У Кобрыне на 360-гадовы дуб «Волат» павесілі на ланцугах шыльду з кароткім апісаннем па-беларуску і QR-кодам, па якім можна атрымаць больш падрабязную інфармацыю пра дрэва.

#помнікіпрыроды #Кобрын #інфармаванне
https://www.realbrest.by/novosti/brest-i-region/istoricheskii-dub-v-kobrine-otmetili-ko-dnyu-goroda-pamjatnym-znakom.html

Неяк незаўважаным засталося, што на Свята-Мікалаеўскай царкве 1750-х гадоў (шыфр 112Г000389) у Кобрыне пазалацілі цыбуліну 🤦

#антырэстаўрацыя #цэрквы #драўлянаедойлідства #кобрын

Міністэрства культуры Беларусі не пагадзілася з Кобрынскім райвыканкамам, што работы па рамонце купала Свята-Мікалаеўскай царквы ў Кобрыне адпавядаюць умовам іх дазволу. Таксама міністэрскія чыноўнікі палічылі навес перад уваходам дысананснай прыбудовай, хоць мясцовыя чыноўнікі тлумачылі яго наяўнасць у тым ліку пандэміяй)))

#Кобрын #цэрквы #антырэстаўрацыя #ахова

Зацвержаны праект зон аховы гістарычнага цэнтра Кобрына, распрацаваны спецыялістамі БелНДІПгорадабудаўніцтва. Калі глядзіш Дзяржаўны спіс, не так відавочна наколькі гораду пашчасціла ў свой час, што пад ахову ўзяты фактычна ўсе гістарычныя будынкі — за тое гэта добра бачна на схеме.

Хочацца адзначаць што тэкставая частка адна з найбольш распісаных з вядомых мне. Сярод іншага:

Забаронена будаўніцтва ў перыметральнай і ўнутрыквартальнай забудове без уліку архіўна-бібліяграфічных матэрыялаў аб страчанай гістарычнай забудове; без выкарыстання гістарычнага модуля па працягласці фасадаў і вышыні прылягаючай забудовы;

Забаронена і навукова неабгрунтаванае змяненне фасадаў нешматлікіх гістарычных будынкаў без ахоўнага статусу (шэрым);

Забаронена любое будаўніцтва на ўчастках па вул. Леніна, 49 і Савецкай, 13 (на фота), акрамя аднаўлення страчаных гісторыка-культурных каштоўнасцей. Проста цікава, хто дазволіў знішчэнне ГКК у свой час?

Забаронены нарэшце непразрыстыя агароджы вышэй за 1,5 м.

#Кобрын #ахова

Здымкі ўзяты з крутога сайта «Познай Кобрин», на якім сабраны ўсе гістарычныя і важныя грамадскія будынкі, прыкладзены іх старыя (каларызаваныя нейрасеткамі) і сучасныя фота, дадзена кароткае архітэктурнае апісанне, якое прадублявана аўдыёзапісам. Для зручнасці ёсць карта. Сайт распрацоўваецца школай №6 г. Кобрына сумесна з аддзелам культуры Кобрынскага райвыканкама. Праект стаў прызёрам інтэрнэт-прэміі «TIBO-2021».

#Кобрын

Будаўніцтва псеўдарускай царквы каля будынка Спаскага манастыра ў Кобрыне. Гэта стала магчыма, калі спецыялісты з «ДЫЯЛОГ плюс» ў 2019 годе распрацавалі праект зон аховы, паводле якога «цалкам выпадкова» на гэтым месцы з'явілася зона рэгулявання забудовы, якая дазваляе ўзвядзенне будынкаў да 30 м вышынёй (калі груба — вышыня 10-павярховага дома), бо гэта, відаць, ніяк не пашкодзіць успрыманню гісторыка-культурнай каштоўнасці...

Таксама атрымайце асалоду ад навукова абгрунтаваных дзвярэй манастырскага корпуса.

#Кобрын #цэрквы #ахова #дзверы