#admin專欄 #2020年度漢字 #抗 @windseasonbro

每年年尾，日本都會選出代表該年嘅漢字。日本人尊唔尊重三文魚、會唔會生食女優我唔知道，但可以肯定嘅係佢哋好尊重漢字。

從佢哋保留每年喺京都清水寺公佈「年度漢字」可見一斑。

日本人保留好多唐漢色彩，佢哋嘅姓名都好有唐漢詩情畫意，用字之精細，有時甚至可以從一篇文章零零星星嘅漢字推敲出整篇文章嘅意思。

從一個漢字代表一整年，的確好考功夫，而該漢字要：
1️⃣ 有廣泛認授性
2️⃣ 言簡意賅

本頻道2019年尾進行一個關於2019年度漢字嘅公投，結果係(勇和合體字)跑出，代表2019年。「勇和不分，兄弟爬山」確實代表2019年。

而今年，本頻道亦有2020年度漢字公投，結果係「抗」字跑出。

大家都知道，抗爭早在2020年頭熄滅，但抗疫抗足一整年，所以呢個「抗」字，相信「抗疫」係有一定比例。

然而我深信，大家選抗為年度漢字，亦係「抗極權」嘅「抗」。

「抗」，其實心態上唔係太好。物理有作用力、反作用力，「抗」嘅心態只係為咗抵銷作用力。

「人哋打我兩拳，我擋」只係對抗緊，而唔係還以顏色。

要以超過作用力嘅反作用力還擊，呢種抗先值得加許。香港人嘅反抗，無力感好重，頂多叫做掙扎。

我明白，紙上談兵易，實際報仇難。事實上香港人喺2019、2020年已經反抗到大傷元氣，所以第二名，「傷」都好多人揀。

講返「抗疫」嘅「抗」，其實大家有無Bear in mind做好個人防疫措施？勤洗手、勿捽眼、禁摸臉、戴好口罩、做好個人衛生。

本身年度漢字應該集中講選出嘅「抗」字，但頭四位都好值得講，所以喺度我要講埋。

「韌/撐」：面對打壓，香港人唯有靠韌性撐住。其實呢個好有意思，無論抗爭、抗疫嘅抗，都需要韌性，因為都係長期作戰，因為都係人無事先做到世界冠軍。

「移/ 逃」：香港人， 逃避雖可恥但有用，一時之間嘅逃避同移民，其實都係韌性表現。三十六計走為上着，當中有藍絲有港豬走，但我相信，黃到金嘅手足移民後都唔會忘記香港，總有手足為下一次抗爭而做足準備。

講完2020嘅年度漢字，咁2021年度漢字會係乜字？留返新一年話畀我哋聽。

而家係2021年00時00分，風巴祝大家新年快樂、遠離武肺病魔。呢一分鐘係漫長而又短暫嘅，漫長係因為突然之間你Wtsapp有好多人祝你新年快樂，大家嘅願望都係遠離病魔。可能有好多大媽、長輩會Send長篇大論嘅新年賀文(近年西曆都會有呢d)、花花綠綠嘅Stickers、同以emoji堆砌嘅圖案，但大意都離不開2021年要遠離武肺，要身體健康云云。

而點解話係短暫？就係因為「新年快樂」集中於00時00分，早咗或者遲咗代表你對果d朋友關係唔係最深。而佢哋班友仔用Wtsapp炸 Group，唔可以好似我咁早幾日打定文，Set好時間Post文咁舒舒服服，所以Tg真係好正。

新一年伊始，本Channel又改名做「2021香港天氣及風暴消息(Since 2017)」， 只要你如最初咁一樣繼續跟隨我，我會始終如一咁對你， @windseasonbro 會繼續陪住各位香港人，面對大小風暴。

因為我真係好撚中意香港，你呢？