ماذا لو أننا لو نقبّل من أحببناهم بشكل كاف ! ماذا لو أننا لم نضمهم إلى صدورنا ما يكفينا جحيم الوحشة في غيابهم !

ماذا لو أن أبي ينتظرني الآن و يبتسم قائلا " أبيت أصحيك "

ليته حينها أيقظني .. لم يكن في العمر يا أبي متسعٌ للنوم ..!

لم أخبرك أنني أحبك !

أسأل صديقا ما .. هل تظن أنني " عاطفية " بشكل مفرط ؟

يقول : نعم ، أظن أنك تعلمين الجواب مسبقا .

أطرق رأسي في أسى.. وحدي أعلم كم من الشوق لُكته في الغياب وحدي .. و بت أجزع من البعد و الفراق .

ليت بإمكاني الشرح .. كم من الموتى قد خبأتهم تحت ملاءات بيضاء ، و انتهى بي المطاف أعدهم كأرقام و أخبر أهليهم أو ربما لا أحد من أخبره

ان من يحبونهم جدا .. لن يتمكنو بعد اليوم من إخبارهم بحبهم لهم ..

ليتني يا حبيبي أستطيع أن أشرح لك .. ما تراه أنت جزعا .. و أراه أنا رغبة في الحب !

يخبرني صديق آخر أن والدته قد مرضت في غيابه و أنه كان في حيرة و ضيق

ثم يسألني .. هو يا سلمى العمر كله قدر شنو عشان نعيشه بُعاد !

قالها لي و قد غاب عني لعامين و وودعته و أنا لا ادري متى أراه مجددا !

( أبقى عشرة على المبادي ).. قلتها له بضحكة مصطنعة كعادتي كلما أخفيت العبرات

ابتسم ملوحا بالفراق .. انت ابقي عشرة نحن هينين !

أطرقت رأسي في أسى مرة أخرى .. ما نفع الأيام بدون من نحب ! 💔

هو العمر كله قدر شنو عشان نعيشه بُعاد !
💔💔💔

#سلمى_المصباح

في ارواحنا التعبانة دي .. مكان مفرود براه ..

للبحبونا بدون مقابل .. البسامحونا بدون منية السماح .
. بدون ما يقول ..تتذكر لما غلطت و سامحتك ..

المتقبلننا زي ما نحنا..
(بي سجمنا و رمادنا )

اللي اذا غلطو .. بيعتذرو قبل ما يتمو الغلط ..
البقولو ليك ..اسفين ياخ .. نحنا عارفين الحاجة دي ممكن تضايقك .. ما تزعلي ..

كتيير من الحب ..مبذول في كلمة ما تزعلي

كتيير من الاهتمام في كلمة .." أنا عارف "

ممكن تغلط و تعتذر .. و ممكن كمان ما تغلط بالمرة ..
البحبك عندو ليك الف عذر .. و قبل ما تجيه بي اعذارك ..بجيك هو بي سماحو ..

اللطف ما صفة الضعفاء .. اللطف صفة النبلاء ..

نحاول نتلطف بي بعض .. لانو الحياة فيها من الوجع ما يكفي كل انسان قوت يومه من الحزن و الانهاك ..

#سلمى_المصباح

في ارواحنا التعبانة دي .. مكان مفرود براه ..

للبحبونا بدون مقابل .. البسامحونا بدون منية السماح .
. بدون ما يقول ..تتذكر لما غلطت و سامحتك ..

المتقبلننا زي ما نحنا..
(بي سجمنا و رمادنا )

اللي اذا غلطو .. بيعتذرو قبل ما يتمو الغلط ..
البقولو ليك ..اسفين ياخ .. نحنا عارفين الحاجة دي ممكن تضايقك .. ما تزعلي ..

كتيير من الحب ..مبذول في كلمة ما تزعلي

كتيير من الاهتمام في كلمة .." أنا عارف "

ممكن تغلط و تعتذر .. و ممكن كمان ما تغلط بالمرة ..
البحبك عندو ليك الف عذر .. و قبل ما تجيه بي اعذارك ..بجيك هو بي سماحو ..

اللطف ما صفة الضعفاء .. اللطف صفة النبلاء ..

نحاول نتلطف بي بعض .. لانو الحياة فيها من الوجع ما يكفي كل انسان قوت يومه من الحزن و الانهاك ..

#سلمى_المصباح
🎀

هذا الصباح ..💛

اقبل نصيبك في القدر و انفض عن قلبك غبار الحزن و الشك في النصيب .. امحي عنك كل غل و ابتسم للمحبة كما للعداء

الاتنين بيألمو و يعلمو و لو ما ألمك ما علّمك ... 💛
صباح كله محبة ما فيه حبة ألم، يلقاكم في خير و سلام و البتحبوهم معاكم و حبكم مضلل عليهم و حبهم مضلل عليكم ..

نحن شنو سوى ضل لي بعض ! 💛🌻
#سلمى_المصباح

نحن فزمن الأدب فيه مرهق شديييييد .. قلة الأدب هي اللي ساهلة جدا و بي بلاش

انما افتكر حاجة واحدة بس .. و انت بتقل ادبك و تتطاول

انت بتقدم اللي بيشبهك و اللي هو مستواك و محتواك و ما شبت و سوف تشيب عليه

لأنه التعديل بعد سن معين صعب !

و نحن بنقدم اللي بنعرفه !

نسأل الله السداد ..!

القاع مليء جدا .. و تعيس للغاية .. بشكل مؤسف حقيقي ..

#سلمى_ المصباح

هذا الصباح

♥️♥️♥️♥️

في بدايه الالفينات و الخرطوم لسه بي خيرها ، و ما نخر في عضمها السوس زي هسي ..

كل شي كان رايق اكتر ، ما عارفه هل دي حقيقه ولا خيالي بس راسم لي الفكره دي .

الخرطوم ياها ، بي شجرها و شوارعها و تقاطعاتا الما مفهومه ، الزحمه يمكن اقل ، بي بيوتا و عماراتا و دكاكينا الفاتحه لي اخر الليل ، الجوطه الفظيعه بالنهار و الليل الرايق نسبيا ...

حاجه واحده بتربطا كلها ..

صوت محمود !

محمود كان الصوت البتسمعه في كل مكان .. حرفيا في كل مكان ..

في الوقت داك و انا اصغر بي كتير ، كنت شايفاه مجرد زول بيغني يعني! ليييه الضجه دي !

بس فعلا كنت صغيره شديد ..

ما انتبهت و انا من رقشه لي حافله لي امجاد لي كفتيريا لي محل طرح في سوق مدني ، لي مطعم..

ما انتبهت انه بيتسرب في المسام ، بمشي مع الروح و بيسكنك !

لي درجه انك لما ذاكرتك تجيب صوره زقاقات السوق في مدني ، تلقائيا بتجيب ليك صوت محمود في الخلفيه ..

افتكر في زي كم الف رقشه مكتوب في ضهرها ، يا مدهشه !

ماف رقشه ما كان فيها صوره الحوت ( ساب البلد )

الشريط العجيب جدا !

كافتيريات السوق العربي و الدنيا سخانه و اتنين قاعدين في طربيزه مشمع و عرقانين و هي خجلانه و هو مرتبك و الحر سيد الموقف و مروحه بايخه شغاله بتزن ..

برضو صوت محمود هناك ..

يا روحي انصفني .. يا روحي

لأنه قاسي علي انا يا حبيب ظلمك ...

في مدني في السوق الكبير و محطه الامجاد ،، محاطين بي دكاكين و محلات من كل شكل و لون ، محلات عصير ، و بتاع عصير قصب تحديدا في الركن هناك ..

الحاجات دي كلها جنب المستشفى !

مستشفى الكلى و المستشفى العام ، و القمسيون الطبي و في النص كده في قسم شرطه !

قادر تتخيل كميه البشر الفي الحته دي ..

اها الشارع ده بي كل تفاصيله و تباينه و تباين الغلابه الفيه .. بيلقاك صوت محمود بالاحضان

زي البيودعك من محل و يدخلك لي محل ..

- زمني الخاين ما لقيتلو شعور ، ظلمك باين ، جافيت النوم .
- ابقي الصمود ما تبقي زيف ، ابقي احتمال نبض الحروف ما تبقي خوف !
- اتعلمنا من ريدا نحب الدنيا و نريدا

محمود شريك كل اللحظات ، كل الخيبات ، كل الافراح و الانتصارات ، شريك المحبه ، كلام الريده و جوابات الحب ، دموع الشوق و لهفه المحبين و لوعتم .. رفيق الامتحانات ، السهر ، الداخليات التعبانه ، كافتيريات السوق اللي شهدت على كتير ، محطات المواصلات ، ضل الشدر ، ستات الشاي و الفلس ، محفور في الوجدان و الاذهان ..

في صديق قال لي اكتبي لينا عن محمود ..

كان ردي طوالي ، انا ما بقدر !!!

محمود ما بقدر اكتب عنه ، محمود هو كتبني !

غريبه الدنيا جمعتنا و بيقولو عليها رواحه ..!

♥️♥️♥️

#سلمى_المصباح

في ذكرى وفاة الحوت .. لسة جوانا حي ما مات

#مليونية_17_يناير

الفظيع في الحزن انك بتكون داير تكورك بس وتهرب حتى من نفسك..

تمرق من مكان وتدخل في مكان وتلقى نفسك شايل معاك الوجع ومافي من هروب

هدومك طابقة عليك والواسعة أضيق ما يكون..!💔💔💔

#سلمى_المصباح

شفتك امبارح معايا
كنتِ بين نايمة وصاحية
تحتويني الريدة والشوق والعنا
وانتِ صاحية ترفعي ايدك للشموس العالية
وتدفئ الغنا
ينتميلك قلبي يا أم قلباً حنين
بشتكيلك منك الحزن الدفين..💔

#سلمى_المصباح
#الإنتماء

💛

هذا الصباح ..

♥️

تلاتة انواع من العلاقات في الحياة ..

- علاقات بتضيف ليك
- علاقات خصما منك
- علاقات ولا حاجة .. ( لا هي ضايفة لا شايلة و دة في حد ذاته خصم ! )

العلاقات في الحياة .. أيا كان نوعا .. صداقة ..حب . زمالة .. في التجارة و البيع و الشراء ..

لابد انك تكون قادر تجاوب على نفسك .. الزول دة وضعه شنو فحياتي ضمن التلاتة تصنيفات ديل !

و اذا ما قدرت تجاوب دة اسوأ من انك تلقى الجواب ما على مزاجك

مبدئيا كدة و بالصلاة على النبي .. العلاقات ما مفروش أبدا أبدا أبدا تكون مرهقة .. !

ما مفروض اكون متشنجة منك .. لو ما رديت ليك اتوتر .. لو ما رجعت ضربت ليك اتكهرب و اعرف اني ح اقعد ابرر حياتي و تصرفاتي الساعة الجاية..

من اكتر الناس المريحين في حياتي ..فواز صحبي .. بنكن لي بعض احترام و مودة كبيرات جدا جدا .. عشان شغلنا عكس عكاس و زحمة و مسؤولياتنا على كل الاصعدة لا يستهان بها .. و رغم اني عندي ضو اخضر اضرب في اي لحظة .. لو بيستعدي الأمر او حتى ما بيستدعي .. بس ليه اوتر نفسي و اوتره .. ما انا عارفة اني لو صحيته ح اكره نفسي !

لينا سنين .. بنرسل لي بعض رسالة .. ممكن اكلمك ؟

و مافي زول بيتوتر ولا يتضايق من قولة لا هسي ما قادر ..! عادي يعني

في عيد ميلادي شكله نساني .. و هو قريب جدا مني .. ضربت ليه عشان انا عارفة انه بعزني جدا .. قلت ليه ضربت ليك عشان تقول لي كل سنة و انت طيبة ..! هو اتبسط و انا اتبسطت و الحياة كويسة اهو !

دة ليفل عالي .. اعلى منه .. اني ممكن اضرب لي صديق تاني يكون لينا تلاتة شهور ما اتكلمنا .. اقوليه صدق البطاطس بتاعت مكدونالدز بقت اي كلام ..!

دي تكون افتتاحية الحوار .. و لا كيف ولا وين ولا في شنو ..! و نتناقش ساعة في البطاطس و نقفل !

نرجع للواقع شوية ..

عاين حوالينك .. من احسن الحاجات اللي حصلت لي قربي من صديقة آسيوية .. جمعتنا القراية و العمل .. البت دي اضافة حقيقية لي حياتي !

بشوفا ناجحة.. بتمشي تسجل لي ماستر .. بتجي توريني .. حتى لو ما سجلت .. بكون عايزة لي قدام اعمل حاجة مشتبهة .. بتقابل دكتورة تغذية كويسة بتوريني .. بمشي ليها طوالي .. حتى لما تتعلم هواية جديدة .. بتحكي لي قدر شنو الهواية دي شالت منها طاقة سلبية و اني لازم اجربها ..!

الناس اللي قاعدة ساي .. بي معنى ساي .. لا خير لا شر .. ديل في الحقيقة خصم ..

لأنه شئت أم ابيت هم ماخدين منك طاقة .. زمن .. مجهود ولو يبدو ليك انه بسيط
بسيط مع بسيط مع بسيط .. ببقا كتير !

الصنف التالت و الأخير ديل عندهم ميزة واحدة بس ..! شارحين نفسهم !

كل زول فينا بيصنف الأذى بي طريقته الخاصة .. لكن في حاجات لابد اننا نكون مجمعين عليها ..

اي زول بتاع سبعة ورقات .. اي زول بتاع لف و دوران حتى ولو كان اللف و الدوران دة ما معاك انت مع ناي تانيين .. صدقني .. حيجي يوم و يلف و يدور عليك انت دة ولو بقيت ابوه !

ناس كتير سيئين .. صفاتم سيئة .. اديناهم مساحات في حياتنا ما كانو بيستحقوها .. مافي ندامة طالما الواحد اتعلم .. الندامة الحقيقية لو ما اتعلمت ..

ما محتاج توطا الجمرة مرتين عشان تعرف انها بتحرق !

المحيط بتاعك هو اهم عوامل نجاحك ..

على فكرة صحبك ما بالضرورة يكون الزول اللي بعمل ماستر و متقدم

انا بالنسبة لي رينا اللي بتعمل لي شعري اهم اسباب سعادتي و بتلعب في نجاحي دور

لأنها مهتمة بي تفاصيلي و حريصة اني قدر ما امشي ليها اطلع منها سعيدة .. و دة خارج نطاق لف الشعر !

دة زول بيدفعك للأمام ..! و بقول ليك يلا اهو .. شعرك حلو امشي حارب العالم ..!

اخر كلمة ..

محيطك" بيحيطك "و بيحدد مصيرك !

اختار محيطك صح !

♥️
"#سلمى_المصباح"

هذا الصباح ..

♥️

صديقة لي في علاقة .. خلينا نقول مستقرة .. مستقرة هنا " اسم الدلع " لي انها بتعدي مشكلة اليوم باليوم و بتغض بصرها عن قصص كتير و تعمل نفسها ما شايفة .

لاقاها زول درويش .. الدراويش ديل انا عندي فيهم اعتقاد .. الدروايش بالجد ما استهبال .. انهم بيقيفو جنب الزول بيقولو ليه كلمتين random تماما بس بيجو على قدرو طق !

المهم الدرويش دة كان في يوم ما زميلها في الجامعة .. لاقاها في صدفة .. ازيك يا فلانة و هي زولة جميلة جميلة جميلة جدا .. روحا اجمل اضعاف من وشها الجميل خالص

- ازيك و عاملة كيف .. ؟ ارتبطتي ؟
- ايوة
- و مبسوطة !
قامت ارتبكت كدة و قالت ليه اااي بيحبني

- رده المباشر و السريع ليها كان قاتل

قاليها ما كفاية يحبك .. لازم يحبك صاح

قال الكلمتين و مشا !

هي كانت بتحكي في الكلام دة بي ضحك و من باب ما شفتي حصل شنو .. بس انا دايما كنت قادرة اقرا حزن بين السطور .. و اسمع بين الحين و الآخر شكية بتقول .. انا حاسة اني ابجورة في البيت ! حاجة جميلة و قاعدة ..

شوف .. مافي كتلوج .. مافي مانيوال .. ولا في رسم بياني .. للحب الصاح !

ولا في زول انت معاه في علاقة حيجي يقوليك حبك لي دة ما صاح ..!

في ردي قبل اليوم على زول قال بحبك .. كنت مختوتة في حتة اضطريت اقول ..!

ما كفاية ! حبك ما كفاية .. ناقص و مبتور و مشوه ..

ما حتعرف انك بتحب الزول صح او انك محبوب لي روحك صح .. الا لما تحس بالرضا !

الرضا هو الفيصل !

في ناس بيفتكرو انهم بيحبو .. لكن كل البيعملوه مجرد لوع و مسك زمن و ضغط نفسي ما ليه اي لازمة !

انا ما بعرف اذا شريكك دة .. بينوم نفسيا ما مرتاح منك .. بتقدر تصنف نفسك على انك بتحبه كيف !

ما بعرف اذا انت قاعد مع زول و عارف و هو قاعد بيعرفك انه ناقص ..

ناقص اهتمام .. ناقص عاطفة .. ناقص حب !

بتعمل في شنو انت !!!

يعني ما بتعرف تحب و ما بتعرف تقيّم وضعك .. باقيات عليك قلة عرفة و عدم فهم !

الناس ما تقعد توزع في كلمة بحبك ساي .. البيحب زول لازم يحق الحب دة !

( يدي الحب حقه ، زي ما بندي الشغل حقه ، القراية حقها ، اهالينا حقهم ، ليه لما نجي نحب بنتعامل على انه الحاجة دي فيها auto pilot و هتمشي براها )

الاكل الناقص ..بيمشي الحال .. الهدوم الما جديدة و ما كتيرة بتمشي الحال .. القروش قدر اللي تمشي يومك نعمة من كريم ..

الا المشاعر الناقصة .. أخير عدمها و اخير ما تكون عندنا خالص ..

ما حنقعد كل يوم نقول .. انا حاسة انك ما بتحبني ..! اللي حاسس انه ما بحبك دي ما شكوك .. دي حقيقةً،، مافي زول بيحبك جد بيخليك تشك في انه بيحبك ولا بحبك قدر شنو

لما تحس انه الزول متردد فيك .. خليك متأكد هو فعلا متردد و اغلب الظن ما عندو ليك حاجة .. اللي بيحبك ما عندو في حبه ليك شكوك ولا تردد !

اخر كلمة ..

ما كفاية تحب الزول و بس .. لازم تحب الزول كفاية !

♥️

#سلمى_المصباح

هذا الصباح..

نحن عايزين الوَنس ..!

❤️

من أول لحظة بتبدأ تتكلم فيها و بيبدا عندك حب إنك تحكي حكاية للي معاك..

و انت طفل بتلتق الحروف و تقول الكلام مكعوج..!

بتشرح لي والديك قصة كيف الكديسة قالت مياو و جرت ..

لحد ما تكبر و تجي داخل من المدرسة و تحكي كيف الأستاذ قال لزملاءك يصفقو ليك عشان عرفت الجواب الصح

مرورا بي صحبك اللي بتحكي ليه كيف بت الجيران عاينت ليك و انت عاينت ليها و حاسس انك بتحبها

لي أول محاضرة في الجامعة و أول زول قعدت جنبو و بعدين بقيتو أصحاب للأبد .. كل القصة بدت بي .. عليك الله شفت القاعة دي حارة كيف .. تخيل المكيفات ما شغالة ..!

نحن بنعمل بيوت .. بنعرس و نناسب و نمشي نودي و نجيب .. و أبوها وافق و أمه ما راضية

كل دة.. بحثا عن الونس !

عشان ما ترجع لي بيت فاضي ولا حيط جامدة.. عشان عشمان تلقى زول تحكي ليه قدر شنو مديرك سخيف .. و قدر شنو بتاع البقالة عطلك في فضلت منتظره مسافة و انه ود عمك زول أناني بيحب نفسه..و انه ان شاء الله يكون فضل بامية من بتاعت امبارح لأنها كانت زابطة شديد..!

نحن بنفتش للونس ..!

عشان كدة نحن ممتنين للي بيخلق في حياتنا الأنس دة ..!

أنا ممتنة .. لي كل زول قدرت جنبه ما أحس بوحشة الدنيا .. بي غربة الأيام .. و بي برود البعد و قسوته..

للي خلو المُر حلو.. أو حتى بس خففو من مراره .. ما بي حاجة بس بالونس..

بتذكر كنت بمر بي ظرف إنساني قاسي جدا جدا .. حسيت وقتها إنه روحي بتتسحب و ما كان عندي قدرة على أي شي غير البكا

صحبتي كانت بتجي الصباح من بيتم .. تقعد في طرف السرير و تفضل ساكتة جنبي .. بعد ما يأست تقول لي بطلي بكا..

ما ح أنسى ليها أبدا .. إنها ونست وحشتي و ألمي و قعدت بس..

مرات الونس ما بحتاج لي كلام .. كفاية وجودك جنبي..إنك هنا حاضر معاي في اللحظة دي ..!

الوَنس هو أساس المحبة .. اللي ما بتقدر تتونس معاه و مافي بينك و بينه قدرة على الكلام .. لا يمكن تكون بتحبه..

هذا الصباح..

! وتزعلى يوم..

وازعل

وننفعل مرات

تقبّلى منّى..

واتوسّد ضُراعى سكات

وفينا حنينه

تتشابك موده..

تشابك الغابات

ونحن اذا اختلفنا سوا..

بنطيع الصاح

ولو بتنا القوا بنرتاح

اذا تمن الملح والعيش..

رُضا الشمّات

* وتتكى سنبلايه على ضراعى..

واميل

كأنى غنا الطفوله العذبْ

كأن الدنيا طى القلبِّ والمنديل

كأنّ الدنيا طىِّ القلب والمنديل

❤️❤️❤️
…..

#محبتي_التي_تعلمون
#سلمى_المصباح