▪️یورا بیلمز یوللار منی


گاه آراندا، گاه داغدایام
گاه چمنده، گاه باغدایام
یاخیندایام، اوزاقدایام
یورا بیلمز یوللار منی

گاه باهار، گاه قارلی قیشام
بو حیاتدان دویمامیشام
سفرده‌یم سحر، آخشام
یورا بیلمز یوللار منی

گاه آنالار آنام اولار
گاه بولاقلار لایلام اولار
او لایلالار دونیام اولار
یورا بیلمز یوللار منی

گاه اومیدیم چیچکله‌نر
گاه بیر گونوم ایله دؤنر
حیات دنیز، قالخار، ائنر
یورا بیلمز یوللار منی

گاه بولود تک دولار کؤنلوم
گاه تک- تنها قالار کؤنلوم
گاه بلدچی اولار کؤنلوم
یورا بیلمز یوللار منی

گاه قوشلارلا یاریشارام
گاه سئللره قاریشارام
دره ائنیب، داغ آشارام
یورا بیلمز یوللار منی

نغمه دولو بیر اوره‌یم
گاه جوشغونام، گاه کؤوره‌یم
بیر اومودلو گله‌جه‌یم
یورا بیلمز یوللار منی

بابام قورقودون سازی‌یام
ننه‌م تومروسون قیزی‌یام
زامان- زامان یاناسی‌یام
یورا بیلمز یوللار منی

ائل آرخامدیر دار آیاقدا
بیر معنا وار یاشاماقدا
دوغولدوغوم بو تورپاقدا
یورا بیلمز یوللار منی

گاه دؤنه‌رم سؤنمز اودا
آرزوم دنیز، من بیر آدا
آند ایچیرم بو حیاتا
یورا بیلمز یوللار منی

#مدینه_گولگون
@SheirOcagi

▫️بو چیچه‌یین گؤزلرینده یاشا باخ!
بو چیچه‌یی یاندیریبدیر غم اودو
زار-زار اؤتن او یارالی قوشا باخ!
بئله گئتسه آغلاداجاق بولودو

نئجه دؤزسون، آنا تورپاق بو درده؟
بوداق-بوداق یارالانیب آغاج‌لار
بیر یارالی، بیر طوفانلی سحرده،
بوداغیندان آرالانیب آغاجلار.

بو چیناردا گوللـه یئری قارالار
نئجه باخیم بو چینارا ایندی من؟
چوخ دریندیر سینه‌نده‌کی یارالار
دردلرینه قوربان اولوم آی وطن...!

#مدینه_گولگون
@SheirOcagi

▫️آپارین منی، دورنالار!

اوچون، اوچون دسته-دسته
قولاق آسین سیز بو دوستا
آلین قانادیزین اوسته
آپارین منی، دورنالار!

دؤزومومو ایللر آلیب
باغلاریم خزل له دولوب
نه زاماندیر سینه‌م اولوب،
حسرت وطنی... دورنالار!

آمان اوردا نیگاراندیر
دئمه‌یین کی یول دوماندیر
سایا سالمایین آماندیر!
دومانی-چنی، دورنالار!

چینارلاریم اییلمه‌ییب
خرمنیم وار دؤیولمه‌ییب
آپارین سیز وطن دئییب...
دیل-دیل اؤتنی، دورنالار!
آپارین منی، دورنالار...!

#مدینه_گولگون
@SheirOcagi

‍ ▫️تبریز

بیر گون‌ ده اومیدسیز یاشامادیم من،
سنی گؤره‌جه‌یم، ائی آنا تبریز!
اؤز آنا یوردونون محبّتیندن،
نه دئییم دونیادان دویانا، تبریز؟!

کیم دئییر گؤروشوم سون گؤروش اولدو؟
عؤمرونون باهاری نه واختسیز سولدو!
قلبیم حسرتیندن بوشالدی، دولدو،
آنجاق باش اَیمه‌دیم هیجرانا، تبریز!

سنین هر داشیندا آیاق ایزیم وار،
او مرد ووقاریندا یئنه گؤزوم وار،
سینه‌مده چاغلایان عهدیم، سؤزوم وار،
اوره‌ییم دؤنوبدور عومّانا، تبریز!

باهاردا باهارین عشقی‌یله یاندین،
اوزانان یول‌لارا خیلی بویلاندین،
سن چتین آیاقدا ائل‌لری آندین،
گلدی گئنیش قلبین طوغیانا، تبریز...!

#مدینه_گولگون
@SheirOcagi

▫️پاییز 🍁

یاشیل یارپاق‌لارا دوشدو قیزیل خال،
چؤل‌لره، دوزلره حزینلیک گلدی.
گؤی اوزو بیر آندا اولدو حال‌باحال،
دره‌لر کؤورَلدی، دوزلر کؤورلدی.

یئنه تنهالاشدی او بوز بولاق‌لار،
یئنه ده سویودو اوجاق داشلاری.
یئنه ده دومانا بوروندو داغلار،
اَیله‌مک اولمادی گئدن قوش‌لاری.

اَسسه ده پاییزین سرین کوله‌یی،
یئنه اولفتده‌یم طبیعتله من.
دولوب بوشالدیقجا شاعیر اوره‌یی،
آیریلا بیلمیرم بو عالمیمدن.

ماوی سولار اوسته اوزَن یارپاق‌لار،
قیزیل قاییق‌لاری آندیریر منه.
فیکریمه یادداشلار یازان یارپاق‌لار،
فیکریمی آردینجا آپاریر یئنه.

دوشوب خیالیمین کؤورک ایزینه،
کؤنلوم «بو عالمدن آیریلما» دئییر.
بولودلار دولدوقجا گؤیون اوزونه،
ساچیما، اوزومه یاغیش اله‌ییر.

یاغیشی، کوله‌یی سالماییر سایا،
باغلار اؤز باریندان سووقات باغلاییر.
کولک‌لر ائله بیل بوتون دونیایا،
بیر قیزیل پاییزین عطرینی یاییر.

بیر پاییز یاغیشی یاغدیقجا، یاغیر
پاییزی پیشوازا چیخیب یول، یوخوش.
اوره‌ییمه تزه نغمه‌لر آخیر،
ساچیما، اوزومه یاغدیقجا یاغیش...

#مدینه_گولگون
@SheirOcagi

▫️شیرین بیر لای‌لایام

داغلارین باشیندا بیتن چیچه‌یم،
هر اسن کوله‌یه باش اَیمه‌رم من.
شیرین آرزولارلا چارپان اوره‌یم،
اؤله‌رم، دؤنمه‌رم بو عملیمدن.

وطن تورپاغیندا قاینار بولاغام،
آرخام اوجا داغلار، اؤنوم گؤی مئشه.
کیم دئییر دونیادا من بیر قوناغام؟
گله‌جک نغمه‌لی سسیم، همیشه.

شیرین بیر لای‌لایام، دوغما بیر سسم،
ایستی بئشیک‌لردن اوجالاجاغام.
من نغمه دئمه‌سم، اؤته بیلمه‌سم،
او زامان، او زامان قوجالاجاغام.

بیر ائوین گلینی، آناسی‌یام من،
بیر ائوین اوجاغی-اودویام دئمک.
همیشه، همیشه یاناسی‌یام من،
همیشه چیراغیم شؤعله‌لنه‌جک.

اینانما سوسدورا زامان قلبیمی،
اینانما دئسه‌لر اؤله‌جه‌یم من!
بو ائله، بو یوردا کؤرپه قوش کیمی،
همیشه باهارلا گله‌جه‌یم من...

#مدینه_گولگون
@SheirOcagi

▫️آپارین منی دورنالار!

اوچون، اوچون دسته-دسته،
قولاق آسین سیز بو دوستا،
آلین قانادیزین اوسته،
آپارین منی دورنالار!

دؤزومومو ایل‌لر آلیب،
باغلاریم خزل‌له دولوب،
نه زاماندیر سینه‌م اولوب-
حسرت وطنی، دورنالار!

آمان اوردا نیگاراندیر،
دئمه‌یین کی، یول دوماندیر،
سایا سالمایین آماندیر،
دومانی-چنی، دورنالار!

چینارلاریم اَییلمه‌ییب،
خیرمانیم وار دؤیولمه‌ییب،
آپارین سیز «وطن» دئییب-
دیل-دیل اؤتنی، دورنالار!
آپارین منی، دورنالار...!

#مدینه_گولگون
@SheirOcagi

▫️شیرین بیر لایلایام.

داغلارین باشیندا بیتن چیچه‌یم،
هر أسن کوله‌یه باش ایمه‌رم من.
شیرین آرزولارلا چارپان اوره‌یم،
اؤله‌رم، دؤنمرم بو عملیمدن.

وطن تورپاغیندا قاینار بولاغام،
آرخام اوجا داغلار، اؤنوم گؤی مئشه.
کیم دئییر دونیادا من بیر قوناغام؟
گله‌جک نغمه‌لی سسم همیشه.

تزه دنه دولموش ساری سونبولم،
ایه‌رم باشیمی آنا تورپاقا.
سئویلن‌دیر کؤنلوم، سئون‌دیر کؤنلوم،
سئوگیدن اوره‌ییم دؤنوبدور داغا.

شیرین بیر لایلایام، دوغما بیر سسم،
ایستی بئشیک‌لردن اوجالاجاغام.
من نغمه دئمه‌سم، اؤته بیلمه‌سم،
او زامان، او زامان قوجالاجاغام.

بیر ائوین گلینی، آناسییام من،
بیر ائوین اوجاغی، اودویام دئمک.
همیشه، همیشه یاناسییام من،
همیشه چیراغیم شؤعله‌لنه‌جک.

اینانما سوسدورا زامان قلبیمی،
اینانما دئسه‌لر اؤله‌جه‌یم من!
بو ائله، بو یوردا کؤرپه قوش کیمی،
همیشه باهارلا گله‌جه‌یم من...

#مدینه_گولگون
@SheirOcagi

▫️منه بیر ناشی دئدی:
«نغمه‌نده غم-کدر وار».
افسوس کی ائشیتمه‌دی،
هارای چکن سینه‌مده،
نه‌لر، نه‌لر، نه‌لر وار!...

#مدینه_گولگون
@SheirOcagi

▫️ساری بولبول

ساری بولبول! ساری سیمده اؤتورسن،
بو فریادا گوللر دؤزمز قورخورام.
اومیدینی، اینامینی ایتیرسن،
جوشوب-داشان سئللر دؤزمز قورخورام.

ساری بولبول، ساری سیمده اؤتمه‌سن!
عؤمرون بویو، یئتر، فغان ائتمه‌سن!
سئل ده گلسه، غوربت ائله گئتمه‌سن!
گئتسن، باغلار، چؤللر دؤزمز قورخورام.

بئله ائتسن، داغ باشیندا چن قالار،
قیزیل گولون سینه‌سینی، اود قالار،
اود ایچینده، حشم اولار بوتالار،
بو آتشه، ائل‌لر دؤزمز قورخورام.

ناکام قالسین، بیر حسرتی یوز ائدن!
آیریل، آیریل بو طالعدن، یازیدان!
حسرت اوسته، حسرت دوشر تزه‌دن،
آیلار دؤزمز، ایل‌لر دؤزمز قورخورام.

سن بیر گولون عشقی‌یله دیل آچمیسان،
تانریم دئییب، قیزیل گولو سئچمیسن.
پروازلانیب اؤز باغچانا اوچماسان،
قانادیندا تئل‌لر دؤزمز قورخورام...

#مدینه_گولگون
@SheirOcagi

▫️یوخوما گلسه‌یدین...

یوخوما گلسه‌یدین اگر بیر آخشام،
دئیردیم، قوی یوخوم اولسون ابدی!
سنی چوخ گزمیشم، چوخ آختارمیشام،
باری ایتیرمه‌ییم‌ بو‌ سعادتی.

یوخوما گلسه‌یدین اگر بیر آخشام،
من چپر ائدردیم کیرپیک‌لریمی.
قویمازدیم یوخومدان کنارا سنی،
قویمازدیم یوخوما داها هئچ کیمی.

یوخوما گلسه‌یدین اگر بیر آخشام،
کؤنلومده اولانی دئیردیم بیر-بیر.
دئیردیم، حسرتدن ناخیشلی عؤمروم،
حسرتلر ایچینده اریییب گئدیر.

یوخوما گلسه‌یدین اگر بیر آخشام،
هراسان یوخوما دینجلیک‌ قوناردی.
سسینی، سؤزونو دینله‌دیکجه من،
یوخومدا چیراقلار، شاملار یاناردی...

آشکاردا گؤروشدوک سنینله آنجاق،
فقط آنی اولدو ووصالین سنین.
گئتدین، آجی-شیرین خاطیره‌لرله،
قالدی یادداشیمدا خیالین سنین.

#مدینه_گولگون
#شعر_اوجاغی
@SheieOcagi

▫️آپار منی!

بیر عؤمورم، یازیم سنسن،
بیر نغمه‌یم، سازیم سنسن،
بیر اوره‌یم، آرزیم سنسن،
هارا گئتسن آپار منی!

بیر چیچه‌یم، شئهیم سنسن،
بیر صؤحبتم، نئییم سنسن،
بیر بوداغام، مئهیم سنسن،
هارا گئتسن آپار منی!

بیر لایلایام، ‌دونیام سنسن،
بیر جوت گؤزم، رؤیام سنسن،
بیر سئوگی‌یم، سئودام سنسن،
هارا گئتسن آپار منی!

بیر باغچایام، باریم سنسن،
بیر ذیروه‌یم، قاریم سنسن،
بیر سینه‌یم، تاریم سنسن،
هارا گئتسن آپار منی!

گئنیش گؤیلر قۇشا قالسین،
آیریلیق داغ-داشا قالسین،
ایزلریمیز قۏشا قالسین،
هارا گئتسن آپار منی،
آپار منی!

#مدینه_گولگون
#شعر_اوجاغی
@SheirOcagi

▫️سن گلمز اولدون.

دئییردین، باهاردا گؤروشریک بیز.
باهار گلدی، گئتدی، سن گلمز اولدون.
داشلارامی دَیدی، سؽندؽ عهدیمیز؟
آیلار گلدی، گئتدی، سن گلمز اولدون.

دئدین، دورنالارلا گله‌رم من ده.
دورنالار قاییتدی، سن گلمز اولدون.
سارالدی یارپاقلار چؤلده، چمنده،
پاییز فصلی چاتدی، سن گلمز اولدون.

دئییردین، قاپینا قونارام قوش تک.
قوشلار جَه-جَه ووردو، سن گلمز اولدون.
یاشاماق عشقی‌یله وجده گله‌رک،
قوشلار یووا قوردو، سن گلمز اولدون.

دئدین، نغمه‌لرله دؤنه‌رم گئری،
مین نغمه اوجالدی، سن گلمز اولدون.
توکَندی عؤمرومون باهار گونلری،
کؤنلوم سنسیز قالدی، سن گلمز اولدون.

سنسیز دؤنه-دؤنه یوللارا باخدیم،
گؤزلریم قارالدی، سن گلمز اولدون.
آی منیم طالعیم، آی منیم باختیم!
سؤیله، بو نه حالدی، سن گلمز اولدون؟!

دردیمی آهسته چالدیم، سئوگیلیم!
سوسدولار چایلار دا، سن گلمز اولدون.
آخی نئجه دئییم، هئچ گلمیر دیلیم،
دئ بس قالدین هاردا، سن گلمز اولدون؟!

سن دؤنوک دئییلدین، دؤنوک دئییلسن،
یقین... ائه، نه دئییم؟! سن گلمز اولدون.
دؤزوملو اولسام دا، داریخیر هردن-
اووونمور اوره‌ییم- سن گلمز اولدون.

فقط اینانیرام، بیر گون اولاجاق،
من دئمه‌یه‌جه‌یم «سن گلمز اولدون»،
غمیم او حسرتلی گونده قالاجاق.
کیم دئییر سن خیال، یا بیر سس اولدون؟
گون گلر دئمه‌رم «سن گلمز اولدون».

#مدینه_گولگون
#شعر_اوجاغی
@SheirOcagi

▫️یوللار

حیاتدا ایکی یول وار:
بیری ال ایچی کیمی،
هاماردیر، یوخوشو یوخ،
قاری یوخ، یاغیشی یوخ.
نه دولایلاری وار کی-
دولایلاردان کئچه‌سن،
حیات سینایا، گؤره،
برک آیاقدا نئجه‌سن.
بو یول گؤز ایشله‌دیکجه،
باشدان-باشا هاماردیر.
اونون دا بیر راحاتلیق-
گزن یولجوسو واردیر.
بو یولون معناسینی،
دئیه بیلمه‌رم آنجاق.
چونکی بو هامار یولدان،
کئچمه‌میشم من هئچ واخت.

ایکینجی یول، چتین یول:
اونون دولایلاری وار،
اونون یارغانلاری وار.
بو یوللاردان باشینا،
قار یاغار، یاغیش یاغار.
بو یوللاردان توفانلار،
کسمک ایستر قارشینی.
بو یوللاردان باشلارسان،
سن حیات ساواشینی.
آیاقلارینی ازَر،
بو یوللارین داشلاری.
قطع ائتمک ایسته‌یرسن،
ذیروه‌لره اوجالان،
یوللاری، یوخوشلاری.
چکیلر یوللاریندان،
پرده-پرده دومانلار.
قارشینا بو یوللاردا،
چیخار اصیل اینسانلار...

منیم ده حیات یولوم،
هامار اولماییب اصلا.
آرزومون ذیروه‌سینه،
قالماق‌چون، اوجالماق‌چون،
من گئتمیشم او داشلی،
او یوخوشلو یوللارلا.

#مدینه_گولگون
#شعر_اوجاغی
@SheirOcagi

▫️من تنها دئییلم.

چوخ زامان دئییرلر «تنها قالما سن!
تنهالیق کؤورَلدیر اینسانی بعضاً.
تنهالیق یاراشمیر چینارا بئله،
تنهالیق یاراشمیر چیچه‌یه، گوله.
تک قالان داغین دا، دردی داغ اولار،
تک قالان بولاغین گؤزلری دولار،
یاش تؤکر گؤزوندن هئی گیله-گیله،
تنهالیق دردیندن او گلر دیله.»

سیز ائی یوللاریما هئی باخان‌لاریم!
سیز ائی منیم اوچون داریخان‌لاریم!
هئچ زامان من تنها قالمیرام دوزو.
بو فیکیر یورماسین اوره‌یینیزی!
قالیرام فیل‌چکمز کدرلریم‌له،
قالیرام اومیدلی سحرلریم‌له.
من یوللار گئدیرم، یوللار آشیرام،
ناراحات فیکریم‌له قوشالاشیرام.
مندن سوروشسالار اگر نه‌ییم وار،
دئیه‌رم ایشیقلی بیر اوره‌ییم وار.
او، منیم دونیام‌دیر، ساحیلسیز دونیام.
اونو دینله‌مکچون هر آن یولدایام...

ائی دۇیان اینسانلار، ائی مرد اینسانلار!
سیز ائی منه مندن عزیز اولانلار!
دینله‌یین ساحیلسیز، دنیز دونیامی،
بو غملی دونیامی، غمسیز دونیامی!
دینله‌یین، دینله‌یین، بیلین هاردایام!
من تنها دئییلم، بو تورپاقدایام،
من تنها دئییلم، بو دیاردایام.

#مدینه_گولگون
#شعر_اوجاغی
@SheirOcagi

▫️دئدین «دورنالارلا گله‌رم من ده»،
دورنالار قاییتدی، سن گلمز اولدون.
سارالدی یارپاقلار چؤلده، چمنده،
پاییز فصلی چاتدی، سن گلمز اولدون.

#مدینه_گولگون
#شعر_اوجاغی
@SheirOcagi