🔈 #ተጠንቀቁ

ወደ ተለያዩ ውጭ ሀገራት " ስራ ነው " በሚል ፕሮሰስ እያደረጋችሁ ያላችሁ ወጣቶቻችን የትም ሀገር ይሁን የምትሄዱት ስራው ምን እንደሆነ እና ለደህንነታችሁም አስተማማኝ መሆኑን አረጋግጡ።

" ለስራ ውጭ እንላካችሁ " የሚሉትን ደላሎችንም ሆነ ኤጀንሲዎች ፦
- ስራው ምንድነው ?
- በትክክል ድርጅቱ ያለበት ሀገር የት ነው ?
- የድርጅቱን ህጋዊነት የሚያሳይ ማስረጃ አሳዩን !
- ባለበት ሀገር ሕጋዊ ስርዓት የተመዘገበበትን ፋይል አሳዩን ! ብላችሁ ጠይቋቸው።

ከዚህ ውጭ በተድበሰበሰ ሁኔታ " ጠቀም ያለ ገንዘብ ነው የምታገኙት " በሚል ብቻ መረጃ ፤ ማስረጃ በሌለበት ሁኔታ የሚደረግ የውጭ ሂደት ብታቋርጡ መልካም ነው።

አንዳንድ ስለ ገንዘብ እንጂ ፍጹም ስለ ሰው ህይወት የማያሳስባቸው ደላሎች እና ኤጀንሲዎች በርካታ ወጣቶችን እያታለሉ መጀመሪያ ወዳሉት ሳይሆን ወደ ሌላ ምንም ደህንነቱ ወዳልተረጋገጠ ሀገር እየላኩ ሰዎችን በማጭበርበር ላይ ወደ ተሰማሩ ድርጅቶች እያስገቧቸው ነው።

በነዚህ ድርጅቶች ውስጥ በሚቆዩበት ወቅት በርካታ ኢ-ሰብዓዊ ድርጊቶች ይፈጸምባቸዋል።

የወጣትነት ጊዜያችሁ ሳያልፍ ህይወታችሁን ለማሻሻል ብላችሁ እጅግ ተቸግራችሁ ፤ ቤተሰብም አስቸግራችሁ ብዙ ብር ከፍላችሁ ወደ ውጭ ሀገር የምትሄዱ ልጆች ስለምትሄዱበት ሀገር እና ስራ በደንብ አጣሩ አንብቡ።

ዘመኑ  የቴክኖሎጂ  ነውና በስልካችሁ ላይ ገብታችሁ የምትሄዱበት ሀገር ስላለው ደህነት፣  ስላለው የስራ ሁኔታ ፣ እናተም ትስሩታላችሁ ስለሚባለው ስራ በደንብ አረጋግጡ።

በኦንላይን የማያታውቁት ሰው ወይም በማስታወቂያ " ለስራ ወጣቶችን እንፈልጋለን " ሲሉ አትመልሱላቸው።

⚠️ በቀጣይ " ጠቀም ያለ ገቢ የሚያስገኝ ስራ ነው ! " እየተባለ ከተለያዩ የዓለም ሀገራት በብዛት ወጣቶችን በማዘዋወር አንዳንድ ድርጅቶች እያስገቡ ወጣቶችን የሚያሰሯቸውን የኦንላይን ማጭበርበር  / Online Scam / ድርጊት አይነቶችን በዝርዝር እንዳስሳለን።

#TikvahEthiopiaFamily

@tikvahethiopia

🔈 #የዜጎችድምጽ

በኢትዮጵያ ውስጥ ከቅርብ አመታት ወዲህ እጅግ እየተስፋፋና እየተባባሰ የመጣው የእገታ ጉዳይ እጅግ አሳሳቢ ደረጃ ላይ ደርሷል።

ሰዎች ይታገታሉ ፤ ገንዘብ ይጠየቃል ፤ አንዳንዴማ ጭራሽ የገንዘብ ዝውውር በባንክ ይፈጸማል።

አጋቾች ዘገያችሁ በማለትም ታጋቾችን ይገድላሉ።

ህጻን፣ አዛውንት፣ ወጣት፣ ሴት ፣ ሀብታም ፣ ገንዘብ የሌለው የሚቀር የለም ይታገታል።

ድርጊቱ በተለይ አማራ እና ኦሮሚያ ክልሎች ላይ በስፋት የሚስተዋል ሲሆን ትግራይ ውስጥ ጦርነቱ ከቆመ ወዲህ እገታ ሲፈጸምና ሰው ሲገደልም ተሰምቷል።

አማራ ክልል ከዚህ ቀደምም እገታ ይፈጸም የነበረ ሲሆን ህዝቡ " የመፍትሄ ያለህ !! "እያለ ሲጮህ ነው የኖረው ባለፉት ዓመታ ግን በክልሉ ካለው የጸጥታ ሁኔታ ጋር በተያያዘ እገታ እጅግ ተባብሷል።

ሰው ይታገታል ፤ ድሃው ቤተሰብ ብር አምጣ ይባላል ብር መላክ ሳይችል ሲቀር ታጋች ተገድሎ ይጣላል ፤ አዘገያችሁ እየተባለም መግደል ተጀምሯል።

አሽከርካሪዎች ተዘዋውረው ስራ መስራት ፈተና ሆኖባቸዋል። ወጥቶ መግባት ብርቅ ሆኗል። በዚህ የተማረረው ዜጋ አካባቢውን ጥሎ ለመውጣት እየተገደደ ነው። ያውም ያለው። የሌለው አማራጭ ስላጣ እዛው በሰቀቀን ይኖራል።

አሁን አሁን ግን እገታ ብቻ ሳይሆን ሰዎችን ማሸበር የተያያዘ ስራ ይመስላል። ብር ተሰጥቶ እንኳን ታጋች ተገድሎ ይጣላል። ህዝቡንና ህብረተሰቡን ተስፋ የማስቆረጥ ፤ በስነልቦና የመጉዳት ነገር !

ኦሮሚያም በተመሳሳይ ዓመታት አልፈዋል።

እጅግ በሚያስገርምና ጥያቄንም በሚፈጥር ሁኔታ አንድ ቦታ ላይ ብዙ ጊዜ ተደጋግሞ እገታ ይፈጸማል።

ተማሪ ፣ ሰላማዊ መንገደኛ ሳይቀር ታፍኖ ተወስዶ ቤተሰብ ብር ይጠየቃል። ሰው ይገደላል።

አንዳንድ ቦታዎች ጭራሽ መንገድ ሄዶ መመልስ ብርቅ ነው። ሰው አቅም የለው በአየር ትራንስፖርት እንዳይጠቀም ህይወቱን አስይዞ ለኑሮው ለስራው ሲል ይጓዛል።

ለመሆኑ አንድ ቦታ ላይ ተደጋግሞ እገታ ሲፈጸም ዘላቂ እርምጃ የማይወስደው ለምንድነው ? ፣ ሌላው ይቅር ችግሩን መፍታት ከተፈለገ የደህንነት ካሜራዎችን እንኳን እየተጠቀሙ ፣ የስልክ መስመሮችን እያጠኑ መፍትሄ መስጠት ለምን አልተቻለም ? ይህ የብዙዎች ጥያቄ ነው።

አንድ መስመር ላይ ዓመታት ሙሉ ሰው እየታገተ ገንዘብ ሲጠየቅ ችግሩን በዘላቂነት እንዲፈታ አለማድረግ ትልቅ ጥያቄ ነው የሚያስነሳው።

ትግራይ ላይ ከጦርነት ማግስት ሰዎችን አግቶ ብዙ ሚሊዮን ብር መጠየቅ የተለመደ ሆኗል። በዚህ ዓመት በርካቶች ታግተው ገንዘብ ተጠይቆባቸዋል።

ከእገታ በኃላ የተገደለም አለ።

በእርግጥ የሰላም መጥፋት ለእንዲህ ያለው ስርዓት አልበኝነት በር እንደሚከፍት የታወቀ ቢሆንም ችግሩን ከምንጩ ለማድረቅ ሁሉንም አቅም አሟጦ በመጠቀም ለምን አልተሰራም ?

ብዙዎች በእገታና ግድያ ተግባራት መሯቸዋል።

ከዓመታት በፊት በዚህ በሰፋ ልክ ያልተለመደ አሁን ግን ልክ ፋሽን እየሆነ የመጣን ተግባር ከምንጩ ለምን ማድረቅ እንዳልተቻለ የብዙዎች ጥያቄ ነው።

#TikvahEthiopiaFamily

@tikvahethiopia