#Update

" ለኮንሶና አካባቢው የመብራት ችግር አርባምንጭ ላይ ተጨማሪ የመብራት ማስተላለፊያ ሰብስቴሽን ይገነባል " - የደቡብ ኢትዮጵያ ክልል ርእሰመስተዳድር አቶ ጥላሁን ከበደ

" ለኮንሶ ዞን የራሱ የሆነ ሀይል ማሰራጫ ነው የሚያስፈልገው " -  የኮንሶና አካባቢው ወጣቶች

ከሰሞኑ የኮንሶና አካባቢዉ ማህበረሰብ በመብራት ኃይል መቆራረጥና መጥፋት ስራ እስከመዝጋት መድረሳቸዉን ገልጸዉ  መንግስት መፍትሄ እንዲሰጣቸዉ ለቲክቫህ ኢትዮጵያ ቅሬታ ማሰማታቸው ይታወሳል።

ከሰሞኑ በተካኬደው የደቡብ ኢትዮጵያ ክልል ም/ቤት ስብሰባ ወቅት ጉዳዩን ያነሱት የክልሉ ርእሰመስተዳድር አቶ ጥላሁን ከበደ " ለኮንሶና አካባቢው የመብራት ችግር አርባምንጭ ላይ ተጨማሪ የመብራት ማስተላለፊያ ሰብስቴሽን ይገነባል " ማለታቸው ተሰምቷል።

" በርእሰ መስተዳድሩ ንግግር ቅር ተሰኝተናል " ያሉ ግለሰቦች " በኮንሶና አካባቢዉ ሰላማዊ ሰልፍ እናካሂዳለን " በማለት በሶሻል ሚዲያ ቅስቀሳ ሲያደርጉ ተስተውለዋል።

ወጣቶቹ ለቅሬታቸዉ ምንጭ የሆነው የርእሰመስተዳድሩ ንግግር መሆኑን ጠቅሰዉ " ለኮንሶና አካባቢው ከባድ የመብራት ኃይል ችግር መፍትሄው ኮንሶ ላይ እንጅ አረባምንጭ ላይ ተጨማሪ ሰብስቴሽን መገንባት አይደለም "  ብለዋል።

በጉዳዩ ዙሪያ ያነጋገርናቸዉ የኮንሶ ዞን መንግስት ኮምዩኒኬሽን ዳይሬክቶሬት ዳይሬክተሩ አቶ ሰራዊት ቲቶ ፥ " የርእሰመስተዳድሩን ንግግር ተከትሎ የሶሻል ሚዲያ እንቅስቃሴዎች ቢኖሩም ከተማዋ ፍጹም ሰላማዊ መሆኑን ገልጸው ሁኔታውን በመጠቀም ችግር ለመፍጠር የሚያሴሩ እንዳሉ እናውቃለን " ብለዋል።

ኃላፊዉ አክለውም የመብራት ችግሩን ለመቅረፍ ከሚመለከታቸው የክልል አመራሮችና ከፍተኛ የመብራት ኃይል  ባለስልጣናት ጋር ዉይይት እንደተካሄደ በመጥቀስ የአጭርና የረጅም ጊዜ እቅድ በማውጣት በአጭር ጊዜ ቅስጥ መፍትሄ ለመስጠት ተወስኖ እንቅስቃሴ መጀመሩን ለቲክቫህ ኢትዮጵያ ገልጸዋል።

#TikvahEthiopiaFamilyHW

@tikvahethiopia

#Update

° " የተቆራረጠ ደሞዝ አንወስድም ምክኒያቱም ካሁን በፊትም እንዲሁ ተደርገናል " - የሾኔ የመጀመሪያ ደረጃ ሆስፒታል ሰራተኞች

° " የተፈጠረው የካሽ እጥረት በመሆኑ ወደስራ ተመለሱ " - የሆስፒታሉ ስራ አስኪያጅ

የሾኔ የመጀመሪያ ደረጃ ሆስፒታል ሰራተኞች " ከግንቦት ወር ጀምሮ ደሞዝ አልተከፈለንም " በሚል ስራ አቁመው ወደ ዞኑ ጤና መምሪያ ጥያቄ ለማቅረብ ለመሄድ ሲሞክሩ በሀድያ ዞን ፖሊስ ተደብድበው ወደ ሆሳዕና ከተማ እንዳይገቡ መደረጋቸውን ለቲክቫህ ኢትዮጵያ መግለጻቸው ይታወሳል።

ጉዳዩን ከምን ደረሰ ? ስንል ጥያቄ ያቀረብንላችሁ ሰራተኞቹ አሁንም ስራ እንዳቆሙ መሆኑን በመግለጽ የተፈቀደውን የአንድ ወር ደሞዝ እንዳይወስዱ በ2015 ዓ/ም በዚህ መልኩ እንደተቃጠለው ገንዘባቸው እንዳይሆን ስጋት እንደገባቸው ገልጸዋል።

ሰራተኞቹ አሁን ላይ ውይይት አድርገዉ አንዳች ውሳኔ ላይ ለመድረስ በዝግጅት ላይ መሆናቸውን በመግለጽ በቅርቡ አቋማቸውን እንደሚገልጹ ነግረዉናል።

የሰራተኞቹን ስራ ማቆም ተከትሎ በስራ ላይ  ችግር አልተፈጠረም ወይ ? ስንል ጥያቄ ያቀረብንላቸው የሆስፒታሉ ዋና ስራ አስኪያጅ አቶ  አብርሀም ሎምቤ ፥ " ስራ ያላቆሙ ሰራተኞች በጫና ውስጥ ሆነው እየሰሩ ቢሆንም ስራ ያቆሙ ሰራተኞች ወደስራ ገበታቸው ተመልሰው ብንነጋገር የተሻለ ነው " ብለዋል።

ለምን የሰሩበትን ክፍያ አትሰጧቸውም ? በሚል ላነሳነው ጥያቄ " የካሽ እጥረት ነው የተፈጠረው ፤ የካሽ እጥረት እንደሀገር የሚገጥም በመሆኑ ክፍያቸው አይቀርባቸውም " ሲሉ መልሰዋል።

በሌላ በኩል ስራቸውን ያቆሙ ሰራተኞች ወደስራ መመለሳቸውን በደብዳቤ እየገለጹ የአንድ ወር ደሞዝ ይውሰዱ ስለተባለው ጉዳይ የጠየቅናቸው አቶ አብርሀም " ዋናው ወደስራ መመለሳቸው በመሆኑ በቃልም ቢሆን ከሰው ሀብት ጋር ተነጋግረን ስራ መጀመር ይችላሉ " ብለዋል።

ሰራተኞች ግን ባለሙያ ሆስፒታል ውስጥ እንደሌለ እየታወቀ ማስታወቂያው የተነገረው ብለዋል።

" ሲጀመር የሰኔዉ ላይ ለመወያየት ቀድሞ የግንቦት የት ነዉ ያለዉ ስላልን ነዉ ይሄ ሁሉ በደል የደረሰብን። " ሲሉ ገልጸዋል።

" አሁንም የግንቦት ላባችን እንዳይበላ ሁሉም ይወቅልን " ብለዋል።

ሰራተኞቹ አስገዳጅ ሁኔታ ተፈጥሮ የሰኔ ላይ እንዲፈርሙ ከተደረጉ በኃላ የግንቦቱ ክፍያቸው ተበልቶ ሊቀር ይችላል ሚል ስጋት እንዳላቸውን ለቲክቫህ ኢትዮጵያ ተናግረዋል።

#TikvahEthiopiaFamilyHW

@tikvahethiopia

#ጎፋ 🕯

" በመጀመሪያው ናዳ የተጎዱትን ለማዉጣት ርብርብ ውስጥ የነበረው ማህበረሰብ በአደጋው አልቋል ! " - የጎፋ ዞን ፖሊስ

በጎፋ ዞን ገዜ ወረዳ በደረሰው የመሬት ናዳ አሁን ላይ የሟቾች ቁጥር እጅግ በጣም እየጨመረ ይገኛል።

ቲክቫህ ኢትዮጵያ የጎፋ ዞን ፖሊስ አዛዥ ኢንስፔክተር ታረቀኝ አጥናፉን አግኝቷቸዋል።

" ሁኔታዉ እጅግ አሳዛኝ ነው " ብለዋል።

በመጀመሪያው ናዳ የተጎዱትን ለማዉጣት ርብርብ ውስጥ የነበረው ማህበረሰብ በአደጋው ማለቁን ገልጸዋል።

አዛዡ ከነሱ አባላት ውስጥ የወንጀል መከላከል ኃላፊው ጓዳኛቸው ወጣቶችን እያስተባበረ የመጀመሪያ ተጎጅዎችን ለማዉጣት ሲጥር አብረዉት ከነበሩት ጋር ቀድሞ መሰዋቱን ተናግረዋል።

እኛ እሳቸውን በስልክ ስናገኛቸው 160  አስከሬን እንደተቆጠረና አሁንም ሟቾች እየተገኙ እንደሆነ ገልጸው ነበር።

በኃላ በተገኘው መረጃ የሟቾች ቁጥር 229 ደርሷል።

የፖሊስ አዛዡ ፥ ጉዳት ደርሶባቸዉ ወደህክምና የተወሰዱትን ቁጥር ማወቅ አለመቻሉን ገልጸዋል።

አሁን ላይ ትልቅ ችግር የተፈጠረዉ በህይወት የተረፉትን ወደአንድ ቦታ ካሰባሰብናቸዉ በኋላ የአልባሳትና ምግብ እጥረት በመፈጠሩ ነዉ በማለት ማህበረሰቡ እገዛ እንዲያደርግ ተማጽነዋል።

አደጋዉ የደረሰበት አካባቢ የመንገድ ችግር ያለበት በመሆኑ ሟቾችንም ሆነ ተጎጅዎችን ከቦታዉ የማዉጣቱና ወደህክምና የመዉሰዱም ሆነ አስፈላጊ ቁሳቁሶችን የማመላለሱ ስራ በሰዉ ሀይል መሆኑ ሁኔታዉን  ከባድ እንዳደረግ አስረድተዋል።

#TikvahEthiopiaFamilyHW

@tikvahethiopia

#HawassaUniversity

በህክምና ጤና ሳይንስ ኮሌጅ የተለጠፈው ማስታወቂያ ምንድነው ? ዩኒቨርሲቲውስ ምን ምላሽ ሰጠ ?

በሀዋሳ ዩኒቨርሲቲ የህክምና ጤና ሳይንስ ኮሌጅ የሚማሩ ተማሪዎች ቅሬታቸውን ለቲክቫህ ኢትዮጵያ ሲልኩ ነበር።

ለዚህ ቅሬታ መነሻቸውም አንድ ተለጥፎ ያዩት ማስታወቂያ ነው።

ማስተወቂያው ፦

° በ12ኛ ክፍል ፈተና ምክንያት ተማሪዎች ወደቤት መሄዳቸውን ይጠቁማል።

° የገበያው አለመረጋጋት አቅራቢዎች ላይ በፈጠረው ከፍተኛ ጫና እና በቀን ለ1 ተማሪ የተወሰነው 22 ብር ዕለታዊ ወጪ ጋር ተመጣጣኝ ባለመሆኑ ላልተወሰነ ጊዜ የመግቢያ ቀን መራዘሙን ያሳያል።

° ኢንተርን ሽፕ ላይ ያሉ እና ካፌ ተጠቃሚ የነበሩ እጩ ዶክተሮች በምግብ ምትክ የሚሰጠውን የነን ካፌ ፎግም ሞልተው ተጠቃሚ እንዲሆኑ ይላል።

° የተማሪዎች መግቢያ እስኪገለጽ ከቀን 29 /11/ 2016 ዓ/ም ጀምሮ የምግብ እና የመኝታ አገልግሎት ላልተወሰነ ጊዜ በመቋረጡ በተለያዩ ምክንያቶች ግቢ ያሉ ተማሪዎች በ4 ቀን ለቀው እንዲወጡ ይላል።

የተማሪዎች ቅሬታስ ምንድነው ?

መልክዕታቸውን ለቲክቫህ ኢትዮጵያ የላኩ ተማሪዎች ትልቅ ቅሬታ እንዳላቸው ይገልጻሉ።

ቅሬታቸው ፦

- ላለፉት ስምንት ዓመታት ትምህርት ላይ ብንሆንም አሁንም በተለያየ መልኩ ጊዜያችን እየተቃጠለ ነው።
- የመመረቂያ ጊዜያችን አሳሳቢ ሆኗል።
- መግቢያችን ለሁለተኛ ጊዜ መራዘሙ ትክክል አይደለም።
- በኮቪድ-19 ለአስር ወራት እንዲሁም በ12ኛ ክፍል ፈተና ምክንያት የትምህርት ጊዚያችን ተቃጥሏል። ወሁን የመመረቂያ ጊዚያችን ተራዝሟል።
- በዚህ ዓመት ለ12ኛ ክፍል ፈተና እንድንወጣ ተደርገን ሐምሌ 17/2016 ዓ.ም ነው የተጠራነው። በኋላም ወደ ሐምሌ 25/2016 ዓ.ም ተገፋ። አሁን ደግሞ ላልተወሰነ ጊዜ መራዘሙን ሰማን። ይህ ትክክል አይደለም።
- የሚመለከተው አካል መፍትሔ ይስጠን።

ቲክቫህ ኢትዮጵያ የተማሪዎች ቅሬታን እንዲሁም የተለጠፈውን ማስታወቂያ ይዞ ዩኒቨርሲቲው አለኝ የሚለውን ማብራሪያ ለተማሪ እንዲሰጥ ጠይቋል።

የሀዋሳ ዩኒቨርሲቲ የህክምናና ጤና ሳይንስ ኮሌጅ  ቺፍ ኤክስኪዩቲቭ ዳይሬክተር ተባባሪ  ፕሮፌሰር አለሙ ጣሚሶ ምን አሉ ?

➡ የቀረበዉ መረጃ ትክክል አይደለም።

➡ ኢንተርን ሀኪሞች ከግቢ አይወጡም። ዶርማቸውንም አይለቁም። ይልቁንም ለተወሰነ ጊዜ የዩኒቨርስቲው የምግብ አገልግሎት በመቋረጡ በጀታቸዉን እንዲጠቀሙ ነው የተገለጸው።

➡ ይህ የሆነው አሁን ላይ ለ3 አመት ውል የገቡ ነጋዴዎች በእቃ መወደድ ምክኒያት ምንም አይነት የምግብ ግብአት ሊያቀርቡልን ባለመቻላቸዉና ይህን ችግር  ተወያይተን መፍትሄ እስክንሰጠዉ ነው።

➡ ሌሎች ተማሪዎች ቅድመ ዝግጅት ከተጠናቀቀ በቅርቡ ወደ ትምህርት ገበታቸው ይመለሳሉ። ትክክለኛ ቀኑንም  ለተማሪዎች በይፋ ይነገራቸዋል።

➡ ተማሪዎችን አሁን ላይ መቀበል ያልተቻለው ከምግብ አቅርቦትና አንዳንድ ማስተካከያ የሚፈልጉ ጉዳዮች ስላሉ ነው።

➡ በየጊዜዉ ለ12ኛ ክፍል ፈተና ሲባል ከግቢ መውጣታቸውን ሆነ አሁን ላይ በቶሎ አለመግባታቸው የሚወስድባቸውን ጊዜ  ለማካካስ ዩኒቨርሲቲው መፍትሄዎችን አስቀምጧል። በዛ ይሄዳል።

➡ ተማሪውን የሚያደናግር ማስታወቂያ ያወጣዉ አካል ከኛ እውቅና ዉጭ በመሆኑ ማንነቱን አጣርተን እርምጃ የምንወስድ ይሆናል።

በሀዋሳ ዩኒቨርሲቲ የህክምና ሳይንስ ተማሪዎች ህብረት ፕሬዝደንቱ ተማሪ ደረጀ መንገሻ ምን አለ ?

👉 ኢንተርን ዶክተሮች ከግቢ ባለመውጣታቸዉ እስካሁን መጉላላት አልደረሰባቸውም። ማስታወቂያውም ያለኛ እውቅና ነው የተለጠፈው።

👉 ተማሪውን ሳይፈልግ ወደነን ካፌ መቀየር አግባብ ስላልሆነ ለዩኒቨርሲቲዉ አመራሮች ውሳኔዉ ልክ አለመሆኑን የሚገልጽ ደብዳቤ አስገብተን ምላሽ እየጠበቅን ነው።

👉 ተማሪዎች ሐምሌ 25 ቀን 2016 ዓ/ም ያልገቡበት ምክኒያት ዩኒቨርሲቲዉ ከበጀት ማስተካከያና ካምፓስ ውስጥ ከሚያስተካክላቸው አንዳንድ ነገሮች ጋር በተያያዘ ምክኒያት ነው።

👉 ተማሪዎች በጊዜ ወደ ግቢ ባለመግባታቸው በቀጣይ ተማሪዎች ላይ የሚከሰተዉን ጫና በተመለከተ ዩኒቨርሲቲው እንዲያስብበት ተነጋግረናል።

#TikvahEthiopiaFamilyHW

More - @tikvahuniversity

@tikvahethiopia