▫️حیرصلنمه‌یین! سیزه عائید اولمایان شئیلره نییه حیرصلنه‌سینیز آخی؟!

📚 بیر ساواشین تصویری
#فرانتس_کافکا
#شعر_اوجاغی
@SheirOcagi

▫️تانری وارمیش کیمی یاشاییب اؤلدویومدن سونرا یوخلوغونو آنلاماغی، تانری یوخ کیمی یاشاییب اؤلدویومدن سونرا وارلیغینی آنلاماغا ترجیح ائدیرم.

#آلبر_کامو
#شعر_اوجاغی
@SheirOcagi

▫️منیم منه سسسیزلیگیم،
قورخودور منی.
بوش‌وئرمیشلیک عارسیزلیغیم،
قورخودور منی.

بوگون وارلار، صاباح یوخلار،
وارلیقلی‌لار، مولکو چوخ‌لار.
آج'ی سئیر ائدییور توخ‌لار،
قورخودور منی.

«نورشانی» سؤندو چیرا'سی،
آیلیق گلیر ائو کیراسی.
آتوم چاغین فوقَراسی،
قورخودور منی.

#علی_نورشانی
#شعر_اوجاغی
@SheirOcagi

▫️بختیار

کولک قاری سپه‌لر، بختیار!
آغ گئیینیب تپه‌لر، بختیار!
گئجه قارا، یول اوزاق، قارداشیم!
گؤیلر بولود، چؤل-دوز آغ، قارداشیم!

کامان چالان کیم‌دیر او، بختیار؟!
کولک‌دی، یا سیم‌دیر او، بختیار؟!
هنیرتینی دویدومو کهَرین؟
توفنگینه یاپیشدی اللرین.

دوشمن اون بیر، تکجه سن، نه ضرر؟!
تنلیک* ایشاره‌سی‌دیر گوللـه‌لر.
گنجلیک حیات شیرین‌دیر، قارداشیم!
وطن قات-قات شیرین‌دیر، قارداشیم!

ایللریمین بالاسی، بختیار!
قلبی وطن قالاسی، بختیار!
قورتاریرسا عسگرین گوللـه‌سی،
سیلاحی‌دیر قلبینین کین سسی.

محو ائتدین اون یاغینی، قهرمان!
قان سیزیردی سنین ده یاراندان.
بوغازینی ضابیطین گمیردین،
ایراده قووّتین‌له دمیر'دین.

غالیب نغمه سس‌لنیر، قارداشیم!
غالبیّت نغمه‌دیر، قارداشیم!
کامان چالان کیمدیر او، بختیار؟!
کولک‌دی، یا سیم‌دیر او، بختیار؟!

آدین بو نغمه‌لرده نقَرات،
دوستلار گئدیر جبهه‌یه، راحات یات!
باخ، قیزاریر اوفوق‌لر، قارداشیم!
بیزیم‌دیر گونش، ظفر، قارداشیم!

سن قورودون وطنی، بختیار!
وطن اونوتماز سنی، بختیار!
بوندان سونرا فخر ایله آنالار،
کؤرپه‌سینه آد قویار: بختیار.

#رسول_رضا
* برابرلیک، معادله
#شعر_اوجاغی
@SheirOcagi

▫️کومسومول پوئماسی5

ایلک تسلیم

آزاجیق کئچمه‌دن سولار قارالدی،
ساحیلده بیر درین سسسیزلیک واردی.
او تایدان بو تایا ایشیقلار گلیر،
توستولر بورولوب گؤیه یوکسه‌لیر.
«گرای» بَی گؤزونو زیلله‌ییب اونا،
وارلیغی داش کیمی قالمیشدیر دونا.

اوچونجو گوندور کی قولوندا یارا،
کاریخیب، وورنوخور دؤرد بیر دیارا.
گورولتو قوپدوقجا آج معده‌سیندن،
دیکسینیر سولارین اویناق سسیندن.
نه‌لر کئچدیگینی او دویا-دویا،
اؤزونو توللاماق ایسترکن سویا،
قالیب پنجه‌سینده ناموس‌ لا عارین،
آت کیمی سیچرایان آغ دالغالارین،
قوینونا گؤزلری دیکیلیب قالیر،
قلبینده حسرتی، کینی چوخالیر.

سونرا گؤزلرینه گؤرونور بیردن،
ساحیله گؤز چکن گمیچی «بهمن».
- «سنمیسن، آی بهمن؟!»
+ «کیمدیر سوروشان؟»
- «منم، بیر باری گل!» سؤیله‌ییر گرای.
+ «بو کی، تانیش سسدیر» دئیرکن بهمن،
فیرلانیب گئرییه، یؤنه‌لیر همن:
+ «وای! سنی خوش گؤردوک، هارادان بئله؟
بو نامرد وطنه... بو نامرد ائله،
یئنه‌می اوز قویوب سالام وئریرسن؟»
- «حاقلیسان، آی بهمن، سؤزلرینده سن!
فقط نه ائتمک کی، بئله‌دیر اینسان،
عزیز دوستلارینا کوسر بیر زامان،
سونرادان غؤور ائیلر¹ اسکی یارالار.»
+ «یوخسا، بو گلمکده بیر فیکرین‌می وار؟»
- «اونسوز اولورمو هئچ؟!... واردیر، شوبهه‌سیز.
بو ائل، بو گوذَران، بو من، بو دا سیز،
گلین کؤمک‌له‌شک، گؤرک نه اولور!
آختاران دونیادا هر حاقّی بولور-
دئمیشلر بابالار».
+ «بو دوغرو... لاکین،
بیر آز حؤوصله‌نیز اولماسا ساکین،
یئنه ده گوناهسیز قانلار آخاجاق.
بوراخ بو ترسلیگی، گل آللاها باخ!»
گؤزآلتی سوزه‌رک قوجا بهمنی:
- «سونرا دانیشاریق... هله‌لیک منی،
دوز-چؤرک عشقینه کئچیر ساحیله!»
دئییب، گمیچینی توتاراق دیله،
«کئچرسن!» دئیه‌رک قیشقیردی بیردن.

دونَندن گرای'ین ایزی‌یله گلن،
کومسومول² بختیار، یانیندا جلال:
«اولسون اینقلابا قانیمیز حلال!»
دئییب وئرمیشدیلر یئنه باش-باشا،
گرای اؤز یئرینده دؤنموشدو داشا.
ایسته‌دی الینی آتسین ناقان'ا،
گؤردو کی، ناقان'ی باتمیشدیر قانا.
حیرصیندن بوزاریب گؤزلری دولدو،
عؤمرونده ایلک دفعه او تسلیم اولدو.

#صمد_وورغون
¹-درین‌لشمک
²- کومونیست گنجلر بیرلیگی اؤیه‌سی
#شعر_اوجاغی
@SheirOcagi
داوامی وار.

▫️سنده قار،
منده یاغیش.
سن دامجیلار قدر چوخ،
من قاردان آدام قدر یالنیز.

#کنعان_اوغان
#شعر_اوجاغی
@SheirOcagi

▫️ایمان گتیرمک دوشونمکدن داها قولای‌دیر. بو اوزدن مؤمینلرین سایی مودریک‌لرین ساییندان داها چوخدور.

#برتراند_راسل
#شعر_اوجاغی
@SheirOcagi

▫️اورالارا قار یاغسا
منه توخودوغون شالی
قار آدامی‌‌نین بوینونا سال
اؤز گؤزلرین‌له گؤر
اریییب یوخ اولدوغومو
گؤرورسن؟!
اؤلولردن کیم‌لری مزار ایسته‌مز
قار آدامی کیمی

#سیدحیدر_بیات
@SheirOcagi

▫️قار آدامی کیمی‌سن
اوزاقدان سئویم
سنی گرک؛
قوجاقلادیقجا الیمدن گئدیرسن...

#نزار_قبانی
@SheirOcagi

▫️حرب‌زده‌لره

ائی گؤرونمز دوست ائلیندن گلن قوش!
هانسی موردار اللر ییخمیش یووانی؟
غریب‌میسن؟ یوخسا نه‌دیر بو دوروش؟
الیندن‌می آلدی اووچو بالانی؟
اووچو! گؤروم بالان سنه قالماسین،
اکدیک‌لرین سولسون، کؤلگه سالماسین!

غریب باجی، گؤزون نه‌دن یاشارمیش!؟
اؤپمه‌دین‌می نیشانلینی دویونجا؟
فلک سنه نه ایسترسه یاپارمیش.
آغلادین‌می قاچدیغین یول بویونجا؟
دیکمه گؤزون هر یالقیزجا مزارا،
گئدن گلمز، باجیم، باخما یوللارا!

آشیقلاردان سس یوخ، سازلاری قالمیش،
چوبان! سورون هانی؟ توزلاری قالمیش.
ائللر کؤچ ائیله‌میش، ایزلری قالمیش.
یوللاری قار باسمیش، یوخ گلیش-گئدیش،
سیزه نه چوخ آغیر کئچدی بو ایل قیش!

باخدیم او یئرلرده، بولودلار آغلار،
مزارلیغا دؤنموش باغچالار، باغلار.
مارالسیز قالدینیز، آ قارلی داغلار!
توتان اولسا سیزدن مارال سوراغی،
گؤره‌جک کی، هر یئر دوشمن یاتاغی.

نیشان مجلیسینده شربت کاساسی-
قیریلمیش، یئرلره شربت تؤکولموش.
باخدیم، چالیر سازلار اؤلوم هاواسی،
تویلار قارا گئیمیش، بئللر بوکولموش.
او یئرلرده داها گلین کؤچَرمی؟!
بو قانلاردان عادیل آللاه کئچرمی؟!

دیدیلمیش بدن‌لر، یولونموش ساچلار-
داغیلمیش یووالار گؤرمک ایسترسن؟
قاردان کفن گئیمیش یوخسوللار آغلار،
او ائللرده نه وار، بیلمک ایسترسن؟
سنه بیر کامانچا هر شئیی سؤیلر،
من بیر کامانچایام، تئللریم اینلر:

عزیزیم، آی هار آیلار!
هر هفته‌لر، هر آیلار،
گؤزو یولدا باجیمیز،
«قارداش» دئییب هارایلار.

#احمد_جاواد
#شعر_اوجاغی
@SheirOcagi

‍ ▫️قار آلتیندا حوزون دنه‌مه‌سی

دونیانین ان اوزون حوزنو یاغیر،
یورغون و یئنیلمیش‌ اینسانلیغیمیزین اوستونه.
قار یاغیر و سن گئدیرسن،
آغلار کیمی، یئرییه‌رک گئدیرسن.
بلکه تاپماغا گئدیرسن ایتیردیگیمیز او اینسان و طبیعت چاغینی.

دؤن منه و دینله!
قوشلار اوچوشور ایچیمده.
لوش بیر کمان چالینماسی کیمی،
قوشلارین اوچوشدوغونو ایچیمده،
دون منه و دینله!

قارانلیق دنیزلرین دیبینده،
بعضی اینجی‌لرین اولدوغونو،
بعضی اینجیلره و خاطیره‌لره
نه‌دن باغلی اولدوغوموزو اونوتما!

ائشیت منی و دینله!
دنیزلر بوغوشور ایچیمده.
«اونوتما!» دئییرم، آما سن آنلا!
آنلات بیزیم ده یاشاماق ایسته‌دیگیمیزی اونلارا!

#اردم_بایزید
#شعر_اوجاغی
@SheirOcagi

▫️ماهنالار یوکسَلیشیمیزین ان بؤیوک تورموز و انگللری‌دیر، اونلارا «زامان اوغروسو» دئییلیر.
ماهنالاری حیاتیمیزدان سیلمه‌یی اؤیره‌نک!

📚 مورکّب اثر
#دارن_هاردی
#شعر_اوجاغی
@SheirOcagi

▫️کومسومول پوئماسی6

هومای

«هومای» دوشوندورور، «هومای» آغلادیر،
او نه «تاتیانا»دیر، نه «اوفئلیا»‌دیر.
حیاتا گلدیگی او گوندن بری،
او کوسکون باخیشلی قارا گؤزلری،
نه‌لر دوشوندورور!...
اونون حیاتی،
سئوگیسی، طالئعی، موقدّراتی،
هر زامان آندیریر ورَملی بیر قیش،
بوتون دیلک‌لری گؤزونده قالمیش.

ایجازه وئرسه‌نیز دانیشارام من،
او، قیز خیالینین اینجه‌لیگیندن:
دالدیغی موسیقی، سازلارین سسی،
یا دا کی قوشلارین وحشی نغمه‌سی...
داغلارین دؤشونده گزینن چوبان،
دردلنیب نئیینی چالدیغی زامان،
یاشاریر هومایین قارا گؤزلری،
حیاتا گلدیگی او گوندن بری.
بیلیرم دردینی، بیلیرم نه‌دیر،
هومای، تک آیاقلی بیر قرینه‌دیر.¹

الینه عؤمرونده کیتاب آلمامیش،
بؤیوک شهَرلرده قوناق قالمامیش،
نه بیر دمیر یولو، نه ده بیر قاتار،
گؤرمه‌میش... گئجه‌لر او قاتار-قاتار
اوزانان دورنالار نه‌لر آندیرار؟
هومایین قلبینی نییه یاندیرار؟
بعضاً قونشولاردا آغلاشما سسی،
کندلی قادینلارین ائدیلَشمه‌سی،²
دیل دئییب آغلایان یاسلی گلینلر،
قانادلی ناله‌لر، آهلار، انین‌لر،³
قیزین خیالینی قالدیریب یئنه،
اوچورور گؤیلرین درینلیگینه...
بعضاً ده گؤیلرده قیزارتی وارسا،
اوفوقده بیر قیزیل شیمشک چاخارسا،
قورخوب طبیعتین حیکمت‌لریندن،
هومای آهو کیمی اورکه‌رک همن،
سوخولور چادیرین کونجونه ساری،
گؤزآلتی سئیر ائدیر تا اوزاقلاری.

دونیانین سیرّینی نه بیلیر هومای؟!
بعضاً ده گؤیلری گزن سولغون آی،
یاریب بولودلاری هوجوما چیخار،
اونون سنگری‌دیر سیخ-سیخ بولودلار.
هومای بو لؤوحه‌دن ماراقلانیر پک،
آیین آرخاسینجا فیکیرلشه‌رک.
نهایت یورولور، کوت‌لشیر باشی،
دونوب کؤلگه‌لنیر مأیوس باخیشی.
بیلیرم دردینی، بیلیرم نه‌دیر،
هومای تک‌آیاقلی بیر قرینه‌دیر.

او هر گون اویانیر قوشلاردان قاباق،
یاخین بیر تپه‌نین اوستدن آشاراق،
ترپه‌نیر ساحیله، بولاق باشینا،
قویوب سهَنگینی ساحیل داشینا،
سئیر ائدیر سس‌لنن اورمانلیقلاری،
پوزور ساچلارینی سحر روزگاری...

#صمد_وورغون
¹- قرینه ۳۳ ایل، دؤرد آی‌دیر. (شاعیر، هومایین ۱۶-۱۷ یاشیندا بیر قیز اولدوغونو دئمک ایسته‌ییر.)
²- بیرلیکده اوخشاما دئمک
³- اینیلتی، زاریلتی
#شعر_اوجاغی
@SheirOcagi
داوامی وار.

▫️سن اولمایاندا،
«سئوینج» آنلامسیز بیر سؤزدور،
«سنی سئویرم» بوغازیمدا دیغلایان بیر سیرّ.

سنسیز نئجه توتولماسین اوره‌ییم؟!
بورادا ساعات، گوزگو، هاوا سنه دوشکون‌دور.

#حسین_منزوی
#شعر_اوجاغی
ترجومه
@SheirOcagi

▫️دنیزه قار یاغیر.

دنیزه قار یاغیر، اوشویور دنیز،
دورموشام بیر ساحیل داشینین اوسته.
بلکه اللریمی چتیر ائیله‌ییم،
ساخلاییم دنیزین باشینین اوسته.

بلکه هئچ قار دئییل یاغان بو قار دا،
بلکه گؤیدن یاغیر آغ-آغ چیچک‌لر.
دنیزه قار یاغیر، دنیر قوشلاری-
بو قاری دن بیلیب دن‌له‌یه‌جکلر.

دنیزه قار یاغیر، اوشویور دنیز،
یالین آیاغینا چکمه ایسته‌ییر.
دوروب پنجره‌دن باخان او قادین،
دنیزی گؤزونه چکمک ایسته‌ییر.

#علیزاده_نوری
#شعر_اوجاغی
@SheirOcagi

▫️بو آریقلیق پهریزدن دئییل.
بو یئکه‌پر آریقلیق، بو کؤک آریقلیق،
داریخماغین «کؤک‌آلتی‌»¹دی،
تکلیگین «کوب»²ودو،
آیریلیغین «کوادرات»³ی‌دی.
کئچمیشین یانیندا الیمیز آشاغی‌دی
گونو-گوندن قیمتی قالخیر خاطیره‌لرین.
یاددان چؤله چیخمیر خاطیره‌لر،
ماما اوشاغی‌دی.
آلزایمر خسته‌سی چیخدی سئودیکلریمیزین چوخو.
هانسی «مؤعتریضه‌»⁴نی آچساق،
اونلار اوردادی.
هانسی «مؤعتریضه‌»نی باغلاسالار،
بیز اوردا یوخوق.
بارماق سایی قدر گولدوک،
حئسابلایا بیلمه‌دیک یاناغیمیزدان آخان نئچه‌نجی گؤز یاشی‌دی.

مین آداملیق اوره‌ییمیز وار ایدی،
بیر سئودالیق یئریمیز،
بیر خیانتلیک جانیمیز وار ایدی.
اؤلدوک...
بیز اؤلمه‌میشدن اوّل،
بیر باخیش بس ایدی سویوغون ایسینمه‌یینه،
قیشین کئچمه‌یینه.
بیر اؤپوش بس ایدی بوتون اورقانلارین بوتون اورقانلارا کؤچمه‌یینه.
هر شئی بسیمیز ایدی.
نه قدر کی سئوگی بیزیم هر شئییمیز ایدی،
نه قدر کی بیز سئوگینین هئچ نه‌یی دئییلدیک،
اینانمیردیق آمئریکان فیلملرینه،
آلدانیردیق هیند کینولارینا.
چونکی ضعیفین غالیب اولاجاغینا امین ایدیک،
چونکی سیچان همیشه پیشیگین باشینا ایتین اویونونو آچیردی،
چونکی «جئری»نین الیندن بئزمیشدی «تام».
اوسته‌لیک ائویمیزین دامی دا اوچمامیشدی باشیمیزا.
قازانچالاری دوزمه‌میشدیک یاغیشین آلتینا،
ایسلانماماق اوچون ائودن قاچمامیشدیق.
کاسیبلیغی هر شئییندن تانیییردیق:
جورابیمیزین ییرتیغیندان،
آیاق‌قابیلاریمیزی دئشیگیندن تانیییردیق.

کیشی کیمی‌یدی آنامیز.
آنامیز اولماسایدی آتاسیز بؤیویردیک.
باجیمیز اولماسایدی، قارداشیمیز اولمازدی.
قونشوموز اولماسایدی، قوهوم نه‌دی‌، بیلمزدیک.
سئوگیلیمیز اولماسایدی هامیدان خوشبخت یاشایاردیق،
بیر خیانتلیک جانیمیز وار ایدی چونکی.

ایندی بو آریقلیق بیر آز دا اوزاقلاشماق‌دی خاطیره‌لردن و سئودیکلریمیزدن،
و بو اوزاقلیق بیر آز دا یاخینلاشماق‌دی
خاطیره‌لره و سئودیکلریمیزه.
چونکی بیز آریقلادیقجا جانیمیز بیر آز دا هوپور ایچیمیزه.
ایندی بو آریقلیق پهریزدن دئییل،
آیریلیغین «کوادرات»ی‌دی بو، تکلیگین «کوب»و...

#ائلوین_باکیراوغلو
¹- جذر
²- اوچ دفعه اؤزونه چیرپیلان عددین حاصیلی- مکعب
³- بیر عددین اؤزونه وورولماسیندان حاصیل اولان عدد- مربّع
⁴- پارانتئز
#شعر_اوجاغی
@SheirOcagi

دیالوق

▫️- پول خوشبختلیک گتیرمز، آما «مرسدس»ده آغلاماق، چارخ‌ اوستونده آغلاماقدان داها قولای‌دیر.

🎬 Legend of the Lost
1957 ایتالیا-آمریکا
#هنری_هاتاوی
#شعر_اوجاغی
@SheirOcagi

▫️دوستونون الینی سیخماق ایسته‌ییرسن، آما سنین ایره‌لی اوزانان الین اختیارسیز حالدا یانینا دوشور، صیفتینده‌کی گولومسه‌مه کئچیر؛ سونرا اطرافیندا هئچ کیم اولمادیغینی، تک اولدوغونو آنلاییرسان.

📚 تاتار چؤلو
# دینو_بوتزاتی
#شعر_اوجاغی
@SheirOcagi

▫️آخشاملار

اؤلکه‌نیزده وارسا سیزین بیر غریب،
باخین گؤزلرینده نه وار آخشاملار!
غریبین حالینی وطندن اسن-
تانرینین یئللری سورار آخشاملار.
‌
قاییق قوجاغیندا، دنیز اوزونده،
دالغانین نغمه‌سی دئییل گؤزونده.
بیر شئیلر سؤیله‌ییر، اونون سؤزونده-
کؤنول بیر اینجه‌لیک دویار آخشاملار.

آچماییر دردینی غریب، بیر کسه،
قولاق وئریب دورور هر یانیق سسه.
وطن موژده‌چیسی روزیگار ایسه،
بعضی گونلر اولور سوسار آخشاملار.

بیر سؤز ایسمارلامیش¹ بلکه یار ائلی،
نه‌دن آنلاشیلماز قوشلارین دیلی؟
سانکی بوغماق ایستر گؤز یاشی سئلی،
غریبین گؤزلری یاشار، آخشاملار.

آخشام اونا کدر، اونا دوشونجه،
توخونمایین، غریب قلبی چوخ اینجه!
یوللارلا سؤیله‌شیر مکتوب گلینجه،
اونونچون یوللارا باخار آخشاملار.

عجب، یوخ‌مو اونون باغچاسی، باغی،
گوللره باخماییر، گول سولو-ساغی.
سن، ائیله گل، اونو سانما بایاغی²،
نئجه دویمادین‌می، جوشار آخشاملار؟

ائی او یانیق قلبین ائلی، وطنی!
وارمی سنده اونون حالین سورانی؟
عجب، ساغ‌می اونلار، وارمی قالانی؟
وارسا سؤیله، قلم یازار آخشاملار!

#احمد_جاواد
¹- تاپشیرماق
²- قابا، لیاقتسیز
#شعر_اوجاغی
@SheirOcagi

▫️کومسومول پوئماسی7

بیر آز دا «هومای»ین آخشاملاریندان:
قارانلیق، دؤشونو گردیگی زامان،
اونون دا روحونا قارانلیق چؤکور،
چیرماییب قولونو، ایته یال تؤکور.
قاپینین آغزیندا پالتار-پالازدان،
نه وارسا ایچری گؤتورور آستا.
جئهیز صاندیغینا بیر قیفیل وورور،
هومایین گونده‌لیک ایشلری بودور.

ال-آیاق ییغیشیر، هامی اَیلشیر،
عاغلینا گلَنی دانیشیر بیر-بیر.
کیشیلر دم وورور پهلوانلیقدان،
گولَشدن، گوللـه‌دن، اؤلومدن، قاندان.
قوجالار قیزیشیر، دانیشیر هردن،
«زال» اوغلو «روستم»ده اولان هونردن.
سونرا «کوراوغلو»دان، بیر ده «قیرآت»دان...
اینسان یورولمادی بو خاطیراتدان...

«موللا نصرالدین»ین مضحکه‌لری،
ائللرین آغزینا دوشندن بری،
اوشاقلار دا اونو سئوه‌رک اوخشار،
دونیانین غریبه ماجراسی وار...

سونرا قادینلار دا نؤوبه‌یله بیر-بیر،
قوهومدان، قونشودان غئیبت ائله‌ییر:
«آی قیز! «گول‌جامال»ین توتاری یوخدور،
بو قوجا واختیندا هئچ عاری یوخدور.
یئنه سیرغالانیر، سیغاللانیر، باخ!
دئین، ار آختاریر بو قوجا سارساق.»
رنگ آلیب رنگ وئریر، گؤزلرین آیدین!
بو ساختا سؤزلری دئین بیر قادین.
اوینادیر قاشینی، سوزور گؤزونو،
گولونج بیر شکیله سالیر اؤزونو.
آلتمیش ایل‌دیر کی صنعتی بودور،
سحر دئدیگینی آخشام اونودور...

هومای خوشلاماییر بو صؤحبت‌لری،
اَیرینی، دوغرونو سئچَندن بری.
سونرا سوفره گلیر، اوتوروب یئردن،
قاتیقدان، قایماقدان، یاغدان، پئندیردن،
نه وارسا یئییلیر، اوستوندن ده چای...
هامیدان آز یئییر، آز ایچیر هومای.
ایشتاهی اولسا دا هئی چکینه‌رک:
«قیز اولان بنده‌لر آز یئسین گرک!»

هومای دوشوندورور، هومای آغلادیر،
او نه «تاتیانا»دیر، نه «اوفئلیا»دیر.
حیاتا گلدیگی او گوندن بری،
او کوسکون باخیشلی قارا گؤزلری،
نه‌لر دوشوندورور!
اونون حیاتی،
سئوگیسی، طالئعی، موقدّراتی،
هر زامان آندیریر ورم‌لی بیر قیش،
بوتون دیلک‌لری گؤزونده قالمیش...
بیلیرم دردینی، بیلیرم نه‌دیر،
هومای تک‌آیاقلی بیر قرینه‌دیر.

#صمد_وورغون
#شعر_اوجاغی
@SheirOcagi
داوامی وار.