法庭文字直播台

#區域法院第廿二庭
#李慶年法官
#網上言論 #入警總殺高層 #審訊 [1/4]

下午進度

👤周 (51)

控罪：煽惑他人有意圖而傷人
被控於或約於2020年12月3日，在香港意圖使香港警務人員身體受嚴重傷害，而煽惑他人非法及惡意傷害該等香港警務人員。

辯方代表： #田奇睿大律師

===========
[14:36] 開庭，被告出庭作供

🔸辯方主問
（部份個人資料省略）被告從事物流業，2000年開設公司，2016年倒閉，個人破產，2017年轉職夜間保安員，案發當日做同樣工作。

2018年被告開始睇精神科醫生，患有適應障礙症，需要食藥；被告單身，與二弟和二弟的兩名兒女同住，2019年10月尾，二弟突然去世，照顧兩名小朋友的責任全落在被告身上；到2020年發生疫情，工作地點的住客多投訴，與住客多咗磨擦，發覺脾氣暴躁咗（舉出在日常生活中的幾個例子）。

2020年在網上見到周潤發穿著全黑行山，畀咗like，有人留言「你班黑暴遲早畀人拉」，就留言嗌交，以前係唔會咁，會避開。

警方檢取咗兩部電話，P5 Samsung Galaxy S20 & P6 Samsung Galaxy Note 8，警方用S20 登入Facebook ，12月3日前，被告係用Note 8 登入Facebook 。

留言的貼文係與黎智英有關，被告唔係直接識佢，2003～2006年期間，被告的運輸公司替一間製衣廠工作，在一個午宴上遇到黎智英，知道黎與製衣廠有關，覺得黎會與他們這些小公司合作，有好印象。

2020年12月2日晚要返夜班，工作至3號凌晨4～5點，有空玩手機，當時睇緊其他嘢，見到Facebook 有通知「今晚又爆大鑊」，撳入去睇，見到有貼文寫「今晚又爆大鑊，告黎智英CLS」，當時無留意係林卓廷Facebook ，事後先知，當刻情緒覺得社會件事唔係完咗，點解又拉人？覺得警方唔公道，好嬲，就寫咗兩句句子，其實係連住，當時斷咗，所以再發出，變成兩段，寫咗句子後就離開Facebook ，睇第二啲嘢。

寫留言時係無特別原因而寫呢啲字，諗到就寫。2020年12月7日，警方在錄影會面問呢啲說話/詞語點解，當刻寫留言係無思考無計劃，去到落口供，佢一定要畀答案，咪諗原因，承認留言字眼比較嚴厲，在網上無乜芥蒂，就講咗出嚟，寫完之後已經無再諗返。

3號07:30收工後無特別事發生，食完早餐就瞓覺，被告的表妹在下午發訊息畀佢，無睇到，直到晚上6～7點，表妹打電話畀被告，講返訊息內容，問被告做乜嘢發埋咁嘅訊息，網上有人公審他，要起底，叫被告快啲删除留言。被告嘗試揾返留言，揾唔到，揾到個制delete Facebook account ，於是就删除帳戶，删除埋Note 8 手機上的 Facebook App，諗住息事寧人，以為從此在Facebook 世界消失。第二日，表姐截圖畀被告，話《大公報》講他的留言，回覆已經delete 咗，由得佢哋講啦，無辦法。

睇控方文件冊，確認截圖係林卓廷的Facebook ，12月3號當日無留意係林的Facebook ，係睇到表妹的WhatsApp 截圖先知。

講返兩個世姪的照顧問題，事源係二弟返大陸開餐廳，娶了大陸太太，2006年他生意失敗，返來香港，同年姪仔出世後，二弟太太有抑鬱症，曾經抱住小朋友坐在天台，傾談後知道她唔適應香港生活，唔鐘意香港，後來離開咗，二弟的情緒變得好差，經常打小朋友，當時被告有自置的物業，就叫二弟搬嚟一齊住，照顧小朋友，和到被告的公司幫手，後來被告的生意轉差，二弟去咗打工，被告較為自由，開始照顧小朋友的日常生活和學業。

呈上一份18頁的文件，內容係被告與一間補習社的WhatsApp 對話截圖，被告姪仔係在該補習社上堂。

在錄影會面的內容中，有關兩姪兒的一段講咗大話，因為當時唔知會被控咩罪，唔知有無得保釋，一時好亂，想同佢哋畫清關係，想警察只係攪我就算，就咁講咗。

第二次錄影會面主要講禁制令，當日理解嘅高等法院禁制令，係唔可以將警察嘅資料放上網，俗稱起底，唔清楚其他內容。

第三次錄影會面係針對留言二，解釋返咩意思，實在在12月3日係無仔細諗過，2020年嘅情緒好暴躁，好擔憂小朋友從網上得到唔知咩嘅資訊，會學壞，自己又無乜娛樂，雖然有女朋友，但分擔唔到，信仰亦無乜幫助。

12月3日嘅留言，被告自己係無任何意圖作出暴力傷害，亦無意圖煽惑叫他人傷害警察，唔相信如果有人睇完留言會認真去做，就算有亦會叫佢唔好做，無參與政治活動，無參與政黨；被告認知在Facebook 係發噏風，講完就算。

主問完畢，詳情後補。

案件押後至明日(17/1)09:30 續審，控方盤問。

2.3K viewsedited 09:27