•·················•·················•
❓你對美孚嘅感覺係？
以前嘅我，只覺得美孚係一個夜晚返嚟瞓嘅地方，真係唔係好熱愛個隻，只當呢個地方係酒店，莫講話鄰里關係，就連美孚有乜嘢舖頭都唔係好清楚。

人大咗，回顧過去就發現好多嘢失去咗真係無得返轉頭。我一出世就開始喺度住，見住好多嘢都變咗，記憶中曾經快樂嘅地方都已消失。細個下晝放學冇嘢做，就會無無聊去荔園hea同睇戲（仲記得出面嗰檔煨魷魚嘅味道），新年勁無聊要留喺美孚就會去影都睇戲，有時又會去碌lane。以前未填海，中秋就會喺嗰啲石壆嘅窿窿嗰度玩蠟燭。

幸運嘅係，縱使美孚好多面貌經已改變，始終佢嘅一磚一瓦，仍然保留住個份熟悉嘅味道。平台甩皮甩骨嘅紙皮石櫈、地下跣死人嘅紅階磚、矇查查嘅波波球型燈：望到，見到，就回想到，那份回憶中的美好。
•·················•·················•
❓有乜嘢想同一班街坊講呀？
點解我哋要堅持做孚聲，除咗因為真係好L愛香港同呢個社區外，最緊要係我哋想凝聚一班街坊！我哋團隊只係開頭，最重要都係你哋嘅參與，為社區出一分力，希望你哋會介紹孚聲比隔籬鄰舍認識！美孚雖然係一個好有歷史嘅社區，但絕對唔老土囉！

堅守心裡信念已不枉 堅守心裡價值的嚮往 —— 一切在心中，共勉之。
•·················•·················•

另外，想藉住今次嘅機會邀請各界專才加入「孚聲義工團隊」，我哋唔同嘅崗位都需要有人幫手，一定會「唯才是用」架，所以記住唔好怕羞，有興趣、想join就PM我哋啦（我哋唔係直銷啊😆）。又或者你想投稿、寫專欄、甚至落廣告，都可以PM我哋㗎！

_______________________________
📍TG: t.me/MF_Voice_Channel
📍IG: instagram.com/meifoovoice
📍MeWe: mewe.com/join/mfvoice
📍WhatsApp 報料熱線: https://wa.me/+85261789665

#孚聲 #美孚 #美孚新邨 #荔枝角 #清麗苑 #盈暉台 #四小龍 #報紙 #區報 #免費 #資訊 #小店 #生活 #健康 #新聞 #投稿 #文章 #訪問 #招人 #義工 #攝影 #寫作 #興趣 #社區