▫️ویرگول‌لرله بؤلونموش صحیفه‌لر دولو سؤزلرله باش-باشایام و آنلاییرام کی، نؤقطه قویولمایاجاق بیر چوخ شئی وار بو حیاتدا....

📚 گونش و اونون چیچکلری
#روپی_کائور (هیندوستانلی شاعیر و یازار)
#شعر_اوجاغی
@SheirOcagi

▫️حیاتیم، پالچیقدان و درینلیکدن عیبارت ایدی، آما من او قارانلیق سولارین بیر پارچاسی دئییلدیم. او سولارین ایچینده بیر وارلیق ایدیم...

📚 سیرسه
#مادلین_میلر
#شعر_اوجاغی
@SheirOcagi

▫️ایفاده ائدیلمه‌میش دویغولار اصلا اؤلمز. جانلی‌-جانلی باسدیریلیب سونرادان چیرکین شکیل‌لرده اورتایا چیخیر...

#زیگموند_فروید
#شعر_اوجاغی
@SheirOcagi

سئودییی شهید اولان، خانیملارا

▫️یاغیشلار یاغمادان دا ایسلانیر شهید قبیرلری...
و قیزلار شهید شکیللرینی سئویر‌...
ایندی... قیزلار اوغلانلارا چیچک آلیر-
اونلارین آد گونونده،
ایلک گؤروش گونونده،
یا ان عادی گونده.
لچک‌لرینده گؤز یاشلاریندان شئه‌لر،
شهید قبیرلرینین اوستونو اؤرتور چیچک‌لر.
ایندی حسرتین بیتمه‌دییی یئرلرده،
بنؤوشه قیزلار
هر گئجه شهیدلره مکتوب یازیر،
و...
هر شهید اؤز سئودییینین یازدیغینی
گؤیلردن اوخویور.
گؤیلر «سئویرم» سؤزو قوخویور،
گؤیلر یئرلره شهیدلرین نورونو سپیر،
قیزلار قیرمیزی لئنتلی باش داشلارینا ساریلاندا
شهیدلر کولک‌لرین گتیردییی
قیز ساچلارینین قوخوسوندان اؤپور...

#اسمیرا_مئهی‌قیزی
#شعر_اوجاغی
@SheirOcagi

▫️اینسان اؤزو ایله صمیمی دئییل. اونا گؤره ده اؤزونو باشا دوشمه‌مه‌سیندن شیکایت‌لنمه‌مه‌لیدیر...

📚 بو شهرده کیمسه یوخدور
#رؤوشن_عبدالله‌اوغلو
#شعر_اوجاغی
@SheirOcagi

▫️ ایللر سونرا اؤیرندیم کی، قیشقیریب-باغیرماغا احتیاج یوخدور. سسینی ائشیتمک ایسته‌ینه بیر فیسیلتی‌ن یئتر...

#فرید_فرجاد
#شعر_اوجاغی
@SheirOcagi

▫️اوشاقلیقدا من اؤزومو بیر آری پته‌یی کیمی خیال ائدیردیم: چئشیدلی ساده و عادی آداملار بال آریلاری کیمی حیات حاقّینداکی اؤز بیلیک و فیکیرلرینین بالینی بورایا گتیریر، هر کس سخاوتله منیم روحومو بیر شئی‌له زنگین‌لشدیریردی. چوخ زامان بو بال چیرکلی و آجی اولوردو، لاکین هر جور بیلیک هر حالدا یئنه ده بال‌دیر...

📚 اوشاقلیق
#ماکسیم_گورکی
#شعر_اوجاغی
@SheirOcagi

▫️ بیز ائله بؤیوموشوک، ائله تربیت اولموشوق کی، حتّی سئوگی بئیینه عایید ائدیلیر.
سئوگی اساساً اوره‌یه مخصوصدور، آما بیزیم توپلوم اورکدن یان کئچیر، چونکی اورک منطیقلی دئییل، اورک راسیونال دئییل.
بئینه ائله تربیت وئریلیب کی، منطیقلی اولمایانی سهو حساب ائدیر، ایرراسیونال اولان هر شئیی یانلیش بیلیر. بئینه گؤره منطیقلی اولان دوزگوندور‌.
بیزیم تربیت پروقرامیمیزدا اوره‌یه یئر یوخدور، هر شئی بئیین اوچوندور. اورک همیشه آز قالا وارلیغیمیزدان اوزاقلاشدیریلیب، سوسدورولوب. اوره‌یه، بؤیومک اوچون ایمکان وئریلمیر، اونا اؤز پوتانسییئلینی فعّال‌لاشدیرماق اوچون شراییط یارادیلمیر...

📚 قیزیل کولچه‌لر
#اوشو
#شعر_اوجاغی
@SheirOcagi

اوشاق شعری

▫️توملار*

بیر استکان توم
اکدیم تورپاغا.
سونرا باشلادیم
من داریخماغا.

کئچدی آیلاریم
کئچدی ایللریم،
نه واخت چیخاجاق،
توملاریم منیم؟

ائشدیم تورپاغی
گؤردوم توملارین
یاریسی یوخدو.
یاریسینین دا
الی چیخیبدی.

گؤردوم یاریسی
آیاق آچیبلار.
او بیرلری ده،
یقین قاچیبلار...

#قشم_نجف‌زاده

* توخوم (Tum)
#شعر_اوجاغی
@SheirOcagi

▫️... سؤزون اخلاقلا ایلگیسی یوخدور.
اخلاقا چوخ باغلی اولان، آنجاق یاخشی داورانیشلاری اولمایان آداملارلا قارشیلاشمیشام من.
و هر گون داها دا چوخ آنلاییرام: «دوغرولوغون قانونا احتیاجی یوخدور...»

📚 سیزیف افسانه‌سی
#آلبر_کامو
#شعر_اوجاغی
@SheirOcagi

▫️سنی اصلا بیر داها گؤرمه‌سم بئله،
بو قورخونج و موردار شهرین بیر یئرینده،
بو قارا جهنّمین بیر بوجاغیندا،
سنین وارلیغینی،
و منی سئودیگینی‌،
بیلمه‌یه احتیاجیم وار.

#ارنستو_ساباتو
#شعر_اوجاغی
@SheirOcagi

▫️یوللار

حیاتدا ایکی یول وار:
بیری ال ایچی کیمی،
هاماردیر، یوخوشو یوخ،
قاری یوخ، یاغیشی یوخ.
نه دولایلاری وار کی-
دولایلاردان کئچه‌سن،
حیات سینایا، گؤره،
برک آیاقدا نئجه‌سن.
بو یول گؤز ایشله‌دیکجه،
باشدان-باشا هاماردیر.
اونون دا بیر راحاتلیق-
گزن یولجوسو واردیر.
بو یولون معناسینی،
دئیه بیلمه‌رم آنجاق.
چونکی بو هامار یولدان،
کئچمه‌میشم من هئچ واخت.

ایکینجی یول، چتین یول:
اونون دولایلاری وار،
اونون یارغانلاری وار.
بو یوللاردان باشینا،
قار یاغار، یاغیش یاغار.
بو یوللاردان توفانلار،
کسمک ایستر قارشینی.
بو یوللاردان باشلارسان،
سن حیات ساواشینی.
آیاقلارینی ازَر،
بو یوللارین داشلاری.
قطع ائتمک ایسته‌یرسن،
ذیروه‌لره اوجالان،
یوللاری، یوخوشلاری.
چکیلر یوللاریندان،
پرده-پرده دومانلار.
قارشینا بو یوللاردا،
چیخار اصیل اینسانلار...

منیم ده حیات یولوم،
هامار اولماییب اصلا.
آرزومون ذیروه‌سینه،
قالماق‌چون، اوجالماق‌چون،
من گئتمیشم او داشلی،
او یوخوشلو یوللارلا.

#مدینه_گولگون
#شعر_اوجاغی
@SheirOcagi

▫️شامی، اؤز ایچینده یئرلشدیردیگی پیلته‌ یاندیردی.
ان گؤینه‌دیجی یانیقلار قۇجاقلادیغین آدامدان گلر.

#ادهم_شرقاوی
#شعر_اوجاغی
@SheirOcagi

▫️قوی کیمسه بیلمه‌سین
نئجه من اوخشانماق یئرینه،
اؤپولمک یئرینه،
سانجیلمیشام!
قوی کیمسه بیلمه‌سین،
هئچ کیمسه!

#احمد_شاملو
#شعر_اوجاغی
@SheirOcagi

‍ ▫️سؤیله حوسئینه، ائی صبا، کرب‌و‌بلایا گلمه‌سین!
گلسه دوشر بو دشتده درد و بلایا؛ گلمه‌سین!

سؤیله‌گینن گتیرمه‌سین کوفه‌یه نازلی اکبری!
ظولم ایله قانینا باتار طُرّه‌ی مُشکِ عنبری.
بلکه فیرنگه‌تک آپار جمله‌ی آلِ حئیدری،
ذبحِ عظیم اوچون بو گون کوهِ منایا گلمه‌سین!

سؤیله گتیرمه قاسم'ی، قاتیلی ائیله‌ییر شتاب!
تویدا اولور یقین اونون قانینا اللری خضاب.
گؤرمه روا کی شمرِ دون دین ائوین ائیله‌سین خراب!
رحم ائله‌‌سین او زینبِ بختی‌قارایا، گلمه‌سین!

گلمه‌یه یوخدو فورصتیم، قان ایله نامه یازمیشام،
اؤلدوره‌جکدی مسلم'ی کوفه‌ده فرقه‌ی ظولام.
قارداشینین اوزون قولو گؤرمه روا اولا قلم!
باجیلاری آیاق‌یالین، دشتِ بلایا گلمه‌سین!

یئتسه اگر خبر سنه: اؤلدو بو مُسلمِ عقیل،
ابن زیاد نعشیمی گرچی ائدیبدی چوخ ذلیل،
غُسل و حنوط اولمادی، اولدو قناره‌ده قتیل،
ایسته‌میرم، عیالینی قویما، عزایا گلمه‌سین!

بادِ خزان اسر سنین غؤنچه‌صیفت عیالینا،
رحم ائله یاوَریم حسین، قاسمِ خوش‌‌مقالینا!
جام تصدّق ائیله‌دیم اکبرِ مه‌جمالینا،
ساغ اولا اول امام حسین، غم اُسرایا گلمه‌سین!

سؤیله عم‌اوغلوما منِ بیکسی ائیله‌سین حلال!
عرضیمی بیربه‌بیر ائله، آلِ عبایه شرحِ حال!
ایکی آچیلمامیش گولوم کوفه‌ده زار و دل‌ملال-
قالدیلار؛ اکبر ایله اول قاسم هارایا گلمه‌سین!

حسرتم اول جمالینا، آه چکیم بو سینه‌دن،
کوفه‌ده واردی قاتیلین، گلمه حزین مدینه‌دن!
قویما یئتیم خدیجه‌نی آیری اولا سکینه‌دن،
باشینا ال چک، آغلاییب شور و نوایا گلمه‌سین!

سؤیله اونون آناسینا باشینا قارا باغلاسین،
ایکی بالادان آیریلیب، کون و مکانی داغلاسین!
توتسا عزا، خدیجه‌دن سؤیله کی گیزلی آغلاسین،
بلکه یئتیملیگین توزو ماه لقایا گلمه‌سین!

فاطمه‌نین کنیزی، بو قصّه‌نی ائیله کیم تامام!
بیر-بیره دَیدی مرد و زن، شوره گلیبدی خاص و عام.
نؤوحه ائدر بو «ناتوان»، روز و شب آغلایار مودام،
تاپماسا بیر درِ نجات، دارِ بقایا گلمه‌سین!

#خورشیدبانو_ناتوان
#شعر_اوجاغی
@SheirOcagi