​Хоразм вилоятидаги болалар уйи тарбияланувчиларини зўрлаган амалдорлар иши қайта кўрилмоқда. Ишда янги фигурантлар пайдо бўлиш эҳтимоли бор

Жорий йилнинг 6 апрель куни Олий суднинг жиноят ишлари бўйича судлов ҳайъатида кассация тартибида ёпиқ суд мажлисида "Хоразм иши" бўйича кассация аризасини кўриб чиқди.

Суд мажлислари ёпиқ режимда ўтказилди.

Кеча Олий суд матбуот котиби Азиз Абидов Судлов ҳайъати прокурорнинг судланувчиларга янги айблов бўйича жиноят иши қўзғатиш ва бошқа шахсларни жиноий жавобгарликка тортиш масаласини ҳал қилиш учун жиноят иши ҳужжатларини айблов хулосасини тасдиқлаган прокурорга юбориш тўғрисида ажрим чиқариш ҳақидаги мурожаатини қаноатлантиргани ҳақида маълум қилди.

Иш яна Хоразм вилоят прокуратурасига юборилади, шунинг учун жиноят ишини кўриш 1 ойлик муддатга тўхтатилди.

Эслатиб ўтамиз, Хоразмлик мансабдорларнинг болалар уйи тарбияланувчиларини зўрлагани ҳақидаги ишни лойиҳамиз 2023 йилнинг март ойида кўтарган эди. Айбдорларга 1,5 йил озодликни чеклаш жазо берилган эди.

Лойиҳамиз жараённи диққат билан кузатиб бормоқда ва ушбу даҳшатли жиноятда айбдорларнинг барчаси Ўзбекистон қонунчилигига мувофиқ жавобгарликка тортилишига умид қилади.

#СукутСақлама #ХоразмИши #болалар #АдолатТалабҚиламиз

​Йил бошидан Ўзбекистонда жинсий зўравонликдан неча нафар бола жабр кўрди?

Олий суд матбуот котиби Азиз Абидов Nemolchi.uz лойиҳасининг сўровига кўра қуйидагиларни маълум қилди. 2023 йилнинг биринчи яримйиллигида вояга етмаганларнинг жинсий эркига қарши қатор жиноятлар учун 257 нафар шахс жиноий жавобгарликка тортилди.

Улардан:
➡️ 15 нафари 14 ёшга етмаган шахснинг номусига теггани учун (ЖК 118-моддаси 4-қисми)
➡️ 44 нафари 14 ёшга етмаган шахс билан жинсий эҳтиёжини ғайритабиий усулда қондиргани учун (ЖК 119-моддаси 4-қисми)
➡️ 163 нафари 16 ёшга етмаган шахснинг номусига теггани учун (ЖК 128-модда)
➡️ 35 нафари - 16 ёшга етмаган шахс билан жинсий эҳтиёжини ғайритабиий усулда қондиргани учун (ЖК 128-модда)

#СукутСақлама #Статистика #Болалар #Қонунлар

​Тошкент туманларидан бирида эркак подъездда вояга етмаган қизга ташланди

2023 йилнинг июнь ойида 16 ёшли қиз дорихонадан чиқиб уйига қайтаётган эди. Унинг кетидан маълум муддат пойлаб келаётган одамни кўрмаган. Уйига кириш йўлагида эркак қизга орқадан ҳужум қилиб, оғзини қўли билан беркитмоқчи бўлади, унга тегинишни бошлайди ва ўпмоқчи бўлиб, йиқитади. Қиз ёрдамга чақира бошлаганда зўравон қочиб кетди. Қўрқиб кетган қизга қўшнилар ёрдам беришди, ҳовлидаги эркаклардан бири жиноятчини қувиб етмоқчи бўлди, аммо ета олмади.

Қизнинг онаси зудлик билан ички ишлар органларига мурожаат қилган ва воқеани тўлиқ тасвирга олган биринчи қаватдаги видеокузатув камерасидаги ёзувларни тақдим қилган. Онанинг сўзларига кўра, зўравон тез топилди. Маълум бўлишича, у Тошкент кимё-технология институтининг 2-босқич талабаси, 2001 й.т. Хасанов А.Б.

Қиз онасининг айтишича, тергов давомида эркак бундай жиноятга биринчи марта қўл урмаётгани маълум бўлди. Шу йилнинг март ойида у худди шу ҳудудда бир аёлга ҳужум қилган, аёл ундан қочиб қолади ва жиноятчи қочиб кетган.

Қиз онасининг маълум қилишча, биринчи жабрланувчи ҳуқуқ-тартибот идораларига мурожаат қилган, бироқ ҳужум қилган шахс топилмаган, ҳуқуқ ҳимоя қилиш органлари ходимларининг ўзи эса бунга жиддий қарамай ишни ёпишган. Энди қизи билан содир бўлган воқеадан кейин Хасановнинг биринчи ҳужуми ҳақида маълум бўлди.

Эркак икки марта кечки пайт кимсасиз жойларда қизларнинг изига тушиб, ҳужум қилади, уларга нисбатан уятсиз ҳатти-ҳаракатлар қилади, иккала сафар ҳам қизларнинг омади келиб ундан қоча олишади. Бундай одам жамият учун хавфлими, уни жиддий жазолаш керакми? Тергов бундай деб ўйламайди. Ҳасановнинг вояга етмаганга нисбатан қилган ҳаракатлари шаҳвоний шилқимлик (Маъмурий жавобгарлик тўғрисидаги кодекснинг 41-1-моддаси), аёлга нисбатан эса майда безорилик (Маъмурий жавобгарлик тўғрисидаги кодексининг 183-моддаси) сифатида квалификация қилинди.

Хасанов биринчи бўлиб ҳужум қилган аёл, иккинчи жабрланувчининг онасининг сўзларига кўра, судга боришни истамаяпти. Ва уни тушуниш мумкин. Аввалига унга ҳужум қилингани бўйича ишни ёпди-ёпди қилишди, кейин эса майда безорилик сифатида тан олишди. Ҳукуматга ишонч қаердан келсин?

Қизнинг оиласи адвокат ёллаган, бироқ уларга жиноий иш қўзғатиш рад этилди. Ҳасановнинг ҳаракатларида тергов ҳеч қандай зўрлаш мақсадини кўрмай фақат безорилик мақсадини аниқлаган экан. Онанинг сўзларига кўра, ИИБ ва туман прокуратураси уч марта зўравонга жарима солишга уринган.

Фақат охирги судда ишни шаҳар прокурорига назорат қилиш учун топшириш ҳақида қарор қабул қилинди. Прокурор бу шахснинг хатти-ҳаракатларида жамоат хавфини ҳисобга олади ва уни қонун доирасида тўлиқ жазолаш учун ҳамма нарсани қилади, деб умид қилиб қоламиз.

#СукутСақлама #Қонунлар #АдолатТалабҚиламиз

​Шарифа Давронова Осиёнинг энг яхши енгил атлетикачисига айланди

Енгил атлетиканинг уч ҳатлаб сакраш йўналиши бўйича ёшлар ўртасида Осиё ва жаҳон чемпиони, Коня-2021 Ислом бирдамлиги ўйинлари ғолиби Шарифа Давронова Осиё енгил атлетика ассоциацияси томонидан “Йилнинг энг яхши ёш енгил атлетикачиси” деб топилди.

Жорий йил ҳисобидан Осиё миқёсида ёшлар ўртасида ўтадиган мусобақалар якунига етди. Давронова 2023 йил пойтахтимиз мезбонлик қилган Осиё чемпионатида 13.99 метр натижа қайд этган. Бу йил давомида нафақат қитъа, балки жаҳон миқёсида ёшлар тоифасидаги энг юқори кўрсаткич бўлиб турибди.

#СукутСақлама #GirlsEmpowerment

Tashkent Film School “Women Watch Uzbekistan” аёлларнинг кинолойиҳалари акселераторида Марказий Осиёдан касбга биринчи қадам қўяётган аёл киноижодкорлар иштироки учун аризалар қабул қилишни бошлади.

10 та жамоа танлаб олинади. Икки ой давомида менторлар ва таклиф этилган ўқитувчилар иштирокчиларга якка тартибда ва гуруҳларда консультация бериб ўтишади. Ноябрь ойи бошида лойиҳалар халқаро экспертлардан иборат ҳакамлар ҳайъатига тақдим этилади.

Ариза бериш учун режиссёр ва продюссер (ёки ўзи ҳам продюссер бўлган режиссёр) жамоаси шаклини тўлдириши ва қуйидаги ҳаволага ўтиб ўз аризаларини юклаши керак.
Лойиҳасиз продюссерлар қуйидаги ҳавола орқали ариза топшириб кузатувчи сифатида қатнашишлари мумкин.

Аризалар 5 сентябргача қабул қилинади.

👉Қўшимча маълумот бу ерда.

#СукутСақлама

#Ўқувчилардан

Мени ҳеч ким урмаган, калтакламаган. Бир қарашда бахтли болалигим, тўлиқ оилам бўлган, лекин бу бир қарашдан. Кичкиналигимда оилам ростанам тинч бўлган, лекин 15 ёшга тўлар-тўлмасимдан онам отамни кўчада бошқа аёл билан муносабати борлигини билиб қолган.

Шу ондан менинг ҳаётим буткул ўзгарган. Энди уйимизда деярли ҳар куни уруш-тўполон жанжал, бир-бирига захарҳандалик қилган ота-онам. Энг ёмони, мен тўнғич фарзанд бўлганим учун отамни уйда олиб қолиш, уни ўйнашдан қайтариш менинг вазифамга айлангандек эди гўё.

Менга у пайтда бу ташвиш жудаям оғирлик қиларди, нима қилишимни билмасдим. Дунё кўзимга тор кўринарди. Онам юм-юм йиғларди. Отам сен аралашма, дерди. Онам бор, отанг кетиб қоляпти, деб ухлаб ётган жойимдан югургилатиб олиб чиқарди. Ҳатто отамнинг жазманини олдига бориб гаплашиб келишни ҳам менга боришни буюрган онам. Дугоналарим билан борганман, нима дейишни билмаганман у аёлга, бориб фақат йиғлаганман.

Шу тарзда умрим ўтди. Оиламиздаги кайфият қандай бўлиши ота-онамнинг кайфиятига боғлиқ эди. Биз, фарзандлар, зириллаб турар эдик. Бошқа ҳеч нарса ҳақида ўйлолмасдим. Ҳозир оилалиман, анча пайт депрессиямни даволадим. Анча психологоик адабиётлар ўқидим ўзимни қутқариш учун. Чунки мен ўзига жуда паст баҳо берадиган аёл бўлиб қолган эдим.

Ўзим учун бир қоида жорий қилганман, менинг шахсий ҳаётимда нимаики содир бўлишидан қатъий назар, фарзандларим бу ҳақида билишлари шарт эмас. Улар болалигини яшаб ўтишлари лозим. Руҳияти тинч ва хтиржам бола, соғлом муҳитдагина ўқиш ва бошқа қизиқишлари билан шуғуллана олади. Бахтли онагина бахтиёр бола ўстира олади.

==============
Sukut saqlama.uz га келган мактублардан. Сиз ҳам ўз ҳикоянгизни аноним тарзда юборишингиз мумкин: https://forms.gle/ZKCabhpzFM3ewTUz9
__ _ _ _
#СукутСақлама #SukutSaqlama #Ўқувчилардан

"Ойдин нур" шелтери ҳақида кўп ёзганмиз. Унинг бугунги директори Шахноза Махмудовна ўша қўшимча иморат қуриш ва мавжудларини таъмирдан чиқариш орзулари ҳақида ҳамон гапириб келарди. Шелтерда 8 хона мавжуд, унга 20 нафар одам сиғади, лекин баъзан одам кўпайса бир хонага бир неча аёлларни жойлаштиришга тўғри келади. Шахноза шелтернинг ўзида аёлларга касб ўргатишни ҳам йўлга қўйиш ҳақида ўйлаб юрганди.

Орзулар бир кун келиб албатта ушалиши ҳақида билармидингиз? Бугун «ONA» жамғармаси кўмагида шелтернинг иккинчи блоки учун қурилиш ишлари бошланди. Жамғарма оғир вазиятга тушиб қолган аёллар ва болаларга ёрдам беради, «Ойдин Нур» муаммосига ҳам эътиборсиз бўлмади. Ишлар авжида: канализация ўтказилди, хоналар ўртаси бўлинди ва том қисми тайёр.

Лекин шелтерда яшовчи аёлларга рўзғорда керакли буюмлар ҳалиям керак:
-вентиляторлар
-сочиқлар
-идиш-товоқ
-ошхона анжомлари
-кондиционерлар
-телевизорлар
-ўйинчоқлар
-болалар коляскалари
-болалар ва катталар учун каравотлар
-диван.

Буюмларни «ONA» жамғармаси орқали бериб юборсангиз бўлади.

Шелтернинг эски иморати ҳам таъмирталаб. Сиз истаган суммани шелтер ҳисобига ўтказишингиз мумкин. Тўлов тизимларида Ҳайрия қисмида "Она" жамғармасини топиб, "шелтер" учун пул ўтказинг.

#СукутСақлама

Фарғонада 11 ёшли қизча зўрланиб, ўлдирилди

Гумонланувчи сифатида вояга етмаган (2006 й.т.) эркак ушланди. Воқеа содир бўлган куни гумонланувчининг ёнида бўлган икки нафар шерикнинг ушбу жиноятга алоқадорлиги ҳам текширилмоқда.

Бош прокуратуранинг маълум қилишича, қизчанинг мурдаси 20 июль куни Фарғона шаҳар Янги Аср кўчасида жойлашган қурилиши тугалланмаган бино ёнидан зўрлаш ва қотиллик аломатлари билан топилган.

Мазкур ҳолат юзасидан Жиноят кодексининг 97 (Қасддан одам ўлдириш), 118 (Номусга тегиш) ва 119 (Жинсий эҳтиёжни зўрлик ишлатиб ғайритабиий усулда қондириш) моддалари билан жиноят иши қўзғатилган.

#СукутСақлама #болалар #ЗўравонликҚурбонлари

Юрист, фаол Зарнигор Омониллаева ёзмоқда:

Сайёра Дусаева турмуш ўртоғининг вафотидан сўнг ёлғиз ўғлини ўзи катта қилади. Ўғли билан Москва области, Мытищи шаҳрида яшашади. Ўғли мактабга боради. Сайёра эса «Тбилисо» кафесида идиш ювувчи бўлиб ишлайди.

2023 йилнинг 4 январига қадар ҳаммаси барча мигрантларнинг ҳаётидек бир маромда кетаётганди. Иш, бола, документ, рўзғор ва ҳ.к. Ҳамкасблари билан муносабати яхши, ҳеч нарсадан нолиш йўқ.

Фақат 4 январ куни ҳамкасби, 50 ёшли Грузия фуқароси бўлган ошпаз Сайёрага ўринсиз ҳазил қилиб, “кетини” ушлайди. 36 ёшли аёлнинг жахли чиқиб, ошпазни қаттиқ урушиб беради. Буни кутмаган ошпаз Сайёрага ташланиб кетади. Шу тариқа жанжал ошхонада муштлашувга айланади.

Ошпаз Сайёранинг сочидан ушлаб, полда судрай бошлайди. Унинг чангалидан чиқиш учун Сайёра қўлига дуч келган биринчи нарса — ошхона пичоғи билан ўзини ҳимоя қилади ва натижада ошпазга бир неча марта тартибсиз пичоқ санчади.

Ошпаз тез тиббий ёрдам етиб келгунга қадар олган жароҳатлари туфайли кўп қон йўқотиб вафот этади. Сайёра Москва области Тергов қўмитаси тарафидан бир неча соат ўтиб ҳибсга олинади. Унга нисбатан қотиллик моддаси бўйича жиноий иш очилади.

Тожикистон элчихонаси ёрдамида Сайёрага адвокат ёлланади ва судда жавобгарлик моддасини “қотиллик”дан “ўзини ҳимоя қилиш”га алмаштириш учун курашилади.

Аммо Мытищи шаҳар суди Сайёра Дусаевани грузиялик ошпаз ўлимида айбдор, деб топади ва уни 6,5 йиллик қамоқ жазосига ҳукм қилади. Тожикистон элчихонаси Сайёранинг иши бўйича адвокат кассация тартибида шикоят қилишини хабар берган. Шунинг учун кейинги судларда жавобгарлик муддати ўзгаришига умид бор.

Мигрант аёллар учун нафсоният, номусни ҳимоя қилиш нархи — 6,5 йиллик қамоқдаги умр.

#СукутСақлама #Қонунлар

Ижтимоий тармоқларда ёш болаларга нисбатан аҳлоқсиз ҳаракатлар содир этган эркак видеоси тарқалди.

Ҳолат Олмалиқ тумани Дўстлик чойхонаси олдида содир бўлгани айтилмоқда.

Эркак ёнига кичик ёшли ўғил ва қиз болани чақириб, уларни аҳлоқсиз ҳаракатлар қилишга мажбурлаган, шунингдек, ўғил болани қиз билан жинсий алоқа қилишга ундаган.

Камерага ҳолатни олган аёл эркак юзини тўлиқ ёзиб олишга эришди.

Бош прокуратура матбуот котибининг маълум қилишича, суриштирув ишлари давом этмоқда.

Воқеа ижтимоий тармоқларда тарқалгач, эркак шахси бўйича тафсилотлар ҳам маълум бўлди. Исми Фаррух Холмирзаев экан. У уйланган, икки нафар боласи бор. Муқаддам судланмаган. Рухан касал.

Шунинг учун мажбуран даволанишга юборилган.

Тафсилотларни кузатамиз.

#СукутСақлама #АдолатТалабҚиламиз

Фарғонада эр телефонда гаплашгани учун хотинини қаттиқ калтаклаган. Тошкентда хотини ва ёш боласини калтаклаган эркак ҳибсга олинган. Қашқадарё вилоятида отаси 14 ёшли қизини таёқ билан урган. Яна бир эркак Шимолий вокзал яқинидаги бекатда қизга шилқимлик қилган. Ҳуқуқ-тартибот идоралари ходимлари автобусда 13 ёшли қизга тегажонлик қилган нафақахўрни ушлашган.

Олмалиқда ёш болаларни аҳлоқсиз ҳаракатлар қилишга мажбурлаган эркакка нисбатан жиноий иш қўзғатилди

Бу ҳақида Бош прокуратуранинг телеграмдаги расмий каналида маълум қилинди. Хабарда маълум қилинишича, Олмалиқда ёш болаларни аҳлоқсиз харакатлар қилишга мажбурлаган эркакка нисбатан Жиноят кодексининг 129-моддаси (Ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилди.

Мазкур жиноят иши бўйича Олмалиқ шаҳар ИИБ ТБ томонидан дастлабки тергов ҳаракатлари амалга оширилмоқда.

#СукутСақлама #АдолатТалабҚиламиз

Ички ишлар вазирлиги ходимаси Екатерина Воронина спортнинг енгил атлетика тури бўйича эркаклар ва аёллар ўртасида ўтказилган ХV Осиё чемпионати ғолибаси бўлди

#СукутСақлама #СпортдаАёллар #womenempowerment

​Самарқанд вилоятида 45 ёшли эркак салкам 1,5 йил давомида 10 ёшли жиянига уятсиз ҳатти-ҳаракатлар қилган

Nemolchi.uz таҳририятига маълум бўлишича, Самарқанд вилояти туманларидан бирида 2013 й.т. қиз 2022 йилнинг февраль ойидан 2023 йилнинг июнь ойигача ўз тоғаси томонидан зўравонликка учраган. Дастлабки тергов ҳужжатларига кўра, 1978 й.т. Н.Т. қизга зўрлик ишлатиб ва қўрқитиб, яланғоч ҳолатда жинсий аъзоларини кўрсатиб, уни ҳам ечинтириб жинсий алоқа қилишга ундаган.

Эркакка нисбатан ЖК 129-моддаси 3-қисми (Ўн тўрт ёшга тўлмаган шахсга нисбатан уятсиз-бузуқ ҳаракатлар қилиш) бўйича жиноий иш қўзғатилди. Унга кўра 5 йилдан 8 йилгача қамоқ жазоси кўзда тутилган. Айни пайтда эркак ҳибсга олинган.

Nemolchi.uz таҳририяти Бош прокуратурага мурожаат қилиб, мазкур ишни ўз назоратига олиш ва барча ҳолатларни текширишни сўраб қолади. Эркак қизчани "жинсий алоқа қилишга ундагани"ни ҳисобга олсак, унинг ҳатти-ҳаракатлари ЖК 119-моддаси 4-қисми билан ҳам квалификация қилиниши мумкин (ўн тўрт ёшга тўлмаган шахсга нисбатан). Олий суд пленумининг бундай ишлар бўйича қарори 8-бандига кўра: «... жинсий эҳтиёжни ғайритабиий усулда қондириш жинояти тегишли жиноят таркибининг объектив томони сифатида назарда тутилган жинсий алоқа ёки жинсий эҳтиёжни ғайритабиий усулда қондиришга қаратилган ҳаракатлар бошланган пайтдан, улар тугатилганлигидан ва келиб чиққан оқибатлардан қатъий назар, тамом бўлган ҳисобланади».

Қиз узоқ вақт давомида зўравонликка учраганини инобатга олсак, унга энг камида психологик ёрдам керак. Давлатимиз буни таъминлашига умид қиламиз.

#СукутСақлама #Болалар #АдолатТалабҚиламиз

Алимент пулини камроқ тўлаш учун қоровул бўлиб оформить қилиб олган нокас оталар ҳақида кўп эшитганмиз. Аслида Оила кодекси бўйича бундай иш тутишдан фойда йўқ эканлиги ҳақида видео тайёрладик.

📹Видео👉 https://youtu.be/PbiA0pSpM_8

​#Ўқувчилардан

Ёшим 20да, 2-курс талабасиман. Синфдошларимга нисбатан ўзимда сал ҳаракат борлиги учун бир амаллаб улардан фарқли равишда ўз кучим билан ўқишга кирдим. Бўлмаса ота-онам 11 синфдан кейин эрга берворишарди.

Ўтган йили онамнинг бир қариндошига (умримда кўрмаган-танимаган инсонимга) фотиҳа қилишди. Йигит Россияда, кўрмай билмай розилик беришди, қариндошчилик узилиб кетмасин деб. Йўқ десам, сени ҳаққинг йўқ қаршилик қилишга, деб тазйиқ ўтказишди. Унаштирилганимга 9 ой бўлганда у келди, аммо умуман мени дунёмга тескари инсон, фақат иккаламиз ёлғиз қоладиган жойга таклиф қилаверади (албатта мен розилик бермадим).

Ўша 1 йил мен учун ғирт жаҳаннамдай ўтди. Орада бир жанжал чиқиб ҳатто онам ҳам фотиҳани қайтарамиз, деди, аммо дадам менга одамларнинг гапи муҳим, менга деса ўлиб кетмайсанми деди. Мен у инсонга турмушга чиқолмайман десам, ўз ота-онам мени калтаклаб айтмаган гаплари қолмади (калтаклаш ҳолати биринчи марта эмас).

У ёқда унинг гаплари, ҳамма қариндош-уруғ тазъйиқи. Илтимос, менга маслаҳат беринг ёки ўз жонимга қасд қилиш даражасига ҳам етдим. Агар ростдан мени шу инсонга мажбурлаб узатишса тўй куни ўзимни ёқвораман, нима қилишга ҳайронман, менга йўл кўрсатинг.

❗️Лойиҳадан: Аноним, бизга психологик ёрдам боти орқали ёзинг: @nemolchibot

==============
Sukut saqlama.uz га келган мактублардан. Сиз ҳам ўз ҳикоянгизни аноним тарзда юборишингиз мумкин: https://forms.gle/ZKCabhpzFM3ewTUz9
__ _ _ _

#СукутСақлама #SukutSaqlama #Ўқувчилардан