دئدیلر سویوق دییب
سنه، خسته‌لنمیسن
بیر خبر ائله گوروم
ایندی حالین نئجه‌دی؟
من ده خسته‌لنمیشم
گوزلریمده اود یانیر
الیمده تئمپئراتور
منفی بیر درجه‌دی

سنده یوکسک حرارت
منده بوز کیمی ال وار
سن اوستونو اورتورسن
من آچیرام اوستومو
بیز عئینی شهرده‌ییک
آیری فصیل‌لرده‌ییک...
پاییز مندن اینجیدی،
باهار سندن کوسدومو؟

ساچ‌لاریم سامان کیمی
دریم شوران یئرلری
دونن گئجه ال‌لریم
گوزلریمی ساغیردی
نه‌سه... بون‌لار بیر یانا
سنین دردین نه‌دیر کی
بوگون، صاباح دوزه‌لر
منیم دردیم آغیردی

گوردون کی ناراحاتسان
گوردون کی داریخیرسان
گل، اوشوین ال‌لریم
سنه شعر دانیشسین
دونن کوهنه سئوگیلیم
اولوب، درد ائله‌میرم
بوگون سن گل، دونیانین
خئیری شره قاریشسین

#اورخان_باهادیرسوی
@SheirOcagi

▫️دئدیلر سویوق دییب
سنه، خسته‌لنمیسن
بیر خبر ائله گوروم
ایندی حالین نئجه‌دی؟
من ده خسته‌لنمیشم
گوزلریمده اود یانیر
الیمده تئمپئراتور
منفی بیر درجه‌دی

سنده یوکسک حرارت
منده بوز کیمی ال وار
سن اوستونو اورتورسن
من آچیرام اوستومو
بیز عئینی شهرده‌ییک
آیری فصیل‌لرده‌ییک...
پاییز مندن اینجیدی،
باهار سندن کوسدومو؟

ساچ‌لاریم سامان کیمی
دریم شوران یئرلری
دونن گئجه ال‌لریم
گوزلریمی ساغیردی
نه‌سه... بون‌لار بیر یانا
سنین دردین نه‌دیر کی
بوگون، صاباح دوزه‌لر
منیم دردیم آغیردی

گوردون کی ناراحاتسان
گوردون کی داریخیرسان
گل، اوشوین ال‌لریم
سنه شعر دانیشسین
دونن کوهنه سئوگیلیم
اولوب، درد ائله‌میرم
بوگون سن گل، دونیانین
خئیری شره قاریشسین

#اورخان_باهادیرسوی
@SheirOcagi

▫️اوشاقلار، آی اوشاقلار!

اؤزومدن توتا-توتا،
اؤزومه دیرماشیرام.
گاه دیزیمدن آشیرام،
گاه سینه‌مدن آشیرام.
ایچیمدن قیشقیریرام،
چؤلومدن دانیشیرام:
اوزاقلار، آی اوزاقلار!

قولاغیما سس گلیر،
نه کابوسدو، نه یوخو.
دیزلریمی تیتره‌دیر،
حسرتیمین سویوغو.
هر یانیم یوخلوغون‌دو؛
قوللاریم بو یوخلوغو،
قوجاقلار، آی قوجاقلار!

دره-تپه عؤموردو،
گاه کدردی، گاه سئوینج.
آزمیشام اؤز ایچیمده،
واللاه، قالمیشام گیرینج!*
سؤیکه‌نیب دیوار-دیوار،
گزیرم او کونج - بو کونج،
بوجاقلار، آی بوجاقلار!

نفَسیمه سد چکن،
بوغازیمدا دویوندو۰
اورک سسی دئییل کی،
سینه‌مده‌کی دؤیونتو.
گئتدین، تاپپیلتیلاری
کؤکسومده ریتمه دؤندو.
آیاقلار، آی آیاقلار!

بیر اؤلوم‌دو وارلیغیم،
خیریلتیسی قهَردن.
سنه گله بیلمیرم،
‌دوشوموشم، ائ، تهردن.
ایندی اؤزوم اؤزومه،
پیچیلداییرام هردن:
یازیقلار، آی یازیقلار!

آغلاماقلا باشلایان،
عؤمور گولمز، من اؤلوم!
بیر آستاجا شیلله‌دن،
باشلامیشدی بو ظولوم.
بو دونیایا گلنده،
قهقهه چکیب گولون!
اوشاقلار، آی اوشاقلار!

#اورخان_باهادیرسوی
* تنگه گلمک، جانا گلمک
#شعر_اوجاغی
@SheirOcagi

▫️ساچیمین قانی

اویاندیم بیر آخشام‌چاغی،
ائویمی یاری‌بوش گؤردوم.
دیواریمدا قان لکه‌سی،
پنجره‌مده یاغیش گؤردوم.

پنجره‌دن باخدیم چؤله،
گؤردوم یوخدور بیر سس-سمیر.
سالام وئردیم بیر کیشی‌یه،
گؤردوم کی آلماق ایسته‌میر.

غفیل گؤردوم سؤنوب سوبام،
اوشویور ائویم، ائشیگیم.
نییه هورمور قارا ایتیم،
گؤزه دَیمیر بوز پیشیگیم؟

دیوارداکی بو قان نه‌دیر؟
منیم کی آخماییب قانیم.
هاردادیر شفّاف چتیریم؟
نییه سینیب چای فینجانیم؟

من ده ائله یونگولم کی،
لاپ بالاجا بیر شار کیمی.
ایندیجه بو پنجره‌دن،
اوچاجاغام قوشلار کیمی.

آخی بو ائوده نه اولوب؟
کیم نه ائدیب کی، ایلاهی؟!
بیر ده گؤردوم «من»یم مندن،
چیخیب گئدیب کی، ایلاهی!

بورونوب یون ژاکئتیمه،
تای‌باتای آچیب قاپیمی،
آلیب شفّاف چتیریمی،
گئیینیب آیاق‌قابیمی.

چیخیب دومانلی باشیمدان،
قاچیب گئدیب مندن جانیم.
یاستیقدا اوچ-بئش توک قالیب،
دیواردا ساچیمین قانی.

گیزلیجه قاچیب گئتمیشم،
بئله‌جه قاچیب گئتمیشم.
من بیر یانا، بو طالئعدن،
بس نئجه قاچیب گئتمیشم؟!

#اورخان_باهادیرسوی
#شعر_اوجاغی
@SheirOcagi

▫️سئوگیلین

چکینیرم، اوتانیرام یاشیمدان-باشیمدان.
دوشدو سفیل یاشاییشا، گوذارا سئوگیلین.
چکیلمزدی اللر منیم ساچیمدان، باشیمدان،
ایندی حسرت قالیب بیرجه تومارا سئوگیلین.

گونلر اؤتور، عؤمور گئدیر الیمدن، عزیزیم!
اؤپدوم سنین ساچلاریندان، بئلیندن، عزیزیم!
سؤیله، داها گؤزل نه وار اؤلومدن، عزیزیم؟!
آددیم-آددیم یاخینلاشیر مزارا سئوگیلین.

تیکان کیمی باتمیشام اؤز جانیما، تأسّوف!
بلَنمیشم، بولانمیشام قانیما، تأسّوف!
دیزین-دیزین گله‌جکدیم یانینا، تأسّوف!
یولوخدو بیر آغیر درده، آزارا سئوگیلین!

دئییرلر کی، یاشایارمیش قبیرده، اؤلن‌لر.
بیزی آگاه ائتمه‌دیلر بو سیردن، اؤلن‌لر،
ها گؤزله‌دیک، گلمه‌دیلر او یئردن، اؤلن‌لر.
سن بیلیرسن، او یئردن ده قاچار آ، سئوگیلین.

شیرین-شیرین، خفیف-خفیف گولومسه، آغلاما!
ال-آیاغیم پارچالارا بؤلونسه، آغلاما!
بیر طالئعین سعادتی اؤلوم‌سه، آغلاما!
سئوین! داها خوشبخت اولار آوارا سئوگیلین.

#اورخان_باهادیرسوی
#شعر_اوجاغی
@SheirOcagi

▫️سئوینسین او اؤلوم کی...

ائله بیلمه یوخ اولور پارچالانان آداملار،
من بؤلونه-بؤلونه چوخالیرام، عزیزیم!
بیر حوجئیره کیمی‌یم، بؤلونوب میلیون یئره،
آیری-آیری ووجوددا ییغیلیرام، عزیزیم!

داش اولسا اود توتاردی، منم یاشایان هله؛
اللریمی قوینوما قیسیب گؤزله‌مکده‌یم.
منده کی بو صبر وار، معطَّلدی تانری دا،
قیشقیریب گؤزله‌مکده، سوسوب گؤزله‌مکده‌یم.

من گولمه‌یی یادیمدان چیخارماماقدان اؤترو،
اؤزومو قیدیقلاییب گولورم ائ، بیلیرسن؟
بیر سؤز دئییم، ساکیت اول، تلاشلانما سن جانین!
حئییف، یاخشی آدامدیم، اؤلورم ائ، بیلیرسن؟!

الیندن دوشدوم یئره، گؤزوندن دوشدوم یئره،
دوشوب سیندیم، باشیما ظولوم‌دو ده بو گلن.
گؤزله‌ییشیم، بیردنه‌م! عبث دئییل، گؤرورسن؟
ایندی دؤیولور قاپیم، اؤلوم‌دو ده بو گلن.

گلیب ادب ایچینده؛ بوینونو بوکوب گلیب،
گلیب منی آپارسین نامعلوم او‌ دونیایا.
دئییرلر کی، او دونیا میلیون ایل‌دی بوش قالیب،
ایندی ائلچی گؤندریب کی دولوم او دونیایا.

اوزولمه! اوزولمورم؛ منی چوخالیم دئیه،
باغینا-باغچاسینا اکَر، او دونیا وارسا.
سئوینسین او اؤلوم کی، منیم حوضورومدادیر،
سئوینسین او دونیا دا...اگر او دونیا وارسا.

#اورخان_باهادیرسوی
#شعر_اوجاغی
@SheirOcagi

▫️پینه‌چی

سنه ائله گلیر کی،
یاشاندی، بیتدی، گئتدی؟
نه سن، نه من، نه بیز وار،
هر اوچو ایتدی گئتدی؟

آرادا بیر واخت ائله،
یولوخ* بیر آخشام بیزی!
گؤر نئجه یاراتمیشام،
نئجه قورموشام بیزی!

سنی خاطیره‌لردن
آلمیشام ایلمه-ایلمه.
توخوموشام لیباسی
نیمداش گله‌جه‌ییمه.

سحرلر گون ایشیغیم،
داغینیق چارپاییمسان.
ساعاتیمین زنگیسن،
مورگوم، قهوه‌م، چاییمسان.

گئجه‌لر سیغیندیغیم
یورغانیم، دؤشه‌ییمسن.
دامیم، قاپیم، پنجره‌م،
ائویمسن، ائشیگیمسن.

سویوقدا اود-اوجاغیم،
ایستیده کؤلگه‌م منیم.
قوطبوم، قیطعه‌م،جهتیم،
شهَریم، اؤلکه‌م منیم.

سن گونده‌لیک دفتریم،
استول‌اوستو کیتابیم.
سنسن هر شئیه صبریم،
سنسن هر شئیه تابیم.

سن هم آسوده واختیم،
هم ده ایشیم-گوجومسن.
هم خیالیم، هم ده کی،
بیر خاطیره کؤچومسن.

گؤر نئجه قوووشموشوق!
گؤر نه بختوَریک بیز!
لاپ آللاه دا ایسته‌سه،
بئله بیرلشمه‌ریک بیز.

سنه ائله گلیر کی،
آرادا آیریلیق وار؟
«هیجران» دئدیگین نه‌دیر؟
جیسمانی آیریلیقلار؟

سنی دونندن آلیب
یاماییرام صاباحا.
آتدیم هیجرانین داشین،
پینه‌چی‌یم من داها.

#اورخان_باهادیرسوی
*باش وورماق
#شعر_اوجاغی
@SheirOcagi

▫️دوداق چایی

گل، سنه چای دمله‌ییم،
پُر‌رنگی، دوداغیمدان،
دمی، سرخوشلوغومدان،
شکری بارماغیمدان!

دوغراییب ساچلاریمی،
یوللارینا سپیم، گل!
سنی منه گتیرن،
آیاغیندان اؤپوم، گل!

بو یوخسول جییَریمه،
آزاجیق نفس گتیر!
غضبیمه تسلّی،
سوکوتوما سس گتیر!

قار-یاغیش خبر وئریر،
«ائفیر»ده‌کی بدخبر.
سنی، منی دوشونمور،
نییه سوسمور بو لچر*؟

سن اونون آجیغینا،
قاردی، یاغیشدی، باخما!
پالتولارا بورون گل،
پاییزدی، قیشدی، باخما!

گل! دیوارلار داغیدیر،
سس‌لنیشیم، هاراییم.
گل! چورودو بارماغیم،
سویودو دوداق چاییم.

#اورخان_باهادیرسوی
* حیاسیز
#شعر_اوجاغی
@SheirOcagi

▫️منم ده...

بو نه ایش‌دیر دوشموشم؟
بیلینمیر گونوم، گئجه‌م.
چیخ، سسیمه هارای وئر!
یوخسا، واللاه اؤله‌جم.

نه داعوایا گلمیشم،
نه ده باریشماق اوچون.
بیر دردیم وار، آی آدام!
گلدیم دانیشماق اوچون.

یوخلوغوندان چکدیگیم
عذابلاری اونوتدوم.
یاراما پامبیق باسیب
آغریما پرده توتدوم.

چوخ دا جیدّی‌یه آلما
بو زارییان بایقوشو!
سنینچون نه چکمیشم،
هامیسی حالال خوشون!

ائشیدیرسن‌می منی؟
آچ قاپینی، ایشیم وار!
بو نئچه ایلده سندن،
تک بیرجه خواهیشیم وار.

سنه قوشولوب قاچان
یوخومو آپارماغا،
بو بویدا یول گلمیشم،
هر کونجه باخا-باخا.

آخیر کی تاپدیم سنی،
بو خارابا شهرده.
آچ قاپینی، آی آدام!
تانیمادین؟...منم ده!

داها دؤزه بیلمیرم،
من بو یوخوسوزلوغا.
وئر آپاریم یوخومو!
علاج‌دیر یالنیزلیغا.

#اورخان_باهادیرسوی
#شعر_اوجاغی
@SheirOcagi

▫️منی هانسی قوش داشییار؟

ائله بیر داغ ایدی چؤکدو، چئوریلیب گؤردوم، عجب،
ایندی بیر صحرادی هر یان، قیریلیب دوشور بوداغیم.
من ده بو صحرا ایچینده دَوه‌سی اؤلموش عرب،
اشی، سو یوخسا، جهنّم! سنه چات-چات دوداغیم.

اوسانیب قاچان روحومو توتورام آتیب سینه‌مه،
منم ائ، دردی باشیندان آشان او سفیل سئوگیلین.
اویانان دئییل بو آغری، مین ایلدی یاتیب سینه‌مه.
گله‌سن، سوسوز جانیما یاغاسان غفیل، سئوگیلیم!

توکه‌نیب بوتون سئوگی‌لر، بیتیب او آرزوم-اومیدیم.
اؤزومه هر گون سؤالیم «نئجه‌سن»، «نه وار، نه یوخ»دو.
ایندی ان شیرین یوخومدا، منه بیر یوزوم اومیدیم
باخیرام، شیرینلیگی ده کم اولور؛ نه وار، نه یوخدو.

تؤکولور پنجره‌لردن، قوشلارین دیمدیگی دن-دن.
آرابیر بوز دیرناقلاری شوشه‌نی دؤیر، قاشییار.
او یازیلماییب بوکولموش، ازیلن مکتوب منم، من.
گئدیب ائ گؤیرچین‌لریم! منی هانسی قوش داشییار؟

#اورخان_باهادیرسوی
#شعر_اوجاغی
@SheirOcagi

▫️ائشیتدین‌می، سئوگیلی؟!

بیر جوت آیاق تاپیبلار،
خزرین ساحیلینده.
بویو لاپ بسته آیاق،
بیر آز دا خسته آیاق.
دوعا دا اوخویورموش،
دنیزلرین دیلینده.
ائشیدن‌لر بیلمه‌ییب،
نه دئییرمیش گؤره‌سن
بو سون نفسده آیاق؟
هارای دوشوب پولیسه،
یییه‌سینی گزیرلر،
قصبه، کوچه، دالان.
نه سند وار، نه ایز وار،
ایکی چیلپاق آیاقدی،
ساحیلده اولان-قالان.

بیر جوت ال ده تاپیلیب،
ساحیلدن اوزاق اولان،
بیر ائوین تپه‌سینده.
آسیلیب پالتار کیمی،
او پالتار زیوه‌سیندن.*
بارماقلاری ازیلیب،
دیرسه‌ییندن کسیلیب،
دیرناغی قوپوب قالیب،
اوستو توز هوپوب قالیب.
هارای دوشوب پولیسه،
یییه‌سینی گزیرلر،
قصبه، کوچه، دالان.
نه سند وار نه ایز وار‌،
ایکی توز توتموش ال‌دی،
زیوه‌ده اولان-قالان.

بیر جوت گؤز ده تاپیبلار،
ایکی یول آیریجیندا.
یولون دؤرد طرفینه،
برَلمیشجه باخیرمیش،
سول سَکینین اوجوندا.
آغی قان دامار-دامار،
قاراسی تور باغلاییب.
اوزون کیرپیک‌لرینی،
قیرپا-قیرپا آغلاییب.
هارای دوشوب پولیسه،
یییه‌سینی گزیرلر،
قصبه، کوچه، دالان.
نه سند وار، نه ایز وار،
ایکی قان دامان گؤزدو،
سکیده اولان-قالان.

ائشیتدین‌می، سئوگیلیم؟!
خبر چاتدی سنه ده؟
بیر جوت آیاق آختاریر،
ایزلرینی هله ده.
بیر جوت ال یوخلوغونو،
پالتار ایپیندن آسیب.
بیر جوت گؤز سوراقلاییر،
یولونو یازیق-یازیق.

او گؤز منیم گؤزومدو،
باخیر اومیدلریمین
سنه باخدیغی یئردن.
او ال منیم الیمدی،
آسیلیب کؤینه‌یینین
یوخا چیخدیغی یئردن.
او آیاق دا منیمدی،
گزیر سنلی گونلرین،
سنسیز آخدیغی یئرده.

#اورخان_باهادیرسوی
* پالتار ایپی
#شعر_اوجاغی
@SheirOcagi

▫️یاغیشا

یاغیش یاغیر، تزه ائوه کؤچموشم،
«سنه، منه ساغلیق!» دئییب ایچمیشم.
گؤیدن گلن، دامجی دئییل؛ مرمی‌دی،
عؤمروم بویو بئله یاغیش گؤرمه‌دیم.

سن نئجه‌سن، نئجه کئچیر یوخلوغوم؟
ایسته‌دیم ائ بو گون سنی یولوخوم.*
سونرا باخیب گؤردوم چؤلده یاغیشدی،
سن ده یاددان چیخدین، باشیم قاریشدی.

بئله ده کی درد ائله‌مه! حیاتدی،
بیر ده گؤردون اَیری توتوب دوز آتدی.
یاستیقلاری سیخا-سیخا باغرینا،
داریخاندا بیر فیلم ایزله، آغریما!

من مین ایلدی «اؤلدوم» دئدیم، اؤلمه‌دیم،
ها بختیمی قیدیقلادیم، گولمه‌دیم.
سن ده قورخما، آدام اؤلمور آغریدان،
اوزاق‌باشی، کوسه‌جکسن تانریدان.

#اورخان_باهادیرسوی
* حال-احوال بیلمک اوچون بیرینه باش وورماق (Yoluxmaq)
#شعر_اوجاغی
@SheirOcagi

▫️سوکوت

گئجه چیخیب کوچه‌لرده دولاندیم،
چوخورلاردا لئیسان سویو کؤپوردو.
بیر سکی‌ده ایزین واردی، اونو دا،
ساری‌دونلو سوپورگه‌چی سوپوردو.

سرخوش آدام دانلاییردی کئچمیشی،
سونسوزلوغون شکلین چکدی یئریشی.
آیاقلاری دیزدن کسیک بیر کیشی،
اؤز پروتئز آیاغیندان اؤپوردو.

دسته دولو قارشیدا، یول کناری،
دؤیوشوردو اللری، آیاقلاری.
بو داعوایا باخا-باخا بیر قاری،
اؤنونده‌کی قوشلارا دن سپیردی.

بیر قادینا سیغینمیشدی بالاسی،
اویونجاق‌می ایسته‌دی سؤزآراسی؟!
کؤرپه‌سینه ترس-ترس باخان آناسی،
الین سیخیب پیچیلتی‌یلا تپیندی.*

یول ایتیریب بو شهرده آزیردیم،
سندن کوسوب سنه شعیر یازیردیم.
من آغریمدان چیغیرماغا حاضیردیم،
کولک توزلا اوز-گؤزومه توپوردو.

#اورخان_باهادیرسوی
* آجیقلانماق، برک دانلاماق
#شعر_اوجاغی
@SheirOcagi