ငဖဲမြို့နယ် ၊ ကျောင်းကုန်းရွာဟောင်းရှိ ( ကပစ - ၁၄ ) ဂိတ်ကင်းစခန်းအား တော်လှန်ရေးပူးပေါင်းတပ်ဖွဲ့များမှ စီးနင်းတိုက်ခိုက်
https://www.youtube.com/TachileikNewsAgency/?sub_confirmation=1
* * * * *

မကွေးတိုင်း ငဖဲမြို့နယ် မန်းချောင်းဆည်အနီး ကျောင်းကုန်းရွာဟောင်းရှိ စစ်ကောင်စီ၏ (ကပစ - ၁၄) ဂိတ်ကင်းစခန်းအား တော်လှန်ရေးပူးပေါင်းတပ်ဖွဲ့များမှ စီးနင်းတိုက်ခိုက်ခဲ့ကြောင်း ချင်းကာကွယ်ရေးတပ်-အရှို(Chin Defence Force – Asho)မှ သတင်းထုတ်ပြန်သည်။

ငဖဲမြို့နယ်ရှိ (ကပစ - ၁၄) ဂိတ်ကင်းစခန်းအား ၂၀၂၄ခုနှစ် ဇွန်လ (၂၁)ရက်နေ့ နံနက် ငါးနာရီခွဲတွင် တော်လှန်ရေးပူးပေါင်းတပ်ဖွဲ့များမှ စီးနင်းတိုက်ခိုက်ခဲ့ပြီး တိုက်ပွဲချိန် (၂) နာရီခန့်ကြာမြင့်ခဲ့ကြောင်း ဇွန်လ (၂၂)ရက်နေ့တွင် သတင်းထုတ်ပြန်သည်။

တော်လှန်ရေးပူးပေါင်းတပ်ဖွဲ့မှ အပြီးတိုင် စခန်းသိမ်းပိုက်ရန် ရည်ရွယ်၍ တိုက်ခိုက်ခဲ့ခြင်းဖြစ်သော်လည်း စစ်ကောင်စီမှ လေကြောင်းထောက်လှမ်းမှုနှင့် လက်နက်ကြီးပစ်ကူများဆက်တိုက်ပစ်ခတ်လာသဖြင့် ပြန်လည်ဆုတ်ခွာခဲ့ရကြောင်း ချင်းကာကွယ်ရေးတပ်-အရှိုမှ ဆိုသည်။

တိုက်ခိုက်မှုအတွင်း စစ်ကောင်စီ ဂိတ်ကင်းစခန်းမှ တပ်ဖွဲ့ဝင်များ သေဆုံးမှုများရှိခဲ့ပြီး ထိခိုက်ဒဏ်ရာရရှိမှုများလည်း ရှိခဲ့ကြောင်း သိရသည်။

အဆိုပါတိုက်ခိုက်မှုကို ချင်းကာကွယ်ရေးတပ်-အရှို (Chin Defence Force – Asho)နှင့် ဧရာဝတီပြည်သူ့ကာကွယ်ရေးတပ်မတော်စစ်ကြောင်း (APDF) အဖွဲ့တို့မှ ပူးပေါင်းဆောင်ရွက်ခဲ့ခြင်းဖြစ်ကြာင်း သိရသည်။

မြန်မာပြည်နိုင်ငံအနှံ့တွင် စစ်ကောင်စီ၏ (ကပစ)ဟု အတိုကောက်ခေါ်သည့် ကာကွယ်ရေးပစ္စည်းထုတ်လုပ်ရေးစက်ရုံပေါင်း (၂၅)ခုရှိပြီး ၎င်းတို့မှနေ၍ စစ်ကောင်စီလိုအပ်နေသည့် လက်နက်ခဲယမ်းများထုတ်လုပ်လျှက်ရှိကာ မကွေးတိုင်းအတွင်းတွင် ကပစ စက်ရုံ (၁၅)ခုနှင့် အများဆုံးအဖြစ် တည်ရှိနေကြောင်း သိရသည်။

News : https://www.tachileik.net/mm/news/36384

#TachileikNewsAgency
Photo: Chin Defence Force - Asho

မြင်းခြံတွင် လူနာလိုက်ပို့သည့် ဆခမဆရာတော် ဥူးဥတ္တမကို စစ်ကောင်စီတပ် ပစ်သတ်
https://www.youtube.com/TachileikNewsAgency/?sub_confirmation=1
* * * * *

မန္တလေးတိုင်း မြင်းခြံမြို့တွင် လူနာလိုက်ပို့သည့် ဆခမဆရာတော် ဥူးဥတ္တမကို စစ်ကောင်စီတပ်က ၂၀၂၄ ခုနှစ် ဇွန်လ(၂၂)ရက်နေ့ ညပိုင်းတွင် ပစ်သတ်လိုက်ကြောင်း သိရသည်။

ယမန်နေ့ ည(၁၀)နာရီဝန်းကျင်က မြင်းခြံမြို့၊ အမှတ်(၁၈)၊ ဝန်ထမ်းကွက်သစ်တွင် စစ်ကောင်စီတပ်က နယ်မြေရှင်းလင်းနေစဉ် မြင်းခြံမြို့ပေါ်သို့ လူနာတင်ယာဉ်ဖြင့် လူနာလိုက်ပို့သည့် ဆရာတော်ကို ပစ်ခတ်ခြင်းဖြစ်ကြောင်း သိရသည်။

ဆရာတော်မှာ သက်တော်(၅၀)၊ ဝါတော် (၁၂)ဝါရှိပြီး စစ်တပ်ဂိတ်တွင် ပစ်ခတ်ခံရခြင်းဖြစ်ကာ စစ်ကောင်စီဘက်က Myingyan Black Tiger PDF အဖွဲ့က ပစ်ခတ်သည်ဟု စွပ်စွဲထုတ်ပြန်သည်။

အဆိုပါဖြစ်စဉ်သည် Myingyan Black Tiger အဖွဲ့နှင့် လုံးဝမသက်ဆိုင်ကြောင်း၊ Myingyan Black Tiger (MBT)က မြင်းခြံနှင့် နီးနီးကပ်ကပ်မှာရှိမနေသည့်အပြင် ယခုရက်ပိုင်းတွင်လည်း စစ်ရေးလှုပ်ရှားမှုမရှိခဲ့ကြောင်း ထုတ်ပြန်ထားသည်။

ပြီးခဲ့သည့်ရက်ပိုင်းကလည်း စစ်ကောင်စီသည် ငါန်းဇွန်နယ်၌ ဝင်းနိမ္မိတာရုံ ဆရာတော်ကြီးကိုလည်း ပစ်ခတ်ပြီးနောက် PDFက ပစ်ကြောင်း သတင်းမှားဖြန့်ဝေပြီးနောက် အတူပါဆရာတော်ကြီးက စစ်တပ်ကပစ်ကြောင်း မိန့်ကြားမှသာ ၎င်းတို့ပစ်ခတ်ကြောင်း ဝန်ခံခဲ့ခြင်းဖြစ်သည်။

News : https://www.tachileik.net/mm/news/36388

#TachileikNewsAgency

ငပလီရှိ တပ်မိသားစုဝင်များ ထွက်ပြေးရန် နာရေးကားများကို ငှားရမ်း

* * * * *

ရခိုင်ပြည်နယ် သံတွဲမြို့ ငပလီကမ်းခြေရှိ စစ်ကောင်စီတပ်စခန်းမှ တပ်မိသားစုဝင်များ ရန်ကုန်သို့ပြေးရန် နာရေးကားများကိုငှားရမ်းနေကြောင်း ဒေသခံများထံမှ သိရသည်။

ယနေ့ ၂၀၂၄ ခုနှစ် ဇွန်လ(၂၃)ရက်နေ့ ညနေပိုင်းတွင် အာရက္ခတပ်တော်(AA)သည် လေဆိပ်အနီး Amazing ဟိုတယ်အထိ ထိန်း ချုပ်ထားကာ လေဆိပ်အတွင်းမှ ပြည်သူ့စစ်များက ခုခံ‌နေပြီး တပ်မိသားစုဝင်များလည်း ရန်ကုန်သို့ထွက်ပြေးရန် နာ‌ရေကားများကိုငှားရမ်းနေကြကြောင်း သိရသည်။

"မြေပြင်က နာရေးကားက ရန်ကုန်သွားရင် အငှားလိုက်ပေးတာ။ နာ ရေးကားဆိုပေမယ့် ပြောင်းမယ်၊ ရွေ့မယ်ဆိုရင်လည်း လိုက်ပေးတယ်။ အဲ့ဒါ ညနေ(၄)နာရီလောက်က တပ်မိသားစုတွေက ငှားကြတာရှိတယ်။ ချက်ခြင်း ကား(၃၊ ၄)စီးလိုတာမျိုးငှားကြတယ်။"ဟု ဒေသခံတစ်ဦးက ယနေ့ ဇွန်လ(၂၃)ရက်နေ့ ည(၉)နာရီခွဲတွင် Tachileik News Agency ကိုပြောသည်။

ထို့အပြင် လေဆိပ်အနီးရှိ ခမရ(၅၆၆)မှ တပ်သားများ ခလရ (၅၅)တပ်အတွင်းသို့ သွားရောက်ပူးပေါင်းနေကာ လက်နက်ချရန်လုပ်သည်ဆိုသည့် သတင်းများလည်း ထွက်ပေါ်နေသည်။

"ဇီးဖြူကုန်းနဲ့ Amazing(Amazing Ngapali Resort ) ဟိုတယ်ကို AA ယူလိုက်ပြီ။ လေဆိပ်က ပြည်သူ့စစ်တွေ ရှိနေသေးတုန်းပဲ။ AA က ပိတ်ဆို့ထားတာပဲရှိ သေးတယ်။ ခမရ (၅၆၆)ကလေဆိပ်နားပဲလေ ကပ်နေတာ။"ဟု ဒေသခံတစ်ဦးကပြောသည်။

Amazing Ngapali Resort သည် အာဏာသိမ်း စစ်ခေါင်းဆောင် မင်းအောင်လှိုင် နှင့် ရင်းနှီးသူဖြစ်ပြီး ရှမ်းပြည်နယ်အရှေ့ပိုင်း ကျိုင်းတုံမြို့တွင် ဟော်နန်းအတု ဆောက်လုပ်ခွင့်နှင့် တာချီလိတ်မြို့နှင့်ကျိုင်းတုံတို့တွင် ဟိုတယ်လုပ်ငန်း လုပ်ကိုင်ခွင့်ရရှိထားသည့် ဦးအောင်မျိုးမင်းဒင် ပိုင်ဆိုင်သည့် Resort ဖြစ်သည်။

ခမရ(၅၆၆)တပ်ရှိ လက်နက်များကို ဂျိတ္တောရဲစခန်းသို့ ရွေ့ပြီး ဂျိတ္တောတွင် သတိဝရိယနှင့်နေထိုင်ကြရန် မခြေအနေအရ ညတွင်း ခြင်းပြေးရနိုင်ကြောင်း အုပ်ချုပ်ရေးမှူးများက ပြောဆိုနေသည်။

ယမန်နေ့ညပိုင်းကလည်း သံတွဲမြို့အနီး ရွှေကျောင်းပြင်ရွာကို AA ဝင်ရောက်သည်ဆိုသော သတင်းကြောင့် စစ်ကောင်စီတပ်က လေ ကြောင်းမှ ဗုံးကြဲရာ နေအိမ်နှစ်လုံးပျက်စီးပြီး (၂)ဦးသေ၊ (၃)ဦး ဒဏ်ရာရရှိခဲ့သည်။

သံတွဲတိုက်ပွဲအခြေအနေကြောင့် သံတွဲမြို့ပေါ်ရှိ ဒေသခံများ ဘေးလွတ်ရာသို့ အလုံးအရင်းဖြင့် ထွက်ပြေးတိမ်းရှောင်နေကြသည်။

ပုံအညွှန်း - သံတွဲတိုက်ပွဲအခြေအနေကြောင့် သံတွဲမြို့ပေါ်ရှိ ဒေသခံများ ဘေးလွတ်ရာသို့ အလုံးအရင်းဖြင့် ထွက်ခွာနေကြပုံ


#TachileikNewsAgency