▫️داریخیرام بو هاوادان
داریخیرام بو سودان
داریخیرام بو تورپاق ییغیمی اولان
یالان دونیادان!!!
سئوگی سیزلیک‌لردن داریخیرام بیر ده-
بیر ده داریخیرام وفاسیزلیق‌لاردان!!!

داریخیرام،
بیر یارپاغین، پوتاغیندان قوپدوغو قَدَر؛
بیر آغاجین،
ترک ائتدییی گؤیرچینی کیمی داریخیرام!!!

داریخیرام،
بیر قیزین-
گلین‌لیکده تَرک ائتدییی آتا ائوی تَکین!
بیر اوشاغین،
آناسیندان آیریلدیغی بویدا داریخیرام!

من،
یاسدا داریخیرام ایل‌دیر،
من ایل‌لردیر، تویدا داریخیرام!

گوندوزلر-
گئجه‌لر-
هفته‌لر- آی‌لار،
اوستومه ییخیلیرلار منیم هر آن سانکی!
بیر هئچلییین ایچینده‌یم-
چوخدان‌دیر اینان کی...

نه گوله بیلیرم،
نه ده آغلاماق گلیر منیم الیمدن!
نه گئده بیلیرم-
نه ده کی،
قالماق ایسته‌ییرم من!

من یالقیزلیغیمین ایچینده یانیرام،
من یالنیزجا مؤعجیزه‌لره اینانیرام!!!
چونکو اینام،
حقیقته چاتماغین تنها یولودور-
چونکو دونیا مؤعجیزه‌لرله دولودور...
بیراز دقّت ائتسن گؤررسن،
یئنی بیر حیات دوغولور هر گون!
یئنی بیر مؤعجیزه-
یئنی بیر اومود-
گئجه‌نین اَن قارانلیق آنیندا
یئنی بیر گون دوغولور،
هر یئنی بیر گون...

📚موحاریبه‌سیز سئوگی

#یاز_باهار
@SheirOcagi

▫️سئل و سارای

آراز منله قان آغلاییر، سارایلاری سئل آپاردی
بوغولدو سس، سو ایچینده، هارایلاری سئل آپاردی

کندین آخشام چاغلاریندان اولدوزلاری کیم قوپاریب
اؤروش اؤلکه قارالتی‌دیر، او آیلاری سئل آپاردی

سانکی پای گلمیشدی کنده، قوناق گلن دان اولدوزلار
کندین الی بوش‌دور ایندی، او پایلاری سئل آپاردی

قاپی الی قوینوندادیر، پنجره‌لر گؤزو یاشلی
اوجالمیر بیر گولوش سسی‌، نانای‌لاری سئل آپاردی

ماتیشکه‌لر سو اوزونده، یاش قوروماز ال گؤزونده
حال قالمادی «شیدا» سنده، هالایلاری سئل آپاردی

#عیسی_پاشاپور (شیدا)
@SheirOcagi

▫️بئشیکدن قبره‌دک عئلم آختاریشیندا اولون!

#محمد_پیغمبر (ص)
#شعر_اوجاغی
@SheirOcagi

دیالوق

▫️- همیشه گووَنمه‌مه‌یی، تام گووَندگیمیز اینسانلار بیزه اؤیره‌دیر.

📺 یاغی
۱۴۰۱ ایران
#محمد_کارت
#شعر_اوجاغی
@SheirOcagi

▫️یادگار اولسون!

طبیعت قوی بو ناله‌مدن داغیلسین، تارومار اولسون،
آلیشسین گؤیلر آهیمدان، جهان بیر شعله‌زار اولسون!

سنه قارشی بو عالمده خیانت اولسا قلبیمده،
وجودوم اود توتوب یانسین، اورک درده دچار اولسون!

یالان سؤز بیلمیرم اصلا، بودور دائم منیم ذکریم:
منه سنسیز ایشیق دونیا، قارانلیق بیر مزار اولسون!

دئییل ممکن حضوروندا اولا شاعیر سرافکنده،
اگر دؤنسم اؤز عهدیمدن، منه خلق ایچره عار اولسون!

سئویملی دلبرین افسوس، الیندن اؤپدوم، آیریلدیم،
اؤزوم گئتدیم؛ سنه مندن بو شعریم یادگار اولسون!

#محمد_بی‌ریا
#شعر_اوجاغی
@SheirOcagi

▫️آنا یاشی

داها گلمه‌یه‌جک آنامین سسی،
منه ده طالعین یومروغو دَیدی.
دوزو، آجیغیما گلیر: بعضیسی،
سوروشور «مرحومون یاشی نئچه‌یدی؟»

بیلمیرم... دوشموشدو ساچلارینا دن.
دولاشیر سؤال‌لا جاواب باشیمدا.
آنا کدَرینی یاش‌می‌دی اؤلچن؟!
آنا ایتیرمیشم آنا یاشیندا.

#ممد_آراز
#شعر_اوجاغی
@SheirOcagi

▫️اینسان آنجاق کدرینین حئسابینی توتور، خوشبختلیگینی‌ ایسه نظره آلمیر. حالبوکی عدالت‌له دوشونسه‌یدی، پایینا هر شئی‌ دوشدویونو گؤرَردی.

📚 یئرآلتیندان قئیدلر
#فئودور_داستایئوسکی
#شعر_اوجاغی
@SheirOcagi

▫️آه، اینسان ایسته‌ییرم من! اینسان گؤرمگ ایسته‌ییرم قارشیمدا. روحومو بسله‌یه‌جک و اونا لذّت وئره‌جک قیدا ایسته‌ییرم.

📚 بیر دلینین خاطیره دفتری
#نیکولای_گوگول
#شعر_اوجاغی
@SheirOcagi

🔹تحکییه ادبی درنه‌یی(418-جی جلسه)
🔹حئکایه: زیقموند کافه‌ده – ویکتور پئلئوین
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه-30 خرداد ماه 1402
🔹ساعت:17-19:30
@tahkie
Butajournal.com
#ادبییات #آذربایجان_تورکجه‌سی #داستان #مودئرن_نثر #تحکییه #اورمو # ویکتور_پئلئوین #روس_نثری #روسیه #حئکایه #

▫️سنین گولوشلرین

قارشیمدا نازلانیب یئنه گولورسن،
بیلسن گولوشلرین نه‌یه بنزه‌ییر؟
من دئسم آرتیق‌دیر، اؤزون بیلیرسن،
لاله یارپاغیندا شئهه بنزه‌ییر.

سنین گولوشلرین بیر روزگار کیمی،
اسَرکن، آرزومون گولو آچیلیر.
گولسه دوداقلارین اولدوزلار کیمی،
روحوما بیر سرین ایشیق ساچیلیر.

سؤیله، گؤزل‌لرین دوداقلاریندان،
بو اویناق گولوشلر اومولموش‌مودور؟
سنین هر قهقهه‌ن آی کناریندان،
کئچن بولودمودور، اوچان قوش‌مودور؟

سنین گولوشلرین یاز سحریندن،
فیکریمه، حیسّیمه سانکی رنگ آلیر.
گول کی! شعیرلریم گولوشلریندن،
قیریلماق بیلمه‌ین بیر آهنگ آلیر.

سن گولدویون زامان بو شاد گونومده،
آچیلیر قارشیمدا، جانلانیر باهار.
بعضاً باش‌اوجومدا، بعضاً اؤنومده،
شیمشک‌لریم چاخار، سولاریم آخار.

جاهان کی، سولمایان بیر باغچا-باغ‌دیر،
بوردا روامی‌دیر گولمه‌دن اؤلمک؟!
یازیق او شخصه کی قاراقاباق‌دیر.
نه قدر یاراشیر اینسانا گولمک!

#میکاییل_مشفق
#شعر_اوجاغی
@SheirOcagi

▫️ساقین! هیچ واخت عشقی سئکس کیمی دوشونمه! یوخسا یانیلماغا اوغرایاجاقسان.
بیرینین ساده‌جه وارلیغینین، باشقا شئی یوخ، صیرف وارلیغینین، سنه خوشبختلیک حیسّی وئرمه‌یه یئترلی اولدوغونو آنلادیغین زامان، سنده بیر شئی چیچک‌لنمه‌یه باشلاییر. او زامان گئرچک عشقین ایچینده‌سن.
آنلا بونو! عشق شهوت دئییل. کئچیجی دویغولار دئییل، یئیه‌لیک حیسّی دئییل.
عشق، بیر درین آنلاییش‌دیر، شخص بیر شکیلده سنی بوتون‌لشدیریر...

#اوشو
#شعر_اوجاغی
@SheieOcagi

▫️هانسی داخمادا گیزله‌دیم روحومو؟
سنین یوخلوغونو گؤرمه‌ییم دئیه؟

#خورخه_لوییس_بورخس
#شعر_اوجاغی
@SheirOcagi

‍ ▫️وطن خائینی

«ناظیم حیکمت وطن خائین‌لیگینه داوام ائدیر هله ده.
-آمئریکان امپریالیزمینین یاری سؤمورگه‌سی‌ییک- دئدی حیکمت.
ناظیم حیکمت وطن خائین‌لیگینه داوام ائدیر هله ده».

بیر آنکارا قزئته‌سینده چیخدی بونلار،
اوچ سوتون اوستونه، قاپ‌قارا هایقیران فونت‌لارلا.
بیر آنکارا قزئته‌سینده،
آدمیرال «ویلیامسون»ون فوتوقرافی یانیندا،
آلتمیش آلتی سانتیمتر مورَبّعده گولور، آغزی قولاقلاریندا،
آمئریکان آدمیرالی.

«آمئریکا، بودجه‌میزه یوز ایگیرمی میلیون لیرا باغیش ائتدی،
یوز ایگیرمی میلیون لیرا.
-آمئریکان امپریالیزمینین یاری سؤمورگه‌سی‌ییک- دئدی حیکمت
ناظیم حیکمت وطن خائین‌لیگینه داوام ائدیر هله ده».

هه، وطن خائینی‌یم،
سیز وطن‌پرورسینیز،
سیز یوردسئورسینیز،
من یورد خائینی‌یم،
من وطن خائینی‌یم،
وطن تارلالارینیزسا،
صاندیقلارینیزین و چئک دفترلرینیزین ایچینده‌کیلرسه وطن،
وطن، شوسه یوللاری بویوندا آجلیقدان گبَرمک‌سه،
وطن، سویوقدا ایت کیمی تیتره‌مک و مالاریا'دان قیورانماق‌سا،
یازین!:
فابریکالارینیزدا آل قانیمیزی ایچمک‌سه وطن،
وطن آغالارینیزین دیرناقلاری‌یسا،
وطن، میزراق‌لی علم‌ِحال‌سا،*
وطن، پولیس باتومویسا،
آیلیق‌لارینیزسا،
اؤده‌نک‌لرینیزسه وطن،
وطن، آمئریکان پایگاه‌لاری،
آمئریکان بومباسی،
آمئریکان دنیز قووّه‌لرین توپویسا،
وطن، قوخوموش قارانلیغینیزدان قورتولماماق‌سا،
من وطن خائینی‌یم.
یازین اوچ سوتون اوستونه،
قاپ‌قارا هایقیران فونت‌لارلا!:
ناظیم حیکمت وطن خائین‌لیگینه داوام ائدیر هله ده.

#ناظیم_حیکمت
* داورانیش بیلگیسی، اسلام دینینین قورال‌لارینی اؤیرتمک اوچون یازیلمیش کیتاب‌لار
#شعر_اوجاغی
@SheirOcagi

▫️سن، داییما یارالاریمین ایچینده قیوریلان بیر بیچاقسان.

#فرانتس_کافکا
#شعر_اوجاغی
@SheirOcagi

‍ ▫️ایکی سئوگی

گؤزل قیز! سن صاف سوسان،
ایکی قلب آرزوسوسان.
من‌سه، سنی سئویرم،
سوسوزلوغون اود ووروب-
کؤز کیمی یاندیردیغی-
دوداق سو سئون کیمی.
او ایسه سنی سئویر،
راحاتجا بارداش قوروب-
«کاباب اوستدن سرین سو
پیس اولماز» دئیَن کیمی.

گؤزل قیز! سن ایشیقسان،
یوردوما یاراشیقسان.
من‌سه سنی سئویرم-
ایینه‌نین اوجو بویدا-
ایشیغا حسرت قالان-
گؤز، ایشیق سئوَن کیمی.
او ایسه سنی سئویر،
بیر شن ماغاردا، تویدا،
ایشیقلاردان یارانمیش-
یاراشیق سئون کیمی.

دانیش! اوجالسین سسین،
قیسیلماسین نفسین.
من کی سنی سئویرم،
«باکی»دان، «داش‌کسن»دن-
گلن بیر صدا کیمی،
سس کیمی، قودرت کیمی.
او ایسه سنی سئویر،
گیزلی دئییل کی سندن،
بیر اوتاق کونجونده‌کی-
غملی سوکونت کیمی.

بو من، بو او، بو دا سن،
دی گؤرک، نه دئییرسن؟!
آمّا یاخشی فیکیر وئر-
بو ایکی محبّته!
داها هئچ نه دئمیرم،
نؤقطه، نؤقطه و نؤقطه.

#علی_کریم
#شعر_اوجاغی
@SheirOcagi

▫️بیر میلّتین بؤیوکلوگو اهالیسینین چوخلوغو ایله دئییل، عاغیل و اردم صاحیبی اینسانلارینین سایی‌یلا بللی اولور.

#ویکتور_هوگو
#شعر_اوجاغی
@SheirOcagi

▫️موغان یئنه باتیب یاسا...

شعر: #کامیل_قهرمان_اوغلو
سَس: #پاشا
@SheirOcagi

▫️من کیمم؟!

آلنیمدا عؤمرون یازیسی،
یازانی وارسا، من کیمم؟
طالعیمین قیشی، یازی،
خزانی وارسا، من کیمم؟

اولو گؤیلر همین-همین،
بورج آلتیندا من بیر زمین.
تره‌زیدن تره‌زیمین،
آسانی وارسا، من کیمم؟

بیر آغ دوه‌نین بئلینده،
بیر دلی صحرا یئلینده،
بختیمین تانری الینده،
اووساری وارسا، من کیمم؟

نه بیلَندَر*، نه حالی‌یام،
اولوم، اؤلوم سؤالی‌یام.
آچیلمیش اولدوز فالی‌یام،
یوزانی وارسا، من کیمم؟

#موسی_یعقوب
* بیلیجی، چوخ بیلن
#شعر_اوجاغی
@SheirOcagi

دیالوق

▫️- منه یالان دئدیگین اوچون اوزولمورم؛ بوندان بئله سؤزلرینه اینانا بیلمه‌یه‌جه‌ییم اوچون اوزولورم.
📺 Liar
2017-2020 انگلستان
#شعر_اوجاغی
@SheirOcagi