▫️خیالیم اؤلکه‌مین آبادلیغیندا،
کؤنلوم ائل تویوندا، ائل شادلیغیندا.
امه‌یین، تحصیلین، استراحتین،
اؤزگه بیر نشه وار آزادلیغیندا...

#میکاییل_مشفق
#شعر_اوجاغی
@SheirOcagi

▫️ایش بیزه چوخ شئیلر قاندیراجاقدیر،
اؤلکه‌میز جنّتی آندیراجاقدیر.
ائللر یوکسلیشین آل چیراغینی،
ائی کور! (Kür)، ساحیلینده یاندیراجاقدیر...

#میکاییل_مشفق
#شعر_اوجاغی
@SheirOcagi

▫️گؤی، بیر محبّته آچیق قوجاق‌دیر،
ساناسان اولدوزلار کؤرپه اوشاقدیر.
بیزیم گنج آنالار اؤز قوجاغیندا،
چوخ بؤیله اولدوزلار پارلاداجاقدیر...

#میکاییل_مشفق
#شعر_اوجاغی
@SheirOcagi

▫️ال چک بیر دفعه ده اؤز آجیغیندان،
اوز چئویر گؤردوگون موردار ییغیندان!
بیر آز دا دانیشساق، هئچ یامان اولماز،
بیزیم دؤوروموزون یاخشیلیغیندان...

#میکاییل_مشفق
#شعر_اوجاغی
@SheirOcagi

▫️قوخوسوز لاله‌دیر معناسیز شئعیر،
قانادسیز بیر قوش‌دور خولیاسیز شئعیر.
گؤزل‌سیز، چالغی‌سیز مجلیسه بنزر،
مضمون‌سوز، آهنگ‌سیز، اداسیز شئعیر.

#میکاییل_مشفق
#شعر_اوجاغی
@SheirOcagi

▫️دونن بیر شاعیرین کئچدیم یانیندان،
ایلده بیر سؤز چیخماز خسیس جانیندان.
عشقی، احتراصی اولمایان، یئتر-
چیخسین بیر دفعه‌لیک سؤز مئیدانیندان...

#میکاییل_مشفق
#شعر_اوجاغی
@SheirOcagi

▫️شاعیره ایلهامدان مایا گرک‌دیر،
آناسیز اوشاغا دایا گرک‌دیر.
«شاعیرم» سؤیله‌ییر یئریندن‌دوران،
آدامین اوزونده حایا گرکدیر.

#میکاییل_مشفق
#شعر_اوجاغی
@SheirOcagi

▫️ایستر بسته‌کار اول، ایستر نقّاش اول،
شاعیر اول، رسّام اول، هئیکل‌تراش اول،
یاراتدیغین شئیی سئوه‌رک یارات!
هامیدان یوکسک اول، هامیدان باش اول!

#میکاییل_مشفق
#شعر_اوجاغی
@SheirOcagi

▫️سنسیز، نه ذؤوقو وار باغین-باهارین،
آچان چیچکلرین، اوچان قوشلارین؟
سنسیز جنّت اولسا کائینات یارین،
هئچ منیم روحومو اوخشارمی؟ سؤیله!

#میکاییل_مشفق
#شعر_اوجاغی
@SheirOcagi

▫️سنین گؤزلرین

نه گؤزل سوزولور قارا گؤزلرین!
گؤره‌سن اونلاری دوزمک واختی‌می؟
دوروشون معنالی، باخیشین درین،
من بو درینلیکده تاپدیم باختیمی.

سنین گؤزلرین‌می گنجلیک باغیندا،
یوخسا نرگیزلرین سایریشیب اوینار؟
یوخسا چیخیلمایان عشقین داغیندا،
عؤمرومون دیریلیک چئشمه‌سی قاینار؟

او قارا گؤزلرین دئییل پارلایان،
اولدوزلار ایچینده گئجه‌لریم‌دیر.
بلکه ده روحوما آیدینلیق یایان،
بیر سرین، ضیالی، یاز سحریم‌دیر.

قوی دئسین دونیانین ائل آشیقلاری،
بو شؤوقو کیم منیم روحوما یایدی.
دوناردیم، گؤزونون شن ایشیقلاری،
قلبیمین جامیندا قیریلماسایدی.

قارا قیش اوستومه تؤکر قارینی،
نرگیز گؤزلریندن منی آییرسان.
منیم اومیدیمین قاپیلارینی،
نئچون گاه آچیرسان، گاه قاپاییرسان؟

#میکاییل_مشفق
#شعر_اوجاغی
@SheirOcagi

▫️سنین گولوشلرین

قارشیمدا نازلانیب یئنه گولورسن،
بیلسن گولوشلرین نه‌یه بنزه‌ییر؟
من دئسم آرتیق‌دیر، اؤزون بیلیرسن،
لاله یارپاغیندا شئهه بنزه‌ییر.

سنین گولوشلرین بیر روزگار کیمی،
اسَرکن، آرزومون گولو آچیلیر.
گولسه دوداقلارین اولدوزلار کیمی،
روحوما بیر سرین ایشیق ساچیلیر.

سؤیله، گؤزل‌لرین دوداقلاریندان،
بو اویناق گولوشلر اومولموش‌مودور؟
سنین هر قهقهه‌ن آی کناریندان،
کئچن بولودمودور، اوچان قوش‌مودور؟

سنین گولوشلرین یاز سحریندن،
فیکریمه، حیسّیمه سانکی رنگ آلیر.
گول کی! شعیرلریم گولوشلریندن،
قیریلماق بیلمه‌ین بیر آهنگ آلیر.

سن گولدویون زامان بو شاد گونومده،
آچیلیر قارشیمدا، جانلانیر باهار.
بعضاً باش‌اوجومدا، بعضاً اؤنومده،
شیمشک‌لریم چاخار، سولاریم آخار.

جاهان کی، سولمایان بیر باغچا-باغ‌دیر،
بوردا روامی‌دیر گولمه‌دن اؤلمک؟!
یازیق او شخصه کی قاراقاباق‌دیر.
نه قدر یاراشیر اینسانا گولمک!

#میکاییل_مشفق
#شعر_اوجاغی
@SheirOcagi