Намеснік кіраўніцы Кабінета Павел Латушка сустрэўся са старшынём Камітэта па справах ЕС польскага Сейма Міхалам Кабоскам

На сустрэчы Павел Латушка адзначыў небходнасць выпрацоўкі эфектыўнай стратэгіі ЕС і канкрэтных дзеянняў з боку ЕС ў дачыненні да Беларусі пры лідзіруючай ролі Польшчы.

Таксама намеснік кіраўніцы Кабінета прапанаваў стварыць групу стратэгічных партнёраў дэмакратычнай Беларусі з краін ЕС і заклікаў інвеставаць у беларускае грамадства, каб з Беларусі не зрабілі Паўночную Карэю.

Міхал Кабоска пацікавіўся патрэбамі беларускага грамадства і папрасіў акрэсліць магчымыя напрамкі падтрымкі з боку еўрапейскай супольнасці. Павел Латушка назваў сярод прыярытэтных:

☑️ фінансаванне незалежных медыя, грамадзянскіх структур і ініцыятыў;

☑️ прызнанне інстытутаў беларускіх дэмсіл;

☑️ прыцягненне Лукашэнкі да адказнасці за міжнародныя злачынствы;

☑️ адкрытасць для беларусаў: не зачыняць межы, ствараць больш магчымасцей для атрымання віз;

☑️ падтрымка нацыянальнай ідэнтычнасці беларусаў.

Латушка і Кабоска таксама закранулі пытанне гарманізацыі санкцый супраць рэжыму Лукашэнкі і Расіі.

Міхал Кабоска балаціруецца ў Еўрапарламент. У выпадку абрання ён будзе намагацца трымаць пытанне Беларусі ў фокусе Еўрапарламента, які з'яўляецца адным з найважнейшых партнёраў дэмсіл.

@CabinetBelarus

Прадстаўніца па сацыяльнай палітыцы Кабінета Вольга Гарбунова возьме ўдзел у Кангрэсе, прысвечаным беларускім палітзняволеным

Кангрэс #WithoutJustCause пачне сваю працу ў Празе 23 мая.

У мерапрыемстве таксама возьмуць удзел чальцы вядучых беларускіх праваабарончых арганізацый і гуманітарных ініцыятыў, беларускія эксперты і эксперткі ў галіне права, беларускія і замежныя палітыкі і дыпламаты, а таксама былыя палітзняволеныя.

Вольга Гарбунова: «Мяркую, пасля падзей 2020 года экспертна-палітычнага форуму такога маштабу яшчэ не было. І ён нам патрэбен як ніколі, бо за гэты час мы сталі сведкамі беспрэцэдэнтнага крызісу.

Рэжым фактычна перакрыў кісларод праваабарончаму руху, а рэпрэсіі набылі тытанічныя маштабы. І мы вымушаныя шукаць новыя падыходы да падтрымкі рэпрэсіраваных і працы ў цэлым.

Вызваленне палітзняволеных – не палітычная справа і не дыскусійнае пытанне. Гэта гуманітарная місія.

Я ўскладаю вялікія надзеі на экспертаў, якія далучацца да кангрэса, і спадзяюся, што нашая дэмакратычная супольнасць яшчэ больш згуртуецца для вырашэння нашай агульнай праблемы».

Кангрэс праводзіць Офіс дэмакратычных сіл Беларусі ў Чэшскай Рэспубліцы пры падтрымцы Амбасады ЗША ў Чэхіі і пад патранажам рэктаркі Карлавага ўніверсітэта.

📌 Журналісты могуць акрэдытавацца на мерапрыемства праз пошту czechia.office@tsikhanouskaya.org

@CabinetBelarus

Лукашэнка – у фокусе ўвагі Мінюста Польшчы

Намеснік кіраўніцы Кабінета Павел Латушка сустрэўся з міністрам юстыцыі і генпракурорам Польшчы Адамам Боднарам. Галоўнай тэмай сустрэчы была магчымая падтрымка Польшчай ініцыятывы НАУ аб прыцягненні Лукашэнкі і яго памагатых да крымінальнай адказнасці праз Міжнародны крымінальны суд за злачынствы супраць чалавечнасці.

Павел Латушка праінфармаваў Адама Боднара аб драматычным становішчы беларускага грамадства, большасць якога выступіла супраць дыктатара Лукашэнкі, вялікай колькасці ахвяр катаванняў, згвалтаванняў, гвалтоўных знікненняў, пазбаўлення волі, забойстваў, дэпартацыі.

Адам Боднар мае багаты досвед у якасці віцэ-прэзідэнта праўлення Хельсінкскага фонду па правах чалавека і амбудсмена Польшчы. Займаючы гэтыя пасады, ён знаходзіўся ў кантэксце праваабарончай сітуацыі ў Беларусі.

Міністр юстыцыі Польшчы адзначыў, што тэма злачынстваў супраць чалавечнасці, якія ўчыняюцца ў Беларусі, знаходзіцца ў фокусе яго ўвагі, і ён ведае аб маштабах рэпрэсій. Боднар адзначыў, што асабіста знаёмы з Анджэем Пачобутам і Алесем Бяляцкім, якія сталі аднымі з тысяч палітвязняў у Беларусі.

Міністр праінфармаваў аб рэформе польскага заканадаўства, якая паўплывае на магчымасць больш шырокага прымянення прынцыпу ўніверсальнай юрысдыкцыі ў Польшчы і, адпаведна, прыцягнення вінаватых за міжнародныя злачынствы нацыянальнымі судамі Польшчы незалежна ад месца іх учынення. Гэты падыход можа быць прыменены да тых, хто ўчыняе злачынствы ў Беларусі.

Боднар выказаў гатоўнасць Генпракуратуры Польшчы садзейнічаць расследаванню спраў у рамках універсальнай юрысдыкцыі, ахвярамі ў якіх з'яўляюцца грамадзяне Беларусі.

Міністр паведаміў, што яго ведамства прааналізуе магчымасць рэалізацыі ініцыятывы НАУ па прыцягненні Лукашэнкі да адказнасці ў Міжнародным крымінальным судзе. Мінюсту Польшчы перададзены матэрыялы па фактах злачынстваў супраць чалавечнасці ў Беларусі.

@CabinetBelarus

Перамовы ў Дзярждэпартаменце, Белым доме, Кангрэсе, ААН

Намеснік кіраўніцы Кабінета Валер Кавалеўскі завяршыў працоўны візіт у ЗША, які доўжыўся з 9 па 17 мая.

У Бостане прадстаўнік па замежных справах Кабінета ўзяў удзел у дыскусіі ў Цэнтры Дэвіса Гарвардскага ўніверсітэта на тэму пагрозы незалежнасці Беларусі з боку Расіі, а таксама сустрэўся з мясцовай беларускай дыяспарай.

У Нью-Ёрку Валер Кавалеўскі меў кансультацыі па тэматыцы ААН і займаўся падрыхтоўкай да візіту у Нью-Ёрк кіраўніцы Кабінета Святланы Ціханоўскай для ўдзелу ў мерапрыемствах у рамках сесіі Генасамблеі ААН у верасні. Намеснік кіраўніцы Кабінета праінфармаваў партнёраў аб нарастанні ваеннай пагрозы з боку рэжыму Лукашэнкі і пагаршэнні сітуацыі з палітзняволенымі.

У Вашынгтоне Кавалеўскі правёў:

☑️ перамовы ў Дзярждэпартаменце ЗША па пытаннях двухбаковых адносін, супрацоўніцтва ў міжнародных арганізацыях (ААН, НАТА, АБСЕ), удзелу Святланы Ціханоўскай у саміце НАТА ў ліпені. Прадстаўнік Кабінета абмеркаваў захады па міграцыйнай праблематыцы, у тым ліку падоўжанне тэрміну дзеяння амерыканскіх віз для грамадзян Беларусі. Адной з тэм перамоў было ўзмацненне санкцый і спалучэнне іх з выкарыстаннем механізмаў прыцягнення рэжыму Лукашэнкі да адказнасці за міжнародныя злачынствы;

☑️ перамовы ў Радзе нацыянальнай бяспекі Белага дома;

☑️ сустрэчу ў Агенцтве ЗША па міжнародным развіцці на тэму павелічэння дапамогі для грамадзянскай супольнасці і незалежных медыя Беларусі;

☑️ перамовы ў Сенаце і Палаце прадстаўнікоў Кангрэса ЗША па прасоўванні новай версіі Акта аб дэмакратыі, правах чалавека і суверэнітэце Беларусі, па ўзгадненні сумесных дзеянняў у парламенцкім супрацоўніцтве. Кавалеўскі праінфармаваў аб выбарах Каардынацыйную Раду і падрыхтоўцы да кампаніі 2025 года;

☑️ сустрэчы з дыпламатычным корпусам у Вашынгтоне для інфармавання аб сітуацыі ў Беларусі і міжнародных намаганнях дэмакратычнага руху.

@CabinetBelarus

Слова з-за кратаў

У Дзень палітвязня, 21 траўня, у Музеі Вольнай Беларусі, які з'яўляецца праектам Народнага антыкрызіснага ўпраўлення, Вольныя Купалаўцы зладзяць дабрачынны паказ тэатральнага праекта.

Акторы прачытаюць вершы, апавяданні і фрагменты лістоў беларускіх палітвязняў, аб’яднаныя ў адмысловую праграму «Слова з-за кратаў» і аздобленыя пяшчотнымі малюнкамі Аляксандры Канафальскай.

Набыўшы квіток, вы аўтаматычна ўдзельнічаеце ў важнай справе. Дзякуючы ініцыятыве «Палітвязынка» ўсе грошы ад продажу квіткоў пойдуць на дапамогу дзецям і сваякам палітвязняў.

Квіткі можна набыць па спасылцы.

Кожны, хто набудзе квіток на тэатральны праект «З-за кратамі», атрымае кнігу твораў беларускіх палітвязняў «Турэмны зборнік». У кнігу ўвайшлі вершы, казкі, успаміны, апавяданні і публіцыстычныя тэксты 52 беларусаў, зняволеных па палітычна матываваных крымінальных справах, напісаныя ў 2020-2023 гадах.

Падтрымайце беларускіх палітвязняў.

Музей Вольнай Беларусі, Варшава, Foksal 11
21 траўня, 19:00.

«Працуем, каб падобныя папраўкі былі прынятыя ў іншых краінах Еўрасаюза»

Нядаўна польскі Сейм прыняў папраўку, якая дапаможа беларусам паступаць у польскія ўніверсітэты без даведкі ад Міністэрства адукацыі рэжыму.

Прадстаўніца па нацыянальным адраджэнні Аб’яднанага Пераходнага Кабінета Аліна Коўшык накіравала на імя міністра вышэйшай адукацыі Польшчы Дарыюша Вячоркі ліст з просьбай як мага хутчэй увесці гэтую папраўку ў дзеянне.

Як адзначыла прадстаўніца Кабінета, гэта пазбавіць беларускіх абітурыентаў і студэнтаў сур’ёзных бюракратычных праблем пры паступленні ў польскія ВНУ. (Праблемы гэтыя звязаныя са штучнымі перашкодамі з боку рэжыму ў выдачы дакументаў.)

Таксама Аліна Коўшык папрасіла міністра Дарыюша Вячорку яшчэ раз паведаміць рэктарам польскіх ВНУ аб магчымасці прыёму ад беларускіх абітурыентаў і студэнтаў дакументаў без апастыляў.

Аліна Коўшык: «Мы працуем, каб падобныя папраўкі былі прынятыя ў іншых краінах Еўрасаюза. Спадзяёмся, рашэнне польскага Сейма стане добрым прыкладам для іншых нашых партнёраў, паспрыяе выбару беларускіх школьнікаў на карысць еўрапейскіх універсітэтаў, а не расійскіх».

@CabinetBelarus

«Мы – голас беларускіх палітвязняў, і нам нельга маўчаць ні дня»: Святлана Ціханоўская – да дня салідарнасці з палітвязнямі

Святлана Ціханоўская: «Сёння дзень, які адгукаецца болем у сэрцы кожнага з нас. Я не магу проста прамовіць слова «палітвязень» – яго хочацца крычаць ад болю і злосці. Болю, бо такіх зняволеных у краіне сёння як менш паўтары тысячы. Яшчэ амаль столькі ж прайшлі праз турмы, катаванні, знявагу – і ўжо вярнуліся на волю. Але з падарваным здароўем і страчанымі гадамі жыцця. Злосць жа перапаўняе мяне ад таго, што рэпрэсіі працягваюцца – і людзей бяруць у закладнікі. Праз імкненне забіць свабоду слова, свабоду меркаванняў рэжым пераследуе народ.

Мы імкнуліся шмат што зрабіць, каб змяніць сітуацыю – публічна і не публічна. Але рэжым не мае цікавасці ў вызваленні палітвязняў. Для Лукашэнкі людзі – гэта проста расходны матэрыял, які не мае каштоўнасці. Менавіта таму ўжо шэсць зняволеных памерлі за кратамі.

Мы абавязаныя штодзень шукаць магчымасці, каб вызваліць нашых родных і сяброў з турмаў. А пакуль яны ў няволі, мы павінны іх падтрымліваць, і павінен гэта рабіць кожны з нас. Мы – голас беларускіх палітвязняў, і нам нельга маўчаць ні дня. Мы можам быць стомленымі і разгубленымі ад таго, што адбываецца навокал. Але людзі, якія знаходзяцца за кратамі, ахвяруюць кожным днём жыцця за вольную Беларусь. І сёння мы з вамі – іх голас, іх надзея. Мы не маем права падвесці нашых герояў».

Глядзіце відэа, каб паслухаць зварот цалкам.

Швецыя папоўніць Міжнародны гуманітарны фонд для падтрымкі беларускіх палітзняволеных, створаны па ініцыятыве Святланы Ціханоўскай

Аб гэтым заявіў міністр міжнароднага развіцця Швецыі Ёхан Форсель на Стакгольмскай канферэнцыі па Беларусі.

Міністр таксама адзначыў:

«Швецыя выразна падтрымлівае дэмакратычную Беларусь. Сёння – Дзень салідарнасці з палітвязнямі Беларусі. Трэцяя гадавіна смерці Вітольда Ашурка. Пасля было яшчэ 5 ахвяр, якія памерлі ў турме. Мы не павінны забывацца пра паўтары тысячы сённяшніх палітзняволеных. Іх там катуюць. Яны без сувязі з роднымі, у перапоўненых камерах. Без медычнай дапамогі.

Ваша справа – наша справа!».

@CabinetBelarus

Наш адказ рэжыму ў Дзень палітвязняў. У дачыненні да 39 «суддзяў» рэжыму накіраваныя абгрунтаванні ўвядзення санкцый

У адрас урада Канады перададзеныя чарговыя санкцыйныя прапановы, падрыхтаваныя з мэтай узмацнення ціску і адказнасці прадстаўнікоў рэжыму за парушэнне нормаў міжнароднага права.

Да цяперашняга часу ўрад Канады прыняў 14 санкцыйных пакетаў у дачыненні да фізічных і юрыдычных асоб рэжыму Лукашэнкі, што па колькасці пакетаў з'яўляецца адным з найбольшых паказчыкаў сярод краін-партнёраў дэмакратычнай Беларусі. Новыя прапановы накіраваныя ў развіццё дамоўленасцяў падчас візіту Святланы Ціханоўскай у Канаду 14-15 красавіка 2024 года.

Мы накіравалі для ўвядзення санкцый спісы з «суддзяў» і прапагандыстаў рэжыму Лукашэнкі з адпаведнымі абгрунтаваннямі і персанальнымі звесткамі прыслужнікаў рэжыму, а таксама пералік арганізацый, якія дзейнічаюць на тэрыторыі Беларусі і спрыяюць ваеннай агрэсіі Расіі супраць Украіны, у тым ліку шэраг прадпрыемстваў ВПК і прапагандысцкіх рэсурсаў.

У прыватнасці, у перададзеным намі канадскаму боку спісе з 39 «суддзяў» рэжыму, ёсць такія адыёзныя персоны як:

– суддзя гомельскага суда Анатоль Сотнікаў, які асудзіў больш за 20 палітвязняў, у тым ліку прысудзіў велізарныя тэрміны пазбаўлення волі беларускім партызанам, якія спынялі рух цягнікоў агрэсара ў бок Украіны ў пачатку ўварвання расійскіх войскаў;

– на працяглыя тэрміны зняволення беларускіх партызан асудзіў і магілёўскі суддзя Ігар Шведаў, а таксама адправіў на 6 гадоў у калонію ўзмоцненага рэжыму журналіста-фрылансера «Радыё Свабода» Андрэя Кузнечыка;

– суддзя суда Маскоўскага раёна г. Брэста Яўген Брэган адправіў у засценкі больш за 20 палітвязняў, у тым ліку вынес прысуд маці дваіх непаўналетніх дзяцей Паліне Шарэнда-Панасюк;

– суддзя Ленінскага раённага суда г. Мінска Таццяна Шоцік, якая асудзіла 15 палітвязняў, у тым ліку на яе сумленні прысуд у дачыненні да загінулага ў зняволенні Ігара Ледніка;

– суддзя Ленінскага раённага суда г. Мінска Юлія Шут, якая незаконна асудзіла прынамсі 10 палітвязняў;

– суддзя Жлобінскага раённага суда Ірына Прадун, якая незаконна асудзіла 10 палітвязняў, у тым ліку 24-гадовага Дзмітрыя Гопту, які мае асаблівасці развіцця;

а таксама іншыя «рэкардсмены» па прысудах палітвязням, якія прадстаўляюць так званы судовы корпус дыктатара Лукашэнкі.

Абгрунтаванні прыняцця санкцый у дачыненні да дадзеных «суддзяў», а таксама 26 прапагандыстаў рэжыму раней былі перададзеныя кампетэнтным органам ЕС, для ўключэння іх у санкцыйны пералік Еўрасаюза.

Мы ўдзячныя ўраду Канады за сістэмную і паслядоўную палітыку ў пытанні санкцыйнага ціску і прыцягнення да адказнасці прадстаўнікоў рэжыму Лукашэнкі за ўчыненыя злачынствы супраць чалавечнасці, ваенныя злачынствы і іншыя парушэнні нормаў міжнароднага права.

Сродкі, сабраныя падчас марафону салідарнасці «Нам не ўсё адно», цалкам размеркаваныя паміж фондамі і арганізацыямі дапамогі палітзняволеным

Пра гэта інфармуе Прадстаўніцтва па сацыяльнай палітыцы Аб’яднанага Пераходнага Кабінета

Сродкі атрымалі наступныя фонды і арганізацыі:

▪️Медыяпраект дапамогі беларускім палітзняволеным жанчынам «Палітвязынка» — 5 000 еўра (аўдыт цалкам пройдзены)

▪️Фонд Медыцынскай Салідарнасці Беларусі — 5000 еўра (аўдыт цалкам пройдзены)

▪️Дабрачынная арганізацыя Littouwin LIONS CLUB — 15 000 еўра (аўдыт цалкам пройдзены)

▪️Беларуская Рада культуры — 15 000 еўра (аўдыт пройдзены часткова)

▪️Фонд дапамогі беларусам у Літве Razam — 28 800 еўра (аўдыт цалкам пройдзены)

▪️Праваабарончая ініцыятыва дапамогі палітзняволеным Dissidentby — 28 000 еўра (аўдыт пройдзены часткова)

▪️Анархічны чорны крыж — Беларусь — 40 000 еўра (аўдыт цалкам пройдзены)

▪️Беларуская асацыяцыя палітзняволеных «Да волі» — 40 000 еўра (аўдыт не пройдзены)

▪️Дабрачынны фонд «Краіна для жыцця» — 60 000 еўра (аўдыт пройдзены часткова)

▪️Фонд Беларускай салідарнасці BYSOL — 100 000 еўра (аўдыт цалкам пройдзены)

▪️Ініцыятыва BY_help — 206 071,63 еўра (аўдыт не пройдзены)

Нагадаем, падчас марафону «Нам не ўсё адно» было сабрана 574 617 еўра. Пасля аплаты камісіі на агульным рахунку засталося 545 740,22 еўра. У тым ліку каля 12 000 еўра захоўвалася ў крыптавалюце.

@CabinetBelarus

«Арганізацыі справіліся з гэтым выклікам, захавалі кантакт з людзьмі ўнутры краіны»

Прадстаўніца па сацыяльнай палітыцы Кабінета Вольга Гарбунова – аб выніках размеркавання сродкаў, сабраных падчас марафону салідарнасці з палітзняволенымі «Нам не ўсё адно»:

«Усе сродкі размеркаваны, на рахунку нуль. Гэта сапраўды быў і ёсць няпросты досвед. Многія думаюць, што марафон скончыўся даўно, але насамрэч ён толькі падыходзіць да канца.

За гэты амаль год нам удалося ўкараніць сістэму Назіральнай рады, папрацаваць з вялікай колькасцю беларускіх арганізацый, разам прайсці ўсе юрыдычныя цяжкасці. Але галоўнае, сотні сем'яў палітзняволеных атрымалі дапамогу – і гэта ўсё дзякуючы беларусам і беларускам.

Так, гэта сапраўды расцягнулася ў часе, але гэты досвед дапаможа ў далейшым больш аператыўна размяркоўваць дапамогу.

Яшчэ 5 арганізацыям засталося прайсці фінальны аўдыт. У найбліжэйшы час Назіральная рада выйдзе з падрабязнай справаздачай аб правераных патрачаных сродках, сабраных падчас марафону.

Фонды працавалі ў аўральным рэжыме. Сваякі палітвязняў у студзені сутыкнуліся з новым вітком рэпрэсій, калі за атрыманне падтрымкі сілавікі затрымалі сотні людзей і ўзбудзілі крымінальныя справы.

Фондам нічога не заставалася, як адаптавацца да гэтай сітуацыі, адшукаць новыя інструменты аказання дапамогі. Гэтыя ўмовы ўплывалі на тое, як хутка дапамога даходзіла да беларусаў. Тым не менш арганізацыі справіліся з гэтым выклікам, захавалі кантакт з людзьмі ўнутры краіны – і дапамога ўсё роўна бесперабойна паступала ў Беларусь.

Сёння, 21 мая, – Дзень салідарнасці з беларускімі палітзняволенымі. І ў гэты дзень, і ва ўсе астатнія мы будзем працаваць, каб пра палітзняволеных памяталі. Будзем акумуляваць дапамогу для іх, шукаць шляхі іх вызвалення. Гэта застаецца штодзённай працай соцень людзей».

@CabinetBelarus

Намеснік кіраўніцы Кабінета Павел Латушка сустрэўся з дырэктарам консульскага дэпартамента МЗС Польшчы

Абмяркоўвалася візавая палітыка Польшчы ў дачыненні да Беларусі

Павел Латушка: «Гэтая тэма хвалюе многіх грамадзян нашай краіны, як у Беларусі, так і за яе межамі. Галоўнае, што мы пачулі падчас гэтай сустрэчы:

1️⃣ Польскі ўрад, нягледзячы на тое, што прымае актыўныя дзеянні для ўзмацнення бяспекі, як на знешніх межах, так і ўнутры краіны, захоўвае падыход максімальнага садзейнічання беларускай грамадзянскай супольнасці.

2️⃣ Польшча будзе распрацоўваць змены ў візавым заканадаўстве. Для стварэння адзіных нормаў і для таго, каб консулы разумелі, як дзейнічаць. Працу над новым Законам плануюць пачаць у чэрвені. У жніўні ён будзе апублікаваны на партале заканадаўчых актаў Польшчы. Пасля гэтага будзе магчымасць уносіць нашыя прапановы ў рамках грамадскай дыскусіі. Важна, каб мы аб'ядналіся і ўнеслі комплексныя прапановы.

3️⃣ Гуманітарныя візы па-ранейшаму выдаюцца толькі адзін раз і толькі грамадзянам Беларусі, у якіх ёсць рызыка затрымання, арышту ці ўзяцця пад варту. Г.зн. тым, каму патрэбная тэрміновая дапамога, каб з'ехаць з краіны. У нас працуе дастаткова эфектыўная дарожка візавай падтрымкі ў такіх выпадках.

4️⃣ У Польшчы сёння атрымалі міжнародную абарону больш за 8100 грамадзян Беларусі. Дырэктар консульскага дэпартамента запэўніла, што калі ў грамадзян Беларусі нешта здарыцца з дакументамі аб статусе міжнароднай абароны ў якой-небудзь трэцяй краіне, то яны маюць права звярнуцца да польскага консула для вяртання ў Польшчу і аднаўлення дакументаў. Што да іншай консульскай дапамогі, то тут ёсць пэўныя цяжкасці, але МЗС гатовы разглядаць індывідуальныя выпадкі.

5️⃣ Кейс Андрэя Гнёта, які знаходзіцца ў сербскай турме, пад пагрозай выдачы ў Беларусь, знаходзіцца ў фокусе знешнепалітычнай увагі польскага МЗС. Мы разлічваем на падтрымку польскага боку.

6️⃣ Праблемы, якія ўзніклі ў выніку закрыцця праграмы Poland Business Harbour, будуць абмяркоўвацца пасля завяршэння праверкі Вышэйшай кантрольнай палатай у МЗС Польшчы з адзелам двух міністэрстваў: рэгіянальнай палітыкі і сям'і. Пытанне ўзята пад увагу і мы будзем прасоўваць яго далей.

7️⃣ МЗС Польшчы даў ацэнку, што ўсё ж адбылося некаторае паляпшэнне ў працы візавых цэнтраў у Беларусі. Праблемы з чэргамі і з атрыманнем віз звязаныя найперш з тым, што рэжым Лукашэнкі выдварыў вялізную колькасць польскіх консулаў. Вядома, ускладняе сітуацыю і сезоннасць: зараз асабліва вялікі наплыў заявак на візы. Але консульствы імкнуцца, каб вырашыць усе праблемы».

@CabinetBelarus