▫️قورخورام یامان!

سن اؤزون اؤزونه قاپیلان زامان،
فیکیرلی اولاندا، دویغولاناندا،
سئودالی واختیندان قورخورام یامان!
قورخورام تاپیشیب ملک‌لر ایله،
تامام باشقا-باشقا دیلک‌لر ایله،
گئده‌سن، گئده‌سن، قاییتمایاسان.
بیردن اؤز عشقینه اسیر اولاسان،
پونهان ساخلادیغین او سیرّ اولاسان،
سرحددن چیخاسان، سددن چیخاسان،
درد کیمی گؤرونمز حدّن چیخاسان،
قیزیل ایلان کیمی خطدن چیخاسان،
بیر دلی سئودانین دالینجا دوشوب
چیخاسان، گئده‌سن، تاپیلمایاسان.

کیمدی‌سه، هارداسا سنی سسله‌یه،
او سسی یاخیندان ائشیتمک اوچون
بیر باشقا یووانی ایسیتمک اوچون
دورنا اؤز صفینه قوشولان کیمی،
ائلین شاناپیپیک* رَوایتینده
ساچی داراقلی قیز قوش اولان کیمی،
باشقا بوداقلارا، باشقا گؤللره،
قوش اولوب اوچاسان، قاییتمایاسان.
باشقا سئوگیلره چییین‌داش اولوب
قوشولوب قاچاسان قاییتمایاسان.
سئودالی گونوندن، عشقلی گونوندن،
دویغولو واختیندان قورخورام یامان!

بیلمم گؤی آدامی، یئر آدامی‌دی،
یاپیشا الیندن او سئودا یازان،
گئده‌سن، چیخاسان باشقا دونیایا،
گئده‌سن، گئده‌سن، قاییتمایاسان.
نه بیلیم بلکه ده، بولودلار ایله،
او غوروب هؤروکلو زر آتلار ایله،
بیردن آتلاناسان، قانادلاناسان.
بوتون سرحد بویو، بوتون حد بویو،
ووروب ییخیب بیر یول تاپیب گئده‌سن.
بوتون دونیا بویو، محبّت بویو،
او عوصیان آتینی چاپیب گئده‌سن،
گئده‌سن، گئده‌سن، قاییتمایاسان.
عوصیانلی گونوندن، دولو گونوندن،
سئودالی گونوندن قورخورام یامان!

#موسی_یعقوب
* اَیری دیمدیگی، داراغا بنزر ککیلی، آلا-بزک للـه‌یی اولان قوش
#شعر_اوجاغی
@SheirOcagi

▫️کؤنلونون کؤنلومدن یوخدور خبری،
منده بیر من واردیر مندن ایچَری.
اونون پاییزیندان خبرین اولماز،
سنین محبّتین قوش‌دو کؤچَری.

یووا دَییشنده کؤچری قوش‌لار،
یادیما دوشورسن کؤچری کیمی؛
بیر یایلاق یئرینده قارالیب قالان،
کؤچری اوبانین کؤچ یئری کیمی.

ایندی او آغاجین بوداغی بوش‌دو،
سنین محبّتین کؤچری قوش‌دو-
اؤیره‌شیب همیشه سئیر و صفایا،
دَییشن یووایا، ایستی هاوایا،
پاییزدان، شاختادان یوخدو خبری،
سنین محبّتین قوش‌دو کؤچری.

یقین دۇیار منی، بیلر سئوگیمی،
دویغولو اورک‌لر، سئودالی باش‌لار.
یاشار بو دونیادا بیر غریب کیمی،
اؤتَرگی سئوگیلر، کؤچری قوش‌لار.

#موسی_یعقوب
#شعر_اوجاغی
@SheirOcagi

▫️قیزیل گول

بیر رنگ ایله گؤر نئچه رنگ چکمیسن،
قارا تورپاق، احسن سنین فیرچانا!
دیریلتمه‌یه قیزیل توخوم اکمیسن،
گول دونوندا قیزیل گلیبدیر جانا.

قیزیل‌توزو فیشقیراجاق قانیندا،
اود لچَکده آلیش گؤروم، اوره‌ییم!
واللاه، بئله قیزیل غؤنچه یانیندا،
قیزیل کۆلچه* دئییل منیم گره‌ییم.

اووجومدادیر بو‌ چهرایی آلوولار،
بو اولماسا وورار منی قیروولار.
تر لچک‌لر کؤنول آلار، روح اوولار.
آللاه، منی بو مقامدان آییرما،
بیللور دولو قیزیل جامدان آییرما!

خوشدور منه گؤی ایلیمدن، یئر ایلیم.
اؤلدور منی، بو لچکده دیریلیم!
قوربان اولسون بو آنیما بیر ایلیم!
قوی منی ده لچک‌لنیم، آل‌لانیم،
گول عؤمرویله بو دونیایا آلدانیم!

گؤزل‌لیگی، ظریف‌لیگی قوی گؤروم،
باخ گؤزلریم، دۇی اوره‌ییم، دۇی گؤروم!
قیزیل بوتا، یاشیل دونو سۏی گؤروم!
آلت کؤینه‌یین آلوو دیللی بیر اوجاق،
بو آلوودا گوموش شئهین یاناجاق.

#موسی_یعقوب
* شمش
#شعر_اوجاغی
@SheirOcagi

▫️قیرمیزی ایشیقدان کئچه بیلمه‌دیم.

او ماوی آخشامدا، ماوی سالوندا،
سن ایدین، سن اوندا قیرمیزی دوندا،
قیزیل ایلاهه‌یدین عؤمروم یولوندا.
قارشیندا هیجان ایچینده‌ قالدیم،
قیرمیزی ایشیقدان کئچه بیلمه‌دیم،
سنین اووسونون‌لا کئچیدده قالدیم.

یاشیلدان کئچن‌لر چیخیب گئتدیلر،
یاشیل لیباس‌لارا، یاشیل دونلارا،
گئتدیلر چیخدیلار یاشیل یوللارا،
یاشیل چمنلرده کاما یئتدیلر.
چوخونون سئوگیسی، عشقی سفرده،
من قالدیم، بیر اؤلچو-بیچیده قالدیم.
توراغای اوخودو گؤی زمیلرده،
من ائله لاله‌لر ایچینده قالدیم.
قیرمیزی ایشیقدان کئچه بیلمه‌دیم.
قالدیم آل پیاله سرخوشلوغوندا،
باشقا باده‌لری ایچه بیلمه‌دیم.

بیلمه‌دیم بیر یاشیل یول گل-گئدینی،
دونیادی عؤمرومده او قیزیل آخشام.
سنینچون کؤنلومون فوتو-لئنتینی،
قیرمیزی ایشیقدا آشکارلامیشام.

دان کیمی عؤمرومه دوغولدوغون گون،
من ده اوفوق‌لندیم سنین دانیندا.
قیرمیزی ایشیقدان کئچه بیلمه‌دیم،
قالدیم کئشیگینده، قالدیم یانیندا.
یانیمدان کئچنلر چیخیب گئتدیلر،
یاشیل اومیدلره، یاشیل گونلره،
یاشیل سئودالاردا کاما یئتدیلر.
من ائله بو اؤلچو-بیچیده قالدیم،
قیرمیزی ایشیقدان کئچه بیلمه‌دیم.
گؤر نئجه صبرلی عؤمور یولجونام،
همیشه سیناقدا، کئچیدده قالدیم!
سن ایدین، سن اوندا، قیرمیزی دوندا
قیزیل ایلاهه‌سن عؤمروم یولوندا،
قیرمیزی ایشیقدان کئچه بیلمه‌دیم.

#موسی_یعقوب
#شعر_اوجاغی
@SheirOcagi

▫️داها کوله دؤنموش سویوق اوجاقدی.
ایندی کی ایستیسی اولمایاجاقدی،
ایندی کی بهره‌سی اولمایاجاقدی،
نه‌ییمه گرَکمیش بو سئوگی منیم؟
نه‌ییمه گرکمیش او اضطرابلار،
او دلی حسرتلر، آغیر عذابلار؟
نه‌ییمه گرکمیش او یوخوش، ائنیش؟
من نئچون بو یولو کئچمه‌لی‌یم‌میش،
اؤزومو بو یولدا یورماقدان اؤترو،
اینسانی دیشیمه وورماقدان اؤترو،
سیناماقدان اؤترو، سیناقدان اؤترو؟
بلکه دؤنوکلویون بۏز صیفتینی،
بلکه بیر اومیدین اوزولمه‌یینی،
بلکه بیر اینامین ییخیلماغینی،
گؤرمکدن اؤترومو یاشادیم بئله؟
اؤیرنمکدن اؤترو، بیلمکدن اؤترو،
وفاسیز یوکونو داشیدیم بئله؟
حئییف، بیر اویونا عؤمور صرفیمه!
یولون بو باشیندا اضطرابلاریم،
یولون او باشیندا گولدوم سهویمه.

هه، بو دا دونیانین سئوگی طرفی،
فایداسیز طرفی، ایتگی طرفی،
یعنی کی آلدانمیش عؤمور طرفی.
رنده‌یه گلمه‌یه، یونقار اولماغا،
طالعین قوروموش آغاج طرفی،
بختین کول طرفی، کؤمور طرفی.
سینانماقدان اؤترو، سینماقدان اؤترو،
ائله اؤز اودومدا یانماقدان اؤترو؟
نه‌ییمه لازیم‌میش او اضطرابلار،
او دلی حسرت‌لر، آغیر عذابلار؟!

#موسی_یعقوب
#شعر_اوجاغی
@SheirOcagi

▫️سنین یانیندا

سنین الین سو پایلایان؛ من یاددان چیخان،
شوشه‌بندده* دیبچک کیمی یاغیشا باخان،
یانغیلانیب اؤز-اؤزونو یاندیریب-یاخان.
سندن اؤترو داریخیرام سنین یانیندا.

نغمه‌سیندن یورغون دوشن بیر نفس کیمی،
گول آغاجیندان آسیلی بیر قفس کیمی،
هارا باخیر سنی گؤرور گؤزوم، ترس کیمی.
سندن اؤترو داریخیرام سنین یانیندا.

سنه باخیب گۆزگۆلنیر رقیبیم هر دم،
منیم اورک سیزیلتیمی دۇیمورسان بیَم؟
من ده ائله او گوزگونون تاختا اوزویم،
سندن اؤترو داریخیرام سنین یانیندا.

بیر دیوارین ایکی اوزو- چؤل اوزو حاصار،
چؤل طرفدن سارماشیغیم‌ چپردن باخار.
آمان آللاه، اوزاق دوروب، یاخین داریخار!
سندن اؤترو داریخیرام سنین یانیندا.

آرامیزدان او سویوق چای آخانا کیمی،
سارماشیغیم او چپردن باخانا کیمی،
سارالیرام بارماغیندا بیر خینا کیمی،
سندن اؤترو داریخیرام سنین یانیندا.

#موسی_یعقوب
* شوشه‌لی بالکون
#شعر_اوجاغی
@SheirOcagi

▫️بو پنجره سنین عئینکین دئییل،
نیمداش پرده‌لری کؤینگین دئییل.
بسدی بو چئشمکی* گؤزونه تاخدین،
بسدی بو آغ دونلا یوللارا باخدین!

عزیزیم، بویلانما بو پنجره‌دن!
قیسمت ده بیر اوودو، کئچدی بره‌دن.
او واخت آچیق ایدی قاپی، پنجره،
اوچدو دا قیسمتین دالینجا هره:
بیری طالعینه باغلاندی قالدی،
بیری شوشه کیمی اؤلچویه دوشوب
پنجره گؤزونه میخلاندی قالدی،
قاناد یورغون کیمی، کؤنول بوش کیمی.
او گونه قاییتماق دئییلمیش آسان،
پنجره‌سی باغلی قارانقوش کیمی.

ایندی نه بکلرسن، نه چیرپینارسان؟
ایندی عؤمور یاری، ایندی گون یاری،
داها بو قانادلار اوچورماز سنی،
داها آچماق اولماز او‌ قاپیلاری،
داها کئچمک اولماز بو پنجره‌نی.
او دویغولار سنی آییلدیب گلمز،
بو یولدان او جیغیر قاییدیب گلمز.
چتین‌ کی، تورپاقدان چیخا ناگاهان،
چتین کی، او قسمت گؤیلردن ائنه.
ماوی بیر بوشقابدا ساریشین اوغلان،
واللاه ائنمه‌یه‌جک بو پنجره‌نه!

دی بوغ حیسلرینی، چاغریشلارینی،
دی ییغ بو یوللاردان باخیشلارینی!
فیکرینده دولانا-دولانا قاییت،
سنینچون حقیقت اولانا قاییت!
او دئدیگین گونلر قاییتماز گئری،
آ دیبچک بوداغیم، چکیل ایچری!

دی ییغ پنجره‌دن قانادلارینی،
گولدور ایسته‌دیگین، ایسته‌مه‌دیگین،
سنین اولان‌لارین حیاتلارینی!
قوورولا-قوورولا، لاپ یانا-یانا،
گولدور ایسته‌دیگین، ایسته‌مه‌دیگین،
او اللری گولدور، گؤزلری گولدور،
اوزونه اوز توتان اوزلری گولدور!
خوش بیلیب گؤزاوجو سال نظرینی،
هردن ده قاییدیب بیزلری گولدور!

آ کؤنول دوستاغیم، چکیل ایچری،
آ دیبچک بوداغیم، چکیل ایچری!
گل، داها بویلانما بو پنجره‌دن!
او عشق بیر شیمشک‌دیر، کئچیر هره‌دن،
او واخت بیر اوو ایدی، کئچدی بره‌دن.

#موسی_یعقوب
* گؤزلوک- عینک
#شعر_اوجاغی
@SheirOcagi

▫️دردیمی، عذابیمی،
یانغیمی سویوتماغا،
عشقیندن اینجیک دوشن
کؤنلومو اویوتماغا،
بیر مقام ایسته‌ییرم.
او سئوگی ساواشیم‌لا
باش قویدوغوم سینه‌نی،
یاندیریم گؤز یاشیم‌لا
یاغا سو دامار کیمی.
منه طرف باخمایان
گؤزلرینین آجیغینا.

دونیانین ان مئهریبان،
ان شیرین سؤزلرینی،
تک سنه پیچیلداییم.
بیرجه دفعه خوش بیلیب
سندن ائشیتمه‌دیگیم،
سؤزلرینین آجیغینا.

بیر قوروجا بوداغی
گؤیَردن سارماشیق تک
سنه ساریلیم قالیم،
داها منیم اولمایان
دیزلرینین آجیغینا.

سما آتشی کیمی،
غوروب گونشی کیمی،
ساچیلیب دا ساچینا،
دؤنوب قیزیل تاجینا،
سیخیم‌ بولود تئلینی
ایندی الیم یئریمه‌ین
تئل‌لرینین آجیغینا.

گؤیرچین اللرینی
ائله سیخیم کؤکسومه
باغریمین آلوووندان
گول آچسین بارماقلاریم،
الیمه ال وئرمه‌ین
اللرینین آجیغینا!

یول آلیب یولا چیخیم،
منه ساری گلمه‌ین
یوللارینین آجیغینا!

آللاهدان اولموش کیمی،
بیر قیرغی جایناغیندان
قوپان قارانقوش کیمی
منی پناهگاه بیلیب
آتیلاسان قوینوما
یوکون دوشه بوینوما،
من ده
بیر یوخو حئسابیندا،
او آرا صاحیبینین
ائتدیگی ثوابیندا،
دونیانین ان بختوَر
مقامیندا یاشاییم،
همین او دقیقه‌نین
داوامیندا یاشاییم،
یوللاریندا چکدیگیم
همین او حسرتلرین،
انتظارین آجیغینا.

سن منه گؤستردیگین
دؤنوکلویون عوضی،
من سنه ساخلادیغیم
اعتبارین آجیغینا.

#موسی_یعقوب
#شعر_اوجاغی
@SheirOcagi

‍ ▫️هاردا قالیر گؤره‌سن؟

سون منزیلین سون پاییزی، سون قاطار،
سیم قیریلدی، میضراب دوشدو، سوسدو تار.
من ده دئییم، کؤنلوم نییه سیزیلدار.
غریب دورنام قاناد چالیر گؤره‌سن؟
منیم سئوگیم هاردا قالیر گؤره‌سن؟

اوت ایچینده گول یارپاغی آغ‌آپپاق،
سولوب گئدیب آل دوداغی آغ‌آپپاق،
تزه توتوب کۆل اوجاغی آغ‌آپپاق.
اوجاق سؤنور، قاش قارالیر گؤره‌سن؟
منیم سئوگیم هاردا قالیر گؤره‌سن؟

او یایلاغین بولاق‌لاری ایچیلمز،
او سئوگینین کؤرپولری کئچیلمز،
بئله گونده واغام* زمی بیچیلمز.
نه چوخالیر، نه آزالیر گؤره‌سن؟
منیم سئوگیم هاردا قالیر گؤره‌سن؟

سون گئجه‌ده پاریلتیسی قالیرمی،
گون‌باتاندا سارالتیسی قالیرمی،
اوزاق یولدا قارالتیسی قالیرمی؟
هاردا ایسه یول دارالیب گؤره‌سن؟
منیم سئوگیم هاردا قالیب گؤره‌سن؟

واللاه، داها داغ آشماغی باجارماز!
یاراشیغا یاراشماغی باجارماز،
کوسوشمه‌یی، باریشماغی باجارماز.
ایندی نه‌یه مئهر سالیر گؤره‌سن؟
منیم سئوگیم هاردا قالیر گؤره‌سن؟

ائله من ده اریمیشم، ایتمیشم.
سونرا گلیب بو‌ تالادا بیتمیشم.
اولو تانریم، مورادیما یئتمیشم!
نه گؤیریر، نه سارالیر گؤره‌سن؟
منیم سئوگیم هاردا قالیر گؤره‌سن؟

چؤپ-چؤپ توتوب یان-یؤره‌نی هؤروبسه،
خزل گلیب اؤرتویونو سریبسه،
او سویوموش یووا هاردا غریب‌سه،
هوشا گئدیر، فیکره دالیر گؤره‌سن؟
منیم سئوگیم هاردا قالیر گؤره‌سن؟

بلکه تاپیب سیز ده بیر سؤز دئیه‌سیز،
آیاغینا ایستی جوراب گئیه‌سیز،
آمان آللاه، هاردا آغلار یییه‌سیز؟!
سوراغیمی کیمدن آلیر گؤره‌سن،
منیم سئوگیم هاردا قالیر گؤره‌سن؟

#موسی_یعقوب
* حدّیندن آرتیق یئتیشمیش- واختی کئچمیش
#شعر_اوجاغی
@SheirOcagi

▫️سنه و منه

قالمادی بیر اومید، بیر گومان یئری،
گؤینه‌دی سینه‌مین او هیجران یئری.
دونیانین ان غریب، داریخقان یئری،
سنین اولمادیغین مکان‌دیر منه.

ایتدی او جیغیریم گلیب-گئدیمسیز،
بو دونیا کئچینمز اؤلوم-ایتیمسیز.
آللاه، بو کائینات محبّتیمسیز،
نئجه ده داریسقال جهان‌دیر منه!

بیلمه‌دیک قدرینی، اؤتوردوک یاشی،
آللاه وئردیگینه بیز اولدوق ناشی.
من عوصیان ائتمه‌رم تانریما قارشی،
بو ظولوم، تانریدان عوصیان‌دیر منه.

سئیرَلدی گؤیلرین او دورنا صفی،
بولاندی احوالی، پوزولدو کئفی.
آلدادیب آپاران بو دونیا ائوی،
غوروبو ناخیشلی دومان‌دیر منه.

زامانین فیرلانان چارخینا باخدیم،
کئچَنی گتیریب یاخینا باخدیم.
طالعده قیسمتیم، عؤمورده واختیم،
گردشِ دؤوراندان عیان‌دیر منه.

بو یئرین تکی‌دیر، او گؤیون تاغی،
آلماز یالواریشی، وئرمز سوراغی.
گؤزه‌گؤرونمزده غئیبین دوداغی،
بیر سیرّ پیچیلداییر هاچان‌دیر منه.

#موسی_یعقوب
#شعر_اوجاغی
@SheirOcagi