#投稿

Re: https://t.me/windseasonhk/60844

再進化就會出現 CA3 嘅場面
youtu.be/hZFyJjx8jo4

然後 Spiderman - Far from Home 亦不遠矣

#風巴鳩噏

風巴 @Windseasonbro 最近太忙，寫唔到#Admin專欄 ，長話短說我認為樓價會喺「撤辣」後短期或會升，但中長期跌嘅機會較高。

#Admin專欄 #消費戰 #善用每一蚊港幣唔好北上 @Windseasonbro

最近有幾位Channel友都PM風巴，問我點睇而家北上消費潮，同埋同唔同意喺香港都係等收割，不如北上消費，使費少啲，享受更便宜嘅服務。

首先，我必先同大家講，我係唔會去中国消費的。

最近大家糾結緊復活清明節北上消費嘅數字，其實意義不大。

我假設2019年某月去中国嘅人次為10000000(純假設)，如果而家2024某月去中国嘅人次為11000000，咁係唔係代表多咗10%香港人去中国呢？

唔代表。

我經常同大家講，Statistic係一個不準確而且任由作者演繹嘅藝術，佢可以係一門科學，但更多時係畀人愚弄民眾嘅偽術。

若論人次，就必須考慮2019年前好多走水貨嘅中国遊客，雖然2015年後將一簽多行改為一周一行，即係一個星期只可以出入境一次，不過大家都唔會反對嘅就係2019年或之前中国好多水貨客嚟香港？

水貨客嚟香港，除咗入境就一定有出境，大家可能會話，風巴你戇鳩咗喎，水貨客都唔係計落『香港居民』類別嘅？

我拎下面個例子說明下:

根據報道，截止2023年12月30日，香港居民全年有5334萬人次「北上」。

呢5334萬人次，有幾多係每日150個嘅新移民，大家又知唔知？根本好多水貨客如今已經變成『香港居民』。

香港主權移交中国後呢二十七年，淨係計每日150個中国人，已經有150*365*27=147萬個中国人移民香港，呢條數重未計新移民二代、同埋2019年後香港政府每日招攬280個專材，我保守估計已有250萬人係親中中国香港人。

呢250萬中国人，只要每人一年去中国20次，已經Cover到2023年5334萬人次「北上」嘅紀錄。

當然，我認為最近一兩年的確係有好多香港人貪新鮮／慳錢而去中国旅行，但你話數字反唔反映到真實情況，我認為有吹大嘅情況。

自梁振英做特首起，中国一直想推大灣區生活圈，想將香港嘅剩餘價值帶去深圳以至其他中国城市。

有常識嘅都會知道，深圳嘅堀起係基於佢地理上接近香港，其實八九十年代都會有港奸北上消費，所以深圳快速堀起。

誠然，近年點解好多香港人（非小粉紅）都會上中国消費，的確對家嘅場更大，而且無視知識產權，政府唔會處理版權問題，而只會派香港喺香港捉Partyroom K房系統侵權、業主不肯減租下所有新興玩意如密室逃脫都被打壓得難以營運。

好多人將其歸究於地產霸權，但我唔認為淨係地產商造嘅孽。

講咗呢堆背景，原諒我最近有要事忙，唔得閒修正文章，可能會有啲亂，東一忽西一忽，原諒下我。

我認為，唔應該因為生活成本上漲而去中国消費。
我認為，唔應該因為生活成本上漲而去中国消費。
我認為，唔應該因為生活成本上漲而去中国消費。

呢幾年，我仍然到訪某些香港本土嘅餐廳、或者支持某些理念相同嘅各種公司，大家可能會講，2024年重講乜黃店吖，但我唔同意，我認為每個香港人嘅每一蚊都係好重要。

我唔係要大家好似2019咁一大堆人去光榮冰室使錢買理念；
我理解某些黃店出品並唔係好理想；

不過，呢個香港重有好多光譜，並唔係話黃一定唔好味就要食藍店。

以我所知，某啲舖頭喺2019年時係暗黃，唔會話自己係黃，有實際捐錢同埋默默支持，呢類舖頭，起碼唔係對家。

而喺2023-2024年，香港各地有好多唔同嘅中資餐廳及茶飲店開舖。

我認為你唔選擇食呢啲餐廳，繼續支持香港細舖頭已經係幫到香港。

如果你想減少消費，平日大可以餐餐食兩送飯，Happy Friday就使錢去偏黃嘅餐廳。

而XX螺絲粉/XX手打檸檬茶你一次都唔幫襯的話，對家都唔會多咗生意。

消費戰下，多你一個就會好撚多。

你想香港多咗川菜、螺絲粉呢啲劣食，定係支持香港繼續保持原來香港面貌嘅餐廳？

講返，我並唔支持啲人所謂攬炒香港而上中国消費。

你要攬炒，就去日韓臺消費。
你要食好嘢，就去日本食嘢。

去中国消費唔喺香港消費就係攻擊到對家？
根本就係Nonsense。

你每去一次中国商場唱K、打邊爐之類，
你就愈來愈中国人。

如果因為窮，我會選擇喺香港食兩送飯，
一年咪去三次日本感受下豪使嘅感覺，
起碼我去日本使每一Yen，
都係對得住自己良心同埋支持應該支持嘅企業。

如果你貪平上中国飲飲食食，
恭喜你，
你全家都只會係中国人。

我只得一個身份，
我係香港人。
只要我人喺香港，
我只會食黃店／非黃但亦非藍中立店如壽司郎。

藍店？不了；
元氣？不了；
去中国食海底撈？不了。
喜茶、蜜雪冰城？不了。

因為我係香港人。

你呢？

#Admin專欄 #垃圾徵費會否壽終正寢？ @Windseasonbro

#TLDR: 風巴 @Windseasonbro 認為，香港政府會擱置2024年8月1號實施嘅垃圾徵費。

2021年8月，香港政府立法會喺無反對派情況下通過咗垃圾徵費。

唔好爭拗鄭松泰係唔係反對派先，事實上佢做樣又好，真係反對又好，佢的而且確無投贊成票。

而喺政府呢兩年大力宣傳下，本身喺2023年12月就要實行嘅垃圾徵費政策一度延遲於2024年4月1號實施，結果喺2024年年初宣佈呢個愚民政策由4月1號改為8月1號推行。

執筆之時，建制派之中有兩股聲音出嚟，一個就係以環保人士為首，建制為輔嘅講法：『垃圾徵費討論咗二十年，已經有足夠討論嘅時間，唔應該再拖。』而另一把聲音就係商界嘅講法：『香港經濟轉差，而垃圾徵費配套措施不足，勞民傷財，應該要等經濟轉好先重新考慮。』

其實呢壇嘢都係玩死自己，今日香港經濟差就係事實，如今連垃圾都徵費，喺消費者層面只會愈來愈唔願意消費。

百物騰貴，連可樂都加價，一排8罐嘅可樂喺百佳都要40蚊一排，即係5蚊一罐。

當然，垃圾徵費就係鼓勵人去做垃圾分類回收垃圾，但問題就係配套成唔成熟先？誠如我之前Admin專欄所言，所謂嘅分類去到收集層面有無再次撈埋一齊先？

如果係認真做，唔係鳩做嘅話，我認為大可以推行如下嘅垃圾回收時間表：

鋁罐星期一：政府派員或外判到每個屋苑淨係收集鋁罐，然後集中處理。

廢紙星期二: 政府派員或外判到每個屋苑淨係收集廢紙，然後集中處理。

膠樽星期三: 政府派員或外判到每個屋苑淨係收集膠樽，然後集中處理。

膠飲管星期四: 政府派員或外判到每個屋苑淨係收集膠飲管，然後集中處理。

如此這般，假設星期1234567各有主題，而廚餘就日日回收，全民參與度會更高，而且大家無咁抗拒就會建立到回收嘅習慣。

可以進行啲全港比賽，例如4月份全港公屋回收大賽，以每幢屋苑為單位，單一個月份嘅回收量最高嗰10%嘅公屋可以免租一年的話，我包保班窮人免費幫你去垃圾分類。

當然，政府唔會咁做，原因就係垃圾徵費係收入之一，係稅嚟。

而我認為居屋甚至私人樓都可以效法有呢類比賽，免差餉或者代交管理費之類，Positive Feedback點都好過Negative Feedback。

Negative Feedback只會令所有人都唔願意喺香港消費，窮撚而又無骨氣自認為自己係中国人嘅可能去中国，而正常嘅人就會去日韓臺消費。

我認為，喺中国都重未實行垃圾徵費嘅2024年，香港政府唔會真正實行垃圾徵費，最近官員傳出嚟風聲似乎係為撤回垃圾徵費做一個下臺階。

可以見得？政府係有意想將每日150個新移民及280個專材取代移民或留港嘅香港人，而同時2023至2024年代全港都有好多唔同大大小小嘅中資茶飲店甚至食店嚟香港開舖，佢哋嘅Target Customer唔係香港人，而係呢班所謂港漂，長遠嚟講就係將香港人嘅價值觀扭轉，口味改變至跟中国人一樣。

所以喺呢個時候，政府唔會想增加食肆成本而令到呢啲食肆執同埋令到班港漂選擇離開香港，因為港漂先可以養到班中資酸菜魚店、螺螄粉店。

我認為，香港政府會擱置2024年8月1號實施嘅垃圾徵費。

而紙餐具紙飲管取代膠餐具膠飲管就係惟一會實施嘅措施。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)

正如我呢篇 admin專欄 所講，環團或政府都想做呢種鳩屎嘢。

大家可以再重新睇我有關環保政策嘅幾篇 #Admin專欄。



透過 HKG 分享一則貼文：環團：8月後到商場丟家居垃圾犯法 建議商場派員或CCTV監察垃圾桶
https://forum.hkgolden.com/thread/7808722/page/1

#Admin專欄 #環保塔利班走塑派膠 #環保爭議 #香港就係一個笑話 @Windseasonbro

香港時間尋日(25/04/2024)環保署『綠色餐具平台』邀請供應商示範使用環保匙羹、刀、叉、紙飲管，其中一間使用竹材料嘅供應商喺用刀叉切牛排時，喺一分鐘內整斷兩枝叉；及後用匙羹𢳂飯時𢳂咗好耐都未𢳂到嚿飯；想飲茶飲時，紙製品篤唔穿塊膜。

影片顯示該員工整斷第一枝叉後想自圓其說：『切到牛排啲筋』；第二枝叉都斷時，再講：『可能同事玩過啲刀叉』、『啲環保餐具擺得太耐』；𢳂唔到嚿飯又賴：『啲飯擺得太耐，太硬』；紙飲管插唔入茶飲塊膜時又話自己太緊張。

如此這般，我哋可以睇到理應教我哋點樣走塑嘅環保供應商不斷派膠，呢種仿似上世紀九十年代港產片或者千禧片代網路上笑片嘅情節，去到２０２４年嘅今日不斷上演緊。

我重複，我本人係極之支持環保，不過我反對一刀切推行垃圾徵費以及走塑行動。

如果大家真係關注環保，不如留意下政府為咗發展新田落馬洲發展，而放棄米埔濕地自然保育區，嗰份好有問題嘅環評重好啦。

如果綠領行動真係關注環保，不如你反映下米埔濕地嘅重要性?

嗱，我知道環保組識都有聯合出聲，但係足唔足夠呢?

政府為咗發展新田落馬洲，須要填平90公頃嘅漁塘，呢度嘅生態就唔係生態？

2024年嘅今日，點解環保人士咁黑人憎？就係因為雙重標準。

早期佢哋會話海龜個鼻畀飲管插住，所以要人捐款去佢哋所屬嘅NGO(Non-Government Organization)，但係捐咗錢，有幾多係落入行政費，有幾多係真真正正幫到班動物？

誠如好多連登仔所講，環保唔係淨係Prevent同Reduce，Reuse同Recycle都重要，香港政府早一兩年趕走咗Mil Mill喵坊去新加坡，環保人士有無出過聲？

疫情期間，香港七百五十萬人，維持咗三年嘅防疫口罩令，為方便計算，我當由2020年至2023年，每人一日戴兩個嘅計算方法，即係3x365x2x7500000=16425000000，即係164億2千5百萬個口罩。

口罩係石油副產品，嗰度就唔係浪費?海龜唔會被口罩包撚住個鼻窒息而死？

如果香港要推行環保，我認為係從教育同配套著手，我知道環保人士可能會話，都教育咗廿幾三十年啦，無得再拖，不過我好肯定同大家講，2024年嘅今日連班環保撚好多都唔明白乜嘢叫環保。

好多環保人士都話，膠製品好多膠，影響生態。

膠製品係多膠，係有問題，不過紙製器都有好多防水膠Coating，更多『微塑膠』Disolve喺啲紙杯度，啲人唔經唔覺飲咗好多落肚重仆街，唔使經過Food chain，直接就食撚咗落肚。

2. 基於1，所以應該先要訂立一個好理想嘅規格同標準（例如紙飲管10分鐘內唔會變軟，紙飲管唔會釋出有毒物質），然後要建立實驗室，又或者食安中心定期抽查市面上嘅走塑紙製品係唔係合副使用要求，例如紙杯加熱會唔會釋放出有毒物質？例如紙叉、木匙羹會唔會好易斷，唔Proper使用？

然後政府應該要從市面下游層面抽查，再去要求上游供應商改善質素，例如政府資助佢哋用新技術降低成本去做高質素嘅走塑餐具，例如澱粉餐具之類。

同時，唔應該期望0塑膠，坦白講好多時環保撚適得其反，我用膠餐具做例子，以前我一買外賣，如果有膠餐具，我都會儲埋盡量重用，例子有飲熱檸水時畀我篤檸檬個膠匙羹，我會盡量重用嚟食Yoghurt又好，食雪糕又好，食甜品又好(某啲牌子有段時間無提供)，而且我用完都會洗一洗，晾乾後下次使用前可以洗一洗再使用。

呢種咪就係Reuse，呢種咪係環保囉。

而同時，木製餐具例如筷子，質素良秀不齊，好多時都有發霉或者過度使用漂白劑，所以喺好長一段時間我都無用嚟食嘢，盡量一個匙羹食完個外賣就算。

如果未計食物安全，盲目追求環保，使用唔及格嘅塑膠取代品，咁人類都係自取滅亡。

過往我如果喺屋企食外賣，我通常都唔會拎膠餐具，但呢個香港有好多人都要嗌外賣，例如地盤班建築工人，人哋已經做到身水身汗，重要畀班環保塔利班叫佢哋用洗潔精洗餐具，大佬啊，唔係個個地盤都有Office。

今次講到呢度，我只可以想講，環保同非環保人士唔係二元對立，我哋無完全環保唔等於無對環保付出，如果你哋班環保撚睇唔過眼，唔該屌咗班去香港郊野公園行山無『自己垃圾自己帶走』嘅中国人先，唔該晒。

真正嘅環保應該係教育同科研。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)

#風巴生活逸事 #凍檸茶 @Windseasonbro

如果要喺茶餐廳揀一款我永遠唔厭嘅餐飲，一定係凍檸茶。

對風巴嚟講，一杯好飲嘅凍檸茶一定會將一個用餐體驗昇華。我可以忍受個飯難食，但凍檸茶一定唔可以難飲。

據聞凍檸茶係由英國引入香港，呢個亦係我愛祖國嘅其中一個原因，蛋撻同凍檸茶，就係香港享譽美食天堂嘅其中一個例子。

所以我唔中意飲茶食點心，因為無得飲杯凍檸茶。記得以前細個未興飲少甜走甜嘅凍檸茶前，都有好多過甜嘅凍檸茶。

喺而家嘅角度睇當然係難飲，因為只要你習慣每餐嗌走甜之後，唔使講『正常甜度』，就連『少甜』都係一種罪過，而除咗罪過之外，你會習慣咗少甜嘅甜度，而非『正常甜度』嘅一味死甜。

真正好飲嘅凍檸茶，就係取決於有無靚茶膽、芳香檸檬以及適合比例嘅甜苦酸香味。

甜、苦、酸不能太Chur，三者都要淡淡然，因為最出嘅應該要係檸檬嘅芳香。

講到呢度，我就回憶起細個嗰時唔中意篤檸檬，飲咗好多年凍檸茶都係白飲，直到少年時朋友提醒我每次同我飲凍檸茶都唔篤檸檬只係飲紅茶，唔係飲緊凍檸茶，我先意識到自己一直以來都無好好品嚐過呢種受到英國影響多年嘅香港特色飲品。

無意貶低奶茶咖啡，但相比下，檸茶嘅解渴功效實在好得多，而汽水更加係無得比，所以喺一年365日之內，我飲得最多嘅就係凍檸茶。

所以2019年前未有黃藍時，我已經唔中意百分百、意樂之類餐廳，佢哋嘅凍檸茶太爛，根本就唔係凍檸茶，枉論2019年後，我一次都無食過佢哋。

黃藍是政見，侮辱凍檸茶更加係無良知。

我記憶中飲過最好飲凍檸茶嘅餐廳，食物質素通常都唔差，印象中最好飲都係大排檔沖出嚟嘅凍檸茶，可惜2024年嘅今日大排檔賣少見少，記憶中嘅味道難以重現。

好飲嘅爆檸，茶底通常唔會反，清新、清澈而混合一年四季不同產地嘅檸檬茶，而玻璃杯、不鏽鋼杯各有風味，膠杯則為下品。

最欣賞就係不計成本嘅大杯裝，曾經有餐廳推出過啤酒杯凍檸茶，當然要配合埋用大冰定碎冰先好飲，近年碎冰檸檬茶，因為Surface Area增加，凍檸茶更加凍，更加提神醒腦消暑解渴。

講到呢度，我好掛住香港嘅凍檸茶，你呢？

我記得每次去完旅行嘅時候，我最掛住香港嘅一樣嘢就係香港嘅檸檬茶。

我想同大家講嘅係，無論而家中国產鴨屎香檸檬茶有幾強勢都好，我只會中意英屬香港嘅港式凍檸茶，因為我係香港人，你呢？

如果你哋中意風巴分享生活上嘅點滴，就幫我睇晒我嘅 #風巴生活逸事 同埋 #Admin專欄 ，同埋幫我搵你生活上認識嘅三個人一齊玩TG Follow 風巴呢個Channel @Windseasonhk

如有投稿，請以以下格式投稿:

#投稿
#XXXXXXXXXXXXXX

然後先寫你想投稿嘅嘢

#Admin專欄 #唔好用啲綠色垃圾徵費袋污染地球
@Windseasonbro

一如風巴同大家所料，政府第三度暫緩垃圾徵費，然而政府稱將來仍有可能徵費，而環保機構亦伺機而動。

我再三強調風巴都係一個愛環保同大自然嘅人，只係唔愛環保機構。如果環保機構口口聲聲話要為香港未來嘅環境舖路，又點睇一個不織布袋相比一個傳統膠袋需要更多時間分解？而香港人好多都唔止一個不織布袋。

而傳統喺超級市場上隨手拎到嘅膠袋，係「低密度聚乙烯」（LDPE），如果由生產開始計到日常使用者使用，相比會重用一次嘅普通膠袋，一個不織布袋要重用數以數千計先可以略勝，如果普通膠袋重用三次以上，用不織布袋代替普通膠袋會比較環保嘅說法係絕對唔成立。

木餐具環保嗎？好視乎用乜木材，我記得以前用過某品牌嘅A4紙，包裝上寫住係用比起其他A4品牌的木材生長得較快嘅樹木。

好簡單，假設而家有樹木A同樹木B，樹木A生長速度快，每年就生到可以生產出二十疊A4紙嘅木材；而樹木B則生長速度慢，每年只可生到可以生產出十疊A4紙嘅木材，咁大家好自然就會大量種植樹木A，起碼唔會砍伐兩倍嘅樹木。

但環保係唔係剩係睇樹木生產速度呢？答案係錯嘅，因為我哋都要睇下棵樹上面嘅生物，例如樹木A有瀕危物種喺上面生活呢？例如好似尤加利樹同樹熊咁。

所以要用木餐具，唔一定等於環保。大家都知道塑膠係石油副產品，係碳鏈產物，某程度上塑膠係儲緊碳喺個膠餐具上面，令到大氣少啲二氧化碳。

如今環保機構係叫人唔好用可以儲碳嘅膠餐具，而使用生產自可吸收二氧化碳嘅樹木製木餐具，咁樣叫做環保咩？

就好似我上面所述，只要你每個普通膠袋重用三次左右，其實點都好過用不織布袋，你諗下，有時用咗半年左右個不織布袋其中一邊就會斷，成個袋就唔用得，但佢個製造時產生嘅環境問題、分解時間遠遠比普通膠袋多幾百至幾千倍。

膠袋、膠餐具係石油副產品，除非有一日世界完全唔用石油，否則佢唔用嚟製造膠餐具都會喺地球上存在，環保左膠成日講電能環保乜乜柒柒，但除咗核能、太陽能、風能、潮汐能或水力發電等等之外，好多時電都係由石油副產品生產出嚟，香港嘅中華電力就係用天然氣生產電。

上述例子只係冰山一角，根本環保撚就唔撚識環保，我認為膠袋膠飲管出現喺海龜個鼻度，咁係應該做好啲垃圾管理而唔係做埋啲戇鳩嘢笠多個膠袋，咁只不過係請隻海龜食多一個膠袋，有撚用咩？

再講，某国人搞到全地球啲生物食咗幾年口罩，嗰度幾萬億至十萬億口罩又點計？班撚屌環保機構有無講過一句嘢？口罩係不織布咪又係石油副產品？要分解幾多年，有無人現實識何漢威條撚樣，叫佢幫我哋計下？

我應該真正嘅環保係靠大家做好垃圾重用、分類同回收，政府同環保機構蠢蠢欲動，打算某年某月再推垃圾徵費，所以我認為大家唔應該拎同用佢啲指定袋，唔應該畀佢哋講『都有好多市民響應使用指用袋，認為時機成熟，應重推垃圾徵費』。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)

#Admin專欄 #文字的意義 #網路上文字交流不要只圍繞兩性 @Windseasonbro

睇呢篇文章之前，問問大家一個問題：如果內容一樣，你中意閱讀文字，抑或睇影片？

如果畀我揀，我大部分時間都中意文字，最近要搵某啲資訊性高啲嘅嘢搵撚到躁咗，唔明點解而家網上面愈來愈少文字描述，愈來愈多影片。

風巴細個好中意睇金庸武俠小說、某些不知名作家嘅遊記，透過文字描述，去投入作者嘅世界觀，其實呢件事好浪漫。

坐熱狗巴士、地鐵、同學屋企睇漫畫；同屋企人邊飲茶邊睇報紙／小說；去髮型屋隨手就拎本老夫子或者潮流雜誌，當年嘅娛樂雖然都可以離開文字，不過閱讀嘅風氣一定比今日盛行。

當然，影片都有佢嘅好處，但有時當你要靠睇影片去搵一啲好Informative嘅嘢就好麻煩。

我舉例，以前靠口耳相傳或者遊戲雜誌嘅攻略言簡意賅，有啲可能要靠圖片輔助，但今日如果你玩啲少少複雜嘅手機Game(唔係課金篤幾下手指就贏嗰啲)，你多多少少都要睇下Youtube介紹，但有時啲Youtuber良莠不齊，又未必好快講到個重點，又或者調返轉太多嘢講，40分鐘嘅攻略你都幾難搵到你想要嘅資訊。

但如果係文字攻略呢？Ctrl+F就立即Search到Keyword，可能一兩分鐘就搵到自己想要睇嘅嘢，慳咗唔少時間。所以我一直唔明點解大家唔可以Promote文字與影片並存？

同時我留意到網路上愈來愈少分享，愈來愈多晒命，又係另一命題，最近好多人玩Thread，算係有少少復興咗舊網路世界嗰種用文字交流同分享嘅生態，不過內容又係圍繞兩性關係，其實好唔健康。

點解乜嘢都係停留喺食、色呢兩個議題？

上一上各大討論區，往往最多人討論就係『邊個邊個女仔好靚』、『男女出軌』，無錯係好Juicy，不過可唔可以唔好只係限於討論呢啲層次？

以前睇書，我真係感受到上一代文化人想流傳畀下一代乜嘅文化價值，而而家好多人嘅價值觀都好錯，書本嘅價值可能只係在於影完相放上IG然後打兩句就當自己係文青。

更甚者就係如上文所述，只充斥飲飲食食、偷情、研究公眾人物私事...其實好無謂。

不如由今日開始，復興文字嘅價值。

對上一次睇書係幾時？不妨去獨立書店，揀一本自己有興趣嘅書睇下。

然後不妨由日記／周記型式紀錄自己嘅生活，你會發現，透過文字你會認識唔一樣嘅自己。

而且亦透過文字，你會反思到好多平時忽略嘅問題。

今次就講到呢度，我知道自己文筆拙劣，希望大家都有所得着啦。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)

#Admin專欄 #反思總統行刺陰謀論 @Windseasonbro

TLDR：呢篇文章並唔係寫或者支持總統行刺陰謀論，而係反思一下點解咁多人相信呢啲陰謀論？

Donald Trump喺賓州(Pennsylvania)出席拉票活動時遭槍擊受傷，凶手其中一發子彈喺Trump耳側擦過，Trump受傷後自然反應係伏低迴避，但好快就企返喺身，然後舉起拳頭示眾，背後嘅美國旗同埋身邊嘅保鑣，形成一幅歷史性照片。

如此有氣勢嘅一個前美國總統，喺中国小粉紅、中国香港某啲五毛嘅眼中，係『自編、自導、自演』，無它，因為佢哋以小人之心度君子之腹。

其實風巴嘅論點唔算獨特，喺各大論壇包括連登都好多人講同一論點，就係『點會有人為咗選擇造勢而選擇叫個鎗手瞄準個頭，然後子彈僅僅擦過耳邊，咁高風險嘅造法？』

事實係Donald Trump演說期間不時擰頭，然後鎗手先射唔中佢，佢避開刺殺後，亦企喺身舉起拳頭，顯示出佢係一個天選之人(姑勿論佢嘅政見係唔係Fit for大眾，Trump做人係有PR，而且不畏懼敵人呢一點正正就係其中一種american dream)，大家諗下，如果美國喺被日本偷襲珍珠港之後縮沙，後來嘅歷史軌跡就會好唔同，Donald Trump被襲後特工射殺鎗手就好似當年美國珍珠港受襲再反擊
日本一樣。

我係好反對小粉紅式嘅陰謀論，我成日都講，如果對於涉及自身健康嘅疫苗，有所合理懷疑唔係『陰謀論』；而對於政治，對於某些有誠信嘅國家同領導人，佢哋所面對嘅刺殺或者受害，我哋唔應該太多陰謀論。

喺度可能有人覺得風巴雙重標準，不過我可以同大家講，即使同樣都係未有實際證據證明，『疫苗風險』嘅『陰謀論』點都合理過『自導自演』嘅『美國陳水扁』論。

Donald Trump受襲後在場嘅特工射殺鎗手，立即講畀全世界聽，偷襲美國嘅下場就係死路一條；想知道小粉紅，如果某国嘅領導人被偷襲，會唔會狼狽倒地同示弱呢？

我總覺得歷史事件唔會只係出現一次，當然有可能有仿傚者再次刺殺Trump，亦有可能有其他国家嘅仿傚者刺殺其他国家領導人，你覺得呢？

呢種鳩估，唔係陰謀論，陰謀論係無證無據下講到似層層，眾人皆醉我獨醒咁，而我呢種鳩估擺到明就係鳩估。

其實Donald Trump真係好撚型， #風巴鳩估 佢2024年可以重奪美國總統之位，你同意嗎？

支持Donald Trump係一件合理嘅事，點都好過戀童失憶廢老拜登啦？

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel ❤️ @Windseasonhk ，並叫多兩個朋友玩TG Follow風巴，感謝=)