صدای مردم لک

#شعر_لکی

شونشینی
شرح احوال شب نشینی های تلخ امروزی به همراه موبایل

شِه وی وَه شوان ، چله زمسانِم
بِری ئِی فامیلل ، بینَه مهمانِــم
هر کی ئَرا وِژ ، گوشی وَه دسـی
نه گفتگو بی ، نه جر و بحثــی
نه شوخی بیٖوو ، هِنَک تیتالــی
نه پَی پرسی بی، نه خوش هَوالی
یِه ساتی مشغول ، تماشاوان بیم
ماتِ کار و بار ، ماجراوان بیــــم
آخِردَس وِتم ، سَرهیزدَن گِری
یَه چِه کاریکَه ،نِهاتتان بِگْری؟
حرفی حدیثی، گَپی دی نی یَه؟
یَه کِی دَم تقه و، شِو نِشینی یَه؟
گَپی بَن بوشِن، یَه چَه مَکِینان؟
یک یک سَری هُوار، مشغولَه چِینان؟


نفر اول ،سَری هُوار وْ رَش
وِتان مشغولَه، وه بازی کِلَش
وَه دام کلش ، گرفتاری بی
وه فکر نیرو، اَتک واری بی
وِت مِه بوخشِن، ئِیمشو کار دیرم
وه گرد کلنی، تا صو وار دیرم
کارتانَه مِه ناو، مِه کِلَش بازم
لیدر وِتیَه سیٖ ، نیرو بسازم
سرم شلوغه ، چوین کولیدِرِم
تازه سه کارگر ، بیکاریش درم
باید بِچمَه جنگ ،طلا جَم بکم
تا روی رقیبل، یک یک کَم بکم


دوم جواو دا ، دردتان ئَر مالم
منیش هم مدیر، چُوار کانالِـم
اخبار بو یا عکس،تا فیلم و آهنگ
مَنِمَه تلِگرام  ، پُستَل رنگارنگ
اگر فعال بوم، دایم دس وَه کار
تعداد اعضا مچو تا هــــــزار
وِژدانَن کمی ،حالم درک بِکن
مترسم مردم، کانال ترک بکن
شهر و آبادی، استان وه استان
سرگرمه مکم، کل لکستــــان
بیس چوار ساعت، یه بیسه کارم
بی مِزد و منت خدمتگـــــزارم
وه عشق مردم، آسایش نِیـــرِم
ریالی وه کس ، نویَه سَه خیــرِم


سِوِمـی تازه ، خَوَردارا بــــی
چوارقاو کِلِکّلی هر وَه کارا بی
وتم تو دی چات، وِی گوشی دَستا
وِت سلامتیت ، هامَه اینستـــــا
ئِیمشو گرفتار ، ئَـژ حَدو دَرِم
کارم فره یه و ، شلوغه ســرِم
یه ئِیمشو بِیلم ، دردت ئَر گیانم
باید لایک بکم ، عکس یارانــم
مِه کِی حوصله ، گَپ و گُر دیرم؟
پانصد و پنجاه ، فالاووِر دیـرم!
یونه تو دیتَه ، رفیقَل مِنِــن
فالاومَه مَکَن ، کامنتَه منِــن
مِه بی اینستا ،خُوردو خاو نِیـــرِم
وه مال وژمان هم، گپ و راو نیرم


نوبت وه نفر ، آخری رَســــی
گوشیَه گِرتوی ،وه هردِگ دسی
چپ و راس شانی ویرَه بان و هوار
مِل کَجا مکِرد ، چوی موتور سوار
وتم تو دی چات ، ئَـرا کِشمٰاتین
تو بوش گیر وه دَس کامین نِهاتین؟
وت با اجازه ت ، بنده گِیمِـــرِمه
فقط علاقـــــه ، وه بـازی دِرِم
نه اهل نُتِــم ، نه وایفـــا دِرم
نه شارژ نه بسته ،نه همرا درم
سرگرمی بنده ، وقت بیکــاری
بازی ماشین و ، موتور سواری
بازی وِی خُووٖی ، وِی رَنگینیَه
بنزه پورشیَــه ، لامبورگینیَــه
ساتی مِه بوَخش گپ وگُر نَکه
تا وه دس بارم صدهزار سکـه
اَسکَه دی راحت ، دل شاده مکم
تریلی اف هاش  ، آزاده مَکـــم
یه گرافیکـــی ، کیفیت بانَــه
یه کَله اِف هاش، ییش اتوبانه
اگر کسی ناو ، مزاحم کارم
ئِیمشو قوله مَم رکوردی بارم


خلاصه هرکس ، عذری تراشی
آوان حرفه ای ،ولی مِه ناشـی
نگرتم معنا ، گفتاران چَه بی؟
منظور بحث و بازاران چه بی؟
وِتم سر هیز دَن ، هر چَن زحمتَه!
گوش بِکن وه مِه ، ئی نصیحتــه
تو کِه بی گوشــی ، آرامت نی یَه
دنیا بی گوشی ، وه کامت نی یَه
بِنیش وه مالت، قِصه م گوش بِکَه
دی شِـونشینی ، فراموش بِکــــه
خیال راحت ، بِـــرَس وه کارِت
ناوَه مزاحم  ، هُمسایَــه ژارِت
آخر دس یک یک، دانر دَریانه
بی خداحافظ ، بی مهلتانه..

شاعر:ناشناس

صدای مردم لک
@lakvahid

734 views11:14