▫️اللرین ساچیمدا دنی یاندیریر.

جنّتده اؤزونه یووا آختاریب
منیم اوره‌ییمه قونان بختوَر!
سنی گتیرمکده دونیایا بئله،
واللاه، بهشت‌لیک‌دیر آنان، بختوَر!

قوشوم قونماسا دا اؤزگه چپَره،
خطرینه دَیمیشم بلکه مین کره.
منی تعریفله‌ییب ائوده‌کی‌لره،
هر گون گوناهیمی دانان بختوَر!

اللرین ساچیمدا دنی یاندیریر،
ذیروه‌لر دومانی، چنی یاندیریر.
منیم یاندیقلاریم سنی یاندیریر،
منه هامیدان چوخ یانان بختوَر!

#علیرضا_حسرت
#شعر_اوجاغی
@SheirOcagi

▫️هاراسیندان قوجاقلاییم داغلاری؟

سن گلنده دومان ایدی ذیروه‌لر،
باش اَیمیشدی داغلار دا سن گئدنده.
هاراسیندان قوجاقلاییم داغلاری
ذیروه‌لردن بو دومان-چن گئدنده؟

ناز-نعمت‌دی، قیزیل تاجدی سونبوللر،
بو دونیایا ایشیق ساچدی سونبوللر.
یاخاسینی جیریب آچدی سونبوللر،
دیمدیگینده قوشلارین دن گئدنده.

یاوانلیغی بو غم-غوبار غریبین،
سوفره‌سینده آیری نه وار غریبین؟
دونیا گلر اَینینه دار، غریبین،
اؤزگه یوردو‌ اؤزونه کند ائدنده.

#علیرضا_حسرت
#شعر_اوجاغی
@SheirOcagi

▫️خاطیره‌لر عشقه بلَک آپاردی.

سون نغمه‌یله آد قازاندی قو عشقدن،
یاز آغیزی سیغماز آرخا سو عشقدن.
پروازلانیب اوچان قوش'دوم بو عشقدن،
یاخشی سالدین منی بنده شکلینه!

داغ بئلینه دولاماغا کندیر یوخ،
سوفره‌میزده شور قحَط‌دیر، پئندیر یوخ.
اوجاق کئچیب، کول سوورولوب، تندیر یوخ،
چؤرک عطری چیخماز کونده شکلینه.

خاطیره‌لر عشقه بلک آپاردی،
قانادیمی للَک-للک آپاردی.
اللریمدن آلیب کولک آپاردی،
یئر تاپمادیق بو وطنده شکلینه.

#علیرضا_حسرت
#شعر_اوجاغی
@SheirOcagi

▫️اولماسا

بیر قالا من تیکیم، بیر قالا سن تیک!
هر یاندان گؤرونسون بو ذیروه، بو دیک!
آزادلیق اینسانا وئرمز خوشبختلیک-
خوشبختلیک اؤزو ده آزاد اولماسا.

سولغون چیچک‌لری شئه سحر توتار،
هر کندین الیندن بیر شهر توتار.
یئر منی، گؤی منی نه تهر توتار-
اوستومده بو شؤهرت، بو آد اولماسا؟!

ائه، گؤزدن، کؤنولدن کنار بو داغلار،
بیر غریب آهیندان یانار بو داغلار.
اؤزونو بختوَر سانار بو‌ داغلار،
داغلارا بو دومان، چن یاد اولماسا.

#علیرضا_حسرت
#شعر_اوجاغی
@SheirOcagi

▫️للک یئری گؤینه‌ییر.

بو گوللـه‌نی کیم توشلادی، کیم آتدی؟
کیم آتدی‌سا، گؤر الینه نه چاتدی؟
هارا باخسان، من سالدیغیم قاناددی،
هارا باخسان، للک یئری گؤینه‌ییر.

کیرپیگیمده اؤز یئری وار بو نمین،
بو سئوگیدن اولمادیم کی هئچ امین.
نه تندیری، نه ساجی وار ننه‌مین،
اللرینده الک یئری گؤینه‌ییر.

توستوسونه بوروندویوم اوجاغین،
نه چیرپیسی، نه کؤزو وار، قوچاغیم!
آیریلیغا بئشیک اولان قوجاغین،
ال‌دَیمه‌میش بلک یئری گؤینه‌ییر.

#علیرضا_حسرت
#شعر_اوجاغی
@SheirOcagi

▫️غریب اوجاغینین ایستیسی اولماز.

سرحد تئللری‌دیر کؤک‌له‌دیگیم ساز،
دومان دا داغلاردا گؤرونور آز-آز.
غریب اوجاغینین ایستیسی اولماز،
گرک کول آلتیندا کؤز ساخلایاسان!

دوروشو باشقادیر بیزده داغین دا،
شاماما رسمیسن قونشو تاغیندا.
نه وار اَییلمه‌یه یار قاباغیندا؟
گرک اوره‌یینی دوز ساخلایاسان!

آلیب آغوشونا یئنه سو، آرخی.
یاندیریر آیریلیق قورخوسو، آرخی.
هایاندان باغریما باسیم بو آرخی-
اوستومده یالاندان گؤز ساخلایاسان؟

#علیرضا_حسرت
#شعر_اوجاغی
@SheirOcagi

▫️آهیم عشقه سون تورکودور.

خاطیره‌لر آینا توتوب،
بیزه بو سفردن ائله.
قونشو قیزی! وئر الینی،
کئچک بو چپردن ائله!

عشقه کؤنول وئرن گولور،
باغدا چیچک درن گولور.
اوزومه پنجره‌ن گولور،
چکیلنده پرده‌ن ائله.

دومان-چن داغین کورکودور،
اووچو قوشلاری هورکودور.
آهیم عشقه سون تورکو'دور،
اوخویارام هردن ائله.

#علیرضا_حسرت
#شعر_اوجاغی
@SheirOcagi

▫️گلدی بختور آیریلیق.

گلدی غمین شن گؤزَلی،
گلدی بختوَر آیریلیق.
بو قدر عشقین ایچینده،
اولماز بو قدر آیریلیق.

نه اوجاق، نه پیردی ائله،
ها سایاسان، بیردی ائله.
کیمینه خئییردی ائله،
کیمینه ده شر آیریلیق.

بو دوروشا، بو بویا باخ،
باخسان، آد قویا-قویا باخ!
تویا باخ آللاه، تویا باخ،
گلین عشق‌دیر، ار آیریلیق!

#علیرضا_حسرت
#شعر_اوجاغی
@SheirOcagi

▫️عجب قول گؤتوروب یول آیریجلاری!

بو سورو اوبادان، اویماقدان کئچیب،
ایتن قوزولاری سایماقدان کئچیب.
داها بالدان کئچیب، قایماقدان کئچیب،
سن بیزیم طرفه شور'ا گلرسن.

بیر شیرین یوخونون گؤروندو بویو،
غریب بئشیگی‌دیر قوجاغیم؛ اویو!
دؤشونه یاتماسا خزرین سویو،
آرازا گؤز قویوب کور'ه گلرسن.

باغرینا باسیبدیر ذیروه‌لر قاری،
دومان قاییتمامیش آیریلاق باری!
عجب قول گؤروتوب یول آیریجلاری!
غوربتده چکیلسم دارا، گلرسن.

#علیرضا_حسرت
#شعر_اوجاغی
@SheirOcagi

▫️اوشاقلیغیم ال ائله‌ییر اوزاقدان.

داغلار منی قارشیلایان یئرده‌یم،
کول-کوس باسمیش جیغیرا باخ، یولا باخ!
اوشاقلیغیم ال ائله‌ییر اوزاقدان،
هونَرین وار، کؤورَل، دولا-دولا باخ!

قول گؤتوردوم، باخان دا یوخ اوینوما،
خاطیره‌لر سیغیندیلار قوینوما.
قهَرلنن کندیمیزین، بوینوما-
غریب-غریب دولادیغی قولا باخ!

داغ اینجیییب، دومان یئرده سئیره‌لیب،
دن سووولوب، سامان یئرده سئیره‌لیب.
تای-توشلاریم یامان یئرده سئیره‌لیب،
آی «علیرضا» ها ساغا باخ، سولا باخ!

#علیرضا_حسرت
#شعر_اوجاغی
@SheirOcagi

▫️وطن دادی

بیر آیریلیق چئشمه‌سی‌دیر،
گؤزومده‌کی سو، غوربتده.
عجب وطن دادی وئریر،
گؤردویوم یوخو غوربتده.

دالغالاری سایا-سایا،
عکسیم دوشدو آخان چایا.
یوز بئله عؤمور یاشایا،
اوخوماز کی قو، غوربتده.

ساچلاریمدا دن سئچمیشم،
بیر روحسوز بدن سئچمیشم.
گل! سنه وطن سئچمیشم-
اوره‌ییمی بو غوربتده.

#علیرضا_حسرت
#شعر_اوجاغی
@SheirOcagi

▫️من «گونش» دئمیشم سئوَن قادینا.

ساچیمین قیرووو توتار گؤزونو،
سنی گؤزله‌دیگیم یئره گلرسن.
دوشوب آرخاسینجا خاطیره‌لرین،
اؤزونه درد وئره-وئره گلرسن.

من «گونش» دئمیشم سئوَن قادینا،
یئر ده ساخلامادین دوشَم یادینا.
بیر سئوگی زوّاری یئتر دادینا،
نازلانا-نازلانا پیره گلرسن.

چکیبدیر چارمیخا نظر کؤنلومو،
بیر غریب آهی‌یلا بزَر کؤنلومو.
دینله‌مک ایسته‌سن «خزر» کؤنلومو،
«آراز»ا اوز توتوب «کور»ه گلرسن.

#علیرضا_حسرت
#شعر_اوجاغی
@SheirOcagi

▫️بیر نغمه اؤیرندیم هر یالقوزاقدان*

ال-آیاق ییغیشیب اکین-بیچیندن،
کۆسۆب قان آغلاییر تورپاق ایچیندن.
بیر خبر گلمه‌دی غریب کؤچوندن،
یوللار غوبارلاندی، توز-توز داریخدیم.

دؤیوشده هر اؤلوم شرف-شان یولو،
یورد سئچدیم روحلارین دولاشان یولو.
گؤردوم آپاراجاق بو تر-قان یولو،
قارالان کۆل آلتدا کؤز-کؤز داریخدیم.

سیلکینیب دوماندان، چیخیب سازاقدان،
نه گؤزل گؤرونور داغلار اوزاقدان!
بیر نغمه اؤیرندیم هر یالقوزاقدان،
بئله میصراع-میصراع، سؤز-سؤز داریخدیم.

#علیرضا_حسرت
* جاناوار- قورد
#شعر_اوجاغی
@SheirOcagi