#ጥንቃቄ

መቼም በአዲስ አበባ ከተማ የመኪና በር ተከፍቶ በውስጥ የተቀመጠ ስልክ፣ ቦርሳ ሌሎችም እቃዎችን ሰዎች ሲዘረፉ ብዙ ሰምተን ሆናል።

ከላይ በፎቶው የምትመለከቱ ዛሬ ምሽት 1:30 ላይ " መገናኛ " አካባቢ ከመኪና ላይ ለመዝረፍ የሚደረገውን ሙከራ እና ወከባ የሚያሳይ ነው።

በአካባቢው የነበረ የቲክቫህ ቤተሰብ አባል (ስም ጌድዮን) ሁኔታውን ሁሉ በቪድዮ ቀርፆ ልኮልናል ፤ የፋይሉ መብዛት ወደናት ለመላክ ቢያስቸግርም የሚመለከታቸው አካላት እንዲደርሳቸው ለማድረግ እንጥራለን፤ በግልፅ ሰዎቹም ስለሚታዩ።

መገናኛ አካባቢ ግን እጅግ ልዩ ትኩረት የሚፈልግ ቦታ ነው።

ለማንኛውም ውድ ቤተሰቦቻችን #ጥንቃቄ በየትኛውም አጋጣሚ የመኪና በር መቆለፋችሁን ለአፍታም ቢሆን አትዘንጉ።

ተጨማሪም ትላንት ጥዋት አንድ የቲክቫህ አባል ኢምፔሪያል አካባቢ ፦ በመኪና የነበሩ 4 ሰዎች አንድን መገደኛ አንቀው መሬት በማስተኛት ዝርፊያ ሲፈፅሙ እንደነበር በኃላም እሱ እንዳያቸው ሲያውቁ ከአራቱ አንደኛው መሳሪያ አውጥቶ እንዳሳየው በኃላም መኪናቸውን አስነስተው በፍጥነት ከአካባቢው መሸሻቸውን አጫውቶናል።

አዲስ አበባ ውስጥ በየጊዜው እየሰማን ያለውነው ዝርፊያ እጅግ የከፋ ነው። በግልፅ በቀን ሳይቀር ሰዎች ሲዘረፉ እየሰማን እንገኛለን።

የሚመለከታቸው አካላት የነዋሪዎችን ደህንነት በአስተማማኝ ሁኔታ ማስጠበቅ ላይ በልዩ ትኩረት ሊሰሩበት የሚገባ ሲሆን አጥፊዎችንም በተገቢው መንገድ ሌላውን በሚያስተምር ሁኔታ መቅጣት ይገባል ፤ የሚሰጡ ጥቆማዎችም ያለ ቸልታ መቀበል ይገባል ፤ አንዳንድ በፖሊስ ውስጥ ያሉ እና ኃላፊነታቸውን የማይወጡ አባላትንም መፈተሽ ይገባል።

@tikvahethiopia @tikvahethiopiaBOT

#ድርድር

የሰሜን ኢትዮጵያው ግጭት በሰላም መቋጫ ያገኝ ዘንድ የተለያዩ ጥረቶች እየተደረጉ መሆኑ ይታወቃል።

ከቅርብ ጊዜ ወዲህም አንዳንድ የውጭ ሀገር ሚዲያዎች ድርድርን በተመለከተ በግልፅ ምንጫቸው የማይታወቁ መረጃዎችን ሲያሰራጩ ከርመዋል።

የኢትዮጵያ መንግስት እስካሁን ንግግር አለመጀመሩን ነገር ግን ለዚሁ ዝግጅት እየተደረገ መሆኑን ጠቁሟል።

ትላንት ፓርላማ የቀረቡት ጠ/ሚ ዶ/ር ዐቢይ አህመድ በይፋ የታወቀ አጥኚ ኮሚቴ ተቋቁሞ በምክትል ጠቅላይ ሚኒስትሩ አማካኝነት እየተመራ መሆኑን፤ እስካሁን ውጤቱን አለማሳወቁን እና የሚደራደረው ኮሚቴም ይሄ መሆኑን ጠቁመው ነበር። ድርድር ሲጀመር መንግስት የሚደብቀው ነገር እንደሌለም ገልፀው ነበር።

ይህ የጠቅላይ ሚስትሩ ንግግር ከተሰማ ብዙም ሳይቆይ በህወሓት ሊቀመንበር ዶ/ር ደብረፅዮን ገ/ሚካኤል የተፃፈ ደብዳቤ ተሰራጭቷል።

ይኸው ደብዳቤ ህወሓት በኬንያ መንግስት በተጠራ ድርድር የሚሳተፍ ከፍተኛ የልዑካን ቡድን ለመላክ መዘጋጀቱን ይገልጻል።

ደብዳቤው በኬንያ መንግስት የተጠራ ድርድር #በናይሮቢ ስለመኖሩ ፍንጭ የሰጠ ነው።

ዶ/ር ደብረፅዮን ገ/ሚካኤል የሰላም ድርድሮችን በማስመልከት የትግራይ ክልልን አቋምን ለማሳወቅ ደብዳቤውን የፃፉት ለአፍሪካ ህብረት የወቅቱ ሊቀ መንበርና የሴናጋሉ ፕሬዝዳንት ማኪ ሳል፣ ለኬንያው ፕሬዝዳንት አሁሩ ኬንያታ፣ ለተባበሩት አረብ ኢምሬትስ ፕሬዝዳንት ሼክ ሞሃመድ ቢን ዛይድ አልናህያን እና ለታንዛኒያዋ ፕሬዝዳንት ሳሚያ ሱሉሁ ሀሰን እንዲሁም የተመድ ዋና ጸሃፊ አንቶኒዮ ጉቴሬዝን ጨምሮ ለተለያዩ ዓለም አቀፍ ተቋማት ነው።

ያንብቡ ; https://telegra.ph/Dr-Debretsion-GMicahel-06-15

@tikvahethiopia

#ሰከላ

በምዕራብ ጎጃም ዞን በሰከላ ወረዳ ከፍተኛ በረዶ ቀላቀሎ የጣለው ዝናብ በሰብል ምርት እና በአርሶ አደሮች መኖሪያ ቤት ላይ ከፍተኛ ጉዳት አደረሰ፡፡

ጉዳቱ የደረሰው በቀን 6/10/2014 ዓ.ም ከቀኑ 9 ስዓት ጀምሮ ያለማቋረጥ ከሁለት ሰዓት በላይ በጣለው በረዶ የቀለቀለ ከፍተኛ ዝናብ ነው።

በወረዳው ውስጥ ከሚገኙ ቀበሌዎች መካከል በባህር ዛፋ፤ በጅግሪታ በአምቢሲና በአባይ ቀበሌዎች የድንች ሰብል ሙሉ በሙሉ የወደመ ሲሆን ጉዳት በባህር ዛፋ ቀበሌ በአርሶ አደሮች መኖሪያ ላይ ጉዳት ደርሷል።

የድንች፣ የገብስ፣ በመስኖ የለማና ያልደረሰ በቆሎ ላይም ጉዳት ደርሷል።

የጉዳቱ ሰለና አርሶ አደሮች መንግስት አቅም በፈቀደ ድጋፍ እንዲያደርግላቸው ጥሪ አቅርበዋል።

የወረዳው ግብርና ፅ/ቤት ከዞን እና ክልል ጋር በሚደረግ ግንኙነት ድጋፍ የሚገኝ ከሆነ አቅም የሌላቸው ተጎጂ የህብረተሰብ ክፍሎች ድጋፍ ይደረግላቸዋል ብሏል።

መረጃው የሰከላ ኮሚኒኬሽን ነው።

@tikvahethiopia

#Alert🚨

በራስ ጠቆሮ ጥብቅ ደን ላይ የተነሳውን እሳት መቆጣጠር አልተቻለም።

በደቡብ ወሎ ዞን አምባሰል ወረዳ 016 ቀበሌ በተለምዶ ራስ ጠቆሮ እየተባለ በሚጠራ ጥብቅ ደን ላይ ሰኔ 6/2014 ሌሊት ጀምሮ የተከሰተው የእሳት አደጋን እስካሁን ድረስ መቆጣጠር አልተቻለም።

በጥብቅ ደኑ ውስጥ ወይራ፣ ጥድ፣ ኮሶ፣ ዝግባና ሌሎች የደን ሐብቶች እንዲሁም የተለያዩ እንሰሳትና አዕዋፋት እንደሚገኙ ተጠቁሟል።

ከመልክዓ ምድራዊ አቀማመጡ አመቺ አለመሆን እና በደኑ ውስጥ ተቀጣጣይ ሳር ከመብዛቱ ጋር ተያይዞም የእሳት አደጋውን ለማጥፋት የሚደረገውን ጥረት ሥራውን ፈታኝ እንዳደረገው ተገልጿል።

የአደጋው መንስኤ በተመለከተ እሳቱ ከግለሰብ ማሳ ተነስቶ ወደ ደኑ እንደተዛመተ የአምባሰል ወረዳ መንግስት ኮሙኒኬሽን ጽ/ቤት አሳውቋል።

@tikvahethiopia

#Update

ለአንድ ዓመት ጊዜ ዝግጅት ተደርጎበታል የተባለው የመጀመሪያው የሃጫሉ ሁንዴሳ አዋርድ ሰኔ 22 ይካሄዳል።

የሃጫሉ ሁንዴሳ ፋውንዴሽን ዛሬ ጋዜጣዊ መግለጫ ሰጥቷል።

ሰኔ 22 በሚካሄደው መጀመሪያው ዙር የሽልማት መርሐግብር አርቲስት ሀጫሉ ሁንዴሳ ከተገደለ ጀምሮ እስከ ዓመት ከስምንት ወር ያሉ የአፋን ኦሮሞ ሙዚቃዎችን ለመሸለም የታቀደ መሆኑን ባለቤቱ ወ/ሮ ፋንቱ ደምሰው ተናግረዋል።

ሰኔ 22 መርሐግብሩን ለማዘጋጀት የታቀደው ቀኑ አርቲስቱ የተገደለበት ዕለትና ሁለተኛ ዓመት መታሰቢያውን ለማድረግ መሆኑን በመግለጫው ተገልጿል።

ሽልማቱ በአስር ዘርፎች የሚከናወን ሲሆን 70 በመቶ የዳኞች ድምጽ 30 በመቶ ከህዝብ በሚሰበሰብ ድምጽ አሸናፊዎቹ ይለያሉ ተብሏል።

የድምጽ መስጫው በዌብሳይቱ ለቀጣይ 2 ቀናት ይቆያል።

በቀጣይ ይህንን የሽልማት መርሐግብር በአፍሪካ ደረጃ ለማከናወን እቅድ መኖሩን ተገልጿል።

ይህ መርሐግብር ፋውንዴሽኑ የአርቲስቱን ሌጋሲ ለማስቀጠል ብሎ ከያዛቸው ሥራዎች አንዱ ነው።

@tikvahethiopia

#ችሎት

ዛሬ የባልደራስ ለእውነተኛ ዴሞክራሲ (ባልደራስ)
አመራር የሆኑት አቶ ስንታየሁ ቸኮል ከታሰሩ ወዲህ ለመጀመሪያ ጊዜ በአማራ ክልል ጠቅላይ ፍርድ ቤት ቀርበዋል።

ሕገ መንግሥቱንና ሕገ መንግሥታዊ ስርዓቱን በኃይል ለመናድ ተንቀሳቅሰዋል የሚል ክስ እንደቀረበባቸው ክሱን ያቀረበውም የፌዴራል ፖሊስ መሆኑን የፓርቲው መረጃ ያመለክታል።

ፖሊስ አቶ ስንታየሁ ፤ ሕዝብን ለተቃውሞ የሚያነሳሳ ፅሁፍ በፌስቡክ ሲያሰራጩ እንደነበርም ጠቅሷል።

አቶ ስንታየሁ ቸኮል በበኩላቸው ባልደራስ ጠቅላላ ጉባኤ ለማድረግ እየተዘጋጁ እንደነበር እና ጉባኤውን ለማደናቀፍ የደረገ ድርጊት ነው ፤ ውንጀላውም የፖለቲካ ተሳትፎ ተከትሎ የመጣ ፖለቲካዊ ጥቃት እንደሆነ ገልፀው ፍርድ ቤቱ በነፃ እንዲያሰናብታቸው ጠይቀዋል።

በሌላ በኩል ፤ አቶ ስንታየሁ ባሉበት መዝገብ ስር የቀድሞው የአማራ ሳተላይት ራዲዮና ቴሌቪዥን(አሥራት) ባልደረባ ጋዜጠኛ ያለለት ወንድዬ ፣ ዋሴ በመረሳው እና ደምስ አያሌው የተባሉ ወጣቶች ተመሳሳይ ክስ ቀርቦባቸው ዛሬ ፍርድ ቤት ቀርበዋል። እነሱም ሕዝብን ለተቃውሞ የሚያነሳሳ ፅሁፍ በፌስቡክ ሲያሰራጩ እንደነበርም ተጠቅሷል።

ፍርድ ቤቱ ለፖሊስ 12 የምርመራ ቀናት በመፍቀድ ለሰኔ 20 ቀን 2014 ዓ.ም. ተለዋጭ ቀጠሮ ሰጥቷል።

4ቱም ተከሳሾች ከየነበሩበት ፖሊስ ጣቢያ ወደ ባሕር ዳር ሰባታሚት ወህኒ ቤት መወሰዳቸውን ባለደራስ ለእውነተኛ ዴሞክራሲ ፓርቲ አሳውቋል።

@tikvahethiopia

#Gambella | " ታጣቂዎቹ ከጋምቤላ ከተማ ውጭ ያሉ ቦታዎች ላይ ሊኖሩ ይችላሉ ፤ የት ቦታ ነው ያሉት የሚለውን ለማወቅ ጥናት እያደረግን ነው " - አቶ ኡጌቱ አዲንግ

ትላንት ታጣቂዎች ጋምቤላ ከተማን ለመቆጣጠር ጥቃት ከፍተው እንደነበር ነገር ግን በፀጥታ ኃይሎች በተወሰደው እርምጃ መክሸፉ ይታወቃል።

የክልሉ ፕረስ ሴክሬታሪያት ጽ/ቤት ኃላፊ አቶ ኡጌቱ አዲንግ ለሪፖርተር በሰጡት ቃል ፤ የክልሉ መንግስት ታጣቂዎቹ በከተማው ጥቃት ለመክፈት ዝግጅት እያደረጉ ስለመሆኑ መረጃ እንደነበረው ተናግረዋል።

ይህን ተከትሎ የክልሉ ፀጥታ ም/ቤት ሰኞ 5 ቀን 2014 ግምገማ ማድረጉንና የክልሉ መንግሥት በመረጃው ላይ ተመሥርቶ ጥቃቱን ለመመከት የተቀናጀ የፀጥታ ኦፕሬሽን ማድረጉን አስታውቀዋል፡፡

" ጥቃት ለመፈጸም እንደተዘጋጁ መረጃ ነበረን፡፡ በዚህ መረጃ ነው ወደ ኦፕሬሽን የተገባው፡፡ ዞሮ ዞሮ [ወደ ከተማው] ገብቷል ግን ቢገባም መመለሻ እንደሌለው ነው የነበረን ውይይት " ብለዋል።

" ጋምቤላ ከተማን በሙሉ ለመቆጣጠር ሙከራ ቢያደርጉም በተደረገው ትግል ከተማው ነፃ ሆኗል " ያሉት ኃላፊው ወደ ከተማዋ ከገቡ በኋላ በደረሰባቸው ጥቃት " በአንዳንድ ቦታዎች ተደብደቀው ወደ ቤቶች የገቡ " ታጣቂዎች በመኖራቸው የፀጥታ ኃይሉ ' ለቀማ ' ላይ ነው ሲሉ ገልፀዋል።

በንፁኃን ላይ ስለ ደረሰ ጉዳት በተመለከተ ፥ " ጦርነት ባለበት ሁሉ ሰው መሞቱ አይቀርም፡፡ ስለዚህ በወታደርም በሲቪሊያን ላይም ችግር ደርሷል፡፡ ቁጥሩን ገና አላጣራንም ስናጣራ እናሳውቃለን " ብለዋል።

ታጣቂዎቹ በክልሉ ከከተማው ውጭ ያሉ ቦታዎች ላይ ሊኖሩ እንደሚችሉ ጠቅሰው " የት ቦታ ነው ያሉት የሚለውን ለማወቅ ጥናት እያደረግን ነው " ብለዋል ለጋዜጣው።

#ሪፖርተር

@tikvahethiopia