▫️من آرازین آدیلان
چوخ زاماندیر تانیشام
ان كیچیك یاشلاریمدان
اونو روانلامیشام

قوجا بابام نه واخت كی
بوغازیم آغرییاردی
«آراز كئچمیشم» دییه
بوغازیمی سیخاردی

سوروشاردیم، آی بابا!
آراز نه دیر كئچمیسن؟
نه كیمی شئیدیر او كی،
سویوندان دا ایچمیسن؟

سؤالیمدان بابامین
یاشلاناردی گؤزلری
اوزون چیینلرینده
گیزله‌نردی كدری

اوزومه مأیوس- مأیوس،
باخیب دئمزدی بیر سؤز
گؤرردیم آنجاق اولوب
اونون توكلری بیز-بیز

سونرا دا قارداشیمین
آدین قویدولار آراز
لاكین اوندا دا منه
آیدینلاشماری بو راز

آنجاق «آراز» بئشیكده
یاتیب ییرغانان زامان
بؤ سؤزلری دینلردیم
آنامین لایلاسیندان:

«آراز'ی آییردیلار
قومویلن دویوردولار
من سندن آیریلمازدیم
ظولمولن آییردیلار»

#بولود_قاراچورلو_سهند
@SheirOcagi

‍

▫️بوز چیچه‌یی

گلدی چپیش کیمی، شن، شیطان، ورهو
نازلانا - نازلانا اوزومه باخدی
الده نئچه بوتا بوز چیچه‌یی، او
گوللری هوسله گولدانا تاخدی‌.

«بونلاری یادیگار ساخلارسان مندن»-
دئیه، گؤیرچینیم پیرلادی، گئتدی
غمزه‌سی اوخ کیمی دَیدی سینه‌مدن،
اوو ایکن، اووچوسون اوولادی، گئتدی.

گولداندا بوتالار قالدی بیر زامان،
گوللری قورودو، تؤکولدو بیر - بیر
منیم‌ ده ایچیمی دوغرادی هیجران
بو نازین، اَدانین معناسی نه‌دیر؟

منی بیر دفعه‌لیک آتیردی اگر،
گئدنده گول نییه وئردی یادیگار؟
بیلمیردی، بیلمیردی، بیلمیردی مگر،
گول نه‌قدر قالار، نه‌قدر یاشار؟

اونا سؤیله‌مه‌دیم، دئمه‌دیم ندن؟:
دریلن چیچکدن یادگار اولماز.
یوز ده گؤزه‌تله‌سن، یوز ده سو وئرسن،
کؤکوندن آیریلار، سارالار، قالماز.

نه بیلیم، بلکه‌ده او آج مارالین،
گومانی بو گوله گلیرمیش تکجه
بیرده، یارامازا، نه یارجی-یارین؟
صاباحین معناسین بیله‌یدی نئجه؟

صاباحسیز کئچمیشدی عؤمرو همیشه
کدر‌لر عؤمورلوک، سئوینجلر بیر آن.
صاباحدان نه اوموب کوسه‌جکدی، نه؟
سحری سیخینتی، آخشامی حیرمان.

او سئللر اوزونده اوزن بیر کؤلون،
بوتاسیندا آچان گوله بنزردی.
هر آن بو دهشتلی طالعین، یولون،
داشلی دالغالاری باغرین ازردی-

او سرت قایالارین قوزو جئیرانی،
قورشونلو، پیچاقلی شهرده دوستاق
بیر قارین میننتلی چؤرک قوربانی،
هر گئجه بیر قوردون ائوینده قوناق

اؤزو بختی قارا پری لر کیمی،
پئشه‌سی بخته‌ور دئولره خیدمت.
قوینو بخته‌ورلیک اوجاغی، لاکین-
نصیبی قارا گون، قیسمتی حسرت.

عشقه، محبته سوسوز اوره‌یی،
گاه ایکی یه باغلی، گاه اوچه باغلی
اومودو، آرزیسی، عشقی، دیله‌یی،
بیلمز نه‌یه باغلی، لاپ هئچه باغلی.

نئجه‌کی قلبیندن چیخاردی آتدی،
بورانلی گئجه‌ده باش آلدی گئتدی
غوبارلی کؤنولدن توفان قوپارتدی،
دومانلار ایچینده ایتدی کی ایتدی.

بیر نئجه دولاندیم دالیجا خسته،
یئره، گؤیه زنجیر سالدیم تاپمادیم؛
آختاردیم، قویمادیم داشی داش اوسته،
هر یاندان سوراغین آلدیم، تاپمادیم.

گون کئچدی، آی کئچدی، ایل‌ ده دولاندی،
حسرتین کؤنولدن آتا بیلمه‌دیم.
منیم‌ ده سارامی سئللر آپاردی،
ندنسه الیندن توتا بیلمه‌دیم.

اؤزو ایتدی باتدی، دوماندا - چن‌ده،
گولوده قورودو، تؤکولدو... اولسون!
غمینی یادیگار ساخلارام من‌ ده،
غم‌ کی چیچک دئییل سارالسین، سولسون

اونوتان دئییلم دردین، نیسگیلین،
«سهند» طاقتی وار منده‌ ده، قاللام
شیرینین اؤزو تک غمی‌ ده شیرین،
گئتدیسه، مهرینی غمینه ساللام

دونن قار یاغیردی... باخدیم، باغچا - باغ،
سون یارپاقلارین‌ دا تؤکوب، ساچمیشدی؛
یالینجا بوتالار اسیردی زاغ - زاغ،
لاکین بوز چیچه‌یی، چیچک آچمیشدی

ائله‌بیل بیر آندا عالم دَییشدی،
بولوتلار دانیشدی، سس گلدی چندن.
ایچیمه‌ سس‌لردن ولوله دوشدو؛
"بونلاری یادیگار ساخلارسان مندن"

بوز چیچه‌یی، منیم سئوگی چیچه‌ییم!
آلقیش بو دؤزومه، ایلقارا آلقیش!
شاختایا، بورانا کیم دؤزرمیش؟ کیم؟
سنده گؤر نه دَرین معنا وار ایمیش!

قیزین!.. اوره‌ییمین اودونا قیزین!
سن منیم عشقیمین سون باهاریسان.
او گوناهسیز قیزین، پناهسیز قیزین،
بوراندا گول آچان یادگاریسان.

سنی اوره‌ییمه اَکیرم، باری-
کؤکسومده کؤک سالیب، بوداق آتاسان
یاغدیقجا باشیما زمانه قاری،
هئی چیچک آچاسان، چیچک آچاسان...

#بولود_قاراچورلو_سهند
@SheirOcagi

▫️الده قاییرما چیچک‌

آلتونلوجا ناخیشلی،
آغ گولداندا بیر دسته.
الده قاییرما چیچک
قویولموش میزین اوسته.

یام-یاشیل یارپاق‌لاری،
آغ، قیرمیزی، بنفشه.
نه سو، نه قایغی ایستر
عارسیز-عارسیز، تپ-تزه.

اوزون ایللر کئچسه ده
دوروب یاشایاجاقلار.
ریاکار طراوتله،
هله ده قالاجاقلار.

کیمسه نه دئییر دئسین،
نه سؤیله‌ییر سؤیله‌سین.
یوخ...!
نه سوسوزوندان اؤلن،
نه عطیر ساچا بیلن،
بو پیلاستیک‌لری من،
چیچک سانا بیلمیرم.

من بزک-دوزک‌لری،
گؤزللیک سانانمیرام.
گؤزللیکدن نه رنگه،
نه شکله، آلدانمیرام.

نه سئون، نه سئویلن،
نه اوموب کوسمک بیلن،
نه یاشاماق آنلایان،
نه ده کی، اؤلمک بیلن.

جانسیز تؤر-تؤکونتولر،
گول‌مو، چیچک‌می اولار؟
گول کمال‌دیر، حیات‌دیر،
هم آچار، هم ده سولار.

بو، گول دئییل، اؤلوم‌دور،
آلدانیش‌دیر، دهشت‌دیر.
یوخ‌..‌. اونا اؤلوم دئسم،
اؤلومه اهانت‌دیر.

اولسون...! اؤلومده سولماق-
چورومک دهشتی وار.
و لاکین توخوم اولماق،
جوجرمک قودرتی وار.

نه قیزاریب سارالماق-
نه آچیلماق، نه سولماق-
نه اوتانیب، قیپچینماق-
محبّت تانیماماق-
گولمک-
بیلمه‌ین‌لرده
قهبه‌لیک صیفتی وار...

 #بولود_قاراچورلو_سهند
@SheirOcagi

بو گئنيش‌ دونيادا، ارلر، ياران‌لار!
هر يئر باشدان‌-باشا قاپسانميش‌ بوتون‌.
ائی وطن‌ داشينی دؤشه‌ وورانلار!
مزار دا تاپيلمير وطنيم‌ اوچون‌.

من‌ كی بير وطنسيز، يوردسوز شاعيرم‌،
بير عؤموردور سيتقاييب‌ اينله‌ييرم‌.
كيمسه‌دن‌ نه‌ قان‌، نه‌ دييه‌ ايستیرم‌
بير مزار بويوندا يئر ديله‌ييرم‌.

يوردومو-يووامی باسيب‌ آلانلار!
فقط‌ نئچه‌ قاريش‌ يئر وئرين‌ منه‌!
بوتون‌ سيزين‌ اولسون‌ بو اؤلكه‌-ديار
بير مزار قاييريم‌ آنام‌ وطنه‌...

 #بولود_قاراچورلو (سهند)
@SheirOcagi

▫️اونا سؤیله‌مه‌دیم، دئمه‌دیم نه‌دن:
«دریلن چیچکدن یادگار اولماز!

یوز ده گؤزَتله‌سن، یوز ده سو وئرسن،
کؤکوندن آیریلان، سارالار، قالماز»...؟

#بولود_قاراچورلو_سهند
@SheirOcagi

▫️طبیعی بیر حیس‌دیر وطن‌پرورلیک،
میللتچی‌لیک آدی وئریلمز اونا.
دوغما بیر سئوگی‌دیر تورپاق سئورلیک،
تورپاق اینسان‌لارا آنادیر، آنا...

#بولود_قاراچورلو_سهند
@SheirOcagi

▫️طالعیمه سن باخ!

دردلر،
اوره‌ییمده قالانیب،
قالاق-قالاق.
بئله گئتسه اگر،
بو بالاجا چاناق،
پرم-پرم اولاجاق.

بیر درد بیلن آختاریرام،
بیر ائشیدن آختاریرام،
دئیه بیلم دردیمی،
سؤیله‌یه بیلم کدریمی.
بیر آچا بیلم صاندیغی،
تؤکه بیلم پامبیغی.

دئمیشلر:
«اورک سوفره دئییل،
هر گله‌نین قارشیسینا آچاسان.»
لاکین، اینان،
من،
سوفره‌دن ده آچیق،
سینه‌می آچماق ایسته‌ییرم.
بو سوفره‌نین دؤوره‌سینه،
بوتون عالمی ییغماق ایسته‌ییرم.
قوناقلیق اوچون یوخ،
دده‌مه احسان اوچون یوخ،
یئدیییم تاتورانی،
ایچدیییم زققومو،
هامیلارا دادیزماق اوچون.
هامییا گؤستریب تانیتماق اوچون،
دردیمی، آجیمی.

آخی بیلیرسن من کیمم؟
من دیلی-آغزی قیفیللی دردلی‌یم.
اوره‌ییم بیر ذرّه قایغی،
بیر ذرّه محبّت اوچون،
افیل-افیل اسیر.
اینانین،
منی اؤلدورمور یانغی.
بیرجه ذرّه عدالت اوچون،
جان وئریرم.
دردیمی قانین!
سؤزومه اینانین!
بیلیرسیز نییه؟
من اؤز دوغولدوغوم ائوده،
اؤز آنا دیاریمدا،
آتا-بابا اولاریمدا،
یادام، یاد.
«شیرین»ینی
یادلار قوینونا بوراخمیش،
فرهادام، فرهاد!

طالعیمه سن باخ!
دوشونجه‌لریم یاساق.
کئچمیشیمدن سؤز آچماغیم یاساق.
گله‌جه‌ییمدن دانیشماغیم یاساق.
آتا-بابامین آدینی چکمه‌ییم یاساق.
آنامدان آد آپارماغیم یاساق.
بابا دیاریم ایسه،
پیدراق-پیدراق‌دیر.

بیلیرسن؟
آنادان دوغولاندا بئله،
اؤزوم بیلمه‌یه-بیلمه‌یه،
دیل آچیب دانیشدیغیم دیلده،
دانیشماغیم دا یاساق ایمیش، یاساق.

#بولود_قاراچورلو_سهند
@SheirOcagi

▫️گؤزونو حیاتا آچدیغین زامان،
یاشام گئری دؤنوب گئدیردی هارا؟
هر نه‌دن خبرسیز کهلیک‌لر کیمی،
اینسانلار باشلارین سوخوردو قارا.

آچدیلار اوزونه یاشام قاپیسین،
دوشونه بیلمیردین هئچ نه او آندا.
زورلا قوتلادیلار دوغوم گونونو،
چاره‌سیزدیر آنان سنی دوغاندا.

قارانلیق، دونیانین حاکیمی اولموش،
سانکی اؤلدوروبلر گؤیون آللاهین.
سؤنوبدور گونشین ایستی نفسی،
یاندیریر شهَری تک سنین آهین.

من ده سنین کیمی یالنیزام ایندی،
بوشالیب اللریم اوره‌ییم کیمی.
قان دامیر گئجه‌لر رویالاریمدان،
دوستلار بیچاقلایان کوره‌ییم کیمی.

چوخونو سئورکن سئویشدیم، آمّا-
سئویشمک آنلارین ایزی سیلینمز.
یاشام توم اوزونو گؤستریب منه،
داها کیمسه منی داشییا بیلمز.

هله‌لیک برده تک دامغالانمیشیق،
ساتدیلار، ساتیلدیق، ندنی بللی.
مینلرجه «نسیمی» سویولدو، آنجاق-
«دلی دومرول»ون ده باغلیدیر الی.

آغاج اؤز ایچیندن قوردلانار، آمّا-
بوردا گؤز اؤنونده یاشاییر بیر قورد.
بیزلره گوج وئریب دایانماق اوچون،
ایکی آیه اوخور دده‌میز «قورقود.»

دئییرسن، گل یاخین، آغلاشاق بیر آز-
قودورموش دونیانین گله‌جه‌یینه!
بوراخ اوزولمه‌یی، قولاق آس دئییم:
«یامان گونون عؤمرو آز اولور» یئنه.

هله‌ده، هله‌ده بیزیم یئرلرده،
ساده اینسان‌لارین آندی چیراق‌دیر.
خالقین آراسیندا، کندده، شهرده،
موقدّس یئرلرین آدی اوجاق‌دیر...

#بولود_قاراچورلو_سهند
@SheirOcagi

▫️صولحه قوربان اولدو

صولحه قوربان اولدو بو آزربایجان.
گرکدیر شرقده بوغولا بو سس،
دئیه کؤهنه دونیا وئردی اَل-اَله.

«لندن»ده باشلادی گیزلی حرکات،
«واشنگتون»داکی قوشون، تداروکات،
خلیجه یوللاندی حربی گمی‌لر.

تاریخده وطنه، هدفه، یولا،
جان قوربان ائدن‌لر هئچ ده آز دئییل...

آمّا بیر میلّتین قوربان اولماسی...!
تاریخ گؤسترمه‌میش هئچ واخت، هئچ زامان.

قوی بیر ده سؤیله‌ییم دونیالار بیلسین:
صولحه قوربان اولدو بو آزربایجان...

#بولود_قاراچورلو_سهند
@SheirOcagi

▫️...«نسیمی» بابامی دیری سویدولار،
مگر سوسدو دیلی، کسیلدی سسی؟
چوخ حاق گؤرنلرین گؤزون اویدولار،
گؤرونمزمی اولدو حاقّین جیلوه‌سی؟

هله کؤکسومده‌دیر دده‌مین سازی،
سؤزوم دوستا مرهم، دوشمنه اوخدور.
چاغیرسام، دادیما گلر «ائیواز»ی،
کؤمه‌ییم، دایاغیم، ائل-آرخام چوخدور.

بولود تک کیشنه‌رم، سئل تک آخارام،
داغلار دا یولومو سدّ ائده بیلمز.
شهاب اوللام، شیطانلارا شاخارام،
«سهند»ین هئچ زامان باشی اَییلمز.

زمانه باشیمدا بوستان اکسه ده،
ظولمه، حقسیزلیگه باش اَیمه‌میشم.
آیاغیم مین کره داشا دیسه ده،
نه بودره‌مک، نه یورولماق بیلمیشم...

#بولود_قاراچورلو (سهند)
#شعر_اوجاغی
@SheirOcagi

اوستاد «شهریار»ا ایتحاف 1

▫️بیر الیمده قلم، بیر الده کاغیذ،
خیالیم بویلانیر دامدان، دوواردان.
باشیمدا یار باغین گزمک هاواسی،
قاپیلار باغلی‌دیر؛ یول تاپیم هاردان؟

حاصارین دالیندا کؤنول وئردیگیم-
او یار بیر باغ سالیب سویو بوللوردان.
هئیواسی کهربا، ناری یاقوتدان،
تاغی فیروزه‌دن، دیوانی گولدن.

ماوی ائیوانیندا ساز چالیر زؤهره،
بورجوندا یای چکیب دایانیب کئیوان.
لاییقی وار گیرم قصرینه من ده-
قیللی پاپاغیم‌لا، سینیق سازیم‌لان؟

او بو احتیشام‌لا، بو طمطراق‌لا،
قاپیسین اوزومه آچماسا نه وار؟
شاه‌لا رعیّتین صؤحبتی توتماز،
من بیر اوبالییام، اودور «شهریار».

گرک روخصت آلام «حیدر بابا»دان،
«یوخ» جاوابی بلکه منه وئرمه‌سین.
بیر ده «شهریار»دان فرمانیم واردیر،
«شاعیر بیر-بیرینی اولور گورمه‌سین؟»

یوخ من ده «سهند»م باشیم اوجادیر،
ایچیمده سؤنمه‌ین عشق آتشی وار.
منده صفاسی وار گوللو باهارین،
باشیمی توتسا دا قارا بولودلار.

لاله‌لی، چیچکلی چمنلریمده،
گلیب یورد سالسا دا چوبان-چولوقلار،
یالواررام صفامدان اوز دؤندرمه‌سین
«شهریار»ا لاییق شاه یوردوم دا وار.

کؤنلوم هاواسی‌یلا قول-قاناد آچیر،
«قاف قالاسی»ن آلماق دئیه اوجالیر.
قالخدیقجا بوی آتیر داش دووارلاردا،
آلیجی ترلانیم یورولور، قالیر.

دووارلار! دووارلار! پولاد اولساز دا،
آلماس میشار اوللام، کسیب بیچه‌رم.
کولونگون بورج آللام «فرهاد» بابانین،
«بیسوتون» اولساز دا، چاپیب کئچه‌رم.

دووارلار! دووارلار! یول وئرین کئچیم!
وولقانام، نفَسیم توفان قوپارار.
«بولود»ام، ساللانسا قاشیم-قاباغیم،
آغلارام، عالمی سئللر آپارار...

#بولود_قاراچورلو_سهند
#شعر_اوجاغی
@SheirOcagi

اوستاد «شهریار»ا ایتحاف 2

▫️بیر الیمده اود وار، بیر الیمده سو،
بیر اوزوم قارا قیش، بیری باهاردیر.
دوستا ایستَکلی‌یه ایستی قوینوم وار
دوشمنه باخیشیم شاختادیر، قاردیر.

ایچیمده بوغولور دادیم، هاراییم،
نه دووار هاییما های وئریر، نه یار.
نه داشدان سس چیخیر، نه ده قارداشدان،
سانکی بوشلوق‌لاردا ایتیر دالغالار.

بیلمیرم، بلکه ده بو بیر خیالدیر،
یا دا کی سئحیردیر منی آلدادان.
دئییرلر دیلبریم بوللور قصرینده،
داردادیر، آسیلیب تپه ساچیندان.

«سهند»ی قورخوتماز نه سارای، نه سئحر،
«محبّت» دئییلن بیر افسونوم وار.
هم اسمِ اعظم‌دیر، هم اسمِ شب‌دیر،
باغلی قاپیلاری اوزومه آچار.

آچیلین، آچیلین، باغلی قاپیلار!
محبّت نامینه، ایستک نامینه!
ارییین، تؤکولون دمیر قیفیللار،
کؤنول خاطیرینه، اورک نامینه!

گلیر قولاغیما اینیلتی‌لری
«بوردا بیر شئر داردا قالیب باغیریر»
دوغرودان دا من بیر مروّتسیزم،
قارداشیم داردادیر، منی چاغیریر.

چکیلین، چکیلین یول وئرین کئچیم!
اوره‌ییم آلیشیب، آلوو ساچارام.
«شهریار» بوینونا زنجیر وورالار،
چئینه‌رم، گمیررم، دارتیب آچارام.

ایشله‌ییر قولوما دمیر پاخلالار،
زنجیر قیجیقدیریر، سانجیر اتیمی.
جان قارداش، هله‌لیک باغیشلا منی!
دئیه‌سن اونوتدون اسارتیمی.

عزیز «شهریار»یم، باغیشلا منی!
اینجیمه،‌ داریلما! فیکرین هاردادیر؟
مروّتسیز دئییل سنین قارداشین،
آنجاق سنین کیمی او دا داردادیر.

اؤزون دئمه‌دین کی «بیزیم ائللرده-
وکیل موکّلین خرجینی چکر،
آنا، عشق اوجاغی سؤنمه‌سین دئیه،
اوره‌یین اریدر چیراغا تؤکر»؟

هر یانی بیلمیرم، بیزیم دیاردا،
هئچ ده خیال دئییل دوستلوق، محبت.
آنجاق ایشیق ساچان ایستی گونش ده،
بعضاً بولود آلتدا گیزله‌نر البت.

#بولود_قاراچورلو_سهند
#شعر_اوجاغی
@SheirOcagi

اوستاد شهریارا ایتحاف 3

▫️نه بیلیم بلکه ده سولطانیم، قارداش!
ایشین عیبی بیزیم اؤزوموزده‌دیر.
همین بو ایلقارین دوشگونویوک بیز،
گوناه یاددا دئییل، گوناه بیزده‌دیر.

بیر اوووج کلک باز، قومارباز ایلن،
پاک باز اولموشوق، پاک اوتوزموشوق.
مرد ایکن نامرده رحم ائله‌میشیک،
ایندی نامردلره مؤحتاج اولموشوق.

دولتلی‌یه ساخسی لازیم اولاندا،
ووروب سیندیرمیشیق اؤز کوزه‌میزی.
چیخدیغیمیز قینی بیَنمه‌میشیک،
بیز ائلی آتمیشیق، ائل آتیب‌بیزی.

ائلیمیزه نه گون آغلامیشیق بیز؟
باغین شاختا ووروب، بوستانین یاریب.
ائل بیزه نئیله‌سین، نه گون آغلاسین؟
آغزی اوچوقلاییب، دیلی باغلانیب.

ایندی اولان اولوب، کئچن‌لر کئچیب،
جالانان سو بیر ده کوزه‌یه دولماز.
دالدان آتیلان داش توپوغا دیَر،
گؤز یاشی تؤکمک‌له یارا ساغالماز.

بو گون من «سهند»ام، سن «شهریار»سان،
گل باشین اوجالداق قوجا تبریزین!
بیر کره یادلارین داشینی آتاق،
چکَک قایغیسینی اؤز ائلیمیزین.

وفاسیز گوللرین اوستوندن اوچاق،
قوناق صداقتلی ائل قوجاغینا!
سؤنمز عشقیمیزدن بیر پیوند سالاق،
ائلین شاختا وورموش گول بوداغینا!

شاعیریم! دونیانی نئجه گؤرورسن؟
دوز یئییب، دوز قابین سیندیرانلار وار.
قدیر بیلن یارا جان قوربان ائیله!
قدیر بیلمه‌یه‌نه حئییف‌دیر ایلقار.

اؤزگه چیراغینا یاغ اولماق بسدیر،
دوغما ائل‌لریمیز قارانلیقدادیر.
یانیب یاندیرمایاق یادین اوجاغین،
ائویمیز سویوقدور، قیشدیر، شاختادیر.

دئمیرم یانمایاق، آلوولانمایاق،
یانماسین نئیله‌سین یازیق پروانه؟
یانمایاق وفاسیز یارین اودونا،
یاناق ائلیمیزه، یاناق وطنه!

#بولود_قاراچورلو_سهند
#شعر_اوجاغی
@SheirOcagi