▫️آغلاما!

آغلاییرسان، ایندی آغلا،
منی اؤلنده آغلاما!
قبریم اوسته گوللر سولوب-
خزان گلنده آغلاما!

سیخیلما یاس ساخلایاندا،
گئییب قارا باغلایاندا!
آغلا دوشمن آغلایاندا،
دوستلار گولنده آغلاما!

گؤزل داوران، گؤزل اینله،
داریلما درد گؤزَلین‌له!
گؤز یاشینی اؤز الین‌له،
اؤزگه سیلنده آغلاما!

اؤز طامی وار، اؤز تهَری،
اؤلوم عؤمروم سون بهَری.
گیزله گؤزوندن قهَری،
گؤزون بیلنده آغلاما!

آخشام شری، سحر دانی،
سنینله بؤلدوم هر آنی.
سونونجو دفعه دونیانی،
یاری بؤلنده آغلاما!

#رامیز_قوسارچایلی
#شعر_اوجاغی
@SheirOcagi

▫️سئون کیشینین ویجدانی، سئویلن قادینین قورویوجو مله‌یی‌دیر.

📚 گولن کیشی
#ویکتور_هوگو
#شعر_اوجاغی
@SheirOcagi

▫️بیری بویوروق ائتمک اوچون دونیایا گلر، بیری بویوروقلارا بویون اَیمک اوچون؛
من‌سه عوصیان ائتمک اوچون دونیایا گلمیشم.

#ارنستو_چگوارا
#شعر_اوجاغی
@SheirOcagi

▫️چای کناریندا بیر نفر عابد،
حقّه اولموشدو شوق ایله ساجد.

گؤردو بیر کلّه سو اوزونده عیان،
آپاریر چای آشاغی سیلِ روان.

دوروب عابد او کلّه‌یه یئتدی،
کلّه‌نین حالینی سؤال ائتدی.

او قورو کلّه نیطقه گلدی روان،
دئدی: «ای عابدِ فرشته‌نشان!

شاه ایدیم من جهاندا عزّت ایله،
روزگاریم کئچیردی شوکت ایله.

تاج ایله تخت و دولتیم وار ایدی،
گنج و زرّ و رعیّتیم وار ایدی.

هر طرف ایشلر ایدی فرمانیم،
خوش کئچردی همیشه دورانیم.

مجلسیمده مدام جامِ شراب،
ساقی و باده، چنگ و تار و رباب.

نئچه زرّین‌کمر غلام‌لاریم،
حاصل ایدی جهاندا کام‌لاریم.

مجلیسیم خُلد، باده کوثر ایدی،
هر مراد ایسته‌سم- میسّر ایدی.

ائیله‌دی دهر عیشیمی برباد،
مرغِ روحه اجل اولوب صیّاد.

منزلیم تا که بیر مغاک اولدو،
بدنیم دؤندو تیره خاک اولدو.

قبریمی سیل هم فنا قیلدی،
منی بو حالا مبتلا قیلدی»...

«سیّد»ا، بیر دیاردیر بو فنا،
که برابردیر اوندا شاه و گدا!

#سیدعظیم_شیروانلی
#شعر_اوجاغی
@SheirOcagi

#اطلاعیه‌ی_ادبی

ادبای عزیز و سروران گرامی، اولین جلسه شعرخوانی و نقد شعر، #چهارشنبه ۴۰۳٫۲٫۱۲ راس ساعت: ۴:۰۰ بعد از ظهر در سالن اجتماعات اداره‌ی فرهنگ و ارشاد اسلامی برگزار خواهد شد.
حضور اساتید و دوستان مایه دلگرمی ماست.

لطفا اطلاع‌رسانی کنید.

روابط عمومی انجمن شعر و ادب استاد شهریار شهرستان پارساباد مغان
#شعر_مغان
@sher_mughan

▫️هئچ بیر ایلیشکی یالنیزلیغی آرادان آپارا بیلمز.
هر بیریمیز دونیادا یالنیزیق.

#اروین_یالوم
#شعر_اوجاغی
@SheirOcagi

▫️عشق ایدی او.

عشق ایدی او، دَییشدیرن بوتون گئجه‌لریمی.
عشق ایدی او، منی دوروب یئنی‌له‌ین.
او ایدی، دویغولو ائدن سرت اللریمی.
او ایدی، دؤرد نالا گئدیشیمه «دور!» دئین.

بیر بیچاغین کسکین اوزونده قان لکه‌سی‌یدیم،
عشق ایدی یئنه منی یویوب آریدان سو.
بؤیله آغ، پاک اولاجاغیمی بیلیرمی‌یدیم-
ایچیمده آچماسایدی او سئومک دویغوسو؟!

من بیر دوستاغام ایندی سئوگییه، کؤنوللو.
چؤزمه‌یین اللریمی، زنجیرلریم قالسین!
گؤرسون پرانقالاریم* او دوغاجاق گونو،
و بو دونیایا عشق دولو شعرلریم قالسین!
سنینله هر یئرده گؤزل، هر زامان یئنی،
ایسته‌مم... سنسیز خاطیرلاماسینلار منی!

#اومید_یاشار_اوغوزجان
* آغیر جزا وئریلمیش توتوقلولارین آیاقلارینا تاخیلان قالین زنجیر
#شعر_اوجاغی
@SheirOcagi

▫️آییل ائی کارگر!

آییل، ائی کارگر، بس‌دیر، گؤز آچ بیر خواب غفلتدن!
جهاندا مرحمت اومما بو قانوندان، بو دؤولتدن!

سارالدین گول کیمی، سولدون، ازیلدین، پایمال اولدون،
بوکولدو قامتین غمدن، قوجالدین درد و مؤحنتدن.

همیشه گؤزلرین گریان، سویوقدا آج-سوسوز، عوریان،
داش اولسا دیل‌لنر اینسان، گلر جانه بو ذیلّتدن.

الین بوش، ائوده اؤولادین-عیالین هر شئیه حسرت،
سنی دیندیرسه‌لر دینمه، قیزار شرم و خجالتدن!

سنین سایه‌نده ظالیملر توتوب کاشانه‌ده مسکن،
آلیر اؤز کامینی هر گون ملَک‌منظر بیر آفتدن.

ایچر مئی، مست اولار دائیم، خیاباندا وورار وولتا،
قیزارمیش گؤزلری هردم شیشر افراطِ شهوتدن.

دئییلسن کیمسه‌دن اسکیک، دئمک اولماز بونا دیرلیک،
سنی آزاد ائدر «بیرلیک» بو زنجیرِ اسارتدن.

#محمد_بی‌ریا
@SheirOcsgi

▫️بعضاً بونو قبول ائتمه‌یه مجبوروق: بعضی آداملار بیر تک اوره‌ییمیزده قالا بیلرلر، حیاتیمیزدا دئییل.

#سیلویا_پلات
#شعر_اوجاغی
@SheirOcagi

▫️آتا-آناسیز دوغولمادیم گؤبه‌لک کیمی.
گؤبه‌لک کیمی بؤیودوم، آما گؤبه‌لک کیمی تئز ییخیلمادیم. هر یئرده بیر شئه وار ایدی، ایچیمه چکدیم؛ منی سوواران کیمسه اولمادی.
بؤیودوم... اییده آغاجی کیمی اَیری-بویرو، آز سویا راضی و آزربایجان کندلرینین اؤیرتمنی اولدوم.
آتام دئییر: ایرانی ایرانلی‌لار آراسیندا بؤلسه‌‌یدیلر، سنین پایینا بوندان آرتیق دوشمزدی.

#صمد_بهرنگی
#شعر_اوجاغی
@SheirOcagi

▫️آ بنؤوشه‌م منیم!

او نه بویلانیشدی، دولموسان یئنه،
آ بنؤوشه‌م منیم، سۆسَنیم منیم!؟
اؤزو بو دونیانی سئودیریب منه،
اؤزو بو دونیادان کۆسَنیم منیم!

گؤر بولاق دره‌یه نه دیل آچدیریب!
تنها داشلارا دا کؤنول آچدیریب.
حسرتی گؤزومده گول-گول آچدیریب،
غؤنچه دوداغینی بۆزَنیم منیم.

گئجه‌لر رنگ آلیر قارا تئلیندن،
قارا منسیزلیگی دارا تئلیندن!
دوشوب اوره‌ییمه یارا تئلیندن،
تئل-تئل اوره‌ییمی اۆزَنیم منیم!

درده ده تک دؤزور جانیم، جان کئچیب،
غوروبا ائنیرسن دانیمدان کئچیب.
اۆز-اۆزه گلنده یانیمدان کئچیب
منی یوخولاردا گزَنیم منیم!

ائه... بو دا بیر عشقین آیری داغلاری،
اوشویور کؤلگه‌سی آیلی چاغلارین.
دۆزۆب ظولوم-ظولوم آیریلیقلاری،
اوستونده مئه کیمی اسَنیم منیم،
آ بنؤوشه‌م منیم، سۆسنیم منیم!

#رامیز_قوسارچایلی
#شعر_اوجاغی
@SheirOcagi

▫️عشقدن اؤنجه

گونلردن بیر گون،
یا بازار ائرته‌سی، یا آراگون،
سون قوروشوما قدر ایچه‌جه‌یم؛
یئنه خاطیریمه سن گله‌جکسن،
اوتوروب آغلایاجاغام.

#اومید_یاشار_اوغوزجان
#شعر_اوجاغی
@SheirOcagi

▫️هر گئدن گلمیش، منیم اول غمگساریم گلمه‌میش،
ای گؤزوم، قان آغلا کیم، چشمی خماریم گلمه‌میش!

گئتمیش ایدی اختیاریم بیله‌سینجه یاریمین،
چونکی یاریم گلمه‌میش، هم اختیاریم گلمه‌میش.

من بو‌ درد ایله اگر اؤلسم، مزارا قویمایین،
اوستومه اول طوطی‌دیللی، شوخ نگاریم گلمه‌میش!

حسرتیندن زعفرانه دؤنسه رویوم، یوخ عجب،
قویموش هجراندا منی بیر گلعذاریم، گلمه‌میش.

دئمه‌سین «واقف!» اجل، کیم گلسه مندن جان آلار!
کیم‌دیر اونا جان وئرن، فرمانِ یاریم گلمه‌میش؟

#موللاپناه_واقف
#شعر_اوجاغی
@SheirOcagi

▫️عاغیل‌لی ایشینه باخار، عاغیل‌سیز دیشینه.

#آتا_آنالار_سؤزو
@SheirOcagi

"سیز ده بیر اونودولموش آتا-آنا سؤزونو آرتیرین👇"

▫️اونون سیخینتیسی او قدر اوزون سوردو کی، یاخینلاری بو دوروما آلیشیب اونون چوخ عذابدا اولدوغونو اونوتدولار.

📚 خوشبخت اؤلوم
#آلبر_کامو
#شعر_اوجاغی
@SheirOcagi

دیالوق

▫️- اینسان آغلایاراق دونیایا گلیر، یئترینجه آغلادیقدان سونرا دا دونیادان کؤچور.

🎬 Chaos
2005 آمریکا
#تونی_گیگلیو
#شعر_اوجاغی
@SheirOcagi

▫️وارلی، ان اوجوز شئیلردن لذّت آپارا بیلن‌دیر.

#هنری_دیوید
#شعر_اوجاغی
@SheirOcagi

▫️«هئچ بیر شئی یئر اوزونده قالارغی دئییل، عشقدن باشقا.»
بونا اینانماق ایسته‌ییرم.

#روبر_دسنوس
#شعر_اوجاغی
@SheirOcagi

▫️وَ

و بو آغ قارالار،
و قارا آغلار...
و بو آغ اۇرالار،¹
و قارا تاغلار...

و بو آغ سرچه‌لر،
و قارا داملار...
و بو آغ گئجه‌لر،
و قارا شاملار...

و بو آغ هاله‌لر،
و قارا اوتلار...
و بو آغ ناله‌لر،
و قارا نوتلار...

و بو آغ دورنالار،
و قارا گؤیلر...
و بو آغ زورنالار،
و قارا زۆیلر²...

و بو آغ قویونلار،
و قارا باغلار...
و بو آغ اویونلار،
و قاراباغلار...

و بو آغ مامیرلار،
و قارا داشلار...
و بو آغ چادیرلار،
و قارا قیشلار...

و بو آغ بازارلار،
و قارا غوللار...
و بو آغ مزارلار،
و قارا دۇللار...

و بو آغ تالانلار،
و قارا ایزلر...
و بو آغ یالانلار،
و قارا اۆزلر...

و بو آغ قانونلار،
و قارا گوجلر...
و بو آغ نادانلار،
و قارا بیجلر...

و بو آغ قضالار،
و قارا قوتو...
و بو آغ فضالار،
و قارا لۏتو...

و بو آغ ریاست،
و قارا کۆتله...
و بو آغ سیاست،
و قارا کۆت‌لر...

و بو آغ آشاغیلار،
و قارا اتک...
و بو آغ اوشاقلار،
و قارا چؤرک...

و بو آغ اولدوزلار،
و قارا سئییر...
و بو آغ کاغیذلار،
و قارا شئعیر...

#رامیز_قوسارچایلی
¹- تره‌وزین، مئیوه‌نین ان آخیردا دریلَنی
²- چالینان هاوانی تکرار ائتمک
#شعر_اوجاغی
@SheirOcagi

▫️بئله‌جه اونلار حیاتین آجی گئرچکلری ایله باریشیب شیرین یالانلارلا دولو خیاللار قورماغا داوام ائدیردیلر.

📚 بیر میلیون دولاریم اولسایدی...
#قاراقان
#شعر_اوجاغی
@SheirOcagi

▫️آجی‌لار دنیزی

من آجی‌لار دنیزینده بوغولموشام،
ائشیتمه‌رم گمی فیتلرینی، قاغایی چیغلیقلارینی.
دالغالار هر گون بیر باشقا قییی‌یا آتار منی،
آنلارام یوسونلارین منیم اوچون آغلادیقلارینی.

اؤلویَم چوخدان، بیر باخسانا گؤزلریمه!
گؤر ایچینده‌کی او قانلی شوشه قیریقلارینی!
بو نه قارانلیق، بو نه زیندان گئجه بؤیله!
بوتون گمیلر سؤندورموش ایشیقلارینی.

من آجیلار دنیزی اولموشام، یاخینلاشما!
سولاریم دوزلو، سولاریم ایلان زهری.
باخسانا، هر کس ایچیمه تؤکموش آرتیقلارینی!

بو قارانلیق بیتسه آرتیق، بیر آی دوغسا!
بیر دلی کولک قوپسا،
آلیب گؤتورسه ایللرین ایچیمده بوراخدیقلارینی!

#اومید_یاشار_اوغوزجان
#شعر_اوجاغی
@SheirOcagi