▫️اوغول دردی 4

یئنه ساپ‌ساری‌دی قارشیمدا واراق،
گؤزومده شیولَنیر شیوَن‌لی اۆنۆم.
بؤیوک قارداشینین جانیندان ایراق،
بس کیمه سیغینیم، کیمه کۆسۆنۆم؟

یوخ، عزیز گونلرده سئوینه‌رم کی،
سئوینجه بورونه اوره‌ییمده او.
چتینده آدینا گووه‌نه‌رم کی،
دیله‌یه قوووشا دیله‌ییمده او.

گلر یاز آیی دا اؤز قایداسیندا،
گزیب دولاشماقدان یئنه دویمارام.
دئیه‌رم گیزله‌نیب کۏل آرخاسیندا،
من «گیزلن‌پاچ»ی دا کول‌لا اوینارام.

قووارام یولومو اؤزگه بیر سمته،
عؤموره یازمارام تکلیک آیؽنی.
هئچ کیمه پای-پۆرۆش گتیرمه‌سم ده،
وئره‌رم بیر اونون آتا پایینی.

دؤزه‌رم طالعین یۏر-یوخوشونا،
بوکه‌رم بوخچایا اؤتن هر ایلی.
نیشان تاخیلاندا هر تای-توشونا،
خونچا بزه‌ده‌رم شاملی-شیرنیلی.

یاشار، منده یاشار بالاجا دده،
اوستونده گول-چیچک بوینونو ایَر.
او کؤرپه قبیری بؤیومه‌سه ده،
آغریسی بؤیویَر، دردی بؤیویَر.

#آغا_لاچینلی
#شعر_اوجاغی
@SheirOcagi

دیالوق

▫️- ایندی‌یه‌جن اؤزونو یالنیز حیسّ ائدیبسن؟
+ هه، اطرافیم قالابالیق اولاندا.

📽 The Thin Red Line
1998
#ترنس_مالیک
#شعر_اوجاغی
@SheirOcagi

▫️تکجه سنی

تکجه سنی ایسته‌ییرم،
سون بیر کره گؤروم دئیه.
بیر ساعاتلیق یانیمدا اول،
درد-سریمی بؤلوم دئیه.

بیز بیرلیکده گزن زامان،
تئز توتاردین اللریمدن.
قلبیمده‌کی آرزولاری،
اوخویاردین گؤزلریمدن.

یاغان یاغیش دامجیسینین،
ایسلاناردیق آلتیندا بیز‌.
قوجاقلاشیب سیغیناردیق،
بیر چتیرین آلتیندا بیز.

یئنه سنی ایسته‌ییرم،
هاوا کیمی، صاف سو کیمی.
آللاهیما یالواریرام،
الین آچان یولچو کیمی.

یالواریرام، سن دؤنه‌سن،
اوچوب گئدن دورنالارتک.
بیر یئتیمین ایلاهیدن-
دیله‌دیگی آرزولارتک.

تکجه سنی ایسته‌ییرم،
گؤزلریندن اؤپوم دئیه.
بیر علاجسیز خسته کیمی،
قوللاریندا اؤلوم دئیه.

#علی_احمدوو
#شعر_اوجاغی
@SheirOcsgi

‍ ▫️سنه اوخشاسین!

منه دانیشماق اؤیرت، سؤزوم سنه اوخشاسین،
چؤره‌ییمین دادی اول، دوزوم سنه اوخشاسین!

منی بیر اویونا سال، چاشیم اؤزومدن چیخیم،
اؤزومو سنده گؤروم، اؤزوم سنه اوخشاسین!

منی خاطرلایاجاق سنی گؤرن آداملار،
ائیله بیر ایش گؤرموشم، ایزیم سنه اوخشاسین.

سنه اوخشار بیر گلین، گئجه گلدی یوخوما،
دئ، نئجه بو یوخونو یوْزوم، سنه اوخشاسین؟!

سنین کیمی ساریشین، سنین کیمی یاشیل گؤز،
سئویرم گله‌جکده، قیزیم سنه اوخشاسین.

#مهران_عباسیان
🎙سالار_موغانلی
@SheirOcagi

▫️بو ساده‌لیک و یالقیزلیقدا گیزلی بیر خوشبختلیک وار ایدی.

📚 خوشبخت اؤلوم
#آلبر_کامو
#شعر_اوجاغی
@SheirOcagi

▫️قوجالدیر اینسانی؛ قوجالدیر زامان
اوره‌یین آتشی، کؤزو قوجالمیر.
داغلاری_داشلاری قوجالدان زامان،
بیلمیرم بس نَدَن اؤزو قوجالمیر.

کئچدی باهاریمیز؛ یای، قیشا قالدی
داغلار قارا قالدی، یاغیشا قالدی
بیزیمکی بیر قورو باخیشا قالدی
نئیله‌ییم؛ آرزونون گؤزو قوجالمیر.

"بختیار"! دوشونَک بیز درین-درین
آرزولار مؤحتشم، دویغولار شیرین
اصیل صنعتکارین، اصیل شاعیرین،
اؤزو قوجالسا دا، سؤزو قوجالمیر.

#بختیار_واهابزاده
@SheirOcagi

▫️هر دؤورده و هر یئرده خالق کۆتله‌لری صبرلی اولماغا مجبور ائدیلیب. چتینلیک‌لره دؤزمک ائله بیل خالقین آلنینا یازیلیب.

📚 آغ زانباقلار اؤلکه‌سی
#گریگوری_پئتروو
#شعر_اوجاغی
@SheirOcagi

▫️داغ کوله‌یی

قدَرده سندن آیری دوشمک ده وار ایمیش؛
دوغروسو بونو هئچ دوشونمه‌میشدیم.

سنی تانیمادان،
هله سنی بؤیله دلی-دیوانه سئومه‌دن،
«یالنیزلیق گؤزل‌دیر» دئییردیم.
«آل باشینی قاچ بو شهردن!
اوفوقده بیر جیزگی کیمی گؤردویون داغلارا،
کوله‌یین یۏد قوخولارینی داشیدیغی دنیزلره گئت!
گئت، گئده بیلدیگین یئره گئت!» دئییردیم.
اویسا کی، سندن قاچیلمازمیش؛
یوخلوغونا بیر گون بئله دایانیلمازمیش، بیلمیردیم.

یئنه ده دایانماغا چالیشیرام ایشده،
گؤزلرینه بنزه‌ین بیر چؤل چیچه‌یی قوپاریرام؛
کئچن بولودلارا سسلنیرم اللرین دئیه.
کولک گؤزل بیر قوخو گتیرمیش‌سه،
«ساچلارینی اوخشاییب گلمیشدیر» دئیه‌رک، اووونورام.

سنینله بیر باشقا زامانی یاشاماق،
بیر باشقا زاماندا سنی یاشاماق...
هر شئیدن اؤنجه سن،
البتّه سن،
موطلقا سن!
ایستر اوزاقلاردا اول،
ایستر یانیمدا دور!
سن اول یئتر کی بو زامان ایچینده.
من اولماسام دا اولار.

سنی بیر یوماغا ساریییرام ایللردیر، بیتمیرسن.
چاره‌سیزلیگیم گون کیمی آشیکار.
سو اولوب چئشمه‌لردن آخان گؤزل‌لیگین،
اینجه‌لیگین اوزومه ووران ایشیق.

سن گونش قدر ایستی،
طبیعت قدر گئرچک.
سن باغچالاردا چیچک‌لر آچدیران،
سودان، هاوادان، گونَشدن بؤیوک وارلیق.
سن، ایچیمده او تک سئوگی،
سن، گؤره بیلدیگیم تک آیدینلیق.

بیر نفس ده منیم اوچون آل
هاواسیزلیقدان اؤلدورمه منی!
بولودلارا، اولدوزلارا منیم اوچون ده باخ!
«سوسادیم» دئییرم‌سه، بیر اودوم سو ایچمه‌لیسن!
من یورولدوم‌سا، سن اویومالیسان!

اللریم سئویلمک ایسته‌ییر،
ساچلاریم اوخشانماق ایسته‌ییر،
دوداقلاریم اؤپولمک ایسته‌ییر، آنلامالیسان!

آغاجلارین یاشیلی قالمادی،
گؤی‌اوزونون ماویسی یوخ.
بو داغلار، او داغلار دئییل،
کوله‌یینده ککلیک‌اوتو قوخوسو یوخ‌.
کیم‌ بو چاره‌سیز آدام؟
بو قان چاناغی گؤزلر کیمین؟
نئچه گئجه‌دیر یوخوسو یوخ، گوندوزو یوخ،
گئجه‌سی یوخ،
یوخ،
یوخ!

آنلادیم:
سنسیز یاشانماز بو دونیادا،
ایمکانی یوخ!

#اومید_یاشار_اوغوزجان
#شعر_اوجاغی
@SheirOcagi

.
▫️کئچمیش دیلک‌لرین آراسیندان بوشالمیشام،
ییرتیق-یاماقلی، آج-یالاواج یولدا قالمیشام.

آرتیق الیمده‌دیر داها آغ تئللرین سایی،
تئز-تئز گتیرمه‌یین اۆزومه کی قوجالمیشام!

واللاه نه‌قدری آختاریرام گونده، بئینیمه-
گلمیر، قولومداکی گوجومو هاردا سالمیشام.

بیر کیمسه‌لردن آددامیشام، یولدا قویموشام،
نه‌م کیمسه‌سین آیاقلامیشام، هن؛ یاهالمیشام.

داغدان قاچیرلار اوستومه بیر کلمه کسمه‌دن،
بیلمم کی هانسینین نه‌یینی الدن آلمیشام.

بو شاعیری ایتلر یئتیریبدیر بو گؤرکمه،
زیندان قارانقولوق‌لاری قدری قارالمیشام.

بیر باخ؛ بو اؤلکه‌ده خیاوانلار کیلیدلی‌دیر،
گؤر کیملرین موحاصره‌سیندن دارالمیشام!

آنجاق یئریمده‌یم، آما آرتیق یئریمده‌یم،
هر یئرده اولموشام، وارام هاردان قوولموشام.

سئوگیم، نه گؤردون اویما، ائشیتدین اینانما کی،
عاصی‌‌لرین یولوندان آزیب عاقیل اولموشام!

ایللر بویوندا نه دالی چکدیم، نه قورخموشام،
یالنیز سیزین موجادیله‌لردن یورولموشام.

#آتیلا_حاجیزاده
@Atilla_hacizade
@SheirOcagi

‍ ‍ ▫️دل عاشق اولوب زولفونه، سئودالارا دوشدو،
مجنون کیمی زنجیر ایله صحرالارا دوشدو.

تا جام'ه اوزون عکسی دوشوب، ای لبی مِیگون!
چوخ خام‌طمع غیر تمنّالارا دوشدو.

سرِّ دهنین سؤیله‌دیلر رمز ایله مردم،
بو مبهم اولان نکته معمّالارا دوشدو.

زولفون ائله‌دی خاطرِ عشّاقی نشیمن،
اول شکلِ چلیپا بو‌ کلیسالارا دوشدو.

تا قطره‌ی نِیسان اولا دندانینه نسبت،
ال ابردن اوزدو، دلِ دریالارا دوشدو.

گه سرزنشِ خلق، گهی کینه‌ی گردون،
عشقینده باشیم گؤر که نه غوغالارا دوشدو.

یاندیردی منی شعشعه‌ی نورِ جمالین،
موسا کیمی «سیّد» بو تجلّالارا دوشدو.

#سیدعظیم_شیروانلی
🎙 یوسف انصاری
#شعر_اوجاغی
@SheirOcagi

▫️دنیزه قارشی بیر اوتوراجاقدا،
چیینینه باشیمی سؤیکه‌ییب-
سسیندن شعرلر دینله‌مک کیمی،
اوشاقجا ایستک‌لریم اولدو.
باغیشلا!

#ناظیم_حیکمت
#شعر_اوجاغی
@SheirOcagi

▫️اعتراف

سنی تانیدیغیم او ایلک گونلری،
یادیما سالاندا غوصّه‌لنیرم.
یالانچی باخیشا، ساختا سؤزلره،
نئجه آلدانمیشام، دونوب قالیرام!

حقیقی کیملیگین، معنویّتین،
کاش بللی اولایدی او واختلار منه!
سنین‌تک غورورسوز قادینلا بیرگه،
ایتیرمیش اولمازدیم هئچ بیر ثانیه.

ایندی وارلیغین دا بیر خیال کیمی،
اؤتور گؤزلریمدن، یادا دوشنده.
او کئچن گونلرین خاطیره‌لری،
یانیب کوله دؤنموش غمده-کدرده.

بعضاً قلبیمده‌کی صاف محبّتی،
دۇیماق ایسته‌ییرم سانکی یئنیدن.
اؤتن ایللرده‌کی عولوی حیسلری،
گئرییه قایتارماق کئچیر کؤنلومدن.

او آن عقلیم ایله حیسلر آراسی،
بیر ساواش باشلاییر داخیلده، اینان!
قلبیم سنه دوغرو آددیملاسا دا،
سوورولور غضب‌له، کین چووغونوندان.

#علی_احمدوو
#شعر_اوجاغی
@SheirOcagi

▫️سئومک «موبالیغه صنعتی‌»دیر،
موبالیغه ائدین!

#عصمت_اؤزل
#شعر_اوجاغی
@SheirOcagi

▫️او، منه باخیب گولومسه‌مه‌یی اؤیرنمیشدی، من ده اونا باخیب ناغیللارا اینانماغا باشلامیشدیم.

📚 ملَک
#قاراقان
#شعر_اوجاغی
@SheirOcagi

▫️سن اویونچوسان، لازیم اولاندا گؤز یاشلارینی شن قهقهه‌لرله دییشه بیلیرسن.

📚 سؤیودلو آرخ
#الیاس_افندی‌یئو
#شعر_اوجاغی
@SheirOcagi

▫️بو یاز چیچک‌لمه، اریک آغاجیم!

نه گؤیَرت بو دردی، نه لکدن کئچیر،
سیلکه‌له، چالخالا، الکدن کئچیر!
داها گولدن کئچیب، چیچکدن کئچیب،
بو یاز چیچک‌لمه، اریک آغاجیم!

اویاتما، قوی یاتسین یاتان دردلری،
کؤز-کؤز اوره‌ییمی چاتان دردلری.
گؤردوم چیچه‌یینی آتام، دردلرین!
بو یاز چیچک‌لمه، اریک آغاجیم!

بو درد قایا-قایا، داش-داش گول‌لنیر،
داش-قایا اوستونده ساواش گول‌لنیر،
یییه‌سیز یورد یئری یاواش گول‌لنیر،
بو یاز چیچک‌لمه، اریک آغاجیم!

#رامیز_قوسارچایلی
#شعر_اوجاغی
@SheirOcagi

▫️ایمکانسیز عشق

فالچی قادین یالان سؤیله‌ییر، یالان:
«بیزی بیر-بیریمیز اوچون یاراتمیش تانریمیز.»

نئجه مومکون دئییل‌سه اولدوزلاری گؤی‌اوزوندن توپلاماق،
اؤیله‌سینه ایمکانسیز بیر شئی‌دیر عشقیمیز.

قۇرۇدو کؤلگه‌سینده اوتوردوغوموز آغاجلار،
باغچالاردا سئودیگین چیچک‌لر قالمادی.
ساده‌جه خاطیره‌لرده‌دیر ابدی اولان.
واز کئچه بیلمه‌دیگیمیز،
اونودا بیلمه‌دیگیمیز...
اونلار بئله، بیزه یار اولمادی.

اونوت مندن قالان نه وارسا!
اونوتماق یالنیزلیغین تسلّی'سی‌دیر.
گونشی بیر قدح شراب کیمی ایچیب-
دلیجه‌سینه سرخوش اولماق،
ان گؤزل طرفی‌دیر ایمکانسیزلیغین.

اومیدلریمیز فیرتینالی دنیزلر اورتاسیندا بیر لیماندا قاییق‌دیر ایندی.
دالغالار دونَنکیندن داها ظالیم،
کولک داها آجیماسیز.
نه بولود وار اوفوقلرده، نه گمی.

مؤوسوملر توز پمبه دئییل،
گوندوزلر گئجه‌دیر، گئجه‌لر زیندان.
گونشین چیخماسینی گؤزله‌مک، بوشونا.
بوشونا آرتیق، مدد اومماق داش قلبلی زمانه‌دن.

اینان کی، قیریلمیش بیر آینا کیمی پارام‌پارچا، قیریق-تؤکوک‌دور عشقیمیز!
چاره‌سیزلیگیم، اومیدسیزلیگین ماهنیسی‌.
ماهنی‌لارین ان ایچلیسی، ان حوزونلوسودور
بؤیوک عشقیمیز.

#اومید_یاشار_اوغوزجان
#شعر_اوجاغی
@SheirOcagi

🔹تحکییه ادبی درنه‌یی(457-جی جلسه)
🔹اوخوناجاق اثر: آتابه‌یین دفنی – خئیرالددین سولطان
🔹اؤزبک ادبییاتی
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 11 اردیبهشت ماه 1403
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #خئیرالددین_سولطان #اؤزبک_نثری #حئکایه

▫️۲۹ آپریل، #دونیا_رقص_گونودور.

بو پُست‌دا آزربایجان بلکه ده دونیا میلّتینین ان‌اسکی رقص‌لریندن بیرینی تانیتدیریریق:

«یاللی رقص» آزربایجانین ان‌اسکی فولکلور رقص‌لریندن بیری‌دیر.

بو ویدیودا گؤردویونوز داش، اورژینالی آزربایجانین «قوبوستان» بؤلگه‌سینده یئرلشن «قاوال داشی»نین، ماکئتی دیر. بو مکاندا «توپلو یاللی رقص داش‌یازماسی» واردیر. بو داشین اسکی‌لییینی ۱۵مین ایل اؤنجه‌یه عایید بیلیرلر. آرخئولوق‌لار، «قاوال‌داشی، رقص ائدن‌لره سس یاراتماق اوچون قوللانیلیرمیش» دئیه اینانیرلار. بالاجا داش‌لارلا بو بؤیوک داشا ضربه وورولاندا گورولتولو و درین بیر سس یارانیر.

یاللی رقصینین ایلکین و ان ساده شکلی، ایشیق و ایستی قایناغی اولان اود شؤعله‌سینین اطرافیندا، شن‌لیک و مراسیم شکلینده اولارمیش. بئله بیر مراسیمده، تانریچایا دؤنوشن اودا تاپینارمیشلار. یاللی، آستا و آغیر باشلانیب قاچماغا بنزر یئگین آددیم‌لارلا، سورعتله سونا چاتیر.

یاللی رقص، قالارغی بیر گله‌نک اولاراق، آزربایجان میلّتی آدینا یونسکودا قئیده آلینمیشدیر.‌ یاللی رقص بیرلیک، مینّت‌دارلیق، سئوینج و گوجدن بیر سیمگه‌دیر...

#شعر_اوجاغی
@SheirOcagi

▫️ایچینده داشیدیغین او اومید قیرینتیلاریندان باشقا، نه وار الینده؟!

📚 گؤزل ایتیردیک.
#جان‌ار_یامان
#شعر_اوجاغی
@SheirOcagi