▫️گونشین قابیرغالارینین
سینماق سسلری
قالدی بیزه.

سیزدن تؤکولمه‌یه باشلادی
یاغیشین یارالاری.

یئره گؤمولموش گؤی
اللرينيزدن ایشه‌دی اوستوموزه.

آغلی باشیندان آلینمیش آی
«آپارتاید»ینیزا ایشیق چکدی.

تانرینین اینتحار گئجه‌سینده
بارماقلارینیز وار.

سیلاحلارینیزین شیشدی لوله‌سی.
شیشدی،
شیشدی،
دئشدی «مارکس»ین ««کاپیتال» دوشونجه‌سینی.

سومسوک راکئتلری آغلادی
رومانلار.

ساواشینیز غالیب گلدی
«تولوستوی»ون باریشینا.

اوزایدان آخدی
شرقده اؤلن‌لرين شكيلی.

يئنه اللری بوش قالدی
گؤیرچینلرین.
اؤیره‌نه بیلمه‌دیلر
سیزین دیلینیزی.

#اسماعیل_خرمی
@SheirOcagi

دیالوق

▫️اومید، قورخو'دان داها گوجلو اولان تک شئی‌دیر.

📽 The Hunger Games- Catching Fire
2013 آمریکا
#فرانسیس_لارنس
#شعر_اوجاغی
@SheirOcagi

▫️بیر شئیی و هر شئیی بیلن، هئچ بیر شئی بیلمیر.

#خودو_ممدوو
#شعر_اوجاغی
@SheirOcagi

‍ ‍ ▫️ائتمه‌گیل!

اوزونو مندن نیهان ائتمک دیلرسن، ائتمه‌گیل!
گؤزلریم یاشین روان ائتمک دیلرسن، ائتمه‌گیل!

برگ نسرین اوزره میشکین زولفونو سن داغیدیب،
عاشیقی بی‌خانیمان ائتمک دیلرسن، ائتمه‌گیل!

قاشلارین قؤوسونده موژگانین خدنگین گیزله‌ییب،
ائی گؤزو مستانه، قان ائتمک دیلرسن، ائتمه‌گیل!

جانیمی وصلین شرابیندان آییردین، ائی گؤزوم!
عئینیمی گؤوهرفشان ائتمک دیلرسن، ائتمه‌گیل!

قویموشام عشقینده من کؤون و مکانین وارینی،
جان نه‌دیر کیم، قصد جان ائتمک دیلرسن؟ ائتمه‌گیل!

بورقعی اوزدن آچارسان... سن مگر نامحرمه-
گیزلی اسراری عیان ائتمک دیلرسن؟ ائتمه‌گیل!

یاندیریرسان کؤنلومو عشقینله، معلوم اولدو کیم،
آنی روسوای جهان ائتمک دیلرسن، ائتمه‌گیل!

دوغرویام عشقینده، اوخ‌تک کیپرییین تانیق دورور،
قددیمی نئیچون کامان ائتمک دیلرسن؟ ائتمه‌گیل!

چونکی عشقین مسکنی‌دیر کؤنلومون ویرانه‌سی،
حسرته آنی مکان ائتمک دیلرسن، ائتمه‌گیل!

چون یقین بیلدی «نسیمی» عشقینی اولدو غنی،
اول یقینی سن گومان ائتمک دیلرسن، ائتمه‌گیل...!

شعر:
#عمادالدین_نسیمی
سَس:
#ائلشن_بؤیوک‌وند
#شعر_اوجاغی
@SheirOcagi

▫️گؤزلرین آددیم-آددیم
بومبالارا قوناق گئدیر، کابُل!
قوجاغین تالانا قالیب،
اینتحار سپه‌له‌نیر آدینا،
آدینلا زنجیرله‌نیر اورتادوغو،
آدینا داش یاغیر،
باشینا داش یاغیر،
آه، گوللـه‌لر یوردو!
آه، یارامین ائکیز تای باجیسی!
تانرییا باخ!
گوزگو دالیندا،
قان دنیزینده شپه‌له‌نیر،
و شیطانلار اؤلوم سمفونیاسی چالماقدادیر.
لای‌لای، ائی دوستاغا تاپشیریلمیش باجیم!
سیلاحلارین قیرجانان زاغاسیندا قورتولان!

#سیاوش_اکبری
@deltaie_khon
@SheirOcagi

▫️منیم خیال ائتدیگیم سئوگی، ایکی اینسانین بیر-بیرینی صاحیبلَنمک ووروشماسیندان داها اوستون بیر شئی‌دیر...

📚 نیچه آغلایاندا
#ایروین_یالوم
#شعر_اوجاغی
@SheirOcagi

▫️بیر میلّتین دیلی، وارلیغینین ان پارلاق قانیتی‌دیر.

#حسین_جاوید
#شعر_اوجاغی
@SheirOcagi

‍ ▫️دئمک گئدیرسن.

دئمک گئدیرسن،
منیم حاقّیم بو دئییلدی.
عشقه و جسارته داییر نه وارسا،
بئلینه آلیب-
او بؤیوک یانغینین‌لا گئدیرسن دئمک.
گئت!
اویسا... اویسا سن اؤیرتمن چیخدیغین ایل،
ووروب آلنیما قارغاشانی،
سیم‌سیاه بیر سود کیمی،
یارپاق تؤکموشدو دارآغاجیم،
آخشاملاریم اولموشدو،
و قودوز گئجه‌لریم.
گؤزیاشلاریم آغلارکن،
بیر اوزون یولجولوق دوشموشدو آرخاما.
او گون بوگوندور، تتیکده بیر عؤمرون سون گوللـه‌سی‌سن.
هئچ عاغلیما گلمزدی، گولوم!
بو دا منه درس اولسون،
بو دا منه درس اولسون!

دئمک گئدیرسن.
بئله اولماسینی ایسته‌مزدیم اویسا،
حزین و داغلارین بو باش دؤنمه‌سی،
جلّاد قیرمیزیسی بیر خَسران ایدی یوللاردا.

سن اؤیرتمن چیخدیغین ایل،
تام چیلغین بیر آغاجا سویونموشدو ایشلم‌لر.
ائیواه!
اسمر بیر توردا بیر ائیله‌میشم‌سه،
جنّتین اوجونو یاندیرمیشام‌سا بیر دفعه،
جهنّمین نظامیّه قاپیسیندایام‌سا،
آتشدن بیر نهره دؤنن بو عوصیان،
هپ او گول یانغینینا قاناد چیرپار.
و ان یاساق ماهنیلار،
اوزونو شارابلا یویار.

گئدیرسن دئمک.
منیم حاقیم بو دئییلدی
عشقه و جسارته داییر نه وارسا،
بئلینه آلیب-
او بؤیوک یانغینین‌لا، گئت!
هایدی، دورما!
گنج‌لیگیمین وبالینی،
و سئوگیسیز حیاتیمیزین بدلینی اؤده‌مه‌دن گئت!

بو شعری سنه ارمغان ائتدیم،
یانینا آلماغی اونوتما، ساقین!
سس‌سیز گئجه‌لرده اوخویوب آغلارسان!
کیمسه‌لر گؤرمه‌سه ده،
قانارسان، گولوم!
نه‌لر چکدیگیمی او گون آنلارسان!

سون باهار یاغیشی‌یلا ایسلاندیم کوچه‌لرده،
آغلادیم ایکیمیزه، سندن چوخ اوزاقلاردا.
ایندی، حوزون موغامیندا بوتون ماهنیلار.
بو یورغون سس،
بو کور لامپا،
بو آتشی سؤنموش بوخاری،
تانیغی‌دیر یالنیزلیغین،
پئشمانلیغین تانیغی‌دیر.
چونکی... چونکی منیم کیتابیمدا،
عشق بیر دفعه یاشانار.

دئمک گئدیرسن.
گئت!
بیر یاندا اؤلومون آلنینداکی تر،
بیر یاندا سویا دوشن شامدان گولو.
و صاباحین‌ ساچلارینداکی قیروو قدَر اوشویورسن.
هایدی، دورما!
بئلینه آلیب او بؤیوک یانغینین وبالینی،
و سئوگیسیز‌ بیر حیاتین بدَلینی اؤده‌مه‌دن، گئت!
بیلیرسن گئجه‌نین ان قارانلیق اولدوغو آن، صاباحین ان یاخینلاشدیغی زاماندیر،
و‌ هئچ‌بیر شئی حاقّیندا بیلدیگیمیز هر شئی، اصلینده یالاندیر.

دئمیشدیم یا:
سن اؤیرتمن چیخدیغین ایل،
ووروب آلنیما قارغاشانی،
سیم‌سیاه بیر سود کیمی،
یارپاق تؤکموشدو دارآغاجیم،
حوزون ساریسی یارپاقلارینی.
آخشاملاربم اولموشدو،
و قودوز گئجه‌لریم.
گؤز یاشلاریم آغلامیشدی،
بیر اوزون یولجولوق دوشموشدو آرخاما.
تام چیلغین بیر آغاجا،
سویونموشدو ایشلم‌لر.

دئمک گئدیرسن.
گئت!
بو شعری سنه ارمغان ائتدیم،
یانینا آلماغی اونوتما!
بلکه بوخاری‌ن سؤنموش،
کیتابین سونا چاتمیش.
بلکه دیزلرینده‌ پتو،
یالنیزلیغین ایچ چکیشمه‌سینی دویارسان.
پاکتده‌کی سون سیقارا'ن،
و تیترک بیر شام آلووو‌ حوزنویله کئچمیشه قاپیلارسان.
کیمسه‌لر گؤرمه‌سه ده،
قانارسان، گولوم!
سن ده یانارسان.

#فاتیح_قیسابارماق
#شعر_اوجاغی
@SheirOcagi

▫️اوتوروب سحردن ایچیرم ائله.

وطن قفسینه دوشموشم اسیر،
قفسه سالماغا قوشون یوخدومو؟
باشیما دوشمه‌یه داشین منتظر،
ائویمی هؤرمه‌یه داشین یوخدومو؟

اوتوروب سحردن ایچیرم ائله،
غم سوزن قهردن ایچیرم ائله،
وئردیگین زهردن ایچیرم ائله،
وئردیگین زهره نوشون یوخدومو؟

منم، یئلین اسسه، بیر نانه اولان،
سؤنموش شامینا دا پروانه اولان،
بو منم، دردیندن دیوانه اولان،
منی تانیمادین. هوشون یوخدومو؟!

#علیزاده_نوری
#شعر_اوجاغی
@SheirOcagi

دیالوق

▫️سنین، کئچمیش‌له ایشین قوتارا بیلر، آما کئچمیشین ایشی سنله هئچ واخت قوتارماز.

📽 Magnolia
1999 آمریکا
#پل_توماس_اندرسن
#شعر_اوجاغی
@SheirOcagi

▫️ایکی حؤکمدار ۱۴

... شاعیر آچیب قلبینی،
دئدی: یانان منم، من.
گونشه، اولدوزلارا،
آیلارا دوشمنم من.
اونلار اؤز تئللرینی،
ائله کی یئره سریر،
منه مین جور فلاکت،
فاجیعه‌لر گؤستریر.

سیز مندن سوروشمایین،
من نه‌لری سئویرم.
ائنسین یئره بولودلار،
ائنسین یئره قارانلیق!
الم‌لری، دردلری،
من گورمه‌ییم بیر آنلیق!

اه، او ظالیم اووچولار،
آه، او ظالیم اووچولار!
اونلاردا اینصاف‌می وار؟
یوواسینی داغیتدی،
منیم بولبول‌لریمین.
یوخوسونو قاچیرتدی،
یوخولو چؤللریمین.

بو دونیایا گله‌لی،
اوزوم گولمه‌دی بیر گون.
دونیادان ذؤوق ایسته‌ین،
دونیادان ال گؤتورسون؟!
من بیر ذؤوق گؤره‌ممه‌دیم،
نه قدر دونیادایام.
غم دنیزی ایچینده،
یالقیز قالان آدایام.

نه قلبیمین آهلاری،
نه گؤزومون قان یاشی،
سؤندوره‌ بیلمیر منیم،
سینه‌مده‌کی آتشی.

اریدیرم اودوما،
اوره‌یی ده، جانی دا.
قورخورام کی، یاندیرام،
اودوما دونیانی دا.

دلی کولک‌لر ایله،
دیله گلیب نئی کیمی،
ایسته‌رم کی، طبیعت،
چالسین منیم غمیمی.

یئرده اودلار قالانسین،
دریالار دالغالانسین،
هایقیرسین عوصیانیمی.
گوروب ائشیتدیکجه، من،
اودا یاخدیم جانیمی.

نئجه دؤزوم بو درده،
مگر داشام، دمیرم؟
من گؤرمک ایسته‌میرم،
ائشیتمک ایسته‌میرم.

گؤروب ائشیتدیکجه من،
آرتیر سینه داغلاریم،
اتدن گؤزوم اولایدی،
داشدان دا قولاقلاریم!

#بختیار_واهابزاده
#شعر_اوجاغی
@SheirOcagi
داوامی وار.

▫️بیر میلّتین یوکسلیش و یا ائنیشینی بیلمک اوچون، اونون اوخوللارینی گؤرمک یئتر.

#حسین_جاوید
#شعر_اوجاغی
@SheirOcagi

▫️دمیر، ماقنیتدن سوروشوب:
- ان چوخ کیمدن نیفرت ائدیرسن؟
ماقنیت جاواب وئریب:
+ سندن...چونکی منی اؤزونه چکیرسن، آنجاق اؤزونده ساخلایاجاق گوجون یوخدور.

📚 زردوشت بئله دئییردی
#فردریش_نیچه
#شعر_اوجاغی
@SheirOcagi

‍ ▫️ایگید ایدین.

من سنی آجیلاردا تانیدیم،
و سن فیرتینادا هئچ بوراخمادین منی.
گؤز یاشیما اورتاق اولدون.
کیتابلاریمی، یورغون یورغانیمی،
و گؤزلریمین گئجه‌لره قاپانماسینی،
هر آنلاتماق ایسته‌ینده سنه،
الیم چاتمادی قلَمه،
یازا بیلمه‌دیم، سوسدوم.
ایگید ایدین...

داش اوسته یاتدیق سنینله،
قار یئدیک،
یاغیشی ایچدیک سو دئیه،
سویوقدان قابارلاریمیز چاتلادی.
سن آغلادین یالنیزجا و سسسیزجه،
اللریمی اوووشدوردون.
ایگید ایدین...

قار اوچقونو دوشدو دامیمیزا،
«چؤکدوم» دئدیم، «بیتدیم» دئدیم،
سن ساردین منی چولون‌لا.
اولو چؤرک ائتدین، بؤلوشدوک،
آنام کیمی سن داشیدین بئلینده.
یوخسول اوتاغیمیزین سوواقسیز دووارلاریندا،
بیرلیکده باتیردیق اوره‌ییمیزه گونشین دیرناقلارینی.
آجیلار کؤرپوسونده ال-اله یئریدیک.
سازاقدا ایلک‌باهاری گئییندین،
اوره‌یینی تیکدین بئینیمه،
آشیمیز اولماسا دا، ترک ائتمه‌دین.
ایگید ایدین...

ماوی‌لرین دنیزینده،
و اولدوزلارین سون دوراغیندا،
سولدورمادین سئودامی،
سولدورمادین اومیدیمی.
قان قوسدوم... آه چکدیم... ایچدن اینله‌دیم.
ساریلینجا قوللاریما قاندال،
سن ده ساریلیب اؤپدون.
زامانین زهرلی عقربه‌سینی سئودیم،
هر گؤروش گونو سنی گتیردیگینده.

گؤزیاشلاریندان سوروش منی!
کیپریک‌لریندن سوروش!
حسرتین آجیسی کوسدورسه ده ماهنیلاری،
قاوالی سئودیم، سازی سئودیم، زهری آخیدیر دئیه.
یاشیللیق جادّه‌سینده داشلارا آرخالاندیق،
یورغونلوق لیمانیندا سو سپدین قلبیمین آلووونا.
ایگید ایدین...

یوسونلارا بولاندیغیمدا،
یاشامین چیغلیق‌لاری منی ساحیله ایته‌له‌دیگینده،
کؤکسومده‌کی فیرتینالار و تیتره‌مه دنیزینده آیریلیغین آناسی یاخاما یاپیشدیغیندا،
یارسیز قویمادین منی، دوز اکمه‌دین گؤزومه.
ایگید ایدین...

تیکانین گولو ده اولسا حیات،
و یا گولون تیکانی دا اولسا،
میل چکمه‌دین اوره‌ییمه.
سن سئودام قدر، سن تورپاق قدر
ایگید ایدین...

کیلیم اولدون قهریمه،
سیر وئرمه‌دین، سر وئردین کؤنول قاپیمدا.
من سنی آجیلاردا تانیدیم،
و سن فیرتینادا هئئئچ بوراخمادین منی،
اورتاق اولدون گؤزیاشیما.
ایگید ایدین...

#فاتیح_قیسابارماق
#شعر_اوجاغی
@SheirOcagi

▫️کائیناتدا سهو یوخدور اصلا. بوتون اولموش شئی‌لرین بیر آچیقلاماسی واردیر.

📚 آدئن
#عذرا_کورئن
#شعر_اوجاغی
@SheirOcagi

▫️اؤز آللاهیمی نغمه‌مده، گولوشومده، گؤزیاشلاریمدا یاد ائدیرم.

📚 زردوشت بئله دئییردی
#فردریش_نیچه
#شعر_اوجاغی
@SheirOcagi

▫️یاندیم، اوره‌ییمده او قیز دا یاندی.

بو عؤمرو‌ کاغیذا کؤچورموشم من،
من آدام کولویم یا کاغیذ کولو؟
یاندیم، اوره‌ییمده او قیز دا یاندی،
بیر آز اؤز کولومَم، بیر آز قیز کولو.

گئجه وار بیر اوزون عؤموردن اوزون،
اؤلومله اویناییب عؤمور اودوزور.
هر آخشام یاندیریر آیی-اولدوزو،
تانری سحر ییغیر آی-اولدوز کولو.

غم چاخماق داشی‌دی، داشدان یانمیشام،
آیاقدان اود آلیب، باشدان یانمیشام.
ایلاهی، نه یاخشی عشقدن یانمیشام!
باها ائله‌میشم بو اوجوز کولو.

#علیزاده_نوری
#شعر_اوجاغی
@SheirOcagi

▫️ایکی حؤکمدار 15

...هر شئی یالان‌دیر، یالان،
عؤمور، غم کاروانی‌دیر.
طالع‌لر عؤمورلرین،
ابدی ساروانی‌دیر.

بؤهتان‌لار وادی‌سینده،
عؤمور آتیمی سوردوم.
کئفدن دم وورانلاری،
من کی یالانچی گؤردوم.

وفا اومدوقلاریمدان،
جفا گؤردوم هر زامان،
گوزگودن صیدق ایسته‌دیم،
اَیری گؤردوم اؤزومو.

سویا دئدیم دردیمی،
آخیب کئچدی یانیمدان.
او دا آغزیمدا قویدو،
ایکی کلمه سؤزومو.

ائی دهشتلی فیکیرلر،
مندن اوزاقلاشمایین!
سیز منیم اوره‌ییمدن،
کناردا آغلاشمایین!

شاعیرم، غم ایچینده-
کئچیر گئجه‌م-گوندوزوم.
سئودالی خیاللارین،
اؤولادی‌یام من اؤزوم.

یالنیز یالان گئرچک‌دیر.
من بو حاقّی دانمیرام.
من اؤز وارلیغیما دا،
شکّ ائدیر، اینانمیرام.

اینانمیرام گؤیه ده،
اینانمیرام یئره ده‌.
مین افسانه اویدوران،
بؤیوک نبی‌لره ده.

وارسا بیر ایناندیغیم:
یالنیز عشقیم‌دیر او دا.
مین دونیا کشف ائتمیشم-
عشقیمله بیر دونیادا.

اؤزوم ده هئچ بیلمیرم،
بو دونیایا نه دئییم؟
نه گئجه‌م بیر گئجه‌دیر،
نه گوندوزوم بیر گوندوز.

ائی منیم محبّتیم،
عشقیم، حیسّیم، دیله‌ییم!
سیز هم منیم حیاتیم،
هم ده اؤلوموم‌سونوز.

اؤلوم! ساغ گؤروب منی-
آتما منه پنجه‌نی!
من کی چوخدان اؤلموشم،
ناله‌م آلداتمیش سنی...

#بختیار_واهابزاده
#شعر_اوجاغی
@SheirOcagi
داوامی وار.

▫️روحوموزدا چیچک بئجَردن اینسانلاری،
کؤنلوموزون هاراسینا بوکوب ساخلایاق؟!

#جمال_ثریا
#شعر_اوجاغی
@SheirOcagi

ائل حئکمتی

▫️بوش‌بوغازا سیرّ وئرمک، چاتلاق قابا سو تؤکمک کیمی بیر شئی‌دیر.

#شعر_اوجاغی
@SheirOcagi

کرگدن سوروشدو: عاشق نه دئمک؟
چوبان‌قوشو دئدی: اوره‌یی دامجی‌-دامجی گؤزلریندن آخان کیمسه.

#شل_سیلور_استاین
#شعر_اوجاغی
@SheirOcagi