▫️ایکی حؤکمدار 7

...خان، قیزی گؤرونجه بیر تهر اولدو،
چاتیلدی حئیرتدن اونون قاشلاری.
گؤزو دومانلاندی، نیطقی توتولدو،
گؤرونجه سوزولن لال باخیشلاری.

باخیشلار نه قدر درین‌دیر هله!
باتار او گؤزلرده غوّاصلار بئله.
او ایلاهی گؤزلر، او اولو گؤزلر،
او نرگیز باخیشلار، یوخولو گؤزلر،
یاتان دویغولاری یوخودان ائیلر،
بیر یول سوزولنده، مین بیر قان ائیلر.

حیات عشقی ایله او دولو گؤزلر،
او خومار باخیشلار، یوخولو گؤزلر،
بؤیوک بیر شاعیرین ایلهام چیراغی،
آلچاق بیر قاتیلین اؤنونده یانیر.
شاعیرین قلبینه چکیلن داغی،
خان اؤز عالمینده انتقام سانیر...
خئیر! قیصاصیندا یانیلمیسان سن،
بو قیصاص دئییلدیر اگر دوشونسن.

لعنت اوخویاجاق نسیل‌لر سنه،
قوی، قاناد وئرمه‌سین بو ایللر سنه!
گووَنمه تاختینا، شرفسیز اینسان!
سن آیلار، سن ایللر حؤکمداریسان،
او سا عصرلرله حؤکم ائده‌جکدیر،
ظولوم یاشاسا دا، عؤمرو گؤدک‌دیر.

خان، قیزی گؤردوکجه بیر تهر اولدو،
چاتیلدی حئیرتدن اونون قاشلاری،
بدنی اوچوندو، نیطقی توتولدو.
گؤرونجه سوزولن او باخیشلاری،
سارسیتدی سئحری‌یله گؤزل‌لیک اونو...

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 8

...قیزی آپاردیلار حرمخانایا،
او گوندن گؤز یومدو خان دا هر شئیه.
کئچدی بیر نئچه گون...
خانین گؤزلری-
رؤیالار ایچینده دومانلانیردی.
خان او گوندن بری، او گوندن بری،
هر نه گؤروردوسه یوخو سانیردی.
دوشونور: گؤره‌سن او گؤزل صنم،
حوسنونون سئحرینی هاردان گؤتورموش؟
خان باشا دوشموردو نه‌یدی او عالم،
ناغیل‌می ائشیتمیش، یوخومو گؤرموش؟

خواجه‌نی چاغیریب یانینا بیر گون،
خان اؤز اوره‌یینی دانیشدی بوتون.
سؤیله‌دی «لئیلا»یا وورولدوغونو،
«باش حرَم قویارام» دئدی من اونو...

خواجه خان امرینی چاتدیردی قیزا،
قیز سوسدو، قلبیندن قان سیزا-سیزا.
لئیلا: بو سؤزلر خواهیش‌می، یوخسا امرمی؟
خواجه: خواهیش...
لئیلا: حرمخانه بس ائیله‌میرمی؟
خواجه: یوخ! سن اولدوزلارین ان پارلاغیسان،
سنین جامالینا حئیران اولوب خان.
او سئویر سنی.
لئیلا: من ایسه سئویرم بیر اؤزگه‌سینی.
خواجه: قیزیم، تپیک آتما گل اؤز باختینا!
لئیلا: منیم اؤز باختیم وار.
خواجه: نه دئییم خانا؟
لئیلا: دئ کی، اوز دؤندریب محبّتیمدن-
اوجوز شؤهرتلره اَییلمه‌رم من.
خواجه: قیزیم، عیناد اولما، عینادی سیندیر،
آنلا کی، خان سنین حؤکمدارین‌دیر!
لئیلا: خواجه، دئدیگینی یاخشی دوشون بیر!
قلبین حؤکمداری محبّتی‌دیر...

#بختیار_واهابزاده
#شعر_اوجاغی
@SheirOcagi
داوامی وار

▫️ایکی حؤکمدار 9

...زیندانا سالدیلار «لئیلا»نی او گون،
دونیا زیندان اولدو «محمد» اوچون.
لئیلا راضی ایدی اؤز عملیندن،
او، زهَر ایچمیشدی عشقین الیندن.
محبّت یولوندا چکدیگی عذاب،
اونا کدر دئییل، ووقار گتیردی.
او، اؤز حیاتینی، جاوان عؤمرونو،
اوغورسوز طالعین حؤکمونه وئردی.

او دئدی: ظولمون‌له، ائی چرخِ دؤوران!
جیگریم قان اولدو، یارالانمیشام.
آنجاق دئمه‌رم کی سن وفاسیزسان،
وئردیگین جفانی وفا سانمیشام.

اونون عذابینی چکدی محمّد،
سفارش گؤندَردی دال‌بادال خانا.
اوره‌یینده آغری، گؤزونده حسرت،
او، لعنت یاغدیردی چرخِ دؤورانا.
یازدی: تانیمیرام نه خان، نه قانون.
یازدی: دوشمن قَوی، طالعیم زبون.
یازدی: قییارلارمی گوله؟ قایدادیر-
بولبولو سالارلار قفسه، ائی خان!
حؤکمون کی اؤلکه‌ده هر یئره چاتیر،
چکینمه بولبولون آه-فغانیندان!
گووَنمه حؤکمونه، تخت و تاجینا!
زامانین یوللاری دویون-دویون‌دور.
ظولمون قیلینجینی گؤتور، سال قینا!
گوله ال قالدیرماق گوجسوزلوگون‌دور.
قورخمورام ظولموندن، سیاستیندن،
شاعیرم، قارایا آغ دئمه‌رم من‌.
سنده ذرّه قدر انصاف وار ایسه،
گولو یوخ، بولبولو سال او محبسه!...

#بختیار_واهابزاده
#شعر_اوجاغی
@SheirOcagi
داوامی وار.

▫️اوچونجو گؤز، کؤنول گؤزو

«گؤی اوزو دامار-دامار،
گؤیدن یئره نور دامار.»

ها باخدیم گؤی اوزونه،
نورو گؤره بیلمه‌دیم.
«گؤزلریمین ایشیغی،
بلکه آزالمیش» دئدیم.
خالق حیکمتی هئچ زامان،
یانلیش اولانماز دئیه،
بیر داها باخدیم گؤیه.
گؤردوم ویزیلتی‌لارلا،
اوچان بیر آناش آری،
قوندو گول لچه‌یینه.
دوشوندوم: «بو آرینین،
مرامی نه، قصدی نه؟»
قیزیل گول دیله گلدی،
(یا منه ائله گلدی):
«گؤیدن ائنن او نورو،
گؤره بیلمکچون سنه،
اوچونجو گؤز کرک‌دیر،
گؤیدن ائنن نور سئلی،
یئرده چیچک-چیچک‌دیر.»

گؤزللیک‌لر اؤنونده،
بو ان حئیرتده‌یم من.
چیخماق دا مومکون دئییل،
گؤردویوم گؤزل‌لیگین،
سیرلی جاذیبه‌سیندن.
گؤزل‌لیگه حئیرتیم،
باشقا گؤز وئردی منه.
گورمه‌دیگیم نورو دا،
او گؤز گؤستردی منه.
آنلادیم، اوچونجو گؤز،
منیم کؤنول گؤزوم‌دور.
او گؤز ایله باخاندا،
گئجه ده گوندوزوم‌دور.
او گؤز ایله باخاندا،
من یالنیز اوزو دئییل،
هم ده اؤزو گؤرورم.
بیره باخیب او بیرین-
آرخاسیندا گیزلنَن-
اونو، یوزو گؤرورم.
او گؤز ایله باخاندا،
داشدا دا، تورپاقدا دا،
اوتدا دا، یارپاقدا دا،
دوزَنده ده، داغدا دا،
قارادا دا، آغدا دا،
من اؤزه‌یی گؤرورم.
بو گونه باخماق ایله،
گله‌جه‌یی گؤرورم.
او گؤز ایله باخاندا،
بیر گیزلی سیر گؤرورم.
هله میصراع‌لانمامیش،
نغمه، شعیر گؤرورم.

بیر نغمه‌دیر، شعیردیر،
بو دونیا باشدان-باشا،
کؤنول گؤزویله باخسان.
کؤنول گؤزون یوخدوسا،
بو حیکمتدن اوزاقسان.

#بختیار_واهابزاده
#شعر_اوجاغی
@SheirOcagi

▫️ایکی حؤکمدار 10

...مکتوبلار دال‌بادال آخدی سارایا،
اعیانلار آلدیلار خانی آرایا،
هره بیر سؤز دئدی؛ چوخ دوشوندو خان،
یئنه ده دؤنمه‌دی اؤز عینادیندان.
دئدی: تئز سارایا چاغیرین اونو،
آنلاداق شاعیره قودوردوغونو!

ساغیندا، سولوندا یالتاق کوبارلار،
بیر یاندا «فضولی»، بیر یاندا «لئیلا».
خانین گؤزلرینده اود وار، آلوو وار،
گاه ساغا بویلانیر، گاه باخیر سولا.

خان: دئییرلر لئیلانین مجنونوسان سن،
نه دئیه بیلرسن محبّتیندن؟
فضولی: اصیل عاشق منم دوزو، حؤکمدار!
مجنونون دونیادا آنجاق آدی وار.
منم بو عصرده عشقین آللاهی،
منی بنزتمه‌یین مجنونا، زینهار!
آهیمجا اولسایدی مجنونون آهی،
یووا تیکردی‌می باشیندا قوشلار؟
خان: لئیلانین شأنینه اوندا گرک سن،
بوردا بداهتاً شعیر دئیه‌سن!
فضولی دانیشمیر...
- هه، بس نه اولدو؟
هجو دئین دیلین نییه توتولدو؟
فضولی دانیشمیر...
- امر ائدیرم من:
گرک حوضورومدا شعیر دئیه‌سن!
فضولی: بیر خان اولسانیز دا، بونو بیلین سیز،
منیم حؤکمداریم سیز دئییلسینیز!
خان: سنین حؤکمدارین بس کیمدیر گؤرن،
اؤزگه خانلیغین‌می تله‌سی‌سن سن؟
فضولی: لئیلا ناموسوم‌دور، لئیلا عاریم‌دیر،
او منیم یگانه حؤکمداریم‌دیر.
عؤمور داستانیم‌دیر او گؤزل پری،
حؤکم اونون حؤکمودور، امر اونو امری...

#بختیار_واهابزاده
#شعر_اوجاغی
@SheirOcagi
داوامی وار

▫️ایکی حؤکمدار 11

..‌گولور گؤزلرینده لئیلانین جاهان،
دئییر: بئله اولار سئوَنلر، ائی خان!
اونون هر کلمه‌سی عشقین سسی‌دیر،
عاشقین سولطانی، معشوقه‌سی‌دیر.
حؤکمدار، بو سیرّی یاخشیجا بیل سن:
سئوگی دونیاسیندا هله طیفیلسن!
خان: سوس!
فضولی: «سوسا بیلرمی هئچ دولو اورک‌لر؟
زنجیر گؤتورمه‌ییر آزاد دیلک‌لر»
دئیه جاوان شاعیر قالخیر عوصیانا،
بوتون غضَبینی یاغدیریر خانا:
- ائشیت سؤزلریمی، ائی خان، ایندی سن،
من ده سنین کیمی بیر حؤکمدارام.
سن اؤز حؤکمون ایله گلدی-گئدرسن،
من اولو سئوگیمله همیشه وارام.
سن ده شاه، من ده شاه... سن اؤلکه‌لری،
منسه کؤنوللری فتح ائدیرم، خان!
قیلینج‌دیر، نیزه‌دیر سیلاحین سنین،
منیم سیلاحیم‌سا سؤزدور هر زامان.
قیلینج بو گون وارسا، صاباح پاس توتار،
سؤزونسه قیلینجی همیشه پارلار.
قیلیجلا، میضراقلا سن دانیشیرسان،
من نشه دوغوران سؤزلرله، ائی خان!
ایندی کی بئله‌دیر، گل مندن ال چک!
آخی چکیشن‌لر تای اولسون گرک!
گل منیم لئیلامی آلما الیمدن!
اونسوز نفَسی یوخ قورو جانام من.

خان: منه ده، ائی شاعیر، باخ بو گرک‌دیر.
سنی عؤمرون بویو اینله‌ده‌جکدیر،
بو گون حوضورومدا دئدیگین سؤزلر.
گرک حسرت قالا سنه او گؤزلر!
اؤلوم بئله آزدی  سیزه، دایانین،
ایکینیز بیر اودا یاندیقجا یانین!...

#بختیار_واهابزاده
#شعر_اوجاغی
@SheirOcagi
داوامی وار

▫️ایکی حؤکمدار 12

...بو احوالاتدان سونرا،
هله بیر نئچه آی دا،
ساخلادیلار لئیلانی،
محبوس کیمی سارایدا.
لئیلا سولدو، سارالدی،
خزان ووران باغ کیمی.
سیزلادی گئجه-گوندوز،
یاغسیز بیر چیراق کیمی.

اوره‌یینین دردینی،
دئدی او بختی قارا،
گوندوزلر بولودلارا،
گئجه‌لر اولدوزلارا.
یوخوسو دا گئجه‌لر،
اوچوب عرشه چکیلدی،
صوبحه قدر گؤزلری،
شام چیراغا دیکیلدی.
دئدی: - سن ده یانیرسان،
منده... بیر فرقیمیز وار.
یانغی ائله یانغی‌دیر،
بو فرق بیزی آییرار:
سن گئجه‌لر یانیرسان،
منسه، منسه، ائی چیراق!
هم گئجه‌لر یانیرام،
هم گوندوزلر... درده باخ!

ظولم‌لر، ایشگنجه‌لر،
سارسیتدی آنجاق اونو.
فضولی‌نین وئردیگی-
او قیزیل مئدالیونو،
سینه‌سینه باساراق،
هیچقیریر صوبحه قدر.

فضولی‌نین یازدیغی،
کؤنول یاخان غزل‌لر،
سارای دیوارلارینی،
دلیب کئچیر بیر آندا،
بو غزل‌لر گول آچیر،
قیزین دوداقلاریندا:

«آشیانِ مرغِ دل، زلفِِ پریشانیندادیر،
هاردا اولسان، ای پری، کؤنلوم سنین یانیندادیر.
عشق دردی‌یله خوشام، ال چک علاجیمدان، طبیب!
قیلما درمان، کیم هلاکیم زهرِ درمانیندادیر..
بس کی، هجرانیندادیر خاصیّتِ قطعِ حیات،
اول حیات اهلینه حئیرانام کی، هجرانیندادیر»

موغام اوسته اوخویور،
لئیلا بو سطیرلری،
حئیران قویور سسینه،
او، گؤیلری، یئرلری.
بو سس اریدیر قیشین،
شاختاسینی، قارینی،
بو سس دیله گتیریر،
سارای دیوارلارینی.

دردی آغیر دئییلدیر،
دردینی بیلمه‌ینین.
دردی یامان آغیردیر،
سئویب-سئویلمه‌ینین!
دردینه درد چاتارمی،
هم سئویب، هم سئویلیب،
عشقی یئتیم قالانین-
هم اؤزو، هم عاشیقی،
بیر آلچاغین الینده،
غول اولوب آلچالانین؟...

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 13

... خان گؤزله‌دی، گؤزله‌دی،
چاتمادی آرزوسونا.
قیزین عینادکارلیغی،
چوخ آغیر گلدی اونا.
چوخ دوشوندو، نهایت-
حیله‌لره ال آتدی،
بیر گئجه قول گوجونه،
مقصدینه او، چاتدی.

سارای اهلی جار چکیب
خبر یایدی هر یئره:
لئیلا سورگون ائدیلمیش،
بغداددان یاد ائللره.
او گوندن ده فضولی،
دره آشدی، داغ آشدی،
اوبالاری، ائللری،
اویماق-اویماق دولاشدی.
شعیر دئدی، اینله‌دی،
او «لئیلا...لئیلا» دئیه.
یارالی آهو کیمی،
باش ووردو هر شنلیگه.
کئچدیگی هر اوبادان،
لئیلانی خبر آلدی.
او، اؤز محبّتی‌یله،
اوجالدی، هئی اوجالدی.
او گؤردو قاسیرغا دا،
گؤردو شاختا دا، قار دا.
«گؤردوم» دئین اولمادی،
لئیلانی بیر دیاردا.
گونش سارالدی گئتدی،
گویلره دالدی گئتدی.
آیی لئیلاسی بیلدی،
او دا یان آلدی گئتدی.
«اورک وورور، یورولمور،
کؤنول یانیر، قور اولمور.
سنه باخان گؤزلریم،
نییه سنسیز کور اولمور؟»

فضولی اوبالاری،
گزمکدن یورولمادی.
آنجاق اونون سسینه،
بیر سس وئرن اولمادی.
محبّتی اورکده،
غزل‌لری سینه‌ده.
کور-پشیمان قاییتدی،
او، بغدادا یئنه ده.
اوره‌یینده بوغولدو،
فضولی‌نین حاق سسی،
بولبول‌لرین ناله‌سی،
کولک‌لرین نغمه‌سی.
آهنگ توتدو عاشیقین،
«ناله‌ی دلسوز»ونا.
دالدی دوشونجه‌لره،
خیاللارا او، یئنه.
اونون سونسوز دردلری،
یئتیشمه‌دی داوایا.
او قاییدیب ائوینه،
چکیلدی اِنزوایا.
گئجه-گوندوز دوشونمک،
اونا بیر عادت اولدو.
تسلّیسی بیر خیال،
بیر ده عیبادت اولدو.
او، چوخ معنالار وئریب-
دونیا قیل‌وقالینا،
گؤیلردن جاواب اومدو،
یئرلرین سؤالینا.

فلک‌لر گؤیده چین-چین،
یاندی اونون آهیندان.
آرزوسونون چیراغی،
آلیشمادی بیرجه آن.
اوره‌یینین ناله‌سی،
«آمان» سسی، «آه» سسی،
یانانلاری اویاتدی،
بختینی اویاتمادی.

آهی گؤیلره چاتدی،
ظالیم خان'ا چاتمادی.
آلنیندا ایزلر آچدی،
عذابلاری خیش کیمی.
اینله‌دی چؤلده بیتن،
یارالی قامیش کیمی.

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار ۱۴

... شاعیر آچیب قلبینی،
دئدی: یانان منم، من.
گونشه، اولدوزلارا،
آیلارا دوشمنم من.
اونلار اؤز تئللرینی،
ائله کی یئره سریر،
منه مین جور فلاکت،
فاجیعه‌لر گؤستریر.

سیز مندن سوروشمایین،
من نه‌لری سئویرم.
ائنسین یئره بولودلار،
ائنسین یئره قارانلیق!
الم‌لری، دردلری،
من گورمه‌ییم بیر آنلیق!

اه، او ظالیم اووچولار،
آه، او ظالیم اووچولار!
اونلاردا اینصاف‌می وار؟
یوواسینی داغیتدی،
منیم بولبول‌لریمین.
یوخوسونو قاچیرتدی،
یوخولو چؤللریمین.

بو دونیایا گله‌لی،
اوزوم گولمه‌دی بیر گون.
دونیادان ذؤوق ایسته‌ین،
دونیادان ال گؤتورسون؟!
من بیر ذؤوق گؤره‌ممه‌دیم،
نه قدر دونیادایام.
غم دنیزی ایچینده،
یالقیز قالان آدایام.

نه قلبیمین آهلاری،
نه گؤزومون قان یاشی،
سؤندوره‌ بیلمیر منیم،
سینه‌مده‌کی آتشی.

اریدیرم اودوما،
اوره‌یی ده، جانی دا.
قورخورام کی، یاندیرام،
اودوما دونیانی دا.

دلی کولک‌لر ایله،
دیله گلیب نئی کیمی،
ایسته‌رم کی، طبیعت،
چالسین منیم غمیمی.

یئرده اودلار قالانسین،
دریالار دالغالانسین،
هایقیرسین عوصیانیمی.
گوروب ائشیتدیکجه، من،
اودا یاخدیم جانیمی.

نئجه دؤزوم بو درده،
مگر داشام، دمیرم؟
من گؤرمک ایسته‌میرم،
ائشیتمک ایسته‌میرم.

گؤروب ائشیتدیکجه من،
آرتیر سینه داغلاریم،
اتدن گؤزوم اولایدی،
داشدان دا قولاقلاریم!

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 15

...هر شئی یالان‌دیر، یالان،
عؤمور، غم کاروانی‌دیر.
طالع‌لر عؤمورلرین،
ابدی ساروانی‌دیر.

بؤهتان‌لار وادی‌سینده،
عؤمور آتیمی سوردوم.
کئفدن دم وورانلاری،
من کی یالانچی گؤردوم.

وفا اومدوقلاریمدان،
جفا گؤردوم هر زامان،
گوزگودن صیدق ایسته‌دیم،
اَیری گؤردوم اؤزومو.

سویا دئدیم دردیمی،
آخیب کئچدی یانیمدان.
او دا آغزیمدا قویدو،
ایکی کلمه سؤزومو.

ائی دهشتلی فیکیرلر،
مندن اوزاقلاشمایین!
سیز منیم اوره‌ییمدن،
کناردا آغلاشمایین!

شاعیرم، غم ایچینده-
کئچیر گئجه‌م-گوندوزوم.
سئودالی خیاللارین،
اؤولادی‌یام من اؤزوم.

یالنیز یالان گئرچک‌دیر.
من بو حاقّی دانمیرام.
من اؤز وارلیغیما دا،
شکّ ائدیر، اینانمیرام.

اینانمیرام گؤیه ده،
اینانمیرام یئره ده‌.
مین افسانه اویدوران،
بؤیوک نبی‌لره ده.

وارسا بیر ایناندیغیم:
یالنیز عشقیم‌دیر او دا.
مین دونیا کشف ائتمیشم-
عشقیمله بیر دونیادا.

اؤزوم ده هئچ بیلمیرم،
بو دونیایا نه دئییم؟
نه گئجه‌م بیر گئجه‌دیر،
نه گوندوزوم بیر گوندوز.

ائی منیم محبّتیم،
عشقیم، حیسّیم، دیله‌ییم!
سیز هم منیم حیاتیم،
هم ده اؤلوموم‌سونوز.

اؤلوم! ساغ گؤروب منی-
آتما منه پنجه‌نی!
من کی چوخدان اؤلموشم،
ناله‌م آلداتمیش سنی...

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 16

...آیلار کئچدی ایل اولدو،
عوض ائتدی گون گونو،
زامان وئردی حؤکمونو،
یامان وئردی حؤکمونو!:
شاه طهماسب بیر گئجه،
هوجوم چکدی بغدادا.
دوشدو یئنه قان-قادا.

ذوالفقارین تختینی،
چئویردیلر باشینا.
گئجه‌نین ظولمتینده،
او یاشینا-یاشینا،*
قاچیردی تک باشینا.
ائله بو واخت، بو زامان،
قاییدیردی فضولی،
ائوه، یاخین اوبادان.

اونلار قارشیلاشدیلار.
گورن کیمی تانیدی،
شاعیر اونو: -ذوالفقار!
هارا بئله قاچیرسان؟
دایان! سنه سؤزوم وار.
+ آمان شاعیر، قوی گئدیم!
- دایان، هله دایان، خان!
ائله کی آیری دوشدون،
او تختیندن، تاجیندان،
عادی بیر آدام اولدون،
گئتدی شانین، شؤهرتین.
تخت و تاجیندا ایمیش،
بوتون گوجون-قودرتین.
گئت! ظولموندن قورتاریب
مملکت آزاد اولدو.
ظولم ایله آباد اولان،
عدل ایله برباد اولدو.

«پادشاهِ مُلک، دینار و دِرَم روشوَت وئریب
فتحِ کشور قیلماغا ائیلر مهیّا لشکری.
گؤسته‌رَر ساعتده دؤورانِ فلک بیر انقلاب،
هم اؤزو فانی اولور، هم لشکری، هم کشوری.
گؤر نه سولطانام، منِ درویش کیم فیض سخن،
ائیله‌میش اقبالیمی آثارِ نُصرت مظهری.
هاردا کیم عزم ائتسه، مرسوم و مواجب ایسته‌مز.
هانسی مولکو توتسا، دَیمز کیمسه‌یه شور و شری»

- سؤیله، لئیلا هاردادیر؟
+ سارایدا.
- یالان دئمه!
+ من دوزونو دئییرم،
سارایدادیر.
- «قلبیمه،
سنین فیتنه‌لریندن،
چکیلدی محشر داغی.
حئییف، دونیا ساخلاییر،
قوینوندا هر آلچاغی!»
دئیه، اوردان بیرباشا،
سارایا گلدی شاعیر.
آختاردی حوجره‌لری،
اوتاقلاری بیربه‌بیر.
گیردی حرمخانه‌یه،
تاپیلمادی لئیلاسی.
«او، هارا گئتمیش؟» دئیه،
دوشوندو ایچین-ایچین.
یئنه کؤهنه یاراسی،
تزه‌لندی شاعیرین...

#بختیار_واهابزاده
* اوزونو بیر شئیله اؤرتوب گیزلتمک (Yaşınmaq)
#شعر_اوجاغی

@SheirOcagi
داوامی وار.

▫️ایکی حؤکمدار 17

... او گئجه ذوالفقار خان،
قاچان کیمی سارایدان،
قاپیلاری آچدیلار.
قیزلار حرمخانادان،
چیخیب داغیلیشدیلار.
هره گئتدی بیر یئره،
لئیلا دا آزاد اولدو.
سانمایین کی او بوندان،
فرحلندی، شاد اولدو!
گئجه‌نین ظولمتینده،
اؤز-اؤرونه دئییردی:
«هارا گئدیم من ایندی؟
ائویمه؟ بس آتامین-
نئجه چیخیم اوزونه؟»
هئچ اؤزو ده بیلمه‌ییر،
فیکری نه‌دیر، قصدی نه.
«هله بو هئچ...محمّد،
او نه دئیَر بس منه؟
ایتیردیم عیصمتیمی،
گولمَزمی هرکس منه؟
یوخ، یوخ من بو حالیملا،
گؤیدن یئره ائنمیشم.
بیر آلچاغین الینده،
من کی لکه‌لنمیشم.
من بدبختی، طالعیم-
یامان سالدی چتینه!
شاعیرین او موقدّس،
بؤیوک محبّتینه،
لاییق اولا بیلرمی،
منیم لکه‌لی آدیم؟
هیهات! گؤزومده قالدی،
بوتون آرزوم، مورادیم.
یوخ! بو داها آغیردیر،
بوتون ایشگنجه‌لردن.
محمّدین گؤزونه،
گؤرونه بیلمه‌رم من»
دئیه، دوغما شهری،
گئجه ترک ائتدی لئیلا.
کربلالی بیر قیزا،
قوشولوب گئتدی لئیلا...

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 18

گئتدی چیخدی شهردن.
بیر خئیلی گئتدی... بیردن:
«یوخ، من اونو گؤرمه‌میش،
هارا گئدیرم؟» دئیه،
لئیلا دؤندو گئرییه:
«آمان، باجیم! ایذن وئر،
گئدیم، گؤروم من اونو،
کؤنلومون ایلک دوستونو.
بلکه بو لیل‌لی سولار،
آخدی، هئچ دورولمادی.
اونو گؤرمک بیر داها،
منه قیسمت اولمادی.
قولاغیمدا بیر داها
سسلنمه‌دی سسی ده».
«گئدک!» دئیه قوشولور،
اونا رفیقه‌سی ده.

او کئچدیکجه شهرین،
تانیش کوچه‌لریندن،
تأسّوفله آه چکیر،
کؤکس اؤتورور دریندن.
دوشونور آستا-آستا:
«کوچه‌لر، آی کوچه‌لر!
من سیزین سینه‌نیزی،
تاپدامیشام نه قدر!
بو یوللارلا نه قدر،
مدرسه‌یه گئتمیشم!
قایغیسیز ایللریمی،
من بوردا اریتمیشم.
بو یوللاردا ایتیبدیر،
عؤمرون شیرین دمی ده.
بو یوللاردا تاپمیشام،
من اؤز سئوگیلیمی ده.
آه بو یوللار، بو یوللار!
نئچه ایل بوندان قاباق،
کیم دئیه بیلردی کی،
بئله بیر گون اولاجاق؟
کیم دئیه بیلردی کی،
کؤنلوم دوشه‌جک دارا،
گؤز یاشلاریم آخاجاق،
گول سپدیگیم یوللارا؟
گوله-گوله کئچدیگیم،
بو یوللاردان بیر زامان،
من آغلایا-آغلایا،
کئچه‌جه‌یم... آی آمان!
بیر دوشدویوم گونه باخ!
طالعین حؤکمونه باخ!»...

#بختیار_واهابزاده
#شعر_اوجاغی
@SheirOcagi
داوامی وار.

▫️ایکی حؤکمدار 19

...لیلا بایاقدان بری،
گزیر بوتون شهری.
آنجاق رفیقه‌سی ده،
گؤزدن بوراخمیر اونو.
ایزله‌ییر اؤز دوستونو،
بئله آغیر گونونده.

مدرسه‌نین اؤنونده،
گلیب لئیلا دایانیر،
اؤتن گونلری آنیر.
سسله‌نیر قولاغیندا،
بیر اینیلتی، بیر اَنین.¹
او اؤپور کاندارینی،²
اونا تانیش حوجره‌نین.
نظرلری ایچَری،
سانجیلیب دورور نه‌دن؟
محّمد'ی سوروشور،
ائله‌ بیل او، حوجره‌دن.

ائولرینین یانیندان،
اؤترکن یانا-یانا،
اؤتَری نظر سالیر،
او، بالاجا ائیوانا.
گلیب چیخیر نهایت،
بالاجا باغچاسینا.
سئویملی محمّدین،
محبّتی اینله‌ییر،
قلبینده حزین-حزین.
پنجره‌نین اؤنونده،
او، دایانیر لال کیمی.
گؤردوکلری گؤرونور،
گؤزونه خیال کیمی:

اودور، شاعیر اوتورموش،
بالاجا میز دالیندا.
قوش للـه‌یی الینده،
بیر دونیا خیالیندا.
یازیر، پوزور... اریییر،
اؤنوده‌کی شام کیمی.
- «آه!... او یازیر، او یازیر،
یقین منیم عشقیمی.»
دئیه، لئیلا دوشونور:
-«خئیلی کئچمیش گئجه‌دن،
یاتماییبسان هله سن.
منیم بؤیوک شاعیریم،
«آه!» یازیر، «آمان!» یازیر.
او، «شبِ هجران» دئییر،
او «شبِ هجران» یازیر.
زیلله‌ییب گؤزلریمی،
پنجره‌نه باخیرام.
گولوم! سنه باخیرام.
محبّت ساپیمیزا،
ووروبدو بیر کور دویون.
باخ، بو ساعات، عشقینی-
کاغیذلارا تؤکدویون،
سئوگیلین دوروب سنین،
اؤنونده پنجره‌نین.
سنین‌سه خبرین یوخ.
منیمله بیرجه آنلیق،
گؤروشونه سن یقین،
حیاتینی وئرردین.

باشا دوشمک اولماییر،
گردیشی، ائی سئوگیلیم!
ترسینه‌دیر دونیانین،
هر ایشی، ائی سئوگیلیم!
سنی چوخ سئودیگیمدن،
بوردان گئتمه‌لی‌یم.
لکه‌لی بیر آد سنه،
ایسته‌میرم یوک اولسون.
قوی سنین بؤیوک آدین،
همیشه بؤیوک اولسون!»
دئیه، دوغما شهری،
گئجه ترک ائتدی لئیلا،
کربلالی دوستونا،
قوشولوب گئتدی لئیلا.

#بختیار_واهابزاده
¹- سیزیلتی، ناله (Ənin)
²- قاپی آغزی، آستانا
#شعر_اوجاغی
@SheirOcagi
سون

▫️کئچمیشینه داش آتانین، گله‌جه‌یینه گوللـه آتارلار.

#بختیار_واهابزاده
#شعر_اوجاغی
@SheirOcagi

▫️حیاتدان گئتسم ده، خاطیراتدایام.
آرزوما همیشه چاتا-چاتدایام.

اوستومه نه قدر تورپاق آتیلسا،
ایشیغام، یئنه ‌ده من اوست قاتدایام...

#بختیار_واهابزاده
#شعر_اوجاغی
@SheirOcagi

‍ ▫️سببی سنسن.

دئییرسن: اؤزونو یامان سئوَنسن،
دئییرم: بونون دا سببی سنسن.

اؤزومو سئومزدیم؛ هله عکسینه،
بیر زامان اؤزومدن بئزیب اوساندیم.
ائله کی اورَکدن باغلاندیم سنه،
اؤزوم اؤز گؤزومده دیَر قازاندیم.

اؤزومو سئومکده بورجلویام سنه،
سئوگی بیر سیردیر کی من اونا تسلیم.
باشقا بیرینی یوخ، من دؤنه-دؤنه
سنی سئودیگیمدن اؤزومو سئودیم.

#بختیار_واهابزاده
#شعر_اوجاغی
🎙 سالار موغانی
@SheirOcagi

▫️آنا دیلیم!
شعر و سس:
#بختیار_واهابزاده
#شعر_اوجاغی
@SheirOcagi

‍ ▫️آنا دیلیم

من «چال!» دئدیم، «اوجال!» دئدیم،
من «وور!» دئدیم، «قالدیر!» دئدیم.
سؤز هوجوم‌دور، سؤز حمله‌دیر،
بیرجه کلمه بیر جومله‌دیر.
سن دیلده‌کی قودرته باخ، جورأته باخ!
بیر جومله‌نی بیر کلمه‌یه سیغیشدیران،
کلمه‌ده‌کی باریتا باخ!
یوز ایللرین اله‌ییندن آریدیلمیش آریتا باخ!
دده‌لریم بو سؤزلرین آلووونو گئیینیبدیر،
اورک‌لری بو سؤزلرین وورغوسویلا دؤیونوبدور.
قالخان تاخیب «قالخ!» سسینه،
ووروشوبدور «وور!» سسینه.

آخی نییه دَییشدیرک بیزیم قورقود آتامیزین
یاراتدیغی کلمه‌لری، باشقاسینین گلمه‌سینه؟!
نییه منیم آنام «مادر»،
نییه آتام «پدر» اولسون؟
بو دولاشیق تجارتده،
نییه منیم دوغمالاریم
اوزگه‌سینین تاپداغیندا هدر اولسون؟!
نییه یادین بهمَزینه¹ «بال» دئمه‌لی،
اؤز آشیما «یال»² دئمه‌لی؟
نییه منیم آنا دیلیم
گلمه دیلین قاباغیندا،
تیتیم-تیتیم تیتره‌مه‌لی؟
نییه دوغمام یاد اولمالی،
اؤز سؤزلریم اؤز دیلیمدن قووولمالی؟

هئچ گؤردون‌مو توراغایی قارغا کیمی قا-قا دئییه؟
هئچ گؤردونمو سیغیرچینی سرچه کیمی جوککولده‌یه؟
سؤزلرین ده میلّت کیمی اؤز ازلی صیفتی وار،
هر کلمه‌نین اؤز جؤوهری، فیطرتی وار.
دَییشنده یاد سؤزونه اؤز سؤزونو، اؤز لهجه‌نی،
صیفتینی دَییشیرسن،
تانیمیرام اوندا سنی،
آنلامیرام فیطرتین نه، صیفتین نه.
گؤوشه‌ینده سن اؤزگه‌نین سؤزلرینی،
صیفت تاخدین صیفتینه،
سن توپوردون اؤز بابانین اوجاغینا.
آنان سنی بو اوجاغا اؤولاد دوغوب،
سن‌سه گیردین اؤزگه‌سینین قوجاغینا.

هر میلّتین ان قیمتلی ثروتی‌دیر آنا دیلی.
اؤولادلاری یئر اوزونه سپه‌لن‌سه،
پرن-پرن دوشَنلرین وحدتی‌دیر آنا دیلی.
بو دونیانین هانسی اوزاق قوجاغیندا سس‌لنرسه،
او قوجاغی منیم اوچون عزیزله‌دن آنا دیلیم،
غوربتی‌ده وطن ائدن آنا دیلیم،
سؤزلرینین نغمه‌سینده روحوموزو جینگیلددن آنا دیلیم،
منی آنا وطنیمین بوتون اوغول-قیزلاری‌یلا
قوهوم ائدن آنا دیلیم!
سن گؤزلره گؤرونمه‌ین بیر تئلسن کی،
یول آچمیسان کئچمیشیمدن گله‌جه‌یه.
آنا یوردون اؤز روحونو کئچیریرسن،
بو نسیلدن او نسیله،
او اورکدن بو اوره‌یه.

اؤز دردیمی، سئوینجیمی
دوداغیمدا چاغلادانیم،
منی آنا وطنیمه،
بوگونومو صاباحیما
دونَنیمه باغلادانیم،
ائی سسیمه سس وئره‌نیم!
سن ائی منیم وارلیغیمی یئر اوزونه گؤستره‌نیم!
ائی شرفیم، ائی بایراغیم!
ائی آنامین کیتابیندا آدی قالان!
دوغما ایکن اوگئی اولان سینه داغیم!
«ختایی‌»نین قیلینجیندا
«فضولی‌»نین غزلینده
بولؤوله‌نیب اورخاولانان سؤز کسَریم!
داغلاریمدان دامجی-دامجی
سیزیب گلن اؤز اثریم!
ائی بو گونو دیلیم-دیلیم پارچالانان آنا دیلیم!
سینه‌سینده اود قالانان آنا دیلیم!
قاپیلارین آرخاسیندا بوینو بوکوک قالان دیلیم!
وار ایکن یوخ اولان دیلیم!
آیاقلاردا کیلیم دیلیم!
ووروشلاردا بیر قهرمان،
باریشلاردا حلیم دیلیم!
یادین فیتواسی‌یلا، اؤز گوللـه‌میزله
اؤزگه‌نین دیلینه اوو اولان دیلیم!
مؤهورلو، حوقوقلو ایداره‌لردن
داخمالار کونجونه قووولان دیلیم!
عالی طبقه‌لر سنی داندیلار،
سن بیر عومّان ایکن، دایاز ساندیلار،
اؤزگه‌نین دیلینده خوروزلاندیلار.

سن ائی اؤز ساجیندا قوورولان دیلیم!
«ختایی» تاختیندا سن فرمان اولدون،
دیللره حؤکم ائدن قهرمان اولدون،
بس نییه سن بو گون پریشان اولدون؟
«بابک» قیلینجیندان اود آلان دیلیم!

تاریخین یولونو کئچدین اوغورلو،
سنه باتانمادی بیر قولو زورلو.
دونَنی مؤحتشم، صاباحی نورلو،
ایندیسی تاپدانیب اووولان دیلیم!
آنالی، آتالی، آی یئتیم دیلیم!
شرفیم، شؤهرتیم، غئیرتیم دیلیم!

#بختیار_واهابزاده
¹- دوشاب، شیره (Bəhməz)
²- ایت یئمه‌یی
#شعر_اوجاغی
@SheirOcagi

▫️قوجالدیر اینسانی؛ قوجالدیر زامان
اوره‌یین آتشی، کؤزو قوجالمیر.
داغلاری_داشلاری قوجالدان زامان،
بیلمیرم بس نَدَن اؤزو قوجالمیر.

کئچدی باهاریمیز؛ یای، قیشا قالدی
داغلار قارا قالدی، یاغیشا قالدی
بیزیمکی بیر قورو باخیشا قالدی
نئیله‌ییم؛ آرزونون گؤزو قوجالمیر.

"بختیار"! دوشونَک بیز درین-درین
آرزولار مؤحتشم، دویغولار شیرین
اصیل صنعتکارین، اصیل شاعیرین،
اؤزو قوجالسا دا، سؤزو قوجالمیر.

#بختیار_واهابزاده
@SheirOcagi