ቅዱስ ያሬድ ማኅሌታይ

232 viewsE, 01:25

እንኳን ለብርሃናተ ዓለም ቅዱስ ጴጥሮስ ወቅዱስ ጳውሎስ በዓለ ዕረፍት መታሰቢያ በሰላም አደረሳችኹ!!

ሐምሌ ፭ ቀን ብርሃናተ ዓለም ቅዱስ ጴጥሮስና ንዋይ ኅሩይ ቅዱስ ጳውሎስ በኔሮን ቄሳር ዘመን ሰማዕትነት የተቀበሉበት በዓለ ዕረፍት ይዘከራል፡፡ በተጨማሪም የጾመ ሐዋርያት ፋሲካ ይከበራል፡፡

ቅዱስ ጴጥሮስ የቀድሞ ስሙ ስምዖን ይባል ነበር፡፡ ጌታችን መድኀኒታችን ኢየሱስ ክርስቶስ ጴጥሮስ ብሎ ጠርቶታል፡፡ ትርጓሜው ዓለት (መሠረት) ማለት ነው፡፡ ቅዱስ ጴጥሮስ ከጌታችን መድኀኒታችን ኢየሱስ ክርስቶስ እግር ሥር ተቀምጦ በዋለበት ውሎ ባደረበት አድሮ፣ የቃሉን ትምህርት ሰምቶ የእጁን ተአምራት አይቶ በአንብሮተ እድ ሥልጣነ ክህነትን ተቀብሎ ለስብከተ ወንጌል የተላከ ሐዋርያ ነው፡፡

ቅዱስ ጳውሎስ ስሙ ሳውል ይባል ነበር፡፡ ክርስትናን ተቀብሎ ወንጌልን ለመስበክ ሲነሣ ጳውሎስ ተብሎ ተጠርቷል፡፡፡ ትርጓሜው ብርሃን፣ አመስጋኝ፣ ደስታ፣ ልሳነ ዕፍረት፣ ልሳነ ክርስቶስ፣ ሰላም፣ ፍቅር ማለት ነው። ሳውል ገማልያል ከሚባለው መምህረ ኦሪት ሕገ ኦሪትንና መጻሕፍተ ነቢያትን ተምሯል፡፡ ለሕገ ኦሪት ቀናኢ ከመኾኑ የተነሣም የክርስቶስ ተከታዮችን ዅሉ ያሳድድ ነበር፡፡ ቅዱስ እስጢፋኖስ በድንጋይ ተደብድቦ በሰማዕትነት በሞተ ጊዜ ቅዱስ ጳውሎስ የገዳዮቹ ልብስ ጠባቂ ነበር (ሐዋ. ፯፥፶፰፤ ፳፪፥፳)፡፡ ክርስቲያኖችን እያሳደደ ሳለ በደማስቆ ጎዳና በታላቅ ብርሃን በተገለጠለት በጌታችን መድኀኒታችን ኢየሱስ ክርስቶስ ፍቅር ልቡ ተነክቶ ከአሳዳጅነት ወደ ተሳዳጅነት የተለወጠ በጌታችን መድኀኒታችን ኢየሱስ ክርስቶስ ንዋይ ኅሩይ(የተመረጠ ዕቃ) ተብሎ የተጠራ ታላቅ ሐዋርያ ነው፡፡

ቅዱስ ጴጥሮስ ኹለት መልእክታትን ሲጽፍ ቅዱስ ጳውሎስ ደግሞ ፲፬ መልእክታትን ጽፏል፡፡ ቅዱስ ጴጥሮስ በጥላው ቅዱስ ጳውሎስ ደግሞ በልብሱ ድውያንን ፈውሰዋል፡፡ (የሐዋ፭፤፲፭ የሐዋ፲፱፤፲፪)፡፡

ሊቀ ሐዋርያት ቅዱስ ጴጥሮስ ሐምሌ ፭ ቀን ፷፯ ዓ.ም. በ ፹፭ ዓመቱ በሮም ከተማ በመስቀል ላይ ቁልቁል ተሰቅሎ በሰማዕትነት አርፏል፡፡ የሮም ክርስቲያኖች ሥጋውንም በሮም ከተማ አሳርፈውታል፡፡ በመቃብሩ ላይም ንጉሥ ቆስጠንጢኖስ ቤተ ክርስቲያን አሠርቶበታል፡፡ ንዋይ ኅሩይ ቅዱስ ጳውሎስም በምድረ አሕዛብ ወንጌልን ሰብኳል፡፡ በንጉሥ ኔሮን ትእዛዝ ተይዞ በሮም ከተማ አንገቱን በሰይፍ ተቀልቶ በሰማዕትነት አርፏል፡፡ ክርስቲያኖችም በየዓመቱ ከመቃብሩ በረከት ለማግኘት ወደ ባቲካኖ(Vatican) እየሄዱ ይሳለማሉ፡፡

የሀገራችን ኢትዮጵያ ነገሥታትና ሊቃውንት ለብርሃናተ ዓለም ቅዱስ ጴጥሮስ ለቅዱስ ጳውሎስ የተለያዩ መታሰቢያዎችን አቁመዋል፡፡ ሊቀ ሐዋርያት ቅዱስ ጴጥሮስና ንዋይ ኅሩይ ቅዱስ ጳውሎስ በስማቸው ጽላት ተቀርጾላቸው፣ ቤተ ክርስቲያን ታንጾላቸው ይታሰባሉ፡፡ በተጨማሪም በቅዱስ ጳውሎስ ስም አንድ መንፈሳዊ ትምህርት ቤት ተከፍቶ እገልግሎት እየሰጠ ይገኛል፡፡ በአዲስ አበባ ከተማ በቅዱስ ጴጥሮስና በቅዱስ ጳውሎስ መታሰቢያ የሚጠሩ ኹለት ታዋቂ የሕክምና ማዕከላት ይገኛሉ፡፡

አምላካችን አግዚአብሔር በሊቀ ሐዋርያት ቅዱስ ጴጥሮስና በንዋይ ኅሩይ ቅዱስ ጳውሎስ ጸሎት ይማረን፣ በረከታቸውም ዘወትር ከእኛ ጋር ትኹን፡፡ አሜን!
የአባቶቻችን ጥርጥር የሌለባት የቀናች ሃይማኖታቸው፣ ድል የማትነሣ ተጋድሏቸው በኹላችን ላይ ለዘለዓለሙ ጸንቶ ይኑር፡፡ አሜን፡፡

546 viewsE, 01:25