▫️ایلاهی، سن منی او کنده یئتیر!
ایلاهی، سن منی او کنده یئتیر،
او کندین دیله‌یی دیلده گؤیه‌رن.
او کندین یؽغوالی¹ اوغولدان یئتیم،
او کندین قیزلاری قارغیش اَییرن.
قوجاسی بورونوب هیس چوخاسینا،
قاریسی آه چکیب قاپیدا بیتیر.
ایلاهی، باغیشلا ائل دوعاسینا،
ایلاهی، سن منی او کنده یئتیر!
باغیشلا دهره‌نین پاسلی یاسینا،
باغیشلا جهره‌نین غم هاواسینا،
باغیشلا کؤهلَنین یاتان تیسینا،
باغیشلا محله‌نین تور هاناسینا!
باغیشلا، باغیشلا بو اکیلمیشی،
باغیشلا بوجاغین بوش قالماسینا!
باغیشلا یوللارا باخیش اکمیشین-
قاریییب-قورویوب داش اولماسینا!
ایلاهی، جۏش گله من باغری‌داشا،
بورونه‌م بیر آخشام یاغیش کندیره!
یایلاق یالوارسینا، بولاق باریشا،
دوشم دان یئریندن دده کندینه!
یا دا دیلک‌لرین قولو آچیلا،
قایغی بوخچاسینی بیریوللوق آتام.
آریلار تئل وورا بو آریچی‌یا،
عوذور کاغیذینی اوزومه توتام.
گئدم ائشیتمه‌دن هده-هدیانی²
مالیمی مارال‌لا اوتارا بیلم!
«قولو»نون قورد یئمیش دلی مادیانی،
قایانین قاشیندان قایتارا بیلم.
سؤکوله جانیمین آغری سیریغی،
دویغوم بۏزالاشا کۏبۇد عاغیل‌لا
یئتیمی-یئسیری، کؤنلو سینیغی،
یئدیردیب-ایچیردم نوغول-ناغیل‌لا.
قاییدا دونیانین بو دولاشانی،
وارلیغیم یوخلوغون دیبیندن چیخا!
چیخاردام آغزیمدان چۇللۇ دووشانی،
ناللی قاریشقا دا جیبیمدن چیخا.
چیخا خورجونومدان چیت'ین باهاسی،
بزه‌نه بیر ائوین کؤهنه کفرَمی³.
باجی-قارداشیمین بئچه بالاسی،
قۏمارا بیر آندا باللی سوفره‌می.
ایلاهی، الیمه گیره‌وه دوشه،
آیریلیق کۆلۆنۆ یوللارا سپم!
سؤیکه‌ییب آلنیمی آنا گؤیروشه،⁴
گؤروشلو آنلاری گؤزومه تپم.
ایلاهی، کؤمه‌یین گؤر نئجه ایتیر!
ایلاهی، سن منی او کنده یئتیر!
یئتیر بیچیله‌سی بیچه‌نه‌یینه،
یئتیر گون قوووران بۏز گونئیینه،
یئتیر بولاقداکی آخشام نئیینه،
یئتیر دان یئلینه، چای کوله‌یینه،
یئتیر قیش قار'ینا، یاز چیچه‌یینه،
یئتیر کۏم اولدوزون گؤبه‌له‌یینه،
یئتیر جان هاوالی یان توته‌یینه،
یئتیر یال-یاماجین گؤی ایپه‌یینه،
یاشیل بله‌یینه، آغ بله‌بینه،
گولونه، گؤلونه، داها نه‌یینه!
ایلاهی، سن منیم ایزیمی یئتیر،
داغیلمیش قبیرین سون کؤمه‌یینه!
آغ‌ساققال چاغیمدا اؤزومو یئتیر،
آغلایان بیر ائوین آغ‌بیرچه‌یینه!
ایلاهی، سن منی او کنده یئتیر،
ایلاهی سن منی او کندده بیتیر!
#آغا_لاچینلی
¹- جمعیت
²- اساسسیز سؤز- سؤیوش
³- میتیل
⁴- ون آغاجی
#شعر_اوجاغی
@SheirOcagi
ایلاهی، سن منی او کنده یئتیر،
او کندین دیله‌یی دیلده گؤیه‌رن.
او کندین یؽغوالی¹ اوغولدان یئتیم،
او کندین قیزلاری قارغیش اَییرن.
قوجاسی بورونوب هیس چوخاسینا،
قاریسی آه چکیب قاپیدا بیتیر.
ایلاهی، باغیشلا ائل دوعاسینا،
ایلاهی، سن منی او کنده یئتیر!
باغیشلا دهره‌نین پاسلی یاسینا،
باغیشلا جهره‌نین غم هاواسینا،
باغیشلا کؤهلَنین یاتان تیسینا،
باغیشلا محله‌نین تور هاناسینا!
باغیشلا، باغیشلا بو اکیلمیشی،
باغیشلا بوجاغین بوش قالماسینا!
باغیشلا یوللارا باخیش اکمیشین-
قاریییب-قورویوب داش اولماسینا!
ایلاهی، جۏش گله من باغری‌داشا،
بورونه‌م بیر آخشام یاغیش کندیره!
یایلاق یالوارسینا، بولاق باریشا،
دوشم دان یئریندن دده کندینه!
یا دا دیلک‌لرین قولو آچیلا،
قایغی بوخچاسینی بیریوللوق آتام.
آریلار تئل وورا بو آریچی‌یا،
عوذور کاغیذینی اوزومه توتام.
گئدم ائشیتمه‌دن هده-هدیانی²
مالیمی مارال‌لا اوتارا بیلم!
«قولو»نون قورد یئمیش دلی مادیانی،
قایانین قاشیندان قایتارا بیلم.
سؤکوله جانیمین آغری سیریغی،
دویغوم بۏزالاشا کۏبۇد عاغیل‌لا
یئتیمی-یئسیری، کؤنلو سینیغی،
یئدیردیب-ایچیردم نوغول-ناغیل‌لا.
قاییدا دونیانین بو دولاشانی،
وارلیغیم یوخلوغون دیبیندن چیخا!
چیخاردام آغزیمدان چۇللۇ دووشانی،
ناللی قاریشقا دا جیبیمدن چیخا.
چیخا خورجونومدان چیت'ین باهاسی،
بزه‌نه بیر ائوین کؤهنه کفرَمی³.
باجی-قارداشیمین بئچه بالاسی،
قۏمارا بیر آندا باللی سوفره‌می.
ایلاهی، الیمه گیره‌وه دوشه،
آیریلیق کۆلۆنۆ یوللارا سپم!
سؤیکه‌ییب آلنیمی آنا گؤیروشه،⁴
گؤروشلو آنلاری گؤزومه تپم.
ایلاهی، کؤمه‌یین گؤر نئجه ایتیر!
ایلاهی، سن منی او کنده یئتیر!
یئتیر بیچیله‌سی بیچه‌نه‌یینه،
یئتیر گون قوووران بۏز گونئیینه،
یئتیر بولاقداکی آخشام نئیینه،
یئتیر دان یئلینه، چای کوله‌یینه،
یئتیر قیش قار'ینا، یاز چیچه‌یینه،
یئتیر کۏم اولدوزون گؤبه‌له‌یینه،
یئتیر جان هاوالی یان توته‌یینه،
یئتیر یال-یاماجین گؤی ایپه‌یینه،
یاشیل بله‌یینه، آغ بله‌بینه،
گولونه، گؤلونه، داها نه‌یینه!
ایلاهی، سن منیم ایزیمی یئتیر،
داغیلمیش قبیرین سون کؤمه‌یینه!
آغ‌ساققال چاغیمدا اؤزومو یئتیر،
آغلایان بیر ائوین آغ‌بیرچه‌یینه!
ایلاهی، سن منی او کنده یئتیر،
ایلاهی سن منی او کندده بیتیر!
#آغا_لاچینلی
¹- جمعیت
²- اساسسیز سؤز- سؤیوش
³- میتیل
⁴- ون آغاجی
#شعر_اوجاغی
@SheirOcagi
▫️گلنده آغرینی اؤزونله گتیر!
گلنده آغرینی اؤزونله گتیر!
سنه بیر سؤزوم وار اینجه‌دن اینجه.
تکلیگی تک قویوب جان ائویمه گیر!
کؤنلومه یولداش اول کؤچوم گئدینجه!
آللاه چوخ گؤرمه‌سین آغ گونلرینی،
گتیر قایغینی دا قارا دۆیۆنده!
بسله‌رم من سنین درد گول‌لرینی،
قانیملا سولانان جان دیبچه‌یینده.
دردی ده اؤلدورن درد کؤته‌یی‌دی،
دردینه درد اولوم... چوخ دا اوزولمه!
چوخ دا کی اوره‌یین اود پتهییدی،
آتیب اوره‌یینی یانیما گلمه!
سنی دۇیا-دۇیا دئییرم بونو،
گؤزونون گؤلو ده گؤزلدی، گؤزل.
تزه گئییمینی، تزه دۏنۇنۇ،
تزه داغ-دۆیۆن‌له دۆیمه‌له‌ییب گل!
اؤزونو تانیماز دردینی دانان،
بیر ده اولانینا بئله یوخ دئمه!
آی منی دوست بیلیب باشا دولانان،
گیزلی یارانی دا مندن گیزله‌مه!
یا دردی یاری بؤل، یا دا اۆزۆلۆش،
قوی عؤمرون خالچاسی اؤنه سریلسین!
دۇزلۇ گؤز یاشی‌یلا بال سیزان گولوش،
بیرلیک خمیرینه قوی اَنده‌ریلسین!
قایغی بوستانیندا هر دیلک بیتیر،
وئریب قازانجینی یانا چکیلمه!
گلنده آغرینی اؤزونله گتیر،
سندن اینجییه‌رم، الی بوش گلمه!
#آغا_لاچینلی
#شعر_اوجاغی
@SheirOcagi
گلنده آغرینی اؤزونله گتیر!
سنه بیر سؤزوم وار اینجه‌دن اینجه.
تکلیگی تک قویوب جان ائویمه گیر!
کؤنلومه یولداش اول کؤچوم گئدینجه!
آللاه چوخ گؤرمه‌سین آغ گونلرینی،
گتیر قایغینی دا قارا دۆیۆنده!
بسله‌رم من سنین درد گول‌لرینی،
قانیملا سولانان جان دیبچه‌یینده.
دردی ده اؤلدورن درد کؤته‌یی‌دی،
دردینه درد اولوم... چوخ دا اوزولمه!
چوخ دا کی اوره‌یین اود پتهییدی،
آتیب اوره‌یینی یانیما گلمه!
سنی دۇیا-دۇیا دئییرم بونو،
گؤزونون گؤلو ده گؤزلدی، گؤزل.
تزه گئییمینی، تزه دۏنۇنۇ،
تزه داغ-دۆیۆن‌له دۆیمه‌له‌ییب گل!
اؤزونو تانیماز دردینی دانان،
بیر ده اولانینا بئله یوخ دئمه!
آی منی دوست بیلیب باشا دولانان،
گیزلی یارانی دا مندن گیزله‌مه!
یا دردی یاری بؤل، یا دا اۆزۆلۆش،
قوی عؤمرون خالچاسی اؤنه سریلسین!
دۇزلۇ گؤز یاشی‌یلا بال سیزان گولوش،
بیرلیک خمیرینه قوی اَنده‌ریلسین!
قایغی بوستانیندا هر دیلک بیتیر،
وئریب قازانجینی یانا چکیلمه!
گلنده آغرینی اؤزونله گتیر،
سندن اینجییه‌رم، الی بوش گلمه!
#آغا_لاچینلی
#شعر_اوجاغی
@SheirOcagi
▫️گل اویون اوینایاق!
گل دردی آخیداق سئوینج سئلینه،
گل اویون اوینایاق ائله بو یاشدا!
گوله‌شک، گولوشک، مله‌شک یئنه،
گونوموز سۆد امَن گۆنلۇ یاماجدا!
من اؤلوم، گل یئنه بیر آغیز دئیَک،
آغرییا ایچیردک شادلیق بالینی!
دادلی تیکه‌میزله یئنه یئم‌له‌یک،
یووادا یالواران اتجه بالانی!
گؤللرده قاز اولاق، چؤللرده گونش،
قاتاق دووشانی دا زاغا دامینا!
پاییزین کۆرکۆندن یولونان کولش،
آلوودان دۏن بیچسین یاز بایرامینا!
دَییشسین عؤمورون آغری قابیغی،
قایغی سۆنگولری قلبدن سۆرۆشسۆن!
قیشین بۇز گؤزلویو، سیرسیرا بیغی،
اوجاق هاواریندا اریییب دوشسون!
ائشیت اوره‌ییمین جیزهاجیزینی!
چۇللو چوبوغو دا چاپاق یوز یئره.
اویون جیغیرینی، اویون جیزینی،
بیر چیدار¹ ائله‌یک قاچان عؤموره!
مین ایل یاشاساق دا، کۆت اوشاقلاریق،
پای-بؤلوش اوماریق دونیا بابادان.
گل اویون اوینایاق نئجه کی واریق،
شیرینه شیرنیکسین² آجینی دادان!
ایللر بیچاغینی چپینه چرتیب،
جاندا جیزیلتی وار، قاندا ولوَله.
باشیمیز، آی قارداش، چوخ اویون چکیب!
بعضی اویوندان دا قورخورام هله.
او «گیزلن-پاچ»دان دا قورخورام آرتیق،
گل اویون اوینایاق قلبه دَیمه‌دن!
دؤیوله-دؤیوله جیزدان چیخمیریق،
آخی نه دانیشیم «دیره-دؤیمه»دن³؟!٫
چیلینگی سینماسین «چیلینگ-آغاج»ین،
هله «سۆدلۆ-سۆمۆک»⁴، سودلوجه گئجه.
«بئش-داش»دا توققوشان بئش قوهوم داشین،
یولو یولوموزا بنزه‌دی نئجه.
نئجه ده سۆرۆشدۆ عؤمور بالیغی،
گل دردین باشینی اویونلا قاتاق!
کفنی یئل‌لنن قیش قوجالیغی،
یازا یووارلاداق، یاشیلا توتاق.
گل ماهنی کؤپوردک ساخسی کۆپه‌ده،
گل اووو قاچیرداق- گؤرن گولوشسون!
تاجی اوجاق اولان قارلی تپه‌ده،
سۏیۇغۇن آغ گؤزو توستویه دوشسون!
بیز بو دَییرمانین قۇرۇ دنی‌ییک،
قوی سئوینج اوولاتسین چالیب-اوخوماق.
اونسوز دا هره‌میز بیر آز دلی‌ییک،
بیر آز عاغیللی‌ییق، بیر آز دا آخماق.
اونسوز دا باغلی‌دی چیخیش یوللاری،
گل قۏدۇ⁵ گزدیرک قارا یاغیشدا!
گل یادا سالمایاق چوخ سؤال‌لاری،
گل اویون اوینایاق بو یاری یاشدا!
#آغا_لاچینلی
¹-بوخوو
²- آلیشماق- اؤیرشمک
³- کوتله‌وی اوشاق اویونلاریندان بیرینین آدی
⁴- کوتله‌وی اوشاق اویونلاریندان بیرینین آدی
⁵- کئچمیشده، آراسی کسیلمه‌دن یاغیش یاغدیقدا کند اوشاقلارینین توپلاشیب حیَط-حیَط گزه‌رک نغمه اوخوما مراسیمی و بو مراسیمده اوخونان نغمه‌نین اؤزو.
#شعر_اوجاغی
@SheirOcagi
گل دردی آخیداق سئوینج سئلینه،
گل اویون اوینایاق ائله بو یاشدا!
گوله‌شک، گولوشک، مله‌شک یئنه،
گونوموز سۆد امَن گۆنلۇ یاماجدا!
من اؤلوم، گل یئنه بیر آغیز دئیَک،
آغرییا ایچیردک شادلیق بالینی!
دادلی تیکه‌میزله یئنه یئم‌له‌یک،
یووادا یالواران اتجه بالانی!
گؤللرده قاز اولاق، چؤللرده گونش،
قاتاق دووشانی دا زاغا دامینا!
پاییزین کۆرکۆندن یولونان کولش،
آلوودان دۏن بیچسین یاز بایرامینا!
دَییشسین عؤمورون آغری قابیغی،
قایغی سۆنگولری قلبدن سۆرۆشسۆن!
قیشین بۇز گؤزلویو، سیرسیرا بیغی،
اوجاق هاواریندا اریییب دوشسون!
ائشیت اوره‌ییمین جیزهاجیزینی!
چۇللو چوبوغو دا چاپاق یوز یئره.
اویون جیغیرینی، اویون جیزینی،
بیر چیدار¹ ائله‌یک قاچان عؤموره!
مین ایل یاشاساق دا، کۆت اوشاقلاریق،
پای-بؤلوش اوماریق دونیا بابادان.
گل اویون اوینایاق نئجه کی واریق،
شیرینه شیرنیکسین² آجینی دادان!
ایللر بیچاغینی چپینه چرتیب،
جاندا جیزیلتی وار، قاندا ولوَله.
باشیمیز، آی قارداش، چوخ اویون چکیب!
بعضی اویوندان دا قورخورام هله.
او «گیزلن-پاچ»دان دا قورخورام آرتیق،
گل اویون اوینایاق قلبه دَیمه‌دن!
دؤیوله-دؤیوله جیزدان چیخمیریق،
آخی نه دانیشیم «دیره-دؤیمه»دن³؟!٫
چیلینگی سینماسین «چیلینگ-آغاج»ین،
هله «سۆدلۆ-سۆمۆک»⁴، سودلوجه گئجه.
«بئش-داش»دا توققوشان بئش قوهوم داشین،
یولو یولوموزا بنزه‌دی نئجه.
نئجه ده سۆرۆشدۆ عؤمور بالیغی،
گل دردین باشینی اویونلا قاتاق!
کفنی یئل‌لنن قیش قوجالیغی،
یازا یووارلاداق، یاشیلا توتاق.
گل ماهنی کؤپوردک ساخسی کۆپه‌ده،
گل اووو قاچیرداق- گؤرن گولوشسون!
تاجی اوجاق اولان قارلی تپه‌ده،
سۏیۇغۇن آغ گؤزو توستویه دوشسون!
بیز بو دَییرمانین قۇرۇ دنی‌ییک،
قوی سئوینج اوولاتسین چالیب-اوخوماق.
اونسوز دا هره‌میز بیر آز دلی‌ییک،
بیر آز عاغیللی‌ییق، بیر آز دا آخماق.
اونسوز دا باغلی‌دی چیخیش یوللاری،
گل قۏدۇ⁵ گزدیرک قارا یاغیشدا!
گل یادا سالمایاق چوخ سؤال‌لاری،
گل اویون اوینایاق بو یاری یاشدا!
#آغا_لاچینلی
¹-بوخوو
²- آلیشماق- اؤیرشمک
³- کوتله‌وی اوشاق اویونلاریندان بیرینین آدی
⁴- کوتله‌وی اوشاق اویونلاریندان بیرینین آدی
⁵- کئچمیشده، آراسی کسیلمه‌دن یاغیش یاغدیقدا کند اوشاقلارینین توپلاشیب حیَط-حیَط گزه‌رک نغمه اوخوما مراسیمی و بو مراسیمده اوخونان نغمه‌نین اؤزو.
#شعر_اوجاغی
@SheirOcagi
▫️شهرلی آغاج
شهرلی آغاجی آغ بیچاق سویار،
بوشقو دا یئریکلر اوجا بویونا.
کولک آغ کاغیذدان کفن دولایار،
بئلی بوکولموشون ساپلاق بوینونا.
دینمزجه قۇرۇشار یول قیراغیندا،
اوزونه توپورَر پالچیقلی تکر.
بار'یندان اوست-باسا بویاق یاغاندا،
بوداغی بالتالار شیلله‌ییب-تؤکر.
اسن یارپاقدان دا قورخو ساللاشار،
قوشلار سیغناجاغی قوش اولار بیردن.
یارالی-یارالی مایاللاق آشار،
یاراق آنبارینین اوستونده بیتن.
تانکلار چینارین دا باغرینی یارار،
قان دامار سؤیودون اۇن آغلیغینا.
گلمه آکاسیالار¹ تیکان باتیرار،
یئرلی قوواقلارین یومشاقلیغینا.
شهرلی آغاجلار بیج-بیج اؤسکورر،
ساغا گؤز گزدیرَر، سولا ماریتلار.
بویلانیب ائولرده گؤزللیک گؤرر،
بالدیری اَهَنگ‌لی² قوجا پالیدلار.
قیشدا باشقالاشار یازین اویونو،
باشلانار کاکتوسون دیبدن ائشیمی.
هر گلن بیر یئرده بیتیرَر اونو،
بیزیم بۇیرۇق غولو باشچیلار کیمی.
شهرلی آغاجلار یامان داریخار،
قیرین دار بوخووو قیریلار یئنه.
شهرلی آغاجلار چپردن چیخار،
قاچار اؤز یئرینه، اؤز مئشه‌سینه.
#آغا_لاچینلی
¹- آغاج آدی- اقاقیا
²- کیرج- آهک
#شعر_اوجاغی
@SheirOcagi
شهرلی آغاجی آغ بیچاق سویار،
بوشقو دا یئریکلر اوجا بویونا.
کولک آغ کاغیذدان کفن دولایار،
بئلی بوکولموشون ساپلاق بوینونا.
دینمزجه قۇرۇشار یول قیراغیندا،
اوزونه توپورَر پالچیقلی تکر.
بار'یندان اوست-باسا بویاق یاغاندا،
بوداغی بالتالار شیلله‌ییب-تؤکر.
اسن یارپاقدان دا قورخو ساللاشار،
قوشلار سیغناجاغی قوش اولار بیردن.
یارالی-یارالی مایاللاق آشار،
یاراق آنبارینین اوستونده بیتن.
تانکلار چینارین دا باغرینی یارار،
قان دامار سؤیودون اۇن آغلیغینا.
گلمه آکاسیالار¹ تیکان باتیرار،
یئرلی قوواقلارین یومشاقلیغینا.
شهرلی آغاجلار بیج-بیج اؤسکورر،
ساغا گؤز گزدیرَر، سولا ماریتلار.
بویلانیب ائولرده گؤزللیک گؤرر،
بالدیری اَهَنگ‌لی² قوجا پالیدلار.
قیشدا باشقالاشار یازین اویونو،
باشلانار کاکتوسون دیبدن ائشیمی.
هر گلن بیر یئرده بیتیرَر اونو،
بیزیم بۇیرۇق غولو باشچیلار کیمی.
شهرلی آغاجلار یامان داریخار،
قیرین دار بوخووو قیریلار یئنه.
شهرلی آغاجلار چپردن چیخار،
قاچار اؤز یئرینه، اؤز مئشه‌سینه.
#آغا_لاچینلی
¹- آغاج آدی- اقاقیا
²- کیرج- آهک
#شعر_اوجاغی
@SheirOcagi
▫️یازدیغین کاغیذ
یاراما ساریق‌دی یازدیغین کاغیذ،
یازدیغین کاغیذین گلیشی گؤزل.
یازدیغین کاغیذدا یاخشی دیل-آغیز،
یازدیغین کاغیذدا کؤنول یاپان ال.
یازدیغین کاغیذدا مونجوق دۆزۆمۆ،
حرفلر قول‌بویون، سؤزلر سؤکولمز.
یازدیغین کاغیذین آندی دۆزدۆمۆ؟-
بونو سن بیلرسن، باشقاسی بیلمز.
یازدیغین کاغیذی، دوعالار اۆفلَر،
دیل آچان دیلک ده جان دیره‌یی‌دی.
اۆسکۆک‌لۆ* حرفلر، شان-شان حرفلر،
دویغو یوواسی‌دی، بال پتهییدی.
یازدیغین کاغیذین آدی اوتانجاق،
یازدیغین کاغیذین یانغیسی درین.
کؤنلوم آراسیندا اویویور، واللاه،
یورغانلی-دؤشَکلی آلت-اوست سطیرین.
او نؤقطه خاللارین، کاغیذیندا وار،
کاغیذین شکلین‌دی- بیلمیر چوخوسو.
کؤنلو دۏیۇزدۇرار، کینی یومشالدار،
کؤینَکلی کاغیذین نرگیز قوخوسو.
سنین قلمینین گؤز یاشی قارا،
قارا گول بیتیریب قاپ‌قارا یاغیش.
سؤز گولو اکمیسن بو کاغیذ قارا،
بس نئجه اولوب کی، قار آلیشمامیش؟!
داغ-دۆیۆن دئمه‌رم یازی جیزگینه،
ویرگول‌لر سون قویماز تکلیک یاسینا.
اوشونن اوره‌ییم سیغینار یئنه،
یازدیغین کاغیذین سؤز یوواسینا.
#آغا_لاچینلی
* بیر چیچک آدی- اوسکوک اوتو- بارماق اوتو
#شعر_اوجاغی
@SheirOcagi
یاراما ساریق‌دی یازدیغین کاغیذ،
یازدیغین کاغیذین گلیشی گؤزل.
یازدیغین کاغیذدا یاخشی دیل-آغیز،
یازدیغین کاغیذدا کؤنول یاپان ال.
یازدیغین کاغیذدا مونجوق دۆزۆمۆ،
حرفلر قول‌بویون، سؤزلر سؤکولمز.
یازدیغین کاغیذین آندی دۆزدۆمۆ؟-
بونو سن بیلرسن، باشقاسی بیلمز.
یازدیغین کاغیذی، دوعالار اۆفلَر،
دیل آچان دیلک ده جان دیره‌یی‌دی.
اۆسکۆک‌لۆ* حرفلر، شان-شان حرفلر،
دویغو یوواسی‌دی، بال پتهییدی.
یازدیغین کاغیذین آدی اوتانجاق،
یازدیغین کاغیذین یانغیسی درین.
کؤنلوم آراسیندا اویویور، واللاه،
یورغانلی-دؤشَکلی آلت-اوست سطیرین.
او نؤقطه خاللارین، کاغیذیندا وار،
کاغیذین شکلین‌دی- بیلمیر چوخوسو.
کؤنلو دۏیۇزدۇرار، کینی یومشالدار،
کؤینَکلی کاغیذین نرگیز قوخوسو.
سنین قلمینین گؤز یاشی قارا،
قارا گول بیتیریب قاپ‌قارا یاغیش.
سؤز گولو اکمیسن بو کاغیذ قارا،
بس نئجه اولوب کی، قار آلیشمامیش؟!
داغ-دۆیۆن دئمه‌رم یازی جیزگینه،
ویرگول‌لر سون قویماز تکلیک یاسینا.
اوشونن اوره‌ییم سیغینار یئنه،
یازدیغین کاغیذین سؤز یوواسینا.
#آغا_لاچینلی
* بیر چیچک آدی- اوسکوک اوتو- بارماق اوتو
#شعر_اوجاغی
@SheirOcagi
▫️غریب آخشاملار
بوردا غم ایچیرم. غریبم، غریب.
یول آچیق اولسا دا، دیل آچیق دئییل.
اوستومه اؤرتولن بو کؤلگه قلیب،
آتا یوردونداکی آلاچیق دئییل.
دونیا گؤز اووودان، آدام اۏتاران،
پایینا نه دوشور یئری گئنیشین؟
کفنی ساری تۆل، تابوتو تۏران،
قبیری گؤی ائودی باتان گونشین.
بو دا اوزاقلارین اۆزه دورماسی،
کولک ده گمیشر¹، گلمه² گولونجه.
غریب آخشاملارین کؤچکۆن دورناسی،
چکر قاطارینی دان سؤکولونجه.
آخشامین آلنیندا سولغون پاریلتی،
بولوددا اله‌نر توتقونجا شاملار.
نییه سۇماغی‌دی، نییه پالیدی،
نییه ده قارادی غریب آخشاملار؟
غریب آخشاملارین غمی بیر شله،
یئنه یورد آغیسی³ کؤمه‌یه گلر.
آیاغین ایلیشسه بو شاخ-شَوه‌له،⁴
اوتلار دا اوستونه بارماق سیلکه‌لر.⁵
یولون قۇیۇلانار مئشه قوینوندا،
تکلیگین توش اولار آسیب-کسَنه.
کۏل قابان دۏنۇندا، آیی دۏنۇندا،
کؤتوک قورد دونوندا گؤروکر سنه.
غریبلیک گۆوه‌سی گۆمانی یئیر،
یوردونا گرَکسن عؤمور داشی‌یلا
بیر قیز سیغالی‌یلا دوغمالاشان یئر،
آتیلیر بیر ائلین چاغیریشی‌یلا.
اؤدَنجی اؤدَنمیر گئدیب ایتَنین،
یالانا بوکولدو غریب ایسمارؽج.⁶
قوجانی سئومه‌ین او عیفریته‌نین،
ایلک پایی قۏغال‌دی⁷، سون پایی قاخینج.
گؤرورم، سنین ده جیزداغین چیخیر،
ییغوال⁸ دَییشیرمی یئر دَییشنده؟
اورک سینیق اولور، دیلک قیوریخیر،
عؤمور اوجوزلاشیر غریب دۆشنده.
اوف! نئجه دؤنوک‌دو، نئجه قورخونج دو!
کؤته‌یی پولسوزدو، کؤمه‌یی جیبلیک.
حالالجا حاقّیما دئییر کی «بورج‌دو»،
اوف! سایماز غریبلیک، قییماز غریبلیک.
اوچموشام. گلمیشم. قونموشام اونا.
آدی شَعبَده‌لی، یولو شوشه‌لی.
اوزانیر گۆن دونلو او گۆن‌دۏغانا،
غریب آخشاملارین اوشویَن الی.
#آغا_لاچینلی
¹- شیغیماق
²- اؤزگه یئردن، کناردان گلن- غریب
³- یاسدا آوازلا سؤیله‌نن یانیقلی سؤزلر(Ağı)
⁴- آغاج قیرینتیلاری- کۏل‌کۏس
⁵- هده‌له‌مک- قورخوتماق
⁶- تاپشیریق- سفارش
⁷- سودلو گیرده چؤرک- کؤکه
⁸- «اقبال» سؤزونون تحریف اولونموش فورماسی
#شعر_اوجاغی
@SheirOcagi
بوردا غم ایچیرم. غریبم، غریب.
یول آچیق اولسا دا، دیل آچیق دئییل.
اوستومه اؤرتولن بو کؤلگه قلیب،
آتا یوردونداکی آلاچیق دئییل.
دونیا گؤز اووودان، آدام اۏتاران،
پایینا نه دوشور یئری گئنیشین؟
کفنی ساری تۆل، تابوتو تۏران،
قبیری گؤی ائودی باتان گونشین.
بو دا اوزاقلارین اۆزه دورماسی،
کولک ده گمیشر¹، گلمه² گولونجه.
غریب آخشاملارین کؤچکۆن دورناسی،
چکر قاطارینی دان سؤکولونجه.
آخشامین آلنیندا سولغون پاریلتی،
بولوددا اله‌نر توتقونجا شاملار.
نییه سۇماغی‌دی، نییه پالیدی،
نییه ده قارادی غریب آخشاملار؟
غریب آخشاملارین غمی بیر شله،
یئنه یورد آغیسی³ کؤمه‌یه گلر.
آیاغین ایلیشسه بو شاخ-شَوه‌له،⁴
اوتلار دا اوستونه بارماق سیلکه‌لر.⁵
یولون قۇیۇلانار مئشه قوینوندا،
تکلیگین توش اولار آسیب-کسَنه.
کۏل قابان دۏنۇندا، آیی دۏنۇندا،
کؤتوک قورد دونوندا گؤروکر سنه.
غریبلیک گۆوه‌سی گۆمانی یئیر،
یوردونا گرَکسن عؤمور داشی‌یلا
بیر قیز سیغالی‌یلا دوغمالاشان یئر،
آتیلیر بیر ائلین چاغیریشی‌یلا.
اؤدَنجی اؤدَنمیر گئدیب ایتَنین،
یالانا بوکولدو غریب ایسمارؽج.⁶
قوجانی سئومه‌ین او عیفریته‌نین،
ایلک پایی قۏغال‌دی⁷، سون پایی قاخینج.
گؤرورم، سنین ده جیزداغین چیخیر،
ییغوال⁸ دَییشیرمی یئر دَییشنده؟
اورک سینیق اولور، دیلک قیوریخیر،
عؤمور اوجوزلاشیر غریب دۆشنده.
اوف! نئجه دؤنوک‌دو، نئجه قورخونج دو!
کؤته‌یی پولسوزدو، کؤمه‌یی جیبلیک.
حالالجا حاقّیما دئییر کی «بورج‌دو»،
اوف! سایماز غریبلیک، قییماز غریبلیک.
اوچموشام. گلمیشم. قونموشام اونا.
آدی شَعبَده‌لی، یولو شوشه‌لی.
اوزانیر گۆن دونلو او گۆن‌دۏغانا،
غریب آخشاملارین اوشویَن الی.
#آغا_لاچینلی
¹- شیغیماق
²- اؤزگه یئردن، کناردان گلن- غریب
³- یاسدا آوازلا سؤیله‌نن یانیقلی سؤزلر(Ağı)
⁴- آغاج قیرینتیلاری- کۏل‌کۏس
⁵- هده‌له‌مک- قورخوتماق
⁶- تاپشیریق- سفارش
⁷- سودلو گیرده چؤرک- کؤکه
⁸- «اقبال» سؤزونون تحریف اولونموش فورماسی
#شعر_اوجاغی
@SheirOcagi
▫️آیریلیق گونونه آزجانا قالیر.
آیریلیق گونونه آزجانا قالیر،
منه گوج گله‌جک مندن قوچاقلار.
یاغاجاق عؤمرونه تکلیگین قاری،
دوشه‌جک یادینا کیمسه‌لی چاغلار.
آغی دؤیه‌جکسن یالدا-یاماجدا،
کؤنلونو سیخاجاق ائو آدلی پتک.
کؤزو باش قالدیران کؤهنه یانلیشدا،
گیزلی یاناجاقسان گۏر ائوینه‌دک.
هره‌نین سئوگیسی بیرینه باغلی،
آغریلار سئوینجه بورونوب گلمیش.
سونرا بیله‌جکسن... دایان، سن جانین!
بیزیم قایغیلار دا قارا دئییلمیش.
سونرا گؤره‌جکسن... آ قاش‌قاباقلی!
بیزیم سئوگیمیزی صافلیق سووارمیش.
تاخچاسی بوش اولان یوخسول کۇمانین،
سیرالی دیلَکدن دیره‌یی وارمیش.
وارمیش یووامیزین بالا قوشلاری،
قویمازدیق بیر گول ده بیزدن اینجییه.
آلاندا بوینونا بو اولموشلاری،
وارلیغین هوپاجاق لال دوشونجه‌یه.
یانغین بوی وئره‌جک یالقیز آنیندا،
کیمسه‌لی چاغلاری چوخ آناجاقسان.
دوداغیم قوخولو استکانین دا-
نزیک دوداغیندان ماچ آلاجاقسان.
دردین یئل‌لنه‌جک بئله‌دن-بئله،
توستو اَییره‌جک کؤنول اوجاغین.
چرچیوه سیغناقلی دوغما شکیله-
اومیدلی اولاجاق سون اوماجاغین.
گئجه‌ن گوندوزونو سونرا یامسیلار،
یوخونا تیکیلر تیکانلی قایغین.
تکلیک یاستیغینی گؤز یاشین سولار،
باتار دۇز چاییندا ایستک قاییغین.
هله قاباقدادی سورغو-سؤال‌لار،
نییه آغلاییرسان آخی، آی دلی؟!
یئنه ده کسیشَر کۆسۆلۆ یوللار،
یاخینا گله‌رم اوزاق گئده‌لی.
اؤلوم گؤروشو وار عؤمرون سونوندا،
آخی قالاسی‌یام یادیندا سنین.
بیر آغاج دونوندا، چیچک دونوندا،
یئنه بیته‌سی‌یم یانیندا سنین.
#آغا_لاچینلی
#شعر_اوجاغی
@SheirOcagi
آیریلیق گونونه آزجانا قالیر،
منه گوج گله‌جک مندن قوچاقلار.
یاغاجاق عؤمرونه تکلیگین قاری،
دوشه‌جک یادینا کیمسه‌لی چاغلار.
آغی دؤیه‌جکسن یالدا-یاماجدا،
کؤنلونو سیخاجاق ائو آدلی پتک.
کؤزو باش قالدیران کؤهنه یانلیشدا،
گیزلی یاناجاقسان گۏر ائوینه‌دک.
هره‌نین سئوگیسی بیرینه باغلی،
آغریلار سئوینجه بورونوب گلمیش.
سونرا بیله‌جکسن... دایان، سن جانین!
بیزیم قایغیلار دا قارا دئییلمیش.
سونرا گؤره‌جکسن... آ قاش‌قاباقلی!
بیزیم سئوگیمیزی صافلیق سووارمیش.
تاخچاسی بوش اولان یوخسول کۇمانین،
سیرالی دیلَکدن دیره‌یی وارمیش.
وارمیش یووامیزین بالا قوشلاری،
قویمازدیق بیر گول ده بیزدن اینجییه.
آلاندا بوینونا بو اولموشلاری،
وارلیغین هوپاجاق لال دوشونجه‌یه.
یانغین بوی وئره‌جک یالقیز آنیندا،
کیمسه‌لی چاغلاری چوخ آناجاقسان.
دوداغیم قوخولو استکانین دا-
نزیک دوداغیندان ماچ آلاجاقسان.
دردین یئل‌لنه‌جک بئله‌دن-بئله،
توستو اَییره‌جک کؤنول اوجاغین.
چرچیوه سیغناقلی دوغما شکیله-
اومیدلی اولاجاق سون اوماجاغین.
گئجه‌ن گوندوزونو سونرا یامسیلار،
یوخونا تیکیلر تیکانلی قایغین.
تکلیک یاستیغینی گؤز یاشین سولار،
باتار دۇز چاییندا ایستک قاییغین.
هله قاباقدادی سورغو-سؤال‌لار،
نییه آغلاییرسان آخی، آی دلی؟!
یئنه ده کسیشَر کۆسۆلۆ یوللار،
یاخینا گله‌رم اوزاق گئده‌لی.
اؤلوم گؤروشو وار عؤمرون سونوندا،
آخی قالاسی‌یام یادیندا سنین.
بیر آغاج دونوندا، چیچک دونوندا،
یئنه بیته‌سی‌یم یانیندا سنین.
#آغا_لاچینلی
#شعر_اوجاغی
@SheirOcagi
▫️عؤمرونده بیرجه یول
عؤمرونده بیرجه یول گؤزل اولموسان،
یولوما چیخمیشدین چیینی گۆیۆم'لۆ¹
آی بۇتا سئوگیمه سو وئریب سوسان!
سؤیله، سنمیسن‌می او آغ گئییملی؟!
دوزده داغ بیتمیشدی بیر بؤلوک چندن،
گؤی یئرده گزیردی ایتمیش آیینی.
بییانلی²، کولک‌لی، کئفلی چمندن،
ائوه آپاریردین کهریز³ پایینی.
آی شئهلی یارپاقدا شکلی یویونان،
تایینی تاپمیشدی بو کؤنلو کۆسکۆن.
گۆیۆم'دن اووجوما سوزولن سویلا،
دویغون اوره‌ییمه داممیشدی او گون.
دیلین گول آتیردی دیله‌یی آجا،
چپلیگین اورتایا چپر گریردی.
سنین دوققوز یاشین ائله اورداجا،
منیم اون یئددیمه دوققوز گلیردی.
آی اؤزو یان اؤتوب گؤزله چاغیران!
یئرییَن یولوم دا یئتمیردی سونا.
هرله‌نیب-فیرلانیب کسه جیغیرلا،
قارشینا چیخیردیم اون آددیم سونرا.
روحوم گیروو کیمی، سئوگیم آند کیمی،
قانیما هوپوردو حاللیجا⁴ هیم-جیم.
دولاشیب هؤرویه قالان آت کیمی،
بیر اووسون جیزیغی کئچه بیلمیردیم.
چیچه‌یین پؤرتموشدو، آی اوردا اسَن!
لاله قیزارتمیشدی باشینداکی شال.
بوندان یانیملی‌یدین⁵ اوندا دئیه‌سن،
بوندان چوخ دادلی‌یدی سؤزونده‌کی بال.
نئجه یاراشیردین بییانلی چؤله!
نئجه ایلاهی‌یدین- سئوَندن سوروش!
هر آللاه بنده‌سی دئیه‌سن ائله،
عؤمرونده بیرجه یول گؤزل اولورموش.
#آغا_لاچینلی
¹- میس سهنگ.
²- شیرین‌بیان
³- قنات
⁴- شیشمان- دولغون
⁵- جان‌یاندیران
#شعر_اوجاغی
@SheirOcagi
عؤمرونده بیرجه یول گؤزل اولموسان،
یولوما چیخمیشدین چیینی گۆیۆم'لۆ¹
آی بۇتا سئوگیمه سو وئریب سوسان!
سؤیله، سنمیسن‌می او آغ گئییملی؟!
دوزده داغ بیتمیشدی بیر بؤلوک چندن،
گؤی یئرده گزیردی ایتمیش آیینی.
بییانلی²، کولک‌لی، کئفلی چمندن،
ائوه آپاریردین کهریز³ پایینی.
آی شئهلی یارپاقدا شکلی یویونان،
تایینی تاپمیشدی بو کؤنلو کۆسکۆن.
گۆیۆم'دن اووجوما سوزولن سویلا،
دویغون اوره‌ییمه داممیشدی او گون.
دیلین گول آتیردی دیله‌یی آجا،
چپلیگین اورتایا چپر گریردی.
سنین دوققوز یاشین ائله اورداجا،
منیم اون یئددیمه دوققوز گلیردی.
آی اؤزو یان اؤتوب گؤزله چاغیران!
یئرییَن یولوم دا یئتمیردی سونا.
هرله‌نیب-فیرلانیب کسه جیغیرلا،
قارشینا چیخیردیم اون آددیم سونرا.
روحوم گیروو کیمی، سئوگیم آند کیمی،
قانیما هوپوردو حاللیجا⁴ هیم-جیم.
دولاشیب هؤرویه قالان آت کیمی،
بیر اووسون جیزیغی کئچه بیلمیردیم.
چیچه‌یین پؤرتموشدو، آی اوردا اسَن!
لاله قیزارتمیشدی باشینداکی شال.
بوندان یانیملی‌یدین⁵ اوندا دئیه‌سن،
بوندان چوخ دادلی‌یدی سؤزونده‌کی بال.
نئجه یاراشیردین بییانلی چؤله!
نئجه ایلاهی‌یدین- سئوَندن سوروش!
هر آللاه بنده‌سی دئیه‌سن ائله،
عؤمرونده بیرجه یول گؤزل اولورموش.
#آغا_لاچینلی
¹- میس سهنگ.
²- شیرین‌بیان
³- قنات
⁴- شیشمان- دولغون
⁵- جان‌یاندیران
#شعر_اوجاغی
@SheirOcagi
▫️آنالی گئجه
بیز یولا دوشنده ساعات یاتیبمیش،
هله قاباقدایمیش باغری‌قان گئجه.
یاخین یونجالیقدا بال'ا باتیبمیش،
اوزاق بولودلوقدا باغیران گئجه.
ائوه قاییدیردیق اوجاق سۇیۇندان،
کؤنول آت چاپیردی اۆزۆ دونیایا.
قایادا قایناییب آغرینی اۇدان،
یئنیدن دوغموشدو بیزی دونیایا.
چیغنانیب¹ دینیردی چینقیللی یاماج،
باشی هرله‌نیردی باییلان اۏوون.
تپه قاشقاسیندا² پول-پول یانان داش،
اۆزۆردۆ گؤلونده ایشیق آلووون.
یانیردی اوزاغین شیمشک داماری،
بولاق نئی توتوردو اؤز اؤیۆدۆیله.³
او مونجوق دۆزۆملۆ ایلهام داغلاری،
ایشیق یوغوروردو ذیروه سۆدۆیله.
«بونلار یازمالی‌دی» دئییردین منه،
قوزئیی قۇجۇردۇ قالایلی قاناد.
یاش آلماس چیله‌ییب یای گونئیینه،
بیزه پای وئریردی گئجه آد-با-آد.
یوخو بیشیریردی یایلاق دورناسی،
هاوانی یاران قوش بالا پری‌یدی.
اورَکدن جارلانان آنا دوعاسی،
کؤنول چیراغی‌یدی، جان چپری‌یدی.
گؤرکَمی باشقایدی او تۇنج⁴ گئجه‌نین،
گئجه‌نی گؤزویله یۏنموشدو آنام.
فیل دومان اوچوردان قورخونج گئجه‌نین،
لاپ آی‌دۆشمزینده یانمیشدی آنام.
آغ-آلا گئییملی قارا گئجه‌نین،
اوچقوندان آسیلمیش قالا گئجه‌نین،
اؤزومه بنزه‌ین قابا گئجه‌نین،
اینجه آناسینا دؤنموشدو آنام.
اوغوروم مینمیشدی اولدوز آتینا،
هاردا دۇیانیم وار اوردا دا خوشدو.
قویوب قۏل بالینجی باشیم آلتینا،
آنام گئجه‌‌یه ده آنا اولموشدو.
منه قۏل آچمیشدی او سیغناق آدا،
آج آیی ایشینی بیلیب قاچیردی.
سۆله‌نیب-سۆمسۆنن آغزی‌قارا⁵ دا،
آنا هنیریندن⁶ سیلیب قاچیردی.
دئمیرم یئل ایینه، یئلپیک سویوق‌دو،
آنا اولان یئرده گوج غمی بوغور.
آنا اولان یئرده قارانلیق یوخدو،
آنا اولان یئرده یئر ایشیق دوغور.
ساعات برک یاتیبمیش آن اۇدا-اۇدا،
هر کس بیر یانلیشین یول یولداشی‌دی.
بالانین چاش-باشلیق آغریسینی دا،
هامیدان بیرینجی آنا داشیدی.
گل منی باشا دوش، آی «منم» دئین!
ائله آتا کیمی آنا دا بیرمیش.
آنا اته‌ییندن توتوب یئرییَن،
تانری ائوینه‌جن گئده بیلیرمیش.
#آغا_لاچینلی
¹-تاپدالانماق، آیاقلانماق
²- آلنین تام اورتاسی
³- نصیحت
⁴- قورغوشون- قالای
⁵- جاناوار- قورد
⁶- یاواش سس
#شعر_اوجاغی
@SheirOcagi
بیز یولا دوشنده ساعات یاتیبمیش،
هله قاباقدایمیش باغری‌قان گئجه.
یاخین یونجالیقدا بال'ا باتیبمیش،
اوزاق بولودلوقدا باغیران گئجه.
ائوه قاییدیردیق اوجاق سۇیۇندان،
کؤنول آت چاپیردی اۆزۆ دونیایا.
قایادا قایناییب آغرینی اۇدان،
یئنیدن دوغموشدو بیزی دونیایا.
چیغنانیب¹ دینیردی چینقیللی یاماج،
باشی هرله‌نیردی باییلان اۏوون.
تپه قاشقاسیندا² پول-پول یانان داش،
اۆزۆردۆ گؤلونده ایشیق آلووون.
یانیردی اوزاغین شیمشک داماری،
بولاق نئی توتوردو اؤز اؤیۆدۆیله.³
او مونجوق دۆزۆملۆ ایلهام داغلاری،
ایشیق یوغوروردو ذیروه سۆدۆیله.
«بونلار یازمالی‌دی» دئییردین منه،
قوزئیی قۇجۇردۇ قالایلی قاناد.
یاش آلماس چیله‌ییب یای گونئیینه،
بیزه پای وئریردی گئجه آد-با-آد.
یوخو بیشیریردی یایلاق دورناسی،
هاوانی یاران قوش بالا پری‌یدی.
اورَکدن جارلانان آنا دوعاسی،
کؤنول چیراغی‌یدی، جان چپری‌یدی.
گؤرکَمی باشقایدی او تۇنج⁴ گئجه‌نین،
گئجه‌نی گؤزویله یۏنموشدو آنام.
فیل دومان اوچوردان قورخونج گئجه‌نین،
لاپ آی‌دۆشمزینده یانمیشدی آنام.
آغ-آلا گئییملی قارا گئجه‌نین،
اوچقوندان آسیلمیش قالا گئجه‌نین،
اؤزومه بنزه‌ین قابا گئجه‌نین،
اینجه آناسینا دؤنموشدو آنام.
اوغوروم مینمیشدی اولدوز آتینا،
هاردا دۇیانیم وار اوردا دا خوشدو.
قویوب قۏل بالینجی باشیم آلتینا،
آنام گئجه‌‌یه ده آنا اولموشدو.
منه قۏل آچمیشدی او سیغناق آدا،
آج آیی ایشینی بیلیب قاچیردی.
سۆله‌نیب-سۆمسۆنن آغزی‌قارا⁵ دا،
آنا هنیریندن⁶ سیلیب قاچیردی.
دئمیرم یئل ایینه، یئلپیک سویوق‌دو،
آنا اولان یئرده گوج غمی بوغور.
آنا اولان یئرده قارانلیق یوخدو،
آنا اولان یئرده یئر ایشیق دوغور.
ساعات برک یاتیبمیش آن اۇدا-اۇدا،
هر کس بیر یانلیشین یول یولداشی‌دی.
بالانین چاش-باشلیق آغریسینی دا،
هامیدان بیرینجی آنا داشیدی.
گل منی باشا دوش، آی «منم» دئین!
ائله آتا کیمی آنا دا بیرمیش.
آنا اته‌ییندن توتوب یئرییَن،
تانری ائوینه‌جن گئده بیلیرمیش.
#آغا_لاچینلی
¹-تاپدالانماق، آیاقلانماق
²- آلنین تام اورتاسی
³- نصیحت
⁴- قورغوشون- قالای
⁵- جاناوار- قورد
⁶- یاواش سس
#شعر_اوجاغی
@SheirOcagi
▫️ائوده اولمادین
دونن سیزه گلدیم، ائوده اولمادین،
اؤلوم سون کؤچونو گۏرا گؤندریب.
گؤردوم وار-گلده‌دی¹ بیر گونه قادین،
گؤردوم دوغما یئرده غریبم، غریب.
گؤردوم چیینی دوشوب آنا-باجینین،
تورپاق هیم ائله‌دی² سنی گزه‌نه.
ساققیز پؤهره‌سینین، توت آغاجینین،
آغلادی هر بیری اؤز عوَضینه.
قازماقدان فس³ قویدو آشلی قاب-قاجاق،
او صیله⁴ سوفره ده کؤنول آچمادی.
کؤزو کؤپه‌جه‌ین او گورراه⁵ اوجاق،
گؤزو غم ایچه‌نه هئچ یاپیشمادی.
قویو دا قورویوب او سن گئده‌لی،
کولک بالتا چالیب دیره‌یی کسه.
او سامان تایاسی، او بلیم⁶ تلی،
پاییز تولکوسونه بنزه‌دی نه‌سه.
یارپاقدا خینجیلان بۏز خیشیلتینی،
بولاقدا اینجه‌لن آغ پیچیلتینی،
قبرینه سانجیلان گؤی سیزیلتینی،
آغی‌یا چئویریب یوخلوغون سنین.
خیخیبدی⁷، چؤکوبدو او چارداق دوه،
دهلیزده یووا یوخ، یووادا جیک-جیک.
فیرچا بارماغیندان کۆل درمیش ائوه،
سینیق ماهنی سپیر قارا سنسیزلیک.
کیشی، سندن سونرا سؤز سؤزو بوغور،
بهمزه⁸ نئیله‌مز بالی آجیدان؟!
بو باشسیز کۏمادا اؤیود کین دوغور،
توستو اَیری چیخیر دوم‌دوز باجادان.
ایللر سیناق یئری، ایشلر چلپه‌شیک،
منلیک هئچ سولوخمور سوچو یویاندا.
چال-چپر چیغنادان⁹ چۇغؤلچو پیشیک،
چوخ یوماق هئللَتمیش سن اولمایاندا.
چینارین جیر سسی دیبینی اۏیور،
تندیره کۆل تؤکور ایچی یانان یاس.
قیزیل گۆرزه¹⁰ کیمی قار-قابیق قویور،
چیرپیلان گیله‌نار، چیرپیلان گیلاس.
یئددی هاچا سینیر بیر یئل اسنده،
روحونا قانادتک کؤمک ائت، کؤمک!
ائله سن قایانین سال¹¹کؤلگه‌سینده،
یاتیب هووخورورموش¹² هر یاللی کؤپک.
اؤلوم یول آییران، بیزلر داغ-آران،
بیرلیک چۇخاسی‌یدین- یۏخا دؤنموسن.
ایشیغا داد وئریب کؤنول دۏیدوران،
سنمیسن، سنمیسن، ائله سنمیسن.
#آغا_لاچینلی
¹- گزینمک، گئت-گل
²- قاش-گؤزله اشاره ائتمک
³- قیرمیزی رنگلی، قوتازلی باش گئییمی
⁴- هدیه
⁵- قیزغین
⁶- کولش، هشَم
⁷- دوه‌نین دیزی اوسته اوتورماغی
⁸- توت و اوزوم شیره‌سی، دوشاب
⁹- تاپدالاماق
¹⁰- بیر نؤوع زهرلی ایلان
¹¹- ایٖری
¹²- بارماقلارینی آغزینا توتاراق، نفسی ایله اونلاری قیزدیرماق
#شعر_اوجاغی
@SheirOcagi
دونن سیزه گلدیم، ائوده اولمادین،
اؤلوم سون کؤچونو گۏرا گؤندریب.
گؤردوم وار-گلده‌دی¹ بیر گونه قادین،
گؤردوم دوغما یئرده غریبم، غریب.
گؤردوم چیینی دوشوب آنا-باجینین،
تورپاق هیم ائله‌دی² سنی گزه‌نه.
ساققیز پؤهره‌سینین، توت آغاجینین،
آغلادی هر بیری اؤز عوَضینه.
قازماقدان فس³ قویدو آشلی قاب-قاجاق،
او صیله⁴ سوفره ده کؤنول آچمادی.
کؤزو کؤپه‌جه‌ین او گورراه⁵ اوجاق،
گؤزو غم ایچه‌نه هئچ یاپیشمادی.
قویو دا قورویوب او سن گئده‌لی،
کولک بالتا چالیب دیره‌یی کسه.
او سامان تایاسی، او بلیم⁶ تلی،
پاییز تولکوسونه بنزه‌دی نه‌سه.
یارپاقدا خینجیلان بۏز خیشیلتینی،
بولاقدا اینجه‌لن آغ پیچیلتینی،
قبرینه سانجیلان گؤی سیزیلتینی،
آغی‌یا چئویریب یوخلوغون سنین.
خیخیبدی⁷، چؤکوبدو او چارداق دوه،
دهلیزده یووا یوخ، یووادا جیک-جیک.
فیرچا بارماغیندان کۆل درمیش ائوه،
سینیق ماهنی سپیر قارا سنسیزلیک.
کیشی، سندن سونرا سؤز سؤزو بوغور،
بهمزه⁸ نئیله‌مز بالی آجیدان؟!
بو باشسیز کۏمادا اؤیود کین دوغور،
توستو اَیری چیخیر دوم‌دوز باجادان.
ایللر سیناق یئری، ایشلر چلپه‌شیک،
منلیک هئچ سولوخمور سوچو یویاندا.
چال-چپر چیغنادان⁹ چۇغؤلچو پیشیک،
چوخ یوماق هئللَتمیش سن اولمایاندا.
چینارین جیر سسی دیبینی اۏیور،
تندیره کۆل تؤکور ایچی یانان یاس.
قیزیل گۆرزه¹⁰ کیمی قار-قابیق قویور،
چیرپیلان گیله‌نار، چیرپیلان گیلاس.
یئددی هاچا سینیر بیر یئل اسنده،
روحونا قانادتک کؤمک ائت، کؤمک!
ائله سن قایانین سال¹¹کؤلگه‌سینده،
یاتیب هووخورورموش¹² هر یاللی کؤپک.
اؤلوم یول آییران، بیزلر داغ-آران،
بیرلیک چۇخاسی‌یدین- یۏخا دؤنموسن.
ایشیغا داد وئریب کؤنول دۏیدوران،
سنمیسن، سنمیسن، ائله سنمیسن.
#آغا_لاچینلی
¹- گزینمک، گئت-گل
²- قاش-گؤزله اشاره ائتمک
³- قیرمیزی رنگلی، قوتازلی باش گئییمی
⁴- هدیه
⁵- قیزغین
⁶- کولش، هشَم
⁷- دوه‌نین دیزی اوسته اوتورماغی
⁸- توت و اوزوم شیره‌سی، دوشاب
⁹- تاپدالاماق
¹⁰- بیر نؤوع زهرلی ایلان
¹¹- ایٖری
¹²- بارماقلارینی آغزینا توتاراق، نفسی ایله اونلاری قیزدیرماق
#شعر_اوجاغی
@SheirOcagi
▫️آزربایجان
سن دئییرسن:
آران سنی داریخدیریر دار قویوجان.
من دئییرم:
صحرادا دا اوجالیقدی آزربایجان.
سوروشورسان:
هانسی آدلا جیناسلی‌دی دیلَک هئجه‌ن؟
من دئییرم:
آزربایجان، آزربایجان، آزربایجان.
سن دئییرسن:
تک‌لنَنده گؤیه باخیر کؤنول باجان.
من دئییرم:
آند یئریم‌دی، آمانیم‌دی آزربایجان.
سوروشورسان:
هانسی آزلیق چوخلوق‌لاردان چوخدو سایجان؟
من دئییرم:
آزربایجان، آزربایجان، آزربایجان.
سن دئییرسن:
قوردلاری وار...هئچ قورتولمور یوردو قۇجان،
من دئییرم:
آغریسی‌یلا درد ساغالدار آزربایجان.
سوروشورسان:
هانسی یولدا جاندان کئچیب تؤکردین قان؟
من دئییرم:
قوی گووَنسین، قوی چاغیرسین آزربایجان!
سن دئییرسن:
چوخ اؤیونمه، اۏددا اۆزۆر اۇلۇ قۏجان
من دئییرم: اؤز کولوندن دیری چیخار آزربایجان.
سن دئییرسن:
اوز گؤرمه‌دین گؤستردیگین حاقّی-سایجان.
من دئییرم:
سئوَنینه بیر هئیکل‌دی آزربایجان.
#آغا_لاچینلی
#شعر_اوجاغی
@SheirOcagi
سن دئییرسن:
آران سنی داریخدیریر دار قویوجان.
من دئییرم:
صحرادا دا اوجالیقدی آزربایجان.
سوروشورسان:
هانسی آدلا جیناسلی‌دی دیلَک هئجه‌ن؟
من دئییرم:
آزربایجان، آزربایجان، آزربایجان.
سن دئییرسن:
تک‌لنَنده گؤیه باخیر کؤنول باجان.
من دئییرم:
آند یئریم‌دی، آمانیم‌دی آزربایجان.
سوروشورسان:
هانسی آزلیق چوخلوق‌لاردان چوخدو سایجان؟
من دئییرم:
آزربایجان، آزربایجان، آزربایجان.
سن دئییرسن:
قوردلاری وار...هئچ قورتولمور یوردو قۇجان،
من دئییرم:
آغریسی‌یلا درد ساغالدار آزربایجان.
سوروشورسان:
هانسی یولدا جاندان کئچیب تؤکردین قان؟
من دئییرم:
قوی گووَنسین، قوی چاغیرسین آزربایجان!
سن دئییرسن:
چوخ اؤیونمه، اۏددا اۆزۆر اۇلۇ قۏجان
من دئییرم: اؤز کولوندن دیری چیخار آزربایجان.
سن دئییرسن:
اوز گؤرمه‌دین گؤستردیگین حاقّی-سایجان.
من دئییرم:
سئوَنینه بیر هئیکل‌دی آزربایجان.
#آغا_لاچینلی
#شعر_اوجاغی
@SheirOcagi
▫️بیر اکدیگیم دۇزدا یاندی، بیریسی بۇزدا،
بیر سپدیگیم تۏز آرتیردی قوراق پاییزدا.
بیتیردیگیم چورویوبدو بو اؤتن یازدا،
نئجه دئییم گلن یایا قالدی منیمکی؟!
باخ کؤنلومدن آخان قانا- چیچه‌ییم بودور!
باخ گؤزلری جان ساتانا- گؤیچه‌ییم بودور!
تویوما دا توی توتدولار، گئرچه‌یی بودور،
قارشیداکی قارا وایا قالدی منیمکی.
چوخ دیدیلدیم ایچریدن من دیدیم-دیدیم،
دوروم کیمه گیلئی‌لنیم، یا هارا گئدیم؟
وئردیگیمی بو دونیادان آلا بیلمه‌دیم،
او دونیایا، او دونیایا قالدی منیمکی.
#آغا_لاچینلی
#شعر_اوجاغی
@SheirOcagi
بیر سپدیگیم تۏز آرتیردی قوراق پاییزدا.
بیتیردیگیم چورویوبدو بو اؤتن یازدا،
نئجه دئییم گلن یایا قالدی منیمکی؟!
باخ کؤنلومدن آخان قانا- چیچه‌ییم بودور!
باخ گؤزلری جان ساتانا- گؤیچه‌ییم بودور!
تویوما دا توی توتدولار، گئرچه‌یی بودور،
قارشیداکی قارا وایا قالدی منیمکی.
چوخ دیدیلدیم ایچریدن من دیدیم-دیدیم،
دوروم کیمه گیلئی‌لنیم، یا هارا گئدیم؟
وئردیگیمی بو دونیادان آلا بیلمه‌دیم،
او دونیایا، او دونیایا قالدی منیمکی.
#آغا_لاچینلی
#شعر_اوجاغی
@SheirOcagi
▫️اولدو قورتاردی.
قورولو یووانی داغیدیب سؤکدوک،
آغری بایرامی‌دی بو کئفی‌کؤکلوک.
بیر سیییق سیرداشلیق، دلی دؤنوکلوک،
مندن «یوخ» پایینی آلدی قورتاردی،
اولدو قورتاردی.
ساتدی، گؤزو ساتدی اۆزۆ گؤیچه‌یی،
چوخدو بیج اوره‌یین دال گیره‌جه‌یی.
یازی بیَندیرن بیاض چیچه‌یی،
پاییزین بۏز یئلی یولدو قورتاردی،
اولدو قورتاردی.
آیریلیق چوخ دردی آز دۇیا-دۇیا،
هانی بیر ائله سو سوچلاری یویا؟
تار-قاوال گرَکمز قوردوغون تویا،
شیطان شؽرتؽغؽنؽ* چالدی قورتاردی،
اولدو قورتاردی.
کوسولو روحوموز گؤیده لاللاشیر،
دانیشان یوخوموز ها ناغیللاشیر.
بو آجی آهیمیز چتین باللاشیر،
تکلیگین بوش ائوی دولدو قورتاردی،
اولدو قورتاردی.
تا کؤنلوم سیغینماز گؤزل گؤزونه،
تا قاچیب گیرمه‌رم کؤز دنیزینه.
بیر گون جانی‌یانان دؤیوب دیزینه،
دئیر بو یازلیقلار اؤلدو قورتاردی،
اولدو قورتاردی.
#آغا_لاچینلی
* موردارلیق، کثیف‌لیک
#شعر_اوجاغی
@SheirOcagi
قورولو یووانی داغیدیب سؤکدوک،
آغری بایرامی‌دی بو کئفی‌کؤکلوک.
بیر سیییق سیرداشلیق، دلی دؤنوکلوک،
مندن «یوخ» پایینی آلدی قورتاردی،
اولدو قورتاردی.
ساتدی، گؤزو ساتدی اۆزۆ گؤیچه‌یی،
چوخدو بیج اوره‌یین دال گیره‌جه‌یی.
یازی بیَندیرن بیاض چیچه‌یی،
پاییزین بۏز یئلی یولدو قورتاردی،
اولدو قورتاردی.
آیریلیق چوخ دردی آز دۇیا-دۇیا،
هانی بیر ائله سو سوچلاری یویا؟
تار-قاوال گرَکمز قوردوغون تویا،
شیطان شؽرتؽغؽنؽ* چالدی قورتاردی،
اولدو قورتاردی.
کوسولو روحوموز گؤیده لاللاشیر،
دانیشان یوخوموز ها ناغیللاشیر.
بو آجی آهیمیز چتین باللاشیر،
تکلیگین بوش ائوی دولدو قورتاردی،
اولدو قورتاردی.
تا کؤنلوم سیغینماز گؤزل گؤزونه،
تا قاچیب گیرمه‌رم کؤز دنیزینه.
بیر گون جانی‌یانان دؤیوب دیزینه،
دئیر بو یازلیقلار اؤلدو قورتاردی،
اولدو قورتاردی.
#آغا_لاچینلی
* موردارلیق، کثیف‌لیک
#شعر_اوجاغی
@SheirOcagi
▫️سون ائوده
یئریمیز بیر کۏلون باتیق دیبینده،
یان-یانا یاتمیشیق بو داشلار کیمی.
ایندی گاپلاشیریق* اؤلو دیلینده،
آیریلیب تاپیشان سیرداشلار کیمی.
نه گلن، نه گئدن، نه بیر سس-سمیر،
دونیادان بؤیوکموش یوخلوق اؤلکه‌سی.
اسمیر اوستوموزده، تا چوخدان اسمیر،
اووولان یارپاغین اؤلو کؤلگه‌سی.
بو قارا سارایدا هئچ کیم ساواشمیر،
هئچ کیم ده قارغیمیر آندی پوزانا.
آنجاق نه‌دن‌دیسه اوچوب یوووشمور،
بو کولوم کولونه، توزوم توزونا.
دامیر گؤز جامینا بو یورغان قومو،
تا قولون اوزانمیر دادلی چیمدیگه.
قونوب دامیمیزا او قوشا قومرو،
نه‌سه قۇر-قۇرلاشیر دیمدیک-دیمدییه.
اؤپوشون، اؤتوشون، سئوگی غوللاری!
آغ یالان سیزی ده یالقیز قویاجاق.
اؤزوم چوخ اوینادیم بو اویونلاری،
یئرینی یاندیردی من آدلی اوجاق.
اؤلمزدیم آند ایچن سؤزونده دورسا،
من قولتوق وئردیگیم یادی قۏرودو.
اورَکلر ایمانا گۆزگۆ توتمورسا،
توکَنمز هئچ هاردا بو دئدی-قودو...
یئریمیز بیر کۏلون باتیق دیبینده،
یان-یانا یاتمیشیق بو داشلار کیمی.
ایندی آغلاشیریق اؤلو دیلینده،
آیریلیب تاپیشان سیرداشلار کیمی.
#آغا_لاچینلی
#شعر_اوجاغی
@SheirOcagi
یئریمیز بیر کۏلون باتیق دیبینده،
یان-یانا یاتمیشیق بو داشلار کیمی.
ایندی گاپلاشیریق* اؤلو دیلینده،
آیریلیب تاپیشان سیرداشلار کیمی.
نه گلن، نه گئدن، نه بیر سس-سمیر،
دونیادان بؤیوکموش یوخلوق اؤلکه‌سی.
اسمیر اوستوموزده، تا چوخدان اسمیر،
اووولان یارپاغین اؤلو کؤلگه‌سی.
بو قارا سارایدا هئچ کیم ساواشمیر،
هئچ کیم ده قارغیمیر آندی پوزانا.
آنجاق نه‌دن‌دیسه اوچوب یوووشمور،
بو کولوم کولونه، توزوم توزونا.
دامیر گؤز جامینا بو یورغان قومو،
تا قولون اوزانمیر دادلی چیمدیگه.
قونوب دامیمیزا او قوشا قومرو،
نه‌سه قۇر-قۇرلاشیر دیمدیک-دیمدییه.
اؤپوشون، اؤتوشون، سئوگی غوللاری!
آغ یالان سیزی ده یالقیز قویاجاق.
اؤزوم چوخ اوینادیم بو اویونلاری،
یئرینی یاندیردی من آدلی اوجاق.
اؤلمزدیم آند ایچن سؤزونده دورسا،
من قولتوق وئردیگیم یادی قۏرودو.
اورَکلر ایمانا گۆزگۆ توتمورسا،
توکَنمز هئچ هاردا بو دئدی-قودو...
یئریمیز بیر کۏلون باتیق دیبینده،
یان-یانا یاتمیشیق بو داشلار کیمی.
ایندی آغلاشیریق اؤلو دیلینده،
آیریلیب تاپیشان سیرداشلار کیمی.
#آغا_لاچینلی
#شعر_اوجاغی
@SheirOcagi
▫️چای قیراغیندا
بنیزی آچیقدی آیازلی گؤیون،
سولار دورولاشیب یای قوراغیندا.
پالتار یوماق اوچون آروادلار بو گون،
قازان آسیبدیلار چای قیراغیندا.
چای گئدیر کؤچ کیمی، گئدیر سس-کوی‌له؛
دوشونمه دونیادا ناغیل قوتارمیش!
کؤپوک شار اوزدوکجه سویون اوزویله،
اونو دار قؽژوولار¹ آتیب توتارمیش.
ماویلیک بزه‌میش آخار-باخاری²
توستو توققا تاخیر داغین بئلینه.
داشینا-داشینا اوزویوخاری،
بو توستو چایلاری، اوجاق چیخاری،
تؤکولور گونشین قیزیل گؤلونه.
یویولور پالتارلار قایا دیبینده،
کیر سویا آخاندا کؤلگه‌لر باتیر.
چکیب یویَنیندن³، دارتیب ایپیندن،
دره چوخ بولاغی بو چایا قاتیر.
تئشت‌لر دوزوم-دوزوم، تییان‌لار جرگه،
سؤزلر کؤرپو سالیر اوتای-بوتایا.
آتماجا، آندیرما داشی‌یلا بیرگه،
آخیر غئیبت‌لر ده دوم‌دورو سویا.
قازانین آلتیندا لالیقمیش⁴ قۏردا،
ایچلی کؤمبه‌چه‌لر⁵ دمده قالیبدی.
دینیر اوماجاقلار گول دوداقلاردا،
اوتانجاق خاللار⁶سا بمده قالیبدی.
بنیزی آچیقدی آیازلی گؤیون،
بولود دا بۇلۇنمۇر، هاوا حلیم‌دی.
کیمینین یودوغو بوردا گوزَم یون،
کیمینین چیرپدیغی گبه-کیلیم‌دی.
گؤیده چادیرلانیر توستو چوبوغو،
سویوق دا گئدیبدی یاز یوخوسونا.
بالا کؤینه‌ییندن کۆرۆنن بۇغۇ،
بنزه‌دیر آنالار گول قوخوسونا.
اۆزۆر شکیل‌لری دوم‌دورو سودا،
اونسوز دا گؤزَلدی بیزیم قادینلار.
هر الده بئش-آلتی قارپیز توتسا دا،
ارین قایغیسینی اونوتمور اونلار.
قازان قاینامادا، پالتار سریلی،
بولودو ساخلاییر توستو قاندالی.
دؤرد یانا یئریییر دهنه‌نین یئلی،
قونور قایالیغا دومان قارتالی.
گون قانا دوشمه‌سین، سرگی یاغیشا،
یاریشیر آروادلار چای قیراغیندا.
اوجاق داشلاری‌تک وئریب باش-باشا،
دانیشیر آروادلار چای قیراغیندا.
#آغا_لاچینلی
¹- چایدا سویون چوخ سورعتله آخدیغی یئر (Qıjov)
²- ایکی چای و یا سو یاتاغینی بؤلن خط
³- اووسار، جیلوو
⁴- حدّن آرتیق یئتیشمیش
⁵- ایری، گیرده، قالین چؤرک
⁶- موسیقینین اساس مئلودییاسی ایله اویوملو اولان یئنی حیصّه
#شعر_اوجاغی
@SheirOcagi
بنیزی آچیقدی آیازلی گؤیون،
سولار دورولاشیب یای قوراغیندا.
پالتار یوماق اوچون آروادلار بو گون،
قازان آسیبدیلار چای قیراغیندا.
چای گئدیر کؤچ کیمی، گئدیر سس-کوی‌له؛
دوشونمه دونیادا ناغیل قوتارمیش!
کؤپوک شار اوزدوکجه سویون اوزویله،
اونو دار قؽژوولار¹ آتیب توتارمیش.
ماویلیک بزه‌میش آخار-باخاری²
توستو توققا تاخیر داغین بئلینه.
داشینا-داشینا اوزویوخاری،
بو توستو چایلاری، اوجاق چیخاری،
تؤکولور گونشین قیزیل گؤلونه.
یویولور پالتارلار قایا دیبینده،
کیر سویا آخاندا کؤلگه‌لر باتیر.
چکیب یویَنیندن³، دارتیب ایپیندن،
دره چوخ بولاغی بو چایا قاتیر.
تئشت‌لر دوزوم-دوزوم، تییان‌لار جرگه،
سؤزلر کؤرپو سالیر اوتای-بوتایا.
آتماجا، آندیرما داشی‌یلا بیرگه،
آخیر غئیبت‌لر ده دوم‌دورو سویا.
قازانین آلتیندا لالیقمیش⁴ قۏردا،
ایچلی کؤمبه‌چه‌لر⁵ دمده قالیبدی.
دینیر اوماجاقلار گول دوداقلاردا،
اوتانجاق خاللار⁶سا بمده قالیبدی.
بنیزی آچیقدی آیازلی گؤیون،
بولود دا بۇلۇنمۇر، هاوا حلیم‌دی.
کیمینین یودوغو بوردا گوزَم یون،
کیمینین چیرپدیغی گبه-کیلیم‌دی.
گؤیده چادیرلانیر توستو چوبوغو،
سویوق دا گئدیبدی یاز یوخوسونا.
بالا کؤینه‌ییندن کۆرۆنن بۇغۇ،
بنزه‌دیر آنالار گول قوخوسونا.
اۆزۆر شکیل‌لری دوم‌دورو سودا،
اونسوز دا گؤزَلدی بیزیم قادینلار.
هر الده بئش-آلتی قارپیز توتسا دا،
ارین قایغیسینی اونوتمور اونلار.
قازان قاینامادا، پالتار سریلی،
بولودو ساخلاییر توستو قاندالی.
دؤرد یانا یئریییر دهنه‌نین یئلی،
قونور قایالیغا دومان قارتالی.
گون قانا دوشمه‌سین، سرگی یاغیشا،
یاریشیر آروادلار چای قیراغیندا.
اوجاق داشلاری‌تک وئریب باش-باشا،
دانیشیر آروادلار چای قیراغیندا.
#آغا_لاچینلی
¹- چایدا سویون چوخ سورعتله آخدیغی یئر (Qıjov)
²- ایکی چای و یا سو یاتاغینی بؤلن خط
³- اووسار، جیلوو
⁴- حدّن آرتیق یئتیشمیش
⁵- ایری، گیرده، قالین چؤرک
⁶- موسیقینین اساس مئلودییاسی ایله اویوملو اولان یئنی حیصّه
#شعر_اوجاغی
@SheirOcagi
▫️اؤلدو وار، دؤندو یوخ.
بو عؤمور تانری پایی؛ پیس-یاخشی یاشاناجاق،
بو باشدان باسان آغری، آیاقدان آشیناجاق¹،
بو سیرتیق سیلدیریمدا، دیرناغیم داش یوناجاق،
بو قیشدان ایستی چکیب دۏندو یوخ، سؤندو یوخدو؛
اؤلدو وار، دؤندو یوخدو.
گؤتورمز ایچیم-چؤلوم، دار-دانلاق کؤته‌یینی،
چاغیرماز یانمیش دیلیم، آند پوزموش ایتیگینی،
یالاماز یالین الیم، یاراقلی اته‌یینی،
هاردا منلیک سینیرسا، اوردا گؤروندو یوخدو؛
اؤلدو وار، دؤندو یوخدو.
اؤزو داش-قاش اریدن، دن گزه‌نه «کیش!» دئییر،
یولو اینام چۆرۆدن، دۆز ایشیمه یاش دئییر،
یۆز کؤهلن'ی یورودن، بیر یابی'دان «دوش!» دئییر،
کوسوب کۆرلۆک² بیجیندن یانا کۆرۆندۆ یوخدو؛
اؤلدو وار، دؤندو یوخدو.
او نه اوجا اولدوزدو!... مینبَرینه مینه‌جم،
او نه درین دنیزدی!... آنبارینا ائنه‌جم.
دوشونمه هر هۆرَندن من قورخوب چکینه‌جم!
گؤیده ائو تیکمه‌یینجه، یئری بۆرۆندۆ یوخدو؛
اؤلدو وار، دؤندو یوخدو.
بو دالا دارتانلاردان³ قاباغا اؤتمه‌یینجه،
بو کینلی کیلیدلرین گؤزونده بیتمه‌یینجه،
بو چپر زینجیریندن آچار دوزَلتمه‌یینجه،
بو دردی اۆتمه‌یینجه، کئفه سۆرۆندۆ یوخدو؛
اؤلدو وار، دؤندو یوخدو.
#آغا_لاچینلی
¹- سورتولوب آرادان گئتمک- سیلینیب یوخ اولماق (Aşınmaq)
²- شیلتاقلیق- قیشقیریقچیلیق
³- بیر شئیی الی و یا باشقا بیر شئیله توتوب اؤزونه طرف و یا کنارا چکمک (Dartmaq)
#شعر_اوجاغی
@SheirOcagi
بو عؤمور تانری پایی؛ پیس-یاخشی یاشاناجاق،
بو باشدان باسان آغری، آیاقدان آشیناجاق¹،
بو سیرتیق سیلدیریمدا، دیرناغیم داش یوناجاق،
بو قیشدان ایستی چکیب دۏندو یوخ، سؤندو یوخدو؛
اؤلدو وار، دؤندو یوخدو.
گؤتورمز ایچیم-چؤلوم، دار-دانلاق کؤته‌یینی،
چاغیرماز یانمیش دیلیم، آند پوزموش ایتیگینی،
یالاماز یالین الیم، یاراقلی اته‌یینی،
هاردا منلیک سینیرسا، اوردا گؤروندو یوخدو؛
اؤلدو وار، دؤندو یوخدو.
اؤزو داش-قاش اریدن، دن گزه‌نه «کیش!» دئییر،
یولو اینام چۆرۆدن، دۆز ایشیمه یاش دئییر،
یۆز کؤهلن'ی یورودن، بیر یابی'دان «دوش!» دئییر،
کوسوب کۆرلۆک² بیجیندن یانا کۆرۆندۆ یوخدو؛
اؤلدو وار، دؤندو یوخدو.
او نه اوجا اولدوزدو!... مینبَرینه مینه‌جم،
او نه درین دنیزدی!... آنبارینا ائنه‌جم.
دوشونمه هر هۆرَندن من قورخوب چکینه‌جم!
گؤیده ائو تیکمه‌یینجه، یئری بۆرۆندۆ یوخدو؛
اؤلدو وار، دؤندو یوخدو.
بو دالا دارتانلاردان³ قاباغا اؤتمه‌یینجه،
بو کینلی کیلیدلرین گؤزونده بیتمه‌یینجه،
بو چپر زینجیریندن آچار دوزَلتمه‌یینجه،
بو دردی اۆتمه‌یینجه، کئفه سۆرۆندۆ یوخدو؛
اؤلدو وار، دؤندو یوخدو.
#آغا_لاچینلی
¹- سورتولوب آرادان گئتمک- سیلینیب یوخ اولماق (Aşınmaq)
²- شیلتاقلیق- قیشقیریقچیلیق
³- بیر شئیی الی و یا باشقا بیر شئیله توتوب اؤزونه طرف و یا کنارا چکمک (Dartmaq)
#شعر_اوجاغی
@SheirOcagi
▫️صمیمیّت
ارک ایله ائوینه گلمیشم، آی دوست!
گؤرورم آچیق‌دیر قاشین-قاباغین.
کومانی عمارت بیلمیشم آی دوست!
نه گرک اوتانیب تر آخیتماغیم.
سندن دونیا مالی اومماییرام من،
سانما بیَنمیرم یاوان لوقمانی.
دۏیورسان قلبیمی صمیمیّتدن-
باغریما باسارام کاسیب داخمانی.
سن دانیش صمیمی، کیری صمیمی،
صمیمیّت قلبین محک داشی‌دیر.
صؤحبت اولاجاق‌سا غیرِ صمیمی،
دینیب-دانیشماماق داها یاخشی‌دیر.
دوستوم! دوغرولتماسا عمل نیّتی،
اینسان نئجه قالخار، نئجه اوجالار؟
بیر اؤلچو گؤتورسَک صمیمیّتی،
عالیم وار چوباندان گئریده قالار.
بیر آجی باخیشدان سینمیش اوره‌یی،
ساغالدان او هانسی شیرین نعمت‌دیر؟
دادا گتیرن ده دوزو، چؤره‌یی،
ائله صمیمیّت، صمیمیّت‌دیر.
#آغا_لاچینلی
#شعر_اوجاغی
@SheirOcagi
ارک ایله ائوینه گلمیشم، آی دوست!
گؤرورم آچیق‌دیر قاشین-قاباغین.
کومانی عمارت بیلمیشم آی دوست!
نه گرک اوتانیب تر آخیتماغیم.
سندن دونیا مالی اومماییرام من،
سانما بیَنمیرم یاوان لوقمانی.
دۏیورسان قلبیمی صمیمیّتدن-
باغریما باسارام کاسیب داخمانی.
سن دانیش صمیمی، کیری صمیمی،
صمیمیّت قلبین محک داشی‌دیر.
صؤحبت اولاجاق‌سا غیرِ صمیمی،
دینیب-دانیشماماق داها یاخشی‌دیر.
دوستوم! دوغرولتماسا عمل نیّتی،
اینسان نئجه قالخار، نئجه اوجالار؟
بیر اؤلچو گؤتورسَک صمیمیّتی،
عالیم وار چوباندان گئریده قالار.
بیر آجی باخیشدان سینمیش اوره‌یی،
ساغالدان او هانسی شیرین نعمت‌دیر؟
دادا گتیرن ده دوزو، چؤره‌یی،
ائله صمیمیّت، صمیمیّت‌دیر.
#آغا_لاچینلی
#شعر_اوجاغی
@SheirOcagi
▫️گلمیشم او شهره.
گلمیشم او شهره،
یاتمیش اولار آجیغین.
قیرخیندان قیرخ ایل کئچیب-
گؤروشسوز آیریلیغین.
تئلئفونون دَییشیب،
عونوانین دا گیزلَنیب.
او بۇزلاقدا ائو شیشیب،
او تپه‌جیک دۆزلَنیب.
دَییر «یوخدور!» گوللـه‌سی
«واردیر» اومان سورغوما.
قوی سۏوروق قار پوفلَسین،
جان‌ایچی سویوغوما!
آه، بو بیاض چؤل-باییر،
آیین سۆدلۆ سۆلۆیۆ*!
چاتیلداییر، سیزلاییر،
شیو سؤیودون سومویو.
باخ، بئله‌جه بیر آندا،
بیردن گلیب اوز-اوزه،
ساری ایشیق آلتیندا،
دایانیریق گؤز-گؤزه.
ائوین بیزه توی قورور،
آی سئوگیمین یاشداشی.
چال بیغیما اود وورور،
گیلئیینین گؤز یاشی.
ائوین کیچیک بیر قوتو،
اؤرتولموشوک یورغانا.
قۏشا قۏللار تابوتو،
لایلا دئییر یورغانا.
بیر یئرده‌ییک ایندی بیز،
کؤچموشوک کئف گونونه.
بۆرۆنمۆشۆک ایکیمیز،
بیر نفَس کفَنینه.
#آغا_لاچینلی
* بالدیری ایچی بوش اولان بیتکیلرین تزه گؤیَرمیش گؤوده‌سی. (Sülük)
#شعر_اوجاغی
@SheirOcagi
گلمیشم او شهره،
یاتمیش اولار آجیغین.
قیرخیندان قیرخ ایل کئچیب-
گؤروشسوز آیریلیغین.
تئلئفونون دَییشیب،
عونوانین دا گیزلَنیب.
او بۇزلاقدا ائو شیشیب،
او تپه‌جیک دۆزلَنیب.
دَییر «یوخدور!» گوللـه‌سی
«واردیر» اومان سورغوما.
قوی سۏوروق قار پوفلَسین،
جان‌ایچی سویوغوما!
آه، بو بیاض چؤل-باییر،
آیین سۆدلۆ سۆلۆیۆ*!
چاتیلداییر، سیزلاییر،
شیو سؤیودون سومویو.
باخ، بئله‌جه بیر آندا،
بیردن گلیب اوز-اوزه،
ساری ایشیق آلتیندا،
دایانیریق گؤز-گؤزه.
ائوین بیزه توی قورور،
آی سئوگیمین یاشداشی.
چال بیغیما اود وورور،
گیلئیینین گؤز یاشی.
ائوین کیچیک بیر قوتو،
اؤرتولموشوک یورغانا.
قۏشا قۏللار تابوتو،
لایلا دئییر یورغانا.
بیر یئرده‌ییک ایندی بیز،
کؤچموشوک کئف گونونه.
بۆرۆنمۆشۆک ایکیمیز،
بیر نفَس کفَنینه.
#آغا_لاچینلی
* بالدیری ایچی بوش اولان بیتکیلرین تزه گؤیَرمیش گؤوده‌سی. (Sülük)
#شعر_اوجاغی
@SheirOcagi
▫️کیمسه‌سیز
هر آغریمین یوز یاشی،
آرواد پیسدی اوشاقدان.
کیمسه‌نه‌م بیر باش‌داشی،
او دا باخیر اوزاقدان.
اؤزگه‌لشیب اؤز قاغام،
قوهوم بئله، یاد بئله.
قوپوب دوشن یارپاغام،
قوناق گئتدیم اۏدگیله.
گؤیو قارسدی یاش آهیم،
قوشلار دئدی «گون‌آیدین!»
نئیله‌ینم، آللاهیم،
اولانی دا آلایدین!
آلایدین بو وار-یوخو،
سوپوره‌یدین مین کره.
چیخاردیغیم چاخ-چوخو،
سووورایدین یئللره!
قۇرۇدایدین قۇیۇمۇ،
سن آی منی لهله‌دن!
دیرریک-میرریک سۇیۇمۇ،
کسه‌یدین لاپ دهنه‌دن!
کسه‌یدین هر توتامی،
قالایدیم من لاپ نه‌سیز.
آلمایایدین آتامی،
اولمایایدیم کیمسه‌سیز!
#آغا_لاچینلی
#شعر_اوجاغی
@SheirOcagi
هر آغریمین یوز یاشی،
آرواد پیسدی اوشاقدان.
کیمسه‌نه‌م بیر باش‌داشی،
او دا باخیر اوزاقدان.
اؤزگه‌لشیب اؤز قاغام،
قوهوم بئله، یاد بئله.
قوپوب دوشن یارپاغام،
قوناق گئتدیم اۏدگیله.
گؤیو قارسدی یاش آهیم،
قوشلار دئدی «گون‌آیدین!»
نئیله‌ینم، آللاهیم،
اولانی دا آلایدین!
آلایدین بو وار-یوخو،
سوپوره‌یدین مین کره.
چیخاردیغیم چاخ-چوخو،
سووورایدین یئللره!
قۇرۇدایدین قۇیۇمۇ،
سن آی منی لهله‌دن!
دیرریک-میرریک سۇیۇمۇ،
کسه‌یدین لاپ دهنه‌دن!
کسه‌یدین هر توتامی،
قالایدیم من لاپ نه‌سیز.
آلمایایدین آتامی،
اولمایایدیم کیمسه‌سیز!
#آغا_لاچینلی
#شعر_اوجاغی
@SheirOcagi
▫️هئچ نه
«وارلیق-وارلیق» دئییب چوخ گورولداما!
او دنیز هئچ نه‌دی، بوخاری هئچ نه.
یوخلوق وار اولانین توکَنمز واری،
آشاغی هئچ نه‌دی، یوخاری هئچ نه.
سونو وای'ا دوشور بو شن تویلارین،
بالی آغولاشیر دادلی پایلارین.
سسینده شام یانان شیمشک چایلارین،
چاخاری هئچ نه‌دی، چیخاری هئچ نه.
آرتار آز ثاوابین، دردله دالاشسان،
ایلانا-چایانا سوموک بالینج‌سان.
ها یوز ده قوورولسان، یوز ده آلیشسان،
اوجاق کۆللۆیۆن‌دۆ، بوخاری هئچ نه.
اؤیونمه بیر بئله، سن اؤزجه جانین!
دۆزۆنۆ سؤیله‌رم، قارالار قانین.
هامینی اؤلدورن دیری دونیانین،
آخاری هئچ نه‌دی، باخاری هئچ نه.
چوخالیر یاغیسی چوخ اۆیۆدَنین،
کسیلیر هردمی قارا هده‌نین.
بندلری برکییَن بو میس بدنین،
قالایی هئچ نه‌دی، پاخیری هئچ نه.
یامان گوپلانیرسان یاخشی آنیندا!
اوتانیر آغریلار سنین یانیندا.
داشی قیزیل دوغان او کالان'ین¹ دا،
سۆرۆسۆ هئچ نه‌دی، ناخیری هئچ نه.
یئری یوخ یاد ائل'ه چوخ اۇیان‌لارین،
اؤزلری حالسیزدی او هایانلارین².
یوواسی یوردوندا اولمایانلارین،
آخیری هئچ نه‌دی، آخیری هئچ نه.
#آغا_لاچینلی
¹- وارلی آدام (Kalan)
²- کؤمک‌چی- آرخا
#شعر_اوجاغی
@SheirOcagi
«وارلیق-وارلیق» دئییب چوخ گورولداما!
او دنیز هئچ نه‌دی، بوخاری هئچ نه.
یوخلوق وار اولانین توکَنمز واری،
آشاغی هئچ نه‌دی، یوخاری هئچ نه.
سونو وای'ا دوشور بو شن تویلارین،
بالی آغولاشیر دادلی پایلارین.
سسینده شام یانان شیمشک چایلارین،
چاخاری هئچ نه‌دی، چیخاری هئچ نه.
آرتار آز ثاوابین، دردله دالاشسان،
ایلانا-چایانا سوموک بالینج‌سان.
ها یوز ده قوورولسان، یوز ده آلیشسان،
اوجاق کۆللۆیۆن‌دۆ، بوخاری هئچ نه.
اؤیونمه بیر بئله، سن اؤزجه جانین!
دۆزۆنۆ سؤیله‌رم، قارالار قانین.
هامینی اؤلدورن دیری دونیانین،
آخاری هئچ نه‌دی، باخاری هئچ نه.
چوخالیر یاغیسی چوخ اۆیۆدَنین،
کسیلیر هردمی قارا هده‌نین.
بندلری برکییَن بو میس بدنین،
قالایی هئچ نه‌دی، پاخیری هئچ نه.
یامان گوپلانیرسان یاخشی آنیندا!
اوتانیر آغریلار سنین یانیندا.
داشی قیزیل دوغان او کالان'ین¹ دا،
سۆرۆسۆ هئچ نه‌دی، ناخیری هئچ نه.
یئری یوخ یاد ائل'ه چوخ اۇیان‌لارین،
اؤزلری حالسیزدی او هایانلارین².
یوواسی یوردوندا اولمایانلارین،
آخیری هئچ نه‌دی، آخیری هئچ نه.
#آغا_لاچینلی
¹- وارلی آدام (Kalan)
²- کؤمک‌چی- آرخا
#شعر_اوجاغی
@SheirOcagi