▫️آیی و سیچان

بیر آیی یاتمیش ایدی راحتله،
اوزانیب خیلی استراحتله.

بیر سیچان آیی اوستدن ائتدی گُذار،
اولدو اول آیی خوابدن بیدار.

ال آتیب موشو ائیله‌دی نخجیر،
دوردو یالوارماغا اونا او فقیر.

دئدی کی «سن منی گل ائیله رها،
یئر دوشر، ائیلرم عوض پیدا».

آیی گولدو، اونو رها قیلدی،
سیچانین مطلبین روا قیلدی.

بیر زامان اووچو قورموش ایدی دام،
دوشدو دام ایچره اول قَوی‌اندام.

نه قدر زور قیلدی اول مغرور،
دامی قیرماقلیق اولمادی مقدور.

باغیریب ناله و فغان ائتدی،
گؤز یاشین سئیل تک روان ائتدی.

آیینین ناله‌سین ائشیتدی سیچان،
بیلدی کیم، دامٍ دردده‌دیر پیچان.

گلدی کسدی دیشی‌یله اول دامی،
آیی‌یا ائیله‌دی سرانجامی.

دئدی آیی کی: «قالمادیم غمده،
یاخشیلیق ایتمز ایمیش عالمده»...

#سیدعظیم_شیروانلی
#شعر_اوجاغی
@SheirOcagi

▫️ای ملَک سیما! جمالین رشکِ جنّت باغی‌دیر،
قامتین طوبا، لبین گویا کی گول یارپاغی‌دیر.

جسمِ زاریم اشکِ چشمیمدن پوزولسا، نئی عجب،
تئز تاپار رخنه، بلی، بیر یئر کی سو اویناغی‌دیر.

لشکرِ غم کؤنلومون مولکونو ویران ائیله‌دی،
پادشاهیم، بیر ترحّم قیل، مروّت چاغی‌دیر!

واعظا، تقریر قیلما چوخ دا روزِ حشردن!
عاشق اوچون‌ روزِ محشر، یارین آیریلماغی‌دیر‌.

هر یئتن شوخِ جفا‌پیشه‌ منه ائیلر ستم،
بو بلا چکمیش ووجودوم خوبلار تاپداغی‌دیر.

لاله‌لر کیم، باش وئریب خاکِ مزاریمدان چیخار،
فرقَتیندن چکدیگیم، سینه‌مده حسرت داغی‌دیر.

لطف ائدیب بیر گون نولار سورسان پریشان حالیمی؟!
«سیّدِ» سرگشته زلفِ پُرخَمین دوستاغی‌دیر.

#سیدعظیم_شیروانلی
#شعر_اوجاغی
@SheirOcagi

▫️چیخیر جان جسمدن؛ بیر دم یئتیر جانانیمی، یارب!
گؤروب رُخسارینی تسلیم ائدیم بو جانیمی، یارب!

گؤروب رخسارینی نذر ائتمیشم کیم، جان ائدیم قربان،
یئتیر یاری، قبول ائیله منیم قربانیمی، یارب!

تنِ زاریمدان آل یا، ای خدا، بو جانِ ناشادی،
مبدّل قیل وصالِ یاره یا هجرانیمی، یا رب!

تنورِ پیرزندن بدتر اولدو چشمِ خونباریم،
جهان غرق اولدو، ساکت ائیله بو توفانیمی، یارب!

تؤکه‌یدی قانیمی، آزاد اولایدیم دردِ هجراندان،
گتیر بیر رحمه اول بیدادگر سلطانیمی، یارب!

امیدیم وار کیم، گؤرسه فغانیم رحم ائده دلبر،
یئتیر اول ماهِ بی‌مِهره منیم افغانیمی، یارب!

#سیدعظیم_شیروانلی
@SheirOcagi

‍ ▫️یادا سالدیقدا سنی، دیده‌ی خونبار آغلار،
یار هجرین چکن، البتّه‌ که ناچار آغلار.

بلبلِ بی‌دل الیندن اوزولوب دامنِ گل،
گئجه‌لر صوبحه کیمی ناله چکیب زار آغلار.

شاد ایکن وصلین ایله کؤنلومه غم چکدی هجوم،
اولدو مین گونه یئنه درده گرفتار، آغلار.

تابِ تب، ظلمتِ شب، محنتِ غربت، غمِ یار،
ائیله‌مز تاب بو محنت‌لره بیمار، آغلار.

بس که شب تا به سحر آغلاماق عادت‌دی منه،
همدم اولموش منه یکسر در و دیوار آغلار.

من که هجر آتشینه یاندی ووجودوم، بالله،
منیم احوالیما دوزخ ده یانار، نار آغلار.

او قدر آغلادی «سیّد» غمِ هجران ایله، کیم-
اونون احوالینا بو چرخِ ستمکار آغلار.

#سیدعظیم_شیروانلی
🎙 یوسف انصاری
#شعر_اوجاغی
@SheirOcagi

‍ ‍ ▫️دل عاشق اولوب زولفونه، سئودالارا دوشدو،
مجنون کیمی زنجیر ایله صحرالارا دوشدو.

تا جام'ه اوزون عکسی دوشوب، ای لبی مِیگون!
چوخ خام‌طمع غیر تمنّالارا دوشدو.

سرِّ دهنین سؤیله‌دیلر رمز ایله مردم،
بو مبهم اولان نکته معمّالارا دوشدو.

زولفون ائله‌دی خاطرِ عشّاقی نشیمن،
اول شکلِ چلیپا بو‌ کلیسالارا دوشدو.

تا قطره‌ی نِیسان اولا دندانینه نسبت،
ال ابردن اوزدو، دلِ دریالارا دوشدو.

گه سرزنشِ خلق، گهی کینه‌ی گردون،
عشقینده باشیم گؤر که نه غوغالارا دوشدو.

یاندیردی منی شعشعه‌ی نورِ جمالین،
موسا کیمی «سیّد» بو تجلّالارا دوشدو.

#سیدعظیم_شیروانلی
🎙 یوسف انصاری
#شعر_اوجاغی
@SheirOcagi

▫️چای کناریندا بیر نفر عابد،
حقّه اولموشدو شوق ایله ساجد.

گؤردو بیر کلّه سو اوزونده عیان،
آپاریر چای آشاغی سیلِ روان.

دوروب عابد او کلّه‌یه یئتدی،
کلّه‌نین حالینی سؤال ائتدی.

او قورو کلّه نیطقه گلدی روان،
دئدی: «ای عابدِ فرشته‌نشان!

شاه ایدیم من جهاندا عزّت ایله،
روزگاریم کئچیردی شوکت ایله.

تاج ایله تخت و دولتیم وار ایدی،
گنج و زرّ و رعیّتیم وار ایدی.

هر طرف ایشلر ایدی فرمانیم،
خوش کئچردی همیشه دورانیم.

مجلسیمده مدام جامِ شراب،
ساقی و باده، چنگ و تار و رباب.

نئچه زرّین‌کمر غلام‌لاریم،
حاصل ایدی جهاندا کام‌لاریم.

مجلیسیم خُلد، باده کوثر ایدی،
هر مراد ایسته‌سم- میسّر ایدی.

ائیله‌دی دهر عیشیمی برباد،
مرغِ روحه اجل اولوب صیّاد.

منزلیم تا که بیر مغاک اولدو،
بدنیم دؤندو تیره خاک اولدو.

قبریمی سیل هم فنا قیلدی،
منی بو حالا مبتلا قیلدی»...

«سیّد»ا، بیر دیاردیر بو فنا،
که برابردیر اوندا شاه و گدا!

#سیدعظیم_شیروانلی
#شعر_اوجاغی
@SheirOcagi