هذا الصباح..

نحن عايزين الوَنس ..!

❤️

من أول لحظة بتبدأ تتكلم فيها و بيبدا عندك حب إنك تحكي حكاية للي معاك..

و انت طفل بتلتق الحروف و تقول الكلام مكعوج..!

بتشرح لي والديك قصة كيف الكديسة قالت مياو و جرت ..

لحد ما تكبر و تجي داخل من المدرسة و تحكي كيف الأستاذ قال لزملاءك يصفقو ليك عشان عرفت الجواب الصح

مرورا بي صحبك اللي بتحكي ليه كيف بت الجيران عاينت ليك و انت عاينت ليها و حاسس انك بتحبها

لي أول محاضرة في الجامعة و أول زول قعدت جنبو و بعدين بقيتو أصحاب للأبد .. كل القصة بدت بي .. عليك الله شفت القاعة دي حارة كيف .. تخيل المكيفات ما شغالة ..!

نحن بنعمل بيوت .. بنعرس و نناسب و نمشي نودي و نجيب .. و أبوها وافق و أمه ما راضية

كل دة.. بحثا عن الونس !

عشان ما ترجع لي بيت فاضي ولا حيط جامدة.. عشان عشمان تلقى زول تحكي ليه قدر شنو مديرك سخيف .. و قدر شنو بتاع البقالة عطلك في فضلت منتظره مسافة و انه ود عمك زول أناني بيحب نفسه..و انه ان شاء الله يكون فضل بامية من بتاعت امبارح لأنها كانت زابطة شديد..!

نحن بنفتش للونس ..!

عشان كدة نحن ممتنين للي بيخلق في حياتنا الأنس دة ..!

أنا ممتنة .. لي كل زول قدرت جنبه ما أحس بوحشة الدنيا .. بي غربة الأيام .. و بي برود البعد و قسوته..

للي خلو المُر حلو.. أو حتى بس خففو من مراره .. ما بي حاجة بس بالونس..

بتذكر كنت بمر بي ظرف إنساني قاسي جدا جدا .. حسيت وقتها إنه روحي بتتسحب و ما كان عندي قدرة على أي شي غير البكا

صحبتي كانت بتجي الصباح من بيتم .. تقعد في طرف السرير و تفضل ساكتة جنبي .. بعد ما يأست تقول لي بطلي بكا..

ما ح أنسى ليها أبدا .. إنها ونست وحشتي و ألمي و قعدت بس..

مرات الونس ما بحتاج لي كلام .. كفاية وجودك جنبي..إنك هنا حاضر معاي في اللحظة دي ..!

الوَنس هو أساس المحبة .. اللي ما بتقدر تتونس معاه و مافي بينك و بينه قدرة على الكلام .. لا يمكن تكون بتحبه..

هذا الصباح..

! وتزعلى يوم..

وازعل

وننفعل مرات

تقبّلى منّى..

واتوسّد ضُراعى سكات

وفينا حنينه

تتشابك موده..

تشابك الغابات

ونحن اذا اختلفنا سوا..

بنطيع الصاح

ولو بتنا القوا بنرتاح

اذا تمن الملح والعيش..

رُضا الشمّات

* وتتكى سنبلايه على ضراعى..

واميل

كأنى غنا الطفوله العذبْ

كأن الدنيا طى القلبِّ والمنديل

كأنّ الدنيا طىِّ القلب والمنديل

❤️❤️❤️
…..

#محبتي_التي_تعلمون
#سلمى_المصباح