▫️هله بو میلّت آییلماز.
غم چکمه عم‌اوغلو! هله بو ملّت آییلماز.
آج، لوت قالا داییم، چکه مین ذلّت، آییلماز.
مشروطه اوچون تؤکدوله بو شهرده قانلار،
قانونِ اساسی دئیه جان وئردی جاوانلار،
آخیردا یئنه حؤکمران اولدو بیزه خانلار.
کئچدی باشینا توربا، داهی اُمّت آییلماز.
غم چکمه عم‌اوغلو! هله بو ملّت آییلماز.
هر عصرده توش اولدو بلایه یازیق ایران،
اولموشدو سیپر جور و جفایه یازیق ایران،
سون گونده اسیر اولدو قضایه یازیق ایران،
چکدی نه قدر رنج و ستم، محنت، آییلماز،
غم چکمه عم‌اوغلو! هله بو ملّت آییلماز.
ایرانلی اسیردیر، اونو غول خلق ائدیب الله،
حقّین طلب ائتسه اولاجاق عرضده گمراه،
لازم دئییل ایرانلی هر ایشدن اولا آگاه،
چوخ برک یاتیب، اولسا نه‌قدر صحبت، آییلماز،
غم چکمه عم‌اوغلو! هله بو ملّت آییلماز.
اسرافیل اگر صورو چیخیب عرشده چالسا،
هئچ دورمایاجاقدیر نه قدر بو دالی قالسا.
گر مخلوقون احوالینی مندن خبر آلسا،
هر کس دئییرم دورما، چاتیب فرصت، آتیلماز،
غم چکمه عم‌اوغلو! هله بو ملّت آییلماز.
ایرانلی گرک اولماسین آفاقده آزاد،
قان آغلاییب ائتسین گرک او ناله و فریاد،
همسایه‌لری ائتسه اگر لوطف ایله امداد،
دوشمز باشا، ائتمز ابداً همّت، آییلماز،
غم چکمه عم‌اوغلو! هله بو ملّت آییلما.
بئش یورغانین آلتیندا بو تنبل نئجه یاتمیش!
چیخمیر نفسی فیس- فیسی‌دیر، قان تره باتمیش.
توپ گوللـه‌لری عالمِ امکانی اویاتمیش،
واه… واه! اونو قویماز دورا بو غفلت، آییماز،
غم چکمه عم‌اوغلو! هله بو ملّت آییلماز.
بیر گون گله‌جک، من گؤرورم، دیک دوراجاقسان،
اطرافه باخیب باشه جوت اللی ووراجاقسان.
هر یئرده گئدیب بوینونو مطلق بوراجاقسان،
وئر اوندا «ریاسیز» سؤزومه قیمت! آییلماز،
غم چکمه عم‌اوغلو! هله بو ملّت آییلماز...
#محمد_بی‌ریا
@SheirOcagi
غم چکمه عم‌اوغلو! هله بو ملّت آییلماز.
آج، لوت قالا داییم، چکه مین ذلّت، آییلماز.
مشروطه اوچون تؤکدوله بو شهرده قانلار،
قانونِ اساسی دئیه جان وئردی جاوانلار،
آخیردا یئنه حؤکمران اولدو بیزه خانلار.
کئچدی باشینا توربا، داهی اُمّت آییلماز.
غم چکمه عم‌اوغلو! هله بو ملّت آییلماز.
هر عصرده توش اولدو بلایه یازیق ایران،
اولموشدو سیپر جور و جفایه یازیق ایران،
سون گونده اسیر اولدو قضایه یازیق ایران،
چکدی نه قدر رنج و ستم، محنت، آییلماز،
غم چکمه عم‌اوغلو! هله بو ملّت آییلماز.
ایرانلی اسیردیر، اونو غول خلق ائدیب الله،
حقّین طلب ائتسه اولاجاق عرضده گمراه،
لازم دئییل ایرانلی هر ایشدن اولا آگاه،
چوخ برک یاتیب، اولسا نه‌قدر صحبت، آییلماز،
غم چکمه عم‌اوغلو! هله بو ملّت آییلماز.
اسرافیل اگر صورو چیخیب عرشده چالسا،
هئچ دورمایاجاقدیر نه قدر بو دالی قالسا.
گر مخلوقون احوالینی مندن خبر آلسا،
هر کس دئییرم دورما، چاتیب فرصت، آتیلماز،
غم چکمه عم‌اوغلو! هله بو ملّت آییلماز.
ایرانلی گرک اولماسین آفاقده آزاد،
قان آغلاییب ائتسین گرک او ناله و فریاد،
همسایه‌لری ائتسه اگر لوطف ایله امداد،
دوشمز باشا، ائتمز ابداً همّت، آییلماز،
غم چکمه عم‌اوغلو! هله بو ملّت آییلما.
بئش یورغانین آلتیندا بو تنبل نئجه یاتمیش!
چیخمیر نفسی فیس- فیسی‌دیر، قان تره باتمیش.
توپ گوللـه‌لری عالمِ امکانی اویاتمیش،
واه… واه! اونو قویماز دورا بو غفلت، آییماز،
غم چکمه عم‌اوغلو! هله بو ملّت آییلماز.
بیر گون گله‌جک، من گؤرورم، دیک دوراجاقسان،
اطرافه باخیب باشه جوت اللی ووراجاقسان.
هر یئرده گئدیب بوینونو مطلق بوراجاقسان،
وئر اوندا «ریاسیز» سؤزومه قیمت! آییلماز،
غم چکمه عم‌اوغلو! هله بو ملّت آییلماز...
#محمد_بی‌ریا
@SheirOcagi
▫️یارانمیشام.
من فطرتاً مبارزِ دوران یارانمیشام،
یوخسوللارا امید و نگهبان یارانمیشام.
پیکانِ ظلمه سینه‌می من ائتمیشم هدف،
زحمتکشین نجاتینا قالخان یارانمیشام.
آغ کؤینه‌ییم قانیملا بویاندیقجا دهرده،
ائللر بیلیر بو رُتبه‌یه شایان یارانمیشام.
قوی آنلاسین مرامیمی اربابِ ارتجاع!
من کارگر گروهینه قربان یارانمیشام.
#محمد_بی‌ریا
#شعر_اوجاغی
@SheirOcagi
من فطرتاً مبارزِ دوران یارانمیشام،
یوخسوللارا امید و نگهبان یارانمیشام.
پیکانِ ظلمه سینه‌می من ائتمیشم هدف،
زحمتکشین نجاتینا قالخان یارانمیشام.
آغ کؤینه‌ییم قانیملا بویاندیقجا دهرده،
ائللر بیلیر بو رُتبه‌یه شایان یارانمیشام.
قوی آنلاسین مرامیمی اربابِ ارتجاع!
من کارگر گروهینه قربان یارانمیشام.
#محمد_بی‌ریا
#شعر_اوجاغی
@SheirOcagi
▫️یادگار اولسون!
طبیعت قوی بو ناله‌مدن داغیلسین، تارومار اولسون،
آلیشسین گؤیلر آهیمدان، جهان بیر شعله‌زار اولسون!
سنه قارشی بو عالمده خیانت اولسا قلبیمده،
وجودوم اود توتوب یانسین، اورک درده دچار اولسون!
یالان سؤز بیلمیرم اصلا، بودور دائم منیم ذکریم:
منه سنسیز ایشیق دونیا، قارانلیق بیر مزار اولسون!
دئییل ممکن حضوروندا اولا شاعیر سرافکنده،
اگر دؤنسم اؤز عهدیمدن، منه خلق ایچره عار اولسون!
سئویملی دلبرین افسوس، الیندن اؤپدوم، آیریلدیم،
اؤزوم گئتدیم؛ سنه مندن بو شعریم یادگار اولسون!
#محمد_بی‌ریا
#شعر_اوجاغی
@SheirOcagi
طبیعت قوی بو ناله‌مدن داغیلسین، تارومار اولسون،
آلیشسین گؤیلر آهیمدان، جهان بیر شعله‌زار اولسون!
سنه قارشی بو عالمده خیانت اولسا قلبیمده،
وجودوم اود توتوب یانسین، اورک درده دچار اولسون!
یالان سؤز بیلمیرم اصلا، بودور دائم منیم ذکریم:
منه سنسیز ایشیق دونیا، قارانلیق بیر مزار اولسون!
دئییل ممکن حضوروندا اولا شاعیر سرافکنده،
اگر دؤنسم اؤز عهدیمدن، منه خلق ایچره عار اولسون!
سئویملی دلبرین افسوس، الیندن اؤپدوم، آیریلدیم،
اؤزوم گئتدیم؛ سنه مندن بو شعریم یادگار اولسون!
#محمد_بی‌ریا
#شعر_اوجاغی
@SheirOcagi
▫️قالاجاق.
کؤنول! زمانه‌ده عشق اهلینه وفا قالاجاق،
وفاسیز عاشیقه هر لحظه مین جفا قالاجاق.
یارانمیشین سوْنو هئچ‌دیر بو فانی دونیادا،
بشر بوتون گئده‌جک؛ یئر، دنیز، سما قالاجاق.
هانی حکیم محبّت، منه علاج ائله‌سین،
اگر او باخماسا بو درده، بی‌شفا قالاجاق.
مذمّت ائتمه، بو فرصت منه غنیمت‌دیر،
نه من، نه ساقی، نه دلبر، نه ده صفا قالاجاق.
آچاندا قبریمی، بو جسمدن نشانه فقط-
وجودو خاکه دؤنن بیر قورو قافا قالاجاق.
نه‌دیر بو آلچاق-اوجا، خالِقین خزینه‌لری،
نه واختاجان بونون اسراری اِختفا قالاجاق؟
یقین کی، قالمایاجاق ظولمدن جهاندا اثر،
بو وارلیغی یاشادان حکمت و دوعا قالاجاق.
تمام عوَض اولونار ارضده بو قانونلار،
هر ایش مروّت ایله عدل و انصافا قالاجاق.
قرینه‌لر کئچه‌جک، مُلک‌لر بهشت اولاجاق،
یئر اوزره انسانا بنزر ملک‌لقا قالاجاق.
ای اژدراوْغلو، سلیمانه سؤیله، تک دئییلم،
بو اؤلکه‌ده اوْنا مین‌لرجه «بی‌ریا» قالاجاق.
#محمد_بی‌ریا
@SheirOcagi
کؤنول! زمانه‌ده عشق اهلینه وفا قالاجاق،
وفاسیز عاشیقه هر لحظه مین جفا قالاجاق.
یارانمیشین سوْنو هئچ‌دیر بو فانی دونیادا،
بشر بوتون گئده‌جک؛ یئر، دنیز، سما قالاجاق.
هانی حکیم محبّت، منه علاج ائله‌سین،
اگر او باخماسا بو درده، بی‌شفا قالاجاق.
مذمّت ائتمه، بو فرصت منه غنیمت‌دیر،
نه من، نه ساقی، نه دلبر، نه ده صفا قالاجاق.
آچاندا قبریمی، بو جسمدن نشانه فقط-
وجودو خاکه دؤنن بیر قورو قافا قالاجاق.
نه‌دیر بو آلچاق-اوجا، خالِقین خزینه‌لری،
نه واختاجان بونون اسراری اِختفا قالاجاق؟
یقین کی، قالمایاجاق ظولمدن جهاندا اثر،
بو وارلیغی یاشادان حکمت و دوعا قالاجاق.
تمام عوَض اولونار ارضده بو قانونلار،
هر ایش مروّت ایله عدل و انصافا قالاجاق.
قرینه‌لر کئچه‌جک، مُلک‌لر بهشت اولاجاق،
یئر اوزره انسانا بنزر ملک‌لقا قالاجاق.
ای اژدراوْغلو، سلیمانه سؤیله، تک دئییلم،
بو اؤلکه‌ده اوْنا مین‌لرجه «بی‌ریا» قالاجاق.
#محمد_بی‌ریا
@SheirOcagi
▫️شاگرد:
ایسته‌ییرسن کی، معلّم! بیز اورکدن باریشاق،
آغزیمیزدا دیلیمیز وار، قوی او دیلده دانیشاق!
مدنیّت بوروموش علم ایله دونیا اوزونو،
داها تنبل‌لیگی آت، گل گئجه-گوندوز چالیشاق!
معلّم:
اشـتباه ائیلمه‌یین! وار هر ایشین قاعده‌سی،
او شیرین یئرلی دیلین مرکزه یوخ فایده‌سی.
امر ائدیبلر کی، سوخام آغزیزا جبراً بو دیلی،
دونیادا فارس دیلی‌دیر جومله دیلین والیده‌سی.
شاگرد:
آی معلّم! اونو اؤیرنمه‌یه یوخ طاقتیمیز،
آنا دیلده دانیشیب گولمک اولوب عادتیمیز.
چوخ بؤیوکدور او غریب دیل، جیراجاق آغزیمیزی،
بیز تصوّور ائله‌دیکجه دَییشیر حالتیمیز.
معلّم:
سیز اوشاق‌سیز، نه بیلیرسیز، آی اوغول یاخشی-یامان؟!
خوراساندا بو دیله حرمت ائدیر پیر و جوان.
اونلارین خاطیرینه سیز ده گرک اؤیرنه‌سیز،
سؤزومو ردّ ائله‌سز، دولت ائدر باشقا گومان.
شاگرد:
آی معلّم، بیر اوتان، ری'لی، گیلان'لی دئییلیک،
ائلیمیز، یوردوموز آیری، گاوالان'لی دئییلیک.
آزریسـتان‌دی بیزیم ملّتیمیز، تاریخه باخ!
معده‌دن سؤیله‌میریک، فیکری دومانلی دئیلیک.
معلّم:
منه تاریخ اوخوماق ایندی یاراشماز، بیلیرم،
دوزو لاپ زور-زوراکی حاقّّیزی اینکار ائدیرم.
دیلیزی ترک ائله‌ییب ایندی گرک فارسلاشاسیز!
آدیزی تـاریخین اوّل واراغیندان سیلیرم.
#محمد_بی‌ریا
#شعر_اوجاغی
@SheirOcagi
ایسته‌ییرسن کی، معلّم! بیز اورکدن باریشاق،
آغزیمیزدا دیلیمیز وار، قوی او دیلده دانیشاق!
مدنیّت بوروموش علم ایله دونیا اوزونو،
داها تنبل‌لیگی آت، گل گئجه-گوندوز چالیشاق!
معلّم:
اشـتباه ائیلمه‌یین! وار هر ایشین قاعده‌سی،
او شیرین یئرلی دیلین مرکزه یوخ فایده‌سی.
امر ائدیبلر کی، سوخام آغزیزا جبراً بو دیلی،
دونیادا فارس دیلی‌دیر جومله دیلین والیده‌سی.
شاگرد:
آی معلّم! اونو اؤیرنمه‌یه یوخ طاقتیمیز،
آنا دیلده دانیشیب گولمک اولوب عادتیمیز.
چوخ بؤیوکدور او غریب دیل، جیراجاق آغزیمیزی،
بیز تصوّور ائله‌دیکجه دَییشیر حالتیمیز.
معلّم:
سیز اوشاق‌سیز، نه بیلیرسیز، آی اوغول یاخشی-یامان؟!
خوراساندا بو دیله حرمت ائدیر پیر و جوان.
اونلارین خاطیرینه سیز ده گرک اؤیرنه‌سیز،
سؤزومو ردّ ائله‌سز، دولت ائدر باشقا گومان.
شاگرد:
آی معلّم، بیر اوتان، ری'لی، گیلان'لی دئییلیک،
ائلیمیز، یوردوموز آیری، گاوالان'لی دئییلیک.
آزریسـتان‌دی بیزیم ملّتیمیز، تاریخه باخ!
معده‌دن سؤیله‌میریک، فیکری دومانلی دئیلیک.
معلّم:
منه تاریخ اوخوماق ایندی یاراشماز، بیلیرم،
دوزو لاپ زور-زوراکی حاقّّیزی اینکار ائدیرم.
دیلیزی ترک ائله‌ییب ایندی گرک فارسلاشاسیز!
آدیزی تـاریخین اوّل واراغیندان سیلیرم.
#محمد_بی‌ریا
#شعر_اوجاغی
@SheirOcagi
▫️آزربایجان ائلی‌ییک.
بیز بیر ائلیک، بیلسین هامی، آندیمیزدیر سؤزوموز!
خایینلره مرحمتله باخا بیلمز گوزوموز،
خلقیمیزی حفظ ائتمیشیک ایللر بویو، اؤزوموز،
تیکیلمه‌میش یئره، بیزیم آلنی آچیق اوزوموز.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
بیر یولوموز واردی، او دا حوریّتین یولودور،
باشدان-باشا اورگیمیز صداقتله دولودور،
آذربایجان ائلی، حقّین بوکولمه‌ین قولودور.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
سود وئریبدیر بیزه آنا، ایشیغیندا اؤلکه‌نین،
بسلَنمیشیک قوجاغیندا آل گونشلی سحرین،
هر یئرینی بوروموشوک قافلانتی'نین-خزر'ین،
آلیر بیزدن بوتون ائللر، سوراغینی ظفرین.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
#محمد_بی‌ریا
#شعر_اوجاغی
@SheirOcagi
بیز بیر ائلیک، بیلسین هامی، آندیمیزدیر سؤزوموز!
خایینلره مرحمتله باخا بیلمز گوزوموز،
خلقیمیزی حفظ ائتمیشیک ایللر بویو، اؤزوموز،
تیکیلمه‌میش یئره، بیزیم آلنی آچیق اوزوموز.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
بیر یولوموز واردی، او دا حوریّتین یولودور،
باشدان-باشا اورگیمیز صداقتله دولودور،
آذربایجان ائلی، حقّین بوکولمه‌ین قولودور.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
سود وئریبدیر بیزه آنا، ایشیغیندا اؤلکه‌نین،
بسلَنمیشیک قوجاغیندا آل گونشلی سحرین،
هر یئرینی بوروموشوک قافلانتی'نین-خزر'ین،
آلیر بیزدن بوتون ائللر، سوراغینی ظفرین.
بیز دونیانین قورخو بیلمز بیر قهرمان ائلی‌ییک،
آلوولاردان یارانیلمیش آزربایجان ائلی‌ییک.
#محمد_بی‌ریا
#شعر_اوجاغی
@SheirOcagi
▫️ای اؤلکه‌می ظولم ایله قویان دهرده ویران!
محکوم اولا بیلمز سنه بوندان سورا اینسان.
اینسان ازَلیندن یارانیب اشرفِ خلقت،
لاییق دئییل اصلا اونا زنجیرِ اسارت.
قوی، بیز ده بیر اینسان‌تک اولاق نائلِ آمال،
گل ائتمه بیزیم حاقّیمیزی قهر ایله پامال!
#محمد_بی‌ریا
@SheirOcagi
محکوم اولا بیلمز سنه بوندان سورا اینسان.
اینسان ازَلیندن یارانیب اشرفِ خلقت،
لاییق دئییل اصلا اونا زنجیرِ اسارت.
قوی، بیز ده بیر اینسان‌تک اولاق نائلِ آمال،
گل ائتمه بیزیم حاقّیمیزی قهر ایله پامال!
#محمد_بی‌ریا
@SheirOcagi
▫️گل، ای اجل! عالمده بوگوندن منه یار اول!
آرتیق داها قویما یانام اودلاردا سببسیز!
ای طالعیمین غؤنچه‌سی قوپ سن ده، یئتر، سول!
مومکون دئییل هر آلچاغا دونیاده چؤکم دیز.
ای وارلیغیمین شمعی، خموش اول، ابدی سؤن!
جسمیمده‌کی آتش قوی اومیدیم کیمی سؤنسون!
دؤن سن ده، ووجودوم! قارا داش پارچاسینا دؤن!
قوی مسلکیم، آمالیم، عقیده‌م کوله دؤنسون!
یوخ…یوخ! من اؤلرسم ده اگر، مسلکیم اؤلمز،
اود پارلایاجاق داییم اوفوقلرده گونش‌تک.
بیر نورِ حقیقت‌دی کی، کورلار اونو گؤرمز،
حقسیزلیگه هر نؤقطه‌ده غالیب‌دیر او مسلک.
#محمد_بی‌ریا
#شعر_اوجاغی
@SheirOcagi
آرتیق داها قویما یانام اودلاردا سببسیز!
ای طالعیمین غؤنچه‌سی قوپ سن ده، یئتر، سول!
مومکون دئییل هر آلچاغا دونیاده چؤکم دیز.
ای وارلیغیمین شمعی، خموش اول، ابدی سؤن!
جسمیمده‌کی آتش قوی اومیدیم کیمی سؤنسون!
دؤن سن ده، ووجودوم! قارا داش پارچاسینا دؤن!
قوی مسلکیم، آمالیم، عقیده‌م کوله دؤنسون!
یوخ…یوخ! من اؤلرسم ده اگر، مسلکیم اؤلمز،
اود پارلایاجاق داییم اوفوقلرده گونش‌تک.
بیر نورِ حقیقت‌دی کی، کورلار اونو گؤرمز،
حقسیزلیگه هر نؤقطه‌ده غالیب‌دیر او مسلک.
#محمد_بی‌ریا
#شعر_اوجاغی
@SheirOcagi
▫️آزربایجانا
بسله‌نیر قلبیمده سونسوز حؤرمت آزربایجانا،
ایسته‌رم دونیاده من حوریّت آزربایجانا.
سانمایین اؤز یوردومون اسرارینا بیگانه‌یم!
من اونون سودای عشقیندن بوجور دیوانه‌یم.
شمعه بنزر؛ دوره‌سینده فیرلانان پروانه‌یم،
قویمارام اصلا قویولسون منّت آزربایجانا.
شاعیرم، بیر بولبولم من، آشیانه‌مدیر وطن،
سئیرگاهیم‌دیر اوفوقلر، خوابگاهیم‌دیر چمن.
چؤلده بیتمیش لاله‌لر، داغلاردا آچمیش یاسمن،
هر بیری وئرمیش یئنه بیر زینت آزربایجانا.
بیر گؤزل‌دیر سئودیگیم كی، حسنونون حئیرانیام،
من اونا تعریف یازان شاعیرلرین قوربانییام.
بیلمیرم صوفی‌پرستم، عارفم، روحانی‌یام،
قائلم معناده من بیر قیمت آزربایجانا.
من خیانت ائتمه‌دیم مرحوم اولان اجدادیما،
ارث تک وئردیم بو یوردو قهرمان اولادیما.
حفظ ائدیب بو اؤلكه‌نی، باش اَیمه‌سین جلّادیما،
اونلارین آوازی وئرسین شهرت آزربایجانا.
پایدار اولسون گؤروم اودلو آلوولار تورپاغی،
دالغالانسین شانلی بورجوندا عدالت بایراغی!
قصردن خوشدور منه هر داخماسی، هر چارداغی،
بسله‌نیر قلبیمده سونسوز حؤرمت آزربایجانا.
#محمد_بی‌ریا
@SheirOcagi
بسله‌نیر قلبیمده سونسوز حؤرمت آزربایجانا،
ایسته‌رم دونیاده من حوریّت آزربایجانا.
سانمایین اؤز یوردومون اسرارینا بیگانه‌یم!
من اونون سودای عشقیندن بوجور دیوانه‌یم.
شمعه بنزر؛ دوره‌سینده فیرلانان پروانه‌یم،
قویمارام اصلا قویولسون منّت آزربایجانا.
شاعیرم، بیر بولبولم من، آشیانه‌مدیر وطن،
سئیرگاهیم‌دیر اوفوقلر، خوابگاهیم‌دیر چمن.
چؤلده بیتمیش لاله‌لر، داغلاردا آچمیش یاسمن،
هر بیری وئرمیش یئنه بیر زینت آزربایجانا.
بیر گؤزل‌دیر سئودیگیم كی، حسنونون حئیرانیام،
من اونا تعریف یازان شاعیرلرین قوربانییام.
بیلمیرم صوفی‌پرستم، عارفم، روحانی‌یام،
قائلم معناده من بیر قیمت آزربایجانا.
من خیانت ائتمه‌دیم مرحوم اولان اجدادیما،
ارث تک وئردیم بو یوردو قهرمان اولادیما.
حفظ ائدیب بو اؤلكه‌نی، باش اَیمه‌سین جلّادیما،
اونلارین آوازی وئرسین شهرت آزربایجانا.
پایدار اولسون گؤروم اودلو آلوولار تورپاغی،
دالغالانسین شانلی بورجوندا عدالت بایراغی!
قصردن خوشدور منه هر داخماسی، هر چارداغی،
بسله‌نیر قلبیمده سونسوز حؤرمت آزربایجانا.
#محمد_بی‌ریا
@SheirOcagi
▫️آییل ائی کارگر!
آییل، ائی کارگر، بس‌دیر، گؤز آچ بیر خواب غفلتدن!
جهاندا مرحمت اومما بو قانوندان، بو دؤولتدن!
سارالدین گول کیمی، سولدون، ازیلدین، پایمال اولدون،
بوکولدو قامتین غمدن، قوجالدین درد و مؤحنتدن.
همیشه گؤزلرین گریان، سویوقدا آج-سوسوز، عوریان،
داش اولسا دیل‌لنر اینسان، گلر جانه بو ذیلّتدن.
الین بوش، ائوده اؤولادین-عیالین هر شئیه حسرت،
سنی دیندیرسه‌لر دینمه، قیزار شرم و خجالتدن!
سنین سایه‌نده ظالیملر توتوب کاشانه‌ده مسکن،
آلیر اؤز کامینی هر گون ملَک‌منظر بیر آفتدن.
ایچر مئی، مست اولار دائیم، خیاباندا وورار وولتا،
قیزارمیش گؤزلری هردم شیشر افراطِ شهوتدن.
دئییلسن کیمسه‌دن اسکیک، دئمک اولماز بونا دیرلیک،
سنی آزاد ائدر «بیرلیک» بو زنجیرِ اسارتدن.
#محمد_بی‌ریا
@SheirOcsgi
آییل، ائی کارگر، بس‌دیر، گؤز آچ بیر خواب غفلتدن!
جهاندا مرحمت اومما بو قانوندان، بو دؤولتدن!
سارالدین گول کیمی، سولدون، ازیلدین، پایمال اولدون،
بوکولدو قامتین غمدن، قوجالدین درد و مؤحنتدن.
همیشه گؤزلرین گریان، سویوقدا آج-سوسوز، عوریان،
داش اولسا دیل‌لنر اینسان، گلر جانه بو ذیلّتدن.
الین بوش، ائوده اؤولادین-عیالین هر شئیه حسرت،
سنی دیندیرسه‌لر دینمه، قیزار شرم و خجالتدن!
سنین سایه‌نده ظالیملر توتوب کاشانه‌ده مسکن،
آلیر اؤز کامینی هر گون ملَک‌منظر بیر آفتدن.
ایچر مئی، مست اولار دائیم، خیاباندا وورار وولتا،
قیزارمیش گؤزلری هردم شیشر افراطِ شهوتدن.
دئییلسن کیمسه‌دن اسکیک، دئمک اولماز بونا دیرلیک،
سنی آزاد ائدر «بیرلیک» بو زنجیرِ اسارتدن.
#محمد_بی‌ریا
@SheirOcsgi