شعری که مرحوم حکیم هیدجی رحمه الله علیه درهنگام وارد شدن به ارض اقدس مشهدِ مقدّس به ترکی سروده اند :


❇️ارضِ اقدسه وارد اولاندا عرض اولدی

یاحضرتِ علیّ رضا ،شاهِ عرش جاه
شاه وگدایه بارگه‌ندور پناهگاه

مولا هرایِمَه[ هارایما] یئتیشن یوخ ،گتیرمیشم
بو روزگار حادثه سندن، سنه پناه

گر بو چمنده چاتمادی گول شاخینه اَلیم
گلدیم سنین گولون اتگینده اولوم گیاه

اول کیمسه دوستدور سنه ،من دوستم ،هراول
دشمندی دشمنم اونا الله‌دور گواه

عالمده من که ایستمه‌دیم عارونام وننگ
دنیاده من که ایستمه‌دیم مال وجار و جاه

سئودیم سنی خدا بیلور اول چاغ که آنلادیم
سن حجّت اله سن و شرطِ لا اله

ای داد بوردا اولمویا گر دردیمه دوا
ای وای سندن اولمویا گر حالیما رفاه

خوار ائیلماق قوناغی، دگیل رسمِ روزگار
ردّ ائیلماق گدانی دگیل شانِ پادشاه

بوآستانه قویموشام اوز ،یوز امیدیلن
اوزمه امیدیمی، ائیلمه سعیمی تباه

اوچ مطلبه گوره، قاپوا گلدیم ،ایستین
قیلسون قبول هراوچِونی حضرتِ اله

اوّل منی باغیشلیا گر ائتمیشام خطا
گِئچسون منم گناهیمی، گر قیلمیشام گناه

ایکّنجی‌سی نصیب ائده بیرده گنه گئدیم
جدّین حسین زیارتنه، روحُنا فداه

امّا اوچونجی‌سی اولور اوچ اَمردن بیری
الله اوزی بیلور اونا زاد اولماز اشتباه

اولما رضا گنه قایِیدوب هیدجه گیده [گئده]
قلبنده غم، دلینده گیله، سینه‌سنده آه


دیوان حکیم هیدجی ،صفحه ۳۰۸

#رضوی
#حکیم_هیدجی

❤️ بیز له یول بیر اولون،

اؤز کانالیزا قوشولون ❤️ 👇


#زنگان_پلاس


madihehvamarsiah
https://t.me/zanganplus