▫️ایکی حؤکمدار 18

گئتدی چیخدی شهردن.
بیر خئیلی گئتدی... بیردن:
«یوخ، من اونو گؤرمه‌میش،
هارا گئدیرم؟» دئیه،
لئیلا دؤندو گئرییه:
«آمان، باجیم! ایذن وئر،
گئدیم، گؤروم من اونو،
کؤنلومون ایلک دوستونو.
بلکه بو لیل‌لی سولار،
آخدی، هئچ دورولمادی.
اونو گؤرمک بیر داها،
منه قیسمت اولمادی.
قولاغیمدا بیر داها
سسلنمه‌دی سسی ده».
«گئدک!» دئیه قوشولور،
اونا رفیقه‌سی ده.

او کئچدیکجه شهرین،
تانیش کوچه‌لریندن،
تأسّوفله آه چکیر،
کؤکس اؤتورور دریندن.
دوشونور آستا-آستا:
«کوچه‌لر، آی کوچه‌لر!
من سیزین سینه‌نیزی،
تاپدامیشام نه قدر!
بو یوللارلا نه قدر،
مدرسه‌یه گئتمیشم!
قایغیسیز ایللریمی،
من بوردا اریتمیشم.
بو یوللاردا ایتیبدیر،
عؤمرون شیرین دمی ده.
بو یوللاردا تاپمیشام،
من اؤز سئوگیلیمی ده.
آه بو یوللار، بو یوللار!
نئچه ایل بوندان قاباق،
کیم دئیه بیلردی کی،
بئله بیر گون اولاجاق؟
کیم دئیه بیلردی کی،
کؤنلوم دوشه‌جک دارا،
گؤز یاشلاریم آخاجاق،
گول سپدیگیم یوللارا؟
گوله-گوله کئچدیگیم،
بو یوللاردان بیر زامان،
من آغلایا-آغلایا،
کئچه‌جه‌یم... آی آمان!
بیر دوشدویوم گونه باخ!
طالعین حؤکمونه باخ!»...

#بختیار_واهابزاده
#شعر_اوجاغی
@SheirOcagi
داوامی وار.

▫️بیر اینسان، سؤیله‌دیکلری قدر، سؤیله‌مه‌دیکلری ایله ده اینسان‌لاشیر.

#آلبر_کامو
#شعر_اوجاغی
@SheirOcagi

‍ ▫️بلکه...

بلکه هئچ یاشامادیم دئیه، دوشون!
بلکه اولدوزلارا هئچ دَیمه‌دی باشین.
بلکه بالیغا چیخمادین «هامسی»¹ زامانی.
ترن‌لرده هئچ سیقارا چکمه‌دین.
بلکه هئچ اوتورمادین او تاختا اسکله‌ده،
آیاقلارینی دنیزه سوخمادین.
بلکه اوشومه‌دین، قالخیب یئریمه‌دین،
بلکه آیاقلارین هئچ اولمادی.

بلکه یاندیراجاق کؤمورون وار سنین،
یئرییه‌‌جک یوللارین،
قومساللاری یویان گونشین وار،
و ماهنیلارین.
و اوووفف اولانلارین!...

سنین بوخار گمی‌لرین وار،
گؤیَرته‌سینده‌² چای، سیقارا.
اومیدلرین، چیچکلرین...
آغاجلارین مئیوه وئریر زامانیندا...
بولودلارا عیناد قوشلارین.
اوشوتمه‌ین پتولارین وار،
یاغیشدا چتیرین و قارا کوت-شالوارین.
جانین چکدی‌می، گلسین راکی!
حتّی پئینیر، حتّی قووون...
ایستر دوعا ائدرسن، ایستر سؤیوش...
کولک‌لرین وار سنین سرین-سرین...
ان چوخ سئودیگین شعرلر، ازبرینده...
جیبینده کیبریت و آسپیرین...
پامادورلارین‌سا کوتور-کوتور.³

اوشاقلارین وار سنین،
قصورسوز یارین،
بیر ائوین.
کیتابلارین،
و اوشاقلارینین اویونجاقلاری،
و حیات یولداشینین صاباحلیغی.⁴
بیر آدین وار سنه ان چوخ یاراشان،
اؤیله چوخ، اؤیله یالنیز.

بلکه هئچ یاشامادیم دئیه، دوشون!
بلکه اولدوزلارا هئچ دَیمه‌دی باشین.
بلکه «ریزه‌»یه هئچ گئتمه‌دین هامسی زامانی.
ترن‌لرده هئچ سیقارا چکمه‌دین.
بلکه اوتورمادین او تاختا اسکله‌ده،
آیاقلارینی دنیزه هئچ سوخمادین.
بلکه اوشومه‌دین و قالخیب یئریمه‌دین.
بلکه،
بلکه سنین «بلکه‌»لرین هئچ اولمادی...

#فاتیح_قیسابارماق
¹- بیر بالیق چئشیدی (Hamsi)
²- گمینین اوست حیصّه‌سینده آچیق یئر، عرشه (Göyərtə)
³- تزه‌لیگیندن دولایی کوتور (Kütür) سسی چیخاران.
⁴- صاباحلاری یاتاقدان قالخینجا کئچیجی اولاراق گئییلن اوستلوک. (Sabahlıq)
#شعر_اوجاغی
@SheirOcagi

▫️دوستلوق، قوتارمایان تک شئی‌دیر. هر شئی ده آرادان گئتسه، دوست قالار. بونو اونوتما!

📚 بعد از پایان
#فریبا_وفی
#شعر_اوجاغی
@SheirOcagi

دیالوق

▫️- بیلیرسن کیم دنیزده بوغولار؟
+ بللی‌دیر دا، اوزمک بیلمه‌ین.
- یوخ، عکسینه، اوزمک بیلن بوغولار. اوزمک بیلمه‌ین دنیزه گیرمز.

📺 House M.D
2004-2012 آمریکا
#دیوید_شور
#شعر_اوجاغی
@SheirOcagi

▫️گؤیلره باخماقدان گؤزوم سارالدی.

یوخسا پریشاندی حالی گؤیلرین،
بو یاغان یاغیشلار نییه لیل دوشور؟
او قدر باخدیم کی، دوشدو بیر اولدوز،
گؤرن من ظالیما نئچه ایل دوشور؟

چوخدان چالینمایان بو سیم، سارالدی،
گله‌نیم اولمادی، ایزیم سارالدی،
گؤیلره باخماقدان گؤزوم سارالدی،
گؤیدن ده غم دولو بیر زنبیل دوشور.

باخ! بو قورخاق کولک- تیتره‌ین، اسن،
گؤرورسن بیزی ده قورخودور بعضاً.
ایلاهی! سن هر گون اوره‌ییمده‌سن،
سنین ده یادینا بو طیفیل دوشور؟

#علیزاده_نوری
#شعر_اوجاغی
@SheirOcagi

‍ ▫️دئمک ایندی گئدیرسن.

دئمک ایندی گئدیرسن،
یازدیغیمیز سون شعر، اؤیله یاریم قالاجاق.
دئمک ایندی گئدیرسن،
قوشلاریمیز آجیخاجاق،
گولدانلاریمیز آرتیق سولانمایاجاق.
دئمک اؤیکوموزو بیر روژ لکه‌سی کیمی یاپیشدیریب آینانین ساختاکار اوزونه،
اوی منیم یارالیم!
دئمک ایندی گئدیرسن،
منی بئله توز کیمی داغیدیب پیلله‌لرین دیبینه.

«هر شئی تامام» دئییرسن‌،
گئت!
منی ویران بیر شهر کیمی ترک ائت،
هایدی گئت!
دیشاریسی جاسوس، دیشاریسی خیانت،
سنی بیر گؤرن اولماسین، دیقّت ائت!

دوستلوق‌موش، اؤلومه یورومک‌میش، اوستونه تیتره‌مک‌میش، وفایمیش،
عشق دئدیگین، زاواللی بیر قاپینی دووارا چیرپیب چیخینجایا قدرمیش.
منه توخونماز دئییب،
سانجینی بیر کیلو راکی‌یا باسدیرسان دا گئجه یاریلاری،
اوی منیم یارالیم!
اصل سانجی، اویاندیغیندا بوتون اوتاقلاری بوش گؤرونجه توخونارمیش.

گئتمک ایسته‌ییرسن، گئت!
بیر ساواشچی اصلا وداع‌لاشماز.
دورما، گئت!
دیشاریسی دینامیت... دیشاریسی داغینتی.
بونو جیبینه قوی،
نه اولار نه اولماز!

«ائیلول» مغدورلاری‌یدیق*
کیمسه‌میز یوخ ایدی،
یارالاریمیز آمان وئرمیردی جانیمیزا.
کیمسه‌یه قییمامیشدیق اویسا، معصوم ایدیق.
راحاتسیز ائدیردی بیزی بو یالانچی تاریخ.
ییرتیلان بیر پلاکارد کیمی،
شهرلرین اورتاسینا قار اوچقونو ائندیردی‌ اؤفکه‌میز،
اوی منیم یارالیم!
ان آز بیر قاریشقانین اوره‌یی قدر،
ناموسلو و چالیشقان ایدی اللریمیز.

«آرتیق بیتدی» دئییرسن،
گئت!
قیریلسین قاپی-چرچیوه، قیریلسین بو شوشه!
سوروشما، گئت!
دیشاریسی قورخو، دیشاریسی ایزدحام،
بیلیرم، سنی ووراجاقلار بو آخشام.

نه چوخ ایتگی وئردیک اوست-اوسته!
نه چوخ آرخاداش ایتیردیک بو توزلو یولجولوقدا!
کیملیگی تثبیت ائدیلمه‌میش نه چوخ جسد ووردو!
زئیتون گؤزَلی آخشاملاریمیزی!
بؤیوک اوتوپیالار و بؤیوک داغلار کیمی،
ایچریدن چوروموشوک دئمه،
اوی منیم یارالیم!
هر گلن اؤلوم یازمیش،
هر گئدن آیریلیق ایشله‌میش بو طالعسیز دزگاهیمیزا.

اؤزونو آختاریرسان، گئت!
ایچینده منی باریندیرمایان،
آبدال بیر حیات قور!
قالما، گئت!
دیشاریسی باروت، دیشاریسی دوستاقچی.
یئنه بیر تک من اولورام سنه پارچالانان.

دئمک ایندی گئدیرسن،
سونوندا بیزی ده ییخیر بو قانجیق زلزله.
دئمک ایندی گئدیرسن،
ییخیلان بیر دووار کیمی،
عؤمرومه دئوریله-دئوریله.
دئمک مجبوری یؤنلرین،
آیریلیغی گؤسترن او عدالتسیز قووشاغیندا،
اوی منیم یارالیم، مارالیم!

دئمک ایندی گئدیرسن،
و منه بیر تک سئچه‌نک قالیر:
«گوله-گوله... گوله-گوله!»...

منی اؤلدورورسن، گئت!
قالماسین سنده قهریم،
قالماسین دردیم.
باخما، گئت!
باشیمی یومروقلاییب آرخانجا‌ آغلاسام،
نامردَم.

#یوسوف_خیال‌اوغلو
* حاقسیزلیغا اوغرامیش
#شعر_اوجاغی
@SheirOcagi

▫️بدنده باش نه‌دیرسه، ایماندا دا صبر اودور.

#علی‌بن‌ابیطالب(ع)
#شعر_اوجاغی
@SheirOcagi

▫️اینسان هئچ بیر شئی بیلمیر.
«حیات» آدلانان بیلمه‌جه‌یه نه دینده، نه فلسفه‌ده، نه ده عئلمده جاواب تاپماق مومکون دئییل.

📚 داهی
#تئودور_درایزر
#شعر_اوجاغی
@SheirOcagi

▫️ایکی حؤکمدار 19

...لیلا بایاقدان بری،
گزیر بوتون شهری.
آنجاق رفیقه‌سی ده،
گؤزدن بوراخمیر اونو.
ایزله‌ییر اؤز دوستونو،
بئله آغیر گونونده.

مدرسه‌نین اؤنونده،
گلیب لئیلا دایانیر،
اؤتن گونلری آنیر.
سسله‌نیر قولاغیندا،
بیر اینیلتی، بیر اَنین.¹
او اؤپور کاندارینی،²
اونا تانیش حوجره‌نین.
نظرلری ایچَری،
سانجیلیب دورور نه‌دن؟
محّمد'ی سوروشور،
ائله‌ بیل او، حوجره‌دن.

ائولرینین یانیندان،
اؤترکن یانا-یانا،
اؤتَری نظر سالیر،
او، بالاجا ائیوانا.
گلیب چیخیر نهایت،
بالاجا باغچاسینا.
سئویملی محمّدین،
محبّتی اینله‌ییر،
قلبینده حزین-حزین.
پنجره‌نین اؤنونده،
او، دایانیر لال کیمی.
گؤردوکلری گؤرونور،
گؤزونه خیال کیمی:

اودور، شاعیر اوتورموش،
بالاجا میز دالیندا.
قوش للـه‌یی الینده،
بیر دونیا خیالیندا.
یازیر، پوزور... اریییر،
اؤنوده‌کی شام کیمی.
- «آه!... او یازیر، او یازیر،
یقین منیم عشقیمی.»
دئیه، لئیلا دوشونور:
-«خئیلی کئچمیش گئجه‌دن،
یاتماییبسان هله سن.
منیم بؤیوک شاعیریم،
«آه!» یازیر، «آمان!» یازیر.
او، «شبِ هجران» دئییر،
او «شبِ هجران» یازیر.
زیلله‌ییب گؤزلریمی،
پنجره‌نه باخیرام.
گولوم! سنه باخیرام.
محبّت ساپیمیزا،
ووروبدو بیر کور دویون.
باخ، بو ساعات، عشقینی-
کاغیذلارا تؤکدویون،
سئوگیلین دوروب سنین،
اؤنونده پنجره‌نین.
سنین‌سه خبرین یوخ.
منیمله بیرجه آنلیق،
گؤروشونه سن یقین،
حیاتینی وئرردین.

باشا دوشمک اولماییر،
گردیشی، ائی سئوگیلیم!
ترسینه‌دیر دونیانین،
هر ایشی، ائی سئوگیلیم!
سنی چوخ سئودیگیمدن،
بوردان گئتمه‌لی‌یم.
لکه‌لی بیر آد سنه،
ایسته‌میرم یوک اولسون.
قوی سنین بؤیوک آدین،
همیشه بؤیوک اولسون!»
دئیه، دوغما شهری،
گئجه ترک ائتدی لئیلا،
کربلالی دوستونا،
قوشولوب گئتدی لئیلا.

#بختیار_واهابزاده
¹- سیزیلتی، ناله (Ənin)
²- قاپی آغزی، آستانا
#شعر_اوجاغی
@SheirOcagi
سون

▫️بیر یئرده پیسلیک وارسا، اوراداکی هر کس بیرآز گوناهکاردیر.

📚 سون اوتاق
#زولفو_لیوانئلی
#شعر_اوجاغی
@SheirOcagi

دیالوق

▫️هر کسین بو دونیادا بیری واردیر، کی یوخدور.

📽 Mary and Max انیمیشن
2009 استرالیا
#آدام_الیوت
#شعر_اوجاغی
@SheirOcagi

‍ ▫️آرتیق قلبیم یوخ.

آرتیق قلبیم یوخ،
آغلادیغیمدا سنه.
دوشوندویومده سنی،
آرتیق قلبیم یوخ.
سنی آنلادیرکن بیری‌لرینه،
آتمیر قلبیم.
آتمیر قلبیم،
سنی رؤیالاریمدا گؤردویومده.
ایسته‌دیگین کیمی ائتدیم،
آرتیق قلبیم یوخ.
کیچیک بیر اوشاغا وئردیم اونو،
اویونجاق نییّتینه.
فیرلادیب آتدیم،
دویورسون قارنینی دئیه،
بیر کوچه کؤپه‌یینه.
سودا سَکدیردیم،
بیر ساخسی پارچاسی کیمی،
و گؤزله‌دیم باتماسینی.
گؤزله‌دیم باتماسینی،
یانان بیر گمی،
نئجه آغلایاراق دنیزه تؤکولورسه.

ایسته‌دیگین کیمی ائتدیم،
آرتیق قلبیم یوخ.
آرتیق قلبیم یوخ،
باخدیغیمدا کؤهنه رسیملره.
سنه داریخدیغیمدا،
ایضافه قالمیش بیر قلبیم یوخ،
یوخ!

#کیچیک_ایسکندر
#شعر_اوجاغی
@SheirOcagi

▫️داغلار اؤلکه‌سیدی سینه‌میز بیزیم.

بلکه قان‌دی آخیر، یئرآلتی چایلار،
بلکه یئرین آلتی دامار کیمی‌دی.
گؤی اوزو آللاهین اوووجلاری‌دی،
اولدوزلار اووجوندا قابار کیمی‌دی.

گؤیدن قیریلیبدی نننی‌میز بیزیم،
حسرتین یاشی‌دی سینّیمیز بیزیم،
داغلار اؤلکه‌سی‌دی سینه‌میز بیزیم
نه اولسون، باخاندا هامار کیمی‌دی.

گوللـه توشلاماغا نه تیردی قوشلار!
قوی گیریم آلتینا، چتیردی قوشلار!
وطندن بیر مکتوب گتیردی قوشلار،
ائله بو قوشلار دا چاپار کیمی‌دی.

#علیزاده_نوری
#شعر_اوجاغی
@SheirOcagi

▫️هامیمیزین بؤیوکلوک ماسکامیز آلتیندا محبّته، باغیشلانماغا، عشقه مؤحتاج و یالنیزلیقدان قورخان بیر اوشاق وار.

📚 عشقین سیرّی
#آلن_دوباتن
#شعر_اوجاغی
@SheirOcagi

▫️بیرینه قارشی سؤیله‌نن سؤزو دینله‌ین، او سؤزو سؤیله‌ین کیمی‌دیر.

#علی‌بن‌ابیطالب(ع)
#شعر_اوجاغی
@SheirOcagi

▫️پادشاهِ مُلک، دینار و دِرَم رُشوَت وئریب،
فتحِ کشور قیلماغا ائیلر مهیّا لشکری.

یوز فساد و فتنه تحریکی‌یله بیر کشور آلیر،
اول دخی آثارِ امن و استقامتدن بری.

گؤسته‌رَن ساعتده دؤورانِ فلک بیر انقلاب،
هم اؤزو فانی اولور، هم لشکری، هم کشوری.

گؤر نه سلطانام منِ درویش، کیم فیضِ سخن،
ائیله‌میش اقبالیمی آثارِ نُصرت مظهری.

هر سؤزوم بیر پهلوان‌دیر کیم، تاپیر تأییدِ حق،
عزم قیلدیقدا توتار تدریج ایله بحر و بری.

هاردا کیم عزم ائتسه، مرسوم و مواجب ایسته‌مز.
هانسی مولکو توتسا، دَیمز کیمسه‌یه شور و شری.

پایمال ائتمز اونو آسیبِ دؤورِ روزگار،
ائیله‌مز تأثیر اونا دؤورانِ چرخِ چنبری.

قیلماسین دنیادا سلطانلار منه تکلیفِ جود،
بس دورور باشیمدا توفیقِ قناعت افسری.

هر جهتدن فارغم عالمده، حاشا کیم، اولا-
رزق اوچون اهلِ بقا، اهلِ فنانین چاکری.

#حکیم_ملامحمد_فضولی
#شعر_اوجاغی
@SheirOcagi

▫️بوتون دونیا اوچون سیرادان بیر آدام اولا بیلرسن، لاکین بعضیلر اوچون سن بیر دونیاسان.

#گابریل_گارسیا_مارکز
#شعر_اوجاغی
@SheirOcagi

▫️نه غریبه‌دیر! دئییل‌می؟
سئودیگیمیز اینسانین هر یالانیندا بیر دوغرو، سئومه‌دیگیمیز اینسانین هر دوغروسوندا بیر یالان آختاریریق.

📚 جینایت و جزا
#فئودور_داستایئوسکی
#شعر_اوجاغی
@SheirOcagi

▫️عزیزینم، تپه‌نی
تیکان باسیب تپه‌نی.
«تکاب»ا چئویردیلر،
دوغما «تیکان‌تپه»نی.

عزیزیم، بؤیوک قالا،
کیمی کؤچه، کیم قالا.
«شاهین‌دژ» نه دئمک‌دیر؟!
مین یاشا «سایین‌قالا!»

تورپاق بیزه آنادیر،
اؤزوم باغی قانادیر.
«پیرانشهر»ه آلدانما!
اصیل آدی «خانا»‌دیر.

اوردا واردیر ایکی چای،
بیر-بیری‌یله اکیزتای.
«میاندوآب» تانیمام،
نه گؤزل‌دیر «قوشاچای»!

اووچو اووو بیَندی،
اونا آتدی کمندی.
«بوکان» نه‌دیر، بیلمه‌رم،
اسکیدن‌دیر «بَی‌کندی».

دولدور ایچَک، آرخاداش!
کئف‌لنَک یاواش-یاواش.
همیشه بیر سس‌لنر،
قارا اوزوم، «سار‌ی‌داش»

گلدیلر بیزه قوناق،
دئدیلر، قویون قالاق!
سونرا «مهاباد» اولدو،
او گؤزل «سویوق‌بولاق».

گؤیلرینده مین اولدوز،
قیشدا یئری قارلی بوز.
«نقده»دن نه چیخار؟
اورانین آدی «سولدوز».

گل چیخاق داغا اووا،
کیم اوولایا، کیم قووا؟
«اشنویّه» تانیمام،
ازل آدی «اوچ‌نووا».

جنوب همن گونئی‌دیر،
شمال همن قوزئی‌دیر.
«شبستر» یئنی آددیر،
قدیم آدی «گونئی»‌دیر.

هم اویان، هم اویاندیر!
حاقسیزلیغی دایاندیر!
«بستان‌آباد» یئنی‌دیر،
دوغما آدی «اوجان»دیر.

قیرقووول دلی‌سوودور،
آمّا گؤزل بیر اوودور.
اورا «مشکین‌شهر» دئییل،
دقیق آدی «خییو»دور.

کیشمیشی نه دادلی‌دیر!
مرد ایگید اؤولادلی‌دیر.
«ملکان» نه‌یه لازیم؟
«ملیک‌کندی» آدلی‌دیر.

اویان سویداشیم، اویان،
حاقّینا دیرَن، دایان!
«آذرشهر»ه نه گرک؟
نه گؤزل‌دیر «توفارقان»!

سای‌هاسای کی قورتارار،
آختاران آرار، تاپار.
اوزاق دئییل خالقیمیز،
او آدلاری قایتارار.

#رسول_قدیری
@SheirOcagi