▫️ویرگول‌لرله بؤلونموش صحیفه‌لر دولو سؤزلرله باش-باشایام و آنلاییرام کی، نؤقطه قویولمایاجاق بیر چوخ شئی وار بو حیاتدا....

📚 گونش و اونون چیچکلری
#روپی_کائور (هیندوستانلی شاعیر و یازار)
#شعر_اوجاغی
@SheirOcagi

▫️حیاتیم، پالچیقدان و درینلیکدن عیبارت ایدی، آما من او قارانلیق سولارین بیر پارچاسی دئییلدیم. او سولارین ایچینده بیر وارلیق ایدیم...

📚 سیرسه
#مادلین_میلر
#شعر_اوجاغی
@SheirOcagi

▫️ایفاده ائدیلمه‌میش دویغولار اصلا اؤلمز. جانلی‌-جانلی باسدیریلیب سونرادان چیرکین شکیل‌لرده اورتایا چیخیر...

#زیگموند_فروید
#شعر_اوجاغی
@SheirOcagi

سئودییی شهید اولان، خانیملارا

▫️یاغیشلار یاغمادان دا ایسلانیر شهید قبیرلری...
و قیزلار شهید شکیللرینی سئویر‌...
ایندی... قیزلار اوغلانلارا چیچک آلیر-
اونلارین آد گونونده،
ایلک گؤروش گونونده،
یا ان عادی گونده.
لچک‌لرینده گؤز یاشلاریندان شئه‌لر،
شهید قبیرلرینین اوستونو اؤرتور چیچک‌لر.
ایندی حسرتین بیتمه‌دییی یئرلرده،
بنؤوشه قیزلار
هر گئجه شهیدلره مکتوب یازیر،
و...
هر شهید اؤز سئودییینین یازدیغینی
گؤیلردن اوخویور.
گؤیلر «سئویرم» سؤزو قوخویور،
گؤیلر یئرلره شهیدلرین نورونو سپیر،
قیزلار قیرمیزی لئنتلی باش داشلارینا ساریلاندا
شهیدلر کولک‌لرین گتیردییی
قیز ساچلارینین قوخوسوندان اؤپور...

#اسمیرا_مئهی‌قیزی
#شعر_اوجاغی
@SheirOcagi

▫️اینسان اؤزو ایله صمیمی دئییل. اونا گؤره ده اؤزونو باشا دوشمه‌مه‌سیندن شیکایت‌لنمه‌مه‌لیدیر...

📚 بو شهرده کیمسه یوخدور
#رؤوشن_عبدالله‌اوغلو
#شعر_اوجاغی
@SheirOcagi

▫️ ایللر سونرا اؤیرندیم کی، قیشقیریب-باغیرماغا احتیاج یوخدور. سسینی ائشیتمک ایسته‌ینه بیر فیسیلتی‌ن یئتر...

#فرید_فرجاد
#شعر_اوجاغی
@SheirOcagi

▫️اوشاقلیقدا من اؤزومو بیر آری پته‌یی کیمی خیال ائدیردیم: چئشیدلی ساده و عادی آداملار بال آریلاری کیمی حیات حاقّینداکی اؤز بیلیک و فیکیرلرینین بالینی بورایا گتیریر، هر کس سخاوتله منیم روحومو بیر شئی‌له زنگین‌لشدیریردی. چوخ زامان بو بال چیرکلی و آجی اولوردو، لاکین هر جور بیلیک هر حالدا یئنه ده بال‌دیر...

📚 اوشاقلیق
#ماکسیم_گورکی
#شعر_اوجاغی
@SheirOcagi

▫️ بیز ائله بؤیوموشوک، ائله تربیت اولموشوق کی، حتّی سئوگی بئیینه عایید ائدیلیر.
سئوگی اساساً اوره‌یه مخصوصدور، آما بیزیم توپلوم اورکدن یان کئچیر، چونکی اورک منطیقلی دئییل، اورک راسیونال دئییل.
بئینه ائله تربیت وئریلیب کی، منطیقلی اولمایانی سهو حساب ائدیر، ایرراسیونال اولان هر شئیی یانلیش بیلیر. بئینه گؤره منطیقلی اولان دوزگوندور‌.
بیزیم تربیت پروقرامیمیزدا اوره‌یه یئر یوخدور، هر شئی بئیین اوچوندور. اورک همیشه آز قالا وارلیغیمیزدان اوزاقلاشدیریلیب، سوسدورولوب. اوره‌یه، بؤیومک اوچون ایمکان وئریلمیر، اونا اؤز پوتانسییئلینی فعّال‌لاشدیرماق اوچون شراییط یارادیلمیر...

📚 قیزیل کولچه‌لر
#اوشو
#شعر_اوجاغی
@SheirOcagi

اوشاق شعری

▫️توملار*

بیر استکان توم
اکدیم تورپاغا.
سونرا باشلادیم
من داریخماغا.

کئچدی آیلاریم
کئچدی ایللریم،
نه واخت چیخاجاق،
توملاریم منیم؟

ائشدیم تورپاغی
گؤردوم توملارین
یاریسی یوخدو.
یاریسینین دا
الی چیخیبدی.

گؤردوم یاریسی
آیاق آچیبلار.
او بیرلری ده،
یقین قاچیبلار...

#قشم_نجف‌زاده

* توخوم (Tum)
#شعر_اوجاغی
@SheirOcagi

▫️... سؤزون اخلاقلا ایلگیسی یوخدور.
اخلاقا چوخ باغلی اولان، آنجاق یاخشی داورانیشلاری اولمایان آداملارلا قارشیلاشمیشام من.
و هر گون داها دا چوخ آنلاییرام: «دوغرولوغون قانونا احتیاجی یوخدور...»

📚 سیزیف افسانه‌سی
#آلبر_کامو
#شعر_اوجاغی
@SheirOcagi

▫️آپار منی!

بیر عؤمورم، یازیم سنسن،
بیر نغمه‌یم، سازیم سنسن،
بیر اوره‌یم، آرزیم سنسن،
هارا گئتسن آپار منی!

بیر چیچه‌یم، شئهیم سنسن،
بیر صؤحبتم، نئییم سنسن،
بیر بوداغام، مئهیم سنسن،
هارا گئتسن آپار منی!

بیر لایلایام، ‌دونیام سنسن،
بیر جوت گؤزم، رؤیام سنسن،
بیر سئوگی‌یم، سئودام سنسن،
هارا گئتسن آپار منی!

بیر باغچایام، باریم سنسن،
بیر ذیروه‌یم، قاریم سنسن،
بیر سینه‌یم، تاریم سنسن،
هارا گئتسن آپار منی!

گئنیش گؤیلر قۇشا قالسین،
آیریلیق داغ-داشا قالسین،
ایزلریمیز قۏشا قالسین،
هارا گئتسن آپار منی،
آپار منی!

#مدینه_گولگون
#شعر_اوجاغی
@SheirOcagi

▫️بیر ایسته‌ییم وار ساده‌جه سندن:
اونون عطرینی آل گتیر،
اونون ساچلارینی آل گتیر،
حتّی مومکون‌سه اونو آل گتیر منه، کولک!

#جمال_ثریا
#شعر_اوجاغی
@SheirOcagi

دیالوق

▫️- آما اونون لیاقتی بو دئییلدی.
+ لیاقت‌می؟ یادیندا قالسین، کیمین نه‌یه لاییق اولدوغونو آراشدیرماق ایسته‌سن، چوخ یاخیندا عؤمرونون قالانینی اوتوروب دونیانین اینسانلارینین تک‌-تکینه آغلارسان.

📺 Game of Thrones
2011-2019
#شعر_اوجاغی
@SheirOcagi

▫️الویداع!

گؤروشدوک نه چتین، آیریلدیق نه آسان!
هارداسان، حیاتیم؟
وارمیسان؟ یوخموسان؟
من سنی ایزله‌دیم، گوناه تک گیزله‌دیم.
هر سحر، هر آخشام، هر گوندوز، هر گئجه گؤزله‌دیم.

هارداسان اولدوزلو گئجه‌لر؟
الویداع، هارداسان؟!
منی نییه آنلاییب-
منی دۇیمۇرسان نییه؟

سنین خیالین منی،
گؤیلره قالدیریر؛
دوشوردور، چیرپیر بو یئرلره.
بیز یاراشمیریق بو دونیایا
بیز یاراشمیریق یئرلره و گؤیلره.

الویداع او گونلر، اولدوزلو گئجه‌لر،
الویداع!

#آنار_رضایئو
#شعر_اوجاغی
@SheirOcagi

▫️«آنار»ا

هیجرانین آغیردیر، دؤزه بیلمیرم،
او اوجا داغلاردان ائن گل، آنار'یم!
کؤرپه آیاقلارین یامان یورولوب،
سینه‌مین اوستونده دینجَل، آناریم!

سنسیز نه گئجه‌م وار، نه ده گوندوزوم،
سن گئدندن بری گولمه‌ییب اۆزۆم.
گل، اۇزۇن کیپریکلی کؤرپه‌جه قوزوم،
آناریم، آناریم، گؤزل آناریم!

سن جئیران‌گؤزلوسن، چاتماقاشلیسان،
تایین-توشون یوخدور، یار-یولداشلیسان.
بلکه مندن آیری گؤزو یاشلیسان،
اولموش بو آیریلیق انگل، آناریم!

داغلارین سینه‌سی لاله، بنؤوشه،
یایلاق‌لار قوناغی اول سن همیشه!
قویما بو داغلارا بیر خزان دوشه-
تؤکوله یوللارا خزل، آناریم!

#نیگار_رفیع‌بیلی
#شعر_اوجاغی
@SheirOcagi

حئکایه

▫️توپ

صمد بیر سیقارئت یاندیریب قاپییا چیخدی. کؤهنه کؤتویون اوستونده اوتوروب قولتوق عصاسینی سازلاماغا باشلادی. غازی ایدی، موحاریبه‌ده توپ کوماندیری اولموشدو، دؤیوشده ساغ آیاغینی ایتیرمیشدی. بالاجا اوغلو عاکیف ده یانیندا ایدی. گاه آتاسینین «آغدام»دان جیبینده گتیردیگی بالاجا رئزین توپلا اویناییر، گاه دا گلیب عصایا سیغال چکیردی. آرادا دا آتاسیندان «قاراباغ»دا نئجه دؤیوشدویونو دانیشماغینی ایسته‌ییردی. صمد ده اوغلونون گؤزلرینه باخیب گولومسه‌ییردی: «موحاریبه بیتدی، بالاسی!»

یئنی قونشو جیپ ماشینی ایله حیَطدن چیخدی. «پرۏکۇرۇر»* ایدی. ماشیندان دوشوب گه‌وَزه بیر طرز آلاراق، گئندن ماشینین ساغینا، سولونا کئچیب سوزمه‌یه باشلادی.

بالاجا عاکیف توپو هاوایا آتدی. توپ ماشینین شوشه‌سینه توخوندو. پروکورورون اوزو زهریمارا دؤندو. اوزونو صمده توتوب باغیردی:
«کوچویونو قیچینا باغلا!»
صمد اختیارسیز سول آیاغینا باخدی، سونرا بالاجا عاکیفین گؤزلرینه باخیب گولومسه‌دی: «موحاریبه بیتمه‌ییب، بالاسی!»

#منصور_حسن‌زاده
* ساوجی، مدّعی‌العموم
#شعر_اوجاغی
@SheirOcagi

▫️عئیبی یوخ!
سنین منه ائتدیگین کیمی،
بیر قادینین یئرده آغلار بوراخدیغی
ایلک یولدان کئچه‌نه، وئره‌جه‌یم اوره‌ییمی.

#محمود_درویش
#شعر_اوجاغی
@SheirOcagi

▫️منلی ده، منسیز ده بو دونیا واردی،
گؤی بئله گؤی ایدی، قار بئله آغدی.
بو دونیا ائله بیر نغمه‌لی والدی،
منلی ده، منسیز ده اوخویاجاقدی.

چیخیب بو دونیانین یولونا من ده،
دؤنوب دورمالی‌یدیم بیر آستانادا.
اوفوق سارالاندا، تۏران دوشنده،
سسله‌مه‌لی ایدیم سنی آستادان.

بئله اولمالی‌یدی یقین کی، بئله،
قلبیم انتظاردا دؤیونمه‌لی‌یدی.
سونرا بو وفالی دؤیونتولرله،
یئنی گؤروشه‌جن اؤیونمه‌لی‌یدی*.

عهد-ایلقار تۇمۇیدۇ بو دؤیونتولر،
من کئچن یوللاردا گؤیرمه‌لی‌یدی.
سینه‌می بیر داشا سؤیکه‌سم اگر،
او دا اینسانلاشیب کؤیرَلمه‌لی‌یدی.

بئله اولمالی‌یدی یقین کی، بئله،
چیینیمه بو یوکو گؤتورمه‌لی‌یدیم.
عاغلیمین حؤکمونو من بیله-بیله،
قلبیمین حؤکمونده ایتیرمه‌لی‌یدیم.

بو گون ده بئله‌جه... بیر دؤنه‌جکده،
سئوگی محکمه‌سی قورولمالی‌یمیش.
بو شرط‌لر، او شرط‌لر... مشعل اورَکده،
محبّت بیر ایشؽم قۏر اولمالی‌یمیش.

بیز آیاق ساخلادیق ناحاقجا یئره،
محبّت یولونا چیخدین، دایانما!
جسارت گرکدیر ایلک سئون‌لره،
یالاندی کول اولماق، یالاندی یانماق.

#ممد_آراز
* فخر ائتمک (Öyünmək)
#شعر_اوجاغی
@SheirOcagi

▫️هه، سنه احتیاجیم وار.
سن، اونونلا بیر بولودون رنگی حاقّیندا دانیشا بیلدیگیم تک اینسانسان.

#ولادیمیر_ناباکوف
#شعر_اوجاغی
@SheirOcagi

▫️«ایلیشکیمیزه بیر سۆره آرا وئرک» جومله‌سینین ترجومه‌سی، «سندن یاخشیسینی تاپسام، نه اعلا! تاپا بیلمه‌سم سنه گئری دؤنه‌رم»‌دیر.

#جمال_ثریا
#شعر_اوجاغی
@SheirOcagi