والدين إللي جاء به ده مكنش كل ده حصل،
فهم في ضغط نفسي رهيب ومتغاظين جدا من الحال إللي وصلت له الأمور ومحتاجين يشوفوا حل😑
والحل الأساسي إنهم ميسمحوش لمحمد ﷺ إنه يهاجر ليثرب، لأن محدش من المسلمين ولا الأوس والخزرج هيقدر يعمل أي حاجة إلا لما يكون محمد ﷺ بينهم،
يبقى لازم يسيطروا على محمد ﷺ ويمنعوه من الهجرة بأي طريقة👌
لكن إزاي هيسيطروا عليه وهو من قبيلة بني هاشم القوية، وصعب إنهم يدخلوا معاها في صراع😕

عشان كده اجتمعوا في دار الندوة ، ودي زي قاعة اجتماعات كده، محدش بياخد قرارات مهمة إلا في دار الندوة دي،
فكل رؤوس المشركين من قريش من القبائل المختلفة ماعدا بني هاشم طبعا، اجتمعت في دار الندوة عشان يشوفوا حل للأزمة بتاعتهم دي👌

☆وبمناسبة اجتماع المشركين، قصة إن إبليس تمثل في صورة شيخ من نجد وحضر معاهم اجتماع دار الندوة غير صحيحة🙅‍♀️❌
أصلا بالعقل محدش بيدخل دار الندوة دي وبيحضر اجتماعاتها غير سادة قريش، فإزاي هيدخلوا رجل غريب وسطهم في اجتماع مهم زي ده🙄

المهم هم اجتمعوا وبدأ كل واحد فيهم يقول الحل إللي عنده للمشكلة دي، كان عندنا فريقين:
فريق معتدل كان شايف إن حبس رسول الله ﷺ في مكة كفاية عشان يحل المشكلة🤷‍♀️

الفريق التاني كان زي ما بنقول عليه دلوقتي وبنسميه اليمين المتطرف😅
ده كان رأيه إن رسول الله ﷺ لازم يُقتل عشان المشكلة تتحل من جذورها،
والفكرة دي كانت عاجبة الجميع لكن مين إللي هيضحي بنفسه ويواجه قبيلة بني هاشم😶
ماهو أي قبيلة قوية يُقتل حد من أشرافها مش بيسبوا دمه يروح هدر 😅
فراح أبو جهل طالع لهم بفكرة شيطانية قال لهم:
احنا هنختار من كل قبيلة شاب قوي ونخليهم يحاصروا بيت محمد، وأول ما يطلع من بيته يقوموا كلهم ضاربينه بالسيوف ضربة رجل واحد وبكده دمه يتفرق بين القبائل،
وبني هاشم مش هيبقى ق

#قصص_الأنبياء(٢)
#السيرة_النبوية
#الحلقة_السابعة_والأربعون
#في_طريق_الهجرة

كنا واقفين عند رسول الله ﷺ لما تجهز هو وأبو بكر رضي الله عنه عشان يهاجروا من مكة ويتجهوا ليثرب وشرحنا الخطة بتاعتهم،
لما خرج رسول الله ﷺ من مكة نظر إليها وقال :
"وَاللهِ إِنَّكِ لَخَيْرُ أَرْضِ اللهِ وَأَحَبُّ أَرْضِ اللهِ إِلَيَّ، وَاللهِ لَوْلَا أَنِّي أُخْرِجْتُ مِنْكِ مَا خَرَجْتُ"

☆محتاجين نقف هنا وقفة عشان نفهم معنى مهم جدا👌
حب الوطن ده من المشاعر الفطرية في الإنسان،
زي حب الإنسان لأولاده وأمه وأبيه وحبه لكل شيء جميل وطبيعي إن الإنسان يحب يقضي حياته في المكان إللي له فيه ذكريات جميلة،
حلو الكلام😁
طيب لو الإنسان اتمنع إنه يُظهر دينه زي مثلا إنه مش عارف يؤدي الصلاة وباقي شعائر الإسلام والناس بتحاربه وبتؤذيه يبقى هنا الوضع إيه😕
يبقى يعمل زي رسول الله ﷺ ويسيب وطنه ده ويروح مكان تاني يقدر يُقيم فيه دينه ويعبد ربنا براحته،
طبعا لو كان يقدر إنه يسيب وطنه ده😉
والهجرة دي واجبة على الإنسان لو يقدر ، قال تعالى:
"يَا عِبَادِيَ الَّذِينَ آمَنُوا إِنَّ أَرْضِي وَاسِعَةٌ فَإِيَّايَ فاعبدون"
وإللي ميقدرش يهاجر يخفي إيمانه لحد ما ربنا يسهل له أمره،
زي المسلمين إللي معرفوش يهاجروا من مكة واتحبسوا فيها،
فاحنا عندنا في الإسلام الحفاظ على الدين مقدم على كل شيء👌
وبالمناسبة الحديث المشهور بتاع :
"حب الأوطان من الإيمان"
حديث موضوع😊
وحتى بالعقل يعني حب الأوطان بيشترك الناسِ فيه من غير فرق بين أهل التقوى والإيمان وأهل الكفر والفسوق والعصيان،
يبقى فين الإيمان بقى🤷‍♀️
وحتى رسول الله ﷺ لما قال كلامه ده مكنش يقصد حب الأرض ذات نفسها ولا التراب مثلا ولا لأنها وطن وهيفارقه بقى وكده 😅
لكن لأن مكة خير بقاع الأرض عند الله تعالى بنص الحديث
في رواية تانية: "وَأَحَبُّ أَرْضِ اللهِ إِلَى الله"
وده لأنها أماكن عبادة وفيها الحج وفيها تعظيم شعائر الله، وربنا قال:
"وَمَن يُعَظِّمۡ شَعَٰٓئِرَ ٱللَّهِ فَإِنَّهَا مِن تَقۡوَى ٱلۡقُلُوبِ "
ورسول الله ﷺ يقول: "أَحَبُّ البِلَادِ إِلَى اللهِ مَسَاجِدُهَا"
فالخلاصة إن حب الوطن حب فطري لكن لو تعارض مع إقامة الدين يبقى يجب علينا لو نقدر نسيب الوطن ونروح مكان تاني نقيم فيه ديننا👌
طيب وإللي مش هيعمل كده ، يعني إللي مش عارف يقيم دينه ومع ذلك مش هيهاجر مع إنه يقدر ده إيه نظامه😕
للأسف آخرته وحشة😶
شوفوا ربنا بيقول إيه :
"إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ
قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا ۚ فَأُولَٰئِكَ مَأْوَاهُمْ جَهَنَّمُ ۖ وَسَاءَتْ مَصِيرًا"

فرسول الله ﷺ ترك وطنه لأنه مش قادر يُقيم فيه دينه وخرج هو وأصحابه من المسلمين لأرض ثانية عشان يعبدوا الله فيها،
اتجه رسول الله ﷺ مع أبي بكر الصديق رضي الله عنه لحد ما وصلوا لغار ثور وده كان في أواخر صفر من السنة الرابعة عشة للبعثة ،
وبدأ تنفيذ الخطة من جميع الأطراف كل واحد عارف دوره،
في الوقت إللي كان فيه رسول الله ﷺ في الغار مع أبي بكر الصديق، كانت مكة مقلوبة🙊
محمد ﷺ اختفى، راح فين.. طلع من مكة إزاي ...طيب فين أبو بكر.. مش لاقيينه هو كمان ...كده كل إللي كانوا خايفين منه هيحصل😮

☆وهنا في قصة مشهورة لكنها غير صحيحة🙅‍♀️❌
بعد ما خرج رسول الله ﷺ ومعاه أبو بكر للهجرة جاء مجموعة من كفار قريش وعلى رأسهم أبي جهل وسأل عن أبي بكر فأسماء قالت إنها متعرفش فراح أبو جهل ضربها ضربة وقعت الحلق من أذنها،
القصة دي مع شهرتها لكنها غير صحيحة👌

دي آخر فرصة ممكن يلحقوا فيها رسول الله ﷺ قبل ما يهاجر، فطلعوا على الطرق يدوروا عليه،
حطوا مكافأة مائة ناقة لأي حد يلاقيه أو يقتله، ومائة ناقة في زمانهم كانت مبلغ كبير😅
فكل الناس بدأت تدور عشان تاخد المكافأة، كل مجموعة أخذت مكان تبحث فيه، وصل مجموعة من المشركين عند غار ثور إللي فيه رسول الله ﷺ وأبو بكر،
وقف المشركون على باب الغار وقعدوا يتكلموا، ولو واحد منهم بص لتحت رجله كده هيشوفهم🙊
متخيلين موقف رسول الله ﷺ وأبو بكر بعد الخطة المحكمة دي، لقوا المشركين واقفين في المكان إللي هم فيه،
ولو المشركون شافوا رسول الله ﷺ وأبو بكر المرة دي هيقتلوهم أكيد😶
فكان أبو بكر الصديق رضي الله عنه خايف وقال لرسول الله ﷺ:
يا رسول الله لو واحد منهم بص تحت رجله هيشوفنا😥
فقال له رسول الله ﷺ :
متخفش! تخيل لما يكون اثنين الله ثالثهما إيه إللي ممكن يحصل، ربنا معانا👌
" إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا ۖ "
فهنا ربنا أنزل عليهم السكينة وساعدهم بجند من جنوده،
وهي الملائكة، فهي صرفت بصر المشركين عن النظر لداخل الغار،
"فَأَنزَلَ اللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا."
ومشي المشركون وتركوا الغار من

#قصص_الأنبياء(٢)
#السيرة_النبوية
#الحلقة_الثامنة_والأربعون
#وصف_النبي_المصطفى
#وصول_رسول_الله_للمدينة

اتكلمنا المرة إللي فاتت عن رسول الله ﷺ لما خرج من مكة وقعد في غار حراء ثلاثة أيام وبعدين بدأ رحلته ليثرب،
وشفنا إللي حصل مع سُراقة بن مالك ومقابلة رسول الله ﷺ للزبير بن العوام في الطريق،

☆قبل ما نكمل الأحداث في قصة مشهورة عن أبي بكر الصديق في الهجرة لكنها غير صحيحة،
مقلتهاش في الجزء إللي فات لحد ما اتأكد،
وفعلا طلعت قصة غير صحيحة ملهاش سند صحيح بيذكرها أهل السيّر وهي إن قبل ما رسول الله ﷺ يدخل غار ثور دخل أبو بكر الصديق وبدأ يقفل الثقوب في الغار ما عدا واحد أغلقه برجله ،
فلدغه عقرب أو ثعبان ورسول الله ﷺ كان نايم على حجره فبكى أبو بكر من الألم فنزلت الدموع على خد رسول الله ﷺ...إلى آخر القصة،
فالقصة دي غير صحيحة، هتلاقوا تفصيل الموضوع في موقع الفتاوى إسلام ويب 😉

نرجع لرسول الله ﷺ ونشوف معاه إللي هيحصل، لما كان ماشي في القافلة الصغيرة بتاعته مرّوا على خيمة لامرأة بدوية كبيرة في السن قوية و عاقلة غير مشهورة في الجاهلية اسمها أُم مَبعد الخُزَاعية،
وكانت قصاد الخيمة بتعمل أشغالها لما مر عليها رسول الله ﷺ،
فسألها لو عندهم تمر أو لحم يشترونه، فملقاش عندها حاجة وكانت فقيرة، وكان أصابهم قحط فقالت له:
والله لو عندنا حاجة كنت هضيفكم من غير ما تطلبوا😥
فرأى رسول الله ﷺ في الجنب كده شاة هزيلة ضعيفة ، فسأل أم معبد هي إيه دي؟
فقالت له أم معبد : دي شاة مخرجتش مع باقي الأغنام في الرعي لأنها هزيلة ومجهدة مش هتقدر تتحرك😓
فقال لها رسول الله ﷺ:
طيب تأذني لي إني أحلبها؟
فقالت له : أه عادي.. لو كان فيها لبن 🤷‍♀️
فجاب الشاة ومسح على ضرعها وقال :
بسم الله، اللهم بارك لها في شاتها،
فاتملى ضرع الشاة باللبن وطلب إناء طبق كبير، فحلب فيه لبن كثير وبعدين أعطاها اللبن تشرب لحد ما شبعت،
وسقى أصحاب لحد ما ارتووا، وشرب هو في الآخر ﷺ، وبعدين ملأ لها الإناء وتركه عندها ومشي.

أنا متخيلة شكل أم معبد وهي مستغربة ومتفاجئة من إللي شافته😳
معجزة ظاهرة واضحة قصادها😅

بعد شوية إلا وزوجها أبو معبد قادم ومعاه أغنام هزيلة بيتمايلوا من شدة الضعف، مش قادرين يمشوا،
فلما شاف اللبن قال :
إنتي جبتي اللبن ده منين والشاة إللي عندك هزيلة ضعيفة عزباء ومفيش ولا شاة تانية في البيت فيها لبن😳
قالت : أيوة صح معاك حق، لكن احنا عدى علينا رجل مبارك😮
وقعدت تحكي لأبي معبد القصة إللي حصلت معاها، فقال لها: طيب اوصفيه لي كده🤔

فقالت له بتوصفه بالإضافة لوصف الصحابة:
أنا شفت رجل ظاهر الجمال والحسن، رأسه ضخمة مش رأس صغيرة يعني ،والرأس الكبيرة في الرجال من مظاهر الحسن عند العرب😉
شعره أسود ولا هو شعر مجعّد ولا الشعر الناعم أوي المسترسل ده ، لأ.. شعره مفرود وحلو،

☆وكان ساعات يقصه عادي، وساعات يتركه لحد ما يوصل لكتفه، فإللي بيطول شعره ويقول أصله سنة ده كلامه خطأ،
ده بيتبع هواه مش أكثر بمناسبة الموضة والكلام ده🙄
وإلا كان أَوْلى إنه يتبع سنة رسول الله ﷺ في حاجات تانية فيها نص شرعي، زي صلاة السنن وصيام الإثنين والخميس واستخدام السواك وغيرها من السنن المهجورة😊
ماهو احنا ناخد سنة النبي ﷺ كلها على بعضها مش هنقي😅

أما وجهه فكان مدوّر ولون بشرته مش أبيض أوي زي الدقيق كده ولا هو أسمر ، بياضه كان بياض فيه حُمرة،
إذا سُر يعني يعني فَرح تقاطيع وجهه بتنور كأنه بيلمع زي الذهب،
وإذا تبسم الدنيا تنور، وكان بيتعرف السرور ده في وجهه يعني كان على الفطرة مشاعره إللي في قلبه ظاهرة على وجهه، إذا استحى...إذا كره شيء...
حتى لما كان بيغضب كان بيبان على وجهه، مش زي مثلا إللي ممكن يكون بيغلي من جواه بيغلي فيظهر ابتسامته ويبان كأنه عادي😅
ومحدش كان أجمل منه، كأن الشمس تجري في جبهته يعني جبهته عريضة وبتلمع ..منورة، عينه واسعة، حرف رموشه يعني المكان إللي بيطلع منه الرموش..منبت الرموش فيه حُمرة،
ورموشه نفسها طويلة وكثيفة،
حدقة العين شديدة السواد والبياض إللي حولها شديد البياض، تحس إن عينه مكحلة مع إن مفيش فيها كحل، حواجبه طويلة ورفيعة مقوسة ومليانة شعر،
إللي يشوف حواجبه يحسهم متصلين ببعض لكنهم مش متصلين،
الجزء إللي بين حواجبه من بداية الأنف أبيض مفيهوش شعر، لكن فيه عِرق لما يغضب بيظهر العرق ده ويبقى بارز،
وجهه مش مليان شعر، الشعر موجود في محيط اللحية وخدوده ناعمة،
وكان بيعرق كثير وكان العرق في وجهه عامل زي حبات اللؤلؤ،
أنفه طويلة وأرنبة أنفه صغيرة ..نهاية أنفه يعني، وفي وسط الأنف حَدب يعني في ارتفاع عند قصبة الأنف بدون ما يكون شكلها قبيح،
فمه كبير وأسنانه بيضاء في بينها فواصل، يعني متفرقة وكل سِنّة متحددة لوحدها،
لما يضحك أسنانه بتبرق تحس إنه بيتلألأ، شعر لحيته ضخم وكثيف لونه أسود يصل طول لحيته لحد صدره وشكلها جميل،
لما يتكلم في سره الناس إللي وراه يعرفوا إنه بيتكلم بسبب تحرك لحيته، فهي كانت باينة له

#قصص_الأنبياء(٢)
#السيرة_النبوية
#الحلقة_التاسعة_والأربعون
#استقرار_رسول_الله_في_المدينة

كنا وافقين المرة إللي فاتت عند وصول رسول الله ﷺ ليثرب، وقلنا إن الأنصار كانوا بيخرجوا ينتظروا رسول الله ﷺ كل يوم الصبح لأنهم مكنوش عارفين الوقت إللي هييجي فيه بالضبط،
فكان أول ما الحر يشتد يرجعوا بيوتهم، ففي يوم لما رجعوا بيوتهم، كان في واحد من اليهود موجود فشاف حد جاي من بعيد فبدأ ينادي على الأنصار،
فتجمع الأنصار مرة ثانية وشافوا رسول الله ﷺ وأبو بكر قادمين،
والأنصار مكنوش يعرفوا رسول الله ﷺ ولا شافوه قبل كده، إللي يعرفوه إللي قابلوه في مكة فقط في البيعة😉

فكانوا بيقولوا هو إللي على اليمين ولا إللي على الشمال🤔
فوهم حيرانين كده قام أبو بكر الصديق بتظليل رسول الله ﷺ من الشمس فعرفوا من هو رسول الله ﷺ 😊

أول ما قرب منهم قعدوا يقولوا جاء رسول الله ..جاء نبي الله، وطبعا محدش قال طلع البدر علينا دي خالص😅
مفيش ولا رواية صحيحة بتقول إن الأنصار استقبلوا رسول الله ﷺ بإنشادهم طلع البدر علينا👌
وفي رواية بتقول إن وصل عدد الأنصار إللي استقبلوا رسول الله ﷺ يصل إلى خمسمائة وكانوا بيحملوا السلاح من باب التشريف والإحتفال به ﷺ،

فدخلوا حدود المدينة في منطقة اسمها قِباء، وأحاط الأنصار بأبي بكر الصديق ورسول الله ﷺ ، والغلمان تفرقوا في الشوارع وقعدوا ينادوا يا محمد يا رسول الله..محمد يا رسول الله!
والنساء والرجال طلعوا فوق البيوت يشوفوا الموكب بتاع رسول الله ﷺ وكانوا فرحانين به جدا،
حتى قال صحابي من الأنصار وهو البراء بن عازب:
أنا مشفتش أهل المدينة فرحوا بحاجة زي فرحهم برسول الله ﷺ 😊
"وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ"
وكان ده في يوم الإثنين الثاني عشر من شهر ربيع الأول للسنة الرابعة عشرة من البعثة.

☆يعني الهجرة كانت في شهر ربيع مش في محرم🤔

الهجرة كانت في شهر ربيع، لكن ابتداء العزم على الهجرة كان في محرم،
لأن بيعة العقبة الثانية كانت في شهر ذي الحجة وأول هلال بعد ذي الحجة هو محرم،
فلما عمر بن الخطاب تولى الخلافة وقالوا عايزين نؤرخ للمسلمين بتاريخ، قالوا نؤرخ من بداية العزم على الهجرة،
فدي كانت بداية التاريخ الإسلامي😉

العجيب إن إزاي الأنصار كانوا فرحانين الفرح ده كله😮
إنتم عارفين معناه إيه دخول رسول الله ﷺ يثرب🙊
معناه إن كل أهل الأرض بقوا أعداء أهل يثرب،
معناه إنهم بيعلنوا الحرب على كل العرب،
معناه العداء المستمر مع اليهود إللي كانوا عايشين معاهم وفي بينهم معاهدات،معناه تضحية وبذل وإنفاق وموت في سبيل الله،
وبرغم كل ده كانوا فرحانين كده😅
الأنصار مكنش همهم أي حاجة، كان همهم الثمن إللي اتفقوا عليه مع رسول الله ﷺ...الجنة😊
بعد دخول رسول الله ﷺ يثرب بقى اسمها
《المدينة النبوية》

☆وفي هنا فائدة 😁
إن أي مدينة يدخلها الإسلام تكون منوّرة، أما المدينة إللي دخلها رسول الله ﷺ تسمى المدينة النبوية،
وكان الصحابة والسلف بيسموها المدينة أو المدينة النبوية، حتى لما ربنا ذكرها في القرآن قال عنها المدينة😉
فإن شاء الله هيكون الاستخدام معانا إما المدينة أو المدينة النبوية😊
مش بقول حرام ولا متقولوهاش😱
أنا بحب بس كل حاجة تبقى بالمسطرة 😁

دلوقتي رسول الله ﷺ بقى هو حاكم المدينة رسمي، فأول حاجة عملها بعد دخوله المدينة كانت بناء مسجد قباء،
فكان هو مسجد التقوى الذي أُسّس من أول يوم :
"لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيهِ"

بعد بناء المسجد جاء علي بن أبي طالب رضي الله عنه بعد ما أدى الأمانات، وجاء معه بعض المستضعفين من المسلمين،
وانطلق بعدها رسول الله ﷺ عشان يدخل المدينة،
فكان كل واحد بيحاول يأخذ الناقة إللي كان راكب عليها رسول الله ﷺ ويقولوا تعال عندنا عشان يضيفوه،
فكان يقول لهم اتركوها فإنها مأمورة👌

☆وهنا رسول الله ﷺ بيعلم الناس درس عملي مهم وهو إن مادام ربنا أمر يبقى لا أنا ولا أي حد من البشر يقدر يتدخل ويغير أمر ربنا👌

فضلت الناقة ماشية لحد ما وصلت عند أرض فيها نخل فبركت فيها ، قعدت يعني،فسأل رسول الله ﷺ عن أصحاب الأرض فلقاهم غلامين يتيمين،
فطلب منهم إنه يشتريها، فقالوا خذها يا رسول الله هبة،
فرفض رسول الله ﷺ وقال لازم ندفع ثمنها، فاشتراها منهم من أموال أبي بكر الصديق رضي الله عنه،
وكان أبو بكر الصديق قد أخذ ماله كله معاه في رحلة الهجرة وكان حاطه تحت أمر رسول الله ﷺ،
حتى أبوه سأل حفيدته أسماء : هو أبوكم ساب لكم فلوس أد إيه لما مشي مع محمد🤔
فأسماء رضي الله عنها جابت كيس قماش وحطت جواه حصى وخلت جدها الأعمى يضع يده على الكيس وهي بتقول له : ساب لنا الكيس ده،
فقال لها : والله لو ساب لكم ده يبقى ساب لكم كتير☺

وفعلا أبو بكر

#قصص_الأنبياء(٢)
#السيرة_النبوية
#الحلقة_الخمسون
#تأسيس_الدولة_الإسلامية_في_المدينة

كنا واقفين المرة إللي فاتت عند المشاكل إللي واجهت رسول الله ﷺ والمفروض إنه يتعامل معاها عشان يقدر يقيم دولة إسلامية تكون مركز تنطلق منها الدعوة لكل أنحاء الأرض،
فلازم يتعامل بحكمة لأن المرحلة دي مهمة جدا لأن هي الأساس ولازم الأساس يكون متين وقوي عشان البناء إللي هيتبنى ميقعش بعدين😶

خلونا نشوف رسول الله ﷺ اتعامل مع المشاكل دي إزاي،
أول وأهم مجموعة بالنسبة لرسول الله ﷺ هي مجموعة المسلمين بطوائفها الخمسة،
أول طائفة المسلمين من الأوس والخزرج، ودول كان بينهم حروب من زمان لسه منتهية قريب بس لسه النفوس شايلة من بعض،
فرسول الله ﷺ من أول ما دخل المدينة أعطاهم درس عملي قبل ما يتكلم في أي حاجة حاجة معاهم إللي هو التربية بالقدوة،
لما وصل لمكان بناء المسجد النبوي سأل :
أي دار أهلنا أقرب؟
فقالوا له : دار أبو أيوب الأنصاري، فنزل عنده زي ما شرحنا المرة إللي فاتت😉
فرسول الله ﷺ من قريش وقريش من العدنانيين، والأوس والخزرج من القحطانيين، يعني فرعين كبار جدا ومختلفين تماما عن بعض،
فرسول الله ﷺ إللي هو بعيد جدا عنهم في النسب بيقول عليهم أهلنا، فمن باب أولى إن الأوس والخزرج يعتبروا نفسهم أهل💁‍♀️
فدي كانت الخطوة الأولى ، الخطوة الثانية إنه قعد مع الأوس والخزرج وبدأ يعلمهم إن إللي بيربط المسلمين ببعض هو رباط العقيدة، مش القبلية أو أي حاجة تانية،
ورسول الله ﷺ كان معتمد على صدق إيمان الأنصار في تنفيذ إللي هيقول لهم عليه،
واستجاب الأوس والخزرج وتغيرت قلوبهم ونسيوا كل إللي كان بينهم وتوحدوا مع بعض عشان هدفهم الرئيسي بناء الدولة الإسلامية👌

☆ونتعلم من الموقف ده إن إللي عايز يحقق هدف مينفعش يكون في بين الشركاء مشاكل وبغضاء، وكل واحد عايز يثبت نفسه وينتصر على الثاني لأن كده القضية هتضيع، وانتم شفتم بعينكم في السنين إللي فاتت أثر العداوة بين أطراف معينة وصلتنا لإيه😑
لازم نصفي النية ويكون همنا وقضيتنا واحدة، غير كده النتيجة هتكون الفشل،
لأن لما الأوس والخزرج نسيوا إللي كان بينهم من المشاكل ووحدوا هدفهم وبقت قضيتهم نصرة الإسلام نجحوا في كده، فأي حد هيعمل عكس إللي الأوس والخزرج عملوه هيفشل فشل ذريع واحنا شايفين الواقع بتاعنا😓

كده حلينا مشكلة أول طائفة، الطائفة الثانية من المسلمين دي مشكلتها مشكلة😶
ناس معندهمش لا مال ولا بيت ولا زاد ولا أي حاجة خالص، عشان نقرب المعنى بلغة عصرنا ممكن نقول عليهم لاجئين🤔
ومعروف إن الإنسان إللي بيهاجر من بلده بيحس بشي من الذِّلة والضعف فمحتاج تطييب خاطر،
وهم أصلا لولا الإسلام كان زمانهم قاعدين في بلدهم مرتاحين مُعززين،
والمشكلة الأكبر إن شغلتهم في مكة كانت التجارة، وفي المدينة مفيش تجارة، في زراعة لأن المدينة أرض خصبة تنفع للزراعة ومكة أرض صخرية، فحتى مفيش شغل يشتغلوا، فكان موقفهم محرج جدا،

طيب إيه الحل بقى😕
رسول الله ﷺ عمل حاجة جديدة وطبعا كل ده بوحي لأن رسول الله ﷺ لا ينطق عن الهوى،
وبرده مش معنى إن كل حاجة بالوحي إن رسول الله ﷺ مجرد آلة وخلاص،
لا...هو بيفكر ويخطط وكله إلهام من ربنا،
ولو حصل أي خطأ بشري الوحي بينزل عشان يعدل الخطأ ده،
عشان بس الناس إللي كل ما نقول لهم ده رسول الله ﷺ عمل كذا يقولوا أيوة ده رسول الله المؤيد بالوحي،
وكأن رسول الله ﷺ كان بيعمل حاجات خارقة🙄
احنا شفنا بالتفصيل إزاي كان بيخطط ويرتب ويأخذ بالأسباب إللي أي بشر يقدر يعملها👌

المهم رسول الله ﷺ آخى بين المهاجرين والأنصار، يعني كل واحد من الأنصار هيبقى له أخ من المهاجرين،
والأخوة دي زي أخوة النسب يعني إللي يموت يورث الثاني،
موضوع الورث ده هيُنسخ بعدين لكن دلوقتي بقى فيه أخوة زي أخوة النسب،
وكان ربنا بيهون عليهم في القرآن :
"فَالَّذِينَ هَاجَرُوا وَأُخْرِجُوا مِن دِيَارِهِمْ وَأُوذُوا فِي سَبِيلِي وَقَاتَلُوا وَقُتِلُوا لَأُكَفِّرَنَّ عَنْهُمْ سَيِّئَاتِهِمْ وَلَأُدْخِلَنَّهُمْ جَنَّاتٍ تَجْرِي مِن تَحْتِهَا الْأَنْهَارُ ثَوَابًا مِّنْ عِندِ اللَّهِ ۗ وَاللَّهُ عِندَهُ حُسْنُ الثَّوَابِ "

فكان المهاجر يفتخر بأنه مهاجر وكان الأنصاري يفتخر بأنه يأوي مهاجرا،
ومن أمثلة المآخاة إن رسول الله ﷺ آخى بين عبد الرحمن بن عوف من المهاجرين وسعد بن الربيع من الأنصار،
فقال سعد بن الربيع لعبد الرحمن:
مالي هقسمه نصفين إنت نصف وأنا نصف، وأنا عندي زوجتين شوف أي واحدة فيهم تعجبك وأنا أطلقها، ولما تنتهي العدة بتاعتها، إنت تتزوجها😊

☆بكل بساطة قال له يقسم المال إللي هو تعب فيه سنين عشان يجمعه، مع إن الانصار بصفة عامة فقراء، يعني هم مكنوش أغنياء بحيث عندهم الفائض إللي يخليهم ينفقوا الأموال دي كلها😮
وكمان سعد كان عنده استعداد يترك واحدة من زوجاته لأخيه،
ومش مثلا قاله خذ فلانة، يعني كانت ممكن تكون مزهقاه فيخلص منها، لأ ده بيقول له اختار، طيب افرض اختار أحب واحدة لسعد بن الربي

#قصص_الأنبياء(٢)
#السيرة_النبوية
#الحلقة_الواحدة_والخمسون
#موقف_قريش_من_المدينة
#سلمان_الفارسي(١)

اتكلمنا المرة إللي فاتت عن طريقة رسول الله ﷺ في حل المشاكل إللي واجهته مع أوضاع المسلمين المختلفة،
وإزاي حط خطة للتعامل مع المشركين،
واتبقى لنا إننا نعرف إزاي رسول الله ﷺ اتعامل مع مشركي قريش ومع اليهود إللي معاه في المدينة،
بالنسبة لمشركي قريش فالوضع معاهم كان خطير، لأنهم لما عرفوا إن رسول الله ﷺ هاجر للمدينة بعثوا رسالة تهديد ووعيد لعبد الله بن أُبي بن سلول إللي هو كان المفروض هيكون ملك المدينة وكان رئيس بعثة الحج لسه من كم شهر قالوا له فيها :
إنتم آويتم صاحبنا! واحنا نحلف باللات والعزى إما إنكم تقتلتوه أو تطردوه من عندكم، يا إلا هنجيلكم بجيش ونقتلكم ونأخذ نساءكم وأبناءكم عبيد عندنا😡

فالتهديد جاء على هوى عبد الله بن أبي بن سلول، بس كده، ده هو ده إللي أنا عايزه😈
عمل إيه بقى عبد الله بن أُبي بن سلول، راح جمع المشركين من الأوس والخزرج وشرح لهم موقف قريش وإزاي إنهم هييجوا بجيش ويغزوا المدينة، فاحنا لازم نشوف حل،
وأحسن حل إننا نحارب المسلمين ونطلعهم من المدينة 👌
اجتمع المشركون من الأوس والخزرج واجتمع المسلمون وبدايات حرب أهلية في المدينة ولسه الدولة الإسلامية في البداية🙊
جاء رسول الله ﷺ ووصل إليهم قبل ما القتال يبدأ وحاول يهدأ الوضع،
لكن المشكلة إن دول مسلمين وكفار، طيب المسلمين هيذكرهم بالله وبالعقيدة و...و... وهيستجيبوا، لكن المشركين هيقول لهم إيه 😕
مينفعش يذكرهم بالله ولا بالجنة ولا بالنار😅
فاستغل رسول الله ﷺ حاجة مهمة بيشترك فيها الطرفين🤭
قال لهم:
هو تهديد قريش لكم وصل بكم للدرجة دي!
ده قريش مكنتش هتقدر تعمل فيكم إللي إنتم هتعملوه في نفسكم لو تقاتلتم👌
مش إنتم إللي قريش تخدعكم بخدعة مكشوف كده!
إنتم عايزين تقاتلوا أبناءكم وإخوانكم؟!
فرسول الله ﷺ حرك فيهم روح التحدي وأثار فيهم النخوة والعزة، وذكرهم بالرحم إللي بينهم،
وفعلا الناس هدأت وتفرقوا وانتهت المشكلة😊

☆وهنا رسول الله ﷺ استغل حاجة من أخلاق الجاهلية لا تتعارض أبدا مع عقيدة الإسلام عشان يقضي بها على فتنة عظيمة كانت ممكن تحصل،
يعني المحافظة على الوطن من أي فتن خارجية وإني أسعى لاستقرار بلدي دي حاجة الشرع يأمر بها،
تخيلوا لما أهل البلد الواحد يقتلوا بعض إيه إللي يحصل؟
المستفيد طبعا من الموضوع العدو الخارجي إللي هو قريش،
هتيجي تقضي على البقية الباقية 🙄
وبكده يبقى احنا قدمنا للأعداء أرواحنا على طبق من فضة💁‍♀️
فرسول الله ﷺ قضى على الموضوع من جذوره👌

قريش مسكتتش طبعا😶
بعتوا للمسلمين رسالة تهديد ووعيد من باب الحرب النفسية:
متفكروش إنكم بعد هربتم ليثرب يبقى خلاص مش هنعرف نجيبكم😈
ده احنا هنجيلكم وهنبيدكم في البلد إلي انتم فيها دي👌
وده حتى لو كان مجرد تهديد فمش مستبعد خالص إن قريش تبعت حد يغتال رسول الله ﷺ،
عشان كده رسول الله ﷺ كان يبيت ساهرا من غير نوم حذرا من غدر قريش لدرجة إنه في مرة قال من شدة التعب:
ياريت ييجي رجل صالح من أصحابي يحرسني الليلة دي!
فسمع رسول الله ﷺ صوت فقال : مين؟
فقال : سعد بن أبي وقاص، فقال رسول الله ﷺ: وإيه إللي جابك دلوقتي؟!
فقال سعد:
أنا خفت عليك يا رسول الله فجيت أحرسك😥
فدعى له رسول الله ﷺ بخير، وبقى الصحابة يتنابوا في حراسة رسول الله ﷺ لحد ما ربنا أنزل آية:
"وَاللَّهُ يَعْصِمُكَ مِنَ النَّاسِ"
فقال للناس خلاص كده محدش هيقدر يقربلي ولا يؤذيني👌
☆ممكن حد يسأل طيب ما كان ربنا يعصمه من الأول😕
عصمة رسول الله ﷺ من الناس دي حاجة خاصة به هو،
واحنا متفقين إن رسول الله ﷺ قدوة وإن كل إللي بيعمله لازم نعمل زيه ، فإزاي بقى نعمل حاجة خاصة بيه ربنا أعطاها له🤷‍♀️
فكان لازم مرحلة توضح لنا بطريقة عملية إزاي القائد الإسلامي يحمي نفسه من أعدائه👌
وإنه لما يكون حوله ناس تحرسه فده مش ضد التوكل أبدا،
بالعكس ده من باب الأخذ بالأسباب،
فربنا عصم رسول الله ﷺ من الناس بعد فترة لأن دي هتكون حاجة خاصة به واحنا محتاجين حل للناس إللي هتيجي بعده😉

وعلى فكرة مكنش بس رسول الله ﷺ إللي كان بياخد حذره حتى الأنصار والمهاجرين مكنوش بيناموا ولا بيتحركوا إلا والسلاح معاهم،
لأنهم عارفين حجم العداء إللي بينهم وبين العرب دلوقتي👌

ومن الحاجات إللي قريش عملتها مع أهل يثرب إللي استضافوا رسول الله ﷺ،
إنهم قطعوا علاقتهم مع يثرب وهددت أهل يثرب بمنعهم من الحج والعمرة ودخول مكة،
وده عكس القوانين المتعارف عليها إن أي أحد ييجي عايز يعتمر أو يحج يُعطى الأمان ويكرم وكانت قريش بتفتخر بكده،
لكن دلوقتي مفيش قوانين بقى واحنا هنمشي الدنيا على مزاجنا😏

وشوفوا القصة إللي حصلت مع سعد بن معاذ رضي الله عنه سيد الأوس لما راح مكة عشان يعتمر حصل معاه إيه👌
لما وصل مكة اتقابل مع صاحبه من أيام الجاهلية أُمية بن خلف، فقال له سعد :
شوفلي كده ساعة البيت يكون فاضي ومفيش حوله ناس عشان أطوف بالبيت،
فأخذه

#قصص_الأنبياء(٢)
#السيرة_النبوية
#الحلقة_الثانية_والخمسون
#سلمان_الفارسي(٢)
#رسول_الله_واليهود

كنا واقفين عند سلمان الفارسي لما كان بيحكي لرسول الله ﷺ قصة بحثه عن الحق،
كان وصل للرجل في عَمّورية وقعد معاه فترة لحد ما جاءه الموت، فسلمان بيحكي لرسول الله ﷺ يقول:
قلت للرجل : يا فلان، توصيني أروح لمين بعدك، وإنت شايف حالك دلوقتي😥
فقال لي: والله يابني مفيش حد على إللي كنت عليه أنا وأصحابي أنصحك تروح له، لكن الزمن إللي إنت فيه ده زمان هيخرج فيه نبي وهو هيبعث بدين إبراهيم،
هيخرج بأرض العرب،
وهيهاجر لأرض بين حرّتين بينهما نخل ، له علامات لا تخفى على أحد: يأكل الهدية ولا يأكل الصدقة، بين كتفيه خاتم النبوة، فلو عرفت تروح البلاد دي روح👌
☆الحَرّة يعني : أرض حجارتها سوداء

فلما مات ودفناه قعدت في عمورية فترة، وبعدين عدّى عليّ تجار من كَلْبٍ فقلت لهم : أعطيكم بقراتي دي وغُنيمتي وتحملوني معاكم لأرض العرب🤔
فقالوا : ماشي اتفقنا، فأعطيتهم وأخذوني معاهم، فلما وصلنا وادي القرى ظلموني وباعوني عبدا لرجل من اليهود😔
فلما كنت عنده وشفت النخل ، تمنيت إن هي دي تكون الأرض إللي صاحبي قال لي عليها،
فو أنا عنده جاء له ابن عمه من قريظة فاشتراني منه وأخذني معاه للمدينة، فوالله أول ما شفتها عرفت إنها الأرض إللي صاحبي قال لي عليها وفضلت موجود فيها،
وانشغلت بشغل الرّق ومسمعتش عن بعثة رسول ولا أي حاجة خالص، لحد ما كنت في يوم شغال على نخلة من بتوع سيدي وسيدي جالس لقينا ابن عم له جاي علينا من بعيد ولما وصل عندنا لقيناه بيقول :
قاتل الله بني قِيلة《الأوس والخزرج، وقِيلة هو اسم أمهم》 ، مجتمعين على رجل بِقُبَاء جاي من مكة بيقولوا إنه نبي😏
فأول ما سمعت كلامة جسمي تلج وساب من بعضه لدرجة إني كنت هقع من فوق النخلة على سيدي 😳
فنزلت من على النخلة وقلت لابن عمه ده:
بتقول إيه بتقول إيه😲
فغضب سيدي وراح ضاربني وقال لي: وإنت مالك أصلا بالموضوع ، روح شوف شغلك😠
فقلت له: مفيش حاجة أنا كنت بس عايز أتثبت من كلامه😓
وكان عندي تمر جمعته، فلما جاء المساء جئتكم وقلت لكم إنكم محتاجين فدي صدقة مني، فأكل أصحابك ولم تأكل، فقلت دي أول علامة،
وبعدين جمعت تمر تاني وقدمته لكم هدية فأكلتَ وقلت لأصحابك يأكلوا معاك، فقلت دي تاني علامة،
ومكنش فاضل غير العلامة الثالثة إللي هي خاتم النبوة فلما شفتها على ظهرك عرفت إن إنت المقصود من وصف صاحبي، فكان رسول الله ﷺ مبسوط إنه أصحابه سمعوا قصة سلمان رضي الله عنه،
وأسلم سلمان ولكنه لسه عبد فكان مشغول في شغل الرّق،

☆قصة سلمان من أعجب القصص إللي ممكن نسمعها مختصر القصة بتاعته : إن إللي عايز يتبع الحق بصدق وبيدور عليه ربنا هيوصله للحق في النهاية👌
"وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا"

¤اختلف العلماء في عُمْر سلمان الفارسي، بسبب رحلته الطويلة دي ،في ناس قالوا إنه كان من المُعَمّرين فكان عمره مائتين وخمسين سنة، وناس قالوا ثلاثمائة،
لكن القول الراجح إنه مات لما كان قرب على الثمانين سنة في خلافة عثمان بن عفان رضي الله عنه،
يعني لما قابل رسول الله ﷺ كان تقريبا عمره معدي الأربعين🤔

وبما إننا اتكلمنا عن اليهود خلونا نشوف خطة رسول الله ﷺ في التعامل مع اليهود كانت إيه👌

عارفين لما بنبقى داخلين مشروع أو بنقدم على وظيفة أو مسافرين مكان،
الطبيعي إننا بنسأل عن طبيعة الحاجات إللي احنا هنتعامل معاها لأول مرة دي، نعرف طبيعة الناس إللي هنتعامل معاهم، مميزاتهم وعيوبهم،
إزاي نتقي شرهم ، إزاي نتعايش معاهم ومنعرّضش نفسنا إنهم يخدعونا،
أهه ربنا كان بيعمل كده مع رسول الله ﷺ والمسلمين من خلال القرآن👌

قبل ما المسلمين يعرفوا أصلا إنهم هيهاجروا للمدينة ويتعاملوا مع اليهود كان ربنا بيحكي لهم قصص عن بني إسرائيل وعن موسى عليه السلام ومواقفه مع فرعون وكمان مواقفه مع بني إسرائيل،
عشان ربنا يوسع آفاق المسلمين، انتم هتكون لكم دولة في يوم من الأيام، فمحتاجين تعرفوا أصناف الناس الموجودة معاكم على الأرض ومنهم اليهود،
فربنا أراد إنه يوصل للمسلمين فكرة عامة عن بني إسرائيل، إللي هم أجداد اليهود إللي عايشين في يثرب،
ولما يدخلوا المدينة يبقى عندهم انطباع إن اليهود دول أهل كتاب زينا، وده هنلاقيه في آية :
"ولَا تُجَادِلُوا أَهْلَ الْكِتَابِ إِلَّا بِالَّتِي هِيَ أَحْسَنُ"
وكمان هم أتباع رسول زينا، موسى عليه السلام وبيعبدوا إله واحد وهو الله، وهم اتأذوا وصبروا على ظلم فرعون:
"وَتَمَّتْ كَلِمَتُ رَبِّكَ الْحُسْنَىٰ عَلَىٰ بَنِي إِسْرَائِيلَ بِمَا صَبَرُوا"
وربنا قال عنهم إنه اختارهم على العالمين،
"وَلَقَدِ اخْتَرْنَاهُمْ عَلَى عِلْمٍ عَلَى الْعَالَمِينَ"
فكل ده بيعطي للمسلمين انطباع إيجابي عن اليهود إللي هيتعاملوا معاهم لما يتقابلوا، وخصوصا إن المنطق والعقل بيقول إن اليهود هيتبعوا رسول الله ﷺ🤷‍♀️

لكن في نفس الوقت ربنا علم الصحابة في القرآن إن بني إسرائيل دول بر